សឿន សំណាង - La Reine Media

ក្រុមគុនល្បុក្កតោជម្រើសជាតិវៀតណាម នឹងទទួលបានរង្វាន់បន្ថែម ពេលដណ្ដើមបានមេដាយ

ដំណឹងល្អបានលេចឡើងសម្រាប់កីឡាករនៃក្រុមគុនល្បុក្កតោជម្រើសជាតិវៀតណាម គ្រាដែលនៅសល់មិនដល់ពីរសប្ដាហ៍ទៀតប៉ុណ្ណោះ ស៊ីហ្គេមលើកទី 32 នឹងត្រូវបានសម្ពោធបើកការប្រកួតនៅកម្ពុជា។

ដំណឹងល្អខាងលើ នោះគឺអត្តពលិកដែលដណ្ដើមបានមេដាយមាសក្នុងវិញ្ញាសាប្រកួតក្បាច់គុនល្បុក្កតោនៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍នៅកម្ពុជា នឹងទទួលបានប្រាក់រង្វាន់ 20 លានដុង ពីសហព័ន្ធកីឡាគុនបុរាណវៀតណាម។

លោក ង្វៀន ង៉ុកអាញ់ ប្រធានសហព័ន្ធកីឡាគុនបុរាណវៀតណាម បានឱ្យដឹងថា «ដើម្បីគាំទ្រ និងលើកទឹកចិត្តដល់អត្តពលិកនៃក្រុមកីឡាគុនល្បុក្កតោជម្រើសជាតិវៀតណាម សហព័ន្ធក្បាច់គុនបុរាណវៀតណាម នឹងផ្ដល់ប្រាក់រង្វាន់ 20 លានដុង (ជាង 850 ដុល្លារអាម៉េរិក) ដល់អត្តពលិកម្នាក់ៗដែលដណ្ដើមបានមេដាយមាសក្នុងវិញ្ញាសាប្រកួតក្បាច់គុនល្បុក្កតោនៅស៊ីហ្គេមលើកទី 32»។

យោងតាមសារព័ត៌មានវៀតណាម ការលើកទឹកចិត្ត ក៏ដូចជាការប្រកាសផ្ដល់រង្វាន់ទាន់ពេលនេះនឹងក្លាយជាការជំរុញដ៏សំខាន់ដើម្បីឱ្យកូនសិស្ស និងគ្រូបង្វឹករបស់ក្រុមគុនល្បុក្កតោជម្រើសជាតិវៀតណាម ឆ្ពោះទៅរកលទ្ធផលល្អក្នុងការប្រកួតស៊ីហ្គេមនៅកម្ពុជា។

អត្តពលិកដែលដណ្ដើមបានមេដាយមាសក្នុងវិញ្ញាសាប្រកួតក្បាច់គុនល្បុក្កតោនៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍នៅកម្ពុជា នឹងទទួលបានប្រាក់រង្វាន់ 20 លានដុង

លោក ឡេ កុងប៊ុត ប្រធានក្រុមគ្រូបង្វឹករបស់ក្រុមគុនល្បុក្កតោវៀតណាម បាននិយាយថា «តាមការកំណត់ អត្តពលិកម្នាក់ៗដែលចូលរួមប្រកួតនៅស៊ីហ្គេម នឹងទទួលបានប្រាក់រង្វាន់ 45 លានដុងសម្រាប់មេដាយមាស, 25 លានដុងសម្រាប់មេដាយប្រាក់ និង 20 លានដុងសម្រាប់មេដាយសំរឹទ្ធ»។

វិញ្ញាសាគុនល្បុក្កតោរបស់កម្ពុជា ថ្វីបើទើបតែមានវត្តមានជាលើកដំបូងក្នុងព្រឹត្តិការណ៍ស៊ីហ្គេម ប៉ុន្តែតាមគម្រោង នឹងមានប្រាំក្រុមចូលរួមប្រកួតដណ្ដើមមេដាយចំនួន 19 គ្រឿង។

យោងតាមកាលវិភាគនៃការប្រកួតនៅស៊ីហ្គេមលើកទី 32 វិញ្ញាសាគុនល្បុក្កតោនឹងសម្ពោធបើកការប្រកួតនៅថ្ងៃទី 05 ឧសភា ហើយចាប់ផ្ដើមការប្រកួតពីថ្ងៃទី 06 ដល់ 14 ឧសភា 2023៕

April 24, 2023

រថយន្តអគ្គិសនីអាចជួយឱ្យអ្នកសន្សំសំច័យប្រាក់បានចាប់ពី 6,000 ដុល្លារអាម៉េរិក

យោងតាមការស្រាជ្រាវមួយតាំងពីឆ្នាំ 2020 របស់ Consumer Reports ម្ចាស់រថយន្តអគ្គិសនីអាចសន្សំសំច័យប្រាក់បានចាប់ពី 6,000 ដល់ 10,000 ដុល្លារអាម៉េរិក នៅក្នុងមួយអាយុកាលរបស់វា បើធៀបនឹងរថយន្តដែលប្រើតែម៉ាស៊ីនចំហេះក្នុង។

Chris Harto អ្នកវិភាគគោលនយោបាយថាមពល និងគមនាគមន៍ជាន់ខ្ពស់របស់ Consumer Reports បានឱ្យដឹងថា ចាប់តាំងពីការស្រាវជ្រាវនោះត្រូវបានប្រកាស រថយន្តអគ្គិសនីជាច្រើនបានថោកជាងមុន ហើយរថយន្តម៉ាស៊ីនសាំងប្រែជាថ្លៃជាងមុន។

នៅសហរដ្ឋអាម៉េរិក ច្បាប់កាត់បន្ថយអតិផរណាដែលលោក ចូ បៃដិន បានចុះហត្ថលេខាកាលពីឆ្នាំ 2022 បានពន្យារពេលឥណទានពន្ធសម្រាប់រថយន្តអគ្គិសនីថ្មីរហូតដល់ឆ្នាំ 2032។ ការផ្ដល់ជូនដែលមានតម្លៃឡើងដល់ 7,500 ដុល្លារនេះ រួមនឹងការកំណត់ស្ដីពីស្ដង់ដាមួយចំនួនទៀត បាន និងកំពុងរួមចំណែកធ្វើឱ្យតម្លៃរថយន្តអគ្គិសនីកាន់តែធូរថ្លៃ។

នៅពេលប្រៀបធៀបអំពីការចំណាយសរុបក្នុងពេលប្រើប្រាស់ គេឃើញថា «ជាមធ្យម រថយន្តអគ្គិសនីតែងតែល្អជាងបើធៀបនឹងរថយន្តម៉ាស៊ីនចំហេះក្នុង» នេះបើតាម Debapriya Chakraborty សេដ្ឋវិទូ និងជាជំនួយការផ្នែកស្រាវជ្រាវនៅមជ្ឈមណ្ឌលស្រាវជ្រាវលើរថយន្តអគ្គិសនីរបស់សាកលវិទ្យាល័យ Chicago និង The Associated Press បានឱ្យដឹងដូច្នេះ។

ក៏ប៉ុន្តែ នៅមានកត្តាមួយចំនួនដែលអាចធ្វើឱ្យលទ្ធផលខាងលើមានការប្រែប្រួលសម្រាប់មនុស្សម្នាក់ៗ ក្នុងនោះមានដូចជាកត្តាតម្លៃអគ្គិសនី និងសាំងក្នុងតំបន់, ប្រសិទ្ធភាពរបស់ឆ្នាំងសាកថ្មតាមផ្ទះធៀបនឹងស្ថានីយសាធារណៈ, ម៉ូដែលរថយន្ត និងរយៈចម្ងាយនៃការបើកបរ។ល។

ទោះជាយ៉ាងណាក៏ដោយ បើយោងតាមលទ្ធផលនៃការសិក្សាស្រាវជ្រាវមួយរបស់សាកលវិទ្យាល័យ Michigan ដែលបានប្រកាសកាលពីខែមករាកន្លងទៅ ការប្ដូរមកប្រើប្រាស់រថយន្តអគ្គិសនីនឹងជួយសន្សំសំច័យឥន្ធនៈជាមធ្យមបាន 55% សម្រាប់អតិថិជននៅទូទាំងសហរដ្ឋអាម៉េរិក។ ការស្រាវជ្រាវនេះក៏បានបង្ហាញថា 90% នៃគ្រួសារនៅសហរដ្ឋអាម៉េរិក នឹងកាត់បន្ថយឧស្ម័នផ្ទះកញ្ចប់ដែលពួកគេបំភាយផងដែរ៕

April 24, 2023

ទ្វីបអឺរ៉ុបសាងសង់ប្រព័ន្ធម៉ាស៊ីនបង្កើននៃភាគល្អិតមានថាមពល «ខ្លាំងស្មើនឹងរន្ទះបាញ់ដប់លានគ្រាប់»

អង្គការស្រាវជ្រាវនុយក្លេអែរអឺរ៉ុប កំពុងអនុវត្តជំហានដំបូងៗដើម្បីសាងសង់ម៉ាស៊ីនបង្កើនល្បឿនភាគល្អិតមានថាមពល (energy particle collider) ខ្នាតយក្សថ្មី ក្នុងគោលដៅស្រាវជ្រាវផ្នែកវេជ្ជសាស្ត្រ និងព្យាបាលជម្ងឺមហារីក។

Future Circular Collider (FCC) នឹងមានបរិមាត្រវែងជាងបីដងធៀបនឹង LHC ដែលជាម៉ាស៊ីនបង្កើនល្បឿនភាគល្អិតមានថាមពល ដែលធំ និងខ្លាំងបំផុតលើពិភពលោកនាបច្ចុប្បន្ន ត្រូវបានសាងសង់ឡើងដើម្បីស្វែងយល់អំពីអាថ៌កំបាំងស្ដីពីយន្តការចក្រវាល។ ម៉ាស៊ីនបង្កើនល្បឿនភាគល្អិតមានថាមពល FCC នឹងស្ថិតក្នុងផ្លូវរូងក្រោមដីនៃប្រទេសបារាំង និងស្វ៊ីស ហើយមានប្រវែង 91 គីឡូម៉ែត្រ និងទំហំមុខកាត់ប្រហែលប្រាំម៉ែត្រ។ នេះបើតាម Phys.org ចុះផ្សាយកាលពីថ្ងៃទី 22 មេសា។

យោងតាមអង្គការស្រាវជ្រាវនុយក្លេអែរអឺរ៉ុប (CERN) គោលបំណងរបស់ FCC គឺការជំរុញថាមពល និងកម្លាំងរបស់ម៉ាស៊ីនបង្កើនល្បឿនភាគល្អិតមានថាមពល ឱ្យសម្រេចបានថាមពលនៃការប៉ះគ្នាឱ្យឡើងដល់ 100 teraelectronvolt ដែលស្មើនឹងរន្ទះបាញ់ដប់លានគ្រាប់។ ផ្លូវរូងនេះស្ថិតនៅក្នុងទីក្រុងហ្សឺណែវ ប្រទេសស្វ៊ីស និងក្បែរតំបន់ Annecy របស់ប្រទេសបារាំង។ មូលដ្ឋានវិទ្យាសាស្ត្រ និងបច្ចេកទេសចំនួន 8 នឹងត្រូវបានសាងសង់នៅលើដី ក្នុងនោះមាន 7 នៅក្នុងប្រទេសបារាំង និងមួយនៅក្នុងប្រទេសស្វ៊ីស។ ក្រោយពីការសិក្សាលំអិត ប្រទេសចំនួន 22 ដែលជាសមាជិករបស់ CERN នឹងធ្វើការសម្រេចចិត្តថា តើអាចសាងសង់ FCC ក្នុងរយៈពេលពី 5 ទៅ 6 ឆ្នាំទៀត ឬអត់។

FCC នឹងបង្កើនល្បឿនរបស់អេឡិចត្រុង និងប៉ូស៊ីត្រុង (electron and positron) រហូតដល់ឆ្នាំ 2060 ហើយក្រោយមកនឹងបង្កើនល្បឿនរបស់ហាដរ៉ុន (hadron) រហូតដល់ឆ្នាំ 2090។ ប្រព័ន្ធម៉ាស៊ីននេះនឹងស្វែងរកចម្លើយដើម្បីតបទៅនឹងសំណួរជាច្រើនដែលមិនទាន់មានចម្លើយនៅក្នុងវិស័យរូបវិទ្យាមូលដ្ឋាន។ បច្ចុប្បន្ន ម៉ាស និងថាមពលប្រមាណ 95% របស់ចក្រវាល មិនទាន់ត្រូវបានគេស្គាល់នៅឡើយ។

អំពីអង្គការស្រាវជ្រាវនុយក្លេអែរអឺរ៉ុប (CERN)

ម៉ាស៊ីនបង្កើននៃភាគល្អិតមានថាមពល LHC របស់ CERN មានបរិមាត្រប្រវែង 27 គីឡូម៉ែត្រ និងជម្រៅប្រហែល 100 ម៉ែត្រក្រោមដី ធ្លាប់ត្រូវបានប្រើប្រាស់ដើម្បីបញ្ជាក់អំពីវត្តមានរបស់ភាគល្អិត Higgs Boson ឬហៅថា ភាគល្អិតរបស់ព្រះ (God Particle) ពង្រីកការយល់ដឹងអំពីរបៀបដែលភាគល្អិតប្រមូលបានម៉ាស ដែលនេះបានជួយឱ្យអ្នកវិទ្យាសាស្ត្រពីររូបទទួលបានពានរង្វាន់ណូបែលរូបវិទ្យាកាលពីឆ្នាំ 2013។

Malika Meddahi អនុប្រធានផ្នែកប្រព័ន្ធម៉ាស៊ីនបង្កើនល្បឿនភាគល្អិត និងបច្ចេកវិទ្យារបស់ CERN បានសង្កត់ធ្ងន់ថា ផលប្រយោជន៍នៃការស្រាវជ្រាវនេះពិតជាមានសារសំខាន់ខ្លាំងណាស់ ក្នុងនោះក៏មានទាំងការថតរូបក្នុងវិស័យវេជ្ជសាស្ត្រ និងការព្យាបាលជម្ងឺមហារីកជាដើមផងដែរ៕

April 24, 2023

ម៉ាស៊ីនជីកផ្លូវរូងក្រោមដីខ្នាតយក្សថ្មី និងទំនើបបំផុតរបស់ចិន ត្រូវបានសម្ពោធយកចេញពីរោងចក្រ

ម៉ាស៊ីនជីករូងក្រោមដី (TNM) ដែលអាចផ្លាស់ប្ដូរទំហំមុខកាត់ចន្លោះពី 6.53 ទៅ 8 ម៉ែត្រ ត្រូវបានយកចេញពីរោងចក្រផលិត កាលពីថ្ងៃទី 20 មេសា នៅខេត្ត Hunan ប្រទេសចិន។

ម៉ាស៊ីនខ្នាតយក្សនេះត្រូវបានអភិវឌ្ឍដោយក្រុមហ៊ុនផលិតឧបករណ៍សំណង់ផ្លូវដែកធុនធ្ងន់ចិន (CRCHI)។ ជាមួយនឹងមុខកាត់ដែលអាចជីករូងក្រោមដីប្រហែលពី 6.53 ដល់ 8 ម៉ែត្រ ម៉ាស៊ីននេះអាចឡើងទួល ចុះទួលរហូតដល់ 50 អង្សា។

ម៉ាស៊ីន TNM នឹងត្រូវបានប្រើប្រាស់ដើម្បីស្ថាបនាស្ថានីយវារីអគ្គិសនីមួយកន្លែងនៅក្នុងខេត្ត Hunan ភាគខាងត្បូងប្រទេសចិន។ TNM អាចជីករូងរាបស្មើ ឬរូងឡើងទួល ចុះទួល។ វាក៏អាចស្ថាបនាផ្លូវរូងកោងដែលមិនទាន់មាននៅលើពិភពលោកផងដែរ។ នេះបើយោងតាម Wu Min អនុប្រធានវិទ្យាស្ថានស្រាវជ្រាវ TBM របស់ CRCHI។

ម៉ាស៊ីន TNM របស់ CRCHI ត្រូវបានយកចេញពីរោងចក្រផលិត កាលពីថ្ងៃទី 20 មេសា

«ក្រៅពីចំណុចពិសេសខាងលើ ម៉ាស៊ីន TNM ក៏អាចប្រែកាយពីមុខកាត់ប្រវែងតូចទៅជាមុខកាត់ធំផងដែរ» លោក Wu Min ឱ្យដឹងដូច្នេះ។

April 24, 2023

ក្រុមបាល់ទាត់ U-22 កម្ពុជា ត្រូវប្រកួតជាមួយទីម័រខាងកើតនៅថ្ងៃទី 29 មេសា នៅស៊ីហ្គេមលើកទី 32

កាលវិភាគនៃការប្រកួតបាល់ទាត់បុរសជម្រើសជាតិអាយុក្រោម 22 ឆ្នាំរបស់បណ្ដាប្រទេសអាស៊ីអាគ្នេយ៍នៅស៊ីហ្គេមលើកទី 32 ដែលប្រារព្ធឡើងចាប់ពីថ្ងៃទី 29 មេសា ឆ្នាំ 2023 នៅកម្ពុជា។

នៅក្នុងវគ្គចែកពូលនៃការប្រកួតបាល់ទាត់បុរសនៅស៊ីហ្គេមលើកទី 32 កម្ពុជាត្រូវប៉ះទីម័រខាងកើតនៅថ្ងៃទី 29 មេសា, ប៉ះហ្វ៊ីលីពីននៅថ្ងៃទី 02 ឧសភា, ប៉ះមីយ៉ាន់ម៉ានៅថ្ងៃទី 07 ឧសភា និងប៉ះឥណ្ឌូណេស៊ីនៅថ្ងៃទី 10 ឧសភា។

ខាងក្រោមនេះគឺជាកាលវិភាគនៃការប្រកួតបាល់ទាត់បុរសវគ្គចែកពូលនៅស៊ីហ្គេមលើកទី 32 ៖

April 24, 2023

ពេលណាទើបផែនីត្រូវបាត់បង់ព្រះចន្ទ បើសិនពួកវានៅតែចាកចេញពីគ្នាក្នុងល្បឿនដូចបច្ចុប្បន្ន?

ព្រះចន្ទនឹងត្រូវព្រះអាទិត្យលេបយកគ្មានសល់ក្រោយរយៈពេលប្រហែលប្រាំពាន់លានឆ្នាំទៀត បើសិនជាវាបន្តចាកឆ្ងាយពីផែនដីនៅក្នុងល្បឿនដូចបច្ចុប្បន្ន។

គន្លងតារាវិថីរបស់ព្រះចន្ទនៅជុំវិញផែនដី ហាក់ដូចជាមិនប្រែប្រួល ប៉ុន្តែជាក់ស្ដែង ព្រះចន្ទកំពុងតែចាកឆ្ងាយពីផែនដីយ៉ាងសន្សឹមៗ។

ក្រុមអ្នកវិទ្យាសាស្ត្រកំណត់បានល្បឿនដែលព្រះចន្ទចរចេញឆ្ងាយពីផែនដីដោយប្រើប្រាស់កញ្ចក់ដែលណាសាបានដាក់នៅឯឋានព្រះចន្ទនៅក្នុងបេសកកម្ម Apollo។ យោងតាមណាសា ក្នុងរយៈពេល 50 ឆ្នាំកន្លង ក្រុមអ្នកស្រាវជ្រាវបានបាញ់កាំរស្មីឡាសែរពីផែនដីទៅលើកញ្ចក់នោះ និងវាស់ពេលវេលាដើម្បីរកចំណាំងផ្លាត។ ដោយការប្រើប្រាស់ល្បឿនពន្លឺ អ្នកវិទ្យាសាស្ត្រគណនាឃើញថា ព្រះចន្ទកំពុងចរចាកចេញពីផែនដីក្នុងល្បឿនប្រហែល 3.8 សងទីម៉ែត្រ/ឆ្នាំ ដែលស្មើនឹងល្បឿននៃការដុះរបស់ក្រចកដៃ។

ព្រះចន្ទគោចរចេញឆ្ងាយពីផែនដីគឺដោយសារឥទ្ធិពលពីកម្លាំងទំនាញរវាងពួកវា ហើយកម្លាំងនេះធ្វើឱ្យរង្វិលជុំនៃអ័ក្សរបស់ផែនដីត្រូវយឺតជាងមុន។ យោងតាមអ្នកវិទ្យាសាស្ត្រ កាលពីប្រហែល 4.5 ពាន់លានឆ្នាំមុន នៅពេលព្រះចន្ទកកើតដំបូង ល្បឿនរង្វិលជុំនៃអ័ក្សរបស់ផែនដីគឺលឿនជាងបច្ចុប្បន្នឆ្ងាយណាស់ ដោយមួយថ្ងៃមានរយៈពេលប្រហែលតែប្រាំម៉ោងប៉ុណ្ណោះ។

ឥទ្ធិពលរបស់ជំនោរសមុទ្រក៏បន្ថយល្បឿនរង្វិលជុំនៃអ័ក្សរបស់ព្រះចន្ទ ហើយជាលទ្ធផល អ័ក្សរបស់ព្រះចន្ទត្រូវឈប់វិល ដោយមួយផ្នែករបស់វាត្រូវបែរមករកផែនដីជាដរាប។ ឥទ្ធិពលនេះក៏បន្លយល្បឿននៃរង្វិលជុំរបស់អ័ក្សផែនដី។ ក្នុងរយៈពេលប្រហែល 50 ពាន់លានឆ្នាំទៀត បើសិនមិនមានការរអាក់រអួល ល្បឿនរង្វិលជុំរបស់អ័ក្សផែនដីនឹងមានវាសនាដូចព្រះចន្ទ ពោលគឺមួយផ្នែករបស់ផែនដីនឹងបែរទៅរកព្រះចន្ទជានិច្ច។ ក្នុងពេលនោះ ផែនដី និងព្រះចន្ទនឹងឈប់ចាកឆ្ងាយពីគ្នា។

ក៏ប៉ុន្តែ ក្រោយរយៈពេលប្រហែលប្រាំពាន់លានឆ្នាំទៀត ព្រះអាទិត្យនឹងស្លាប់ ដោយវានឹងរីកធំឡើងទៅជាផ្កាយយក្សក្រហម។ ពេលនោះ ប្រព័ន្ធផែនដី – ព្រះចន្ទប្រាកដជានឹងត្រូវបានរំខាន និងបែកធ្លាយ។ បើសិនជាបន្តចាកឆ្ងាយពីផែនដីក្នុងល្បឿនដូចបច្ចុប្បន្ន ព្រះចន្ទនឹងឆ្ងាយពីផែនដីប្រហែល 189,000 គីឡូម៉ែត្របន្ថែមទៀត ហើយក៏នឹងត្រូវផ្កាយយក្សក្រហមលេបយកគ្មានសល់៕

April 24, 2023

សហព័ន្ធកីឡាអាស៊ីអាគ្នេយ៍ចេញប្រកាសសំខាន់គ្រាដែលស៊ីហ្គេមលើកទី 32 កាន់តែជិតមកដល់

សហព័ន្ធកីឡាអាស៊ីអាគ្នេយ៍ ថ្មីៗនេះបានចេញសេចក្ដីសម្រេចថ្មីបំផុតដើម្បីឱ្យបណ្ដាប្រទេសម្ចាស់ផ្ទះអនុវត្តចាប់ពីស៊ីហ្គេមលើកទី 33។

ព្រឹត្តិការណ៍កីឡាអាស៊ីអាគ្នេយ៍ (ស៊ីហ្គេម) លើកទី 32 នឹងត្រូវបានប្រារព្ធពិធីសម្ពោធបើកការប្រកួតនៅថ្ងៃទី 05 ឧសភា 2023 នៅរាជធានីភ្នំពេញ។ មុននពេលប្រារព្ធព្រឹត្តិការណ៍ខាងលើ សហព័ន្ធកីឡាអាស៊ីអាគ្នេយ៍ ថ្មីៗនេះបានបង្កការភ្ញាក់ផ្អើលខ្លាំងនៅពេលចេញសេចក្ដីប្រកាសថ្មី។

សហព័ន្ធកីឡាអាស៊ីអាគ្នេយ៍ បានសម្រេចថា ចាប់ពីស៊ីហ្គេមលើកទី 33 ឆ្នាំ 2025 ព្រឹត្តិការណ៍កីឡាពហុវិញ្ញាសារបស់អាស៊ីអាគ្នេយ៍នឹងផ្ដោតទៅលើការរៀបចំបណ្ដាវិញ្ញាសាកីឡារបស់ក្រុមទីមួយ (អត្តពលកម្ម, ហែលទឹក) និងក្រុមទីពីរ (បណ្ដាវិញ្ញាសាកីឡាអូឡាំពិកដទៃទៀត) នៅព្រឹត្តិការណ៍កីឡាអូឡាំពិក និងកីឡាអាស៊ី។

សេចក្ដីសម្រេចខាងលើអនុញ្ញាតឱ្យប្រទេសម្ចាស់ផ្ទះស៊ីហ្គេម ជ្រើសរើសវិញ្ញាសាយ៉ាងច្រើនត្រឹមពីរនៅក្នុងក្រុមទីបី ដោយមានការប្រកួត 8 ប្រភេទ។ នេះគឺជាជំហានដ៏ធំមួយរបស់ស៊ីហ្គេម និងកីឡាអាស៊ីអាគ្នេយ៍។ សហព័ន្ធកីឡាអាស៊ីអាគ្នេយ៍ក៏បានបញ្ចេញបញ្ជីឈ្មោះវិញ្ញាសាកីឡាដែលស្ថិតក្នុងក្រុមទីបី ដែលរួមមាន ក្បាច់គុនដំបង Arnis, អុក, កាយវប្បកម្ម (Bodybuilding), កីឡាហែលទឹក Finswimming, Kempo, Netball, Muay, របាំកីឡា, Pencak Silat, បោះប៊ូល, ប្រណាំងទូកប្រពៃណី, ទាត់សី, Vovinam, Water Skiing ។ល។

នេះគឺជាជំហានដំបូងនៅក្នុងដំណាក់កាលលើកកម្ពស់ឥទ្ធិពលកីឡាអាស៊ីអាគ្នេយ៍។ មុននោះ ម្ចាស់ផ្ទះកម្ពុជាបានលុបចោលវិញ្ញាសាកីឡាមួយចំនួននៅអូឡាំពិក មានដូចជា បាញ់ធ្នូ បាញ់កាំភ្លើង។ល។

April 24, 2023

សង្គ្រាមនៅស៊ូដង់ ៖ ប្រទេសនានានាំគ្នាជម្លៀសពលរដ្ឋត្រលប់ទៅស្រុក

បណ្ដាក្រុមប្រដាប់អាវុធរបស់អាម៉េរិក និងអង់គ្លេស បានជម្លៀសបុគ្គលិកស្ថានទូតចេញពីប្រទេសស៊ូដង់ ស្របពេលដែលប្រទេសដទៃទៀតកំពុង «ដុតដៃដុតជើង» នាំពលរដ្ឋរបស់ពួកគេទៅកាន់កន្លែងមានសុវត្ថិភាព គ្រាដែលក្រុមប្រដាប់អាវុធនានានៅស៊ូដង់ ប្រយុទ្ធដណ្ដើមអំណាចគ្នានៅក្នុងរដ្ឋធានីខាទុំ (Khartoum) កាលពីថ្ងៃទី 23 មេសា។

ការប្រយុទ្ធគ្នាខាងលើដែលបានកើតឡើងកាលពី 8 ថ្ងៃមុន រវាងកងទ័ពស៊ូដង់ និងកងកម្លាំងយោធាប៉ារ៉ា (RSF) បានផ្ទុះអាវុធដាក់គ្នា បណ្ដាលឱ្យមនុស្សយ៉ាងតិច 420 នាក់បាត់បង់ជីវិត និងរាប់លាននាក់ត្រូវជាប់គាំង មិនអាចទទួលសេវាកម្មចាំបាច់។

នៅពេលប្រជាជនព្យាយាមរត់គេចពីសង្គ្រាម ប្រទេសជាច្រើនក៏បានបញ្ជូនយន្តហោះ និងក្បួនរថយន្តទៅកាន់រដ្ឋធានីខាទុំ ដើម្បីជម្លៀសពលរដ្ឋរបស់ពួកគេ។

បារាំងបានឱ្យដឹងថា យន្តហោះមួយគ្រឿងរបស់ខ្លួនបានដឹកមនុស្សប្រហែល 100 នាក់ចាកចេញទៅកាន់ Djibouti ហើយយន្តហោះជើងទីពីរនឹងធ្វើសកម្មភាពជម្លៀសនាពេលដ៏ខ្លីខាងមុខ។

ប្រភពព័ត៌មាននានាបានរាយការណ៍ថា ការផ្ទុះអាវុធដាក់គ្នារវាងកងទ័ពស៊ូដង់ និងកងកម្លាំងប៉ារ៉ា RSF នៅស៊ូដង់ បានធ្វើឱ្យពលរដ្ឋអ៊ីរ៉ាក់ម្នាក់បាត់បង់ជីវិត និងអ្នកការទូតមួយរូបរបស់អេហ្ស៊ីបត្រូវរងរបួស។

អាល្លឺម៉ង់បានឱ្យដឹងថា ប្រទេសនេះបានបញ្ជូនយន្តហោះយោធាមួយគ្រឿងនៅ ខាទុំ។ ចំណែកអ៊ីតាលីវិញ ក៏បាននិយាយថា ជម្លៀសពលរដ្ឋរបស់ខ្លួនចេញពីស៊ូដង់ កាលពីថ្ងៃទី 23 មេសា។ ហ្កាណា ឥណ្ឌា និងលីប៊ី កំពុងតែធ្វើការដើម្បីនាំពលរដ្ឋត្រលប់ទៅស្រុករៀងៗខ្លួន។

ប្រទេសនានានាំគ្នាជម្លៀសពលរដ្ឋត្រលប់ទៅស្រុក

កាលពីថ្ងៃទី 23 មេសា អង់គ្លេសបានឱ្យដឹងថា បានជម្លៀសបុគ្គលិកការទូត និងញាតិរបស់ពួកគេចេញពីស៊ូដង់។ ហូឡង់គឺជាប្រទេសថ្មីបំផុតដែលបានប្រកាសជម្លៀសពលរដ្ឋរបស់ខ្លួនចេញពីស៊ូដង់។

ការប្រយុទ្ធគ្នាបានផ្ទុះឡើងនៅ ខាទុំ និងបណ្ដាទីក្រុងដែលនៅក្បែរនោះ រួមមាន Omdurman និង Bahri រួមនឹងបណ្ដាតំបន់នៅស៊ូដង់កាលពីថ្ងៃទី 15 មេសា។

កងទ័ពស៊ូដង់ និង RSF បានរួមគ្នាធ្វើរដ្ឋប្រហារមួយកាលពីឆ្នាំ 2021 ប៉ុន្តែបានបរាជ័យក្នុងការចរចាអំពីផែនការបង្កើតរដ្ឋាភិបាលស៊ីវិល និងបញ្ចូល RSF ទៅក្នុងកងកម្លាំងប្រដាប់អាវុធ។

ការផ្ទុះសង្គ្រាមស៊ីវិលភ្លាមៗនៅស៊ូដង់ បានបំផ្លាញផែនការស្ដាររបបប្រជាធិបតេយ្យ រុញច្រានប្រទេសក្រីក្រមួយនេះធ្លាក់ចូលទៅក្នុងវិបត្តិមនុស្សធម៌ និងប្រឈមនឹងសង្គ្រាមធំដែលអាចអូទាញមហាអំណាចបរទេស៕

April 24, 2023

វៀតណាមរកឃើញករណីឆ្លង «មេរោគស៊ីសាច់មនុស្ស»

បុរសវ័យ 66 ឆ្នាំម្នាក់នៅខេត្តដាក់ណុង (Dak Nong) ភាគខាងត្បូងប្រទេសវៀតណាម ដែលមានចម្ងាយប្រហែល 250 គីឡូម៉ែត្រពីទីក្រុងហូជីមិញ (ព្រៃនគរ) បានចូលសម្រាកព្យាបាលនៅមន្ទីរពេទ្យ ដោយសារតែមានដុំសាច់ពកធំនៅលើក្បាល ហើយត្រូវវេជ្ជបណ្ឌិតរកឃើញថា កើតជម្ងឺ Whitmore។

យោងតាមនាយកដ្ឋានសុខាភិបាលខេត្តដាក់ណុង កាលពីមួយឆ្នាំមុន អ្នកជម្ងឺខាងលើមានដុំសាច់នៅលើក្បាល ដែលត្រូវបានធ្វើរោគវិនិច្ឆ័យឃើញថាជាដុំខ្លាញ់។ កាលពីមួយសប្ដាហ៍មុននេះ អ្នកជម្ងឺមានអាការឈឺចាប់ត្រង់ដុំពកនោះ ហើយក៏បានចូលពេទ្យនៅខេត្តដាក់ណុង។ នេះបើតាមការចុះផ្សាយរបស់គេហទំព័រ VNexpress កាលពីថ្ងៃទី 21 មេសា។

អ្នកជម្ងឺត្រូវបានពិនិត្យឃើញថារលាកលលាដ៍ក្បាល និងខ្ទុះក្រោមស្បែកក្បាល ហើយក៏ត្រូវបានយកសំណាកទៅធ្វើតេស្ត។ ថ្ងៃទី 19 មេសា 2023 លទ្ធផលនៃការធ្វើតេស្តបង្ហាញថា វត្ថុសំណាកនេះមានផ្ទុក Burkholderia pseudomallei ដែលជាបាក់តេរីបង្កជម្ងឺ Whitmore ឬហៅថា «បាក់តេរីស៊ីសាច់មនុស្ស»។

នេះគឺជាមនុស្សដំបូងនៅខេត្តដាក់ណុងដែលត្រូវបានរកឃើញថាមានជម្ងឺ Whitmore ជាជម្ងឺដែលហាក់ត្រូវបានគេភ្លេចទៅហើយ និងបានបង្ហាញវត្តមានឡើងវិញក្នុងប៉ុន្មានឆ្នាំចុងក្រោយនេះ។

បន្ទាប់ពីបានរកឃើញករណីខាងលើ មជ្ឈមណ្ឌលគ្រប់គ្រងជម្ងឺខេត្តដាក់ណុង ក៏បានណែនាំឱ្យប្រជាជនចូលរួមទប់ស្កាត់ការឆ្លងរាលដាល ដោយការរក្សាអនាម័យផ្ទាល់ខ្លួន ការពារបរិស្ថាន និងប្រើប្រាស់សម្ភារៈការពារសុខភាពនៅពេលធ្វើការ។

បាក់តេរី B. pseudomallei រស់នៅក្នុងដី ទឹកកខ្វក់ និងអាចចូលក្នុងរាងកាយមនុស្សតាមរយៈស្បែកដែលរលាត់ របួសដែលមិនបានព្យាបាល។ បច្ចុប្បន្ន ពុំទាន់មានភ័ស្ដុតាងដែលបង្ហាញអំពីសមត្ថភាពនៃការឆ្លងរាលដាលពីមនុស្សទៅមនុស្ស ឬពីសត្វទៅមនុស្សរបស់បាក់តេរីនេះនៅឡើយ។

អ្នកកើតជម្ងឺនេះអាចបាត់បង់ជីវិតបើសិនមិនបានព្យាបាលទាន់ពេល ពិសេសអ្នកជំងឺដែលមានជម្ងឺប្រចាំកាយមួយចំនួនមានដូចជា ជម្ងឺទឹកនោមផ្អែម ជម្ងឺថ្លើម ជម្ងឺតម្រងនោម និងជម្ងឺសួតជាដើម។

នៅប្រទេសវៀតណាម អ្នកជម្ងឺ Whitmore ប្រហែល 70% ត្រូវចូលពេទ្យចាប់ពីខែកញ្ញាដល់ខែវិច្ឆិកាជារៀងរាល់ឆ្នាំ។ អ្នកជម្ងឺទាំងនេះតែងតែមានទំនាក់ទំនងជាមួយនឹងស្ថានភាពទឹកជំនន់។ បច្ចុប្បន្នមិនទាន់មានវ៉ាក់សាំងសម្រាប់ចាក់ទប់ស្កាត់ការឆ្លងជម្ងឺ Whitmore នេះនៅឡើយ៕

April 22, 2023

ក្រុមបាល់ទាត់ជាច្រើននៅអាស៊ីអាគ្នេយ៍ «នាំគ្នា» ទៅប្រទេសថៃ បោះជំរំហ្វឹកហាត់ត្រៀមសម្រាប់ស៊ីហ្គេមនៅកម្ពុជា

យោងតាមស្ថិតិ 5/10 នៃក្រុមបាល់ទាត់ជម្រើសជាតិ U-22 (មិនគិត U-22 ថៃ) របស់តំបន់អាស៊ីអាគ្នេយ៍ សុទ្ធតែជ្រើសរើសប្រទេសថៃជាទីតាំងបោះជំរំហ្វឹកហាត់ដើម្បីត្រៀមខ្លួនសម្រាប់ការប្រកួតនៅស៊ីហ្គេមលើកទី 32។

វិញ្ញាសាបាល់ទាត់បុរសនៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍នៅកម្ពុជា នឹងចាប់ផ្ដើមនៅក្នុងរយៈពេលមួយសប្ដាហ៍ទៀត (29 មេសា 2023)។ បណ្ដាក្រុមបាល់ទាត់ដែលត្រូវចូលរួមប្រកួត សុទ្ធតែមានដំណើរហ្វឹកហាត់ដើម្បីត្រៀមខ្លួនសម្រាប់ព្រឹត្តិការណ៍ស៊ីហ្គេម។

គិតត្រឹមបច្ចុប្បន្ន មានក្រុមបាល់ទាត់ជម្រើសជាតិរហូតដល់ប្រាំនៅអាស៊ីអាគ្នេយ៍ បានជ្រើសរើសប្រទេសថៃជាទីតាំងហ្វឹកហាត់ រួមមាន ក្រុមម្ចាស់ផ្ទះកម្ពុជា មីយ៉ាន់ម៉ា ឡាវ ហ្វ៊ីលីពីន និងទីម័រខាងកើត។ មូលហេតុចម្បងដែលត្រូវបានគេជឿថា បាននាំឱ្យក្រុមបាល់ទាត់ទាំងនេះសម្រេចចិត្តទៅហ្វឹកហាត់នៅប្រទេសថៃ គឺដោយសារទឹកដីនេះមានអាកាសធាតុប្រហាក់ប្រហែលនឹងប្រទេសកម្ពុជា។

នៅក្នុងដំណើរបោះជំរំហ្វឹកហាត់ បណ្ដាក្រុមបាល់ទាត់ក៏នឹងចូលរួមការប្រកួតមិត្តភាពជាមួយនឹងក្លឹបបាល់ទាត់មួយចំនួននៅប្រទេសថៃ។ បណ្ដាក្រុមបាល់ទាត់ក្រៅពីនេះ ដែលរួមមាន ថៃ វៀតណាម ម៉ាឡេស៊ី សិង្ហបុរី និងឥណ្ឌូណេស៊ី គឺសុទ្ធតែធ្វើការហ្វឹកហាត់នៅក្នុងប្រទេសមុនពេលចេញដំណើរមកកម្ពុជា៕

April 22, 2023

Author: សឿន សំណាង