សិក្ខាសាលា ស្តីពីការព្យាបាលបង្កើតកោសិកាថ្មីឡើងវិញ និងពន្យារភាពចាស់ ត្រូវបានគ្លីនិកពហុព្យាបាល Absolute Health នៃព្រះរាជាណាចក្រថៃ បានរៀបចំធ្វើឡើង នៅសណ្ឋាគារសូហ្វីតែលភ្នំពេញភូគីត្រា ក្រោមអធិបតីភាពលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោកជំទាវ តឹករ៉េត កំរ៉ង រដ្ឋលេខាធិការក្រសួងពាណិជ្ជកម្មកាលពីព្រឹកថ្ងៃទី30 ខែវិច្ឆិកា ឆ្នាំ2019នេះ។
សិក្ខាសាលានេះ រៀបចំឡើងក្នុងគោលបំណង ផ្សព្វផ្សាយអំពីអត្ថប្រយោជន៍នៃការថែរក្សាសុខភាព និងសម្ផស្សតាមរយៈវិធីកែប្រែទម្លាប់នៃការរស់នៅឱ្យបានត្រឹមត្រូវ និងរួមមានការធ្វើបទបង្ហាញ និងផ្តល់ការប្រឹក្សាយោបល់អំពីការស្តារនឹងថែរក្សាសុខភាព និងសម្ផស្ស ពីសំណាក់ក្រុមគ្រូពេទ្យជំនាញ ដែលបានឆ្លងកាត់ការហ្វឹកហ្វឺនបណ្តុះបណ្តាល និងទទួលបានសញ្ញាបត្របញ្ជាក់គុណភាពពីស្ថាប័ននានា លើពិភពលោក ដើម្បីណែនាំអ្នកចូលរួម អនុវត្តការថែរក្សាសុខភាព និងសម្ផស្សឱ្យបានត្រឹមត្រូវ។
ឯកឧត្តម ខៀវ កាញារីទ្ធ បានថ្លែងអំណរគុណដល់គ្លីនិក Absolute Health ដែលបានជ្រើសរើសកម្ពុជា ដើម្បីរៀបចំសិក្ខាសាលា ដ៏មានអត្ថប្រយោជន៍នេះឡើង ដើម្បីចែករំលែកចំណេះដឹង និងស្វែងយល់ពីការព្យាបាលបង្កើតកោសិកាថ្មីនេះឡើងដល់អ្នកចូលរួម ក៏ដូចជាប្រជាជនកម្ពុជា។
ឯកឧត្តម បានថ្លែងថា៖«គឺជាឱកាសមួយឱ្យយើងបានសិក្សា ស្វែងយល់ ពីការព្យាបាលនិងបង្កើតឡើងវិញនូវកោសិកាថ្មីដើម្បីពន្យារភាពចាស់ ដែលខ្ញុំជឿថាកាព្យាបាលបែបនេះមានលក្ខណៈថ្មីចំពោះប្រទេស និងប្រជាជនកម្ពុជាយើង។ខ្ញុំសង្ឃឹមថាអ្នកចូលរួម នឹងយកចិត្តទុកដាក់ ស្វែងយល់ពីការព្យាបាលថ្មីនេះតាមរយៈការធ្វើបទបង្ហាញរបស់វេជ្ជបណ្ឌិត»។
ឯកឧត្តម បានជឿជាក់ថា ការព្យាបាលបង្កើតកោសិកាថ្មីឡើងវិញ និងពន្យារភាពចាស់នេះនឹងទទួលបានការចាប់អារម្មណ៍ពីអ្នកចូលរួមទាំងអស់ និងពិតជាបានរួមចំណែក ពីបញ្ហាចំណេះដឹង ផ្នែកសុខភាពជូនអ្នកចូលរួមទាំងអស់ផងដែរ។
លោកជំទាវ តឹករ៉េត កំរ៉ង រដ្ឋលេខាធិការក្រសួងពាណិជ្ជកម្មបានចាត់ទុកការពង្រីកសេវាកម្មព្យាបាលមកកាន់កម្ពុជា ថាជាបរិយាកាសដ៏ល្អប្រសើរក្នុងការធ្វើពាណិជ្ជកម្ម និងការវិនិយោគពីដៃគូ ដូចជាគ្លីនិកពហុព្យាបាល Absolute Health នៃព្រះរាជាណាចក្រថៃនេះ។ ដោយហេតុថាសិក្ខាសាលានេះមិនត្រឹមតែផ្តល់ការសិក្សាស្វែងយល់នៃការព្យាបាលទេ តែថែមទាំងផ្តល់ឱកាសដល់ធុរកិច្ចនៃប្រទេសទាំងពីរ អាចសហការគ្នា ដើម្បីផ្តល់សេវាកម្មព្យាបាលឱ្យកាន់តែប្រសើរ ដល់ប្រជាជននៅក្នុងតំបន់។
លោកវេជ្ជបណ្ឌិត CHATCHAI SRIBUNDIT អគ្គនាយកក្រុមហ៊ុន Absolute Health Groupបានគូសបញ្ជាក់ថា៖«ខ្ញុំមានសេចក្តីរីករាយក្នុងការស្វែងរកដៃគូសហការនៅកម្ពុជាដើម្បីធានាឱ្យបានថាប្រជាជននៅក្នុងតំបន់ ទទួលយកបានការព្យាបាលដែលមានគុណភាព»។
លោកវេជ្ជបណ្ឌិត CHATCHAI SRIBUNDIT បានបន្ថែមថា Absolute Health គឺជាគ្លីនិកដែលឈានមុខគេ នៅប្រទេសថៃ និងមានក្រុមគ្រូពេទ្យជំនាញពោរពេញដោយបទពិសោធន៍ ដែលផ្តល់នូវទំនុកចិត្តជូនអតិថិជននូវការព្យាបាលឆ្លើយតបទៅនឹងតម្រូវការផ្នែកសុខភាព គ្រប់ផ្នែក គ្រប់ដំណាក់កាល ចាប់តាំងពីការពិនិត្យវិភាគសុខភាពលក្ខណៈជារួម ដើម្បីរកឱ្យឃើញនូវមូលហេតុនៃជំងឺយ៉ាងស៊ីជម្រៅ ការពិនិត្យវិភាគជំងឺរ៉ាំរ៉ៃនានា ការថែទាំសុខភាពក្នុងន័យការពារជំងឺ និងពន្យារភាពចាស់ ព្រមជាមួយនឹងសេវា ប្រកបដោយភាពងាយស្រួលកក់ក្តៅ យកចិត្តទុកដាក់គ្រប់ដំណាក់កាលទាំងអស់នៃការព្យាបាល។
លើសពីនេះទៅទៀត ក្រុមគ្រូពេទ្យជំនាញ មិនត្រឹមតែបំពេញតួនាទី ជាគ្រូពេទ្យព្យាបាលប៉ុណ្ណោះទេ ថែមទាំងបំពេញ តួនាទីជាទីប្រឹក្សាផ្នែកសុខភាពផ្ទាល់ខ្លួន ដើម្បីជាវិធីសាស្រ្តគាំទ្រសុខភាពដ៏ល្អចំពោះអ្នកជំងឺក្នុងរយៈពេលវែងទៀតផង។
សូមបញ្ជាក់ថា គ្លីនិក Absolute Healthនេះ បានសង្កត់ធ្ងន់លើការព្យាបាលឱ្យចំមូលហេតុពិតនៃជំងឺ ការថែទាំសម្រស់ស្បែកពន្យាររភាពចាស់និងការបន្តឹងស្បែកនិងរាង្គកាយដើម្បីឱ្យអ្នកមានភាពស្រស់ស្អាតដូចធម្មជាតិ ប្រើបច្ចេកវិទ្យាព្យាបាលដោយចលនា និងស្តារដោយវេជ្ជសាស្ត្រ ដោយប្រើកាំរស្មីឡាស៊ែររលក shock wave រលកម៉ាញ៉េទិច ដើម្បីព្យាបាលដោយគ្មានការឈឺចាប់។
ជាពិសេស ការពារមិនឱ្យមានជំងឺដោយឧបករណ៍ និងបច្ចេកវិទ្យាទំនើបទាន់សម័យ គ្រប់ដណ្តប់គ្រប់ប្រព័ន្ធដំណើរការរាងកាយ ស្តារនិងព្យាបាលជំងឺដោយវិធីកែប្រែទម្លាប់ការរស់នៅ លាងជាតិពុលប្រើប្រាស់សារធាតុចិញ្ចឹម វីតាមីននិងជាតិអ៊ីយ៉ុង ការមើលថែផ្នែកចំណីអាហារការថែទាំសម្រស់ស្បែក និងពន្យារភាពចាស់ចំពោះបុគ្គលយ៉ាងមានអនាម័យ៕
