Author: អេបិល

ថ្ងៃទី 9 ខែ តុលា ឆ្នាំ 2020 លោក VJ DaDa បើកសម្ភោធភោជនីយដ្ឋាន GM ដែលស្វិតនៅខាងក្រោយសាលា ACE ឬអតីតក្លឹបឥន្ទ្រីខ្មៅ ផ្លូវត្រសក់ផ្អែម មានការចូលរួមយ៉ាងច្រើនកុះករពីសំណាក់ភ្ញៀវ និងតារាសិល្បៈ។ ម្ចាស់ភោជនីយដ្ឋានធំមួយបានកំណត់យកថ្ងៃបើកសម្ភោធហាងរបស់ខ្លួន ធ្វើជាថ្ងៃបរិច្ចាគមូលនិធិជួយដល់ គន្ធបុប្ផា និង សាលាដូង ខណៈដែលលោកបានប្រកាសថានឹងបន្តបំផុសបែបនេះជាបន្តទៀត ដើម្បីជាប្រយោជន៍ដល់សង្គម។ អ្នកចូលរួមភាគច្រើនបានទាំងសរសើរចំពោះទឹកចិត្តដ៏កម្រមាននេះនោះផងដែរ។

លោក VJ DaDa បានប្រកាសថា ភ្ញៀវដែលចូលរួមក្នុងពិធីសម្ភោធហាងរបស់ខ្លួននាថ្ងៃនោះ គឺលោកមិនតម្រូវឱ្យចងដៃ ឬទិញជាកាដូជូននោះឡើយ ដោយការចំណាយនៅក្នុងពិធីនោះទាំងស្រុង គឺលោកចំណាយរៀបចំដោយមិនយកចំណូលមកស៊ីសងវិញទេ។ ដោយឡែកភ្ញៀវទាំងអស់លោកស្នើរឱ្យបង្វែរការចងដៃ ទៅដាក់លុយនៅក្នុងហិបមូលនិធិវិញ ដោយក្នុងកម្មវិធីទាំងមូល លោកបានដាក់ហិបចំនួន2 គឺហិបមួយសម្រាប់ពេទ្យ គន្ធបុប្ផា និង ហិបមួយសម្រាប់ សាលាដូងនៅគិរីរម្យ ដោយភ្ញៀវកិត្តិយសពេញចិត្តបរិច្ចាគចូលហិបណា គឺតាមសទ្ធារៀងៗខ្លួន។

លោកនិយាយថា ប្រសិនបើភ្ញៀវម្នាក់បរិច្ចាគត្រឹមតែ5$ ចូលឱ្យហិបទាំង2 នោះភ្ញៀវរបស់លោកទាំងជាង 300នាក់ គឺពិតជាធ្វើឱ្យមូលនិធីទាំង2 ទទួលបានថវិការច្រើន។ ម្យ៉ាងលោកចង់បង្វែងការទិញផ្កាអបអរឱ្យក្លាយជារឿងដែលមានប្រយោជន៍សម្រាប់កុមារកម្ពុជាវិញផង។ លោកថាហិបទាំង2 នឹងយកទៅបើកដោយផ្ទាល់ ហើយរាប់លុយដោយផ្ទាល់នៅមន្ទីរពេទ្យគន្ធបុប្ផា និងសាលាដូង ដោយលោកបានទាំងប្រកាសទៀតថា ប្រសិនបើថវិការមូលនិធិនោះទទួលមិនសូវបានសមរម្យនោះលោកក៏នឹងបន្ថែមថវិការផ្ទាល់ខ្លួនពីលើផងដែរ។

ភ្ញៀវកិត្តិយសចូលរួមទាំងអស់សុទ្ធតែលាន់មាត់សរសើរពីទឹកចិត្តសប្បុរសធម៌របស់លោក ជាមួយនឹងជំហរមិនធ្លាប់មានដែលលោកបានប្រកាសមិនឱ្យភ្ញៀវចងដៃនៅក្នុងពិធីរបស់ខ្លួន ធ្វើជាទីលានបរិច្ចាគថវិការ ដើម្បីជួយដល់មន្ទីរពេទ្យគន្ធបុប្ផា និងសាលាដូងនៅគិរីរម្យ ដោយលោកបានទាំងអះអាងថា នឹងបន្តធ្វើរឿងបែបនេះបន្តទៀត ដើម្បីបំផុសឱ្យបានច្រើនជាប្រយោជន៍ដល់សង្គម ។ ក្នុងពិធីដែលចូលរួមយ៉ាងកុះករពីសំណាក់ភ្ញៀវកិត្តិយសនោះ លោកបានបង្វែរចំណងដៃគ្រប់កាក់គ្រប់សេនពីភ្ញៀវដែលបានចញលរួម ឱ្យក្លាយជាមូលនិធិជាប្រយោជន៍ដល់ គន្ធបុប្ផា និង សាលាដូង ។

គួរបញ្ជាក់ផងដែរថា GM PuB and Restaurant របស់លោក VJ DaDa ក៏នឹងមានគម្រោងដាក់បញ្ចូលជនពិការឱ្យទទួលសេវ៉ាកម្មម៉ាស្សាភ្ញៀវ 24 ម៉ោងផងដែរ ដើម្បីចញលរួមលើកកម្ពស់ការងារជនពិការដែលលោកចាត់ទុកថា គឺជាការរួមចំណែកជួយដល់សង្គម។ ដូច្នេះហើយទើបលោកត្រូវបានគេចាត់ទុកថាគឺជាម្ចាស់ហាងទី 1 ដែលហ៊ានយកកម្មវិធីធំរបស់ខ្លួនធ្វើជាមូលនិធិជួយដល់សង្គម។ នេះជាអាជីវកម្មធំមួយបស់លោក ដែលលោកមានភាគហ៊ុនប្រមាណ 35% ជាមួយនឹងដៃគូ2ទៀត និងជាអាជីវកម្មដែលបានចំណាយដើមទុនប្រមាណជាង 10ម៉ឺនដុល្លា៕

ទីបំផុតតារាចម្រៀងល្បីឈ្មោះប្រចាំផលិតកម្មរស្មីហង្សមាស អ្នកនាង សួស វីសា សម្រាលបានកូនស្រីម្នាក់ហើយ ក្រោយពីរឹតចំណងស្នេហ៍ជាមួយលោក ថមមី ដែលជាតារាសម្ដែងល្បីមួយរូបរួចមក។

លោក ថមមី ស្វាមី របស់អ្នកនាង សួស វីហ្សា បានផ្ដល់ព័ត៌មានលម្អិតក្នុងគណនីហ្វេសប៊ុករបស់លោកឱ្យដឹងថា៖ “ទីបំផុតកាដូនៃចំណងដៃរៀបការរបស់ពួកខ្ញុំទាំងពីរនាក់គឺកូនស្រីដ៏ឆ្លាតរបស់ប៉ាម៉ាក់បានសម្រាលដោយជោគជ័យនិងសុវត្តិភាព កូនស្រីបានមកឃើពិភពលោកដ៏ស្រស់ស្អាតនិងជ្រកក្រោមម្លប់នៃសុខសន្តិភាពហើយ សមាជិកថ្មីនៃក្រុមគ្រួសារយើងខ្ញុំនិងជាបេះដូងនៃ ប៉ាៗ Tommy ម៉ាក់ៗ Sous Visa កូនស្រីមានឈ្មោះថា ថង សាម៉ូលីណា ហៅ Jenny កើតនៅថ្ងៃទី 09 ខែ 10 ឆ្នាំ 2020 វេលាម៉ោង 9:09 នាទីព្រឹក (Am) អូនកើតឆ្នាំជូត (តំណាងសត្វកណ្តុរមាស) សូមអរគុណបងប្អូនដែលបានជូនពរនិងផ្តល់ជាកំលាំងចិត្តមកកាន់ក្រុមគ្រួសាររបស់យើងខ្ញុំ ខ្ញុំតំណាងឱ្យគ្រួសារទាំងមូលសូមអរគុណបងប្អូនទាំងអស់គ្នាខ្លាំងមែនទែន ខ្ញុំនិងភរិយាសប្បាយចិត្តណាស់”។

គួររំឭកដែរថា ក្រោយពីស្វែងយល់ចិត្តគ្នាជាប្រមាណជាង4ឆ្នាំ គូស្នេហ៍សិល្បៈសួស វីហ្សា និង ថមមី បានសម្រេចចិត្តរៀបអាពាហ៍ពិពាហ៍កាលពីចុងខែវិច្ឆិកាឆ្នាំ 2019 ក្រោមវត្តមានភ្ញៀវជាង1000នាក់ ។ បន្ទាប់ពីរៀបការរួច គូស្នេហ៍សិល្បៈ១គូនេះបានដឹកដៃគ្នាទៅក្រេបទឹកឃ្មុំនៅឯក្រៅប្រទេសរហូតដល់ទៅ 8ប្រទេសឯណោះ មាន ប្រទេសបារាំង ស្វីស អេស្ប៉ាញ ហុឡង់ដ៍ អ៊ីតាលី អាល្លឺម៉ង់ ប៉ូឡូញ និង ដាណឺម៉ាក ដោយត្រូវចំណាយ ពេលនៃការដើរលេងនេះខ្ទង់មួយខែ។ ពួកគេបានបង្ហាញភាពហ៊ឺហាខ្លាំងទាំងការបង្ហាញរថយន្តទំនើបថ្លៃកប់ពពក និងការបើកដំណើរការហាងលក់សម្លៀកបំពាក់នៅតំបន់ដ៏មមាញឹកនៅរាជធានីភ្នំពេញ៕

អតីត Freshie Boy លោក ថៃ នរៈពិទូ ដែលគេចាំបានថាធ្លាប់ជួបរឿងអាស្រូវ គ្រឿងញៀននោះ ធ្លាប់បានបង្ហាញមុខជាសាធារណៈហើយកាលពីថ្មីៗនេះ។ ក្រោយពេលបង្ហាញមុខ អតីតតារាប្រុសរូបនេះហាក់មានបំណងវិលមកកាន់ការងារសិល្បៈជាថ្មីថែមទាំងបង្ហាញពីគម្រោងក្នុងភាពយន្តខ្នាតខ្លីថ្មីមួយផងដែរ។

យោងតាមវីដេអូបង្ហោះជាសាធារណៈរបស់ទំព័រហ្វេសប៊ុក @One Shot Music ដែលគេឯងដឹងថាជាផលិតកម្មថ្មីរបស់លោក Rith Omega អតីតអ្នកដឹកនាំសម្តែងល្បីឈ្មោះមួយរូបនៅក្នុងផលិតកម្មថោន បានឲ្យដឹងដំណឹងការវិលចូលសិល្បៈវិញជាថ្មីរបស់ អតីត Freshie Boy លេខ១ ឆ្នាំ២០០៦ លោក ថៃ នរៈពិទូ បន្ទាប់ពីផ្អាកសិល្បៈទាំងស្រុងអស់រយៈពេលជាច្រើនឆ្នាំកន្លងទៅ។ វីដេអូចម្រៀងដែលអតីត Freshie Boy ឆ្នាំ២០០៦រូបនេះចូលរួមសម្តែងចំណងជើង «បើគ្មានបងអូននឹងសប្បាយចិត្ត» ។

យ៉ាងណាមិញ នៅមិនទាន់មានការអះអាងជាផ្លូវការពីសាម៉ីខ្លួននៅឡើយទេចំពោះការវិលត្រលប់ចូលវិស័យសិល្បៈវិញទាំងស្រុង ឬយ៉ាងណានោះ។ គួររលឹកថា មុនពេលមានរឿងរ៉ាវចម្រូងចម្រាស់ជាច្រើនបានកើតឡើង អតីត Freshie Boy លេខ១ លោក ថៃ នរៈពិទូ ធ្លាប់ជាតារាសម្តែងម្នាក់មានប្រជាប្រិយភាពមួយរូបផងដែរ ដែលមហាជនតែងកោតសរសើរលើសមត្ថភាព និងទេពកោសល្យនៃការសម្តែងពីមួយរឿងទៅមួយរឿងផងដែរ៕

នៅពេលថ្មីៗនេះ តារាសិល្បករជាច្រើនដួងពីក្រុមគ្រួសារតារាកម្ពុជា រួមគ្នាជាមួយតារា Facebook អ្នកនាង រៃ សោភា ដែលគេស្គាល់ថាជាម្ចាស់ហាង Sophea Skincare និងត្រូវបានគេឱ្យរហ័សនាមថា កញ្ញា Pak Bom ខ្មែរ នោះបានដឹកនាំជំនួយជាអង្ករ ជាថវិការ និង សម្ភារៈជាច្រើន ជួយដល់មណ្ឌលកុមារកំព្រាមួយកន្លែងនៅស្រុក កណ្ដាលស្ទឹង ។ ម្នាក់ៗសុទ្ធតែបង្ហាញនូវអារម្មណ៍ក្ដុកក្ដួលពេលរៀបរាប់ពីជីវិតតស៊ូចែករំលែកបទពិសោធន៍ ដល់កុមារទាំងនោះ។

ការប្រគល់ជំនួយអង្កររហូតដល់ 1 តោនកន្លះ ស្មើរនឹង 30 បេនេះ គឺជាជំនួយដោយផ្ទាល់របស់ម្ចាស់ហាង Sophea Skincare រួមទាំងតំណាងចែកចាយ ដោយអ្នកស្រីបានយកទៅប្រគល់ដោយផ្ទាល់នៅទីតាំងមណ្ឌល ដោយមានតំណាងចែកចាយជាច្រើនរូបចូលរួម។ នេះគឺជាជំនួបសួរសុខទុក្ខកុមារកំព្រាទ្រង់ទ្រាយធំមួយ ដែលមានការសហការណ៍ពី គ្រួសារតារាកម្ពុជា ខណៈដែលសិល្បៈករដែលបង្ហាញវត្តមាននៅទីនោះមិនត្រឹមតែបរិច្ចាគពេលវេលា និងសំណេះសំណាលលើកទឹកចិត្តដល់ក្មេងកំព្រាប៉ុណ្ណោះនោះទេ តែក៏មានការបរិច្ចាគជាថវិការរៀងៗខ្លួន ដោយសរុបជាថវិការ និងជំនួយ ក៏ច្រើនគួរសមផងដែរ។

អ្នកនាង លី ម៉ារីណា ថាក្នុងនាមអ្នកនាងដែលបានចូលរួមដោយផ្ទាល់ អ្នកនាងក៏បានបរិច្ចាគនូវថវិការផ្ទាល់ខ្លួនមួយចំនួនផងដែរ ដើម្បីរួមចំណែកជាមួយម្ចាស់ហាង Sophea Skincare អ្នកនាងចង់ឃើញសកម្មភាពសប្បុរសធម៌បែបនេះកើតមានកាន់តែច្រើន ដើម្បីជាការបំផុសនូវអំពើល្អក្នុងសង្គម។

អ្នកនាង ម៉ៅ ស៊ីណាត និង កញ្ញា សូ ដានីតា ក៏បង្ហាញការចាប់អារម្មណ៍ស្រដៀងគ្នាផងដែរថា សកម្មភាពសប្បុរសធម៌របស់អ្នកស្រី រៃ សោភា គឺជាអ្វីដែលអ្នកសិល្បៈដូចជារូបអ្នកនាងគាំទ្រយ៉ាងពេញទំហឹង។ អ្នកទាំងពីរក៏ទទូចឱ្យសប្បុរសជនដ៏ទៃទៀត រួមចំណែកជួយដល់សមាគមកុមារកំព្រាមួយនេះឱ្យអស់ពីលទ្ធភាពបន្តទៀតផងដែរ ដើម្បីជាប្រយោជន៍ដល់ក្មេងៗដែលប្រឈមនឹងការលំបាកជាច្រើននៅក្នុងសមាគម។

អ្នកស្រី ប៉ូ ស្រីគង់ ប្រធានសមាគម ស្នាមញញឹមថ្មីនៃក្ដីសង្ឃឹមកុមារកម្ពុជា បានអះអាងថា មណ្ឌលរបស់អ្នកស្រីចិញ្ចឹមក្មេងកំព្រាប្រមាណជា 7 ឆ្នាំមកហើយ ដោយមកដល់បច្ចុប្បន្នមានក្មេងៗសរុបចំនួន 69 នាក់។ អ្នកស្រីថាបើទោះបីជាមានការជួយជ្រោមជ្រែងពីសំណាក់សប្បុរសជនខ្លះ ក៏កង្វះខាតនៅតែកើតមាន ពិសេសការចំណាយលើម្ហូបប្រចាំថ្ងៃ និងខ្វះកន្លែងស្នាក់នៅរបស់ក្មេងតែម្ដង។

ទឹម រដ្ឋា បានបង្ហាញសម្រស់គ្រងឈុត «នាងចម្បាំងស្វា ស» ជាឈុតសាកល្បងបង្កើតថ្មី ដែលស្ថិតនៅក្នុងចក្រវាឡសិល្បៈអិយរ្យធម៌ខ្មែរ ក្រោមប្រធានបទស្រ្តីក្លាហាន ។ នេះជាលើកដំបូងដែលគេបានឃើញ ទឹម រដ្ឋា តែងខ្លួនបែបនេះ ដែលមើលទៅពិតជាមានភាពជឿជាក់ និង ក្លាហានដែលស័ក្តិសមជាមួយនឹងការរចនាទាំងសម្លៀកបំពាក់ និងគ្រឿងអលង្ការ ហើយក្នុងនោះក៏មានការសរសើរពីសំណាក់មិត្តភក្តិ និង អ្នកគាំទ្រថាស្រស់ស្អាត និង លេចធ្លោផងដែរ ។

ឈុតស្ដេចចម្បាំងស្វា ស ពិតជាមើលទៅស្រស់ស្អាតខ្លាំងណាស់ បានរច​នាឡើងតាមបែបបុរាណ និងភាពច្នៃប្រឌិត ម្យ៉ាងវិញទៀត ពេលតារាស្រីរូបនេះ បានស្លៀ​កឈុតនេះទៅ ពិតជាសក្ដិសម ហើយអង់អាច និងរឹងមាំតែម្ដង។ ជាមួយគ្នាក៏ឃើញមានតារាប្រុសរាងខ្ពស់ស្រឡះលោក អ៊ុន សិទ្ធា បានចែករំលែកបន្តដោយភ្ជាប់ជាមួយសំណេរថា៖ “វគ្គដំបូង សូមបង្ហាញពីកញ្ញាTim Rothaក្នុងឈុតចម្បាំងស្វាសយល់យ៉ាងណាដែរ ? បើ​ស្រ​លាញ់ និងគាំទ្រស្នាដៃរបស់ខ្មែរ ជួយលើកស្ទួយទាំងអស់គ្នាផងសង្ឃឹមថា នឹងមានឈុតបែបនេះក្នុងភាពយន្តខ្មែរយើងក្នុងពេលឆាប់ៗនេះ។

ក្រៅពីការងារបង្ហាញម៉ូដមិនត្រឹមតែប៉ុណ្ណោះ មួយរយៈពេលចុងក្រោយនេះ ទឹម រដ្ឋា កាន់តែមានភាពមមាញឹកជាមួយការងារខ្លាំងជាងមុនគួរឱ្យកត់សម្គាល់ មិនថាថតខ្សែភាពយន្ត ថតស្ពត ឬថតសម្អាងការជាដើម៕

លោក អ៉ិន សុភិន បានបង្ហាញប្រតិកម្មខ្លាំងៗតបនឹងអ្នករិះគន់ដែលបានលើកឡើងថា កម្មវិធី Miss Grand Cambodia ឆ្នាំ2020 ដែលទើបតែបានបញ្ចប់ មានបរិយាកាសអវិជ្ជមានច្រើន និងថាក្រុមការងាររបស់លោកធ្វើឱ្យអាម៉ាស់ក្នុងខ្សែរភ្នែកអន្តរជាតិ។ លោកថ្លែងបញ្ជាក់ថា លោកស្វាគមន៍រាល់ការរិះគន់បែបស្ថាបនាតែចំពោះការរិះគន់បែបមាក់ងាយ និងជាន់ពន្លិចមកលើការប្រឹងប្រែងរបស់លោក និងក្រុមការងារនោះលោកមិនទទួលយកនោះឡើយ។

លោកថា កម្មបិធីមួយនេះទម្រាំតែដើរដល់ទីបញ្ចប់គឺម្នាក់ៗពិបាកគ្រប់គ្នា ទំាងក្រុមការងារ និងបេក្ខនារីដោយផ្ទាល់។ ក្នុងនោះបរិយាកាសនៃការរៀបចំក៏មិនស្រួលនោះដែរ ដោយសារតែផ្ទុះបញ្ហាកូវីដ តែកម្មវិធីមួយនេះនៅតែបញ្ចប់បានជោគជ័យ។ លោកថាអ្នកខ្លះរិះគន់លើពិធីករ ពិធីការិនី តែលោកមិនអាចយកពិធីករពិធីការិនីខាងក្រៅដែលគ្មានការស្វែងយល់ពីកម្មវិធីទាំងមូលឱ្យមកអត្ថាធិប្បាយពីកម្មវិធីមួយនេះបានឡើយ។

លោកបន្តថា ពិធីករពិធីការិនីគឺពួកគាត់ជាក្រុមការងាររៀបចំដូច្នេះបើមិនលើកទឹកចិត្តអ្នកទាំងពីរ ក៏កម្មវិធីទាំងមូលមិនអាចមានថ្ងៃនេះដែរ។ ពាក់ព័ន្ធនឹងអ្នកថាកម្មវិធីរបស់លោក រញ៉េរញ៉ៃពេលប្រគល់ពាន លោកថាវាមិនមែនជារឿងចម្លែកនោះទេព្រោះនេះគឺជាបទពិសោធន៍លើកដំបូង ហើយកំហុសដែលបានកើតឡើងក៏ជារឿងអចេតនាតែប៉ុណ្ណោះ។ ក្នុងនោះលោកថាមានឧបសគ្គជាច្រើនផ្សេងទៀតកើតឡើងដូចជា បីថ្ងៃមុនប្រកួតស្តាតអូឡាំពិកបែជាប្រកែកមិនឱ្យរៀបចំដោយលើកហេតុផលថាខ្លាចផ្ទុះកូវីដ ។

ដូច្នេះហើយទើបធ្វើឱ្យប្រព័ន្ធឆាកភ្លើងដែលបានត្រៀមជាស្រេចនៅស្តាតអូឡាំពិក មិនអារើយកមករៀបនៅទីតាំងថ្មីបាន សូម្បីតែប្រព័ន្ធអុបតិចសម្រាប់ផ្សាយបន្តផ្ទាល់តបស់ប៉ុស្តិ៍លេខ5 ក៏មិនអាចរើមកទីតាំងថ្មីទាន់ហើយធ្វើឱ្យការផ្សាយបន្តផ្ទាល់មានបញ្ហា ដែលនាំឱ្យពន្យាពេលកម្មវិធី។ បេក្ខនារីដែលគ្រងឈុតបុរាណភាគច្រើនក៏ត្រូវវិញ្ញាណសន្ឋិតមិនអាចឡើងឆាកបានតាមម៉ោងកំណត់ ដែលសុទ្ធតែបង្កឱ្យកម្មវិធីត្រូវរយាលព្រោះត្រូវការពេលវេលាដោះស្រាយ។

សរុបមកលោកថា អ្នករិះគន់មិនដឹងពីផលវិបាកនោះទេ តែលោកនិងក្រុមការងារគឺពោពេញដោយភាពស្មុគស្មាញទម្រាំតែដំណើរការកម្វិធីមួយនេះបានចប់។ នៅក្នុងពិធីនោះក៏មានការញ៉ំាអាហារសាមគ្គី និងលើកឡើងពីបញ្ហាផ្សេងៗម្ដងម្នាក់ៗ ពីសំណាក់ Miss Grand Cambodia ដែលបានទទួលពានទាំងអស់នោះផងដែរ៕

កាលពីង្ងៃទី 27 កញ្ញា ឆ្នាំ 2020 តារាចម្រៀង សាន់ដេ លោក អ៊ីណូ (Eno) មិនត្រឹមតែធ្វើពិធីខួបកំណើតដូចឆ្នាំមុនៗប៉ុណ្ណោះទេ លោកក៏បានប្រកាសបើកសម្ភោធឃ្លាំងរថយន្ត ដែលមានសេវ៉ាកម្មទិញលក់ និងជួសជុលរថយន្តនៅជិតផ្សារទំនើប Aeon2 ដែលប្រើដើមទុនរហូតដល់ជាងកន្លះលានដុល្លារផងដែរ។ នេះជាអាជីវកម្មផ្ទាល់ខ្លួនបន្ទាប់ពីលោកត្រូវគេដឹងថាមានអាជីពលក់ឡានកន្លងមកផងដែរ។ លោក Eno ថ្លែងក្នុងកិច្ចសម្ភាសន៍ថា បន្ទាប់ពីលោកទទួលបានបទពិសោធន៍ច្រើននៅក្នុងមុខរបរលក់ឡាន និងមានការចូលរួមពីក្រុមគ្រួសាររបស់លោក ទើបលោកសម្រេចបើកអាជីវកម្មថ្មីនេះឡើងដោយដាក់ឈ្មោះថា Eno Auto Car ដែលនេះគឺជាឃ្លាំងលក់រថយន្តមួយផ្ទាល់ខ្លួន។

ម្យ៉ាងមកពីលោកចង់ធ្វើពិធីនេះឱ្យអធិកអធមផងទើបសម្រេចបើកសម្ភោធចំថ្ងៃខួបកំណើតតែម្ដង ដោយលោកអញ្ជើញភ្ញៀវអ្នកសិល្បៈប្រមាណជាង 300 នាក់អញ្ជើញចូលរួម។ លោក Eno បន្តថា ហេតុផលដែលលោក ហ៊ានបើកអាជីវកម្មលក់ឡានដោយផ្ទាល់ខ្លួននេះ គឺដោយសារតែលោកមើលឃើញនូវយុត្តិសាស្ត្រជោគជ័យរួចទៅហើយស្របគ្នាដែលទីផ្សារលក់ឡានរបស់លោកមានអតិថិជនទូទាំងប្រទេសទទួលស្គាល់រួចមកហើយ ជាពិសេសគឺយុទ្ធសាស្ត្របង់រំលោះជាមួយនឹងលក្ខខ័ណ្ឌងាយៗ លក់តម្លៃទាបជាងទីផ្សារ និងលក់តែរថយន្តមិនបុក មិនកាត់ត ហើយមានសេវ៉ាធានាត្រឹមត្រូវ។

យានដ្ឋានរបស់លោកមានលក់ទាំងរថយន្តធម្មតា និងសេរីទំនើប ហើយបើទោះបីជាលោកជោគជ័យនឹងអាជីវកម្មលក់ឡានមួយនេះក៏លោកនៅតែប្រកាន់ជំហរមិនដកថយក្នុងអាជីបសិល្បៈនោះដែរ ដោយលោកនឹងដើរឱ្យជោគជ័យទន្ទឹមគ្នា។ លោកថា សប្បាយចិត្តដែលពិធីសំខាន់របស់ខ្លួនបើទោះបីជាមានការរំខានដោយភ្លៀង ក៏មានសិល្បៈករ និងភ្ញៀវអញ្ជើញចូលរួមពេញរោងផងដែរ ជាពិសេសគែឺតារាល្បីៗ ដែលលោកមានទំនាក់ទំនងនៅក្នុងសង្គមសិល្បៈ។

បើទោះបីប្រឡូកក្នុងអាជីពសម្ដែងនិងពិធីករតែប្រមាណជ2ឆ្នាំចុងក្រោយ តែអ្នកឯកទេសផាត់មុខដែលមានឱកាសបានសម្ដែងស្គាល់អ្នកសិល្បៈព្រោះតែមានជំនាញផាត់មុខលោក អៀម សុខា ត្រូវគេកត់សម្គាល់ថាទទួលបានការស្រឡញ់រាប់អានពីអ្នកសិល្បៈគួរឱ្យសរសើរតែម្ដង។ ជាក់ស្ដែងនៅក្នុងពិធីខួបកំណើតរបស់លោកកាលពីថ្ងៃទី 27 ខែកញ្ញា ឆ្នាំ 2020 មុននេះ មិនត្រឹមតែមានសិល្បករថ្មីៗនិងមិនសូវល្បីប៉ុណ្ណោះទេ សូម្បីតែតារាដែលមានកេរ្តិ៍ឈ្មោះបោះសំឡេង ក៏មានវត្តមានឡើងផ្អៀងភោជនីយដ្ឋាន V-Friend ឬស្សីកែវផងដែរ។

លោក អៀម សុខា បានថ្លែងបញ្ជាក់ថាគ្មានអ្វីសប្បាយចិត្តជាឃើញបងប្អូនអ្នកសិល្បៈផ្ដល់កិត្តិយសឱ្យលោកដល់ម្លឹងនោះឡើយ ដោយអ្នកសិល្បៈខ្លះ គឺលោកមិនបានអញ្ជើញដោយផ្ទាល់ផង តែក៏នៅតែបានអញ្ជើញចូលរួម។ នៅក្នុងពិធីនោះក៏មានវត្តមានលោកជំទាវ ហ៊ុន ស៊ីណាត និងអ្នកមានមុខមាត់មួយចំនួន ក្រៅពីអ្នកសិល្បៈផងដែរ។ យ៉ាងណាក៏ដោយលោកអះអាងថា នឹងមិនធ្វើពិធីខួបកំណើតជាលើកទី2 ទៀតនោះទេ ដើម្បីកុំឱ្យរំខានអ្នកសិល្បៈ បើទោះជាពិធីខួបកំណើតរបស់លោកលើកនេះមានភ្ញៀវកិត្តិយសចូលរួមកុះករ ដែលអាចនិយាយបានថាចំណេញមិនតិច ម្យ៉ាងមកពីលោកមមាញឹកខ្លាំងនឹងការងារផាត់មុខនិងសម្ដែងផង ទើបលោកប្រកាសថាមិនធ្វើជាលើកទី2នោះទេ។

ជាក់ស្ដែងពិធីដែលបានធ្វើឡើងនេះមិនត្រូវនឹងថ្ងៃកំណើតរបស់លោកនោះឡើយ ដោយសារតែថ្ងៃកំណើតរបស់លោកត្រូវនឹងថ្ងៃ9 ខែ9 ឯណោះទេ តែបណ្ដាលមកពីរវល់ដកឃ្លាមិនរួចទើបសម្រេចធ្វើខួបថ្ងៃទី27នេះវិញ។ នៅក្នុងពិធីខួបកំណើតរបស់លោកគេឃើញមានវត្តមានសិល្បករចាស់ថ្មី ល្បីឈ្មោះជាច្រើនដោយ ភ្ញៀវកិត្តិយសភាគច្រើននៅច្រៀងរាំយ៉ាងសប្បាយរហូតដល់ម៉ោង12 យប់ទៀតផង។

គួរបញ្ជាក់ផងដែរថាលោក អៀម សុខា គឺជាអ្នកផាត់មុខល្បីឈ្មោះមួយរូបដោយក្នុងរង្វង់សិល្បៈ លោកជាអ្នកផាត់មុខឱ្យក្រុម ហ្វ្រេសស៊ីប៊យ&ហ្គើល និងក្រុមកញ្ញាឯក របស់ក្រុមហ៊ុន BKA ក្រៅពីផាត់មុខឱ្យតារាចម្រៀង និងតារាសម្ដែងល្បីៗ នៅក្នុងពិភពសិល្បៈ។ លោកកាន់តែត្រូវបានគេស្គាល់តាមរយៈការសម្ដែងក្នយងរឿង « សរសរកន្លោង » និងភាពយន្តមួយចំនួនទៀត លោកក៏ជាពិធីករប្រចាំនូវប៉ុស្តិ៍លេខ5 និងត្រៀមបង្ហាញនូវស្នាដៃភាពយន្តថ្មីៗក្រោយពីវាយលុកសិល្បៈផងដែរ។