អេបិល - La Reine Media

ROYAL SALUTE THE MALTS BLEND 21 ឆ្នាំ ប្រកាសសម្ពោធជាលើកដំបូងនៅកម្ពុជា

កាលពីថ្ងៃទី 22 ខែវិច្ឆិកាឆ្នាំ2019 ក្រុមហ៊ុន ភើណូដ រីខាដ (ខេមបូដ) បានធ្វើការសម្ពោធជាផ្លូវការនូវប្រភេទស្តេចស្រាវិស្គីដែលមានអាយុកាល 21ឆ្នាំ មួយប្រភេទដែលមានឈ្មោះថា The Malts Blend។

The Malts Blend បានចម្រាញ់រយៈពេល 21ឆ្នាំ ចេញពីគ្រាប់ធញ្ញជាតិតែមួយប្រភេទដែលមានអាយុកាលយ៉ាងតិច 21ឆ្នាំយកចេញមកពីតំបន់ផលិតវិស្គីទាំងប្រាំ (Speyside, Highlands & Island, Lowlands, Islay, and Campbelltown) នៅក្នុងប្រទេសស្កុតឡេន។ គ្រាប់ធញ្ញជាតិទាំងនោះ បានបង្កើតជាក្លិនមួយដែលល្អបំផុត។ ជាលទ្ធផល យើងបានបង្កើតឡើងនូវប្រភេទវិស្គីមួយប្រភេទដែលពោរពេញទៅដោយក្លិននិងរសជាតិ នៃទិន្នផលគ្រាប់ធញ្ញជាតិ ដែលប្រកបដោយភាពឈ្ងុយឈ្ងប់ប្រៀបដូចជាក្លិនរបស់ផ្លែឈើស្រស់ដែលទើបប្រមួលផលមកពីចម្ការ។ នេះគឺជាលើកដំបូងដែលយើងបានផលិតនិងដាក់បញ្ចូលនូវប្រភេទវិស្គីនេះនៅក្នុងគ្រួសារ Royal Salute 21 ឆ្នាំ ជាមួយនឹង Royal Salute Signature Blend ដែលបានផលិតឡើងដើម្បីជាដង្វាយក្នុងឳកាសគ្រងរាជសម្បត្តិរបស់ព្រះមហាក្សត្រិយានី Elizabeth ទីពីរនៅក្នុងឆ្នាំ1953។ The Malts Blend បានផលិតឡើងក្នុងដប និងសម្បកប្រអប់ ដែលមានរូបរាងថ្មីស្រឡាងដែលបង្ហាញពីប្រវត្តិសាស្រ្តដ៏សំបូរបែបរបស់ប្រទេសស្កុតឡេនជាមួយនឹងរូបភាពចម្រុះពណ៌នៃសត្វនិងផ្កាជាច្រើនប្រភេទនៃសួនសត្វនៅក្នុងរាជវាំងរបស់ប្រទេសអង់គ្លេស។

លោក Sandy Hyslop ជាអ្នកឯកទេសក្នុងការផលិតនិងលាយស្រា Royal Salute បានមានប្រសាសន៍ថា “ប្រភេទគ្រាប់ធញ្ញជាតិដែលយកមកចម្រាញ់ក្នុងការផលិតស្រានេះឡើងប្រៀបបីដូចជាអក្សរភ្លេងដែលសរសេរឡើងចេញជាតន្រ្តី ពោលវាបង្កើតបានជារសជាតិពិសេសនៃវិស្គីនៅពេលដែលគ្រាប់ធញ្ញជាតិទាំងនោះបានរួមបញ្ចូលគ្នា។ ជាមួយនឹងលក្ខណៈពិសេសនៃគ្រាប់ធញ្ញជាតិដែល បានធ្វើឲ្យរសជាតិនិងក្លិនរបស់ វិស្គី The Malts Blend កាន់តែអស្ចារ្យ ជាពិសេសចាប់ពីពេលដែលអ្នកភ្លក់នូវរសជាតិដ៏ផ្អែមលាយជាមួយក្លិនឈួលតិចៗ អ្នកនឹងកាន់តែមានអារម្មណ៍ថាវាគឺជាវិស្គីមួយដែលបានបង្កើតដោយវេទមន្ត”។ លោកបានបន្តទៀតថា “ ក្នុងនាមជាអ្នកឯកទេសក្នុងការផលិតនិងលាយស្រា Royal Salute គ្មានអ្វីដែលប្រសើរជាងការខិតខំប្រឹងប្រែងបន្ត និងរក្សានូវកេរតំណែលនៃរូបមន្តនៃការផលិតនិងលាយបញ្ចូលគ្នារបស់ វិស្គីប្រភេទនេះដែលបានបង្កើតតាំងពីឆ្នាំ1953 មកនោះទេ។ ប៉ុន្តែឳកាសនៃការស្វែងរកនិងអភិវឌ្ឍនូវរូបមន្តដើម្បីបង្កើតជារសជាតិនិងក្លិនថ្មីៗឲ្យសាកសមទៅនឹងលក្ខណៈសម្បត្តិដើមរបស់វា គឺជាក្តីសុបិន្តយ៉ាងពិតប្រាកដសម្រាប់យើងក្នុងនាមជាអ្នកផលិតវិស្គីនេះ”។ ជាងនេះទៅទៀតវាក៏ត្រូវបានច្រកចូលទៅក្នុងដប ប៉សឺឡែនយ៉ាងប្រណីតដែលឆ្លាក់និងខាត់ឲ្យរលោងប្រៀបដូចជាត្បូងមរកតដែលដាំនៅលើម្កុដរបស់ព្រះមហាក្សត្រនៃប្រទេសអង់គ្លេស។

លោក Mathieu Deslandes ប្រធានផ្នែកទីផ្សារស្រា Royal Salute បានមានប្រសាសន៍ថា “យើងពិតជាមានមោទនភាពចំពោះផលិតផលរបស់យើង ជាមួយនឹងរូបរាងនៃការវេចខ្ចប់ថ្មីនៅក្នុងប្រអប់ដ៏ប្រណីត របស់សមាជិកថ្មី The Malts Blend ដែលជាសមាជិកថ្មីនៃគ្រួសារ Royal Salute 21 ឆ្នាំ ជាពិសេសវាបានបន្ថែមភាពទាក់ទាញនិងបង្កើនបន្ថែមនូវកេរ្ត៍ឈ្មោះមួយកម្រិតទៀតនៃស្កុតវិស្គីផងដែរ។ លោកបានបន្ថែមទៀតថា “Royal Salute មានប្រវត្តិសាស្ត្រគួរជាទីមោទនៈ ហើយយើងក៏តែងតែខិតខំប្រឹងប្រែងថែរក្សាកេរតំណែលនេះឲ្យនៅស្ថិតស្ថេរប្រៀបបីជាបេះដូងរបស់យើងផងដែរ។ យ៉ាងណាមិញយើងខិតខំស្រាវជ្រាវនិងស្វែងរកនូវបច្ចេកវិទ្យាចុងក្រោយ ដើម្បីផលិតស្រានេះ ជាលទ្ធផលយើងក៏ទទួលបាននូវវិស្គីប្រភេទថ្មីមួយនេះ។ The Malts Blend គឺជាឈ្មោះនៃវិស្គីថ្មីមួយប្រភេទនេះ ដែលយើងជឿជាក់ថាវាសាកសមបំផុតសម្រាប់ខ្សែរាជវង្ស”។

នាថ្ងៃដដែលនោះដែរ ក្រុមហ៊ុន ភើណូដ រីខាដ (ខេមបូដ) ក៏បានអញ្ជើញភ្ញៀវកិត្តិយស ទាំងភ្ញៀវជាតិ និងភ្ញៀវអន្តរជាតិជាដៃគូសហការជាច្រើនមកចូលរួមនៅក្នុងកម្មវិធីពិសាភោជនីយអាហារពេលល្ងាចដ៏អស្ចារ្យ ដែលរៀបចំឡើងដោយ ស្តេចស្រាវីស្តី Royal Salute ដើម្បីអបអរសាទរ និងស្វាគមន៍ដល់វត្តមាននៃរូបរាងថ្មី និងរសជាតិថ្មីនៃស្រា Royal Salute 21ឆ្នាំ Malts Blend នៅក្នុងទីផ្សារកម្ពុជា។ នៅក្នុងរាត្រីនោះដែរ ភ្ញៀវកិត្តិយសទាំងអស់ បានទទួយនូវការស្វាគមន៍យ៉ាងកក់ក្តៅ និងបានទទួលនូវបទពិសោធន៍មុនគេក្នុងការសាកល្បងភ្លក្សរសជាតិ និងសិក្សាពីភាពខុសគ្នានៃរសជាតិរបស់ស្រាវីស្គី Royal Salute ទាំង4ប្រភេទ ដែលជាស្តេចស្រាវីស្គី Royal Salute ដ៏ល្បីល្បាញទូទាំងពិភពលោក។ ស្រាវីស្គី Royal Salute មានរសជាតិផ្អែម ឈ្ងុយ និងប្លែកជាប់ចិត្តតែម្តង គឺវិសេសជាងស្រាវីស្គីដទៃទៀត។ ភ្ញៀវជាតិ និងភ្ញៀវអន្តរជាតិទាំងអស់ដែលមានវត្តមាននៅក្នុងកម្មវិធីពិសាភោជនីយអាហារពេលល្ងាចដ៏អស្ចារ្យ ដែលរៀបចំឡើងដោយ ស្តេចស្រាវីស្តី Royal Salute គឺពិតជាទទួលបាននូវមហាកិត្តិយសយ៉ាងធំធេង ដែលបានក្លាយជាមនុស្សដំបូងគេ ដែលបានភ្លក្សនូវរជាតិដ៏វិសេសរបស់ស្តេចស្រាវីស្តី Royal Salute 21ឆ្នាំ Malts Blend៕

November 23, 2019

ពីរោះរណ្ដំចិត្ត!! បទថ្មី «កោះអូនកោះបង» ពីអង្គក្សត្រីតូច នរោត្តម ជេន ណា រួបរួមអភិរក្សព្រៃកោងកាង

អង្គក្សត្រីតូច នរោត្តម ជេន ណា បច្ចុប្បន្នទ្រង់កំពុងសាងនូវប្រជាប្រិយភាពខ្លាំង ក្នុងវិស័យសិល្បៈ តាមរយៈការ Cover បទចម្រៀងជាច្រើន បង្ហោះចូលក្នុងបណ្ដាញសង្គម ក៏ដូចជាបានបញ្ចេញបទចម្រៀងផ្ទាល់ របស់ព្រះនាងនាពេលកន្លងមក។ យ៉ាងណាមិញ ថ្មីៗនេះ ម្ចាស់ក្សត្រីតូចពោរពេញដោយសមត្ថភាព និងសម្រស់ ទាក់ទាញ ព្រះនាង ជេនណា បានបញ្ចេញនូវបទចម្រៀងផ្ទាល់ខ្លួនមួយបទទៀតហើយ មានចំណងជើងថា «កោះអូនកោះបង» ខណៈដែលចម្រៀងមួយបទនេះ គឺបានបង្ហាញពីសម្បត្តិធម្មជាតិ ពោលគឺសម្រស់ដ៏ស្រស់ ត្រកាលរបស់ព្រៃកោងកាងឱ្យយុវជនចូលរួមថែរក្សាការពារ និងអភិរក្ស។

នៅលើហ្វេសបុកផេកផ្លូវការរបស់អ្នកអង្គម្ចាស់ក្សត្រីតូច នរោត្តម ជេនណា បានបញ្ចេញបទចម្រៀងថ្មី ដែលចម្រៀងមួយបទនេះមានចំណងជើងថា «កោះអូនកោះបង» ដែលអ្នកអង្គម្ចាស់ក្សត្រីតូចបានបញ្ចេញនូវសំនៀងបានយ៉ាងពីរោះរណ្ដំចិត្ត ស្ដាប់មិនចេះជិនណាយ ថែមទាំងបានបង្ហាញនៅទេសភាពស្រស់ស្អាត នៃសម្រស់ព្រៃកោងកាងដ៏សែនមនោរម្យ បង្ហាញឱ្យឃើញកាន់តែច្បាស់ពីសម្រស់ដ៏ស្រស់ត្រកាលនៃធម្មជាតិ រួមជាមួយនឹងអត្ថន័យឱ្យយុវជនចូលរួមការពារ និងអភិរក្ស។

ជាការពិតអត្ថន័យនៃចម្រៀងមួយនេះ គឺរៀបរាប់ពីសម្បត្តិធម្មជាតិ សម្រស់របស់ព្រៃកោងកាង ដែលជាកេរ្តិ៍ដំណែលរបស់ប្រទេសកម្ពុជា អមដោយទេសភាពពណ៌ខៀវស្រងាត់ដាច់កន្ទុយភ្នែក ព្រមទាំងឱ្យយុវជនខ្មែរចូលរួមលើកស្ទួយ និងថែរក្សាសម្បត្តិធម្មជាតិខ្មែរ ដែលដូនតាបានបន្សល់ទុកជាកេរ្តិ៍ដំណែល ចូលរួមសាមគ្គីគ្នាការពារក៏ដូចជាអភិរក្សនូវសម្បត្តិធម្មជាតិ ជាពិសេសគឺព្រៃកោងកាងឱ្យបានគង់វង្ស និងរីកចម្រើនរហូតទៅ។

ចង់ដឹងកាន់តែច្បាស់ថា «កោះអូនកោះបង» របស់អ្នកអង្គម្ចាស់ នរោត្តម ជេន ណា ពីរោះរណ្ដំ និងបង្កប់អត្ថន័យយ៉ាងណានោះ សូមប្រិយមិត្តទស្សនិកជនរីករាយសណ្ដាប់នូវចម្រៀងមួយនេះទាំងអស់គ្នា៖

November 22, 2019

សហព័ន្ធកីឡាបាល់ទាត់របស់ថៃ នឹងប្រើកីឡាករ U22សុទ្ធ ក្នុងព្រឹត្តិការណ៍ស៊ីហ្គេម

កាលពីព្រឹកមិញនេះ ក្រុមជម្រើសជាតិរបស់ប្រទេសថៃ ដែលដឹកនាំដោយលោក Akira Nishino បានបញ្ចេញបញ្ជីឈ្មោះរបស់កីឡាករដែលត្រូវទៅប្រឡូកនៅក្នុងព្រឹត្តិការណ៍ស៊ីហ្គេមលើកទី30 នៅប្រទេសហ្វីលីពីនដែលនឹងចាប់ផ្តើមចាប់នៅថ្ងៃទី26 ខែវិច្ឆិកា ដល់ថ្ងៃទី10 ខែធ្នូ ឆ្នាំ2019 ហើយ។

ក្នុងបញ្ជីឈ្មោះកីឡាករទាំង 20រូបចុងក្រោយនេះដែរ គេសង្កេតឃើញថា មានសុទ្ធតែជាកីឡាករដែលមានអាយុក្រោម 22ឆ្នាំទាំងអស់ ពោលគឺ មិនមានកីឡាករលើសអាយុឡើយ។ ជាក់ស្ដែងគេឃើញមានកីឡាករយុវជនដែលជាប់ឈុតធំជម្រើសជាតិជាច្រើនដែលមានដូចជា Ekanit Panya, Supachai Chaided, Supachok Sarachat និង Suphanat Mueanta គឺជាខ្សែប្រយុទ្ធ 4រូបដែលលេងនៅក្រុមលីកធំៗ និងមានសមត្ថភាពមិនធម្មតាឡើយ។ ស្របពេលដែលកីឡាករ Worachit Kanitsribumpen, Rattanakorn Maikami និង Anon Amornlertsak វិញ សុទ្ធតែជាកីឡាករស្នូលសម្រាប់ក្រុមថៃទាំងអស់។

គួរបញ្ជាក់ផងដែរថា ការប្រកួតបាល់ទាត់ក្នុងព្រឹត្តិការណ៍ស៊ីហ្គេមលើកទី30 ឆ្នាំ2019 ដែលប្រទេសហ្វីលីពីនធ្វើជាម្ចាស់ផ្ទះនេះ គឺអនុញ្ញាតឱ្យក្រុមបាល់់ទាត់នីមួយៗអាចដាក់កីឡាករលើសអាយុ 22ឆ្នាំបានចំនួន 2នាក់៕

November 21, 2019

ចេញហើយ! បញ្ជីឈ្មោះកីឡាករ 3នាក់ចុងក្រោយ សម្រាប់ប្រជែងពានរង្វាន់កីឡាករវ័យក្មេងប្រចាំទ្វីបអាស៊ី

កាលពីពេលថ្មីៗនេះ សហព័ន្ធកីឡាបាល់ទាត់ទ្វីបអាស៊ី (AFC) បានបញ្ជេញបញ្ចីឈ្មោះកីឡាករវ័យក្មេងដែលល្អបំផុតប្រចាំតំបន់អាស៊ី ដែលមានសមាសភាពចុងក្រោយ 3រូប ដែលមានកីឡាករ DOAN VAN HAU (វៀតណាម), HIROKI ABE (ជប៉ុន), LEE KANG-IN (កូរ៉េខាងត្បូង)។

គួររំឭកផងដែរថា សៀង ចន្ធា របស់កម្ពុជាដែលសហព័ន្ធបានបញ្ជូនឈ្មោះទៅចូលរួមប្រកួតប្រជែងក្នុងពានរង្វាន់ Best Young Player of the Year ក្នុងកម្មវិធី AFC Annual Award នាពេលចុងឆ្នាំនេះ ត្រូវបានធ្លាក់ចេញពីបក្ខភាពប្រជែងពានរង្វាន់នេះហើយ។

កម្មវិធី AFC Annual Award ត្រូវបានប្រារព្ធធ្វើឡើងជារៀងរាល់ឆ្នាំ ដែលមានពានរង្វាន់ជាច្រើនប្រមាណជាង 30ប្រភេទ ដែលរួមមានទាំងកីឡាករឆ្នើម សហព័ន្ធល្អបំផុត គ្រូបង្វឹកឆ្នើម និងប្រភេទផ្សេងៗទៀតនៃកីឡាបាល់ទាត់ទាំងបុរស និងនារី៕

November 21, 2019

កម្ពុជានៅមានឱកាសឡើងទៅប្រកួត World Cup ជាបន្ត

ក្រុមជម្រើសជាតិកម្ពុជាដែលស្ថិតនៅក្នុងពូល C នៃវគ្គជម្រុះពានរង្វាន់បាល់ទាត់ពិភពលោក FIFA WORLD CUP ជាមួយនឹងក្រុមចំនួន 4ទៀតដែលមាន អ៊ីរ៉ាក់ អ៊ីរ៉ង់ ប៉ារ៉ែន និងហុងកុង។ ទោះបីជាអស់ឱកាសឡើងទៅឈរនៅកំពូលតារាងក៏ដោយ តែកម្ពុជាក៏នៅតែមានក្តីសង្ឃឹមបានឡើងទៅកាន់ World Cup ក្នុងនាមជាក្រុមល្អបំផុតលេខ2 ក្នុងចំណោមក្រុមទាំង4 ប្រចាំទ្វីបអាស៊ីដែរ។

ឆ្លងកាត់ 5ប្រកួតកន្លងមកនេះ ក្រុមបាល់ទាត់ជម្រើសជាតិកម្ពុជាបានប្រកួតក្នុងទឹកដីខ្លួនឯងចំនូន 3ប្រកួត និងក្រៅទឹកដី2ប្រកួត បើគិតទៅលើលទ្ធផលវិញ កម្ពុជាទទួលបានលទ្ធផលស្មើ1 និងចាញ់4 និងមានតែ 1ពិន្ទុប៉ុណ្ណោះនៅក្នុងដៃ ខណៈដែលត្រូវគេស៊ុតចូលសរុប 22គ្រាប់ និងស៊ុតចូលគេវិញតែ 1គ្រាប់ប៉ុណ្ណោះ។

គួររំឭកដែរថា ក្រុមបាល់ទាត់ជម្រើសជាតិគោព្រៃកម្ពុជា បានប្រកួតចាញ់ក្រុមបាល់ទាត់ជម្រើសជាតិហុងកុងក្នុងលទ្ធផល 0ទល់នឹង2 កាលពីថ្ងៃទី19 ខែវិច្ឆិកា ឆ្នាំ2019 កន្លងទៅនេះ៕

November 21, 2019

ពិតជាពីរោះនិងមានអត្ថន័យ !! មាស សុខសោភា បកស្រាយបទ “Side by Side” រួមគ្នារវាងតារាចម្រៀងនៅអាស៊ាន និងតារាចម្រៀងមកពីកូរ៉េខាងត្បូង

តារាចម្រៀងស្រីដ៏ល្បី មាស សុខសោភា បានក្លាយជាតួអង្គដ៏សំខាន់តំណាងឱ្យកម្ពុជា ក្នុងជំនួបតារា K-POPល្បីៗ ចូលរួមនៅក្នុងព្រឹត្តិការណ៍ប្រគុំតន្ត្រី ASEAN-ROK Commemorative Summit 2019, Busan កម្មវិធីនេះនឹងប្រពឹត្តិឡើង នៅថ្ងៃទី ២៥ វិច្ឆិកា នេះ នៅប៊ូសាន សាធារណរដ្ឋកូរ៉េ។

បើទោះជារដូវនេះមានភាពមមាញឹកខ្លាំងក្នុងស្រុកក៏ពិតមែន ប៉ុន្តែ មាស សុខសោភា នៅតែឆ្លៀតមិនអាចខកខានបាន ក្នុងការចូលរួមព្រឹត្តិការណ៍ Concert ដ៏ធំខាងលើ។ នាងប្រកាសពីការត្រៀមខ្លួនរួចជាស្រេច ដើម្បីធ្វើដំណើរឆ្ពោះទៅកាន់ប្រទេសកូរ៉េ នៅថ្ងៃទី ២២ វិច្ឆិកា ខាងមុខនេះ ដើម្បីទៅហាត់សមមុនសម្ដែង ក្នុងរយៈពេល២ថ្ងៃជាប់ៗគ្នានៅទីនោះផង។

មាស សុខសោភា បានបង្ហាញក្ដីរំភើបជាខ្លាំងចំពោះការត្រៀមទៅសម្ដែងនៅកូរ៉េលើកនេះ បើទោះជាមិនមែនជាលើកទីមួយសម្រាប់ការចេញសម្ដែងនៅក្រៅប្រទេសរបស់នាង។ អ្វីដែលធ្វើឱ្យនាងហាក់ប្លែកអារម្មណ៍ និង មានមោទនភាពនោះគឺ ការប្រគុំតន្ត្រីនេះគឺជាការរៀបចំនិង អញ្ជើញពីសំណាក់ អ្នករៀបចំកម្មវិធីរបស់កូរ៉េផ្ទាល់តែម្ដង ដែលខុសពីការសម្ដែងក្រៅប្រទេសមុនៗ ដែលនាងទៅតាមរយៈ Sponsor។ នាងថាបើទោះជាមានឱកាសតិចតួចក្នុងការស្លៀកសម្លៀកបំពាក់បុរាណប្រពៃណីខ្មែរនៅលើឆាកតន្ត្រីបែប K-POP ក៏ពិតមែន ប៉ុន្តែនាងនឹងសម្រិតសម្រាំងឱ្យបានល្អអស្ចារ្យបំផុត ក្នុងការបង្ហាញឱ្យពិភពលោកបានស្គាល់ បានឃើញអំពីសម្លៀកបំពាក់ វប្បធម៌ ភាសា ទំនៀមទម្លាប់របស់ខ្មែរ និងត្រៀមបញ្ចេញឱ្យអស់ពីសម្ថភាព នៅលើឆាកអន្តរជាតិមួយនេះ។ មាស សុខសោភា ក៏ត្រៀមនឹងពាំនាំបទចម្រៀង Original ជាច្រើនបទយកទៅបង្ហាញ បន្ថែមពីលើចម្រៀងមួយបទដែលត្រៀមច្រៀងរួមគ្នា ជាមួយតារាចម្រៀងល្បីៗនៅអាស៊ីផងដែរ។

យ៉ាងណាមិញថ្មីៗនេះ មាស សុខសោភា ក៏បានបង្ហាញនូវបទចម្រៀងថ្មីដែលមានចំណងជើង Side by Side ដែលជាការបកស្រាយរួមគ្នារវាងតារាចម្រៀងនៅអាស៊ាន និងតារាចម្រៀងមកពីកូរ៉េខាងត្បូង ដើម្បីអបអរក្នុងឱកាសកិច្ចប្រជុំកំពូលរំលឹកខួបអនុស្សាវរីយ៍ ៣០ឆ្នាំ នៃទំនាក់ទំនងដៃគូអាស៊ាន-សាធារណរដ្ឋកូរ៉េ (ASEAN-ROK Commemorative Summit 2019, Busan) ដែលនឹងធ្វើឡើងចាប់ពីថ្ងៃទី២៥ ដល់ថ្ងៃទី២៦ ខែវិច្ឆិកា ឆ្នាំ២០១៩ ៕

តោះមកទស្សនាវីដេអូចម្រៀងនៅខាងក្រោមនេះ៖

November 21, 2019

ក្រុមហ៊ុន So Sreyni Co., Ltd ផ្តល់រថយន្តដល់តំណាងចែកចាយ និងជួយជ្រោមជ្រែងអាជីវកម្ម

ក្រុមហ៊ុន So Sreyni Co., Ltd ដែលជាក្រុមហ៊ុនផ្គត់ផ្គង់គ្រឿងសម្អាង D.X.L (De’Xing Li) ប្រកបដោយគុណភាពខ្ពស់នៅកម្ពុជា បានផ្តល់រង្វាន់ជារថយន្តដល់តំណាងចែកចាយផ្តាច់មុខប្រចាំតំបន់របស់ខ្លួន ដើម្បីជាការលើកទឹកចិត្ត និងបង្កើនសក្តានុពលកាន់តែខ្លាំងសម្រាប់អ្នកតំណាងរបស់ខ្លួនក្នុងការធ្វើអាជីវកម្មក្នុងទីផ្សារកម្ពុជា។

កញ្ញា សូ ស្រីនិ អគ្គនាយិកា ក្រុមហ៊ុន So Sreyni Co., Ltd បានលើកឡើងថា ក្រុមហ៊ុន So Sreyni Co., Ltd បានចុះបញ្ជី និងបង់ពន្ធត្រឹមត្រូវក្នុងការនាំចូល និងចែកចាយផលិតផលប្រកបដោយគុណភាពខ្ពស់ សុវត្ថិភាព និងមានតម្លៃល្អបំផុតសម្រាប់ប្រជាជនខ្មែរ។ ផលិតផលនីមួយៗសុទ្ធតែជាផលិតផលដែលមានការទទួលស្គាល់គុណភាពពីក្រសួងសុខាភិបាល ក្រសួងពាណិជ្ជកម្ម រួមទាំងភាគីពាក់ព័ន្ធនានានៅកម្ពុជា និងមានការទទួលស្គាល់ផងដែរពីស្ថាប័នជាច្រើននៅប្រទេសថៃ។ ហេតុនេះហើយ ទើបធ្វើឱ្យផលិតផលរបស់ក្រុមហ៊ុន So Sreyni Co., Ltd ទទួលបានការគាំទ្រ និងមានទីផ្សារល្អនាពេលបច្ចុប្បន្ន។

កញ្ញា សូ ស្រីនិ បាននិយាយថា៖ «ដើម្បីជំរុញឱ្យផលិតផលប្រកបដោយសក្តានុពលទាំងអស់នេះចែកចាយកាន់តែទូលំទូលាយនៅកម្ពុជា និងដើម្បីជួយលើកកម្លាំងចិត្តដល់អ្នកដែលមានបំណងចង់ធ្វើអាជីវកម្មផ្នែកគ្រឿងសម្អាងនានាផងនោះ ក្រុមហ៊ុន So Sreyni Co., Ltd បានសម្រេចប្រគល់រង្វាន់ជារថយន្តដល់តំណាងចែកចាយផ្តាច់មុខសម្រាប់តំបន់នីមួយៗ»។

សហគ្រិនវ័យក្មេងខាងលើបានលើកឡើងផងដែរថា ផលិតផលរបស់ក្រុមហ៊ុន So Sreyni Co., Ltd គឺជាជម្រើសដ៏ល្អមួយ សម្រាប់អ្នកចង់វិនិយោគយូរអង្វែង ព្រោះក្រុមហ៊ុនមានគោលដៅដំណើរការយូរអង្វែងនៅក្នុងទីផ្សារកម្ពុជា មិនមែនបើកត្រឹម 1ខែ ឬ 2ខែនោះទេ។ ហេតុនេះហើយទើបក្រុមការងារទាំងអស់ខិតខំប្រឹងប្រែងគ្រប់លទ្ធភាពដើម្បីជំរុញឱ្យមានការយកចិត្តទុកដាក់កាន់តែខ្លាំងចំពោះតំណាងចែកចាយ រួមទាំងអតិថិជននៅទូទាំងប្រទេសផងដែរ។

សម្រាប់អ្នកដែលចង់ធ្វើជាតំណាងចែកចាយរបស់ក្រុមហ៊ុន នឹងទទួលបានអត្ថប្រយោជន៍ជាច្រើនដូចជា ទទួលបានសិទ្ធិក្នុងការចែកចាយផ្តាច់មុខក្នុងតំបន់របស់ខ្លួន ស្របពេលដែលក្រុមហ៊ុនក៏ជួយជ្រោមជ្រែងដោយរៀបចំជាសេវាកម្ម និងយុទ្ធសាស្រ្តលក់ជូន ដើម្បីទទួលបានជោគជ័យក្នុងការធ្វើអាជីវកម្ម។ ក្រៅពីនេះក្រុមហ៊ុននឹងធានាទីផ្សារជូនដោយផ្តល់នូវអតិថិជន រួមទាំងផ្សព្វផ្សាយឱ្យតំណាងចែកចាយបន្ត នៅក្នុងតំបន់របស់គាត់បានស្គាល់ និងមានទំនាក់ទំនងល្អជាមួយនឹងតំណាងចែកចាយផ្តាច់មុខនោះ។ បន្ថែមពីលើនេះ សម្រាប់អ្នកចង់ធ្វើទីផ្សារ ឬចង់ថតផ្សាយពាណិជ្ជកម្ម ក្រុមហ៊ុនក៏មានជាកន្លែងសម្រាប់ថត(ស្ទូឌីយោ) ឬរៀបចំជាផ្ទាំង Background សម្រាប់ថតពាណិជ្ជកម្មជូនផងដែរ។

កញ្ញាអគ្គនាយិកាក្រុមហ៊ុន ក៏បានបញ្ជាក់ផងដែរថា ប្រសិនបើមានការគាំទ្រកាន់តែខ្លាំង កញ្ញានឹងបន្ថែមរង្វាន់ជាច្រើនទៀត ដូចជាគ្រាន់តែចុះឈ្មោះក្លាយជាតំណាងចែកចាយភ្លាម នឹងទទួលបានរថយន្ត 1គ្រឿងភ្លាម និងអាចជារង្វាន់សំខាន់ៗជាច្រើនផ្សេងទៀតផង។ កន្លងមកក្រុមហ៊ុនក៏ធ្លាប់ផ្តល់ជូនកាដូជាច្រើនផងដែរសម្រាប់អតិថិជននានា ដូចជាកាផ្តល់ជាកម្រៃជើងសាប្រចាំខែ (commission) ចិញ្ចៀន និងគ្រឿងអលង្ការជាច្រើនទៀតផង។

លក្ខខណ្ឌដែលអាចក្លាយជាតំណាងចែកចាយផ្តាច់មុខប្រចាំតំបន់របស់ក្រុមហ៊ុន So Sreyni Co., Ltd គឺត្រូវមានថវិកាប្រមាណ 2ម៉ឺនដុល្លារ ហើយចុះកិច្ចសន្យាដោយលក់ផលិតផលទាំងអស់តាមតម្លៃត្រឹមត្រូវដែលក្រុមហ៊ុនកំណត់ជូនដល់អតិថិជននៅក្នុងតំបន់របស់ខ្លួន។ បន្ថែមពីលើនេះ តំណាងចែកចាយត្រូវតែរក្សាការសម្ងាត់ចំពោះតម្លៃបោះដុំសម្រាប់អ្នកចែកចាយបន្ត និងគោរពលក្ខខណ្ឌសុចរិតភាព ដូចជា មិនអនុញ្ញាតឱ្យក្លែងបន្លំផលិតផល និងមិនអនុញ្ញាតឱ្យលក់ផលិតផលផ្សេងឡើយ។

គួរបញ្ជាក់ផងដែរថា កញ្ញា សូ ស្រីនិ ជាសហគ្រិនឆ្នើមមួយរូបដែលបានទទួលពានរង្វាន់ Icon Brand ASEAN award 2019 នៅប្រទេសថៃ កាលពីថ្ងៃទី29 ខែកញ្ញា ឆ្នាំ2019 កន្លងទៅ និងទទួលបានពានរង្វាន់ Success CEO award 2019 កាលពីថ្ងៃទី8 ខែវិច្ឆិកា ឆ្នាំ2019 ថ្មីៗនេះទៀតផង៕

November 21, 2019

9ខែឆ្នាំនេះ រាជរដ្ឋាភិបាលកម្ពុជា ប្រមូលចំណូលចូលថវិការដ្ឋបានជិត 5ពាន់លានដុល្លារ

នៅរយៈពេល 9ខែ ឆ្នាំ2019នេះ រាជរដ្ឋាភិបាលកម្ពុជាបានប្រមូលចំណូលចូលថវិការដ្ឋសរុប ចំនួនប្រមាណ 19.125ប៊ីលានរៀល (ប្រមាណជិត 5ពាន់លានដុល្លារ) ស្មើនឹង 90% ធៀបនឹងច្បាប់ថវិកា ឆ្នាំ2019។ នេះបើយោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ។

សេចក្តីប្រកាសព័ត៌មាន ស្តីពីលទ្ធផលនៃកិច្ចប្រជុំគណៈកម្មាធិការដឹកនាំការងារកែទម្រង់ ការគ្រប់គ្រងហិរញ្ញវត្ថុសាធារណៈ និងក្រុមការងារបច្ចេកទេសបានបញ្ជាក់ថា «តាមរយៈរបាយការណ៍បូកសរុប រហូតមកដល់ត្រីមាសទី 3 នេះ គ្រប់ផ្នែកនៃផែនការសកម្មភាពរួមនៃការងារកែទម្រង់ ការគ្រប់គ្រងហិរញ្ញវត្ថុសាធារណៈ នៅបន្តមានវឌ្ឍនភាពល្អ និងវិជ្ជមាន។ ក្នុងរយៈពេល 9ខែកន្លងទៅនេះ រាជរដ្ឋាភិបាលកម្ពុជាបានប្រមូលចំណូលចូលថវិការដ្ឋសរុបប្រមាណ 19,125ប៊ីលានរៀល ស្មើនឹង៩០% ធៀបនឹងច្បាប់ថវិកាឆ្នាំ2019»។

យោងតាមសេចក្តីប្រកាសព័ត៌មានក្រសួងសេដ្ឋកិច្ចដដែលបានឱ្យដឹងទៀតថា ការអនុវត្តផែនការប្រមូលចំណូលប្រចាំត្រីមាសទី3 បង្ហាញថា ទិន្នផលចំណូលបានពីការប្រមូលដោយពន្ធគយ និងរដ្ឋាករមានប្រមាណ 49%, ពន្ធដារមានប្រមាណ 32%, ចំណូលមិនមែនសារពើពន្ធមានប្រមាណ 12% និងចំណូលផ្សេងៗប្រមាណ 6%។ រីឯការអនុវត្តចំណាយស្ថិតក្នុងស្ថានភាពដែលអាចគ្រប់គ្រង បានតាមច្បាប់ជាធរមាន។

សម្រាប់ការអនុវត្តសកម្មភាពនៃការងារកែទម្រង់ទាំងក្របខ័ណ្ឌក្រសួងសេដ្ឋកិច្ច និងហិរញ្ញវត្ថុ ក៏ដូចជាក្របខ័ណ្ឌក្រសួង-ស្ថាប័ន កំពុងបន្តមានវឌ្ឍនភាពល្អប្រសើរ ដែលត្រូវបានរំពឹងទុកថា អាចសម្រេចបានគោលដៅប្រចាំឆ្នាំ។

អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញ វត្ថុ និងជាប្រធានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ បានគូសបញ្ជាក់ថា ការប្រមូលចំណូល និងការអនុវត្តចំណាយ នៅបន្តមានសុខភាពល្អធៀបនឹងឆ្នាំមុនៗ និងនៅរក្សាបាននិន្នាការល្អប្រសើរ ទៅតាមការគ្រោងទុក។
ស្របពេលជាមួយគ្នានេះ កិច្ចការគន្លឹះៗមួយចំនួនទៀតត្រូវបន្តពង្រឹងក្នុងការអនុវត្ត កសាង និងរៀបចំបញ្ចប់រួមមានការរៀបចំបញ្ចប់លិខិតបទដ្ឋានគតិយុត្ត ពាក់ព័ន្ធនឹងការគ្រប់គ្រងចំណូល មិនមែនសារពើពន្ធ ការគ្រប់គ្រងទ្រព្យសម្បត្តិរដ្ឋ ផែនការសកម្មភាពលម្អិតសម្រាប់ការអនុវត្តយុទ្ធសាស្ត្រគន្លឹះៗនានា ដូចជាយុទ្ធសាស្ត្រកែទម្រង់ប្រព័ន្ធលទ្ធកម្មសាធារណៈ ឆ្នាំ2019-2025 យុទ្ធសាស្ត្រកែទម្រង់ប្រព័ន្ធថវិការដ្ឋបាលថ្នាក់ក្រោមជាតិ យុទ្ធសាស្ត្រកែទម្រង់ប្រព័ន្ធថវិការដ្ឋបាលថ្នាក់ ក្រោមជាតិ ឆ្នាំ 2019-2025 យុទ្ធសាស្ត្រកៀរគរចំណូល 2019-2023 និងអនុក្រឹត្យស្តីពីការគ្រប់គ្រង គម្រោងវិនិយោគសាធារណៈ ជាដើម។

ឯកឧត្តម អគ្គបណ្ឌិតសភាចារ្យ ក៏បានផ្តល់អនុសាសន៍ណែនាំបន្ថែម លើការពង្រឹងសមត្ថភាពមន្ត្រី ដោយត្រូវគិតគូររៀបចំឱ្យបានគ្រប់ជ្រុងជ្រោយ តាមរយៈការបន្តបណ្តុះបណ្តាលដែលជាក់លាក់ ប្រកបដោយគុណភាព ក៏ដូចជាបំពាក់ជំនាញច្បាស់លាស់ និងប្រើប្រាស់ធនធាន ដែលបានបណ្តុះបណ្តាលឱ្យត្រូវតាមតួនាទី និងភារកិច្ច និងជំនាញនីមួយៗ។

ជាមួយគ្នានេះ តំណាងដៃគូអភិវឌ្ឍន៍ បានវាយតម្លៃខ្ពស់ចំពោះសមិទ្ធផល ដែលសម្រេចបានក្នុងត្រីមាសទី3 និងការខិតខំប្រឹងប្រែងអនុវត្តការងារកែទម្រង់យ៉ាងសកម្មពីក្រសួង-ស្ថាប័ន ទាំងអស់។ ដៃគូអភិវឌ្ឍន៍ ក៏បានផ្តល់អនុសាសន៍បន្ថែមជាពិសេសទៅលើប្រសិទ្ធភាពនៃការអនុវត្តចំណាយរបស់ក្រសួង-ស្ថាប័ន, ការប្រើប្រាស់ប្រព័ន្ធ (Financial Management Information System - FMIS) និងពង្រឹងការផ្សព្វផ្សាយលើការត្រួតពិនិត្យការអនុវត្តថវិកាកម្មវិធី។ បន្ថែមពីនេះ ដៃគូអភិវឌ្ឍន៍ នៅតែបន្តផ្តល់ការសហការល្អ និងកិច្ចគាំទ្រ ទាំងជំនួយបច្ចេកទេស និងហិរញ្ញវត្ថុ ទៅលើសកម្មភាពគន្លឹះសំខាន់ៗរបស់ការងារកែទម្រង់ហិរញ្ញវត្ថុសាធារណៈនៅកម្ពុជានេះ៕

November 21, 2019

លោកស្រី ទេព សក្តិលីនដា៖ ពីក្មេងស្រីកំព្រា មិនដេកចាំវាសនា តស៊ូក្លាយជាស្ត្រីរឹងមាំ កាន់អាជីវកម្មធំក្នុងដៃ

នៅលើលោកនេះ ថ្វីដ្បិតតែមនុស្សទាំងអស់គ្នាស្ថិតនៅក្រោមមេឃតែមួយ មានពេលវេលា 24ម៉ោងដូចគ្នា និងមានជីវិតរស់រានដូចគ្នាក៏ពិតមែន តែស្ថានភាព និងវាសនានៃដំណើរជីវិតមិនដូចគ្នាឡើយ។ មានអ្នកខ្លះកើតមកលើគំនរមាសប្រាក់ អ្នកខ្លះទៀតកើតមកក្នុងត្រកូលមធ្យម ខណៈមនុស្សមួយចំនួនទៀតកើតមកក្នុងស្ថានភាពកំព្រា ក្រលំបាក ដែលទាមទារឱ្យមានការតស៊ូជម្នះក្នុងដំណើរជីវិតយ៉ាងស្វិតស្វាញ។

**លោកស្រី ទេព សក្តិលីនដា ម្ចាស់ក្រុមហ៊ុន NKY trading Co., Ltd**

ទោះជាយ៉ាងនេះក្តី វាសនាអាក្រក់មិនអាចយកឈ្នះសម្ទុះចិត្តតស៊ូដ៏ស្វិតស្វាញបានឡើយ។ ហេតុនេះហើយទើបគេតែងនិយាយថា មនុស្សមិនអាចជ្រើសរើសស្ថានភាពនៅពេលកើតបានទេ តែគេអាចខិតខំប្រឹងប្រែងដើម្បីផ្លាស់ប្តូរវាសនាពីអាក្រក់ទៅល្អបាន។ ជាក់ស្តែង លោកស្រី ទេព សក្តិលីនដា ដែលជាម្ចាស់ក្រុមហ៊ុន NKY trading Co., Ltd បានចាប់ផ្តើមដំណើរជីវិតប្រកបដោយភាពតស៊ូ និងឧបសគ្គជាច្រើន រហូតក្លាយជាសហគ្រិនឆ្នើមមួយរូបនៅកម្ពុជា។

ថ្វីដ្បិតតែចាប់ផ្តើមដំណើរជីវិតជាក្មេងកំព្រា និងត្រូវតស៊ូធ្វើការងារតាមហាងតូចៗក្ដី តែលោកស្រី លីនដា នៅតែចិញ្ចឹមចិត្ត ខាំមាត់សង្កត់ចិត្ត ប្រឹងប្រែងជម្នះឧបសគ្គ តស៊ូជាមួយដំណើរជីវិត ដោយមិនរស់ដេកចាំសំណាងនោះទេ។ សហគ្រិនដែលពោរពេញដោយគំនិតសុទិដ្ឋិនិយមរូបនេះ បើទោះបីជាមានអតីតកាលដ៏ជូរចត់ ស្ថិតក្នុងស្ថានភាពលំបាក និងមើលស្ទើរមិនឃើញកោះត្រើយនៃជីវិតក្នុងភាពមានបានក៏ដោយ ក៏លោកស្រីមិនបោះបង់ចោលការតស៊ូដែរ។ លោកស្រីចាប់ផ្តើមចិញ្ចឹមចិត្តរកស៊ីដោយប្រើប្រាស់លុយសន្សំផ្ទាល់ខ្លួន តាមរយៈការចេញធ្វើការដើម្បីដោះស្រាយការលំបាកផង និងជម្នះឧបសគ្គហិរញ្ញវត្ថុផង រហូតក្លាយជាសហគ្រិនស្ត្រីប្រកបដោយភាពរឹងមាំ ជាមួយនឹងចំណូលខ្ទង់សែនដុល្លារនាពេលបច្ចុប្បន្ននេះ។

លោកស្រី ទេព សក្តិលីដា បាននិយាយថា៖ «មិនមានអ្នកណាកើតមកជោគជ័យនោះឡើយ គឺមានតែខ្លួនឯងជាអ្នកបង្កើតឱកាស និងចាប់យកឱកាសដោយខ្លួនឯង ហេតុនេះសូមអ្នកទាំងអស់គ្នាកុំបាក់ទឹកចិត្ត បើទោះបីជាជួបរឿងលំបាកក្នុងជីវិតក៏ដោយ។ អ្វីដែលយើងអាចធ្វើបាន គឺដួលហើយហ៊ានក្រោកតស៊ូឡើងវិញ ដើម្បីបង្កើត និងក្តោបក្តាប់ឱកាសដើម្បីជំរុញភាពរុងរឿងសម្រាប់ជីវិត»។

ដោយភាពអត់ធ្មត់ និងរឹងមាំ លោកស្រី លីនដា បានទទួលពានរង្វាន់សហគ្រិន3 ក្នុងពេលតែមួយនៅប្រទេសថៃ ពីឯកឧត្តមឧត្តមសេនីយ ជិកសាក់ ចេរិនសម្បត្តិ ដោយក្នុងនោះមានដូចជា ពានរង្វាន់ Outstanding Organization 2019 ពានរង្វាន់ Achievement Award 2019 និងពានរង្វាន់ Standardization Products Awards។ ហើយថ្មីៗនេះលោកស្រីក៏បានទទួលពានរង្វាន់សហគ្រិនឆ្នើមឆ្នាំ2019 កាលពីខែវិច្ឆិកា ឆ្នាំ2019 នេះផងដែរ។

គួរបញ្ជាក់ថា បច្ចុប្បន្ន លោកស្រីជាម្ចាស់ក្រុមហ៊ុន NKY trading Co.,Ltd ដោយក្រុមហ៊ុននេះបង្កើតឡើងតាំងពីឆ្នាំ2016 ដែលមាននាំចូលគ្រឿងទេស និងគ្រឿងសម្អាងប្រ៊េនដ៍ល្បីៗពីប្រទេសជិតខាង ដូចជា MIZ, NACECA, CHERISTA, CHUBUGAH ហើយកាន់តែពិសេស អាជីវកម្មរបស់លោកស្រីមានឈ្មោះល្បីនៅលើវិស័យគ្រឿងសម្អាងក្នុងចុងឆ្នាំ2019 នេះយ៉ាងខ្លាំង។ ប្រ៊េនដ៍ ដែលល្បីជាងគេគឺ ប្រ៊េនដ៍ MIZ ដែលមានការគាំទ្រយ៉ាងខ្លាំងពីតំណាងចែកចាយទូទាំងប្រទេស ហើយថ្មីៗនេះ ប្រ៊េនដ៍ថ្មីមួយរបស់លោកស្រី គឺ ប្រ៊េនដ៍ BABYFACE ផលិតផលម៉ាសសន្លឹក មកពីកូរ៉េ ក៏ល្បីខ្លាំងដែរ ព្រោះតែគុណភាពដ៏ល្អគួរឱ្យចាប់អារម្មណ៍ ដែលធ្វើឱ្យបងប្អូនស្ត្រីយើងរាប់ពាន់នាក់បានប្រើប្រាស់ និងរកចំណូលដោយខ្លួនឯងបាន ក្នុងនោះផងដែរលោកស្រីក៏ជាម្ចាស់ហាងបោះដុំគ្រឿងក្រអូបដ៏ធំ ឈ្មោះថា ONESKIN CAMBODIA និងត្រៀមបើកសណ្ឋាគារ នៅមាត់ទន្លេក្នុងឆ្នាំ2020 ខាងមុខនេះទៀតផង៕

November 21, 2019

តន្ត្រីបង្សុកូល ត្រៀមសម្ដែងបទ «ការចងចាំ» ដើម្បីឧទ្ទិសកុសលវិញ្ញាណក្ខ័ន្ធ ព្រឹទ្ធាចារ្យសិល្ប:សម្តេចព្រះរាជបុត្រីព្រះរៀម និងជា ទេពនាដវដ្តីឯក នរោត្តម បុប្ផាទេវី

គ្រាន់តែឮថា «តន្ត្រីបង្សុកូល » គ្រប់គ្នាឆ្ងល់យ៉ាងខ្លាំងថាជាអ្វី? ការពិតទៅការប្រគំតន្ត្រី ”បង្សុកូល” គឺជាស្នាដៃរួមបញ្ចូលគ្នាមួយដែលមានតន្ត្រីករប្រហែល 80នាក់ នៅលើឆាកតែមួយ តែមានឧបករណ៍តន្ត្រីខ្មែរចំនួន ៦ប្រភេទ មានដូចជាគ្រឿងខ្សែកេះ ឧបករណ៍ពិណ គ្រឿងខ្សែកូត ទ្រសោ ទ្រអ៊ូ ទ្រខ្មែរ គ្រឿងផ្លុំ មានដូចជា ស្រឡៃ ខ្លុយ ប៉ីពក ប៉ីអ រនាតភ្លោះ គងភ្លោះ នឹងត្រូវសម្ដែងបញ្ចូលគ្នាជាមួយវង់ភ្លេងតន្ត្រីបរទេស។

អ្នកផ្ដើមគំនិតនិពន្ធបទភ្លេងតន្ត្រី ”បង្សុកូល” ដំបូង និងជាទីប្រឹក្សារាជបណ្ឌិត្យសភាកម្ពុជា លោកបណ្ឌិត ហ៊ឹម សុភី បានអះអាងប្រាប់អ្នកសារព័ត៌មានថា ការប្រគំតន្ត្រី ”បង្សុកូល” ត្រូវបានតាក់តែងនិពន្ធបទភ្លេងបង្សុកូលអស់រយៈពេល ៥ ឆ្នាំ។ មូលហេតុដែលធ្វើឱ្យមានការប្រគំតន្ត្រី ”បង្សុកូល” នេះ គឺលោកចង់ផ្ញើសារប្រាប់ទៅដល់ពលរដ្ឋខ្មែរអំពីការរំឭកប្រវត្តិសាស្ត្ររបស់ខ្លួនដែលធ្លាប់ឆ្លងកាត់នៅសម័យ ប៉ុល ពត។ លោកបន្តថា ក្នុងចំណោមឧបករណ៍តន្ត្រីបូរាណខ្មែរជាង ១០ឧបករណ៍ ក៏មានឧបករណ៍បូរាណខ្លះដែលបានបាត់បង់រាប់រយឆ្នាំ និងត្រូវបង្កើតឡើងវិញ ដូចជាពិណខ្មែរសម័យអង្គរ ប៉ីពកធំមានស្នែង និងខ្លុយដីជាដើម។

តន្ត្រី ”បង្សុកូល” ដែលទទួលបានហិរញ្ញវត្ថុបង្កើតឡើងពីប្រទេសអូស្ត្រាលី សហរដ្ឋអាមេរិក និងពីអង្គការមួយចំនួនទៀតនេះ គឺជាស្នាដៃប្រគំតន្ត្រីវង់ធំ និងជាស្នាដៃសហការគ្នាលើកដំបូងរវាងផលិតករធ្លាប់ទទួលបានពានរង្វាន់ លោក ប៉ាន់ រិទ្ធី និងអ្នកនិពន្ធបទភ្លេងដីល្បីឈ្មោះលោក ហ៊ឹម សុភី ក្នុងគោលបំណងរៀបរាប់ស្វែងយល់អំពីសេចក្ដីរន្ធត់នានា របស់ប្រជាជនកម្ពុជា នៅចុងទសវត្សរ៍ឆ្នាំ១៩៧០ ជាពិសេសដើម្បីរំលឹកដល់ជនរងគ្រោះ ដែលត្រូវបានគេធ្វើទារុណកម្ម និងសម្លាប់ និងដើម្បីផ្ញើសារទៅកាន់ពិភពលោកឱ្យស្គាល់អំពីប្រវត្តិកម្ពុជា ផងដែរ។

យ៉ាងណាមិញ ការប្រគំ«តន្ត្រីបង្សុកូល » នៅប្រទេសកម្ពុជានាថ្ងៃទី២១,២២,២៣ ខែវិច្ឆិកា នេះ លោកសាស្ត្រាចារ្យ ហ៊ឹម សុភី ក៏បានបន្ថែមបទនិពន្ធថ្មីមួយបទនៃការបើកទំព័រសម្ដែងគឺបទ «ការចងចាំ» ជាស្នាដៃនិពន្ធថ្មី ដើម្បីឧទ្ទិសដល់វិញ្ញាណក្ខ័ន្ធ ព្រឹទ្ធាចារ្យសិល្ប:សម្តេចព្រះរាជបុត្រីព្រះរៀម និងជា ទេពនាដវដ្តីឯក នរោត្តម បុប្ផាទេវី ស្តេចយាងទៅកាន់សុគតិភព ដែលប្រកបទៅដោយភាពរុងរឿងត្រចះត្រចង់ដូចសម័យកាលនៃចក្រភពខ្មែរសម័យអង្គរដ៏បរវរនៃយេីង ។ បទភ្លេងនេះនឹងត្រូវប្រគំមុនការសម្តែង តន្រ្តីបង្សុកូល និងផ្សាយនៅក្រោយថ្ងៃទី២៣ វិច្ឆិកាខាងមុខនេះ៕

November 21, 2019

Author: អេបិល