អេបិល - La Reine Media

ម៉ាស៊ីនបោកសម្លៀកបំពាក់ Samsung Addwash បោក & សម្ងួត ក្នុងពេលតែមួយ! កាន់តែទំនើប……កាន់តែងាយស្រួល!!

ភ្នំពេញថ្ងៃទី ០៣ ខែតុលា ឆ្នាំ២០១៩៖ កាលពីមុនទម្រាំតែបោកគក់សម្លៀកបំពាក់ហើយ ទម្រាំយកទៅហាលឱ្យស្ងួត និងយកមកអ៊ុតទៀតត្រូវចំណាយពេលចង់កន្លះថ្ងៃបាត់ទៅហើយទើបបានពាក់! ហើយប្រសិនបើប៉ះចំរដូវភ្លៀងទៀតដឹងតែគឺរឹតតែពិបាកជាងនឹងទៀត! ហើយអ្វីដែលកាន់តែបារម្ភនោះគឺអាចប្រឈមនឹងក្លិនផ្តុសថែមទៀតផង! ត្រូវអត់?

ម៉្យាងវិញទៀតផលិតផលម៉ាស៊ីនបោកគក់ផ្សេងៗទៀតជាច្រើនមិនត្រឹមតែធ្វើឱ្យសម្លៀកបំពាក់ខូចសាច់ក្រណាត់, រួញខ្លាំង, និងជាប់សាប៊ូប្រតាកទៀតផង! តែឥឡូវនេះជាមួយនឹងម៉ាស៊ីនបោកសម្លៀកបំពាក់ Samsung Addwash Wash & Dry បំពាក់ជាមួយនឹងបច្ចេកវិទ្យាទំនើបចុងក្រោយបំផុតអាចឱ្យលោកអ្នកបោកគក់សម្លៀកបំពាក់ និងសម្ងួតក្នុងពេលតែមួយតែម្តង! អ្វីដែលកាន់តែពិសេស និងមានតែមួយនោះគឺ Samsung Addwash Wash & Dry អាចកម្ចាត់មេរោគ បាក់តេរីដែលអាចធ្វើឱ្យមានផលរំខានលើស្បែកដូចជា អាឡ័កស៊ី កន្ទួលរមាស់បានយ៉ាងល្អបំផុត! ដូច្នេះទោះបីជាលោកអ្នករវល់យ៉ាងណាក៏នៅតែអាចរីករាយ និងមានផាសុកភាពជាមួយនឹងសម្លៀកបំពាក់ជាទីស្រឡាញ់ជានិច្ច! អាចនិយាយបានថា “បោកភ្លាម…ស្ងួតភ្លាម…ស្អាតភ្លាម…ពាក់បានភ្លាមតែម្តង!” ពិតជាឡូយ! ឡូយហួសពីការគិតទៅទៀត! អរគុណបច្ចេកវិទ្យាអេឡិចត្រូនិច សាមសុង!

ខាងក្រោមនេះគឺជាលក្ខណៈទំនើបអស្ចារ្យរបស់ម៉ាស៊ីនបោកសម្លៀកបំពាក់ស៊េរីថ្មីចុងក្រោយ ដែលអាចឱ្យអតិថិជនទាំងអស់ធ្វើការសម្រេចចិត្តដោយគ្មានការស្ទាក់ស្ទើរឡើយក្នុងការជ្រើសរើសម៉ាស៊ីនបោកគក់ដែលល្អស័ក្តិសមបំផុតសម្រាប់ក្រុមគ្រួសារ និងមនុស្សជាទីស្រឡាញ់បាន ៖

* បំពាក់បច្ចេកវិទ្យាវៃឆ្លាត៖
ជាមួយនឹងប្រព័ន្ធ Q-rator ដ៏វៃឆ្លាតលោកអ្នកអាចបញ្ជា និងតាមដានបញ្ហានានាតាមរយៈស្មាតហ្វូនបានយ៉ាងងាយស្រួលបំផុត។

* បច្ចេកវិទ្យាសម្ងួតដោយខ្យល់៖
ជួយសម្អាត និងសម្ងួតសម្លៀកបំពាក់ កម្ចាត់ក្លិនមិនល្អ កម្ចាត់បាក់តេរី ឬសារធាតុបង្កអាឡ័កស៊ីផ្សេងៗ បានយ៉ាងមានប្រសិទ្ធភាពរហូតដល់ 99%!

* បច្ចេកវិទ្យាបំលែងសាប៊ូទៅជាពពុះសាប៊ូ (Eco BubbleTM )៖
ជាបច្ចេកវិទ្យាចុងក្រោយរបស់ សាមសុង ក្នុងការធ្វើឱ្យសាប៊ូទឹក ឬម្សៅសាប៊ូបោកគក់ក្លាយជាពពុះសុទ្ធទាំងអស់ហើយជ្រាបចូលសាច់ក្រណាត់សម្លៀកបំពាក់បានយ៉ាងល្អបំផុតដោយមិនបន្សល់កំណកសាប៊ូនៅលើសម្លៀកបំពាក់របស់លោកអ្នកឡើយ និងជួយធ្វើឱ្យគ្រប់សម្លៀកបំពាក់របស់អ្នកទាំងអស់ភ្លឺស្អាត មានរបៀប និងមិនរួញខ្ញីវខ្ញូវឡើយ។

* បច្ចេកវិទ្យាសម្អាតដោយប្រើចំហាយទឹក (Hygiene Steam)៖
នេះគឺជាបច្ចេកវិទ្យាសម្អាតសម្លៀកបំពាក់ដោយបញ្ចេញចំហាយទឹកក្តៅចេញពីបាតក្រោមនៃម៉ាស៊ីនដោយផ្ទាល់មានប្រសិទ្ធភាពកម្ចាត់ស្នាមប្រឡាក់ខ្លាំងដែលពិបាកជម្រះ និងបាក់តេរី រហូតដល់ 99%!

* សន្សំសំចៃពេលវេលា (បោក & សម្ងួត ក្នុងពេលតែមួយ) ៖
មុខងារនៃបច្ចេកវិទ្យាចុងក្រោយនេះអាចបោកសម្អាតសម្លៀកបំពាក់រួចរាល់ និងអាចពាក់បានភ្លាមៗក្នុងរយៈពេលតិចជាង 60 នាទី តែប៉ុណ្ណោះ!

* សម្លេងស្ងាត់ល្អ៖
ជាមួយនឹងបច្ចេកវិទ្យា Digital Inverter ជួយឱ្យម៉ាស៊ីនស្ងាត់មិនមានសំឡេងរំខាន និងស៊ីថាមពលតិចដោយមានការធានាជូនរហូតដល់ 10 ឆ្នាំ!!

យ៉ាងម៉េចដែរ? ចាប់ពីពេលនេះទៅលោកអ្នកអាចផ្តោតអារម្មណ៍បំពេញការងារសំខាន់របស់អ្នកបានដោយរីករាយ និងមានទំនុកចិត្ត! រីឯការងារបោកគក់ ថែទាំ សម្លៀកបំពាក់ និងផាសុកភាពគ្រួសារជាទីស្រឡាញ់របស់អ្នកសូមទុកឱ្យ ម៉ាស៊ីនបោកសម្លៀកបំពាក់ទ្វារចំហៀង Samsung Addwash Wash & Dry ជាអ្នករ៉ាប់រងជូនលោកអ្នកចុះ!

សម្រាប់ព័ត៌មានលម្អិតសូមអញ្ជើញមកសាកសួរដោយផ្ទាល់នៅតាមបណ្តាហាងទំនើបសាមសុង និងដេប៉ូចែកចាយផលិតផលអេឡិចត្រូនិចដែលនៅជិតលោកអ្នកបំផុត ឬទំនាក់ទំនងទៅកាន់ទូរស័ព្ទ៖ 1800 203 232 !!

October 4, 2019

កម្ពុជាប្រកាសបើកការប្រួតបវរកញ្ញាភពផែនដី ឬMiss Planet Cambodia 2020

ប្រទេសកម្ពុជាបានប្រកាសបើកការប្រួតបវរកញ្ញា Miss Planet Cambodia 2020 ជាថ្មីទៀតហើយ ដែលមានបេក្ខនារីជាច្រើនដាក់ពាក្យចូលរួមប្រកួត។ នេះគឺជាលើកទី២ហើយដែលកម្ពុជា ក្រោមការរៀបចំរបស់កញ្ញា រំដួលលិចទឹក បន្ទាប់ពីទទួលបានសិទ្ធិបានសិទ្ធិ ពីគណកម្មការ Miss Planet International។

គណកម្មការដែលចូលរួមកាត់ក្ដីនៅក្នុងវេទិកានោះរួមមាន កញ្ញា រំដួលលិចទឹក អគ្គនាយិកា Miss Planet Cambodia, អ្នកស្រី ហាលីមីន អគ្គនាយិកា Miss Planet International, លោក ផាត់ តារារដ្ឋ ស្ថាបនិកគ្រួសារតារាកម្ពុជា, អ្នកស្រី សរ កេសារ៉ា ម្ចាស់ផលិតកម្មកេសារ៉ាភាពយន្ត , កញ្ញា រីចំណាន កល្យាណ បវរកញ្ញាភពផែនដីឆ្នាំ២០១៩ និង តំណាងក្រុមហ៑ុនជាស្ពុនស័រ។ បេក្ខនារីដែលជាប់ទាំង២៥នាក់ នឹងដំណើរការប្រកួតច្រើនដំណាក់កាល ដោយនៅថ្ងៃទី២៨ តុលា គឺជាការប្រកួតវគ្គចុងក្រោយ ដើម្បីស្វែងរកម្ចាស់មកុដ។

កញ្ញា រំដួលលិចទឹក បានថ្លែងបញ្ជាក់ថា កម្មវិធីបវរកញ្ញាភពផែនដី គឺកម្មវិធីប្រកួតបវរកញ្ញា ដែលបង្កើតឡើងដោយជនជាតិកម្ពុជា គឺអ្នកស្រី ហាលីមីន ដោយកម្មវិធីនេះទទួលបានជោគជ័យម្ដងហើយ កាលពីឆ្នាំទី១ ទើបសម្រេចរៀបចំក្នុងឆ្នាំទី២។ កញ្ញាថាការជម្រើសយកបេក្ខនារីកម្ពុជា នៅក្នុងពេលនេះ គឺដើម្បីស្វែងរកតំណាងកម្ពុជាមួយរូប ទៅប្រកួតបវរកញ្ញាភពផែនដីអន្តរជាតិនៅដើមឆ្នាំ២០២០ខាងមុខ ដែលក្នុងឆ្នាំនេះកម្ពុជា ក៏នៅតែជាម្ចាស់ផ្ទះដដែល។ ការប្រកួតនៅក្នុងឆ្នាំនេះ មានការចូលរួមពីបេក្ខនារីច្រើនជាងឆ្នាំមុន ហើយស្ទើរតែគ្រប់ខេត្តក្រុងផង។ កញ្ញាថា នេះគឺជាមោទនភាពដែលកម្ពុជាមានការប្រកួតបវរកញ្ញា ហើយមានប្រទេសជាច្រើនបញ្ជូនបេក្ខនារីមកប្រកួត។

សូមជម្រាបនៅសៀលថ្ងៃទី២ តុលា ឆ្នាំ២០១៩ គណកម្មការការប្រកួតបវរកញ្ញាភពផែនដី ក៏បានប្រកាសបើកសន្និសីទកាសែតជម្រើសយកបេក្ខនារី២៥រូបទៅប្រកួតផ្លូវការ។ បេក្ខភាពដែលជម្រើសបានទាំង២៥រូប ក៏ត្រូវបានគណកម្មការចោទសំនួរដើម្បីស្ទាបស្ទង់ពីចំណេះដឹង បន្ថែមពីលើការ វិនិច្ឆ័យលើរូបសម្រស់ផងដែរ៕

October 3, 2019

ការិយាល័យសាខាប្រាសាក់មួយផ្សេងទៀតបានឧប្បត្តិកនៅកណ្តាលក្រុងច្បារមននៃខេត្តកំពង់ស្ពឺ

គ្រឹះស្ថានមីក្រូហិរញ្ញវត្ថុ ប្រាសាក់ មានសេចក្តីសោមនស្សសូមជម្រាបជូនអតិថិជន និងសាធារណជន មេត្តាជ្រាបថា ប្រាសាក់ បានបើកឱ្យដំណើរការការិយាល័យសាខាចំនួន 1 បន្ថែមទៀត គឺសាខាស្វាយក្រវ៉ាន់ ដែលមានទីតាំងនៅខាងត្បូងសាលាខេត្តកំពង់ស្ពឺចម្ងាយប្រហែល 300 ម៉ែត្រក្នុងភូមិទួលគក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។

លោក សាយ សូនី នាយកប្រតិបត្តិនៃគ្រឹះស្ថានមីក្រូហិរញ្ញវត្ថុ ប្រាសាក់ បានមានប្រសាសន៍ថា៖ «យើងមានក្តីរំភើបរីករាយដែលបានពង្រីកបណ្តាញការិយាល័យរបស់យើងឱ្យខិតជិតអតិថិជន ដើម្បីបម្រើសេវាធនាគារជូនប្រកបដោយភាពងាយស្រួល លឿនរហ័ស និងសុវត្ថិភាពជាមួយនឹងសេវាហិរញ្ញវត្ថុដ៏សម្បូរបែបពីប្រាសាក់។ ការបើក គណនីសន្សំ នៅប្រាសាក់នៅថ្ងៃនេះ អតិថិជនអាចផ្ទេរប្រាក់ ទិញកាតទូរស័ព្ទ ផ្ទេរប្រាក់តាមលេខសម្ងាត់ទៅអ្នកគ្មានគណនី ពិនិត្យសមតុល្យគណនី និងសេវាផ្សេងៗដោយមិនអស់កម្រៃសេវា»។

ជាមួយនឹងបទពិសោធន៍ដ៏ប៉ិនប្រសប់ប្រមាណជា 25 ឆ្នាំក្នុងវិស័យហិរញ្ញវត្ថុ ប្រាសាក់បាននិងកំពុងរីកចម្រើនប្រកបដោយសក្តានុពលជាមួយនឹងដំណោះស្រាយហិរញ្ញវត្ថុដ៏សម្បូរបែប និងមានភាពបត់បែន វិសាលភាពនៃបណ្តាញការិយាល័យ និងអេធីអឹមគ្របដណ្ដប់ទូទាំងប្រទេស និងបច្ចេកវិទ្យាឌីជីថលហិរញ្ញវត្ថុ។ សេវាហិរញ្ញវត្ថុដែលប្រាសាក់ផ្តល់ជូនមាន ប្រាក់បញ្ញើសន្សំ ប្រាក់កម្ចី ផ្ទេរប្រាក់ ផ្ទេរប្រាក់ទៅអ្នកគ្មានគណនី ឬ ដកប្រាក់ដោយមិនចាំបាច់ប្រើប័ណ្ណអេធីអឹមប្រាសាក់ បង់ថ្លៃទឹក បង់ថ្លៃភ្លើង ទិញកាតទូរស័ព្ទ សេវាទូទាត់រហ័ស អេធីអឹម សេវាធនាគារចល័ត សេវាបើកប្រាក់បៀវត្ស និងសេវាផ្សេងៗទៀត។

អាស្រ័យហេតុនេះ សូមអតិថិជនទាំងអស់រីករាយក្នុងការទទួលបានសេវាហិរញ្ញវត្ថុ និងការផ្តល់សេវាបម្រើដោយភាពរួសរាយរាក់ទាក់ពីប្រាសាក់សាខាស្វាយក្រវ៉ាន់ ឬ អាចរកទីតាំងសាខាតាម https://goo.gl/maps/cPed9eM3NxwDbRN4A

អំពីប្រាសាក់ 
ក្នុងរយៈពេល 6 ខែដើមឆ្នាំ 2019 នេះ ប្រាសាក់មានទ្រព្យសកម្មសរុបច្រើនជាង 2,800 លានដុល្លារអាមេរិក សម្ពៀតឥណទានច្រើនជាង 2,370 លានដុល្លារអាមេរិក អតិថិជនប្រាក់កម្ចី 410 ពាន់នាក់ បណ្តាញការិយាល័យ និងទីតាំងម៉ាស៊ីនអេធីអឹមគ្របដណ្តប់ទូទាំងប្រទេស និងបុគ្គលិកជិត 8,200 នាក់ ព្រមទាំងបានផ្តល់អគារបណ្ណាល័យចំនួន 40 នៅតាមបណ្តាខេត្តនានានៅកម្ពុជា។

សម្រាប់ព័ត៌មានបន្ថែម ឬ ត្រូវការប្រើប្រាស់កម្ចីពីប្រាសាក់ សូមទាក់ទងតាមទូរស័ព្ទលេខ 086 999 911 ឬ 023 999 911 ឬ 096 9 999 911 ឬ ចូលទៅកាន់វេបសាយត៍ www.prasac.com.kh ។

October 3, 2019

ពលរដ្ឋជាង 2ម៉ឺននាក់បានជិះរថយន្តក្រុងសាធារណៈឥតបង់ប្រាក់ នាពេលបុណ្យភ្ជុំបិណ្ឌ

បើគិតពីថ្ងៃដំណើរការដំបូង រហូតដល់ថ្ងៃចុងក្រោយ នៃដំណើរការសេវារថយន្តក្រុងសាធារណៈឥតបង់ប្រាក់នាឱកាសនៃពិធីបុណ្យភ្ជុំបិណ្ឌនេះ មានប្រជាពលរដ្ឋជាង 2ម៉ឺននាក់បានធ្វើដំណើរ តាមរថយន្តក្រុងរបស់សាលារាជធានីភ្នំពេញដែលរាជរដ្ឋាភិបាលបានរៀបចំ ដោយចេញពីភ្នំពេញទៅតាមបណ្ដាខេត្ត និងចេញពីបណ្ដាខេត្តចំនួន18 មកភ្នំពេញវិញ។

លោក អ៊ាន សុខឃីម អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានី ភ្នំពេញ បានឱ្យដឹងកាលពីថ្ងៃទី30 ខែកញ្ញា ឆ្នាំ2019 ថា ចាប់ពីថ្ងៃទី26 ដល់ថ្ងៃទី30 ខែកញ្ញា ឆ្នាំ2019 គឺមានប្រជាពលរដ្ឋធ្វើដំណើរតាមរថយន្តក្រុងរបស់សាលារាជធានីភ្នំពេញចំនួនប្រមាណជាង 2ម៉ឺននាក់ ដោយប្រើប្រាស់រថយន្តក្រុង 120គ្រឿង ហើយរាល់ចំណាយទាំងអស់ជាបន្ទុករបស់រាជរដ្ឋាភិបាល។

លោក អ៊ាន សុខឃីម អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង បានបញ្ជាក់ថា ចំនួនពលរដ្ឋដែលធ្វើដំណើរដោយរថយន្តក្រុងសាធារណៈទៅតាមបណ្តាខេត្ត និងត្រឡប់មកភ្នំពេញវិញក្នុងរយៈពេល 4ថ្ងៃនៃបុណ្យភ្ជុំបិណ្ឌនេះ មានសរុបចំនួន 23,635នាក់។ ចំណែកអ្នកធ្វើ ដំណើរតាមកាណូតមានចំនួន 634នាក់។

លោកអភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុងបានអះអាងថា ចំនួនពលរដ្ឋដែលធ្វើដំណើរដោយរថយន្តក្រុងសាធារណៈច្រើនជាងគេគឺ ខេត្តបាត់ដំបង និងខេត្តបន្ទាយមាន ជ័យ។ ជាក់ស្តែងនៅថ្ងៃដំបូងនៃដំណើរការជិះរថយន្តក្រុងដោយឥតគិតថ្លៃ រដ្ឋាករស្វយ័តបានបន្ថែមរថយន្តក្រុងចំនួន 54គ្រឿង សម្រាប់ផ្លូវជាតិលេខ5 ឆ្ពោះទៅខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យដោយថយន្តក្រុងកំណត់មានត្រឹមតែ 45គ្រឿង។

លោក អ៊ាន សុខឃីម បានបញ្ជាក់ដែរថា បុគ្គលិកដែលបម្រើការងារជាអ្នកបើកបររថយន្តក្រុងសាធារណៈនៅថ្ងៃបុណ្យភ្ជុំបិណ្ឌមានសរុបចំនួន 234នាក់។ ក្នុង 1គ្រឿងមានបុគ្គលិកចំនួន 2 នាក់ ម្នាក់ជាអ្នកបើកបរ និងម្នាក់ទៀតជាព្រូឡាន។
សូមបញ្ជាក់ថា នាឱកាសបុណ្យភ្ជុំបិណ្ឌឆ្នាំនេះ រាជរដ្ឋាភិបាលបានរៀបចំរថយន្តក្រុង ឱ្យប្រជាពលរដ្ឋជិះដោយឥតបង់ប្រាក់រយៈពេល5ថ្ងៃ គឺចាប់ពីថ្ងៃទី26 ដល់ថ្ងៃទី30 ខែកញ្ញា ឆ្នាំ2019 ដោយមានកំណត់តារាងស្ថានីយចេញដំណើរនៃផ្លូវជាតិនីមួយៗសម្រាប់បណ្តាខេត្តជាគោលដៅ។

រថយន្តក្រុងរបស់សាលារាជធានីភ្នំពេញទាំង 120គ្រឿងនេះ គឺមានធ្វើដំណើរតាមផ្លូវជាតិ លេខ1 ទៅ-មកខេត្តព្រៃវែង និងខេត្តស្វាយរៀង។ ផ្លូវជាតិលេខ2 ទៅ-មកខេត្តតាកែវ និងខេត្តកែប។ ផ្លូវជាតិលេខ3 ទៅ-មកខេត្តកំពត។ ផ្លូវជាតិលេខ4 ទៅ-មកខេត្តកំពង់ស្ពឺ និងខេត្តព្រះសីហនុ។ ផ្លូវជាតិលេខ5 ទៅ-មកខេត្តកំពង់ឆ្នាំង ពោធិ៍សាត់ បាត់ដំបង និងខេត្តបន្ទាយមានជ័យ។ ផ្លូវជាតិលេខ6 ទៅ-មកខេត្តកំពង់ធំ និងខេត្តសៀមរាប។ ផ្លូវជាតិលេខ6 និងផ្លូវជាតិលេខ7 ធ្វើដំណើរទៅ-មកខេត្ត កំពង់ចាម ក្រចេះ និងខេត្តស្ទឹងត្រែង។

ឯកឧត្តម ឃួង ស្រេង អភិបាលរាជធានីភ្នំពេញ បានលើកឡើងថា ការផ្ដល់សេវារថយន្តក្រុងជូនប្រជាពលរដ្ឋជិះទៅ-មកស្រុកកំណើតដោយឥតបង់ប្រាក់នេះ គឺជាការអនុវត្តតាមប្រសាសន៍របស់សម្តេចអគ្គមហាសេនាបតីតេជោ ហ៊ុន សែន ដែលតម្រូវឱ្យសាលារាជធានីភ្នំពេញ បញ្ចេញរថយន្តក្រុង ដើម្បីដឹកប្រជាពលរដ្ឋចេញទៅតាមបណ្តាខេត្តចំនួន 18 ដោយឥតបង់ថ្លៃ ក្នុងបំណងកាត់បន្ថយការចំណាយរបស់ប្រជាពលរដ្ឋ និងការកកស្ទះចរាចរណ៍ ឬក៏គ្រោះថ្នាក់តាមដងផ្លូវជាដើម៕

October 3, 2019

កម្ពុជានាំចេញកៅស៊ូក្នុងរយៈពេល 8ខែឆ្នាំ2019 សរុបជាទឹកប្រាក់បានជាង 200លានដុល្លារ

គិតត្រឹមរយៈពេល 8ខែ ក្នុងឆ្នាំ2019នេះ កម្ពុជាបាននាំចេញជ័រកៅស៊ូទៅកាន់ទីផ្សារអន្តរជាតិ បានជិត 15ម៉ឺនតោន(149,263តោន)ដែលគិតជាប្រាក់ចំណូលស្មើនឹងប្រមាណជាង 200លានដុល្លារ។ របាយការណ៍របស់អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី30 ខែកញ្ញា ឆ្នាំ2019នេះ បានបង្ហាញថា ក្នុងរយៈពេល 8ខែ ឆ្នាំ2019 ការនាំចេញកៅស៊ូបានកើនឡើង 24% បើធៀបនឹងរយៈពេលដូចគ្នាកាលពីឆ្នាំមុន។

របាយការណ៍ដដែលបានបញ្ជាក់ទៀតថា តម្លៃជាមធ្យមរបស់ជ័រកៅស៊ូនៅ 8ខែដំបូងឆ្នាំ2019នេះមានតម្លៃ 1,340ដុល្លារក្នុង 1តោន ធ្លាក់ចុះប្រមាណ3%។ ដូច្នេះបើគិតជាចំណូលដែលកម្ពុជា ទទួលបានពីការនាំចេញជ័រកៅស៊ូរយៈពេល 8ខែមានចំនួនជាង 200លានដុល្លារអាមេរិក(ប្រមាណជា200,012,420$USA)។ ដោយឡែកសម្រាប់ការនាំចេញជ័រកៅស៊ូក្នុងខែសីហា មានចំនួនប្រមាណជាជាង 23,308តោន ខណៈតម្លៃជ័រកៅស៊ូជាមធ្យមក្នុងខែសីហាមានតម្លៃ 1,333ដុល្លារក្នុង1តោន ធ្លាក់ចុះ1.47% ។

បញ្ហាដែលកើតឡើងនៅក្នុងវិស័យកសិកម្មផ្នែកកៅស៊ូបច្ចុប្បន្ន គឺអ្វីដែលសំខាន់ក្រៅពីតម្លៃកៅស៊ូនៅលើទីផ្សារអន្តរជាតិមានការធ្លាក់ចុះ អ្នកជំនួញក្នុងវិស័យនេះ ក៏ដូចជាក្រុមហ៊ុនដែលធ្វើការនាំចេញត្រូវប្រឈមខ្លាំងនោះ គឺការបង់ពន្ធនាំចេញដែលស្ថិតនៅក្នុងកម្រិតមួយខ្ពស់។ នេះបើតាមវិស័យឯកជនបានជួបប្រទះ និងចង់ឱ្យរដ្ឋាភិបាលជួយដោះស្រាយ និងជួយលើកតម្កើងការផលិតកៅស៊ូនៅកម្ពុជាឱ្យមានសកម្មភាពផ្នែកសេដ្ឋកិច្ចជួយដល់ការអភិវឌ្ឍប្រទេសជាតិ។

លោកឧកញ៉ា លឹម ហេងអនុប្រធានសភាពាណិជ្ជកម្មកម្ពុជា ធ្លាប់មានប្រសាសន៍ថា ការនាំចេញកៅស៊ូពីកម្ពុជា ទៅកាន់ទីផ្សារអន្តរជាតិមានការកើនឡើង ប៉ុន្តែបើនិយាយពីចំណូលរបស់អ្នកផលិតវិញ គឺមានការថមថយចុះគួរឱ្យព្រួយបារម្ភ។
លោកឧកញ៉ាបានបន្តទៀតថា ៖«បច្ចុប្បន្ននេះ មានសិប្បកម្មខ្នាតតូចមួយចំនួនបានប្រឈមនឹងការបិទទ្វារជាបណ្ដើរៗ ដោយសារតែមិនអាចទ្រាំទៅនឹងការចំណាយ និងភាពខាតបង់ជារៀងរាល់ឆ្នាំបាន»។

លោកឧកញ៉ាបានបញ្ជាក់ថា សភាពាណិជ្ជកម្មកម្ពុជា ក៏បានពិភាក្សា និងធ្វើការស្នើសុំក្រសួងសេដ្ឋកិច្ច និងហិរញ្ញវត្ថុ ឱ្យមានការសម្របសម្រួល និងអនុគ្រោះទៅលើការបង់ពន្ធនាំចេញកៅស៊ូកន្លងមកដែរ ដោយក្រោមតម្លៃ 2,000ដុល្លារត្រូវបានលើកលែង ខណៈដែលកាលពីពេលកន្លងទៅ ក៏ដូចជាបច្ចុប្បន្ននេះ រាល់ការនាំចេញ ត្រូវបានគិតពន្ធ 50ដុល្លារ សម្រាប់កៅស៊ូដែលមានតម្លៃ 1,500ដុល្លារក្នុង1តោន។

លោកឧកញ៉ា លឹម ហេងក៏បានបញ្ជាក់បន្ថែមថា៖«ប្រសិនបើការស្នើសុំខាងលើនេះមានប្រសិទ្ធភាព គឺជាការជួយសង្គ្រោះ និងលើកទឹកចិត្តដល់អ្នកធ្វើជំនួញក្នុងវិស័យជាខ្លាំង ហើយវាក៏ជាការជួយលើកកម្ពស់ វិស័យដំណាំកៅស៊ូនៅកម្ពុជាមានភាពល្អប្រសើរផងដែរ»។

កាលពីឆ្នាំ2018 កន្លងមក កម្ពុជាបាននាំចេញជ័រកៅស៊ូជាង 21ម៉ឺនតោន ទទួលបានចំណូលជិត 300លានដុល្លារសហរដ្ឋអាមេរិក ដោយក្នុងនោះភាគច្រើនជ័រកៅស៊ូកម្ពុជា បាននាំចេញទៅកាន់ម៉ាឡេស៊ី ចិន វៀតណាម និងប្រទេសសិង្ហបុរី ៕

October 3, 2019

អ៊ឺរ៉ង់ថា FIFA លូកដៃចូលកិច្ចការផ្ទៃក្នុង ក្រោយត្រៀមស៊ើបអង្គេតការប្រកួតជាមួយកម្ពុជា

សហព័ន្ធបាល់ទាត់អ៊ឺរ៉ង់ប្រកាសថា ក្នុងការប្រកួតជាមួយកម្ពុជា ប្រទេសដែលកាន់សាសនាអ៊ីស្លាមដ៏ខ្ជាប់ខ្ជួនមួយនេះ នឹងដកចេញនូវបម្រាមដែលហាមមិនឱ្យនារីចូលរួមទស្សនាការប្រកួតបាល់ទាត់នោះចេញ ហើយជាមួយនឹងរឿងនេះដែរ FIFA ក៏ត្រៀមដាក់កម្លាំងមួយចំនួនដើម្បីឃ្លាំមើលការប្រកួតមួយនេះថា តើមានការអនុញ្ញាតិឱ្យនារីចូលរួមទស្សនាពិតប្រាកដមែនឬអត់?។

ទោះជាយ៉ាងណាក្តី ប្រទេសអ៊ីរ៉ង់បានចេញមុខថ្លែងសេចក្តីប្រកាសថា ការដែលមានអ្នកឃ្លាំមើលការងារទាំងនេះ គឺជាការលូកដៃចូលយ៉ាងពេញទំហឺងពីសំណាក់សហព័ន្ធកីឡាបាល់ទាត់ពិភពលោកទៅក្នុងការងារផ្ទៃក្នុងរបស់ប្រទេសអ៊ឺរ៉ង់។

គួរបញ្ជាក់ផងដែរថា ក្រុមបាល់ទាត់ជម្រើសជាតិអ៊ឺរ៉ង់នឹងត្រូវបើកទ្វារកីឡដ្ឋាន Azari ក្នុងទីក្រុងតេអេរ៉ង់របស់ខ្លួនស្វាគមន៍ក្រុមបាល់ទាត់ជម្រើសជាតិកម្ពុជាក្នុងវគ្គជម្រុះ FIFA WORLD CUP 2022 ដែលវានឹងក្លាយជាប្រកួតលើកដំបូងដែលអ៊ឺរ៉ង់ធ្វើជាម្ចាស់ផ្ទះក្នុងឆ្នាំ2019 នេះ៕

October 3, 2019

Hun Sen Cup វគ្គផ្តាច់ព្រ័ត្រ នឹងធ្វើឡើងក្រោយចប់លីកកំពូលកម្ពុជា

ការប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន ប្រចាំឆ្នាំ2019នេះ ក្រុមបឹងកេត និងក្រុមព្រះខ័នរាជស្វាយរៀងនឹងត្រូវប្រជែងគ្នាដណ្តើមពានរង្វាន់មួយនេះនៅសប្តាហ៏ទី1 នៃខែវិច្ឆិកា ពោលគឺក្រោយការបញ្ចប់លីកកំពូលកម្ពុជា។

ឌោយឡែក ការប្រកួតវគ្គផ្តាច់ព្រ័ត្រឆ្នាំនេះនឹងធ្វើឡើងនៅពហុកីឡដ្ឋានជាតិ វេលាម៉ោង6 និង30នាទីល្ងាច និងមិនមានការប្រកួតគ្នាដើម្បីយកចំណាត់ថ្នាក់លេខ3 ឡើយ ដោយវិសាខា និងភ្នំពេញក្រោននឹងទទួលបានលេខ3ស្ទួន។

ចំពោះមូលហេតុនៃការរៀបចំតែមួយប្រកួតនេះ គឺដោយសារតែក្លិបវិសាខា និងភ្នំពេញក្រោនចង់ទុកពេលផ្តោតសម្រាប់ត្រៀមរដូវកាលថ្មី ហើយការដែលធ្វើក្រោយពីបញ្ចប់លីកកំពូលកម្ពុជានេះ គឺដោយសារតែចង់ឱ្យក្រុមដណ្តើមពានទាំង2 គឺ ក្រុមបឹងកេត និងក្រុមព្រះខ័នរាជស្វាយរៀង មានពេលវេលាគ្រប់គ្រាន់សម្រាប់ពានមួយនេះក្នុងវគ្គផ្តាច់ព្រ័ត្រ៕

October 3, 2019

អ្នកចាត់ការក្រុមជម្រើសជាតិកម្ពុជា ប្រហែលជាអាចនឹងទៅលេងនៅ Manchester United

លោក Keisuke Honda អ្នកចាត់ការក្រុមជម្រើសជាតិកម្ពុជាទំនងជាមានឱកាសក្នុងការផ្លាស់ទៅលេងនៅ English Premier League ក្នុងពេលឆាប់ៗនេះជាមួយក្លិប Manchester United។

បើតាមអ្នកចាត់ការក្រុមបិសាចក្រហម Manchester United លោក Ole Gunnar Solskjær បានបង្ហើបឱ្យដឹងពីគម្រោងទិញយកខ្សែប្រយុទ្ធដ៏មានសមត្ថភាពម្នាក់សម្រាប់ជើងទី2 រដូវកាលនេះ ឱ្យបាននៅដើមឆ្នាំ2020 ខាងមុខ។

គួរបញ្ជាក់ដែរថា Keisuke Honda បានបង្ហាញអារម្មណ៍ចង់លេងឱ្យក្លិបមួយនេះដោយមិនយកប្រាក់កម្រៃអ្វីទាំងអស់ តាមរយៈគណនី Twitter របស់ខ្លួន កាលពីប៉ុន្មានថ្ងៃមុននេះ ក្រោយពីទំនេរមិនមានក្លិបលេង និង លាឈប់ពីជម្រើសជាតិជប៉ុនអស់រយៈពេលជាងកន្លះរដូវកាលកន្លងមក៕

October 3, 2019

មកស្គាល់ពីតារាចម្រៀងល្បីៗនៅក្នុងស្រទាប់យុវវ័យត្រូវបានជ្រោមជ្រែងដោយតារាចម្រៀង លោក Eno

តារាចម្រៀងសាន់ដែលជាម្ចាស់បទម៉ោងបាយនឹកអូន រឺ ម្ចាស់បទប្រុសក្រញ៉ាញ់ខូចចិត្ត គឺលោក Eno បានបង្កើត Team Original Song ចំនួន១៣នាក់ ដែលលោកបានសម្រិតសម្រាងចម្រាញ់ ជ្រើសអ្នកចម្រៀងប្រុសស្រី សុទ្ធសឹងមានទេពកោសល្យ សម្ថភាពខ្ពស់ ជាពិសេសចរិកឫកពារថ្លៃថ្នូរ ចូរមកTeam Original របស់លោក។ ក្នុងនោះមាន៖

1. លោក Deeo Rapper ជាអ្នកចម្រៀង ជាអ្នករ៉េប និង ជាអ្នកនិពន្ធបទថ្មី
2. កញ្ញា លៀង ចាន់ឡា
3. កញ្ញា សោភា ទេពី
4. កញ្ញា អាំម៉ារ៉ា
5. កញ្ញា អាន់យ៉ា
6. ក្រុម PR
7. លោក SO-G-O
8. កញ្ញា សរ សុខកញ្ញា
9. កញ្ញា ណាន់ ណា
10. លោក ហ្វីណាល់
11. លោក ទេព អាណាក់
12. លោក អុីដា
13. លោក យ៉ាកូ

ក្រោយពេល បានលេចឮព័ត៌មាន ថាលោកបាននិពន្ធបទភ្លេងថ្មីមួយបទ ដែលជាបទមនោសញ្ចេតនាពិរោះ ជាសំនៀងរបស់ក្មេងស្រីកំសត់ ចាន់ឡា គឺបទ ( ស្រ្តី )រួចមក ក៏មានការគាំទ្រយ៉ាងខ្លាំពីសំណាក់មហាជន បន្ទាប់មកក៏បានសង្កេតឃើញថា លោកក៏បានផ្តល់ឱកាស់ ជូន ក្មេងស្រីកម្សត់ ចាន់ឡា ចូលច្រៀងក្នុងTeam Original របស់លោក បន្ទាប់មកមានបទចម្រៀងចេញជាបន្តបន្ទាប់របស់TeamលោកEno គឺបទទេពធីតា ម្ចាស់បទ ក្រុម PR, បទ អត់អូនមិនបានហេតុអ្វីនៅតែក្បត់: ជាសំនៀងច្រៀងយ៉ាងពិរោះរបស់យុវតីវ័យ១៦ឆ្នាំម្នាក់ ឈ្មោះ អាន់យ៉ា។ សូម្បីតែអ្នកចម្រៀងល្បីស្រទាប់យុវ័យ កញ្ញា សោភាទេពី និង លោក ទេព អាណាក់ ក៏ចូលជាសមាជិក Team Original Song របស់លោកដែរ។

លោកEno បានបញ្ជាក់ថាពួកគាត់ដែរខ្ញុំបានជ្រើសរើសហើយបានដាក់ឈ្មោះជា Team Original Song នេះ ពួកគាត់ទាំងអស់គ្នាសុទ្ធសឹងជាអ្នកចម្រៀងឯករាជ ច្រៀងតែបទភ្លេងថ្មីទេ គ្មានឡើយពាក្យថាCopy ដោយក្រោមការនិពន្ធ និង ដឹកនាំដោយលោកផ្ទាល់។

ដោយសារជីវិតរបស់លោកតាំងពី២០០៥មក មានសម្ថភាពដែរ តែទៅសំពះសុំគេច្រៀងក៏គេមិនឱ្យតស៊ូជិះម៉ូតូកញ្ចាស់ម្នាក់ឯងគេថាប្រលងជាប់ហើយឱ្យចូលផលិតកម្មចុងក្រោយប្រលងជាប់ជ័យលេខភីហើយក៏គេមិនឱ្យចូលខុសការសន្យាទៀត ចុងក្រោយសម្ងំច្រៀងពេលយប់បានមួយថ្ងៃ៤ $ ៥$ ប៉ុណ្ណោះ។ ជួលផ្ទះនៅម្នាក់ឯងឆ្ងាយពុកម៉ែមួយខែ៤៥$ ទៅសុំគេច្រៀង គេអោយច្រៀងដែរ តែច្រៀងហើយចាញ់បោកគេទៀត នេះហើយការឈឺចាប់ដែរ Eno ចង់បង្កើតក្រុមOriginal Song នេះឡើង។

លោកEno បានបញ្ជាក់ទៀតថាគាត់ត្រឹមជាកាំជណ្តើរដើម្បីឱ្យពួកគាត់តស៊ូជាន់ដើរឡើង ក៏ដូចជាណែនាំបង្ហាត់បង្រៀនចង្អុលបង្ហាញអោយស្គាល់អ្វីដែរហៅថាសិល្បះ និង ប្រើចរិកឫកពារថ្លៃថ្នូរបែបណាដើម្បីអោយហ្វេនៗអាណិតស្រលាញ់គាំទ្រ ព្រោះនៅពេលអត់ពីលោកទៅពួកគាត់និងរីកចម្រើន ព្រមទាំងអាចខ្លាយជាតារាល្បីឈ្មោះប្រចាំផលិតកម្មណាមួយមិនខាននៅក្នុងប្រទេសកម្ពុជា។ សូមជម្រាបបញ្ជាក់ថា បទចម្រៀងរបស់Team Original របស់លោកEno
និងបានផុសបង្ហោះជាផ្លូវការនៅក្នុង Chanel Youtubeថ្មីរបស់លោកគឺវាយអក្សរធំ ENO OFFICIAL ឬផេកផ្លូវការរបស់លោកគឺ TEAM ORIGINAL រឺ ENO_Official៕

October 3, 2019

រាសីខ្ពស់ !! អេឡិច ចាន់ត្រា ថតស្ពតនៅប្រទេសថៃតម្លៃខ្លួនថ្លៃគុណនឹង៥

តារាប្រុសស្រស់សង្ហា អេឡិច ចាន់ត្រា ត្រូវបានក្រុមផលិតករថៃជ្រើសរើសរូបលោកឱ្យឱ្យថតស្ពតពាណិជ្ជកម្មមួយក្នុងតម្លៃខ្ពស់ឱ្យមន្ទីរពេទ្យប្រទេសថៃ ដែលគេបានដឹងថា លោកទទួលបានតម្លៃគុណនឹង៥។

លោក អេឡិច ចាន់ត្រា ក្រោយត្រឡប់មកពីប្រទេសអង់គ្លេសភ្លាមក៏ទទួលបានការងារថ្មីភ្លាម ក្នុងនាមជាអ្នកតំណាងឱ្យស្រាបៀ SINGHA។ ទន្ទឹមគ្នានោះដែរ តារាសម្ដែងរូបស្រស់សង្ហាបានលេចមុខថតស្ប៉តឲ្យមន្ទីរពេទ្យមួយនៅប្រទេសថៃ។ បើតាមប្រភពផ្លូវការមួយបានឲ្យដឹងថាមន្ទីរពេទ្យមួយនៅប្រទេសថៃដែល អេឡិច ចាន់ត្រា ថតស្ប៉តនោះមានឈ្មោះថា PHAYATHAI2 ដោយកំលោះសង្ហាកូនកាត់ចិនរូបនេះទទូលបានតម្លៃខ្លួន ៦០ ៨០០០(ប្រាំមួយសែនប្រាំបីពាន់បាត) ស្មើនឹង២ម៉ឺនដុល្លារអាមេរិកឯណោះ។ បើប្រៀបធៀបជាមួយកម្ពុជាគឺខុសគ្នាឆ្ងាយខ្លាំងណាស់។

ជាមួយនឹងការថតស្ប៉តខាងលើ អេឡិច ចាន់ត្រា បានទទួលស្គាល់ថាកាលពីប៉ុន្មានថ្ងៃមុនលោក ពិតជាបានថតស្ប៉តឲ្យមន្ទីរពេទ្យមួយនៅក្នុងប្រទេសថៃពិតមែនដោយទទូលបានតម្លៃខ្លួនខ្ពស់ជាងថតស្ប៉តក្នុងស្រុក តែលោកសុំលាក់តម្លៃនេះ។ សូមជម្រាបបន្ថែមថា តារាចម្រៀង និងសម្ដែង អេឡិច ចាន់ត្រា ក្រៅពីមានមុខជំនួញផ្ទាល់ខ្លួន ថតស្ប៉ត និងជាអ្នកតំណាងចែកចាយឲ្យក្រុមហ៊ុនស្រាបៀ SINGHA ហើយនោះបច្ចុប្បន្ននេះគេសង្កេតឃើញថាកំលោះ សង្ហារូបនេះចេញទៅកើបលុយក្រៅប្រទេសស្ទើររកពេលសម្រាកមិនចង់បាន៕

October 3, 2019

Author: អេបិល