សឿន សំណាង - La Reine Media

ក្រុមបាល់ទាត់ U-22 ថៃ ប្រកាសថា មិនខ្លាចអាជ្ញាកណ្ដាល បើទោះមិនមាន VAR

គ្រូបង្វឹករបស់ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ បានអះអាងថា មិនព្រួយបារម្ភអំពីការងាររបស់ក្រុមអាជ្ញាកណ្ដាល បើទោះមិនមានជំនួយពីបច្ចេកវិទ្យា VAR នៅស៊ីហ្គេមលើកទី 32។

ដើម្បីត្រៀមខ្លួនឱ្យបានល្អបំផុតសម្រាប់ការប្រកួតនៅស៊ីហ្គេមលើកនេះ កាលពីល្ងាចថ្ងៃទី 28 មេសា ក្រុម U-22 ថៃ បានធ្វើការហ្វឹកហាត់ថ្ងៃទីពីរនៅឯកីឡដ្ឋានអគ្គិសនីកម្ពុជា (EDC) នៅរាជធានីភ្នំពេញ ក្រោមការដឹកនាំរបស់គ្រូបង្វឹក Issara Sritaro ។

នៅពេលត្រូវបានសួរអំពីការងាររបស់ក្រុមអាជ្ញាកណ្ដាលនៅស៊ីហ្គេមលើកនេះ គ្រូបង្វឹក Sritaro ឱ្យដឹងថា លោកមិនមានការព្រួយបារម្ភចំពោះអាជ្ញាកណ្ដាល បើទោះបច្ចេកវិទ្យា VAR ដែលជួយផ្ដល់ភាពសុក្រឹតដល់ការកាត់ក្ដីរបស់អាជ្ញាកណ្ដាល មិនត្រូវបានប្រើប្រាស់នៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023។

គ្រូបង្វឹករបស់ U-22 ថៃ និយាយថា «នោះគឺជាកត្តាខាងក្រៅ។ យើងមិនអាចគ្រប់គ្រងបាន ដូច្នេះ U-22 ថៃ នឹងមិនផ្ដោតអារម្មណ៍ច្រើនទៅលើអាជ្ញាកណ្ដាល»។ លោក Sritaro បន្ថែមថា «យើងមិនខ្លាច ហើយយើងនឹងប្រឹងប្រែងឱ្យអស់ពីសមត្ថភាព។ … កីឡាកររបស់យើងក៏ត្រូវបានរម្លឹកអំពីបញ្ហាមួយចំនួន មានដូចជា ការបង្កកំហុសនៅក្នុងតំបន់គ្រោះថ្នាក់ និងអកហ្សឺជាដើម»។

ទន្ទឹមនឹងបញ្ហាខាងលើ គ្រូបង្វឹកអាយុ 43 ឆ្នាំរបស់ U-22 ថៃ ក៏បានឱ្យដឹងថា លោកមិនពេញចិត្តចំពោះទីលានហ្វឹកហាត់ EDC ដែលម្ចាស់ផ្ទះកម្ពុជាផ្ដល់ឱ្យ U-22 ថៃ។ ក្រុមគ្រូបង្វឹកថៃក៏បានសម្រេចចិត្តស្វែងរកទីលានហ្វឹកហាត់ថ្មីដើម្បីមានលក្ខខណ្ឌល្អបំផុតសម្រាប់ U-22 ថៃ នៅស៊ីហ្គេម។

លោក Sritaro ពន្យល់ថា «ទីលានហ្វឹកហាត់ EDC ដែលម្ចាស់ផ្ទះផ្ដល់ជូន U-22 ថៃ ប្រើប្រាស់ស្មៅ carpet ខុសពីស្មៅ bermuda នៅកីឡដ្ឋានព្រីនស៍…។ ផ្ទៃរបស់ទីលាន EDC រឹងខ្លាំងពេក ដូច្នេះហានិភ័យរងរបួសរបស់កីឡាករក៏មានកម្រិតខ្ពស់។ យើងពិតជាព្រួយបារម្ភចំពោះបញ្ហានេះ»។

នៅស៊ីហ្គេមលើកទី 32 U-22 ថៃ ស្ថិតក្នុងពូល B ជាមួយនឹងវៀតណាម ម៉ាឡេស៊ី សិង្ហបុរី និងឡាវ។ ប្រធានសហព័ន្ធបាល់ទាត់ថៃ (FAT) បានដាក់គោលដៅឱ្យក្រុម U-22 ថៃ និងក្រុមបាល់ទាត់នារីជម្រើសជាតិប្រទេសនេះ ត្រូវដណ្ដើមឱ្យបានមេដាយមាសពីស៊ីហ្គេមនៅកម្ពុជា៕

April 29, 2023

រកឃើញដីកម្រនៅលើភពក្រៅប្រព័ន្ធព្រះអាទិត្យ ដែលមានកម្ដៅបួនពាន់អង្សាសេ

ក្រុមអ្នកវិទ្យាសាស្ត្របានរកឃើញសារធាតុ terbium ជាលើកដំបូងនៅក្នុងបរិយាកាសរបស់ KELT-9b ដែលជាភពមួយក្នុងចំណោមភពក្រៅប្រព័ន្ធព្រះអាទិត្យដែលក្ដៅបំផុតធ្លាប់ត្រូវបានកត់ត្រានាពេលកន្លង។

KELT-9b មានសីតុណ្ហភាពជាមធ្យម 4,000 អង្សាសេ វិលជុំវិញផ្កាយមេ KELT-9 ដែលមានចម្ងាយពីផែនដីប្រហែល 670 ឆ្នាំពន្លឺ (មួយឆ្នាំពន្លឺស្មើនឹង 9.46 ទ្រីលានគីឡូម៉ែត្រ)។ ភពនេះតែងតែជាទីចាប់អារម្មណ៍របស់អ្នកតារាសាស្ត្រចាប់តាំងពីត្រូវបានរកឃើញកាលពីឆ្នាំ 2016។

លទ្ធផលនៃការស្រាវជ្រាវថ្មីដែលបានប្រកាសលើទស្សនាវដ្ដី Astronomy and Astrophysics បានឱ្យដឹងថា ក្រុមអ្នកវិទ្យាសាស្ត្របានរកឃើញលោហធាតុ terbium ដែលជាដីកម្រ នៅក្នុងបរិយាកាសរបស់ KELT-9b។

Terbium ត្រូវបានអ្នកវិទ្យាសាស្ត្រស៊ុយអែត Carl Gustaf Mosander រកឃើញជាលើកដំបូងក្នុងអណ្ដូងរ៉ែ Ytterby នៅប្រជុំកោះ Stockholm កាលពីឆ្នាំ 1843។ សារធាតុ terbium គឺជាដីដ៏កម្រ ក្នុងនោះ 99% នៃការផលិត terbium របស់ពិភពលោក គឺធ្វើឡើងនៅ Bayan Obo ដែលជាតំបន់ទាញយករ៉ែក្នុងដែនដីម៉ុងហ្កោលីខាងក្នុងរបស់ប្រទេសចិន។

ភព KELT-9b វិលជុំវិញផ្កាយមេ KELT-9

ការរកឃើញខាងលើនេះពិតជាមានសារសំខាន់ក្នុងការស្វែងយល់អំពីបណ្ដាភពនៅក្រៅប្រព័ន្ធព្រះអាទិត្យ។ «កាន់តែយល់ច្បាស់អំពីលក្ខណៈសម្បត្តិរបស់បណ្ដាភព យើងក៏កាន់តែមានឱកាសច្រើនក្នុងការស្វែងរកឃើញផែនដី 2.0 ក្នុងអនាគត» Nicholas Borsato មកពីសាកលវិទ្យាល័យ Lund ដែលជាសមាជិករបស់ក្រុមស្រាវជ្រាវអំពីភព KELT-9b បញ្ជាក់ដូច្នេះ៕

April 29, 2023

គ្រូបង្វឹកក្រុមបាល់ទាត់ U-22 របស់ឥណ្ឌូណេស៊ី សរសើរចំពោះទីលានបាល់ទាត់នៅកម្ពុជា

គ្រូបង្វឹក Indra Sjafri នៃក្រុមបាល់ទាត់ជម្រើសជាតិអាយុក្រោម 22 ឆ្នាំ (U-22) របស់ប្រទេសឥណ្ឌូណេស៊ី មានការភ្ញាក់ផ្អើលចំពោះហេដ្ឋារចនាសម្ព័ន្ធសម្រាប់បាល់ទាត់នៅស៊ីហ្គេមលើកទី 32 របស់ម្ចាស់ផ្ទះកម្ពុជា។

U-22 ឥណ្ឌូណេស៊ី ត្រូវបានរៀបចំឱ្យហ្វឹកហាត់នៅទីលានរបស់ក្លឹបវិសាខា ក្រោយពីបានមកដល់កម្ពុជា។ ថ្វីបើទីលាននេះនៅឆ្ងាយពីសណ្ឋាគារភ្នំពេញដែលក្រុមឥណ្ឌូណេស៊ីស្នាក់នៅ ប៉ុន្តែ ជំនួសមកវិញ វាលស្មៅរបស់ទីលាននេះបានធ្វើឱ្យគ្រូបង្វឹក Indra Sjafri មានការពេញចិត្ត។

នៅក្នុងសន្និសីទសារព័ត៌មានកាលពីពេលថ្មីៗនេះ គ្រូបង្វឹក Indra Sjafri និយាយថា «ខ្ញុំមានការភ្ញាក់ផ្អើល។ ឆ្នាំ 2019 ខ្ញុំបានទៅដល់ទីនោះ វាជាវាលស្មៅសិប្បនិម្មិត តែពេលនេះគឺជាស្មៅធម្មជាតិ។ នោះគឺជាការផ្លាស់ប្ដូរធំ ហើយផ្ទៃរបស់ទីលាននេះល្អណាស់»។

គ្រូបង្វឹក Indra Sjafri ក៏ពេញចិត្តនឹងគុណភាពរបស់ទីលានប្រកួត នៅពេលរួមដំណើរជាមួយក្រុមកូនសិស្ស ធ្វើទស្សនកិច្ចកីឡដ្ឋានជាតិអូឡាំពិក ជាទីដែលនឹងមានការប្រកួតរបស់បណ្ដាក្រុមនៅពូល A ។

នៅថ្ងៃទី 29 មេសានេះ ឥណ្ឌូណេស៊ីនឹងប្រកួតបើកឆាកជាមួយហ្វ៊ីលីពីន វេលាម៉ោង 16 ល្ងាច។ ម៉ោង 19 ក្បាលព្រលបនៃថ្ងៃដដែល ម្ចាស់ផ្ទះកម្ពុជានឹងប្រកួតជាមួយទីម័រខាងកើត។

April 29, 2023

គម្រោងស្ដីពីព្រលានយន្តហោះសម្រាប់តាក់ស៊ីហោះអគ្គិសនីនៅឌូបៃ

ក្រុមហ៊ុនស្ថាបត្យកម្មល្បីឈ្មោះរបស់អង់គ្លេស Foster + Partners បានលើកឡើងគំនិតស្ដីពីរចនាសម្ព័ន្ធយន្តហោះថ្មីសម្រាប់មធ្យោបាយធ្វើដំណើរដែលហោះឡើង និងចុះចតបញ្ឈរត្រង់។

ក្រុមហ៊ុនខាងលើបានឱ្យដឹងថា ព្រលានយន្តហោះថ្មីនេះនឹងតភ្ជាប់បណ្ដាទីតាំងល្បីៗរបស់ឌូបៃ និងផ្ដល់សេវាកម្មផ្លាស់ទីក្នុងល្បឿនលឿន មិនបញ្ចេញឧស្ម័នពុល។ ស្ថាបត្យកម្មនេះត្រូវបានអភិវឌ្ឍដោយមានកិច្ចសហការរបស់ក្រុមហ៊ុន Skyports Infrastructure ហើយព្រះអង្គម្ចាស់ Sheikh Mohammed Bin Rashid AI Maktoum ដែលជាព្រះរាជារបស់រាជាណាចក្រឌូបៃ នៃប្រទេសអេមីរ៉ាតអារ៉ាប់រួម ក៏បានអនុម័តរួចរាល់។ ព្រលានយន្តហោះថ្មីនេះ តាមគម្រោងនឹងស្ថិតនៅក្បែរព្រលានយន្តហោះអន្តរជាតិឌូបៃ (DXB) ដែលតភ្ជាប់ជាមួយនឹងបណ្ដាញអាកាសយានដ្ឋានបច្ចុប្បន្ន ក៏ដូចជាមជ្ឈមណ្ឌលដឹកជញ្ជូននានា។

គំនូរប្លង់បង្ហាញថា ព្រលានយន្តហោះនេះស្ថិតលើផ្ទៃរាបនៅទីខ្ពស់ បង្កលក្ខណៈងាយស្រួលសម្រាប់ការហោះឡើង និងចុះចត។ អគារនានាស្ថិតនៅជុំវិញព្រលានយន្តហោះដែលតភ្ជាប់ជាមួយនឹងបន្ទប់រង់ចាំសម្រាប់អ្នកដំណើរ ព្រមទាំងអាចឱ្យអ្នកដំណើរមើលឃើញទិដ្ឋភាពដ៏អស្ចារ្យរបស់បណ្ដាយន្តហោះ និងទីក្រុងទាំងមូល។ Foster + Partners ក៏ជ្រើសរើសពណ៌យ៉ាងសមស្រប និងវត្ថុធាតុធម្មជាតិសម្រាប់ផ្នែកខាងក្នុងអាកាសយានដ្ឋាន បង្កើតបានជាបរិយាកាសធូរស្រាល និងបរិស្ថានស្និទ្ធស្នាលនឹងធម្មជាតិ។

កាលពីខែកុម្ភៈ ក្សត្រារបស់រាជាណាចក្រឌូបៃ បានប្រកាសថា ស្ថានីយតាក់ស៊ីហោះទាំងឡាយនឹងចាប់ផ្ដើមដំណើរការនៅឌូបៃ បន្ទាប់ពីរយៈពេលបីឆ្នាំទៀត។

ឌូបៃបានរៀបផែនការសម្រាប់សេវាកម្មតាក់ស៊ីហោះមិនបំភាយឧស្ម័នពុលតាំងពីយូរមកហើយ និងទទួលបានចំណាប់អារម្មណ៍ពីបណ្ដាក្រុមហ៊ុនក្នុងស្រុក និងក្រុមហ៊ុនអត្តរជាតិផងដែរ ពិសេសគឺក្រុមហ៊ុនមកពីប្រទេសចិន៕

April 29, 2023

ស្រីស្អាតរបស់ក្រុមតៃក្វាន់ដូកម្ពុជា ត្រូវគេរំពឹងថា ដណ្ដើមបានមេដាយមាសនៅស៊ីហ្គេមលើកទី 32

កីឡាការិនីតៃក្វាន់ដូកូនកាត់កម្ពុជា-អាម៉េរិកាំង របស់ក្រុមជម្រើសជាតិកម្ពុជា កញ្ញា ថិប កាសាន់ទ្រីនីកូល (Cassandre Nicole Tubbs) មានមហិច្ឆតា «ប្ដូរពណ៌» មេដាយនៅពេលចូលរួមប្រកួតនៅស៊ីហ្គេមលើកទី 32 ដែលកម្ពុជាធ្វើជាម្ចាស់ផ្ទះ។

កញ្ញា ថិប កាសាន់ទ្រីនីកូល ឬហៅក្រៅថា ខេស៊ី (Cassie) កើតឆ្នាំ 1999 នៅសហរដ្ឋអាម៉េរិក។ កញ្ញា ខេស៊ី មានម្ដាយជាជនជាតិខ្មែរ និងឪពុកជាជនជាតិអាម៉េរិកាំង។ ខេស៊ី ប្រកួតក្នុងប្រភេទទម្ងន់ 55 គីឡូក្រាម, 59 គីឡូក្រាម និង 62 គីឡូក្រាម។

ខេស៊ី ចូលរួមប្រកួតបាន 31 លើក ក្នុងនោះ បានឈ្នះ 19 លើក ស្មើនឹង 61.3%។ ក្នុងរូបថតខាងក្រោម ខេស៊ី បង្ហាញមេដាយសំរឹទ្ធប្រភេទទម្ងន់ 62 គីឡូក្រាម ដែលដណ្ដើមបាននៅក្នុងការប្រកួតតេក្វាន់ដូបើកទូលាយកូស្តារីកាឆ្នាំ 2020។

ឪពុករបស់ ខេស៊ី លោក Greg Tubbs គឺជាគ្រូបង្វឹករបស់នាង។ បុរសជាអ្នកគុននិយមរូបនេះបានចាប់ផ្ដើមកំណត់គោលដៅ និងជួយឱ្យ ខេស៊ី បានចូលក្នុងវិស័យក្បាច់គុនតៃក្វាន់ដូតាំងពីនាងមានអាយុ 11 ឆ្នាំ។ ក្រោយមក ខេស៊ី ក៏បានជ្រើសរើសស្រុកកំណើតរបស់ម្ដាយនាងដើម្បីចូលរួមប្រកួតឱ្យក្រុមតៃក្វាន់ដូជម្រើសជាតិកម្ពុជា។

ខេស៊ី ចូលរួមប្រកួតនៅស៊ីហ្គេមបានបីលើក គឺនៅក្នុងឆ្នាំ 2017, 2019 និង 2022។ ស៊ីហ្គេមនៅលើទឹកដីម៉ាឡេស៊ី ខេស៊ី ដណ្ដើមបានមេដាយសំរឹទ្ធក្នុងប្រភេទទម្ងន់ 57 គីឡូក្រាម។

នៅស៊ីហ្គេម 2019 ខេស៊ី ដណ្ដើមបានមេដាយប្រាក់ក្នុងប្រភេទទម្ងន់ 62 គីឡូក្រាម។ ស៊ីហ្គេមលើកទី 31 ខេស៊ី ដណ្ដើមបានមេដាយសំរឹទ្ធប្រភេទទម្ងន់ 62 គីឡូក្រាម។

នៅស៊ីហ្គេមលើកទី 32 ដែលធ្វើឡើងលើទឹកដីស្រុកកំណើតរបស់ម្ដាយ ខេស៊ី ប្ដេជ្ញាដណ្ដើមឱ្យបានមេដាយល្អជាងមុន។ នៅក្នុងការប្រកួតដណ្ដើមពានរង្វាន់ក្នុងស្រុកកាលពីថ្ងៃទី 01 មេសា 2023 ខេស៊ី ដណ្ដើមបានមេដាយមាស។

វិញ្ញាសាតៃក្វាន់ដូនៅស៊ីហ្គេមលើកទី 32 នឹងប្រកួតចាប់ពីថ្ងៃទី 12 ដល់ 16 ឧសភា 2023។ ពលរដ្ឋកម្ពុជាកំពុងតែមានក្ដីសង្ឃឹមលើកីឡាការិនីកូនកាត់រូបនេះ៕

ខេស៊ី (រូបឆ្វេងបង្អស់)

ខេស៊ី និងមិត្តប្រុសនៅសហរដ្ឋអាម៉េរិក

April 28, 2023

ក្រុមបាល់ទាត់បុរស U-22 កម្ពុជា ប្រកាសបញ្ជីឈ្មោះកីឡាករ 20 រូបនៅស៊ីហ្គេម

ក្រុមបាល់ទាត់ជម្រើសជាតិ U-22 កម្ពុជា ទើបតែបានប្រកាសបញ្ជីឈ្មោះកីឡាករ 20 រូបរបស់ខ្លួនដែលនឹងត្រូវចូលប្រកួតនៅស៊ីហ្គេមលើកទី 32 ជាមួយនឹងគោលដៅដណ្ដើមឱ្យបានមេដាយ។

នៅព្រលប់ថ្ងៃទី 29 មេសា ក្រុម U-22 របស់ម្ចាស់ផ្ទះកម្ពុជានឹងប្រកួតបើកឆាកនៅពូល A នៃវិញ្ញាសាបាល់ទាត់បុរសរបស់ស៊ីហ្គេមលើកទី 32 ជាមួយនឹងទីម័រខាងកើត។ គោលដៅរបស់ក្រុមកម្ពុជាគឺមេដាយប្រវត្តិសាស្ត្ររបស់ខ្លួន នៅពេលកម្ពុជាធ្វើជាម្ចាស់ផ្ទះស៊ីហ្គេមលើកដំបូង។

នៅមុនស៊ីហ្គេមលើកទី 32 មកដល់ U-22 កម្ពុជាបានបោះជំរំហ្វឹកហាត់នៅប្រទេសថៃ។ កូនសិស្ស និងគ្រូបង្វឹកជនជាតិជប៉ុន Keisuke Honda របស់ U-22 កម្ពុជា កំពុងតែមានភាពជឿជាក់លើសមត្ថភាពរបស់ខ្លួននៅព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023 នេះ។

ថ្មីៗនេះ U-22 កម្ពុជាបានប្រកាសបញ្ជីឈ្មោះផ្លូវការស្ដីពីកីឡាករ 20 រូបដែលនឹងត្រូវចូលរួមប្រកួតនៅស៊ីហ្គេមលើកនេះ។ ទាំងនេះគឺជាកីឡាករល្អបំផុតដែលត្រូវបានជ្រើសរើសដោយគ្រូបង្វឹកជនជាតិជប៉ុន។ ក្នុងចំណោមនេះ ក៏មាន សៀង ចន្ធា និង លឹម ពិសុទ្ធ ដែលធ្លាប់បានចូលរួមប្រកួតនៅស៊ីហ្គេមលើកទី 31។ កីឡាករទាំងនេះត្រូវបានចាត់ទុកថាជាក្ដីសង្ឃឹមរបស់ U-22 កម្ពុជា។

ដូចទៅនឹងពានរង្វាន់មុនៗ ក្រុមគ្រូបង្វឹករបស់ U-22 កម្ពុជានៅស៊ីហ្គេមលើកនេះ ត្រូវបានបញ្ជាផ្ទាល់ដោយលោក Honda ខណៈប្រធានក្រុមគ្រូបង្វឹកគឺលោក Ryu Hirose។

នៅក្នុងវគ្គចែកពូល U-22 កម្ពុជាស្ថិតក្នុងពូលជាមួយឥណ្ឌូណេស៊ី មីយ៉ាន់ម៉ា ហ្វ៊ីលីពីន និងទីម័រខាងកើត។ ចំណែកក្នុងពូល B វិញ រួមមាន ថៃ វៀតណាម ម៉ាឡេស៊ី សិង្ហបុរី និងឡាវ។

April 28, 2023

ថៃទាក់ទាញបានក្រុមហ៊ុនផលិតរថយន្តអគ្គិសនីមួយទៀតពីប្រទេសចិន

ក្រុមហ៊ុនផលិតរថយន្តចិន Changan Automobile បានជ្រើសរើសប្រទេសថៃជាកន្លែងសម្រាប់រោងចក្រផលិតរថយន្តអគ្គិសនីដំបូងរបស់ខ្លួននៅខាងក្រៅប្រទេសចិន។

Changan នឹងវិនិយោគ 9.8 ពាន់លានបាត (285 លានដុល្លារអាម៉េរិក) ដើម្បីសាងសង់រោងចក្រដែលអាចផលិតរថយន្តអគ្គិសនីបាន 100,000 គ្រឿងក្នុងដំណាក់កាលដំបូង។ រថយន្តអគ្គិសនីដែលផលិតក្នុងរោងចក្រនេះនឹងត្រូវបានលក់ក្នុងប្រទេសថៃ និងនាំចេញទៅកាន់ប្រទេសដទៃនៅអាស៊ីអាគ្នេយ៍ អាស៊ីខាងត្បូង អូស្ត្រាលី នូវែលសេឡង់ អង់គ្លេស និងអាហ្វ្រិកខាងត្បូង។

រោងចក្ររបស់ Changan នៅប្រទេសថៃ នឹងផលិតរថយន្តដើរដោយថាមពលអគ្គិសនី រថយន្តកូនកាត់សាំង-អគ្គិសនី រួមនឹងប្រភេទថ្មផ្ទុកថាមពលសម្រាប់ប្រភេទរថយន្តទាំងនេះ។

ខ្ទង់វិនិយោគខាងលើនេះគឺជាផ្នែកមួយនៅក្នុងកិច្ចប្រឹងប្រែងដើម្បីប្រែក្លាយប្រទេសថៃទៅជាមជ្ឈមណ្ឌលផលិតរថយន្តអគ្គិសនីដ៏ធំមួយរបស់ពិភពលោក។ កន្លងមក អាជ្ញាធរថៃបានអនុម័តគម្រោងផលិតរថយន្តអគ្គិសនីចំនួន 26 គម្រោងរួចហើយនៅទូទាំងប្រទេស ខណៈការវិនិយោគបន្ទាប់គ្រោងនឹងត្រូវបានប្រកាសឆាប់ៗនេះ។

Changan គឺជាអ្នកផលិតរថយន្តធំជាងគេលំដាប់ទីបួននៅប្រទេសចិន។ ក្នុងឆ្នាំ 2022 ក្រុមហ៊ុននេះលក់រថយន្តបានពីរលានគ្រឿង។ ទាំង Ford និង Mazda សុទ្ធតែបាន និងកំពុងសហការជាមួយ Changan ដើម្បីផលិតរថយន្តសម្រាប់ទីផ្សារចិន។

April 28, 2023

អ្នកគាំទ្រកម្ពុជា បន្តបង្ហាញភាពរំជើបរំជួលចំពោះបាល់ទាត់នៅស៊ីហ្គេមលើកទី 32

ក្រោយរយៈពេលតែប៉ុន្មានម៉ោងប៉ុណ្ណោះ សំបុត្រចូលទស្សនាការប្រកួតថ្ងៃដំបូងនៅពូល B នៃវិញ្ញាសាបាល់ទាត់បុរសរបស់ស៊ីហ្គេមលើកទី 32 ត្រូវបានចែកចាយអស់គ្មានសល់។

វិញ្ញាសាបាល់ទាត់បុរសនៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកនេះ នឹងផ្ដើមការប្រកួតចាប់ពីថ្ងៃទី 29 មេសា ក្នុងនោះមានបួនក្រុមត្រូវប្រកួតបើកឆាក រួមមាន U-22 ឥណ្ឌូណេស៊ី vs U-22 ហ្វ៊ីលីពីន (ម៉ោង 16) និង U-22 កម្ពុជា vs U-22 ទីម័រខាងកើត (ម៉ោង 19)។ មុននោះ សំបុត្រសម្រាប់ចូលទស្សនាការប្រកួតបើកឆាករវាងកម្ពុជា និងទីម័រខាងកើត ត្រូវបាន «លក់» អស់ ក្នុងតម្លៃសូន្យរៀល។

ថ្មីៗនេះ គណៈកម្មការបាល់ទាត់បុរសបានធ្វើការចែកចាយសំបុត្រចូលទស្សនាការប្រកួតចំនួនពីរនៅថ្ងៃប្រកួតទីពីររវាង ថៃ និង សិង្ហបុរី , វៀតណាម និងឡាវ។ ក្រោយរយៈពេលតែប៉ុន្មានម៉ោងប៉ុណ្ណោះ សំបុត្រចូលទស្សនាការប្រកួតថ្ងៃដំបូងនៅពូល B នេះ ត្រូវបានចែកចាយអស់គ្មានសល់។

តាមរយៈការទិញសំបុត្រខាងលើ អ្នកគាំទ្រកម្ពុជាបានបង្ហាញនូវភាពរំជើបរំជួលនៅក្នុងការទស្សនាបាល់ទាត់។ ដូចទៅនឹងនិន្នាការនៅបរទេស ប្រជាជនកម្ពុជាក៏ចូលចិត្តមើលការប្រកួតបាល់ទាត់ជាងកីឡាដទៃ។ យោងតាមការកំណត់ អ្នកគាំទ្រម្នាក់នឹងទទួលបានសំបុត្រចូលទស្សនាយ៉ាងច្រើនត្រឹមពីរសំបុត្រ។

April 28, 2023

កប៉ាល់ដឹកឧស្ម័នរាវធំជាងគេបង្អស់លើលោក ត្រូវបានប្រគល់ដល់អតិថិជន

កប៉ាល់ Harzand មានបណ្ដោយ 230 ម៉ែត្រ អាចផ្ទុកឧស្ម័នរាវបាន 93,000 ម៉ែត្រគូប ត្រូវបានប្រគល់ជូនក្រុមហ៊ុនមួយរបស់សិង្ហបុរីកាលពីថ្ងៃពុធកន្លង។

កប៉ាល់ដឹកឧស្ម័នរាវធំជាងគេបង្អស់លើពិភពលោក ដែលអាចដឹកឧស្ម័នរាវបានរហូតដល់ 93,000 ម៉ែត្រគូប ត្រូវបានប្រគល់ជូនក្រុមហ៊ុន Singapore Petredec នៅសៀងហៃ ភាគខាងត្បូងប្រទេសចិន កាលពីថ្ងៃទី 26 មេសា 2023 នេះបើតាម CCTV ។

កប៉ាល់ Harzand ដែលមានបណ្ដោយ 230 ម៉ែត្រ ទទឹង 36.6 ម៉ែត្រ ត្រូវបានអភិវឌ្ឍ និងផលិតដោយក្រុមហ៊ុនសាងសង់កប៉ាល់ Jiangnan Shipyard នៅប្រទេសចិន។

កប៉ាល់នេះអាចបើកបរក្នុងល្បឿន 30.5 គីឡូម៉ែត្រ/ម៉ោង ដោយប្រើឧស្ម័នធម្មជាតិរាវ និងប្រេងឥន្ធនៈធម្មតា។ Harzard អាចធ្វើដំណើរបានចម្ងាយ 42,600 គីឡូម៉ែត្រ មុននឹងអស់ប្រេងឥន្ធនៈ។

«ដើម្បីសាងសង់កប៉ាល់នេះ យើងបានប្រើប្រាស់ដែកថែបសម្រាប់សីតុណ្ហភាពទាប ចំនួនជាង 10,000 តោន ដែលស្មើនឹង 1/3 នៃកប៉ាល់ទាំងមូល» លោក Hu Keyi ប្រធានក្រុមប្រឹក្សាបច្ចេកវិទ្យា និងវិទ្យាសាស្ត្ររបស់ក្រុមហ៊ុនសាងសង់កប៉ាល់ Jiangnan ឱ្យដឹងដូច្នេះ។

យោងតាមលោក Hu ការប្រើប្រាស់ដែកថែបប្រភេទនេះជួយកាត់បន្ថយការចំណាយសម្រាប់ការផលិត និងងាយស្រួលក្នងការរកទិញ ព្រោះវាត្រូវបានផលិតក្នុងស្រុក។

កប៉ាល់ Harzand មានបណ្ដោយ 230 ម៉ែត្រ ទទឹង 36.6 ម៉ែត្រ អាចដឹកឧស្ម័នរាវបាន 93,000 ម៉ែត្រគូប

លោក Wei Xiaoyong ប្រធានផ្នែកផលិតកម្មបញ្ជាក់ថា ដើម្បីអាចឱ្យកប៉ាល់ Harzand ដំណើរការបានភ្លាមបន្ទាប់ពីបានប្រគល់ ក្រុមហ៊ុនផលិតបានធ្វើការសាកល្បងដំណើរការគ្រប់យ៉ាងនៅលើកប៉ាល់ ក៏ដូចជាការបើកបរលើសមុទ្រនៅក្នុងពេលតែមួយ។

បច្ចុប្បន្ន ក្រុមហ៊ុនសាងសង់កប៉ាល់ Jiangnan កាន់កាប់ចំណែកទីផ្សារសកលជិត 25% នៅក្នុងវិស័យសាងសង់កប៉ាល់ដឹកឧស្ម័នរាវខ្នាតធំ៕

April 28, 2023

ក្រុមបាល់ទាត់ U-22 ថៃ ត្អូញត្អែរថា អាកាសធាតុនៅកម្ពុជាបង្កការលំបាកខ្លាំង

បន្ទាប់ពីឥណ្ឌូណេស៊ី ក្រុមបាល់ទាត់ជម្រើសជាតិ U-22 របស់ប្រទេសថៃ ក៏បានត្អូញត្អែរអំពីអាកាសធាតុ ក៏ដូចជាការរៀបចំរបស់ម្ចាស់ផ្ទះនៅស៊ីហ្គេមលើកទី 32។

យោងតាមសហព័ន្ធបាល់ទាត់ថៃ (FAT) ក្រុមបាល់ទាត់ U-22 ថៃ បានបង្ហាញវត្តមាននៅកម្ពុជាតាំងពីថ្ងៃទី 27 មេសា ដើម្បីត្រៀមខ្លួនសម្រាប់ការប្រកួតនៅស៊ីហ្គេម។

ក្នុងការចែករំលែកថ្មីបំផុតជាមួយនឹងអ្នកយកព័ត៌មានថៃ គ្រូបង្វឹក Issara Sritaro របស់ក្រុម U-22 ថៃ បានត្អូញត្អែរអំពីបញ្ហាអាកាសធាតុ និងការត្រៀមរបស់ម្ចាស់ផ្ទះកម្ពុជា។ លោក Sritaro យល់ថា អាកាសធាតុក្ដៅខ្លាំងនៅកម្ពុជា ធ្វើឱ្យកីឡាករវ័យក្មេងរបស់ថៃ ពិបាកសម្របខ្លួន ពិសេសនៅពេលដែលកាលវិភាគនៃការប្រកួតវគ្គចែកពូលរបស់ U-22 ថៃ ភាគច្រើនត្រូវធ្វើឡើងនៅម៉ោង 16 ដែលមានសីតុណ្ហភាពចន្លោះពី 30 ទៅ 35 អង្សាសេ។

«គណៈកម្មការរៀបចំស៊ីហ្គេមលើកទី 32 រៀបចំពេលវេលាបែបនោះគឺមិនសមស្របជាមួយនឹងការប្រកួតនៅប្រទេសថៃ។ បើទោះកីឡាករតែងតែហ្វឹកហាត់នៅម៉ោងបួនរសៀល ប៉ុន្តែការហ្វឹកហាត់ និងការប្រកួតជាក់ស្ដែងមិនដូចគ្នា។ ជាងនេះ ក្នុងអំឡុងពេលនោះ អាកាសធាតុនៅកម្ពុជាក៏ក្ដៅខ្លាំងជាងធម្មតា» មេដឹកនាំ U-22 ថៃ ត្អូញដូច្នេះ។

ក្រុមបាល់ទាត់ U-22 ថៃ ត្រូវទាត់នៅម៉ោងក្ដៅច្រើនជាងគេបង្អស់ក្នុងវគ្គចែកពូលនៅស៊ីហ្គេមលើកទី 32

មុននោះ ក្រុម U-22 ឥណ្ឌូណេស៊ីក៏ធ្លាប់បានត្អូញត្អែរអំពីអាកាសធាតុនៅកម្ពុជាថា «ក្ដៅដូចគេដុត»។ ប៉ុន្តែ ភ្លាមៗនោះ ប្រធានសហព័ន្ធបាល់ទាត់ឥណ្ឌូណេស៊ី (PSSI) លោក Arya Sinulingga បានចេញមកកែតម្រូវ និងស្នើឱ្យកីឡាកររបស់ប្រទេសនេះពិនិត្យមើលឥរិយាបថ ដោយការប្រកាសថា «យើងដូចគេ គេក៏ដូចយើង»។

នៅក្នុងកាលវិភាគនៃការប្រកួតវគ្គចែកពូល U-22 ថៃ ត្រូវបានកំណត់ឱ្យទាត់បីប្រកួតនៅក្នុងម៉ោង 16 ល្ងាច និងមួយប្រកួតចុងក្រោយនៅម៉ោង 19 ព្រលប់។ វៀតណាមត្រូវប្រកួតនៅម៉ោង 16 មួយប្រកួត និងបីប្រកួតទៀតនៅម៉ោង 19។ ម៉ាឡេស៊ី ហ្វ៊ីលីពីន និងឡាវ មានពីរប្រកួតនៅវេលាម៉ោង 16 និងពីរប្រកួតនៅម៉ោង 19។ ចំណែកក្រុមម្ចាស់ផ្ទះកម្ពុជា យ៉ាងណាក៏ត្រូវតែបានប្រកួតនៅម៉ោង «ល្អ»។

ថ្វីបើមិនពេញចិត្តនឹងកាលវិភាគនៃការប្រកួតនៅវគ្គចែកពូល ប៉ុន្តែ គ្រូបង្វឹករបស់ក្រុមថៃនៅតែអះអាងថា កូនសិស្សរបស់លោកនឹងអាចសម្របខ្លួនបាន ហើយថ្នាក់ដឹកនាំនឹងប្រឹងប្រែងជួយដល់កីឡាករដោយយកចិត្តទុកដាក់បំផុត៕

April 28, 2023

Author: សឿន សំណាង