Author: អេបិល

ពិតជាគួរឱ្យព្រឺសម្បុរមែន ពេលឃើញ ម៉ាក់ សែនសូនីតា ស្នេហាជាមួយពស់ថ្លាន់
នៅថ្ងៃទី26 ខែតុលា ឆ្នាំ2017 តាមរយៈ Facebook Page របស់តារាស្រីបបូរមាត់ស្អាត ម៉ាក់ សែនសូនីតា បានឱ្យដឹងថា តារាស្រីរូបនេះពិតជាមានសេចក្ដីក្លាហានមែនដែលហ៊ានប្រឡែងលេង និងនែបនិត្យស្នេហាជាមួយនឹងសត្វពស់ថ្លាន់ដែលមានទំហំធំ និងប្រវែងខ្លួនវែងគួរសម។ ការសម្ដែងជាមួយសត្វពស់ដ៏គួរឱ្យស្រៀវស្រើបនេះមាននៅក្នុងរឿង “កូនពស់កេងកង” ដែលជារឿងភាគថ្មីរបស់ស្ថានីយទូរទស្សន៍ហង្សមាស HD TV និងដឹកនាំរឿងដោយលោក ហ្វៃ សំអាង ។
ដោយឡែកនៅលើរូបភាពប៉ុន្មានសន្លឹក និងឃ្លិបវីដេអូប្រឡែងលេងជាមួយសត្វពស់ថ្លាន់ កញ្ញា ម៉ាក់ សែនសូនីតា បានរៀបរាប់ជាពាក្យកំណាព្យថា ៖
“ស្នេហាមនុស្សនឹងពស់ រស់ក្នុងកម្មពារ
ក្នុងនាមភរិយា ក្បត់ចិត្តស្វាមី
មិនចង់សាងទេ តែកម្មលោកិយ
ទោះជីវិតក្ស័យ ក៏មិនអស់ដែរ…”
“បើនិយាយពីសាច់វិញ….ឡើងត្រជាក់តែម្ដង..” ។ ដើម្បីឱ្យកាន់តែជាក់ច្បាស់ សូមទស្សនាវីដេអូខាងក្រោមនេះ៖
October 27, 2017
នាំគ្នាមកស្គាល់ពិធីកររូបសង្ហាដាច់គេក្នុងកម្មវិធី Miss Grand International 2017 វិញម្ដង…
នៅទីបញ្ចប់កម្មវិធីប្រកួតបវរកញ្ញាលំដាប់ថ្នាក់អន្ដរជាតិ Miss Grand International 2017 បានរកឃើញម្ចាស់គ្រងតំណែងមកុដហើយ គឺបានទៅលើបេក្ខនារី Maria Jose Lora ជាបវរកញ្ញាតំណាងប្រទេស ប៉េរូ តែដោយឡែកនៅក្នុងកម្មវិធីទាំងមូលក៏មានការចាប់អារម្មណ៍ជាខ្លាំងទៅលើពិធីកររាងសង្ហាមួយរូបដែលបានធ្វើបវរកញ្ញានៅលើឆាកទាំងអស់ រួមទាំងទស្សនិកជន(ជាសុភាពនារី)ផងនោះ ទប់អារម្មណ៍សឹងតែមិនចង់បានខណៈបានឃើញរូបលោកនៅលើវេទិកា។ ពិធីកររូបនេះមានឈ្មោះថា Xian Lim គឺជាតារាកូនកាត់ចិន និងហ្វ៊ីលីពីន ហើយលោកមានអាជីពជាតារាសម្ដែង និងបង្ហាញម៉ូដ។
តារាប្រុសរូបនេះ មានឈ្មោះពេញគឺ Alexander Xian Cruz Lim-Uy កើតនៅឆ្នាំ 1989 ឪពុកម្ដាយរបស់លោកមានសែស្រឡាយជាជនជាតិចិន ហើយបានមករស់នៅក្នុងប្រទេស ហ្វ៊ីលីពីន។ លោកបានប្រសូតនៅលើទឹកដីសហរដ្ឋអាមេរិក ក្នុងរដ្ឋ San Francisco លុះអាយុបាន 6 ឆ្នាំ ក៏វិលត្រឡប់មករស់នៅក្នុងប្រទេសហ្វ៊ីលីពីនវិញ។ ក្រោយមកដល់អាយុ 10 ឆ្នាំ លោកបានធ្វើដំណើរទៅរស់នៅសហរដ្ឋអាមេរិកវិញ និងបន្ដការសិក្សានៅទីនោះរហូតដល់ចប់ថ្នាក់វិទ្យាល័យនៅអាយុ 18 ឆ្នាំ។ តារាប្រុសរូបនេះ បានចាប់ផ្ដើមសម្ដែងក្នុងខ្សែភាពយន្ដជាលើកដំបូងរបស់ខ្លួននៅក្នុងឆ្នាំ 2011 ខ្សែភាពយន្ដនោះមានចំណងជើងថា “My Binondo Girl” ។
គួរបញ្ជាក់ផងដែរថា លោក Xian Lim មានប្រជាប្រិយភាពខ្លាំងបំផុតនៅក្នុងពិភពសិល្បៈប្រទេស ហ្វ៊ីលីពីន ព្រមទាំងមានអ្នកគាំទ្រ និងស្រឡាញ់លោកជាច្រើនសិបពាន់នាក់ទៀតផង ។ ហើយថ្មីៗនេះ លោកកំពុងតែថតភាពយន្ដភាគទូរទស្សន៍រឿងថ្មីមួយទៀត ដែលមានចំណងជើងថា “Bride For Rent” ( Bride borrowed) ៕
October 27, 2017
បវរកញ្ញា ខ្លឹម ស្រីគា ទោះមិនជោគជ័យ តែក៏ស្ថិតក្នុងបេះដូងអ្នកគាំទ្រកម្ពុជាដែរ
នៅរាត្រីថ្ងៃទី25 ខែតុលា ឆ្នាំ2017 នេះ កម្មវិធីប្រកួតបវរកញ្ញា Miss Grand International 2017បានរកឃើញម្ចាស់មកុដ ហើយ គឺកញ្ញា Maria Jose Lora មកពីប្រទេស ប៉េរូ និងបើទោះបីជាបេក្ខភាពពីកម្ពុជា កញ្ញា ខ្លឹម ស្រីគា មិនបានជាប់ជយលាភី និងនិយាយភាសាអង់គ្លេសមិនសូវបានល្អក្ដី ក៏មជ្ឈដ្ឋានអ្នកគាំទ្រកម្ពុជានៅតែបន្ដគាំទ្រនាង និងលើកទឹកចិត្តនាង ព្រមទាំងមានមោទនភាពចំពោះរូបនាងដែលជាតំណាងប្រទេស កម្ពុជា ទៅប្រកួតនៅលើឆាកអន្ដរជាតិដែរ។
នេះបើតាមការរៀបរាប់របស់ Facebook Page Miss Grand Cambodia ដែលបានផ្ដល់កម្លាំងចិត្តដល់កញ្ញា ខ្លឹម ស្រីគា ថា «សូមចូលរួមសោកស្តាយ និងលើកទឹកចិត្តចំពោះកញ្ញាខ្លឹម ស្រីគា។ កញ្ញានៅតែស្ថិតក្នុងដួងចិត្តរបស់យើង កញ្ញានៅតែជា Miss Grand Cambodia ជាទីស្រឡាញ់នៃប្រជាជនកម្ពុជា។ បោះជំហានទៅមុខជាមួយគ្នា ជាមួយប្អូនៗជំនាន់ក្រោយ យើងសង្ឃឹមថា ថ្ងៃមួយនឹងមានបេក្ខនារីកម្ពុជាទទួលបានមកុដមាសដ៏មានកិត្តិយសនេះមិនខាន។ សូមថ្លែងអំណរគុណគ្រប់កម្លាំងចិត្តពីមហាជនកម្ពុជាគ្រប់ៗរូប។ សូមជូនពរសំណាងល្អ និងសុភមង្គលគ្រប់ក្រុមគ្រួសារ »។
គួរបញ្ជាក់ផងដែរថា ទោះមិនបានជ័យលាភីគ្រងតំណែងមកុដក្ដី ក៏ប៉ុន្ដែ ខ្លឹម ស្រីគា បានទទួលពានរង្វាន់ពិសេស១ គឺ ពានប្រជាប្រិយភាព ដោយសារតែនាងមានភាពរីករាយរាក់ទាក់លេចធ្លោជាងគេ៕

October 27, 2017
រកឃើញម្ចាស់មកុដ Miss Grand International 2017 ហើយ!
នៅថ្ងៃទី26 ខែតុលា ឆ្នាំ 2017 នេះ តាមរយៈសារព័ត៌មាន Kenh14 បានឱ្យដឹងថា នៅរាត្រីថ្ងៃទី25 ខែតុលា យប់មិញនេះ នៅលើទឹកដីកោះត្រល់ ប្រទេសវៀតណាម កម្មវិធីលំដាប់ថ្នាក់អន្ដរជាតិ Miss Grand International 2017 បានរកឃើញម្ចាស់មកុដហើយ ដោយជយលាភីបានទៅលើបវរកញ្ញា Maria Jose Lora ជាបវរកញ្ញាតំណាងប្រទេស ប៉េរូ ដោយនាងទទួលបានពិន្ទុនៃសំឡេងឆ្នោតច្រើនជាងគេបង្អស់នៅក្នុងវគ្គផ្ដាត់ព្រ័ត្រនេះ។
បន្ទាប់ពីបានប្រកួតប្រជែងអស់រយៈពេលជាច្រើនថ្ងៃ និងច្រើនដំណាក់កាលរួចមក បវរកញ្ញារូបនេះត្រូវបានគេចាត់ទុកជាប្រវត្តិសាស្ត្រថា ជាបវរកញ្ញាដែលមានសមត្ថភាពខ្ពស់ និងស្រស់ស្អាតលេចធ្លោជាងគេ ព្រមទាំងស័ក្ដិសមជាមួយតំណែងកំពូលជានារីឯកពិតប្រាកដមែន។ គួរបញ្ជាក់ផងដែរថា ទាំងកម្ពស់ រូបសម្ផស្ស និងការបញ្ចុះបញ្ចូលទស្សនិកជនរបស់បវរកញ្ញារូបនេះពិតជាគួរឱ្យមានទំនុកចិត្តមែន ខណៈពេលដើរបង្ហាញខ្លួននៅលើឆាក ហើយបានគ្រងនូវមកុដ Miss Grand International 2017 បានយ៉ាងសុក្រឹតនិងយុត្តិធម៌បំផុត៕
October 27, 2017
ភាពយន្ដខ្លីរបស់ខ្មែរ មានសម្ទុះខ្លាំងក្នុងមហោស្រពភាពយន្ដខ្លីចតុមុខឆ្នាំ2017នេះ
នេះជាឆ្នាំទី 6 ហើយដែលមហោស្រពភាពយន្ដខ្លីចតុមុខ បានរៀបចំឡើង និងទទួលបានជោគជ័យខ្លាំងបំផុត រហូតដល់ឆ្នាំ 2017 នេះមានការគាំទ្រពីសំណាក់ផលិតករបរទេសបានមកចូលរួមប្រកួតរហូតដល់ទៅ 3,124 រឿង ជារឿងដែលមកពីបណ្ដាប្រទេសនៅក្នុងតំបន់អាស៊ាន សហរដ្ឋអាមេរិក និងសហភាពអឺរ៉ុបទៀតផង។
គេសង្កេតឃើញថា ក្នុងឆ្នាំនេះ មហោស្រពភាពយន្ដខ្លីចតុមុខក៏ទទួលបានសម្ទុះនៃការចូលរួមពីផលិតករវ័យក្មេង និងជើងចាស់ដែលជាជនជាតិខ្មែរយើងដែរ ដោយបានចូលរួមប្រកួតចំនួន 49 រឿង ហើយជាប់ជាជម្រើសក្នុងការចាក់បញ្ជាំងនៅក្នុងរោងភាពយន្ដចំនួន 28 រឿង ព្រមទាំងជាប់ក្នុងការប្រកួតជុំចុងក្រោយមានចំនួន 7 រឿងទៀតផង។
នៅរាត្រីថ្ងៃទី 25 ខែតុលា ឆ្នាំ 2017 ក្នុងពិធីបើកសម្ពោធមហោស្រពភាពយន្ដខ្លីចតុមុខឆ្នាំ2017 នៅក្នុងបរិវេណសាលមហោស្រពចតុមុខ ឯកឧត្តម សោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈបានថ្លែងនៅក្នុងពិធីថា « ពីមួយឆ្នាំទៅមួយឆ្នាំ ការរីកចម្រើននៃវិស័យភាពយន្ដនៅក្នុងប្រទេសកម្ពុជាកាន់តែរីកដុះដាលសុសសាយខ្លាំងឡើង ហើយកាន់តែទទួលបានភាពល្បីល្បាញរហូតដល់បរទេសបានមកចូលរួម និងមានការស្វែងយល់ពីសន្តិភាពរបស់ប្រទេសកម្ពុជាយើងទៀតផង»។
យ៉ាងណាមិញលោក ជា សុខហី ប្រធានមហោស្រពភាពយន្ដខ្លីចតុមុខ ក៏បានបញ្ជាក់ប្រាប់សារព័ត៌មាន ឡារ៉ែន ថា « ពិតជារំភើបណាស់ ! ចាប់តាំងពីយើងបានចាប់ផ្ដើមមក យើងសង្កេតឃើញថា សម្ទុះនៃការផលិតភាពយន្ដខ្មែរបានកើនឡើងខ្លាំងមែនទែន ដូចជានៅក្នុងឆ្នាំនេះ យើងទទួលបានជាង 3000រឿង ហើយអ្វីដែលមិនធ្លាប់មានពីមុនមកនោះគឺ រឿងខ្មែរមានដល់ទៅ 49 រឿងឯណោះ។ អស្ចារ្យមែនទែន! ភាពយន្ដខ្មែរនៅក្នុងឆ្នាំ 2017 នេះ មានគុណភាពល្អ និងគំនិតច្នៃប្រឌិតខ្ពស់ និងបានជាប់ជាជម្រើសយកទៅបញ្ចាំងនៅទីក្រុងតូក្យូ ប្រទេសជប៉ុនរហូតដល់ទៅ 3 រឿង »។
គួរបញ្ជាក់ផងដែរថា លោក ស៊ុំ ស៊ីថែន ជាអ្នកនាំពាក្យមហោស្រពភាពយន្ដខ្លីចតុមុខក៏បានបញ្ជាក់បន្ថែមផងដែរថា នៅក្នុងឆ្នាំនេះ កម្មវិធីនៃការបង្ហាញស្នាដៃភាពយន្ដខ្នាតខ្លីមានចំនួន 4 កម្មវិធី ដូចជា Film Cam ( ភាពយន្ដខ្លីរបស់ក្រុមជំរំភាពយន្ដ ) Legacy Film Lap , Family and You និងគម្រោងបង្ហាញភាពយន្ដទាំង 5 ដែលទទួលបានជយលាភីលេខ 1ក្នុងរយៈពេល 5 ឆ្នាំដំបូងរបស់មហោស្រពភាពយន្ដខ្លីចតុមុខផងដែរ៕

October 26, 2017
ភរិយា Rain ជិតដល់ថ្ងៃប្រសូតបុត្រហើយ
នៅថ្ងៃទី25 ខែតុលា ឆ្នាំ2017 នេះ តាមរយៈសារព័ត៌មានកូរ៉េ Koreaboo បានឱ្យដឹងថា ចុងក្រោយថ្មីៗនេះ Kim Tae Heeជាភរិយារបស់តារាចម្រៀង និងសម្ដែង Rain បានប្រាប់ឱ្យដឹងថា អ្នកនាងជិតដល់ថ្ងៃផ្ដល់កំណើតកូនសម្លាញ់ហើយ បន្ទាប់ពីពពោះបានគ្រប់ខែ។ សារព័ត៌មានដដែលនេះក៏បានអះអាងដែរថា លោក Rain បានបង្ហោះរូបភាពមួយចំនួននៅក្នុងបណ្ដាញសង្គម Instagram របស់លោកផ្ទាល់ដោយបានបញ្ជាក់ថា លោកត្រៀមទទួលយកនូវសមាជិកថ្មីមួយទៀតដែលជិតបានឃើញពន្លឺព្រះអាទិត្យនាពេលឆាប់ៗខាងមុខនេះ។
គួរបញ្ជាក់ផងដែរថា លោក Rain បានសរសេរខ្លីៗជំនួសកូនស្រីនៅក្នុងគភ៌របស់ភរិយានៅលើរូបភាពក្នុងអ៊ីនស្ដាក្រាមថា “អរគុណ!! …ខ្ញុំប្រៀបបីដូចជាម្ចាស់ក្សត្រិយ៍ដ៏ស្រស់ស្អាត។ ពួកយើងនឹងឱ្យនាងបានសម្រាកយ៉ាងស្រួលបំផុត ហើយនោះនាងនឹងក្លាយជាមនុស្សម្នាក់ដែលប្រសើរ ហើយរីករាយបំផុតនៅក្នុងជីវិត”៕
October 26, 2017
Original song របស់ Sky ចាក់ដោតអារម្មណ៍យុវវ័យខ្លាំងដល់បេះដូង
អ្នកនិយមលេងឧបករណ៍ភ្លេងហ្គីតារច្បាស់ជាមិនអាចរំលងបទចម្រៀងមួយនេះបានឡើយ ជាប្រភេទបទងាយៗ ចង្វាក់បែប Cuteៗ តាមស្ទីលយុវវ័យសម័យថ្មី ដែលមានចំណងជើងថា “ចង់ឱ្យគ្រប់យ៉ាងដូចដើម” ជាការបកស្រាយ និងនិពន្ធដោយ តារាចម្រៀង Sky ។ អារម្មណ៍ដែលផុសចេញពីការស្រឡាញ់ និងមានទេពកោសល្យក្នុងការផលិតស្នាដៃថ្មីៗ ដើម្បីឱ្យមហាជនអ្នកគាំទ្របានទទួលនោះ គឺជាកម្លាំងជំរុញចិត្តឱ្យតារាចម្រៀងរូបនេះ និពន្ធទំនុកច្រៀង និងទំនុកបទភ្លេងដោយខ្លួនលោកផ្ទាល់ក្នុងការបម្រើអារម្មណ៍អ្នកនិយមគាំទ្រស្ដាប់បទ Original song ដែលជាស្នាដៃកូនខែ្មរផ្ទាល់។
លោក ចាន់ធី មករា ឬមានឈ្មោះនៅក្នុងសិល្បៈហៅថា Sky បានប្រាប់សារព័ត៌មាន ឡារ៉ែន ថា “ចម្រៀងនិពន្ធថ្មីដំបូងដែលខ្ញុំបានធ្វើឡើងនេះ បានផលិតជាផ្លូវការហើយ ក៏ប៉ុន្ដែខ្ញុំក៏នៅតែបន្ដផលិតបទជាច្រើនទៀតផងដែរ ។ ពេលនេះគឺមានការគាំទ្រពីអ្នកទាំងអស់គ្នាហ្នឹងហើយដែលជាកម្លាំងចិត្តយ៉ាងសំខាន់សម្រាប់ខ្ញុំ ជាពិសេសស្នាដៃកូនខ្មែរផ្ទាល់តែម្ដង។ សង្ឃឹមថា អ្នកទាំងអស់គ្នាជាកូនខ្មែរបានចាប់អារម្មណ៍ និងលើកទឹកចិត្តកូនខ្មែរដូចគ្នាក្នុងការផលិតស្នាដៃនិពន្ធថ្មីនេះ” ។
តារាចម្រៀងរូបនេះបានរំឭកប្រាប់ថា នៅពេលដែលលោកចូលសិល្បៈដំបូងៗ និងឡើងច្រៀងនៅតាមស្ថានីយទូរទស្សន៍ក្នុងស្រុកជាច្រើននោះ លោកមានការសោកស្ដាយយ៉ាងខ្លាំងដែលពេលនោះមិនមានបទចម្រៀងផ្ទាល់ខ្លួន ដូច្នេះពេលនេះបើទោះបីជាលំបាក ឬគ្មានថវិកាគ្រប់គ្រាន់ក្នុងការផលិតបទចម្រៀងយ៉ាងនេះក្ដី ក៏លោកបានសន្សាទុកនៅក្នុងចិត្តថា លោកគ្រោងនឹងផលិតបទចម្រៀងថ្មីៗសម្រាប់កូនខ្មែរ និងរូបលោកផ្ទាល់ឱ្យបាន។
ជាចុងក្រោយ តារាវ័យក្មេងរូបនេះក៏បានថ្លែងអំណរគុណដល់អ្នកគាំទ្រទាំងអស់ ដែលបានស្រឡាញ់ និងគាំទ្រចម្រៀងលោក និងជាពិសេសផងដែរនោះ តារាចម្រៀងរូបនេះគ្រោងនឹងផលិតជាវីដេអូចម្រៀងដែលធានាថា នឹងទាក់ចិត្តយុវវ័យខ្លាំងបំផុតនៅពេលឆាប់ៗខាងមុខនេះ៕
October 25, 2017
អ្នកនាង អ៊ុំ គន្ធា បកស្រាយរឿងសមត្ថកិច្ចចាប់ ពាក់ព័ន្ធរឿងសេពគ្រឿងញៀន
ថ្មីៗនេះ អតីតតារាចម្រៀងយេយេក្នុងអំឡុងទសវត្សរ៍ 90 អ្នកនាង អ៊ុំ គន្ធា ត្រូវបានសមត្ថកិច្ចឃាត់ខ្លួន ហើយបញ្ជូនទៅកាន់ប៉ុស្ដិ៍នគរបាលខណ្ឌឬស្សីកែវ រាជធានីភ្នំពេញ ដោយសង្ស័យថា អ្នកនាងកំពុងសម្ងំប្រើប្រាស់គ្រឿងញៀន។ ដោយឡែក បន្ទាប់ពីត្រូវបានចាប់ខ្លូនរួចមក តារាស្រីរូបនេះបានចេញមុខបកស្រាយតាមរយៈវីដេអូ Live របស់ Facebook Page មួយកាលពីយប់មិញនេះ។
អ្នកនាង អ៊ុំ គន្ធា បានអះអាងថា ដំបូងឡើងអ្នកនាងចង់ផឹកស្រាមួយកែវ ហើយក៏ត្រូវកូនប្រុសយកស្រាមួយកែវនោះចាក់ចោល ធ្វើឱ្យអ្នកនាងខឹងសម្បាយ៉ាងខ្លាំង ក៏រត់ចេញពីផ្ទះ។ នៅពេលនោះអ្នកនាងចង់ផឹកស្រាខ្លាំងណាស់ អ្នកនាងក៏បានជួបនឹងបុរសម្នាក់ដែលជាអ្នកដើររើសកំប៉ុងអេតចាយ និងបានសួរនាំគ្នា និយាយត្រូវគ្នា ក៏បាននាំគ្នាទៅផឹកស្រានៅក្នុងផ្ទះគាត់នៅម្ដុំចំណុចក្រោមលូទឹកស្អុយតែម្ដង។ អ្នកនាងបានបន្ដទៀតថា ខណៈដែលអ្នកនាងកំពុងសម្រាកនៅក្រោមលូនោះ អ្នកនាងមិនដឹងថា នៅខាងលើផ្ទះនោះមានអ្នកណាធ្វើសកម្មភាពអ្វីឡើយ លុះដល់ឮសំឡេងក្ឌុងក្ឌាំងនៅខាងលើ ទើបផ្អើលឈូឆរឡើងតែម្ដង។
គួរបញ្ជាក់ផងដែរថា អតីតារាចម្រៀងសិចស៊ីរូបនេះ បាននិយាយថា អ្នកនាងមិនបានពាក់ព័ន្ធជាមួយគ្រឿងញៀនអ្វីទេ តែដោយសារពេលសមត្ថកិច្ចចុះរុករក ហើយប្រទះឃើញអ្នកនាងនៅក្រោមលូនោះតែម្ដង។ អ្នកនាងបានបញ្ជាក់ថា អ្នកនាងមិនពាក់ព័ន្ធអ្វីនឹងគ្រឿងញៀននោះទេ។ អ្នកនាងនិយាយថា ដោយសារខ្លួនមានជំងឺឈឺឆ្អឹងខ្នង និងមានបំណងរត់ចោលកូនៗ ព្រោះមិនចង់ឱ្យកូនលំបាក និងមករងទុក្ខវេទនាក្នុងការមើលថែទាំ និងរស់នៅជាមួយអ្នកនាងតែប៉ុណ្ណោះ៕
October 25, 2017
ទូច ស្រីល័ក្ខ ជួបគ្រោះថ្នាក់ចរាចរណ៍កាលពីយប់មិញនេះ
នៅថ្ងៃទី25 ខែតុលា ឆ្នាំ2017 វេលាម៉ោង 1 : 20 នាទី រំលងអធ្រាត តារាចម្រៀង និងសម្ដែង ទូច ស្រីល័ក្ខ បានជួបគ្រោះថ្នាក់ចរាចរណ៍ដោយបានបុកម៉ូតូហុងដាឌ្រីម125 CC សេរ៊ីឆ្នាំ2012 ពណ៌ខ្មៅ ក្នុងទិសដៅបញ្ច្រាសគ្នា ដោយអូសម៉ូតូជនរងគ្រោះទៅឆ្ងាយជិត 1 គីឡូម៉ែត្រ ទើបឈប់រថយន្ដដោះស្រាយភ្លាមៗ។
ប្រភពដែលសារព័ត៌មានឡារ៉ែនទទួលបាន បានឱ្យដឹងថា អ្នកនាង ទូច ស្រីល័ក្ខ បានចេញដំណើរពីពិធីខួបកំណើតរបស់ខ្លួននៅលើបណ្ដោយផ្លូវ 217 (ផ្លូវព្រះមុនីរ៉េត) ក្នុងល្បឿនលឿនល្មមក្នុងទិសដៅពីត្បូងទៅជើង។ លុះមកដល់ចំណុចផ្លូវកោងច្រមុះជ្រូកស្ទឹងមានជ័យ អ្នកនាងក៏បានបត់ឡើងមកផ្លូវវេងស្រេង ស្របពេលគ្នានោះស្រាប់តែម៉ូតូរបស់ជនរងគ្រោះបានបត់ចេញមកយ៉ាងលឿន ហើយមកវាក់អ៊ើនឹងរថយន្ដរបស់អ្នកនាង ទើបបណ្ដាលឱ្យដួលកៀបជាប់នឹងរថយន្ដរបស់អ្នកនាង ហើយអូសទៅមុខឡើងជិត 1 គីឡូម៉ែត្រ ទើបអាចបញ្ឈប់រថយន្ដបាន។
គួរបញ្ជាក់ផងដែរថា បន្ទាប់ពីកើតហេតុការណ៍ភ្លាមៗ លោក ប៉ែន ចំរ៉ុង បានមកដល់កន្លែងកើតហេតុ និងសូមធ្វើជាតំណាងដោះស្រាយបញ្ហាជូនអ្នកនាង ទូច ស្រីល័ក្ខ ព្រមទាំងជូនជនរងគ្រោះដែលមានរបួសស្រាលទៅមន្ទីរពេទ្យ ហើយទទួលជួសជុលម៉ូតូជនរងគ្រោះឱ្យស្អាតឡើងវិញ ព្រោះមិនចង់បន្ដរឿងវែងឆ្ងាយនាំតែរំខានសមត្ថកិច្ចដោះស្រាយ៕

October 25, 2017
តារាចម្រៀងសិចស៊ីអម្លុងទសវត្ស90 អ្នកនាង អ៊ំ គន្ធា ត្រូវសមត្ថកិច្ចចាប់ខ្លួន ករណីប្រើប្រាស់គ្រឿងញៀន
នៅព្រឹកថ្ងៃទី 24 ខែ តុលា ឆ្នាំ2017 នេះ អតីតតារាចម្រៀងសិចស៊ីអម្លុងទសវត្ស90 អ្នកនាង អ៊ំ គន្ធា ត្រូវបានសមត្ថកិច្ចឃាត់ខ្លួន និងបញ្ជូនទៅកាន់ប៉ុស្ដិ៍នគរបាល ខណ្ឌឬស្សីកែវ ដោយជាប់ពាក់ព័ន្ធនឹងករណីគ្រឿងញៀន ដែលបានបង្កជាច្រើនលើកច្រើនសារ។ ប្រភពដែលសារព័ត៌មាន ឡារ៉ែន ទទួលបាន បានឱ្យដឹថា តារាស្រីរូបនេះ កន្លងមកធ្លាប់ត្រូវបានបញ្ជូនទៅមន្ទីរកែប្រែផងដែរ ក៏ប៉ុន្ដែដោយឡែក តារាសិចស៊ីរូបនេះត្រូវបានសមត្ថកិច្ចឃាត់ខ្លួនជាថ្មីម្ដងទៀត នៅវេលាម៉ោង 11 ព្រឹកថ្ងៃនេះ ដោយសង្ស័យថា នាងបានសេបគ្រឿងញៀន។
គួរបញ្ជាក់ផងដែរថា នៅចំណុចកើតហេតុម្ដុំ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ មន្ត្រីសមត្ថកិច្ចឃាត់ខ្លួនបាន មនុស្សចំនួន 3នាក់ រួមទាំងតារាស្រីសិចស៊ីរូបនេះ បានសំងំប្រើប្រាស់គ្រឿងញៀននៅទីនោះ។ ខណៈនេះអ្នកនាង អ៊ំ គន្ធា ត្រូវបានសមត្ថកិច្ចបញ្ជូនទៅប៉ុស្ដិ៍នគរបាលខណ្ឌ ឬស្សីកែវ ដើម្បីសួរនាំ និងចាត់ចែងតាមនិតិវិធីច្បាប់៕
October 24, 2017