ខណៈដែលតារាចម្រៀង អ៊ាម វន្នី និងជាអតីតបេក្ខជនកម្មវិធីប្រឡងលំដាប់ថ្នាក់ពិភពលោក Cambodian Idol រដូវកាលទី 1ដែលបាននិងកំពុងធ្វើដំណើរទៅសម្ដែងនៅសហរដ្ឋអាមេរិកនោះ លោកបានបង្ហាញពីហេតុអាក្រក់មួយដែលបានកើតឡើង ដោយសារតែគណនី Facebook របស់លោកត្រូវបានជនមិនស្គាល់មុនហ៊ែកចូលដល់ទៅ2លើក ហើយលោកក៏បានទាញយកបានមកវិញម្ដងដែរហើយ តែជនដដែលនោះនៅតែព្យាយាមហ៊ែកយក Facebook លោកម្ដងហើយម្ដងទៀត ដោយមានគោលបំណងមិនល្អ។
អ៊ាម វន្នី បានប្រកាសព្រមាននៅលើ Facebook ផ្ទាល់ខ្លួនថា “ថ្ងៃនេះខ្ញុំត្រូវបានគេហ៊ែកចូលយកអ៊ែកខោនរបស់ខ្ញុំ2ដង លើកទី1ដោះយកបានមកវិញបាននៅព្រលានយន្តហោះ លុះដល់ល្ងាចបន្តិចខ្ញុំបានឡៃហ្វ៍វីដេអូកម្មវិធីជប់លៀងនៅលើទូកនៅឯសហរដ្ឋអាមេរិក រួចក៏ត្រូវបានគេហ៊ែកចូលយកម្តងទៀតជាលើកទី2 តែខ្ញុំបានដោះយកមកវិញបានម្តងទៀត ដោយមានជំនួយពីប្អូនប្រុស “ថាណា” អ្នកជំនាញខាងSocial Media ហើយពេលនេះបានបិទSecurity រួចរាល់ហើយ”។
ជាចុងក្រោយលោកបានពោលថា “ជាការក្រើនរំឭក ជាពិសេសមិត្តៗសិល្បករដទៃទៀតដែលមានឥទ្ធិពលលើបណ្តាញសង្គម គួរតែរកអ្នកការពារសុវត្ថិភាពកុំឱ្យគេហ៊ែកយកបាន បើយើងប្រើធម្មតាមិនបានបិទប្រព័ន្ធសុវត្ថិភាពទេ វានឹងងាយត្រូវគេហ៊ែកចូលយកបានមិនខាន បំណងល្អពីខ្ញុំ: អ៊ាម វន្នី”៕
