ឯកសារវីដេអូមួយបង្ហាញថា មួយតួខ្លួនរបស់ Jackie Chan សុទ្ធតែធ្លាប់បាក់ទាំងអស់ ក្នុងនោះលលាដ៍ក្បាលក៏ប្រេះ និង ត្រចៀកក៏ថ្លង់។ ឈិនឡុង ត្រូវបានគេដាក់សំណួរលើគាត់ថា តើគាត់នៅរស់បានដោយរបៀបណា?
តារាសម្ដែងក្បាច់គុនចិនរូបនេះ ត្រូវបានគេកោតសរសើរសម្រាប់ការថត ដោយមិនប្រើ Effect ឬកាត់តរូបភាព ដោយគាត់សម្ដែងដោយផ្ទាល់ៗ និងមិនប្រើខ្សែកាបជំនួយអ្វីទាំងអស់។ រាល់ការសម្ដែងរបស់គាត់ក្នុងឈុតគ្រោះថ្នាក់នីមួយៗ គឺគាត់សម្ដែងវាជាការពិត មិនបោកប្រាស់ភ្នែកអ្នកមើលនោះឡើយ ថ្វីបើការសម្ដែងគ្រោះថ្នាក់ដល់ជីវិតក៏ដោយ។
ជាតារាសម្ដែង ជាអ្នកដឹកនាំរឿង និងជាតារាចម្រៀង លោក Jackie Chan ប៊ិះស្លាប់ម្ដងក្នុងរឿង Armour of God II ដែលរឿងនេះធ្វើឱ្យគាត់ថ្លង់ត្រចៀកម្ខាង។ ឈុតក្នុងរឿងនោះ គាត់បានលោតពីលើភ្នំតោងដើមឈើមួយដើម ដែលអាចទម្លាក់ខ្លួនគាត់ទៅនឹងដីបាន។ តែជាអកុសល្យ គាត់បានតោងខុសបច្ចេកទេស បណ្ដាលឱ្យគាត់ប៊ិះស្លាប់ ដោយប្រេះលលាដ៏ក្បាល និងហូរឈាមតាមត្រចៀកខាងស្តាំ ជាហេតុនាំឱ្យគាត់ថ្លង់មកទល់ពេលនេះ។
តារាសម្ដែងអាយុ ៦៥ រូបនេះបានបង្ហាញភាពក្លាហានរបស់ខ្លួនក្នុងរឿងជាច្រើន បើទោះជាគាត់ដឹងថាវាគ្រោះថ្នាក់ដល់ជីវិតក៏ដោយ។ ដូចនៅក្នុងរឿង Police Story ឆ្នាំ ១៩៨៥ គាត់បានតោងបង្គោលសម្រូតខ្លួនចុះ ទាំងបង្គោលមានអំពូលភ្លើងអម។ ជាការពិតណាស់ឈុតក្នុងរឿងនេះ ដៃរបស់គាត់បានរលាកកម្រិតពីរធ្ងន់ធ្ងរ តែវាមិនជាបញ្ហប៉ុន្មានទេ តែនៅពេលធ្លាក់ដល់ក្រោម ធ្វើឱ្យគាត់ជុងទៅនឹងអំបែង ដែលគាត់ធ្លាក់ទៅលើកញ្ចក់បណ្ដាលឱ្យចូលមន្ទីរពេទ្យ។
គេក៏បានកោតសសើរគាត់ចំពោះភាពតស៊ូក្នុងជីវិត ដូចជារឿង Rumble in the Bronx ក្នុងឈុតមួយគាត់បានលោតទៅលើកប៉ាល់ខ្យល់ ខុសបច្ចេកទេស បណ្ដាលឱ្យក្រិកកជើង។ ក្រោយមកគាត់បានពាក់ស្រោមជើងក្រាស់ ជួយដល់ជើងរបស់គាត់ដើម្បីថតតទៅទៀត។ ក៏មានឈុតគ្រោះថ្នាក់មួយទៀតរបស់គាត់ គឺនៅពេលគាត់ធ្លាក់ពីនាឡិកាកម្ពស់ ២៤ ម៉ែត្រដល់ក្រោម ដោយមិនប្រើខ្សែកាបការពារ ឬក៏ពូកទ្រពីក្រោយដែរ ហើយពេលនោះគាត់បានធ្លាក់ដាំក្បាលចុះ និងបន្តថត ដោយមិនកាត់ក្នុងពេលដែលគាត់ធ្លាក់ចុះនោះទេ។ សុទ្ធតែឈុតគ្រោះថ្នាក់ ដូច្នេះគេឆ្ងល់ថាតើគាត់នៅរស់ដោយរបៀបណាទៅ បើគាត់ធ្លាប់ប្រាប់ថា កែងដៃ ចង្ការ ជង្គង់ កជើង ធ្មេញ សុទ្ធតែធ្លាប់បាក់ទាំងអស់នោះ៕
