Author: អេបិល

សមាជិកក្រុមចម្រៀង Maroon 5 បង្ហាញរូបអាក្រាតគូទជាមួយកូនស្រីដ៏សែន Cute
នៅថ្ងៃទី23 ខែវិច្ឆិកា ឆ្នាំ2017 នេះ តាមរយៈសារព័ត៌មាន Kenh 14 បានឱ្យដឹងថា នៅលើបណ្ដាញទំនាក់ទំនងសង្គមអ៊ីនស្ដាក្រាមរបស់សមាជិកក្រុមម៉ូដែល Angels Victoria’s Secret គឺអ្នកនាង Behati Prinsloo បានបង្ហោះរូបភាពស្វាមីអ្នកនាង និងកូនស្រីជាទីស្រឡាញ់ ក្នុងសភាពអាកា្រតកាយលេចកំប៉េះគូទ បង្ហាញឱ្យអ្នកគាំទ្ររូបនាង និងស្វាមីភ្ញាក់ផ្អើលចំពោះភាពសិចស៊ីនេះ។
គួរបញ្ជាក់ផងដែរថា សមាជិកក្រុមចម្រៀង Maroon 5 លោក Adam Levine បានរៀបអាពាហ៍ពិពាហ៍ជាមួយអ្នកនាង Behati Prinsloo អស់រយៈពេល 3 ឆ្នាំហើយ ទើបតែមានកូនស្រីដ៏សែន Cute មួយនេះតែប៉ុណ្ណោះ នាងតូចមានឈ្មោះថា Dusty Rose។ យ៉ាងណាមិញតារាប្រុសរូបនេះ ក៏ធ្លាប់បានប្រាប់អ្នកសារព័ត៌មានថា «ខ្ញុំចង់បង្កើតកូនឱ្យបានច្រើន ហើយខ្ញុំនឹងរំភើបចិត្តបំផុត ប្រសិនបើភរិយាខ្ញុំអាចបង្កើតកូនបានដល់ទៅ 100 នាក់។ ខ្ញុំចូលចិត្តចំពោះការដែលមានកូនច្រើនបែបនេះ»៕
November 23, 2017
ប៊ី សុធារី ត្រូវការកម្លាំងចិត្តពីបងប្អូនខ្មែរ ព្រោះនៅសល់តែ 4 ថ្ងៃទៀតទេ
នៅសល់តែ 4 ថ្ងៃទៀតទេ គឺជាថ្ងៃដែលបវរកញ្ញាឯក ប៊ី សុធារី នឹងត្រូវឡើងប្រកួតលើវេទិកាលំដាប់អន្ដរជាតិ Miss Universe 2017 វគ្គចុងក្រោយដែលនឹងប្រព្រឹត្តទៅនៅថ្ងៃទី27 វិច្ឆិកា ឆ្នាំ2017 ខាងមុខនេះ ។ បើតាមរយៈហ្វេសប៊ុកផ្លូវការរបស់ Miss Universe Cambodia បានឱ្យដឹងថា នេះជាលើកដំបូងក្នុងកម្មវិធីប្រកួតបវរកញ្ញាចក្កវាឡ ដែលប្រទេសកម្ពុជាមានកិត្តិយសបានទៅបង្ហាញវត្តមាននៅក្នុងកម្មវិធីមួយនេះដែរ ដែលវាមិនមែនជារឿងងាយស្រួលឡើយ។
បន្ទាប់ពីបានគ្រងតំណែងជាជយលាភីកញ្ញាឯកកម្ពុជាឆ្នាំ 2016 កញ្ញា ប៊ី សុធារី បានត្រៀមលក្ខណៈជាច្រើនដូចជាកម្លាំងចិត្ត និងបញ្ញាស្មារតីសម្រាប់ចូលរួមក្នុងការប្រកួតកម្មវិធីមួយនេះអស់រយះពេលជិតមួយឆ្នាំមកហើយ។
នាងបានបង្កើនភាពស្និទ្ធស្នាលយ៉ាងខ្លាំងជាមួយគ្រូបង្វឹករបស់នាងដែលមិនមែនត្រឹមតែជាភ្នាក់ងាររៀបចំកម្មវិធីកញ្ញាឯកកម្ពុជានោះទេ។ នាងបានធ្វើដំណើរទៅប្រទេសហ្វីលីពីនដើម្បីធ្វើការហ្វឹកហាត់បន្ថែមក្នុងការដើរបង្ហាញម៉ូដ រួមទាំងការហ្វឹកហាត់ឆ្លើយសំនួរដែលទាក់ទងនឹងកម្មវិធីប្រកួតផងដែរ។
កញ្ញា ប៊ី សុធារី បានបញ្ជាក់ប្រាប់ថា «ខ្ញុំពិតជាសប្បាយរីករាយណាស់ដែលបានទទួលការគាំទ្រយ៉ាងច្រើនពីសំណាក់ប្រជាជនខ្មែរទាំងអស់ នាងខ្ញុំនឹងធ្វើអ្វីៗគ្រប់យ៉ាងដែលខ្ញុំអាចធ្វើបានឱ្យអស់ពីសមត្ថភាពដើម្បីក្លាយជាកញ្ញាឯកតំណាងប្រទេសកម្ពុជាដ៏មានតម្លៃរបស់ប្រទេសដ៏ស្រស់ស្អាតរបស់យើង។ នាងខ្ញុំនៅតែសំណូមពរ សូមឱ្យអ្នកទាំងអស់គ្នានៅតែបន្តការគាំទ្ររូបនាងខ្ញុំបន្តទៀត»។
គួរបញ្ជាក់បន្ថែមផងដែរថា ខណៈនេះកញ្ញា ប៊ី សុធារី កំពុងត្រូវការកម្លាំងចិត្តពីបងប្អូនខ្មែរយើងជាខ្លាំងក្នុងការបោះឆ្នោតគាំទ្ររូបនាងដើម្បីឱ្យបានជាប់បន្ដជា Miss Popular Vote ដែលនឹងជាប់ដោយស្វ័យប្រវត្តិទៅវគ្គចុងក្រោយ ព្រោះថា នៅសល់តែ 4 ថ្ងៃទៀតប៉ុណ្ណោះ។ ដូច្នេះសូមចូលរួមបោះឆ្នោតលើកទឹកចិត្ត និងគាំទ្ររូបនាងទាំងអស់គ្នាផង តាមរយៈLink ៖ vote.missuniverse.com ៕

November 23, 2017
Barca និង Chelsea ទៅវគ្គ16ក្រុម ខណៈ Man Utd ចាញ់លើទឹកដី Basel
ក្រុម Barcelona និង Chelsea បានកក់កៅអីរបស់ពួកគេរៀងៗខ្លួនទៅកាន់វគ្គ16ក្រុមចុងក្រោយនៃក្របខ័ណ្ឌ Champions League កាលពីថ្ងៃពុធ ប៉ុន្តែក្រុមបិសាចក្រហម Manchester United បានរងបរាជ័យដ៏មិននឹកស្មានដល់ក្នុងលទ្ធផល 1-០ នៅលើទឹកដីក្រុម Basel។
ក្រុម Barcelona បានបញ្ចប់ក្នុងលទ្ធផលស្មើ ០-០ ជាមួយនឹងក្រុម Juventus ក្នុងទីក្រុង Turin ដើម្បីទទួលបាន1ពិន្ទុ ដែលគ្រប់គ្រាន់ក្នុងការជួយឲ្យពួកគេឈានទៅវគ្គបន្តក្នុងនាមជាក្រុមឈរលេខ1ក្នុងពូល D បើទោះបី Lionel Messi ត្រូវបានដាក់ឲ្យលេងក្នុងនាមជាកីឡាករបម្រុងក៏ដោយ។ ស្របពេលជាមួយគ្នានេះ ក្រុម Chelsea ក៏បានឈានទៅវគ្គបន្តដោយសុវត្ថិភាពដែរ ក្រោយពីបានផ្តួលក្រុម Qarabag របស់អាស៊ែបៃហ្សង់ យ៉ាងបរិបូណ៌ក្នុងលទ្ធផល 4-០ ដើម្បីរក្សាការឈរលេខ1ក្នុងពូល C ពីលើក្រុម Roma ដែលបានចាញ់ក្រុម Atletico Madrid 2-០ នៅថ្ងៃដដែលនោះដែរ។ ប៉ុន្តែ ក្រុម Man Utd ដែលហាក់ដូចជាកំពុងស្ថិតនៅលើផ្លូវក្នុងការទទួលបានពិន្ទុដែលត្រូវការជាចាំបាច់ក្នុងការបានកក់កៅអីទៅវគ្គ16ក្រុមចុងក្រោយទៅហើយនៅក្នុងប្រទេសស្វ៊ីសនោះ ស្រាប់តែត្រូវបានកីឡាករ Michael Lang រកគ្រាប់បាល់ឈ្នះឱ្យក្រុម Basel បាននៅនាទីទី89 ធ្វើឱ្យពួកគេខកចិត្តយ៉ាងខ្លាំង។
ក្រុមរបស់លោក Antonio Conte បានឈានទៅវគ្គ16ក្រុមចុងក្រោយ ខណៈដែលនៅសល់តែ1មួយប្រកួតទៀត ក្រោយការបង្ហាញពីទម្រង់លេងយ៉ាងល្អពីសំណាក់ខ្សែបម្រើឆ្នើម Eden Hazard និង William នាកីឡដ្ឋាន Olympic ស្របពេលដែលជ័យជម្នះនេះបានទម្លាក់ក្រុម Qarabag របស់អាស៊ែបៃហ្សង់ ចេញពីយុទ្ធនាការនេះតែម្តង។ Hazard បានឲ្យដឹងថា៖ «យើងពិតជាធ្វើបានល្អមែន។ យើងគួរតែរកបានគ្រាប់បាល់ច្រើនជាងនេះ។ វាពិតជារឿងដ៏ងាយស្រួលណាស់ក្នុងការលេងជាមួយនឹងកីឡាករឆ្នើមៗទាំងនេះ»៕
ប្រភពពី៖ The Sun
November 23, 2017
លោក Emery ផ្តោតលើការជួប Bayern ក្រោយ PSG បំបាក់ Celtic ចាស់ដៃ
លោក Unai Emery គ្រូបង្វឹករបស់ក្រុម Paris Saint-Germain បានជំរុញឲ្យក្រុមរបស់លោករក្សាការផ្តោតអារម្មណ៍ទៅលើការប្រកួតក្នុងយុទ្ធនាការក្របខ័ណ្ឌ Champions League វគ្គចែកពូលរបស់ពួកគេ ក្រោយពីតារាឆ្នើម Neymar បានជួយឲ្យក្រុមរបស់ខ្លួនបំបាក់ក្រុម Celtic យ៉ាងចាស់ដៃ កាលពីថ្ងៃពុធម្សិលមិញ។
ក្រុម PSG បានធ្វើការវាយបកដេញតាមពីក្រោយដើម្បីផ្តួលក្រុមម្ចាស់ជើងឯកស្កុតឡេនមួយនេះ ក្នុងលទ្ធផល 7-1 នាកីឡដ្ឋាន Parc des Princes ក្រោមការបង្ហាញពីទម្រង់លេងយ៉ាងល្អរបស់ Neymar ដែលបានស៊ុតបាល់បញ្ចូលទី2គ្រាប់ ក្រោយពីខ្សែប្រយុទ្ធ Moussa Dembele បានជួយឲ្យក្រុម Celtic មានគ្រាប់បាល់នាំមុខមុន។ ខ្សែប្រយុទ្ធ Edinson Cavani បានស៊ុតបាល់បញ្ចូលទី2គ្រាប់ផងដែរ ស្របពេលដែល Kylian Mbappe, Marco Verratti និង Dani Alves រកបានម្នាក់1គ្រាប់ដូចគ្នា ដើម្បីធ្វើឲ្យក្រុមរបស់ពួកគេរកបានគ្រាប់បាល់សរុប24គ្រាប់ក្នុងវគ្គចែកពូល ខណៈដែលនៅសល់តែ1ប្រកួតទៀតប៉ុណ្ណោះក្នុងពូល B របស់ពួកគេ។ ការទទួលជ័យជម្នះកាលពីថ្ងៃពុធ ក៏ជាការទទួលជ័យជម្នះដ៏ធំផុតរបស់ PSG ផងដែរក្នុងយុទ្ធនាការនេះ ក្រោយពីបានបំបែកកំណត់ត្រាកាលពីមុនរបស់ពួកគេ គឺការយកឈ្នះ 7-2 លើក្រុម Rosenborgកាលពីខែតុលា ឆ្នាំ2០០០ ដែលនៅពេលនោះខ្សែប្រយុទ្ធ Nicolas Anelka បានស៊ុតបាល់បញ្ចូលទី2គ្រាប់។
ខណៈដែលបានឈានទៅវគ្គ16ក្រុមចុងក្រោយរួចស្រេចហើយមុនពេលការប្រកួតនេះ PSG នឹងសម្លឹងរកការឈ្នះកៅអីលេខ1ក្នុងពូល B ពីលើក្រុម Bayern Munich នៅពេលដែលពួកគេធ្វើដំណើរទៅកាន់អាល្លឺម៉ង់ សម្រាប់ការប្រកួតចុងក្រោយក្នុងពូលរបស់ពួកគេនៅខែក្រោយ៕ លោក Emery បានឲ្យដឹងថា៖ «Bayern គឺជាក្រុមដ៏ខ្លាំងមួយ។ វានឹងក្លាយជាការសាកល្បងដ៏ល្អមួយ។ ពួកគេស្ថិតក្នុងចំណោមក្រុមដែលអាចឈ្នះពាន Champions League»៕
ប្រភពពី៖ Sport24
November 23, 2017
ម៉េង កែវពេជ្ជតា រិះគន់រូបិយប័ណ្ណថ្មីម៉ាទំហឹង
នៅថ្ងៃទី22 ខែវិច្ឆិកា ឆ្នាំ 2017 ម្សិលមិញនេះ តាមរយៈបណ្ដាញទំនាក់ទំនងសង្គមហ្វេសប៊ុករបស់ អ្នកនាង ម៉េង កែវពេជ្ជតា បានទម្លាយសាររិះគន់រូបិយប័ណ្ណក្រដាសប្រាក់ដែលទើបតែចេញថ្មីថា ងាយភាន់ច្រឡំ ងាយវង្វេងវង្វាន់ក្នុងការចាយវាយ។ សាររបស់អ្នកនាងហាក់បីដូចជាបានរិះគន់ទៅកាន់ធនាគារជាតិ និងរាជរដ្ឋាភិបាលចំៗតែម្ដងដើម្បីសុំឱ្យពិចារណារឿងនេះឡើងវិញ។
នៅក្នុងនោះដែរតារាចម្រៀងស្រីជើងចាស់ និងមានឈ្មោះល្បីរូបនេះបានរៀបរាប់នៅលើហ្វេសប៊ុកថា «និយាយពីរឿង រូបិយប័ណ្ណ ( លុយ ) នៅស្រុកខ្ញុំវិញ ម្តេចក៏មានច្រើនរូប ច្រើនបែបម្ល៉េះ? ចំនួនទឹកប្រាក់តែមួយ ប៉ុន្តែមានរូបរាង ពណ៌ រូបភាព ទំហំផ្សេងៗគ្នា ធ្វើឱ្យអ្នកចាយមានការវង្វេងវង្វាន់ភាន់ច្រឡំ។ នេះសម្រាប់ប្រជាពលរដ្ឋខ្មែរផង ចុះទម្រាំជនបរទេសទៀត តើគេនឹងពិបាកសម្គាល់យ៉ាងណាទៅ? ខ្ញុំមិនដឹងថា នេះជាគោលការណ៍សេដ្ឋកិច្ចអ្វីទេ តែខ្ញុំឆ្ងល់មែនទែន ព្រោះមិនដែលឃើញលុយ អាមេរិក បារាំង អូស្ត្រាលីអី គេដូរញឹកញាប់ដូច្នេះផង គឺទាល់តែយូរណាស់ ទើបដូរម្តង…ឆ្ងល់…»។
សូមជម្រាបផងដែរថា នៅខាងក្រោមសាររបស់អ្នកនាង ម៉េង កែវពេជ្ជតា គេសង្កេតឃើញមានមតិមហាជនជាច្រើននាក់ បានចូលមកគាំទ្រសាររបស់អ្នកនាង ព្រមទាំងសម្ដែងការមិនពេញចិត្តដូចគ្នាដែរ៕
November 23, 2017
ទស្សនាពីរបៀប Make Up ទម្រង់មុខឱ្យដូចតារាចម្រៀង CL
ដូចដែលគេហទំព័រ ឡារ៉ែន ធ្លាប់បានជម្រាបជូនប្រិយមិត្តអ្នកគាំទ្រកម្ពុជាទាំងអស់រួចហើយថា កំពូលតារាចម្រៀងកូរ៉េ កញ្ញា CL នឹងមកអង្រួនឆាកប្រគំតន្រ្តីខ្នាតយក្សក្នុងបរិវេណកោះពេជ្រដែលនឹងប្រារព្ធឡើងនៅថ្ងៃទី9 ខែធ្នូ ខាងមុខនេះ ដែលនាំមកជូនដោយក្រុមហ៊ុន Smart ។ ដូច្នេះប្រាកដណាស់ ច្បាស់ជាមានអ្នកគាំទ្រជាច្រើននាក់ទន្ទឹងរង់ចាំវត្តមានរបស់កំពូលតារាចម្រៀងរូបនេះ ហើយក៏ប្រាកដជាចង់ដឹងអំពីរបៀបផាត់ទម្រង់មុខឱ្យស្អាតដូចជាកញ្ញា CL ដែរមិនខាន។
គួរបញ្ជាក់ថា ការប្រគំតន្រី្ត Smart Mega Concert នេះក៏មានការចូលរួមពីក្រុមតារាចម្រៀង Original Song ជាច្រើនដួង រួមមានកញ្ញា Nikki Nikki , Small World Small Band , លោក P-Sand , កញ្ញា ADda , លោក ថេណា , Bros La , ក្រុម SWSB និងក្រុម Mustaches Band ….ផងដែរ។
ដូច្នេះដើម្បីឱ្យកាន់តែជាក់ច្បាស់ និងបានឃើញឱ្យច្បាស់អំពីរបៀបផាត់មុខឱ្យដូចតារាចម្រៀងរូបស្អាត CL នោះ សូមទស្សនាវីដេអូខាងក្រោមដូចតទៅ៖
https://www.youtube.com/watch?v=8PcE8txixIg
November 22, 2017
កំពូលតារាចម្រៀង Jay Park ទម្លាយរឿងអាថ៌កំបាំងនៅក្នុងចិត្ត
នៅថ្ងៃទី22 ខែវិច្ឆិកា ឆ្នាំ2017 នេះ តាមរយៈសារព័ត៌មាន Koreaboo បានចេញផ្សាយបានឱ្យដឹងថា ថ្មីៗនេះ កំពូលតារាចម្រៀងកូរ៉េ Jay Park ទើបតែបានបញ្ចេញរូបភាពដែលថត និងផ្ដល់បទសម្ភាសជាមួយទស្សនាវដ្ដី បុរស ឬ Men’s Magazine។
នៅក្នុងជំនួបជាមួយទស្សនាវដ្តីខាងលើ លោកត្រូវបានតម្រូវឱ្យឆ្លើយតបបទសម្ភាស អំពីនារីនៅក្នុងក្ដីសុបិនដែលបានលាក់ទុកជាអាថ៌កំបាំងនៅក្នុងចិត្តលោកជាយូរមកហើយ និងអ្វីដែលសំខាន់នោះគឺរឿង គូអនាគត ព្រោះថាមកទល់ពេលនេះ តារាប្រុសរូបនេះនៅមិនទាន់មានគូស្នេហ៍នៅឡើយ។
បើនិយាយពីរឿងស្នេហា តារាប្រុសរូបសង្ហាម្នាក់នេះប្រាប់ថា «ខ្ញុំមិនបានលង់ងប់ងល់ជាមួយស្នេហាគ្រាដំបូងឡើយ តែប្រសិនបើខ្ញុំប្រាថ្នាចង់ទាក់ទងនរណាម្នាក់ ខ្ញុំនឹងចាប់ផ្ដើមផ្សារភ្ជាប់ទំនាក់ទំនងនោះជាមួយគេម្ដងបន្តិចៗ និងកាន់តែខ្លាំងឡើងៗ»។ ចុះខណៈមានស្នេហា តើនារីប្រភេទណាដែលលោកប្រាថ្នាចង់មានក្ដីស្នេហ៍ពិតប្រាកដជាមួយនាង? នេះ គឺជាសំណួររបស់ទស្សនាវដ្តីដដែលនោះ។
កំពូលតារាចម្រៀង Jay Park បានឆ្លើយបញ្ជាក់បន្ថែមថា «ទោះជាយ៉ាងណាក្ដី នារីដែលគួរតែក្លាយជាមិត្តស្រី ឬក៏ជានារីម្នាក់ដែលអាចចូលមករស់នៅក្នុងក្រុមគ្រួសារខ្ញុំបាន លុះត្រាតែខ្ញុំបានដកពិសោធចិត្តគ្នាក្នុងរយៈពេលដ៏យូរមួយ និងជានារីដែលមានការខិតខំប្រឹងប្រែងបង្ហាញពីសញ្ញានៃក្ដីស្រឡាញ់ចំពោះគ្នាទៅវិញទៅមក នោះទើបជាស្នេហាប្រាកដប្រជារបស់ខ្ញុំ»៕
November 22, 2017
នី រតនា ឡើងកូដ ដូររថយន្ដប្រណីត Mazda ថ្មីសន្លាងមែនឬ?
នៅថ្ងៃទី21 ខែវិច្ឆិកា ឆ្នាំ2017 នេះ តាមរយៈបណ្ដាញទំនាក់ទំនងសង្គមហ្វេសប៊ុករបស់ម្ចាស់ពានកម្មវិធីប្រកួតចម្រៀងលំដាប់ថ្នាក់ពិភពលោក Cambodian iDol រដូវកាលទី 1 លោក នី រតនា បានបង្ហោះរូបភាពមួយសន្លឹក និងសារដ៏មានអត្ថន័យនៅក្នុងជីវិតឱ្យមហាជនបានដឹង។ រូបភាពមួយសន្លឹកនោះបានស្ដែងឱ្យឃើញថា លោកកំពុងតែឈរនៅពីមុខឡានទំនើបមួយគ្រឿងម៉ាក Mazda ខុសពីពេលកន្លងមកដែលលោកជិះឡាន Lexus RX 350 នៅឡើយ។
តារាចម្រៀងប្រចាំផលិតកម្មហង្សមាសបានរៀបរាប់ថា «យើងអាចនឹងកើតមក មិនបានរស់នៅលើគំនរទ្រព្យដូចគេក៏ពិតមែន ក៏ប៉ុន្តែអ្វីដែលយើងយកមកជាមួយនោះ គឺទេពកោសល្យ នឹងជំនាញពិសេសផ្ទាល់ខ្លួន។ ទ្រាំបន្តិចទៀត! ប្រឹងបន្តិចទៀត! តស៊ូបន្តិចទៀត! យើងនឹងឈានទៅដល់គោលដៅរបស់យើងជាក់ជាមិនខាន…»។
សារព័ត៌មាន ឡារ៉ែន បានព្យាយាមសុំការបកស្រាយបញ្ជាក់ពីលោក នី រតនា តាមរយៈសារអេឡិចត្រូនិក និងត្រូវបានលោកបញ្ជាក់ប្រាប់មកវិញថា «នោះមិនមែនជារថយន្ដរបស់ខ្ញុំទេបង! ការពិត គឺជារថយន្ដសម្រាប់ថតរឿងភាគថ្មី ដែលមានចំណងជើងថា ”រាជបុត្រកង្កែប“ ទេ»៕
November 22, 2017
គង់ ចាន់ស្រីមុំ និងស្វាមីបរិច្ចាគថវិកាផ្ទាល់ខ្លួនជួយសាងសង់ខ្លោងទា្វរសាលាដូង
បន្ទាប់ពីបានបាត់មុខមួយរយៈពីពិភពសិល្បៈ ពីការសម្ដែង MV វីដេអូចម្រៀង ស្ប៉តពាណិជ្ជកម្ម ក៏ដូចជារឿងភាគទូរទស្សន៍ និងកំពុងទទួលបានជោគជ័យលើមុខជំនួញនោះ ថ្មីៗនេះសារព័ត៌មាន ឡារ៉ែន ទទួលបានដំណឹងថា អ្នកនាងគង់ ចាន់ស្រីមុំ និងស្វាមី គឺលោក សីហា បានបរិច្ចាគថវិកាផ្ទាល់ខ្លួនចំនួន 7,77០ ,០០០ រៀល ក្នុងគោលបំណងជួយសាងសង់ខ្លោងទ្វារសាលាដូងបន្ថែម ដែលមានប្រវែង 150 ម៉ែត្រ និងជួយឧបត្ថម្ភដល់ជីវភាពក្មេងកំព្រាជាច្រើននាក់ឲ្យបានចៀសផុតពីដើរការសុំទានតាមផ្លូវ ព្រមទាំងឧបត្ថម្ភជំនួយដល់មនុស្សចាស់ជរាទៀតផង។
សូមជម្រាបថា ខ្លោងទ្វារសាលាដូងដែលគ្រោងនឹងសាងសង់បន្ថែមប្រវែង 150 ម៉ែត្រនេះ នឹងត្រូវធ្វើទ្បើងពីឈើ និងសម្បកកំប៉ុងអេតចាយ។ យ៉ាងណាមិញ ក៏មានសាងសង់បន្ថែមនូវរោងប្រក់ស្បូវមួយខ្នងសម្រាប់ក្រុមមនុស្សចាស់ជរាដែលមានទំហំ 12ម៉ែត្រផងដែរ។
នាឱកាសដ៏វិសេសវិសាលខាងលើ តារាស្រីរូបនេះក៏បាននាំយកនូវថវិកា សារុង ក្រមា និងនំនែកមួយចំនួនទៅចែកជូនលោកតា លោកយាយ និងកុមារៗនៅទីនោះផងដែរ។
អ្នកនាង គង់ ចាន់ស្រីមុំ បានរៀបរាប់នៅលើបណ្ដាញសង្គមហ្វេសប៊ុកយ៉ាងដូច្នេះថា «នាងខ្ញុំពិតជារំភើប និងរីករាយខ្លាំងណាស់ដែលបានជួយដល់សាលាដូងគិរីរម្យ និងមនុស្សចាស់ជរា ក្មេងៗដែលស្នាក់នៅក្នុងទីនេះឱ្យចៀសផុតពីការសុំទាននៅតាមដងផ្លូវ។ វាគ្រាន់តែជាមួយចំណែកតូចមួយដែលនាងខ្ញុំអាចជួយដល់សង្គមរបស់យើងប៉ុណ្ណោះ ហើយនាងខ្ញុំក៏សូមអរគុណផងដែរទៅដល់ក្រុមការងារ និងមិត្តភ័ក្តិទាំងអស់ រួមទាំងពុកម៉ែបងប្អូនដែលតែងតែគាំទ្រនាងខ្ញុំកន្លងមក។ សូមផ្ញើសេចក្តីស្រឡាញ់មួយនេះនៅក្នុងដួងចិត្តអ្នកគ្រប់គ្នាផង»។
គួរបញ្ជាក់ផងដែរថា សាលាដូង គឺជាមណ្ឌលសប្បុរសធម៌ដែលប្រមែប្រមូល និងជួយដល់កុមារកំព្រា និងចាស់ជរាដែលគ្មានទីពំនាក់។ នៅក្នុងសាលាដូង មានថ្នាក់រៀនសម្រាប់កុមារកំព្រាដែលមិនចេះអក្សរ មានរោងសម្រាប់ស្នាក់នៅ និងចិញ្ចឹមមើលថែទាំជនកំព្រាទាំងនោះទៀតផង។ សាលាដូងអាចរស់នៅបានដល់សព្វថ្ងៃនេះគឺ ដោយសារការជួយឧបត្ថម្ភពីសំណាក់សប្បុរសជននានា។ សាលាដូងមិនរើសអើងចំពោះអំណោយ ឬជំនួយឡើយ សូម្បីដែលរបស់របរចាស់ៗដែលលែងប្រើហើយ សម្បកកំប៉ុងអេតចាយ(សំរាម) ឬអ្វីក៏ដោយ ក៏សាលាដូងទទួលយកដែរ។ សាលាដូងសព្វថ្ងៃមាន 2 សាខា គឺទីមួយនៅកោះដាច់ និងទីពីរនៅឧទ្យានជាតិគីរីរម្យ៕
November 22, 2017
គម្រោងទឹកស្អាតនៅកម្ពុជា ផ្គត់ផ្គង់បានត្រឹមតែជាង2លានគ្រួសារប៉ុណ្ណោះ
ភ្នំពេញ៖ យោងតាមគេហទំព័រ Country Meters ដែលជាគេហទំព័រដ៏ធំមួយសម្រាប់រាប់ចំនួនមនុស្សនៅលើពិភពលោកបានឱ្យដឹងថា មកទល់ពេលបច្ចុប្បន្ន ប្រជាជនខ្មែរមានចំនួនប្រមាណជា 16,181,734 នាក់ ប៉ុន្តែក្នុងចំណោមប្រជាជនខ្មែរទាំងអស់នោះ មានប្រមាណតែជាង 2លានគ្រួសារប៉ុណ្ណោះដែលទទួលបានទឹកស្អាតប្រើប្រាស់។
ក្រសួងឧស្សាហកម្ម និងសិប្បកម្មបានបង្ហាញរបាយការណ៍ថ្មីមួយឱ្យដឹងថា ការផ្គត់ផ្គង់ទឹកស្អាតនៅទីប្រជុំជនបានកើនឡើងគួរឱ្យកត់សម្គាល់ ជាពិសេសអត្រាគ្របដណ្តប់នៃការផ្គត់ផ្គង់ទឹកស្អាតតាមប្រព័ន្ធបណ្តាញនៅទីប្រជុំជនបានកើនឡើងពី52% នៅឆ្នាំ2008 ដល់68,5% នៅឆ្នាំ2012 និង86% នៅឆ្នាំ2017 ដោយគិតជាចំនួនគ្រួសារដែលទទួលបានទឹកស្អាតប្រើប្រាស់កើនដល់ 2.300.000គ្រួសារ។
ឯកឧត្តមទេសរដ្ឋមន្រ្តី ចម ប្រសិទ្ធ រដ្ឋមន្រ្តីក្រសួងឧស្សាហកម្ម និងសិប្បកម្មបានឱ្យដឹងថាសម្រាប់ប្រជាពលរដ្ឋក្រីក្រដែលមានប្រាក់ចំណូលតិចនឹងទទួលបានការប្រើប្រាស់ទឹកស្អាតដែលមានតម្លៃថោកក្នុងកម្រិតអប្បបរមា ព្រមទាំងកំណត់តម្លៃទឹកស្អាតលក់ជូនម្ចាស់ផ្ទះ ឬម្ចាស់អគារដែលមានបន្ទប់ជួលឱ្យកម្មករ-កម្មការិនី បុគ្គលិក សិស្ស-និស្សិត (ប្រមាណ 131.020 បន្ទប់) ក៏ទទួលបានការផ្គត់ផ្គង់ទឹកស្អាតពីបំពង់ចែកចាយរបស់រដ្ឋក្នុងតម្លៃថោកសមរម្យដូចគ្នាដែរ។ លើសពីនោះ ប្រជាពលរដ្ឋក្រីក្រមួយចំនួនក្នុងរាជធានីភ្នំពេញក៏ទទួលបានការឧបត្ថម្ភធនក្នុងការតភ្ជាប់បណ្តាញទឹកស្អាតដែលគិតមកដល់បច្ចុប្បន្ននេះមានចំនួនប្រមាណជាង 3ម៉ឺនគ្រួសារ។
ឯកឧត្តមបន្តថា ការជំរុញឱ្យមានការចូលរួមរបស់ផ្នែកឯកជន គឺជាយុទ្ធសាស្រ្តដ៏សំខាន់របស់រដ្ឋាភិបាលក្នុងការប្រមូលធនធានសម្រាប់ការវិនិយោគលើការអភិវឌ្ឍក្នុងវិស័យផ្គត់ផ្គង់ទឹកស្អាត។ ការពង្រីកសមត្ថភាពផលិត និងលើកទឹកចិត្តឱ្យមានការចូលរួមពីផ្នែកឯកជន ក្នុងការវិនិយោគលើវិស័យផ្គត់ផ្គង់ទឹកស្អាត គឺជាយុទ្ធសាស្ត្រមួយដែលក្រសួងឧស្សាហកម្ម និងសិប្បកម្មតែងបានប្រកាន់ខ្ជាប់។ ផ្តើមចេញពីនយោបាយនេះ វិស័យឯកជនបានចូលរួមចំណែកយ៉ាងសកម្មផងដែរនៅតាមបណ្តាទីរួមខេត្ត និងទីប្រជុំជននានាដែលមានប្រជាជនរស់នៅចាប់ពី300 ដល់5.000គ្រួសារ។
គួររំឭកថា នៅមុនឆ្នាំ2008 ក្រុមហ៊ុនឯកជនវិនិយោគលើប្រព័ន្ធផ្គត់ផ្គង់ទឹកស្អាតមានតែ76ទីប្រជុំជនប៉ុណ្ណោះ តែបច្ចុប្បន្ននេះបានកើនដល់222ទីប្រជុំជន។ កំណើននេះដោយសារមានការចូលរួមពីវិស័យឯកជន និងកិច្ចសហប្រតិបត្តិការលើការអនុវត្តគម្រោងក្រោមជំនួយឥណទាន, ជំនួយកម្ចីហិរញ្ញប្បទានរបស់អង្គការ និងដៃគូអភិវឌ្ឍន៍នានា តាមរយៈ´អង្គការ JICA, អង្គការ UN-HABITAT, កម្មវិធីទឹកស្អាត និងអនាម័យនៃធនាគារពិភពលោក(WSP), អង្គការសុខភាពពិភពលោក (WHO), ធនាគារអភិវឌ្ឍន៍អាស៊ី(ADB), ធនាគារពិភពលោក(WB), ទីភ្នាក់ងារអភិវឌ្ឍន៍បារាំង(AFD) លើការងារពង្រីកប្រព័ន្ធផ្គត់ផ្គង់ និងបណ្ដាញចែកចាយ និងការពង្រីកសមត្ថភាពផលិតទឹកស្អាត និងការបណ្តុះបណ្តាលកសាងសមត្ថភាពដល់មន្ត្រីតាមបណ្តាអង្គភាពរដ្ឋាករទឹកសាធារណៈ និងឯកជនផងដែរ។
ដើម្បីឱ្យប្រជាពលរដ្ឋបានប្រើប្រាស់ទឹកស្អាតកាន់តែច្រើន ក្រសួងបានកំណត់ថា «ប្រជាជនរស់នៅតាមតំបន់ទីប្រជុំជននឹងទទួលបានទឹកស្អាតប្រើប្រាស់100%នៅឆ្នាំ2025»៕

November 22, 2017