ក្រុមហ៊ុន Samsung បានប្រកាសចេញ Monitor(អេក្រង់)សម្រាប់ Gamer ម៉ូដែល Odyssey G7 និង G9 ដោយវាជាប្រភេទ Monitor អេក្រង់កោងមានល្បឿន Refresh rate ដល់ទៅ 240Hz ឯណោះនៅឯពិធីតាំងពិព័រណ៍ CES 2020 កន្លងទៅនេះ។
ម៉ូដែល Odyssey G9 មានទំហំអេក្រង់ 49អ៊ីញកម្រិតបង្ហាញ 5120×1440 ភិកសែល គាំទ្របច្ចេកវិទ្យា DisplayHDR 1000។ ចំណែកម៉ូដែលធុនតូច G76 មានអេក្រង់ទំហំ 27អ៊ីញ និង 32អ៊ីញកម្រិតបង្ហាញ 2560×1440ភិកសែល គាំទ្របច្ចេកវិទ្យា DisplayHDR 600។
បើក្រឡេកមកមើលទីផ្សារ Gaming Monitor ទូទាំងសកលលោកវិញ នៅពេលបច្ចុប្បន្នបានហក់ឡើងមកទល់ 7.8លានគ្រឿងកាលពីឆ្នាំ2019 ហើយរំពឹងថា នឹងអាចឡើងដល់ 12.2លានគ្រឿងនៅឆ្នាំ2023។ ហេតុនេះហើយទើបក្រុមហ៊ុនយក្សកូរ៉េខាងត្បូងកាន់តែសកម្មខ្លាំង ក្នុងការរុករកភាពច្នៃប្រឌិតថ្មីផ្តល់ជូនអតិថិជនដែលស្រឡាញ់ការលេងហ្គេមជាពិសេស។
សម្រាប់តម្លៃ និងកាលបរិច្ឆេទជាក់លាក់ក្នុងការចេញលក់ផលិតផលថ្មីទាំងនោះ ខាងក្រុមហ៊ុន Samsung មិនទាន់ប្រកាសជាផ្លូវការនៅឡើយ៕
Author: អេបិល
Samsung បង្កើតថ្មី Monitor ថ្មី អេក្រង់កោងខ្លាំងសម្រាប់ Gamer ជាពិសេស
ពេជ្រ សូលីកា បង្ហោះសារក្ដុកក្ដួល និងពោលពាក្យសុំទោសទៅកាន់ម្ដាយ
មុននេះបន្ដិច ពេជ្រ សូលីកា ចេញសារយ៉ាងវែងអន្លាយនៅលើហ្វេសប៊ុកនាង បន្ទាប់ពីកើតមានរឿងរ៉ាវម្ដាយត្រូវបានសមត្ថកិច្ចធ្វើការឃាត់ខ្លួនពីបទសម្លាប់ស្ត្រីម្នាក់វ័យ ៥០ ឆ្នាំនៅក្នុងបុរីវីឡាថោន ភូមិទួលរកា សង្កាត់ ចាក់អង្រែក្រោម ខណ្ឌមានជ័យ ល្បីពេញប្រទេស។
ពេជ្រ សូលីកា ថាខណៈពេលនេះខ្លួន ពិតជាបាក់ទឹកចិត្តខ្លាំងណាស់ ហើយក៏ខ្លាចពាក្យថាជីវិតអ្នកសិល្បៈមួយនេះដែរ ព្រោះនេះមិនមែនជាការសម្ដែងទេ។ តែវាគឺជាអារម្មណ៍ពិតរបស់នាង មិនអាចធ្វើអ្វីបានក្រៅពីអង្គុយយំលេបបាយមិនចូលរួចសួរខ្លួនឯងថា៖”ហេតុអ្វីទើបអ្នកមានគុណរបស់ខ្ញុំ មានបញ្ហានៅក្នុងចិត្តរឿងអ្វីខ្លះ ហេតុអ្វីបានជាខ្ញុំមិនដឹង ខ្ញុំស្ដាយក្រោយ បើខ្ញុំបានដឹងថាគាត់កំពុងជួបបញ្ហាអ្វី។ ខ្ញុំមិនបណ្ដោយឱ្យគាត់លំបាក់បែបនេះទេ”។
នាង បន្ថែមថា៖” ហើយខ្ញុំក៏មិនបណ្ដោយឱ្យ ប្អូនស្រីរបស់ខ្ញុំ ឃើញនៅរូបភាពបែបនេះដែរ ខ្ញុំអាណិតប្អូនខ្ញុំដឹងហើយឮហើយ តែខំទ្រាំមិនសួរមិននិយាយ សុខចិត្តទៅលួចអង្គុយយំនឹកម៉ាក់។ អ្វីដែលខ្ញុំអាចធ្វើបាននៅពេលនេះតែមួយគត់ គឺរឹងមាំដើម្បីប្អូនៗ និងអនាគតគ្រួសាររបស់ខ្ញុំ កូនសុំទោសណាម៉ាក់”៕
បើកទំព័រឆ្នាំថ្មី2020!! តារាសម្ដែងល្បីឈ្មោះ កញ្ញា ម៉ៃយ៉ា គ្រងតំណែងទូតសុឆន្ទៈសាប៊ូកក់សក់
នៅថ្ងៃទី 13 ខែមករា ឆ្នាំ2020 នេះ តារាសម្ដែងល្បីឈ្មោះ និងជាពិធីការិនីស្រស់សោភា កញ្ញា ម៉ៃយ៉ា (ខាហ្គឺ ម៉ៃយ៉ា) ត្រូវបានក្រុមហ៊ុនក្រុមហ៊ុន TRE ជ្រើសតាំងឱ្យក្លាយជាតារាតំណាងផលិតផលសាប៊ូកក់សក់ ម៉ាក កូឡាទីន រយៈពេលមួយឆ្នាំពេញ។
តារាសម្ដែង ម៉ៃយ៉ា បានប្រាប់អ្នកសារព័ត៌មានឡារ៉ែនថា នាងពិតជាសប្បាយចិត្ត នៅពេលដែលក្រុមហ៊ុន ចាប់អារម្មណ៍លើរូបនាង ហើយយកនាងធ្វើជាអ្នកតំណាង។ ជាការពិតសុខភាព និងសម្រស់ គឺជាអ្វីដែលស្ត្រីគ្រប់រូបត្រូវការ ហើយនាងគឺជាមនុស្សស្រឡាញ់សក់បំផុត មុននឹងបានសក់ប្រវែងនេះ គឺនាងប្រឹងប្រែងថែរក្សា និងប្រើផលិតផលល្អៗជាច្រើន។ ម៉ៃយ៉ា និយាយថា «នេះក៏ជាបទពិសោធន៍ដ៏ពិសេសមួយ សម្រាប់រូបខ្ញុំផ្ទាល់ដែរ ខ្ញុំមានឱកាសមកចែករំលែកពីបទពិសោធន៍នៃការប្រើប្រាស់ផ្ទាល់ និងលទ្ធផលដែល ខ្ញុំទទួលបាន តាំងពីមុន និង ក្រោយពេលដែលខ្ញុំទទួលបានការងារ ជាឯកអគ្គរដ្ឋទូតសុឆន្ទៈរបស់សាប៊ូ កូឡាទីន»។
ម៉ៃយ៉ា បន្ថែមថា សម្រាប់កិច្ចសន្យា ជាអ្នកតំណាងផលិតផលខាងលើនេះ គឺមានរយៈពេលមួយឆ្នាំប៉ុណ្ណោះ ប៉ុន្តែនៅឆ្នាំក្រោយៗទៀត នាងនឹងពិភាក្សាជាមួយម្ចាស់ក្រុមហ៊ុន ដើម្បីបន្ត ឬបញ្ចប់។ អ្វីដែលនាងទទួលបាន ពីការងារនេះ គឺមិនបានប៉ះពាល់ដល់អាជីពសិល្បៈរបស់នាងឡើយ ទោះបីជាមមាញឹកខ្លាំង ក្នុងរដូវនេះក្ដី។
ដោយឡែកអ្នកស្រី តែ ស៊ូអេង អគ្គនាយិការក្រុមហ៊ុន ធីអអ៊ី បានថ្លែងថា មូលហេតុដែលអ្នកស្រីជ្រើសរើសកញ្ញា ម៉ៃយ៉ា ធ្វើជាអ្នកតំណាង គឺដោយសារតែអ្នកស្រីមើលឃើញពីសមត្ថភាព គួបផ្សំជាមួយនឹងសម្រស់ដ៏ស្រស់របស់នាង ពោលគឺស័ក្តិសមជាមួយនឹងផលិតផលសាប៊ូកក់សក់នេះតែម្ដង។ សមិទ្ធផលដ៏អស្ចារ្យលើសពីការរំពឹងទុករបស់នាង គឺបានកើតឡើង ដោយសារតែនាង បានធ្វើការសម្រិតសម្រាំង យ៉ាងយកចិត្តទុកដាក់បំផុត មុននឹងសម្រេចចិត្តនាំចូលផ្តាច់មុខនូវផលិតផលកក់ក់ និងព្យាបាលគ្រប់បញ្ហាស្បែកក្បាល និងសរសៃសក់ ដែលជារូបមន្តឥតខ្ចោះ៕
មើលតារាល្បីៗបង្ហាញខ្លួនក្នុងជំនួបជប់លៀងធំប្រចាំឆ្នាំរបស់ស្ថានីយទូរទស្សន៍ប៉ុស្ដិ៍លេខ៥
ក្រុមសិល្បករ សិល្បការិនីល្បីៗ បុគ្គលិកស្ថានីយ៍ទូរទស្សន៍ប៉ុស្ដិ៍លេខ៥ រួមទាំងអ្នកសារព័ត៌មានជាច្រើននាក់ បានបង្ហាញវត្តមានក្នុងពិធីជប់លៀងធំប្រចាំឆ្នាំ2020 របស់ស្ថានីយទូរទស្សន៍កងយុទ្ធពលខេមរភូមិន្ទប៉ុស្ដិ៍លេខ៥ កាលពីចុងសប្ដាហ៍កន្លងនេះ ដែលស្ថានីយបានដំណើរការជាង ២ទសវត្សមកហើយ។
វត្តមានតារាល្បីៗប្រចាំស្ថានីយបានចូលរួមដូចជា កញ្ញា ព្រះកាយច័ន្ទ កញ្ញា ដួង ម៉ានិច្ច លោក សន ពិសិដ្ឋ តារាចម្រៀង ជេន រ៉ូហ្វឺ និងតារាសម្ដែងជាច្រើនទៀត បានបង្កបរិយាកាសឱ្យកាន់តែសប្បាយរីករាយ ។ មន្ត្រីជាន់ខ្ពស់ប៉ុស្ដិ៍លេខ៥បានអះអាងថា ដោយសារចង់ចងសម្ព័ន្ធភាពជាមួយ ក្រុមការងារ និង តារាសិល្បៈ ទើបស្ថាប័នមួយនេះចំណាយលុយច្រើនម៉ឺនដុល្លាររៀបចំជប់លៀងនាពេលនេះ។
លោក ហួង តារាមុនី តំណាងប៉ុស្ដិ៍លេខ៥ តារាសិល្បៈទាំងខ្មែរ និងថៃមិនតិច និងបុគ្គលិកស្ថានីយមិនតិចជាង ១០០ នាក់នោះទេ ត្រូវបានអញ្ជើញឱ្យចូលរួមក្នុងពិធីជប់លៀងនោះ ដើម្បីចងរឹតទំនាក់ទំនងរវាងគ្នា និងគ្នាឱ្យកាន់តែប្រសើរ។ លោកថា តារាដែលបានទទួលការអញ្ជើញនោះ សម្រាប់តែតារាដែលបានចូលរួម សម្ដែងក្នុងរឿងកន្លងមករបស់ប៉ុស្ដិ៍លេខ៥ និងធ្លាប់ចូលរួមច្រៀង រាំលើឆាកតន្ត្រី របស់ប៉ុស្តិ៍ប៉ុណ្ណោះ ដោយតារាដែលមិនធ្លាប់ធ្វើការពាក់ព័ន្ធនឹងប៉ុស្ដិ៍គឺប៉ុស្ដិ៍លេខ៥ មិនត្រូវបានអញ្ជើញឡើយ។ លោកថា ពិធីនោះ ក៏ដើម្បីបង្អួតរឿងភាគខ្មែរទាំងអស់ដែលបានផលិត និងដាក់បញ្ចាំងនៅប៉ុស្ដិ៍លេខ៥ ដើម្បីលើកមុខលើកមាត់តារា សិល្បៈដែលបានចូលរួមផងដែរ។ លោកថា ក្រោយជំនួបដ៏ធំនេះ តារាសិល្បៈ និងផលិតករនឹងក្លាយជាគ្រួសារតែមួយ ខណៈដែលលោកគ្រោងនឹងរំលេចការផលិតកម្មវិធី និងរឿងជាច្រើនទៀតជំរុញឱ្យតារា ទាំងអស់មានការងារជាមួយស្ថាប័ននេះកាន់តែច្រើន៕
មកដឹងពីមតិអ្នកសិល្បៈ ជុំវិញករណីម្ដាយបង្កើតតារាចម្រៀង ពេជ្រ សូលីកា ជាប់ជាជនសង្ស័យសម្លាប់នាទីភេទទី៣
នៅព្រឹកថ្ងៃទី១៣ ខែមករា ឆ្នាំ២០២០ នេះរឿងរ៉ាវម្ដាយបង្កើតតារាចម្រៀង ពេជ្រ សូលីកា សម្លាប់នាទីភេទទី៣ម្នាក់ធ្វើឲ្យកក្រើកពេញប្រទេសតែម្ដង ដោយមិនហ្នឹងស្មានថាម្ដាយរបស់តារាចម្រៀងល្បីខាងលើហ៊ានលើកដៃសម្លាប់មនុស្សដូច្នេះសោះ។
ឃើញដូចនេះតារាចម្រៀង និងពិធីការិនីកញ្ញា សុភ័ក្រ្ដ កុសុម៉ា ក៏បានបង្ហាញអារម្មណ៍ខ្លោចចិត្តអាណិត ពេជ្រ សូលីកា ថា៖” រឿងម្ដាយជារឿងរបស់ម្ដាយ ហេតុអ្វីចាំបាច់ដាក់រូបគាត់ដែរ ព្រោះវាអាចប៉ះពា់ខ្លាំងចំពោះគាត់។ ម្ដាយភាគច្រើនតែងតែនាំលាភជ័យដល់កូន ចុះហេតុអ្វីអ្នកមីងធ្វើបែបនេះ”។ មិនមែនតែ សុភ័ក្រ្ដ កុសុម៉ា ទេដែលបង្ហាញអារម្មណ៍ហួសចិត្តចំពោះម្ដាយបង្កើត ពេជ្រ សូលីកា នោះសូម្បីតែមហាជននិងអ្នកសិល្បៈមួយចំនួន ក៏មិនយល់ដែរជាម្ដាយរបស់តារាចម្រៀងល្បីមួយទាំងមូលហេតុអ្វីបានជាមានចិត្តព្រៃផ្សៃលើកដៃសម្លាប់មនុស្សដូច្នេះ។
យ៉ាងណាមិញ អ្នកនិពន្ធល្បីឈ្មោះ សុខ ជំនោរ ក៏លើកមតិមួយចំនួនដែរថា ៖ «ព័ត៌មានក្តៅគគុក! ចាប់បានឃាតកហើយ! ដោយសារកូនឃាតកជាតារាល្បី ធ្វើឪ្យអ្នកសារព័ត៌មាននិងមហាជនភ្ជាប់ឃាតកទៅឈ្មោះកូនស្រីជាតារា ខ្ញុំយល់ថា ដូចជាមិនពាក់ព័ន្ធនឹងកូនទេ បើកូនមិនបានចូលដៃឬផ្សំគំនិត... សុខៗត្រូវខូចឈ្មោះអ្នកដែលមិនបានរួមអំពើ»។
បើតាមផ្តល់បទសំភាសន៍របស់លោកអធិការខណ្ឌមានជ័យ លោកអធិការបានមានប្រសាសន៍ថា ដំបូងឡើយគឺជនសង្ស័យដែលជាម្តាយរបស់តារាចម្រៀង ពេជ្រ សូលីកា បានរាយការណ៍ប្រាប់សមត្ថកិច្ចថា ជនរងគ្រោះស្លាប់ដោយសារខ្យល់គរ តែពេលសមត្ថកិច្ចមកពិនិត្យគឺឃើញមានស្នាមចងដៃ និងស្លាប់ដោយសារថប់ដង្ហើម។ ក្រោយពីប្រកែកអស់ចិត្ត ជនសង្ស័យបានសារភាពថាខ្លួនបានយកខ្នើយមកខ្ទប់មុខជនរងគ្រោះ នៅពេលជនរងគ្រោះមកដល់ក្នុងស្ថានភាពស្រវឹង ហើយទន់ដៃទន់ជើង និងបានយកខ្សែចងដៃខាងក្រោយផងដេរ៕
វិសាខា ទៅបោះជំរំប្រកួតមិត្តភាពនៅថៃ ត្រៀមរដូវកាល2020
ក្លិបបាល់ទាត់វិសាខា បានធ្វើដំណើរទៅដល់ប្រទេសថៃហើយកាលពីថ្ងៃទី10 ខែមករា ឆ្នាំ2020 ដើម្បីបោះជំរំហ្វឹកហាត់ត្រៀមរដូវកាលថ្មី2020។
ទន្ទឹមគ្នានេះដែរ ក្លិបបាល់ទាត់វិសាខា ក៏មានការប្រកួតមិត្តភាពអន្ដរជាតិចំនួន 3ប្រកួតផងដែរ ជាមួយនឹងក្រុមម្ចាស់ផ្ទះថៃ ដែលមានដូចជាក្លិប Bangkok FC, ក្លិប BG Pathum United និងក្លិប Ayutthaya United។
ឆ្លងកាត់ 1ប្រកួតកន្លងមក ក្លិបបាល់ទាត់វិសាខា បានប្រកួតស្មើជាមួយនឹងក្លិប Bangkok FC ដោយលទ្ធផល 1ស្មើ។
នៅសល់ 2ប្រកួតទៀត ក្លិបបាល់ទាត់វិសាខា នឹងត្រូវជួបជាមួយនឹងក្លិប BGPU FC នាថ្ងៃទី15 ខែមករា ឆ្នាំ2020 មុននឹងប្រកួតជំនួបចុងក្រោយជាមួយនឹងក្លិប Ayutthaya United នៅថ្ងៃទី18 ខែមករា ឆ្នាំ2020៕
ល្ងាចនេះ ព្រះខ័នរាជស្វាយរៀង ត្រូវជួបជាមួយនឹងអតីតក្លិបរបស់ ធារី ចន្ថាប៊ីន
នាល្ងាចថ្ងៃទី13 ខែមករា ឆ្នាំ2020 នេះ ក្លិបជើងឯកលីកកំពូលកម្ពុជា ព្រះខ័នរាជស្វាយរៀង នឹងត្រូវប្រកួតជំនួបចុងក្រោយនៃដំណើរបោះជំរំប្រកួតនៅឯប្រទេសម៉ាឡេស៊ីនេះ ជាមួយនឹងក្លិប Terengganu FC នាកីឡដ្ឋាន UM Arena Stadium។
សូមបញ្ជាក់ថា ព្រះខ័នរាជស្វាយរៀង ដែលបានចេញទៅបោះជំរំហ្វឹកហាត់នៅប្រទេសម៉ាឡេស៊ី រយៈពេល 1សប្ដាហ៍ កាលពីព្រឹកថ្ងៃទី7 មករា រហូតដល់ថ្ងៃទី14 ខែមករា មានការប្រកួតកម្ដៅសាច់ដុំ 3ប្រកួតផងដែរ ដោយបានយកឈ្នះ Selangor 4-០ រួចមកហើយ នៅថ្ងៃទី11 បានបន្តយកឈ្នះក្រុម Felda United FC ដោយលទ្ធផល 1ទល់នឹង0 និងថ្ងៃទី13 នេះ នឹងត្រូវជួប Terengganu FC មុនត្រឡប់មកវិញ 1ថ្ងៃ៕
ភ្នំពេញក្រោន និង Kehda FA ត្រូវដណ្តើមពាន Pre-Season Cup នៅថ្ងៃស្អែកនេះ
ការប្រកួត Smart RSN Cup 2020 នៅកីឡដ្ឋាន Smart RSN Stadium បានរកឃើញក្រុមដែលត្រូវដណ្តើមពានហើយ ដែលក្នុងនោះរួមមានក្រុមភ្នំពេញក្រោន និង Kehda FA។
ឆ្លងកាត់ 2ប្រកួតមកនេះ ក្នុងប្រកួតទី1 ភ្នំពេញក្រោន បានយកឈ្នះ អង្គរថាយហ្គឺរ ដោយលទ្ធផល 2-1 និងប្រកួតទី2 ក្លិបអង្គរថាយហ្គើរបានបន្តចាញ់ក្លិប Kehda FA ក្នុងលទ្ធផល 1ទល់នឹង០។
គួរបញ្ជាក់ផងដែរថា ការប្រកួតចុងក្រោយដណ្តើមពានរង្វាន់ Smart RSN Cup 2020 នឹងធ្វើឡើងនៅថ្ងៃទី14 ខែមករា ឆ្នាំ2020 នេះ នៅកីឡដ្ឋាន Smart RSN Stadium ដែលក្រុមភ្នំពេញក្រោន ត្រូវជួបជាមួយនឹងក្លិប Kehda FA មកពីលីកកំពូលម៉ាឡេស៊ី និងជាម្ចាស់ពានរង្វាន់ Malaysia Cup 2019៕
រដ្ឋបាលរាជធានីភ្នំពេញ គ្រោងស្ថាបនាផ្លូវក្រោមដី មុខសាកលវិទ្យាល័យភូមិន្ទភ្នំពេញ និងមុខវិទ្យាស្ថានភាសាបរទេស
រដ្ឋបាលសាលារាជធានីភ្នំពេញបានដាក់គម្រោងផែនការសាងសង់ផ្លូវក្រោមដី 2ខ្សែ នៅមុខសាកលវិទ្យាល័យភូមិន្ទភ្នំពេញ និងមុខវិទ្យាស្ថានភាសាបរទេស បន្ទប់ពីបានមើលឃើញពីការកកស្ទះចរាចរណ៍ជាប្រចាំ ហើយគម្រោងផែនការសាងសង់ផ្លូវក្រោមដីគ្រោងនឹងបើកការដ្ឋានស្ថាបនានាពេលដ៏ខ្លីខាងមុខនេះ។
តាមរយៈសេចក្ដីប្រកាសនៅលើគណនីផ្លូវការ របស់រដ្ឋបាលរាជធានីភ្នំពេញកាលពីថ្ងៃទី9 ខែ មករា ឆ្នាំ2020 បានបញ្ជាក់ថា នៅពេលឆាប់ៗខាងមុខនេះ រដ្ឋបាលរាជធានីភ្នំពេញនឹងសាងសង់ផ្លូវក្រោមដី 2ខ្សែនៅមុខសាកលវិទ្យាល័យភូមិន្ទភ្នំពេញ និងត្រង់ចំណុចមុខវិទ្យាស្ថានភាសាបរទេស IFL តាមបណ្តោយផ្លូវសហព័ន្ធរុស្ស៊ី ដែលទទួលរងការកកស្ទះចរាចរណ៍ស្ទើរតែរាល់ថ្ងៃ។
ឯកឧត្ដម ឃួង ស្រេង អភិបាលរាជធានីភ្នំពេញ បានបើកកិច្ចប្រជុំជាមួយក្រុមជំនាញ ដើម្បីពិភាក្សាលើគម្រោងស្ថាបនាផ្លូវក្រោមដីទាំង 2ខ្សែនេះ ដើម្បីជំរុញឱ្យគម្រោងនេះដំណើរការទៅឱ្យបានរលូន និងទទួលបានជោគជ័យ ដើម្បីបង្កភាពងាយស្រួល ដល់ការធ្វើដំណើររបស់បណ្តាសិស្ស និស្សិត ដែលចេញចូលវិទ្យាស្ថាន ជាពិសេសបញ្ចៀសការកកស្ទះ ក្នុងការធ្វើចរាចរណ៍របស់ប្រជាពលរដ្ឋនៅត្រង់ចំណុចនោះ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូននៃសាលារាជធានីភ្នំពេញ បានបញ្ជាក់ឱ្យដឹង ក្នុងកិច្ចប្រជុំនោះថា ជាគម្រោងដែលបាន និងកំពុងសិក្សាទៅលើផ្លូវក្រោមដីទាំង 2ខ្សែនេះ គឺ 1ខ្សែរត់ក្រោមផ្លូវសហព័ន្ធរុស្ស៊ីនៅចំណុចមុខសាកលវិទ្យាល័យភូមិន្ទភ្នំពេញ ទម្លុះទៅផ្លូវ265 ដោយធ្វើចរាចរណ៍ទៅមក។
ចំណែកផ្លូវក្រោមដី 1ខ្សែទៀត គ្រោងនឹងធ្វើឡើងនៅមុខវិទ្យាស្ថានភាសាបរទេស ដោយចេញពីក្នុងវិទ្យាស្ថាន មុជក្រោមផ្លូវសហព័ន្ធរុស្ស៊ី ទម្លុះមកផ្លូវ261 ស្ថិតក្នុងសង្កាត់ទឹកល្អក់ទី1 ខណ្ឌទួលគោក។ ក្នុងគម្រោងនេះដែរ កំណាត់ផ្លូវសហព័ន្ធរុស្ស៊ី ចាប់ពីស្ពានអាកាស 5មករា រហូតដល់ស្ពានអាកាស 7មករា គឺគ្រោងនឹងបិទរបាំងថ្មទ្រូងផ្លូវមិនឱ្យធ្វើចរាចរឆ្លងកាត់តែម្ដង។
ក្នុងកិច្ចប្រជុំនោះដែរ ក៏បានពិភាក្សាវែកញែករកដំណោះស្រាយថា តើក្រសួងការងារ និងបណ្តុះបណ្តាលវិជ្ជាជីវៈ និងសភាពាណិជ្ជកម្មកម្ពុជានឹងចេញចូលច្រកណាមួយ។ឯកឧត្ដម ឃួង ស្រេង អភិបាលរាជធានីភ្នំពេញ ក្នុងកិច្ចប្រជុំនោះបានជំរុញឱ្យក្រុមការងារធ្វើការសិក្សាឱ្យបានហ្មត់ចត់ លើកគម្រោងស្ថាបនាផ្លូវក្រោមដី2ខ្សែនេះ ដោយឯកឧត្តមជំរុញឱ្យមានកិច្ចប្រជុំលើកក្រោយទៀត ដោយត្រូវអញ្ជើញនាយកសាលាទាំង2 ក្រសួងការងារបណ្ដុះបណ្ដាលវិជ្ជាជីវៈ និងសភាពាណិជ្ជកម្មកម្ពុជា មកប្រជុំរួមគ្នាដើម្បីរកដំណោះស្រាយរួម មុននឹងដាក់ឱ្យគម្រោងខាងលើដំណើរការ ព្រោះគម្រោងនេះត្រូវតែអនុវត្តហើយ ដោយសារតែមាននិស្សិតប្រមាណជាង 2ម៉ឺននាក់ចេញពីសាកលវិទ្យាល័យទាំង2នេះ ហើយតែងតែកកស្ទះចរាចរណ៍រាល់ថ្ងៃ នៅម៉ោងដែលនិស្សិតចេញ និងចូលក្នុងសាលា៕
ម្តាយបង្កើត ពេជ្រ សូលីកា ត្រូវកម្លាំងសមត្ថកិច្ចឃាត់ខ្លួន ក្រោយសង្ស័យថាបានសម្លាប់ស្ត្រីវ័យ៥០ឆ្នាំម្នាក់
ម្តាយបង្កើត ពេជ្រ សូលីកា ត្រូវកម្លាំងសមត្ថកិច្ចឃាត់ខ្លួន ក្រោយសង្ស័យថា បានសម្លាប់ស្ត្រីវ័យ៥០ឆ្នាំម្នាក់នៅខណ្ឌមានជ័យ កាលពីល្ងាចថ្ងៃទី១២ ខែមករា ឆ្នាំ២០២០ ស្រ្តីវ័យ៥០ម្នាក់ ត្រូវបានឃើញដេកស្លាប់ក្នុងផ្ទះ ដែលស្ថិតនៅក្នុងបុរីមួយកន្លែង ក្នុងសង្កាត់ចាក់អង្រែក្រោម ខណ្ឌមានជ័យ។ បន្ទាប់ពីមន្ត្រីបច្ចេកទេសកោសល្យវិច័យ មូលហេតុគឺរកឃើញថា សពត្រូវបានស្លាប់ ដោយសារថបដង្ហើម គឺមានគេយករបស់អ្វីមួយសង្កត់ពីលើមុខរហូតថប់ដង្ហើមស្លាប់។ យ៉ាងណាមិញ ពេលនេះជនសង្ស័យត្រូវបានសមត្ថកិច្ចវែកមុខហើយ គឺជាម្តាយបង្កើតរបស់តារាចម្រៀងស្រី ពេជ្រ សូលីកា។
ប្រភពពីគ្រួសាររបស់សពបានប្រាប់ថា មុនកើតហេតុពួកគាត់បានទូរសព្ទ័ទៅរកជនរងគ្រោះ នៅព្រឹកថ្ងៃទី១២ ខែមករា ឆ្នាំ២០២០ តែមិនមានអ្នកលើក ស្រាប់តែម៉ោងជិត៣រសៀលថ្ងៃដដែល មានគេទូរស័ព្ទមកប្រាប់ថា ម្ចាស់លេខបានដេកស្លាប់ នៅក្នុងផ្ទះបាត់ហើយ ធ្វើឲ្យពួកគាត់បានទៅផ្ទះកើតហេតុ លុះពេលទៅដល់ក៏ឃើញសពពិតមែន ធ្វើឲ្យពួកគាត់ដែលជាគ្រួសារ មានការសោកស្តាយយ៉ាងខ្លាំង។
ដោយគ្រួសារមិនអស់ចិត្ត ព្រោះឃើញការស្លាប់របស់ស្រ្តីមានសភាពគួរឲ្យសង្ស័យ ក៏រាយការណ៍ទៅកម្លាំងនគរបាល ភ្លាមៗកម្លាំងនគរបាលខណ្ឌមានជ័យ បានចុះទៅដល់ទីតាំងកើតហេតុ ជាមួយមន្ត្រីបច្ចេកទេសកោសល្យវិច័យ ប្រាប់ថា សពគឺត្រូវបានស្លាប់ដោយសារថបដង្ហើម គឺមានគេយករបស់អ្វីមួយសង្កត់ពីលើមុខរហូតថប់ដង្ហើមស្លាប់។
បន្ទាប់ពីដឹងថា ស្រ្តីដែលស្លាប់នោះដោយគេសម្លាប់មែនក្រុមគ្រួសារស្រ្តីរងគ្រោះ បានដាក់ការសង្ស័យថា មិត្តភក្តិដែលនៅជាមួយស្រ្តីរងគ្រោះ ជាអ្នកប្រព្រឹត្តព្រោះអ្នកទាំងពីរ តែងតែមានជម្លោះជាមួយគ្នាញឹកញាប់ ភ្លាមៗនោះកម្លាំងនគរបាលបានហៅមិត្តស្រ្តីដែលស្លាប់ ទៅសាកសួរនៅប៉ុស្តិ៍នគរបាលចាក់អង្រែលើ ដើម្បីឈានទៅដល់ការឃាត់ខ្លួនជនដៃដល់។
គួរជម្រាបថា ស្រ្តីរងគ្រោះមានឈ្មោះ ងិន សុខលី អាយុ៥០ឆ្នាំ មុខរបរចងការប្រាក់ និងលក់ការហ្វេនៅម្តុំផ្សារដេប៉ូ ហើយបាត់បង់ទ្រព្យសម្បត្តិដែលនៅជាប់នឹងខ្លួនមួយចំនួនផងដែរ។ ក្រោយពីធ្វើកោសល្យវិច័យរួចសពប្រគល់ជូន ក្រុមគ្រួសារយកទៅធ្វើបុណ្យតាមប្រពៃណី។ ចំណែកជនសង្ស័យ ត្រូវបានសមត្ថកិច្ចកំពុងសួរនាំ ដើម្បីបន្តនីតិវិធីច្បាប់៕
