Author: អេបិល

Aguero រឹងមាំក្នុងការចូលលេងឲ្យ Man City ក្រោយមានបញ្ហាសុខភាព
Sergio Aguero ពិតជារីករាយក្នុងការបង្ហាញខ្លួនឲ្យក្រុម Manchester City នៅលើទឹកដីក្រុម Leicester City ក្នុងការប្រកួតក្របខ័ណ្ឌ Premier League នៅថ្ងៃសៅរ៍នេះ បើទោះបីមានការបារម្ភពីបញ្ហាសុខភាពក្នុងពេលបំពេញកាតព្វកិច្ចអន្តរជាតិក៏ដោយ។
ខ្សែប្រយុទ្ធរូបនេះត្រូវបានបញ្ជូនទៅកាន់មន្ទីរពេទ្យ ដើម្បីការពារទុកជាមុន ក្រោយពីត្អូញត្អែរពីការវិលមុខ ខណៈដែលក្រុមបាល់ទាត់ជម្រើសជាតិអាហ្សង់ទីន បានចាញ់ក្រុមជម្រើសជាតិនីហ្សេរីយ៉ា 4-2 ក្នុងការប្រកួតមិត្តភាពនៅទីក្រុង Krasnodar របស់រុស្ស៊ី កាលពីថ្ងៃអង្គារ។ Man City បានធ្វើការច្រានចោលព័ត៌មានដែលថា Aguero សន្លប់បាត់ស្មារតី ក្រោយពីការអស់កម្លាំងខ្លាំង ដោយបានបញ្ជាក់ថា រូបគេថែមទាំងអាចចាកចេញពីកីឡដ្ឋាន ដោយមិនត្រូវការជំនួយទៀតផង។ រូបគេបានវិលទៅកាន់ទីក្រុង Manchester វិញដើម្បីធ្វើការត្រួតពិនិត្យសុខភាពបន្ថែមទៀត កាលពីថ្ងៃពុធ ស្របពេលដែលឈាមមួយដំណក់ក្នុងសម្ពាធឈាមរបស់គេត្រូវបានគេជឿជាក់ថា ជាដើមហេតុដែលធ្វើឲ្យគេធ្លាក់ខ្លួនឈឺ។ លោក Pep Guardiola ដែលជាអ្នកចាត់ការទូទៅ បានតាមដានការត្រួតពិនិត្យយ៉ាងយកចិត្តទុកដាក់ទៅលើ Aguero ចាប់តាំងពីពេលនោះមក ប៉ុន្តែ រូបគេបានចូលរួមហ្វឹកហាត់ជាមួយនឹងមិត្តរួមក្រុមរបស់ខ្លួនកាលពីថ្ងៃព្រហស្បតិ៍ និងថ្ងៃសុក្រនេះ ហើយត្រូវបានរំពឹងទុកថា នឹងចូលលេងនៅកីឡដ្ឋាន King Power។ Aguero បានស្ថិតក្នុងទម្រង់លេងយ៉ាងល្អឥតខ្ចោះ នៅមុនពេលសម្រាកសម្រាប់ការប្រកួតអន្តរជាតិ ដោយរកបាន10គ្រាប់ពីការប្រកួត12លើកសម្រាប់ក្លិបរបស់គេ ខណៈដែល Man City បានទទួលជ័យជម្នះ16លើកពីការប្រកួត17លើកក្នុងរាល់យុទ្ធនាការទាំងអស់ នៅរដូវកាលនេះ។
Man City កំពុងតែស្ថិតក្នុងទម្រង់លេងយ៉ាងរឹងមាំ ដោយបានកក់កៅអីរួចជាស្រេចក្នុងក្របខ័ណ្ឌ Champions League វគ្គ16ក្រុមចុងក្រោយ តាមរយៈការផ្តួល Napoli 4-2 មុនពេលផ្តួលក្រុម Arsenal 3-1 ដើម្បីធ្វើឲ្យពួកគេនាំមុខ8ពិន្ទុដាច់លើតារាង Premier League។ ការប្រកួតនេះនឹងចាប់ផ្តើមនៅម៉ោង10យប់៕
ប្រភពពី៖ Sky Sports
November 17, 2017
តោខៀវ Chelsea រីករាយចំពោះការធ្វើដំណើរទៅជួប West Brom ថ្ងៃសៅរ៍នេះ
ក្រុមតោខៀវ Chelsea អាចនឹងទុកការចាប់ផ្តើមដ៏ខកចិត្តចំពោះការការពារពាន Premier League របស់ខ្លួនមួយឡែក តាមរយៈការបន្តកំណត់ត្រាឈ្នះរបស់ពួកគេនៅលើទឹកដីក្រុម West Bromwich Albion នៅថ្ងៃសៅរ៍នេះ។
ក្រុមរបស់លោក Antonio Conte កំពុងតែដេញតាមពីក្រោយក្រុម Manchester City រហូតដល់ទៅ9ពិន្ទុ ក្រោយពីការប្រកួត11លើក។ ប៉ុន្តែ ក្រុមម្ចាស់ការពារតំណែងជើងឯកមួយនេះ បានឈ្នះរាល់ការប្រកួតលីកទាំង4លើកចុងក្រោយរបស់ពួកគេ ហើយអាចនឹងឡើងចេញពីចំណាត់ថ្នាក់លេខ4 ទៅកាន់ចំណាត់ថ្នាក់លេខ2 ប្រសិនបើក្រុម Manchester United និង Tottenham ដែលកំពុងតែឈរពីលើពួកគេ មិនអាចដណ្តើមបានជ័យជម្នះពីការប្រកួតរបស់ពួកគេ។ លោក Conte បានឃើញក្រុមរបស់លោករងបរាជ័យយ៉ាងខកចិត្តក្រោមស្នាដៃក្រុម Roma ក្នុងក្របខ័ណ្ឌ Champions League កាលពីចុងខែមុន ប៉ុន្តែ ការយកឈ្នះលើក្រុម Manchester United 1-០ ក្នុងការប្រកួតក្របខ័ណ្ឌ Premier League បានបង្ហាញថា មិនមានការខកចិត្តដ៏ធំពីប្រទេសអ៊ីតាលី នៅតែកើតឡើងក្នុងក្រុមមួយនេះទៀតឡើយ។ ស្របពេលជាមួយគ្នានេះ ខ្សែបម្រើស្លាប Victor Moses ក៏បានគិតបែបនោះផងដែរ។ Moses បានឲ្យដឹងថា៖ «ក្នុងនាមជាក្រុមមួយ ទោះបីជាមានអ្វីកើតឡើងក៏ដោយ ក៏យើងនៅតែស្ថិតនៅជាមួយគ្នា និងធ្វើឲ្យបានល្អបំផុតតាមដែលយើងអាច។ មនុស្សជាច្រើនមិនមានការរីករាយ ប៉ុន្តែ យើងមិនត្រូវគិតពីបញ្ហានោះ ឬផ្តោតលើអ្វីដែលមនុស្សជាច្រើនកំពុងតែនិយាយឡើយ»។
ខ្សែបម្រើរូបនេះបានបន្ថែមទៀតថា៖ «ការរិះគន់ទាំងនេះ គឺជាប្រភេទនៃកត្តាដែលធ្វើឲ្យកីឡាករម្នាក់ៗកាន់តែរឹងមាំ។ យើងដឹងថា យើងត្រូវតែជឿជាក់លើខ្លួនយើង និងបង្ហាញឲ្យពួកគេឃើញថា ពួកគេកំពុងតែយល់ខុស។ យើងមានសាមគ្គីភាព100ភាគរយ។ យើងដូចជាបងប្អូនអ៊ីចឹងនៅទីនេះ»។ ការប្រកួតនេះនឹងចាប់ផ្តើមនៅម៉ោង10យប់៕
ប្រភពពី៖ sports.yahoo.com

November 17, 2017
Justin Bieber និង Selena Gomez គ្រោងទិញផ្ទះតម្លៃរាប់លានដុល្លារនៅរដ្ឋ California
នៅថ្ងៃទី17 ខែវិច្ឆិកា ឆ្នាំ2017 បើតាមសារព័ត៌មាន keng14 បានចេញផ្សាយឱ្យដឹងថា នាប៉ុន្មានសបា្ដហ៍មុននេះតារាចម្រៀង Justin Bieber និង Selena Gomez បានបង្ហើបប្រាប់សារព័ត៌មានបរទេសថា អ្នកទាំងពីរគ្រោងនឹងទិញផ្ទះប្រណីតមួយដែលមានតម្លៃរាប់លានដុល្លារសហរដ្ឋអាមេរិក ស្ថិតនៅក្នុងតំបន់មួយក្នុងរដ្ឋ California ដើម្បីចំណាយពេលវេលាដ៏មានន័យ រស់នៅជុំគ្នាជារៀងរហូត។
នៅក្នុងនេះ បើយើងមើលតាមការចេញផ្សាយរបស់ទស្សនាវដ្ដីល្បីមួយរបស់អាមេរិក ក៏បានឱ្យដឹងបន្ថែមដែរថា តារាពីរដួងនេះព្យាយាមបំពេញការរស់នៅតាមលក្ខណៈសាមញ្ញៗ និងសម្របខ្លួនតាមធម្មជាតិ ពោលគឺ ពួកគេចូលចិត្តទៅតំបន់ឆ្ងាយៗ ហើយមានធម្មជាតិខៀវស្រស់ត្រកាល។ ប្រភពស្និទ្ធនឹងJB ក៏បានអះអាងថា គម្រោងទិញផ្ទះរបស់គេក៏ស្ថិតនៅក្បែរតំបន់ភ្នំផងដែរ។
គួរបញ្ជាក់ដែរថា ថ្មីៗនេះជីវិតឯកជនរបស់ Selena Gomez និង Justin Bieber ហាក់បីដូចជាមានសេចក្ដីសុខខ្លាំងបំផុត ដែលគេបានសង្កេតមើលទៅ ទំនងជានេះគឺជាពេលវេលាចុងក្រោយនៃការថែរក្សាសុខភាពរបស់ Selena Gomez អ៊ីចឹងដែរ។ ក្រុមគ្រួសារ និងមនុស្សជំនិតរបស់ Selena Gomez បានថ្លែងប្រាប់សារព័ត៌មានបរទេសកន្លងមក អំពីទំនាក់ទំនងជាថ្មីជាមួយ Justin Bieber ថា «ពួកយើងចង់ឱ្យនាងខ្លួនឯងមានសុខភាពល្អ ហើយនេះក៏ជាកំហុសដ៏ធ្ងន់មួយនៅក្នុងជីវិតរបស់ពួកយើងផងដែរ អ្វីដែលអាចធ្វើបាន គឺដើម្បីសុខភាពនាង»៕

November 17, 2017
ទស្សនាសម្រស់ពិតរបស់បវរកញ្ញាផែនដី Miss Earth 2017 នៅលើទឹកដីប្រទេសកម្ពុជា
តាមរយៈសារព័ត៌មាន Kenh 14 ដែលបានចេញផ្សាយនៅថ្ងៃទី16 ខែវិច្ឆិកា ឆ្នាំ2017 មុននេះបន្ដិចបានឱ្យដឹងថា បរវកញ្ញាផែនដី ឬ Miss Earth 2017 កញ្ញា Karen Ibasco បានធ្វើដំណើរចេញពីព្រលានយន្ដហោះអន្ដរជាតិ Tan Son Nhat នៅក្នុងប្រទេសវៀតណាម មកកាន់ប្រទេសកម្ពុជាហើយ។
កញ្ញា Karen Ibasco ជាជនជាតិហ្វីលីពីនដែលបានជាប់ជយលាភីប្រឡងការប្រកួតបវរកញ្ញាផែនដី Miss Earth 2017 ព្រមទាំងបានគ្រងមកុដដ៏មានតម្លៃទៀតផងនោះបានធ្វើដំណើរមកកាន់ប្រទេសវៀតណាម ហើយបានជួបរាក់ទាក់សំណេះសំណាលជាមួយបវរកញ្ញាផែនដីតំណាងប្រទេសវៀតណាម មុនពេលដែលនាងត្រូវចេញដំណើរមកកាន់ប្រទេស កម្ពុជា បន្ដទៀត។
ដោយឡែកតាមរយៈរូបថតមួយសន្លឹកដែលបានដកស្រង់ពីបណ្ដាញសង្គម Facebook បានឱ្យដឹងថា ដំណើររបស់បវរMiss Earth 2017រូបនេះ នឹងត្រូវបានទទួលស្វាគមន៍ពីសំណាក់សណ្ឋាគារ Naga World ដូច្នេះដើម្បីឱ្យកាន់តែជាក់ច្បាស់បន្ថែមថា សម្រស់ពិតៗរបស់ម្ចាស់មកុដ Miss Earth 2017 នៅលើទឹកដីកម្ពុជា ស្រស់ស្អាតខុសពីការរិះគន់កម្រិតណានោះ សូមប្រិយមិត្តទាំងអស់ទស្សនារូបភាពទាំងឡាយខាងក្រោមនេះ៖
November 16, 2017
កញ្ញា ឌី លីណា សង្ឃឹមថា នឹងមិនមានបាតុភូតចម្លែកអ្វីកើតឡើងពេលថតរឿង ភូមិគ្រឹះ100ល្បិច
នៅថ្ងៃទី15 ខែវិចិ្ឆកា ឆ្នាំ2017 កញ្ញា ឌី លីណា ឬនៅក្នុងចង្កោមពិភពសិល្បៈគេនិយមហៅថា ម៉ែគ្រូ និងជាតារាសម្ដែងនៅក្នុងរឿងភាគក្នុងស្ថានីយទូរទស្សន៍ជាច្រើននោះ បានបង្ហាញពីអារម្មណ៍ភ័យព្រួយជាខ្លាំង ខណៈនាងបានក្លាយជាតួអង្គខ្មោចស្រីនៅក្នុងរឿង”ភូមិគ្រឹះ100ល្បិច” របស់ស្ថានីយទូរទស្សន៍ប៉ុស្ដិ៍លេខ5។ នេះបើតាមការផ្ដល់សម្ភាសជាមួយអ្នកយកព័ត៌មាននៃគេហទំព័រ ឡារ៉ែន នាថ្ងៃក្រុងពាលីរឿង។
ក្នុងពិធីក្រុងពាលីរឿង “ភូមិគ្រឹះ100ល្បិច” កញ្ញា ឌី លីណា បាននិយាយថា នៅក្នុងរឿងនេះនាងសម្ដែងជាតួអង្គខ្មោចឈ្មោះនាងម៉ារ៉ា ដែលបានបង្កប់នូវល្បិចពិសពុលកាច់កុង ប្រកួតប្រជែងគ្នា ធ្វើយ៉ាងណាឱ្យស្នេហារបស់ខ្លួនបានសម្រេច ហើយតំណែងតួអង្គមួយនេះបានធ្វើឱ្យនាងកំពុងតែមានការព្រួយបារម្ភជាខ្លាំង នៅពេលនាងទទួលបានដំណឹងថា ធ្លាប់មានតារាសម្ដែងមួយចំនួនជួបនឹងបញ្ហាអបិយជំនឿ និងមានវិញ្ញាណចូលសណ្ឋិតពិតប្រាកដមែនទៀតផង។
នាងនិយាយថា «នាងខ្ញុំមានក្ដីព្រួយបារម្ភខ្លាំងណាស់ ព្រោះកន្លងមកនាងខ្ញុំធ្លាប់តែសម្ដែងជាតួអង្គធម្មតា មានចរិតស្លូតបូត មិនមែនជាតួអង្គខ្មោច ដល់បានទទួលសម្ដែងជាតួខ្មោចបែបនេះ នាងខ្ញុំបារម្ភខ្លាចថា ពុំធ្លាប់មានបទពិសោធ និងទេពកោសល្យក្នុងការសម្ដែងជាតួខ្មោចដែលតម្រូវឱ្យនាងខ្ញុំត្រូវសិក្សាយកបទពិសោធ និងតិចនិកបន្ថែម ពីចរិតរបស់ខ្មោចតាមរយៈភាពយន្ដបរទេសនានា »។
អ្វីដែលសំខាន់បំផុតនោះគឺ នាងមានក្ដីបារម្ភខ្លាចមានវិញ្ញាណចូលសណ្ឋិតពិតប្រាកដ ព្រោះកន្លងមកនាងក៏ធ្លាប់ជួបបញ្ហាបែបនេះ នៅពេលនាងទៅកន្លែងទីសក្ការៈបូជានានាម្ដងរួចមកហើយ។ កញ្ញា ឌី លីណា បញ្ជាក់ផងដែរថា «កន្លងមកខ្លួនខ្ញុំផ្ទាល់ធ្លាប់មានវិញ្ញាណចូលសណ្ឋិតពិតប្រាកដម្ដងរួចមកហើយ គ្រាន់តែវិញ្ញាណនោះជាវិញ្ញាណល្អ មិនមែនអាក្រក់។ ទោះជាយ៉ាងក៏ដោយ ក៏ខ្ញុំចេះតែបារម្ភខ្លះៗដែរ ខណៈពេលថតរឿងជាតួអង្គខ្មោចបែបនេះ ដូច្នោះហើយទើបនៅពេលថតម្ដងៗ ខ្ញុំត្រូវតែធ្វើការបន់ស្រន់ម្ចាស់ទឹកម្ចាស់ដី គ្រូបាធ្យាយជាមុន។ ហើយនាងខ្ញុំសង្ឃឹមថា វានឹងមិនមានរឿងអ្វីកើតឡើងនៅពេលថតឡើយ»៕

November 16, 2017
អស្ចារ្យ!! ក្រុមបាល់ទាត់តារាកម្ពុជា “Mohahang All Star” ត្រៀមខ្លួនប៉ះជាមួយក្រុមតារាថៃ
ថ្មីៗនេះ នាឱកាសពិសេសនៃការសម្ពោធក្រុមបាល់ទាត់តារាមហាហង្សដែលបានប្រកាសឈ្មោះជាផ្លូវការថា “Mohahang All Star Football Team” ជាក្រុមដែលប្រមូលផ្ដុំដោយតារាសម្ដែង និងក្រុមការងារបច្ចេកទេសផ្នែកសិល្បៈ ក្រោមវត្តមានកិត្តិយសពី លោក អ៊ិន សុភិន អគ្គនាយកផលិតកម្មមហាហង្ស និងក្រុមពាណិជ្ជករថៃពីបណ្តាក្រុមហ៊ុនជាច្រើនៗ រួមទាំងវត្តមានក្រុមតារាប្រុស-ស្រីជាច្រើនទៀត។
នៅក្នុងពិធីខាងលើនេះលោក អ៊ិន សុភិន បានប្រកាសនៅមុខក្រុមអ្នកសារព័ត៌មានថា គោលបំណងដែលជំរុញឲ្យលោកសម្រេចបង្កើតក្រុមបាល់ទាត់ជាផ្លូវការនៅពេលនេះ ព្រោះលោកចង់ផ្ដល់ឱកាសឲ្យក្រុមតារាៗ និងក្រុមការងារបច្ចេកទេសផ្សេងៗ ដែលនិយមចូលចិត្តលេងកីឡាបាល់ទាត់មួយនេះ ទើបលោកបង្កើតឱ្យមានជាក្រុមលេងច្បាស់លាស់ និងមានការប្រកួតត្រឹមត្រូវ សមស្របទៅតាមក្បួនច្បាប់ប្រកួតជាលក្ខណៈអន្ដរជាតិឡើង។
លើសពីនេះ លោកក៏បានបង្ហាញពីក្ដីរំពឹងវែងឆ្ងាយពីការបង្កើតក្រុមមួយនេះផងដែរ។ តែជំហានដំបូង លោកគ្រោងនឹងទទួលស្វាគមន៍គ្រប់ការប្រកួតមិត្តភាពទាំងអស់ មិនថាក្រុមតារាល្បីៗ ស្ថាប័នរដ្ឋ ឬឯកជនឡើយ ពោលគឺអាចចូលរួមប្រកួតយកពានសមល្មមមួយ ដើម្បីជាបទពិសោធឆ្ពោះទៅចូលលេងជាមួយក្រុមពាក់កណ្ដាលខ្លាំង។
ជាចុងក្រោយម្ចាស់ផលិតកម្ម មហាហង្សរូបនេះក៏បានបញ្ជាក់ប្រាប់ថា «នៅដើមឆ្នាំ2018ខាងមុខនេះ ផលិតកម្មមហាហង្ស នឹងរៀបចំព្រឹត្តិការណ៍ដ៏អស្ចារ្យមួយទៀតគឺ ការប្រកួតមិត្តភាពរវាងក្រុមបាល់ទាត់តារាមហាហង្ស និងក្រុមតារាល្បីៗប្រចាំប្រទេសថៃ នៅលើទឹកដីកម្ពុជា ហើយជាបន្ដបន្ទាប់ លោកក៏មានគម្រោងណាត់ក្រុមតារាល្បីៗរបស់វៀតណាម ឡាវ និងក្រុមតារាក្នុងតំបន់ មកចូលរួមប្រកួតមិត្តភាពនៅកម្ពុជាទៀតផង»៕

November 16, 2017
ក្រុមបេក្ខនារី Miss Global ជាប់ចិត្តអាហារខ្មែរនៅក្នុងភោជនីយដ្ឋាន One More
កាលពីរាត្រីថ្ងៃទី14 ខែវិច្ឆិកា ឆ្នាំ2017កន្លងទៅ ភោជនីយដ្ឋាន One More មានកិតិ្តយសបានរៀបចំ និងទទួលស្វាគមន៍ចំពោះដំណើរទស្សនកិច្ចរបស់ក្រុមបេក្ខនារី Miss Global 2017 ដើម្បីភ្លក្សរសជាតិម្ហូបអាហារខ្មែរដ៏ឆ្ងាញ់ជាប់មាត់មិនអាចបំភ្លេចបាន ក្នុងព្រឹត្តការណ៍លំដាប់ពិភពលោកមួយនេះ ដែលបានរៀបចំជាពិសេស និងសម្រិតសម្រាំងស្នាដៃដោយចុងភៅឯកប្រចាំភោជនីយដ្ឋាន រួមមានអាហារ និងភេសជ្ជៈជាច្រើនមុខផងដែរ។
កាន់តែពិសេសជាងនេះទៅទៀត ក្រុមបេក្ខនារីបវរកញ្ញាទាំង 65 រូបដែលមកពីបណ្ដាប្រទេសនានាបានទទួលនូវឱជារសម្ហូបអាហារដែលចម្អិនពីបន្លែធម្មជាតិដែលពុំធ្លាប់បានទទួលទានពីមុនមក ព្រមទាំងមានការទទួល និងសាទរយ៉ាងរាក់ទាក់ពីសំណាក់ភ្ញៀវគាំទ្រអាហារនៅទីនោះក្នុងការថតរូបសែលហ្វីជាមួយគ្នាទៀតផង។
ជំនួយការអ្នកគ្រប់គ្រងភោជនីយដ្ឋាន One More លោក ម៉េង ហុង បានប្រាប់អ្នកសារព័ត៌មានឡារ៉ែន ឱ្យដឹងថា ដោយសារតែនៅក្នុងភោជនីយដ្ឋាន One More មានបម្រើជូននូវសេវាកម្មម្ហូបអាហារខ្មែរ និងធ្លាប់មានកេរ្ដិ៍ឈ្មោះល្បីល្បាញជាងគេនៅក្នុងរាជធានីភ្នំពេញនេះ ពោលគឺមិនថាតែម្ហូបអាហារ និងការតុងតែងរបស់ភោជនីយដ្ឋាននោះទេ គឺយើងខ្ញុំផ្ដោតសំខាន់ទៅលើរចនាប័ទ្មបែបខ្មែរ និងមានស្ដង់ដារកម្រិតអន្ដរជាតិ ដែលបើកស្វាគមន៍ទាំងភ្ញៀវជាតិ និងអន្ដរជាតិទៀតផងនោះ ទើបធ្វើឱ្យហាងយើងខ្ញុំទទួលបានការគាំទ្រយ៉ាងច្រើនកុះករបែបនេះ។ បុរសសម្បុរសកូនកាត់ចិន និងជាជំនួយការអ្នកគ្រប់គ្រងហាងរូបនេះ បានបន្ដទៀតថា «ក្រុមបេក្ខនារីបវរកញ្ញាពិភពលោក បានធ្វើដំណើរមកកាន់ប្រទេសកម្ពុជា ប្រាកដជាចង់ភ្លក្សនូវរសជាតិអាហារប្លែកៗ រសជាតិដើមឆ្ងាញ់ៗរបស់ខ្មែរយើងជាក់ជាមិនខាន ដោយសារតែនៅទីនេះមានអាហារប្រណីតៗបែបខ្មែរយ៉ាងសម្បូរបែប យើងបានរៀបចំជាពិសេសសម្រាប់ទទួលក្រុមបរវកញ្ញាពិភពលោក ឬ Miss Global 2017 នារាត្រីតែម្ដង»។
ជាចុងក្រោយ លោកក៏បានបញ្ជាក់ប្រាប់ទៀតដែរថា ព្រោះតែការជឿទុកចិត្តពីអតិថិជនទាំងអស់ដែលបានគាំទ្រ ចំពោះឱជារសម្ហូបអាហារ និងសេវាកម្មនៅភោជនីយដ្ឋាន One More ទើបធ្វើឱ្យអ្នកគ្រប់គ្រង និងរៀបចំកម្មវិធី Miss Global 2017 ជ្រើសរើសយកទីនេះ ព្រមទាំងមានទំនុកចិត្តលើថ្វីដៃចុងភៅប្រចាំភោជនីយដ្ឋានប្រណីតមួយនេះ សម្រាប់ធ្វើការភ្លក្សអាហារជាពិសេសដែលមិនធ្លាប់មានពីមុនមក។ លោកសង្កត់ធ្ងន់បន្ថែមទៀតថា «រសជាតិអាហារបែបខ្មែរនៅក្នុងភោជនីយដ្ឋាន One More ពិតជាទាក់ទាញក្រុមបេក្ខនារីបវរកញ្ញាពិភពលោកឱ្យពិសាបានច្រើន និងសរសើរមិនដាច់ពីមាត់ទៀតផង»៕

November 15, 2017
មិត្តស្រី តៅ មីងស៊ឺ រំឭកអតីតអាពាហ៍ពិពាហ៍របស់នាង
បើតាមរយៈសារព័ត៌មាន kenh14 នៅថ្ងៃទី15 ខែវិចិ្ឆកា ឆ្នាំ2017 បានចេញផ្សាយឱ្យដឹងថា មិត្តស្រីរបស់ តៅ មីងស៊ឺ ឬមានឈ្មោះពិតថា Yan Cheng Xu គឺតារាស្រីល្បីឈ្មោះ Lin Chi Ling បានរំឭកពីអាពាហ៍ពិពាហ៍របស់នាងកាលពីអតីតកាលនៅថ្ងៃម្សិលមិញនេះដោយការបង្ហោះរូបភាពជាច្រើនសន្លឹកដែលនៅពេលនោះមានតារាចិនហុងកុង និងតៃវ៉ាន់ចូលរួមអបអរយ៉ាងច្រើនកុះករ និងដែលបានបង្កឱ្យមានភាពភ្ញាក់ផ្អើលជាខ្លាំងដល់អ្នកគាំទ្រ ខណៈដែលនាងកំពុងមានស្នេហាជាមួយអតីតប្រុសស្អាត F4 តៅ មីងស៊ឺ។
គួររំឭកផងដែរថា តារាប្រុស Yan Cheng Xu(តៅ មីងស៊ឺ) និងនាង Lin Chi Ling បានចំណាយពេលអស់12ឆ្នាំមកហើយក្នុងការបង្កើតទំនាក់ទំងស្នេហាផ្អែមល្ហែមជាមួយគ្នាក្រោយពេលអាពាហ៍ពិពាហ៍របស់ខាងស្រីបាក់បែករួចមក តែមិនទាន់ឈានដល់ការរៀបអាពាហ៍ពិពាហ៍នៅឡើយ ហើយស្រាប់តែម្សិលមិញនេះ តារាស្រីខាងលើនេះបានបញ្ចេញរូបភាពជាច្រើនសន្លឹកដែលនាងបានរៀបអាពាហ៍ពិពាហ៍ជាមួយអតីតមិត្តប្រុសរបស់នាងគឺលោក Huang Xiao ming ព្រមទាំងអមដោយសារខ្លីៗថា “នឹករឮកឈុតរៀបការ និងផ្កា ព្រមទាំងកាយវិការនៅគ្រានោះខ្លាំងណាស់ “។
ការបង្ហោះរូបភាពកាលពីអតីតកាល និងសារខ្លីៗបែបនេះ ធ្វើឱ្យសាធារណជនអ្នកគាំទ្រមានការភ្ញាក់ផ្អើល និងងឿងឆ្ងល់យ៉ាងខ្លាំងថា តើការពោលពាក្យសម្ដីបែបនេះមានន័យយ៉ាងណា?។ ដើម្បីឱ្យកាន់តែជ្រាបច្បាស់ សូមទស្សនារូបភាពទាំងឡាយខាងក្រោមនេះ៖
November 15, 2017
Miss Global ស្ងើចសរសើរប្រាសាទសំបូរព្រៃគុក មិនដាច់ពីមាត់
បន្ទាប់ពីក្រុមបេក្ខនារីបវរកញ្ញាពិភពលោក ឬ Miss Global 2017 បានធ្វើដំណើរទៅទស្សនកិច្ចនៅតំបន់រមណីយដ្ឋានប្រាសាទសំបូរព្រៃគុកដែលជាសម្បត្តិបេតិកភណ្ឌពិភពលោក ដែលបានបង្ហាញឱ្យឃើញពីអរិយធម៌ដ៏ខ្ពង់ខ្ពស់ល្បីល្បាញតាំងពីសម័យបុរាណកាលរាប់ពាន់ឆ្នាំមកហើយនោះ ក្រុមបេក្ខនារីបវរកញ្ញាពិភពលោកបានដក់ដិតជាប់អារម្មណ៍រំភើប ស្ញប់ស្ញែងជាមួយសោភ័ណភាពដ៏ស្រស់ត្រកាលនាបរិវេណប្រាសាទ។
បើតាម Facebook Page របស់ Miss Global និងក្រសួងទេសចរណ៍ បានឱ្យដឹងបន្ថែមថា ក្រុមបវរកញ្ញាពិភពលោក បានបន្លឺនូវសំឡេងសារស័ព្ទស្ញប់ស្ញែងជាខ្លាំង នៅពេលបានឃើញប្រាង្គប្រាសាទតូចធំជាច្រើន និងព្រៃព្រឹក្សាដ៏ខៀវស្រងាត់ អមដោយសំឡេងបក្សីបក្សាស្រែកច្រៀងសាទរចំពោះវត្តមានរបស់ពួកគេ ប្រៀបបានទៅនឹងជីវិតបវរកញ្ញាឯកក្នុងរាជវាំងសម័យចេនឡា នៃអាណាចក្រខ្មែរបុរាណដូច្នោះដែរ។
យ៉ាងណាមិញស្នាមញញឹមបិទមាត់មិនជិតរបស់ក្រុមបវរកញ្ញាទាំង65ប្រទេសទាំងនេះ ពិតជាស័ក្តិសមនឹងទេសភាពក្នុងតំបន់ប្រាសាទសំបូរព្រៃគុកនេះខ្លាំងណាស់ ព្រោះការរចនាតុបតែងលម្អដោយក្បាច់ក្បូរបស់វិចិត្រករសម័យបុរាណ ដែលបន្សល់លើប្រាង្គប្រាសាទនីមួយៗ គឺកាន់តែធ្វើឲ្យសម្រស់របស់ក្រុមបវរកញ្ញា លេចធ្លោខុសប្លែកជាងពេលណាៗទាំងអស់។
គួរបញ្ជាក់ផងដែរថា ប្រទេសកម្ពុជាយើងមានកិត្តិយសធ្វើជាម្ចាស់ផ្ទះ ក្នុងការរៀបចំកម្មវិធីប្រកួតប្រជែងបវរកញ្ញាឯក Miss Global 2017 ដោយមានការចូលរួមពីបេក្ខភាពស្រស់ស្អាត65នាក់ មកពីបណ្តាប្រទេសនាៗ ជុំវិញពិភពលោក។ ក្នុងនោះផងដែរ បវរកញ្ញាឯកចក្រវាលតំណាងឲ្យកម្ពុជា គឺកញ្ញា យស ប៉ូលីណា ក្រោយពីឆ្លងកាត់វគ្គប្រឡងជាច្រើនក្នុងកម្មវិធី Miss Global 2017 ពេលនេះ នាងកំពុងត្រូវការការជួយគាំទ្រជាចាំបាច់ ពីសំណាក់បងប្អូនប្រិយមិត្តខ្មែរ យើងក្នុងការបោះឆ្នោត ដើម្បីឲ្យកញ្ញាទទួលបានជយលាភីពានរង្វាន់ Best National Beauty ដែលនឹងប្រកាសនៅថ្ងៃទី17 ខែវិច្ឆិកា 2017 ខាងមុខនេះ៕
November 15, 2017
អាំ ផាត់ឆារ៉ាផា ធ្វើពិធីខួបកំណើតឱ្យអ្នកនាង អ៊ែន ថងប្រាក់សុម
ពិតជាបរិយាកាសដ៏កម្ររកបានមែន បើតាមរយៈសារព័ត៌មាន Mthai ដែលបានចេញផ្សាយនៅថ្ងទី15 ខែវិច្ឆិកា ឆ្នាំ2017 ប៉ុន្មានម៉ោងមុននេះបន្ដិចបានឱ្យដឹងថា នៅថ្ងៃម្សិលមិញនេះ គឺជាថ្ងៃកំណើតរបស់តារាស្រីជើងចាស់ និងបច្ចុប្បន្នជាអ្នកដឹកនាំរឿងភាគល្បីៗ គឺអ្នកនាង អ៊ែន ថងប្រាក់សុម។ ហើយកាន់តែពិសេសជាងនេះទៅទៀតគឺ មានវត្តមានតារាស្រីល្បីឈ្មោះលំដាប់ជួរមុខ នាង អាំ ផាត់ឆារ៉ាផា មកចូលរួមក្នុងកម្មវិធី ព្រមទាំងជូនកាដូនំ Cake ដ៏ស្រស់ស្អាតមួយទៀតផង ដែលកាន់តែបង្កបរិយាកាសឱ្យអ្នកនាង អ៊ែន ថងប្រាក់សុម កាន់តែរំភើបចិត្តរកពាក្យអ្វីមកនិយាយលែងចេញតែម្ដង។
កម្មវិធីខួបកំណើតលើកនេះត្រូវបានរៀបចំឡើងជាលក្ខណៈគ្រួសារតែប៉ុណ្ណោះ ពោលគឺមិនមានតារាល្បីៗ ឬមិត្តជិតស្និទ្ធមកចូលរួមជួបជុំជាមួយគ្នាឡើយ។ តែដោយឡែក តារាស្រី អាំ ផាត់ឆារ៉ាផា ក៏មានចំណែកក្នុងការរៀបចំកម្មវិធីនេះឡើងដែរ និងថែមទាំងមិនបានប្រាប់ឱ្យអ្នកនាង អ៊ែន ថងប្រាក់សុម សាមីខ្លួនបានដឹងមុនទៀតផង។
បើតាមសារព័ត៌មានខាងលើបានបង្ហើបប្រាប់ឱ្យដឹងទៀតថា តារាស្រីទាំងពីរដួងនេះកំពុងតែរួមកិច្ចការងារជាមួយគ្នានៅពីក្រោយឆាក គ្រាន់តែមិនទាន់បានបញ្ចេញឱ្យមហាជនដឹងជាផ្លូវការប៉ុណ្ណោះ។ ដើម្បីឱ្យកាន់តែជាក់ច្បាស់បន្ថែមទៀត សូមទស្សនារូបភាពទាំងឡាយនៅក្នុងកម្មវិធីខួបកំណើត អ្នកនាង អ៊ែន ថងប្រាក់សុម ខាងក្រោមនេះ៖
November 15, 2017