Author: អេបិល

ណែនាំវិធីបំបាត់ខ្លាញ់គល់ភ្លៅយ៉ាងមានប្រសិទ្ធភាពបំផុត
មិនថាបុរស ឬនារីទេ ភាគច្រើនសុទ្ធតែប្រាថ្នាចង់បានជើង នឹងគល់ភ្លៅដែលមានសភាពរឹងមាំ ស្រឡូនស្អាតស័ក្តិសមនឹងរូបរាងកាយ ព្រមទាំងសមល្មមក្នុងការទ្រទម្ងន់រាងកាយបានល្អប្រសើរ។ ការឡើងទម្ងន់ខ្លួនវានឹងបណ្ដាលឱ្យអ្នកឧស្សាហ៍មានអាការឈឺចុកចាប់នៅលើជើងទាំងមូល (ពីលើដល់ក្រោម) ដូច្នេះការហាត់ប្រាណជារឿងសំខាន់មួយសម្រាប់ថែរក្សាសុខភាពរាងកាយ និងបើទោះបីជាមានគន្លឹះនៃការហាត់ប្រាណសម្រកជាតិខ្លាញ់ច្រើនវិធីហើយក៏ដោយ តែថ្ងៃនេះគេហទំព័រ ឡារ៉ែន សូមណែនាំនូវវិធីហាត់ប្រាណដើម្បីសម្រកខ្លាញ់គល់ភ្លៅ នឹងតួជើងទាំងមូលឱ្យមានសភាពស្រឡូនស្អាតដែលមានប្រសិទ្ធភាពបំផុត។
ខាងក្រោមនេះ គឺជាលំនាំវីធីហាត់ប្រាណទាំង3ប្រភេទ សូមទស្សនារូបភាពទាំងអស់ជាមុនសិន៖
បន្ទាប់ពីបានទស្សនាហើយ នៅមានវិធីមួយចំនួនទៀតដែលយើងត្រូវហាត់បន្ថែម ដើម្បីឱ្យរាងកាយទាំងមូលស្រកនូវជាតិខ្លាញ់៖
1.រត់រយៈចម្ងាយ ៖ ជាវិធីបណ្ដេញជាតិខ្លាញ់ពីផ្នែកជើង ដោយការរត់បានយ៉ាងល្អប្រសើរ អ្នកធ្លាប់សង្កេតមើលកីឡាកររត់ជាប្រចាំដែរទេ ពួកគេមានស្បែក នឹងតួជើងទាំងមូលស្អាតហើយរឹងមាំ សាច់ដុំមានភាពងាយស្រួលក្នុងការបត់បែន ដែលនោះជាយន្តការរបស់រាងកាយដែលបានសម្របទៅតាមធម្មជាតិ។
2.លោតអន្ទាក់៖ លោតអន្ទាក់ក្នុងមួយថ្ងៃប្រមាណ 200ដង ជាវីធីល្អមួយក្នុងការសម្រកជាតិខ្លាញ់ និងសម្រកទម្ងន់ដំណាលគ្នា។ ការលោតអន្ទាក់អាចជួយសម្រកខ្លាញ់ត្រង់បរិវេណគល់ភ្លៅ កំភួនជើង ព្រមទាំងរាងកាយទាំងមូលបានផងដែរ៕
August 11, 2017
វិធីបំបាត់ស្នាមសម្លាកផ្លែ និងសង្វារនៅលើដងខ្លួន
ស្នាមរបួសដែលបណ្ដាលមកពី ការរលាកខ្លោច ដួលរលាត់ ស្នាមមុត ស្នាមសង្វារ ស្នាមផ្លែដែលមាននៅលើដងខ្លួន ឬផ្នែកណាមួយនៅលើរាងកាយ គឺជារឿងមួយដែលធ្វើឱ្យនារីៗយើងមានកង្វល់ខ្លាំងបំផុត តែថ្ងៃនេះអ្នកនឹងបាត់អស់នូវក្តីកង្វល់ទាំងនោះហើយ ព្រោះគេហទំព័រ ឡារ៉ែន នឹងនាំមកជម្រាបជូននូវវិធីព្យាបាលបំបាត់ស្លាកស្នាមនៅលើរាងកាយអ្នកត្រឹមរយៈពេលតែ 1 ខែប៉ុណ្ណោះ ធានាថា ពិតជាមានប្រសិទ្ធភាពល្អគួរជាទីគាប់ចិត្តមែន។
មានវិធីជាច្រើនដើម្បីកាត់បន្ថយ ឬលុបបំបាត់ស្លាកស្នាមនេះ ដូចជាការវះកាត់ ការព្យាបាលដោយបាញ់ឡាស៊ែរ និងការព្យាបាលដោយការប្រើក្រែមលាបស្បែកជាដើម តែទោះជាយ៉ាងណាក៏នៅមានវីធីដ៏ល្អបំផុតមួយដែលធ្វើការព្យាបាលស្នាមសម្លាក សង្វារ ស្នាមផ្លែទាំងនោះដោយឱសថបុរាណធម្មជាតិ ដែលមានអត្ថប្រយោជន៍សម្រាប់អ្នករហូតដល់នឹកស្មានមិនដល់ដែរ។ ខាងក្រោមនេះជាវិធីនៃការព្យាបាលបំបាត់ស្លាកស្នាមតាមរូបមន្តធម្មជាតិ:
គ្រឿងផ្សំ៖
ទឹកឃ្មុំធម្មជាតិ 1 ស្លាបព្រាបាយ
ប្រេងដូង 1/4 ពែង
ប្រេងអូលីវ 1/4 ពែង
ប្រេងផ្កាឡាវេនឌើ 4 ដំណក់
វិធីប្រើ៖
ដំបូងត្រូវកំដៅប្រេងដូងឱ្យរលាយនៅក្នុងសីតុណ្ហភាពក្ដៅ បន្ទាប់មកចាក់វត្ថុផ្សំទាំងអស់បញ្ជូលគ្នា ហើយកូរឱ្យសព្វជាមួយគ្នាក្លាយជាល្បាយមួយ។ ក្រោយមកចាក់ដាក់ចាន ទុកមួយអន្លើឱ្យត្រជាក់ប្រមាណជា 20 នាទី ដើម្បីប្រាកដថា ប្រេងមានសីតុណ្ហភាពក្ដៅឧណ្ហៗ មិនរលាកស្បែក។
ជាចុងក្រោយ រៀងរាល់ពេលងូតទឹកសម្អាតរាងកាយនៅពេលព្រឹក និងល្ងាចរួច ចូរកម្តៅទឹកល្បាយប្រេងនោះឱ្យក្ដៅឧណ្ហៗ រួចហើយយកមកលាបនៅត្រង់កន្លែងដែលចង់បំបាត់សម្លាកស្នាមលើស្បែកទាំងនោះ។ ការព្យាបាលនេះ មិនត្រឹមតែអាចបំបាត់ស្លាកស្នាមបានទេ តែវាថែមទាំងជាការព្យាបាលឱ្យស្បែកមានសំណើមល្អ និងស្អាតភ្លឺរលោងទៀតផង៕
August 10, 2017
Taylor Swift ត្រៀមខ្លួនឡើងតុលាការ ករណីបណ្ដឹងបៀតបៀនកេរ្តិ៍ខ្មាស
អាចនិយាយបានថា ជាបណ្ដឹងដែលយូរឆ្នាំណាស់ហើយ បើគិតមកដល់ថ្ងៃនេះ គឺមានរយៈពេល 4 ឆ្នាំទៅហើយដែលតារាស្រី Taylor Swift បានដាក់ពាក្យបណ្ដឹងទៅតុលាការចំពោះករណីដែលឌីជេល្បីឈ្មោះលោក David Mueller បានបៀតបៀនកេរ្តិ័ខ្មាសនាង ដោយយកដៃលូកចាប់ច្របាច់គូទនាងពីក្រោយ ខណៈដែលកំពុងឈរថតរូបនៅលើការប្រគំតន្ត្រីជាមួយគ្នា ហើយការប្តឹងផ្ដល់នេះមិនមាននរណាយោគយល់នរណាឡើយ គឺចង់បានឈ្នះរៀងខ្លួន។
កាលពីខែមិថុនា ឆ្នាំ2013 ឌីជេ David Mueller ត្រូវតារាស្រី Taylor ស្នើសុំឱ្យថៅកែក្រុមហ៊ុនបណ្តេញលោកចេញពីក្រុមហ៊ុន និងបង់ប្រាក់សងជំងឺចិត្តចំនួនជាង 3 លានដុល្លារ ហើយព្រមទាំងស្នើសុំឱ្យប៉ូលិសចាត់វិធានការតាមផ្លូវច្បាប់ទៀតផង។ តែទីបំផុត នៅថ្ងៃទី8 ខែសីហា ឆ្នាំ 2017 នាងនៅតែបន្ដដំណើរការពាក្យបណ្ដឹងនោះជាមួយចៅក្រម ដោយបន្ថយការទាមទារប្រាក់សំណងមកនៅត្រឹមតែជាង 1 លានដុល្លារប៉ុណ្ណោះ។
យ៉ាងណាក៏ដោយ តារាស្រីរូបនេះមិនដែលបានជួបជាមួយមន្ត្រីប៉ូលិសឡើយ ចាប់តាំងពីនាងបានដាក់ពាក្យបណ្ដឹងដំបូង ក្រោយថ្ងៃកើតហេតុរួចមក ដោយសារតែនាងព្យាយាមដំណើរការរឿងនេះដោយប្រយ័ត្នប្រយែងដោយខ្លួនឯងផ្ទាល់ ខណៈដែលមេធាវីរបស់នាងបានពោលថា នាងខូចចិត្តខ្លាំងណាស់ដែលត្រូវឌីជេ David Mueller ចោទប្រកាន់នាងថា នាងជាអ្នកតាក់តែងរឿងប្រឌិតឡើង លោកមិនបានធ្វើដូចនាងចោទប្រកាន់ទេ។
គួរបញ្ជាក់បន្ថែមដែរពីសម្ដីមេធាវីរបស់ Taylor Swift ដែលធ្លាប់បាននិយាយថា កូនក្តីខ្ញុំអាចមានការយល់ច្រឡំក៏ថាបានដែរ ព្រោះអាចមានអ្នកចម្រៀងស្រីដ៏ទៃ ជាអ្នកប៉ះទង្គិចនឹងគូថរបស់នាងក៏អាចទៅរួចដែរ៕
August 10, 2017
សូមសរសើរ! ជិះឡានរាប់ពាន់គីឡូម៉ែត្រឆ្លង 2ប្រទេសដើម្បីភាពយន្ត
ក្រោយពីបាននាំយកខ្សែភាពយន្ដរឿង “វិកលចរិត” ទៅចាក់បញ្ជាំងនៅលើឆាកអន្ដរជាតិរួចមក អ្នកដឹកនាំរឿងនេះបានលាន់មាត់ថា ទោះមិនទទួលបានផលច្រើនមែន តែនេះជាជំហានដំបូង ផ្លែផ្កាដំបូងហើយដែលលោកហ៊ុយ យ៉ាឡេងទទួលបានពីការខំប្រឹងប្រែងដើម្បីស្វែងរកទីផ្សារភាពយន្តក្រៅស្រុក ហើយក៏ជាបទពិសោធមួយសម្រាប់ខ្សែភាពយន្ដខ្មែរយើងដែរ។
ដោយសារត្រូវជិះរថយន្ដរាប់ពាន់គីឡូម៉ែត្រឆ្លងប្រទេស2ដើម្បីខ្សែភាពយន្តខ្មែរយើង លោក ហ៊ុយ យ៉ាឡេង បានបា្រប់អ្នកសារព័ត៌មាន ឡារ៉ែនថា “រឿងរបស់យើងមិនទាន់ទទួលបានផ្លែផ្កា និងមានទស្សនិកជនចូលរួមទស្សនាច្រើននៅឡើយទេ ទាំងប្រទេសថៃ និងឡាវ ដោយហេតុថា គេមិនទាន់ស្គាល់រឿងខ្មែរ ព្រមទាំងអ្នកដែលបានចូលទៅទស្សនា ភាគច្រើនគឺជាយុវវ័យ ដូច្នោះហើយ គឺនៅមិនទាន់មានភាពទូលំទូលាយក្នុងការស្គាល់អំពីខ្សែភាពយន្ដខ្មែរ រួមទាំងគំនិតជាតិនិយមរបស់ជនជាតិថៃ និងឡាវផងដែរ”។ មិនតែប៉ុណ្ណោះ អ្នកដឹកនាំរឿងរូបនេះក៏បានបន្ថែមថា “នេះជាបទពិសោធលើកដំបូងហើយ ដែលយើងបានយល់ដឹងអំពីការនាំភាពយន្ដទៅកាន់ឆាកអន្ដរជាតិ”។
ដោយឡែក ពីដំបូងឡើយលោក ហ៊ុយ យ៉ាឡេង ធ្លាប់បានបញ្ចេញព័ត៌មានអំពីការដកប្រាក់ពីការទិញសំបុត្រចំនួន 1 ដុល្លារ ហើយបរិច្ចាគចំពោះកុមារបាត់បង់សតិបញ្ញា និងកុមារកំព្រានៅកម្ពុជា តែផ្ទុយទៅវិញបែរជាខកបំណង ព្រោះថា ភាពយន្ដមួយនេះមិនទទួលបានផ្លែផ្កាច្រើនពីប្រទេសថៃ និងឡាវឡើយ គឺមានតែប្រទេសកម្ពុជាមួយតែប៉ុណ្ណោះ ដែលទទួលបានការគាំទ្រ។
គួរបញ្ជាក់ដែរថា លោក ហ៊ុយ យ៉ាឡេង បានបញ្ជាក់ប្រាប់អ្នកសារព័ត៌មាន ឡារ៉ែនថា “មានតែកម្ពុជាទេដែលទទួលបានអ្នកទស្សនាច្រើនជាងគេ បើគិតពីថ្ងៃដាក់បញ្ជាំងរហូតមកដល់ពេលនេះ ហើយទោះជាយើងមិនបានកម្រៃពីការដាក់បញ្ចាំងនៅបរទេសក៏ដោយ ក៏លោកនៅបន្ដបរិច្ចាគដោយទឹកចិត្តសប្បុរសធម៌ទៅកាន់កុមារកំព្រា និងបាត់បង់សតិបញ្ញា នៅកម្ពុជាយើងដែរ ព្រោះថា នេះជាប្រវត្តិសាស្ត្រដំបូងដែលកុនខ្មែរបានទៅបញ្ជាំងនៅអន្តរជាតិ ហើយចូលរួមកម្មវិធីសប្បុរសធម៌ផងដែរ”។
ទោះបីជាមិនទទួលបានផ្លែផ្កា និងមានការតស៊ូនឿយហត់ជាច្រើនក៏ដោយ តែក៏ទទួលបានមកវិញនូវបទពិសោធថ្មីៗជាច្រើន ព្រោះថា វាធ្វើឱ្យយើងមើលឃើញថា ប្រជាជនគេនៅតែគាំទ្រភាពយន្តគេខ្លាំងជាងភាពយន្តបរទេស តែភាពយន្តមួយនេះទទួលបានចំណុចល្អត្រង់ថា ទស្សនិកជនទាំងអស់ចូលមើលរឿងខ្មែរយើងហើយមិនដើរចេញពាក់កណ្តាលទីទេ គឺមើលរហូតដល់ចប់ ហើយសរសើរភាពយន្តយើងថាល្អមើលណាស់ គ្រាន់តែនេះជាលើកដំបូង នៅមិនមានការផ្សព្វផ្សាយទាក់ទាញឱ្យពួកគាត់ចូលមើលភាពយន្តខ្មែរយើង៕

August 10, 2017
Barcelona យល់ព្រមលើតម្លៃខ្លួន108.8លានផោន ដើម្បីទិញ Coutinho
ក្លិប Barcelona បានយល់ព្រមលើតម្លៃខ្លួន108.8លានផោន (ស្មើនឹង141លានដុល្លារអាមេរិក) ជាមួយនឹងក្លិបហង្សក្រហម Liverpool ដើម្បីចុះហត្ថលេខាជាមួយនឹងខ្សែបម្រើដ៏មានឥទ្ធិពល Philippe Coutinho។ នេះបើយោងតាមប្រភពដ៏គួរឲ្យជឿជាក់ជាច្រើននៅក្នុងប្រទេសអេស្ប៉ាញ។
ក្លិបយក្សរបស់ក្របខ័ណ្ឌ La Liga មួយនេះបានតាមប្រមាញ់ទិញ Coutinho តាំងពីខែមុនមកម្ល៉េះ ហើយបច្ចុប្បន្ន ពួកគេជឿជាក់ថា ពួកគេបានឈានដល់ការព្រមព្រៀងគ្នាមួយជាមួយនឹង Liverpool ហើយសម្រាប់តារាឆ្នើមរូបនេះ ដើម្បីធ្វើឲ្យរូបគេក្លាយជាកីឡាករមានតម្លៃខ្លួនខ្ពស់បំផុតលំដាប់ទី2ក្នុងប្រវត្តិសាស្ត្រកីឡាបាល់ទាត់។ ទូរទស្សន៍ ESPN បានចេញផ្សាយថា គ្រូបង្វឹករបស់ Liverpool បានទទួលយកកញ្ចប់ថវិកានេះដែលនឹងធ្វើឲ្យ Coutinho ត្រូវចាកចេញពីកីឡដ្ឋាន Anfield ដើម្បីផ្ទេរទៅកាន់កីឡដ្ឋាន Nou Camp។ បណ្តាញសារព័ត៌មានដ៏គួរឲ្យជឿជាក់មួយនេះ បានបញ្ជាក់ថា ក្រុមមន្ត្រីមួយក្រុមរបស់ Barcelona បានធ្វើដំណើរទៅកាន់ទីក្រុង Liverpool កាលពីថ្ងៃចន្ទ ដើម្បីរៀបចំការពិភាក្សាផ្សេងៗ ជាមួយនឹងក្រុមគ្រូបង្វឹករបស់ Liverpool ក្រោយពីរងការច្រានចោលចំពោះការដាក់សំណើចំនួន2លើករបស់ខ្លួនសម្រាប់កីឡាកររូបនេះ។
វាត្រូវបានគេយល់ឃើញថា ខ្សែបម្រើប្រយុទ្ធអន្តរជាតិប្រេស៊ីល Coutinho បានប្រាប់ក្លិប Liverpool កាលពីថ្ងៃម្សិលមិញថា រូបគេនឹងពេញចិត្តក្នុងការផ្ទេរទៅកាន់អេស្ប៉ាញ ប្រសិនបើការផ្ទេរមួយនេះអាចត្រូវបានឈានដល់ការឯកភាពរវាងក្លិបទាំងពីរ។ ការសម្រេចចិត្តនេះ ហាក់បានបន្ទន់ឥរិយាបថរបស់ Liverpool ក្រោយពីបានបញ្ជាក់ថា តារាឆ្នើមរបស់ពួកគេមិនមែនសម្រាប់លក់ឡើយ»៕
ប្រភពពី៖ The Sun
August 9, 2017
វិធីងាយៗ 5យ៉ាងកាត់បន្ថយអាការឈឺធ្មេញ
នៅពេលឈឺធ្មេញ ពិតប្រាកដណាស់ច្បាស់ជាមានភាពវេទនាយ៉ាងខ្លាំង ព្រោះភាគច្រើននៅពេលដែលឈឺធ្មេញហើយ គឺនូវមានផលប៉ះពាល់ដល់ការឈឺពេញបរិវេណក្បាលថែមទៀត។ ដូច្នេះហើយទើបថ្ងៃនេះ ឡារ៉ែន បានពាំនាំនូវវិធីងាយ 5យ៉ាងក្នុងការបំបាត់អាការឈឺធ្មេញយ៉ាងមានប្រសិទ្ធភាពមកជូនមិត្តអ្នកអានទាំងអស់ ហើយធានាថាអាចជួយព្យាបាលអាការឈឺចាប់បានយ៉ាងប្រសើរ តើមានវិធីអ្វីខ្លះ? សូមអានទាំងអស់គ្នា។
1/ ចៀសវាងរបស់ដែលធ្វើឱ្យឈឺធ្មេញ
នៅពេលមានអាការឈឺធ្មេញ អ្នកគួរជៀសវាងទទួលទានរបស់មួយចំនួនដែលជាមូលហេតុ ឬជាអាហារដែលបណ្ដាលឱ្យមានអាការឈឺធ្មេញខ្លាំងឡើង ឧទាហរណ៍ដូចជា អាហារ និងភេសជ្ជៈដែលក្ដៅខ្លាំង ត្រជាក់ខ្លាំង មានរសជាតិប្រៃខ្លាំង ផ្អែមខ្លាំង និងជូរខ្លាំងជាដើម។
2/ លេបថ្នាំបំបាត់ការឈឺចាប់
ថ្នាំបំបាត់ការឈឺចាប់ ជាថ្នាំដែលបន្ថយការឈឺចាប់បានយ៉ាងល្អប្រសើរ មិនថាតែឈឺក្បាល ឬឈឺធ្មេញនោះទេ ដោយជាដំបូងអ្នកគួរតែសាកល្បងលេបថ្នាំ Paracetamol 500 mg ជាមុនសិន។ ប្រសិនបើអាការឈឺធ្មេញខ្លាំងមែនទែន អ្នកគួរតែប្ដូរថ្នាំបំបាត់ការឈឺចាប់ណាដែលមានឥទ្ធិពលខ្លាំងបន្ដិច ឬអាចលេបថ្នាំសម្រាប់បំបាត់
អាការឈឺធ្មេញតែម្ដងក៏បានដែរ ក៏ប៉ុន្ដែត្រូវប្រយ័ត្នចំពោះការលេបថ្នាំឱ្យមែនទែន ព្រោះថ្នាំប្រភេទខ្លះអាចហុចផលប៉ះពាល់ដល់សុខភាពរបស់អ្នកបានដូចគ្នា។
3/ ស្អំទឹកកក
ការម៉ាស្សា ឬស្អំទឹកកក អាចជួយបន្ថយអាការឈឺធ្មេញបានយ៉ាងប្រសើរ ដោយយកក្រណាត់ស្អាតស្ដើង ជ្រលក់ជាមួយទឹកកកមកស្អំនៅត្រង់បរិវេណដែលឈឺចាប់ ដែលការធ្វើបែបនេះនឹងជួយបំបាត់អាការរលាកអញ្ចញធ្មេញបានយ៉ាងមានប្រសិទ្ធភាព និងហុចផលឱ្យអាការឈឺចាប់ថយចុះមួយកម្រិត។
4/ ចៀសវាងការប៉ះទង្កិចត្រង់បរិវេណធ្មេញឈឺ
ព្រោះវាកាន់តែមានអាការឈឺចាប់ខ្លាំងនៅពេលដែលមានវត្ថុអ្វីមួយមកប៉ះទង្កិចជាមួយធ្មេញដែលកំពុងឈឺ ឬប្រើអណ្ដាតទៅប៉ះ ក៏មានភាពឈឺចាប់ទ្វេឡើងដែរ ទាំងនេះហើយទើបអ្នកគួរតែធ្វើយ៉ាងណាកុំឱ្យមានវត្ថុអ្វីមកប៉ះទង្គិចជាមួយធ្មេញដែលកំពុងឈឺ។
5/ យកកាកអាហារដែលជាប់នឹងប្រហោងធ្មេញ
ចេញហេតុផលដែលបង្កឱ្យកើតមានការឈឺធ្មេញ ក៏ដោយសារតែមានកាកសំណល់អាហារមួយចំនួនជាប់នឹងធ្មេញដែរ ដូច្នេះអ្នកគួរតែធ្វើការសម្អាតធ្មេញ និងព្យាយាមយកកាកអាហារដែលនៅជាប់នឹងធ្មេញរបស់អ្នកចេញឱ្យអស់ ដោយប្រើថ្នាំដុសធ្មេញដុសសម្អាតធ្មេញ ឬឆ្កឹះកាកអាហារចេញមកដោយប្រើអំបោសក៏បាន ប៉ុន្ដែអ្នកមិនត្រូវប្រើឈើចាក់ធ្មេញ ដើម្បីឆ្កឹះកាកអាហារចេញនោះទេ ព្រោះវាមានគ្រោះថ្នាក់ដល់អញ្ចញធ្មេញ និងអាចឆ្លងមេរោគបានថែមទៀតផង៕
August 9, 2017
Aum Pachrapa ទទួលពានរង្វាន់ តារាស្រីនាំមុខគេជាច្រើនឆ្នាំ
ត្រឡប់មកវិញជាថ្មីម្ដងទៀតជាមួយនឹងកម្មវិធីប្រកាសពានរង្វាន់កិត្តិយសសម្រាប់សិល្បៈថៃ ដែលមានឈ្មោះថា “มายามหาชน MAYA AWARDS 2017” ដែលលទ្ធផលសម្រេចទទួលបានពីការបោះឆ្នោតដោយប្រជាជនថៃទូទាំងប្រទេស និងនៅឆ្នាំនេះ ពិធីនេះត្រូវបានប្រារព្ធរៀបចំឡើងនៅក្នុងបរិវេណ Crystal Grand Ball Room ក្នុងទីក្រុង បាងកក។
ពិតជាមិនធម្មតាមែន ព្រោះមានតារាថៃជាច្រើនដួងទាំងជំនាន់ថ្មី ជំនាន់ចាស់បានចូលរួមយ៉ាងច្រើនកុះករ ហើយដើរបង្ហាញខ្លួននៅលើកម្រាលព្រំពណ៌ក្រហមដ៏អស្ចារ្យ។ ដោយឡែក តារាស្រីដែលទទួលបានពានរង្វាន់ជាច្រើនឆ្នាំ ហើយជាតារាស្រីលំដាប់ជួរមុខគេ និងមានតម្លៃខ្លួនខ្ពស់ជាងគេបំផុតនោះ គឺនាង អាំ ផាត់ឆារ៉ាផា (Aum Pachrapa)បានគ្រងតំណែងពានរង្វាន់ តារាស្រីនាំមុខគេក្នុងកម្មវិធី MAYA AWARDS 2017 នេះ។
គួរបញ្ជាក់ផងដែរថា ដំបូងឡើយទស្សនិកជនគ្រប់គ្នាបានគិតទុកជាមុនថា នៅក្នុងឆ្នាំនេះពានរង្វាន់សម្រាប់កំពូលតារាលេខមួយ គឺត្រូវបានទៅលើតារាឯកស្រី កុប ស៊ុវៈណាន់ (ផ្កាយព្រឹក) ប៉ុន្ដែលទ្ធផលបោះឆ្នោតពីប្រជាជនថៃទាំងអស់ បានសម្រេចបោះឆ្នោតឱ្យតារាស្រី Aum Pachrapa ឈ្នះក្នុងការប្រកួត ព្រមទាំងបានក្លាយជាកំពូលតារាលំដាប់ទី 1 ជាច្រើនឆ្នាំផងដែរ។
សូមទស្សនារូបភាពតារាថៃទាំងឡាយនៅក្នុងកម្មវិធីទាំងមូល ព្រមទាំងតារាស្រី Aum Pachrapa ខាងក្រោមនេះ៕
August 9, 2017
BIC ជាអ្នកភ្ញាស់បណ្តុំសហគ្រាសធុនតូច និងមធ្យមនៅកម្ពុជាឱ្យមានភាពរឹងមាំ
ភ្នំពេញ៖ ក្រសួងឧស្សាហកម្ម និងសិប្បកម្មបានសហការជាមួយសមាគមសហគ្រិនវ័យក្មេងកម្ពុជា សមាគមសហគ្រិនស្ត្រីកម្ពុជា សភាពាណិជ្ជកម្មកម្ពុជា និងអង្គការគំនិតផ្តួចផ្តើមអាជីវកម្មមេគង្គ(MBI)បង្កើតមជ្ឈមណ្ឌលព័ត៌មានអាជីវកម្ម(BIC) ពង្រឹងដល់ឧស្សាហកម្មខ្នាតតូច និងមធ្យមនៅកម្ពុជាឱ្យកាន់តែរឹងមាំ។
កម្មវិធីនេះទទួលបានការឧបត្ថម្ភពីធនាគារអភិវឌ្ឍន៍អាស៊ី(ADB), ជំនួយអូស្ត្រាលី WEG ,GMT , CAM-ASEAN ,LG,Manulife និងAdvanced Glory Logistic ដែលជួយជំរុញឱ្យមជ្ឈមណ្ឌលព័ត៌មានអាជីវកម្ម(BIC)ដំណើរការទៅប្រកបដោយជោគជ័យ។
ឯកឧត្តមទេសរដ្ឋមន្ត្រី ចម ប្រសិទ្ធ រដ្ឋមន្រ្តីក្រសួងឧស្សាហកម្ម និងសិប្បកម្ម បានលើកឡើងពីអត្ថប្រយោជន៍នៃការបង្កើត BIC ដោយបានសង្កត់ធ្ងន់ថា៖ BIC យើងអាចចាត់ទុកថាជាអ្នក ភ្ញាស់បណ្តុំសហគ្រាសធុនតូច និងមធ្យមឱ្យមានភាពរឹងមាំ និងមានលក្ខណៈប្រកួតប្រជែង ហើយក៏បានរួមចំណែកក្នុងការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា 2015-2025ផងដែរ។
BIC ក៍បានចូលរួមលើកកម្ពស់ប្រសិទ្ធភាព និងតម្លាភាពនៃការអនុវត្តច្បាប់ និងលិខិតបទដ្ឋានគតិយុត្តនានាពាក់ព័ន្ធ និងសហគ្រាសឯកជន។ ម៉្យាង BIC មិនមែនគ្រាន់ជាបណ្តុំព័ត៌មានអាជីវកម្មទេតែបានផ្តល់ជូននូវសេវាកម្មដូចជា៖ ការផ្តល់នូវការប្រឹក្សាផ្នែកហិរញវត្ថុ និងប្រព័ន្ធទិន្នន័យផ្តល់ការប្រឹក្សាលើដំណើរការអាជីវកម្ម និងភាពអនុលោមសម្រាប់ SMEs ដោយផ្តល់នូវសេវាផ្នែកពាណិជ្ជកម្ម និងជំនាញការសម្រាប់ពិភាក្សាការងារពាក់ព័ន្ធ និងSMEs។
ក្រៅពីនោះឯកឧត្តមទេសរដ្ឋមន្ត្រីបានបន្ថែមចំណុចជាគន្លឹះមួយចំនួនទៀត ធ្វើយ៉ាងណាជួយជ្រោមជ្រែងឱ្យ SMEs អាចរស់ដោយខ្លួនឯងបាន ហើយគួរដាក់បញ្ចូលចំណេះដឹងផ្សេងៗ ទាក់ទងនឹងផែនការអាជីវកម្ម ជំនាញទីផ្សារ ព័ត៌មានទីផ្សារ និងបញ្ជីប្រព័ន្ធគណនេយ្យជាដើម៕
August 9, 2017
Song Joong Ki និង Song Hye Kyo ជ្រើសបានសណ្ឋាគារសម្រាប់រៀបចំមង្គលការហើយ
នៅមុននេះបន្ដិច អ្នកគាំទ្រតារាសម្ដែងជាគូស្នេហ៍នឹងគ្នានៅក្នុងរឿង Descendants of the Sun បានឮពីការប្រកាសរៀបអាពាហ៍ពិពាហ៍ជាផ្លូវការហើយនៅថ្ងៃទី31 ខែតុលា ឆ្នាំ2017 នេះរួចមកហើយ។
ឥឡូវនេះ Song Joong Ki និង Song Hye Kyo បានសម្រេចជ្រើសរើសយកសណ្ឋាគារ Shilla Hotel Seoul ក្នុងការរៀបចំពិធីរៀបមង្គលការរបស់ខ្លួន ព្រោះវាជាសណ្ឋាគារមួយដែលប្រណីតបំផុត។ គួររំឭកផងដែរថា មានតារាកូរ៉េជាច្រើនគូរួចមកហើយដែលបានរៀបមង្គលការ និងបានស្បថស្បែនៅក្នុងសណ្ឋាគារនេះ មានដូចជា Jang Dong Gun, Go So Young, Kwon Sang Woo, Son Tae Young, Jeon Ji Hyun និងប្តីរបស់នាង Choi Jun Hyuk, Hwang Jung Eum និង Lee Young Don ជាដើម៕
August 8, 2017
បើញ៉ាំឪឡឹករយៈពេល 7 ថ្ងៃជាប់គ្នា តើនឹងមានអ្វីកើតឡើងចំពោះសុខភាពរបស់អ្នក?
មនុស្សមួយចំនួនមិនសូវនិយមញ៉ាំទឹកប៉ុន្មានទេ អ្នកខ្លះទៀតខំប្រឹងធ្វើការងាររហូតដល់មិនបាននឹកនារឿងញ៉ាំទឹកឱ្យបានគ្រប់គ្រាន់ឡើយ។ ផ្លែឪឡឹកត្រូវបានអ្នកស្រាវជ្រាវផ្នែកភោជនាហារ និងសុខភាពទទួលស្គាល់ថា ជាផ្លែឈើដែលសម្បូរទៅដោយជាតិទឹកច្រើន និងមានវីតាមីនជាច្រើននៅក្នុងសាច់របស់វា។ ដោយហេតុថា វាមានអត្ថប្រយោជន៍ជាច្រើនបែបនេះហើយ ទើបបានជាអ្នកជំនាញផ្នែកសុខភាពបានណែនាំឱ្យអ្នក ដែលមិនសូវនិយមញ៉ាំទឹកច្រើនឱ្យងាកមកញ៉ាំផ្លែឪឡឹកជំនួសទឹកវិញ ដើម្បីឱ្យរាងកាយមានជាតិទឹកគ្រប់គ្រាន់ និងមានសម្បុរស្បែកភ្លឺថ្លា។
ក្រុមអ្នកវេជ្ជសាស្ត្របានពិសោធលើអ្នកជំងឺដែលបាត់បង់ជាតិទឹកដោយឱ្យទទួលទានផ្លែឪឡឹកក្នុងរយៈពេល 7ថ្ងៃជាប់គ្នា ហើយក៏សង្កេតឃើញថា រាងកាយរបស់អ្នកជំងឺមានភាពល្អប្រសើរជាងមុន ដូច្នោះហើយបានជាយើងគួរតែដឹងថា ការញ៉ាំឪឡឹក 7 ថ្ងៃជាប់ៗគ្នានឹងមានអ្វីកើតឡើងចំពោះសុខភាពរបស់យើងខ្លះ?
ខាងក្រោមនេះ ជាគុណសម្បតិ្តក្នុងការទទួលទានឪឡឹករយៈពេល 7 ថ្ងៃជាប់ៗគ្នា៖
1.រក្សាសុខភាពតម្រងនោមបានល្អ
2.ប្រឆាំងជំងឺមហារីក
3.បង្កើនសុខភាពភ្នែក
4.ប្រឆាំង និងការពាររោគផ្សេងៗ
5.បន្ថែមថាមពល
6.សម្រកទម្ងន់ និងរក្សារាងបានស្អាត
7.សម្រួលប្រព័ន្ធឈាម និងបេះដូង
8.ការពាររោគរលាកផ្សេងៗ
9.ព្យាបាលជំងឺបាក់ទឹកចិត្ត
សម្រាប់ព័ត៌មានលម្អិតអំពីចំណុចនៃអត្ថប្រយោជន៍ផ្នែកវេជ្ជសាស្រ្តរបស់ឪឡឹក សូមមើលវីដេអូខាងក្រោមនេះ៖
August 8, 2017