Author: អេបិល

អេនប៊ី (Anbe) ធ្លាប់ជា VJ ម្នាក់ក្នុងចំនោម VJ ជាច្រើនដែលល្បីល្បាញខ្លាំងក្នុងចង្កោម VJ នៅកម្ពុជា។ Anbe ផ្តើមប្រឡូកសិល្បៈក្នុងឆ្នាំ2007 រហូតចន្លោះឆ្នាំ2009- 2010 ពិធីករកម្លោះសង្ហានេះ បានផ្តើមអាជីពជាពិធីករតាមកញ្ចក់ទូរទស្សន៍ និងចាប់ផ្តើមមានគេស្គាល់ មានអ្នកគាំទ្រពីពេលនោះមក។ បន្ទាប់ពីស្ងប់ស្ងាត់បាត់មុខពីលើកញ្ចក់ទូរទស្សន៍ប្រមាណ2ឆ្នាំ ពេលនេះ VJ Anbe ដែលល្បីល្បាញកាលពី10ឆ្នាំមុន បានត្រឡប់មករកអាជីពពិធីករវិញហើយ។ ត្រឡប់មកលើកនេះ VJ Anbe ឱ្យដឹងថា ការបាត់មុខប្រមាណ២ឆ្នាំរបស់លោកគឺតែលើកញ្ចក់ទូរទស្សន៍ប៉ុណ្ណោះ និងការសម្តែងភាពយន្តប៉ុណ្ណោះ ចំណែកការងារខាងក្រៅលោកនៅតែទទួលដូចដើម។

ឆ្នាំ២០២០ ជាចំនុចផ្តើមម្តងទៀតរបស់លោកក្នុងវិស័យសិល្បៈ ហើយការត្រឡប់មកលើកនេះ គឺយូរអង្វែង។ មិនត្រឹមការងារពិធីករទូរទស្សន៍ទេដែលលោកទទួលធ្វើវិញ ការថតភាពយន្តភាគ ឬដុំ ក៏ទទួលដូចគ្នាដែរ ប្រសិនផលិតករក្នុងស្រុកណាម្នាក់មើលឃើញ និងពេញចិត្តសមត្ថភាពរបស់លោក ហើយផ្តល់ឱកាស่ឱ្យរូបលោក។ គ្រាន់ត្រឡប់មកវិញភ្លាម គេឃើញ VJ Anbe ក្តោបបានការងារសិល្បៈវិញជាហូរហែរ ដូចជា ពិធីករកម្មវិធី «តូច ខ្លឹម ខ្លាំង» របស់ស្ថានីយ៍ទូរទស្សន៍ភីអិនអិន ជាពិធីករតាមកម្មវិធី និងអនឡាញ ថែមទាំងបានបង្ហាញមុខតាមកម្មវិធីផ្សេងៗរបស់សិល្បករ សិល្បការនី ជាមិត្តរួមអាជីពជាញឹកញាប់ថែមទៀតផង។ យ៉ាងណាមិញ VJ Anbe នៅមិនទាន់ហ៊ាននិយាយពីការរំពឹងប្រជាប្រិយភាពអាចនឹងមានការកើនឡើងវិញឬយ៉ាងណានោះទេ គ្រាន់តែសង្ឃឹមថាអ្នកគាំទ្រ និងទស្សនិកជន នឹងបើកបេះដូងទទួលរូបលោកដូចកាលពេល10ឆ្នាំ។

គួរបញ្ជាក់ផងដែរថា មកទល់ពេលនេះ លោកប្រឡូកសិល្បៈបាន១៣ឆ្នាំហើយ តែចន្លោះនេះលោកបានបាត់មុខពីសិល្បៈទាំងស្រុងប្រមាណ2ឆ្នាំ ធ្វើឲ្យប្រជាប្រិយភាពធ្លាក់ស្រុតខ្លាំងគួរឲ្យសម្គាល់។ គេនៅមិនទាន់ដឹងថា VJ រូបនេះ នឹងអាចបំបែកទីផ្សារអ្នកគាំទ្របានម្តងទៀតឬយ៉ាងណានោះទេ ខណៈបច្ចុប្បន្នមានតារាល្បីៗជាច្រើនកំពុងរីកធំធាត់ដូចផ្សិតកើតឡើងរៀងរាល់ថ្ងៃដើម្បីប្រជែងទីផ្សារសិល្បៈ។

ផលិតករ និងជាអ្នកនិពន្ធល្បីឈ្មោះ សុខ ចាន់ផល បានផលិតស្នាដៃដំបូងតាមរយៈរឿង «សង្សារ១៤ថ្ងៃ» នៅអំឡុងឆ្នាំ២០១៨ ។ បើគិតមកទល់ពេលនេះ គឺអស់រយៈពេលជាង២ឆ្នាំមកហើយ ដែលភាពយន្ដខ្មែរមួយនេះ ត្រូវខកខានមិនបានដាក់បញ្ចាំងក្នុងរោងភាពយន្ដ។ តើមានមូលហេតុអ្វី បានជាភាពយន្ដមួយនេះត្រូវផ្អឹបចោលឡើងរាប់ឆ្នាំបែបនេះ ? តើអាចប៉ះពាល់ដល់ប្រជាប្រិយភាពរឿងដែរឬទេ? ពោលគឺ បាត់បង់ចំនួនអ្នកចង់ទស្សនាភាពយន្ដនេះ។

លោក សុខ ចាន់ផល បានប្រាប់អ្នកសារព័ត៌មានថា «មិនខ្លាចធ្លាក់ប្រជាប្រិយភាពរឿងទេ នេះបើតាមខ្ញុំគិត។ ភាពយន្ដ «សង្សារ១៤ថ្ងៃ» នេះ ពិតណាស់គឺពន្យាពេលចាក់បញ្ចាំងយូរមែនទែន រហូតធ្វើឱ្យហ្វេនៗទន្ទឹងចាំមើលខ្លាំង នឹងមានចម្ងល់គ្រប់ៗគ្នា។ សួរថា តើភាពយន្ដនេះចាក់បញ្ចាំងពេលណាឱ្យប្រាកដ? ក៏ប៉ុន្ដែសម្រាប់ខ្ញុំ ខ្ញុំគិតថា ការអូសបន្លាយពេលបញ្ចាំងភាពយន្ដ ក៏ជាកត្តាមួយល្អ សម្រាប់ការអានប្រលោមលោក «សង្សារ១៤ថ្ងៃ»  ព្រោះភាពយន្ដនេះ បានចេញជាសៀវភៅប្រលោមលោកដែរ ក៏នឹងមិនភ័យព្រួយពីការបាត់បង់ចំនួនអ្នកទស្សនាភាពយន្ដដែរ។ បើអ្នកបានអានប្រលោមលោក នោះគេនឹងទន្ទឹងចាំមើលភាពយន្ដជាក់មិនខាន»។

អ្នកនិពន្ធភាពយន្ដនិងប្រលោមលោកដ៏ល្បីមួយនេះ  ក៏បានអះអាងទៀតថា «ការពិតទៅភាពយន្ដនេះ គ្រោងដាក់បញ្ចាំងនៅខែវិច្ឆិកា ឆ្នាំ២០២០នេះដែរ ក៏ប៉ុន្ដែ ដោយសារតែកូវីដ១៩ ធ្វើឱ្យរោងកុនបិទទ្វារ។ អ៊ីចឹងហើយ ភាពយន្ដនេះ ក៏ត្រូវរុញពេលបញ្ចាំងទៅមុខជាបន្ដទៀត»។

សូមជម្រាបថា សាច់រឿង «សង្សារ ១៤ថ្ងៃ»ជារឿងបែបមនោសញ្ចេតនា និងមានខ្លឹមសា​អប់រំ និងផ្តល់កម្លាំងចិត្តដល់យុវវ័យដែលជាស្នាដៃកម្រ និងផលិតឡើងដោយការ​យកចិត្តទុកដាក់។ រឿងនេះត្រូវបានជ្រើសរើសតួស្រីស្អាត ស៊ិម ស្រីនិច ធ្វើជាតួឯក យ៉ានី ទាំងលើគ្របសៀវភៅ និងក្នុងភាពយន្ត និងតួប្រុស ហូរ សារៈ លោក សាន់នី លោក លី សុខណេត និងតារាកិត្តិយសជាច្រើនរូបទៀត៕

កាលពីពេលថ្មីៗ តារាហ្វេសប៊ុក និង ជាតារា Tik Tok ផាកប៊ូមខ្មែរ ដែលមានឈ្មោះពិតថា រៃ សុភា បានបង្ហាញប្រតិកម្មយ៉ាងចាស់ដៃចំពោះបុគ្គលិកដែលដាក់ស៊ីវី និង ទើបបានចូលបម្រើការនៅក្នុងហាង Sophea Skin Care បន្ទាប់ពីបុគ្គលិកដែលមកសុំការងារទាំងនោះ គឺក្រោយពេលប្រគល់ភារកិច្ចឱ្យ ក៏បោកគ្រាប់បែក និង ខ្លះរត់ចោលកណ្ដាលទី ធ្វើអោយលោកស្រីខកបំណង។

លោកស្រី រៃ សុភា គឺជាតារាហ្វេសប៊ុក ដែលមានមុខមាត់ស្រដៀងនឹងសមាជិក 2NE1 កញ្ញា ផាកប៊ូម ដ៏ល្បីរបស់ប្រទេសកូរ៉េខាងត្បូង រហូតធ្វើឱ្យគេហៅឈ្មោះលោកស្រីថា ផាកប៊ូមខ្មែរ។ លោកស្រីគឺជាតារាTik Tok ដែលមានកេរ្តិ៍ឈ្មោះសំឡេង និងជាអ្នកឯកទេសផ្នែកថែរក្សាសម្រស់ និង ព្យាបាលមុនដ៏ល្បីប្រចាំហាង Sophea Skin Care ដែលស្ថិតនៅផ្សារសុវណ្ណា ផ្សារទួលពង្រ និង នៅសៀមរាប។ លោកស្រីក៏ត្រូវគេស្គាល់កាន់តែខ្លាំងដោយសារតែមានសកម្មភាពសប្បុរសធម៌ យ៉ាងសកម្មព្រមជាមួយនឹង វីដេអូចែករំលែកពីចំណេះដឹងផ្នែកសម្ភស្ស ដែលលោកស្រីតែងតែបង្ហោះនៅលើយូរធូបនាពេលចុងក្រោយ។

តាមរយៈវីដេអូជាង៦នាទីគេមើលឃើញថា ក្រោយពេលលោកស្រីប្រកាសជ្រើសរើសបុគ្គលិកប្រចាំហាង គឺមានCV របស់អ្នកដាក់ពាក្យចំនួន10រូបត្រូវបានជ្រើសឱ្យមកធ្វើសម្ភាសន៍ ដោយអ្នកខ្លះយំផង អង្វរផង សុំឱ្យលោកស្រីទទួល ព្រោះគ្មានការងារធ្វើ ប៉ុន្តែក្រោយពេលកំណត់អោយជាប់ហើយ បែរជាខ្លះមិនមកធ្វើការ និង ខ្លះបានចូលធ្វើការហើយ បែរជាដើរស៊ើបប្រាក់ខែបុគ្គលិកចាស់ ហើយពេលដឹងថាខ្លួនបានតិចជាងគេ ក៏ឈប់មិនឱ្យដំណឹង។ លោកស្រីបញ្ជាក់ថា ក្នុងពេលសម្ភាសន៍លោកស្រីពន្យល់អស់ហើយ ថាសម្រាប់បុគ្គលិកថ្មីផ្នែកនេះ បានប្រាក់ខែប៉ុន្មាន បុគ្គលិកថ្មីផ្នែកនោះ បានប្រាក់ខែប៉ុន្មាន ហើយក៏ប្រាប់ផងដែរថា បុគ្គលិកនីមួយៗ គឺទទួលបានភាគរយពីការខិតខំបំពេញការងារបន្ថែមពីលើនៅក្នុងហាងប្រចាំថ្ងៃទៀត ចុះហេតុអ្វីពេលព្រមព្រៀងគ្នាហើយ បែរមិនមកបំពេញការងារ និង ឈប់កណ្ដាលទី ទាំងលោកស្រីបានប្រគល់ភារកិច្ចឱ្យហើយ៕

កាន់តែជាក់ច្បាស់ទស្សនាវីដេអូខាងក្រោមនេះ៖

Japanese Film Festival Plus ឬ JFF Plus ជាកម្មវិធីមហាស្រពភាពយន្តជប៉ុនដូចគ្នានិងមហោស្រពភាពយន្តជប៉ុនឆ្នាំ២០២០ដែរ តែវាត្រូវបង្កើតជាលើកដំបូង តាមប្រព័ន្ធឌីជីថលទំនើបក្នុងទម្រង់បែបអនឡាញ អំឡុងការរាតត្បាតនៃវីរ៉ុសកូវីដ១៩ ដែលរាលដាលលើសកលលោករួមទាំងកម្ពុជាផងនោះ ដើម្បីឲ្យប្រទេសផ្សេងទៀតមានលទ្ធភាពទស្សនាខ្សែភាពយន្តក្នុងមហាស្រពភាពយន្តជប៉ុនបាន ទោះមិនបានការរៀបចំធំដុំដូចរាល់ឆ្នាំ។

JFF Plus មានប្រទេសចំនួន២០ចូលរួម ក្នុងនោះក៏មានប្រទេសប្រទេសកម្ពុជាផងដែរ។ សម្រាប់អ្នកគាំទ្រ និងនិយមទស្សនាភាពយន្តជប៉ុន លោកអ្នកអាចចូលរួមទស្សនារឿងពី JFF Plus បាននៅខែធ្នូ ខាងមុខ ចាប់ពីថ្ងៃទី ០៤ ដល់ថ្ងៃទី១៣ តាមការវិភាគដែលរៀបចំដោយ JFF Plusដូច្នេះហើយសម្រាប់លោកអ្នកនិយមគាំទ្រមហោស្រពភាពយន្តជប៉ុននៅតែមានលទ្ធភាពក្នុងការទស្សនាភាពយន្តជប៉ុនល្អៗបានតាមរយៈ JFF Plus។ នេះចាត់ទុកជាការប៉ះប៉ូវជំនួសឲ្យមហោស្រពភាពយន្តជប៉ុនឆ្នាំ២០២០ ដែលបាននិងកំពុងប្រព្រឹត្តឡើង តែបែរជាត្រូវផ្អាកចាក់បញ្ចាំងកណ្តាលទីទៅវិញ ដើម្បីការពារការរីករាលដាលជំងឺកូវីដ-១៩ នៅកម្ពុជា តាមសេចក្តីប្រកាសរបស់ក្រសួងសុខាភិបាលនៃព្រះរាជាណាចក្រកម្ពុជា ដែលប្រកាសឡើងកាលពីថ្ងៃទី០៨ ខែវិច្ឆិកា ឆ្នាំ២០២០ កន្លងទៅ។

លោកអ្នក អាចស្វែងរកពត៌មានបន្ថែមពី Japanese Film Festival Plus តាមតំណរភ្ជាប់នេះផ្ទាល់ https://jff.jpf.go.jp/about/?fbclid=IwAR3Pe-M-kcWBVupgbILZpO_n4X-ahA0ExHLHQuzZ2PHiGit0u4VS5KXHTbE

ឬ អាចទំនាក់ទំនងទៅកាន់ទំព័រហ្វេសប៊ុកផ្លូវការរបស់មហោស្រពភាពយន្តជប៉ុន ដែលមានឈ្មោះថា @ Japanese Film Festival – Cambodia។ សូមជម្រាបថា មហោស្រពភាពយន្តជប៉ុនឆ្នាំ២០២០ ត្រូវបានប្រកាសបើកជាផ្លូវការនៅថ្ងៃទី០៦ ខែវិច្ឆិកា ឆ្នាំ២០២០ នៅរោងភាពយន្ត Major Cineplex by Smart ផ្សារទំនើបអ៊ីអន២ ក្រោមការចូលរួមយ៉ាងខ្ពង់ខ្ពស់ពីសំណាក់ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និង ឯកឧត្តម MIKAMI Masahiro (មីកាមិ ម៉ាសាហ៊ីរ៉ុ) ឯកអគ្គរាជទូតនៃប្រទេសជប៉ុនប្រចាំកម្ពុជា មជ្ឈមណ្ឌលអាស៊ីនៃមូលនិធិជប៉ុន និងសិស្សានុសិស្ស។

ពិតជារឿងគួររឲ្យសោកស្តាយ មហោស្រពភាពយន្តជប៉ុនឆ្នាំ២០២០នេះ ទើបតែដំណើរការបានប៉ុន្មានថ្ងៃប៉ុណ្ណោះ ក៏ត្រូវផ្អាកទៅវិញ តាមសេចក្តីប្រកាសរបស់ក្រសួងសុខាភិបាលនៃព្រះរាជាណាចក្រកម្ពុជា ដើម្បីចូលរួមការពារការរីករាលដាលជំងឺកូវីដ-១៩ នៅកម្ពុជា។ ត្បិតដំណើរការបានរយៈពេលខ្លីក៏ពិតមែន ប៉ុន្តែ មហោស្រពភាពយន្តជប៉ុនឆ្នាំ២០២០នេះ ត្រូវអ្នកបានចូលទស្សនាពោលសរសើរ និងសាទរមិនដាច់ពីមាត់ថា រឿងពិតជាល្អមើលប្លែក ហើយរឿងដែលយកមកចាក់បញ្ចាំងជារឿងដែលមិនសូវបានចាក់ផ្សាយនាពេលសព្វថ្ងៃនេះទេ ជាក់ស្តែង ដូចរឿង AI Amok និយាយពីឧក្រិដ្ឋកម្ម AI ដែលជាការវាយលុកតាមប្រព័ន្ធអ៊ីនធឺណិតជាដើម។

កាលពីថ្ងៃក្រុងពាលីរឿង«ស្នាមស្នេហ៍សមុទ្ររាម» វគ្គ២ កន្លងមកថ្មីៗនេះ អ្នកនិពន្ធ និងដឹកនាំរឿង ពាន់ ភួងបុផ្ផា ត្រូវបានក្រុមអ្នកសារព័ត៌មានក្នុងស្រុកសាកសួរនាំ និងជីកកកាយមូលហេតុការមិនជ្រើសយកតារាសម្តែងចាស់ៗ កាល17ឆ្នាំ មុនសម្តែងក្នុងវគ្គថ្មីនេះ។

ក្រោយពីផ្ទាល់កិច្ចសម្ភាសន៍ នៅរសៀលថ្ងៃខែឆ្នាំដដែរ គេឃើញមានការភ្ញាក់ផ្អើលមួយបានកើតឡើង ដោយមានអត្ថបទក្នុងស្រុកមួយបានចុះផ្សាយចំណងជើងថា សឿ សុធារ៉ា អស់ភាពក្រមុំទើបមិនអាចជ្រើសមកយកឲ្យសម្តែងជាតួឯករឿង «ស្នាមស្នេហ៍សមុទ្ររាម» វគ្គ២ បាន។ យ៉ាងណាមិញ ក្រោយបានឃើញអត្ថបទនេះ អ្នកនិពន្ធ និងដឹកនាំរឿង ពាន់ ភួងបុផ្ផា បានចេញមុខស្រាយមន្ទិលនេះហើយ តាមរយៈគណនីហ្វេសប៊ុកផ្ទាល់ខ្លួនរបស់អ្នកស្រី។

យោងតាមការបង្ហោះលើគណនីដែលគេឯងដឹងថាជារបស់អ្នកនិពន្ធ និងដឹកនាំរឿងរូបនេះ បានសរសេររៀបរាប់ស្រាយបំភ្លឺចំពោះចំណងជើងអត្ថបទខាងលើថា៖ «ខ្ញុំសូមបំភ្លឺចំពោះពាក្យសម្តីរបស់ខ្ញុំ ដែល Fresh News យកមកធ្វើជាចំណងជើងអត្ថបទ នោះគឺជាការដកស្រង់មិនអស់សម្ដី ធ្វើឲ្យមានកាយល់ច្រឡំអំពីសំនួរដែលសួរខ្ញុំថា ហេតុអ្វីមិនយកតួសម្តែងអ្នកនាង សឿ សុធារ៉ាមកសម្តែងតួនាងរាមវិញ? ខ្ញុំបានឆ្លើយក្នុងន័យថា រឿងស្នាមស្នេហ៍សមុទ្ររាម មុន គឺយើងថត១៧ឆ្នាំកន្លងមក ដូច្នេះតួសម្តែងមុន គាត់មិននៅក្មេងដូចមុនទៀតទេ គាត់មានប្តីមានកូនហើយ។ នេះជាការពិតព្រោះក្នុងអត្ថបទភាពយន្តបានសរសេរពីនាងរាម គឺមានអាយុ១៦-១៧ឆ្នាំតែប៉ុណ្ណោះ។ អគុណចំពោះការយកចិត្តទុកដាក់របស់ Fan Fan ទាំងអស់គ្នា »៕

ដូចមហាជនបានដឹងហើយថា «TikTok» ជាកម្មវិធីកម្សាន្តបែបឌីជីថលមួយ ដែលមានប្រភពមកពីប្រទេសចិន។ កម្មវិធីទូរស័ព្ទនេះទើបតែចាប់កំណើតក្នុងរយៈពេលខ្លីប៉ុណ្ណោះ តែទទួលបានការគាំទ្រហួសពីការស្មាន។ បច្ចុប្បន្ន កម្មវិធីនេះកំពុងតែល្បីខ្ទរខ្ទារពាសពេញពិភពលោក ក្នុងនោះរួមទាំងប្រទេសកម្ពុជាផងដែរ ដោយគេសង្កេតឃើញមានអ្នកប្រើប្រាស់ច្រើនលើសលុប ហើយក៏មានមនុស្សជាច្រើនកំពុងតែទាញប្រជាប្រិយភាព ពីមហាជនតាមរយៈ App ទូរស័ព្ទមួយនេះផងដែរ។

នៅក្នុងនោះដែរ រយៈពេលប្រមាណជាមួយខែចុងក្រោយនេះ បទចម្រៀងរបស់ លោក ខេមរៈ សិរីមន្ត នៅក្នុងផលិតកម្ម រស្មីហង្សមាស ចំណងជើងថា «ពឺតៗ» បាននឹងកំពុងផ្ទុះការគាំទ្រក្នុងកម្មវិធី «TikTok» ដោយមានអ្នកធ្វើត្រាប់តាមវីដេអូចម្រៀងនេះ រហូតដល់រាប់សែន ក្នុងចំណោមនោះមិនត្រឹមមានអ្នកគាំទ្រក្នុងស្រុកប៉ុណ្ណោះទេ តែកាន់តែគួរឲ្យភ្ញាក់ផ្អើលជាងនេះ ក្នុងចំណោមអ្នកដែលស្រឡាញ់ Cover វីដេអូ បទនេះ មានទាំងប្រទេសថៃ និងប្រទេសឡាវយ៉ាងច្រើន ព្រោងព្រាតទៀតផង។

បទចម្រៀងដ៏មានប្រជាប្រិយមួយបទនេះ មិនត្រឹមតែកំពុងល្បីកក្រើកក្នុង TikTok ប៉ុណ្ណោះទេ ងាកទៅផ្នែក YouTube វិញក៏មិនធម្មតា ដោយត្រឹមតែមួយខែរាប់ចាប់ពីថ្ងៃចេញបទនេះជាផ្លូវការរហូតមកទល់ថ្ងៃទី5 ខែវិច្ឆិកា ឆ្នាំ2020 (រសៀលម៉ោង5) មានអ្នកចុចចូលទស្សនារហូតដល់ទៅជិត 7.1លានដងទៅហើយ។ ការផ្ទុះការគាំទ្រខ្លាំងនៅពេលនេះ គឺទាំងមិនទាន់ចេញជា OFFICIAL MV នៅឡើយទេ យ៉ាងណាមិញ ខណៈពេលនេះ គេកំពុងតែចាំអ៊ុតមើលថាតើទម្រាំ MV ផ្លូវការបទនេះ តើនឹងផ្ទុះខ្លាំងដល់កម្រិតណា បើត្រឹមតែចេញ ជា Audio ក៏ល្បីយ៉ាងហ្នឹងទៅហើយនោះ។ ក្រៅពីបទនេះ នៅមានបទចម្រៀងថ្មីៗជាច្រើនផ្សេងទៀតរបស់ លោក ខេមរៈ សិរីមន្ត នៅក្នុងផលិតកម្មរស្មីហង្សមាស ដែលផ្ទុះការគាំទ្រខ្លាំងដូចគ្នា ជាក់ស្តែងមានដូចជាបទ I’m Not The Gang ក៏កំពុង តែទទួលការគាំទ្រមិនធម្មតាដែរ៕

https://youtu.be/8S4o8fbAreA

https://youtu.be/IesHXf7-DZ0

https://youtu.be/p3ORZoWguDQ

«១ម៉ោងដើម្បីសង្គមជាតិ» ត្រូវ ផលិតកររឿង «ដើម្បីកូន» លោក ហ៊ុយ យ៉ាឡេង បញ្ជាក់ក្នុងវីដេអូឃ្លីបរយៈពេលជាង4នាទី លើបណ្ដាញសង្គមនៅថ្ងៃទី4 ខែវិច្ឆិកា នេះ ថា ដោយសារលោកសង្កេតឃើញមានមនុស្សភាគច្រើន ខំប្រឹងធ្វើការងារដើម្បីខ្លួនឯង និងគ្រួសារ ប៉ុន្ដែមិនបានគិតគូរ ឬចែករំលែកពេលវេលាណាមួយច្បាស់លាស់ដើម្បីជួយសង្គមឡើយ។ ដូច្នេះហើយទើបលោកផ្តួចផ្តើមបង្កើតកម្មវិធីនេះឡើង ដោយ «១ម៉ោងដើម្បីសង្គមជាតិ» មានន័យថា មនុស្សយើងមួយអាទិត្យក្រៅពីធ្វើការដើម្បីខ្លួនឯងនិងគ្រួសារហើយ គួរចំណាយពេល១ម៉ោងយ៉ាងតិចដើម្បីជួយដល់សង្គមជាតិវិញ។

លោកថា គំនិតនេះលោកបានគិតយូរហើយតែរង់ចាំអក្សរមានសិនចាំធ្វើ តែដោយសារកូវីតធ្វើឱ្យលោកភ្ញាក់ខ្លួនទៅមុខទៀតមិនដឹងមានរឿងអ្វីទាន់គំនិតនៅមានកម្លាំងនៅមានគួរតែធ្វើ ហើយបានការជម្រុញពីមិត្តខ្ញុំម្នាក់ឈ្មោះ ម៉ែនចនសុន ផងទើបសម្រេចចិត្តធ្វើ តែអាចធ្វើទៅបានគឺត្រូវមានការចូលរួមពីបងប្អូនមិត្តភក្រអ៊ំពូមីងជួយជាកម្លាំងកាយចិត្តនិងថវិការទើបជោគជ័យបាន។

លោក ហ៊ុយ យ៉ាឡេង ក៏អំពាវនាវដល់អ្នកដែលមានទេពកោសល្យ មានគំនិតថ្មីៗ ឬអ្នកដែលចង់ចូលរួមក្នុងសកម្មភាពអប់រំសង្គមដោយផ្ទាល់ឲ្យចូលរួមជាមួយលោកក្នុងការធ្វើដោយផ្ទាល់ និងបំផុសគំនិតឱ្យជនរួមជាតិចេះគិតគូរពីសង្គមជាតិកាន់តែច្រើនឡើង។ រីឯសប្បុរសជនទាំងក្នុង និងក្រៅប្រទេសដែលមិនអាចចូលរួមសកម្មភាពនេះដោយផ្ទាល់បាន ក៏អាចជួយបរិច្ចាគនូវថវិកាដើម្បីគាំទ្រកម្មវិធីនេះបានដែរ តាមរយៈទូរស័ព្ទលេខ 012 / 069 239 789។ នៅក្នុងកម្មវិធី «១ម៉ោងដើម្បីសង្គមជាតិ» នេះ លោក ហ៊ុយ យ៉ាឡេង ដែលជាអ្នកផ្ដួចផ្ដើមគំនិត អះអាងថា រូបលោកនឹងចេញមុខមុនគេក្នុងការចូលរួមអប់រំដល់ជនរួមជាតិតាមរយៈរឿង «វិបត្តិផ្សែងបារី» ដែលរឿងអប់រំខ្លីនេះនឹងចេញក្នុងពេលឆាប់ៗ។

ព្រោះតែកន្លង​មកទស្សនិកជនក៏ដូចជាអ្នកគាំទ្រតែងតែ​​ផ្គូផ្គងចង់ឱ្យកំពូលតារាចម្រៀងលោក ខេមរៈ សិរីមន្ត និងអ្នកនាង ឱក សុគន្ធកញ្ញា ចាប់ដៃគូច្រៀងជាមួយគ្នា ដោយសារតែយល់ឃើញថា អ្នកទាំងពីរពិត​ជាដៃគូដ៏​ស័ក្កិ​សម​ឥត​ខ្ចោះ ហើយក៏ជាតារាចម្រៀង​ដែល​ឈរ​លំដាប់ជួរ​មុខ​​ក្នុង​ប្រទេសផងដែរ ។ តាំងពីទ្រនំផលិតកម្ម U2 រហូតមកជ្រកនៅហង្សមាស អ្នកនាង ឱក សុគន្ធកញ្ញា និងលោក ខេមរៈ សិរីមន្ត ត្រូវបានហ្វេនៗគាំទ្រឱ្យជាដៃគូចម្រៀងលំដាប់កំពូល។

ថ្មីៗនេះកំពូលតារាចម្រៀងល្បីឈ្មោះរស់​ក្នុងផលិតកម្មហង្សមាស ឱក សុគន្ធកញ្ញា បានធ្វើការបង្ហោះរូបភាពរួមមិត្តសំឡាញ់ក្នុងវិថីចម្រៀងលោក ខេមរៈ សិរីមន្ដ ក្នុងឱកាស​ថ្ងៃកំណើតយ៉ាង​ភ្ញាក់ផ្អើល​ពីសំណាក់​អ្នកគាំទ្រ​ជាមួយពាក្យពេចន៍ដ៏ស្និទ្ធស្នាល​មិនធ្លាប់ឃើញពីមុនមកឡើយ។

តារាស្រីដែលជាប្អូនថ្លៃថៅកែហង្សមាសបានរៀបរាប់​ឲ្យដឹង​កាន់តែច្បាស់​ទំនាក់ទំនងរួម សិរីមន្ដ ថា៖ «ថ្វី​ត្បិត​តែ​យើង​ជាមិត្ត តែគ្មានឱកាស​បាន​ជុំគ្នា​ក្រៅពី​ម៉ោងធ្វើការ តែយ៉ាងណាក៏មិនដែល​ភ្លេចគិតពី​សុខទុក្ខ​គ្នា​ឡើយ​ ហើយខ្ញុំនៅតែចាំថាខ្ញុំមានមិត្តម្នាក់ចាំផ្ដល់កំលាំងចិត្ត និងជាអ្នកគាំទ្រខ្ញុំគ្រប់ពេល រីករាយ​ថ្ងៃកំណើត​មិត្ត​ល្អរបស់ខ្ញុំ»។ សុគន្ធ កញ្ញា តារាចម្រៀងកូនមួយត្រួយជីវិតមានឈ្មោះឆលី បានថ្លែង​នូវចុងបញ្ចប់​នៃសំណេរខ្លួន​ពីការជូនពរថា៖ «សូម​ឲ្យ​អ្នកទទួល​បាន​អ្វី​ៗគ្រប់យ៉ាងដែលជាបំណងប្រាថ្នា ឈប់​អន់ចិត្ត​ទៀត ​OK ចាស់ៗ​អស់ហើយ​»៕

តារាចម្រៀងទ្រនំ ថោន កញ្ញា ផាន វីរ៉ាទី ហៅ កញ្ញា រ៉ាប៊ី បានរអ៊ូថា ជិតចប់ឆ្នាំ ២០២០ ហើយ នាងនៅតែគ្មានម្ចាស់ចិន្តាមកនែបនិត្យនៅឡើយទេ។ យ៉ាងណាមិញ រ៉ាប៊ី ក៏បានព្រលយពីលក្ខខណ្ឌនៃសេចក្តីប្រាថ្នាចំពោះបុរសជាគូគ្រងខ្លួន នាពេលអនាគតឱ្យដឹងថា បុរសដែលនាងចង់បាន ឬស្រឡាញ់ជាគូជីវិត គឺជាបុរសដែលគោរពស្រឡាញ់ និងឱ្យតម្លៃនាងឱ្យបានច្រើន គឺមានសេរីភាពក្នុងការចាយវាយ និងការរស់នៅជាដើម។

កញ្ញា រ៉ាប៊ី បានរអ៊ូថា៖ «រកសង្សារក្នុងស្រុកមួយគ្រាប់ ធ្វើថ្នាំមិនបានសោះ ហើយក៏គ្មានប្រុសស្នេហ៍នៅបរទេសណាដែរ អ៊ីចឹងសរុបទៅឆ្នាំ2020 បេះដូងនាងខ្ញុំ គឺទទេស្អាតតែម្ដង មិនទាន់មានប្រុសណាម្នាក់មកធ្វើជាម្ចាស់ចិត្តឡើយ»។ តែយ៉ាងណាតាមប្រភពអ្នកតាមដានប្រមាញ់ពីជីវិតឯកជនរបស់នាង បានព្រលយឲ្យដឹងថា អំឡុងពេលដែលនាងចេញទៅសម្ដែងនៅសហរដ្ឋអាមេរិកកាលពីឆ្នាំមុន នាងមានគេទាក់ទងផងដែរ ប៉ុន្តែដោយសាររូបនាងមិនបង្ហាញភ្លើងខៀវឱ្យគេ ទើបស្ងាត់ទៅវិញអស់ទៅ ស្រាប់តែឥឡូវ បែរមករអ៊ូថារកសង្សារម្នាក់មិនបានទៅវិញ។

តារាចម្រៀងរូបស្រស់ រ៉ាប៊ី ជាតារាចម្រៀងស្រីសំខាន់ម្នាក់របស់ផលិតកម្ម ថោន ក៏ធ្លាប់បញ្ជាក់ដែរថា៖ «ជារឿងធម្មតាទេ សម្រាប់ជីវិតមនុស្សមិនទាន់មានគូគ្រង គឺតែងតែមានគេមកតាមដូច្នេះហើយ។ តែសម្រាប់នាងខ្ញុំ នាពេលនេះដូចជា មិនទាន់ចង់គិតគូរខ្លាំងលើរឿងគូគ្រងអ្វីនោះឡើយ គឺនាងខ្ញុំចង់ប្រើពេលរកប្រាក់ពីការងារសិល្បៈនេះមួយរយៈសិន ព្រោះថាក្រោយពីបានវិលមកពីអាមេរិកមកនោះ ខ្ញុំក៏ទទួលការងារសិល្បៈច្រើនណាស់ គឺសឹងតែគ្មានពេលទំនេរទេ ពីមួយអាទិត្យ ទៅមួយអាទិត្យ»។ ម្ចាស់បទ «ដង្កូវវើកៗ» រូបនេះ ស្រូបបានប្រជាប្រិយភាពល្បីខ្លាំងពីយុវវ័យសម័យថ្មី ក៏បានឱ្យដឹងពីមូលហេតុ ពុំទាន់បើកចិត្តទទួលយកស្នេហ៍ពីក្រុមកន្លង់បរទេសជាអាណិកជនខ្មែរ-អាមេរិកទាំងឡាយ ដែលតាមសុំស្នេហ៍ដែរថា៖ «ម្យ៉ាងទៀតអ្នកតាមសួរនាំខ្ញុំនោះ ភាគច្រើននៅមិនទាន់ពេញចិត្ត ឬត្រូវចិត្តចង់បានរបស់នាងខ្ញុំនោះឡើយ។ នាងខ្ញុំក៏សន្យាក្នុងចិត្តខ្លួនដែរថា បើមិនត្រូវចិត្តនាងខ្ញុំប្រាថ្នាចង់បានទេ គឺសុខចិត្តនៅទំនេរល្អជាង»។

ខេម ដែល​ជា​គ្រាប់​ពេជ្រ​របស់​ផលិតកម្ម Galaxy Navatra ពេល​​នេះ​​បាន​​សាក​ល្បង​ចេញ​រក​ស៊ី​​ហើយ ដោយ​អាជីវកម្ម​ដំបូង​មួយ​នេះ បាន​ប្រើ​ដើម​ទុន​រហូត​ជាង​20ម៉ឺន​ដុល្លារ​ឯណោះ។ មុខ​ជំនួញ​ដំបូង​របស់ ខេម មិន​មែន​ជា​អចលនទ្រព្យ​ដូច​ថៅកែ​​របស់​ខ្លួន​ឡើយ ពោល​គឺ​លោក​បាន​បើក​ជា​​ភោជនីយដ្ឋាន​(ផាប់) លក្ខណៈ​ស្តង់ដារ​មួយ។

តារា​ចម្រៀង​ល្បី​ឈ្មោះ​រូប​នេះ បាន​ថ្លែង​ឲ្យ​ដឹង​ថា មូលហេតុ​ដែល​នាំ​ឱ្យ​លោក​សម្រេច​ចិត្ត​បើក​ភោជនីយដ្ឋាន​(ផាប់) ​នេះ ក៏​ព្រោះ​តែ លោក​គិត​ថា ​ខ្លួន​ចង់​មាន​មុខរបរ​បន្ទាប់​បន្សំ​​មួយ​ក្រៅ​ពី​ការងារ​សិល្បៈ ត្បិត​​​អី​​ទៅ​ថ្ងៃ​អនាគត​មិន​អាច​តែ​ពឹង​លើ​សិល្បៈ​មួយ​មុខ​បាន​ឡើយ។ ខេម បាន​បង្ហើប​ឲ្យ​ដឹង​ថា T&Y Restaurant ដែល​ខ្លួន​ហ៊ាន​វិនិយោគ​​លើក​ដំបូង​នេះ​ បាន​ប្រើ​ទុន​រហូត​ដល់​ទៅ​ជាង20ម៉ឺន​ដុល្លារ​ឯណោះ ហើយ​មុខ​ជំនួញ​នេះ មិន​មាន​អ្នក​ណា​ម្នាក់​ចូល​ហ៊ុន​ជា​មួយ​ឡើយ គឺ​លោក​បើក​ផ្ដាច់​មុខ​តែ​ម្ដង ប៉ុន្តែ​ក្នុង​នោះ​មាន​ការ​ប្រឹក្សា​ពី​បង​ប្រុស​របស់​លោក​ម្នាក់ដែរ។ ការ​សម្រេច​ជ្រើស​ទីតាំង​​​ជិត​វត្ត​សំរោង​អណ្ដែត មក​ផ្ដើម​អាជីវកម្ម​លើក​ដំបូង​នេះ ខេម បាន​សិក្សា​​ជា​ច្រើន​ឆ្នាំ​នឹង​ច្បាស់​លាស់ ដោយ​លោក​យល់​ថា ម្ដុំ​នោះ​មាន​ហាង​ច្រើន ប៉ុន្តែ​ហាង​បែប​​(ផាប់) មាន​ប៊ែន​ច្រៀង មិន​ទាន់​មាន​នៅ​ឡើយ​ទេ ដូច​នេះ​ការ​បើក​នៅ​ទីតាំង​នេះ វា​ពិត​ជា​ងាយ​ស្រួល​​ដល់​​អតិថិជន​ដែល​ចង់​សប្បាយ​បែប​ផាប់ មិន​ចាំ​បាច់​ចូល​កណ្ដាល​ទី​ក្រុង​នោះ​ទេ អាច​មក​កន្លែង​លោក​បាន​។

ខេម បាន​ពន្យល់​នៃ​ពាក្យ T&Y Restaurant មាន​ន័យ​ថា (Thank you អរគុណ) ដែល​​ពាក្យ​មួយ​នេះ​មនុស្ស​គ្រប់​គ្នា​តែង​និយាយ​ជា​ការ​គួរសម។ T&Y Restaurant បាន​បើក​លក់​សាល​ល្បង​ប៉ុន្មាន​ថ្ងៃ​មក​ហើយ ឃើញ​​ថា មាន​ការ​​គាំទ្រ​ច្រើន ថ្ងៃ​​សម្ពោធ​ជា​ផ្លូវ​ការ​គ្រោង​ធ្វើ​នៅ​ថ្ងៃ​ទី07 ខែ វិច្ឆិកា ឆ្នាំ 2020 ខាង​នេះ។ ភ្ញៀវ​កិត្តិយស​ដែល​ធ្វើ​ខួប​កំណើត​ និង​កម្មវិធី​ជប់លៀង​ផ្សេងៗ​​ និង​មានការ​ Discount យ៉ាង​ពិសេស​ជូន​ភ្ញៀវ​កិត្តិ​យស​ផង​ដែរ​។ ទទឹម​គ្នា​នោះ​ដែរ ខេម ក៏​បាន​ស្នើ​ដល់​អ្នក​គាំ​របស់​លោក ជាពិសេស​​អ្នក​ដែល​រស់​​នៅ​តំបន់​ហាង​របស់​លោក មេត្តា​ចូល​សាក​ល្បង​មុខ​ម្ហូប ស្ដាប់​ភ្លេង​​ហាង​ថ្មី របស់​លោក​ឱ្យបាន​ច្រើន​កុះករផង​ដែរ៕