Author: អេបិល

នៅថ្ងៃទី7 ខែធ្នូ ឆ្នាំ2017 នេះ តាមរយៈបណ្ដាញសង្គមហ្វេសប៊ុករបស់តារាស្រីប្រចាំផលិតកម្មរស្មីហង្សមាស អ្នកនាង សុគន្ធ នីសា ដែលទើបតែបានរៀបអាពាហ៍ពិពាហ៍ហើយថ្មីៗនេះ បានឱ្យដឹងថា អ្នកនាងបានបង្ហោះសារដែលស្ដែងពីការអរគុណ និងជាការសំណូមពរដល់បណ្ដាអ្នកសារព័ត៌មាន ដែលចេញផ្សាយពីរូបអ្នកនាងកន្លងមក ក្នុងន័យលើកតម្កើងជ្រុល និងហួសពីសមត្ថភាពអ្នកនាង ក្នុងការរៀបចំពីមង្គលការយ៉ាងអធិកអធមកាលពីថ្ងៃទី1 ខែធ្នូកន្លងទៅនៅក្នុងបរិវេណសណ្ឋាគារ សូហ្វីតែល។

សារដំបូងរបស់តារាស្រីរូបនេះបានរៀបរាប់យ៉ាងរាក់ទាក់ជាមួយប្រិយមិត្តអ្នកគាំទ្រ និងអ្នកសារព័ត៌មានយ៉ាងដូច្នោះថា « ជម្រាបសួរបងប្អូនទាំងអស់ និងបងៗអ្នកសារព័ត៌មាន ខ្ញុំអរគុណណាស់ដែលបានចុះផ្សាយពីអាពាហ៍ពិពាហ៍យើងខ្ញុំ អរគុណណាស់ដែលចុះលើកតម្កើងខ្ញុំ ប៉ុន្តែខ្ញុំមិនចង់ឱ្យបងប្អូនទាំងអស់យល់ច្រទ្បំទេ»។ បន្ទាប់មកទៀតអ្នកនាងបានសង្កត់ធ្ងន់ទៅលើអ្នកសារព័ត៌មានយ៉ាងក្ដៅគគុកថា «មង្គលការរបស់ខ្ញុំនេះគឺ រៀបចំសន្សំសំចៃណាស់ មិនចង់ចំណាយលុយកាក់ច្រើនទេ ព្រោះក្រុមគ្រួសារខ្ញុំទាំងពីរក៏មិនមែនជាអ្នកមានទ្រព្យស្តុកស្តម្ភអីដែរ តម្លៃចិញ្ចៀនក៏មិនថ្លៃអីណាស់ណាទេ ហើយចំពោះការចំណាយភាគច្រើនដូចជាសម្អាងការ ដេគ័រ នំខេក រ៉ូបកាត់នំ គឺសុទ្ធតែបងៗដែលពួកគាត់ស្រទ្បាញ់រាប់អានខ្ញុំ ពួកគាត់បានជួយឧបត្ថម្ភដល់យើងខ្ញុំច្រើន»។

ជាចុងក្រោយតារារូបឆោមស្រស់សោភារូបនេះបានអំពាវនាវចំពោះអ្នកសារព័ត៌មានដែលបានលើកតម្កើងរូបនាងថា អ៊ីចឹងសូមបងៗសារព័ត៌មានមេត្តាកុំសរសេរអ្វីដែលឱ្យលើសតម្លៃអី ព្រោះមនុស្សនាងខ្ញុំមិនចូលចិត្តចំណាយប្រាក់ឱ្យខ្ជះខ្ជាយទ្បើយ តែយ៉ាងណាក៏នៅតែអរគុណសារពត៌មានគ្រប់ផ្នែកដែលលើកតម្កើងនាងខ្ញុំ ហើយក៏សូមអរគុណពុកម៉ែបងប្អូនទាំងអស់ដែលស្រទ្បាញ់ចូលចិត្តនាងខ្ញុំផងដែរ៕

យោងតាមសារព័ត៌មាន khaosod ដែលបានចេញផ្សាយនៅថ្ងៃទី6 ខែធ្នូ ឆ្នាំ2017 មុននេះបន្ដិច បានឱ្យដឹងថា មន្ត្រីបូលិសកូរ៉េ ដែលល្បីល្បាញខាងរឿងតឹងរឹងម៉ឺងម៉ាត់ក្នុងការត្រួតពិនិត្យចំពោះអ្នកទេសចរណ៍ ឬ បុគ្គលដែលបានធ្វើដំណើរទៅកាន់ប្រទេសកូរ៉េខាងត្បូង មិនថាតែជាជនល្បី តារា ឬមនុស្សធម្មតាទូទៅនោះឡើយ។ ដោយឡែក កំពូលតារាស្រីលំដាប់ជួរមុខរបស់ថៃ នាង នុន វរ៉ានុត ក៏ត្រូវបានមន្ត្រីប៉ូលិសកូរ៉េឃាត់ខ្លួនដល់ទៅពីរដងដែរ ខណៈដែលនាងបានធ្វើដំណើរទៅកាន់ប្រទេសកូរ៉េខាងត្បូង។

តារាស្រីរូបនេះ បានបង្ហោះសារ និងរូបភាពនៅលើបណ្ដាញទំនាក់ទំនងសង្គមធ្វីតធើររបស់នាង​នៅពេលកំពុងជាប់ក្នុងការឃាត់ខ្លួនថា «កញ្ញា នុន វរ៉ានុត គឺជាអ្នកដែលសំណាងល្អជាងគេដំបូងបង្អស់របស់ប្រទេសថៃ ដែលបានទទួលការអញ្ជើញឱ្យចូលបន្ទប់ឃាត់ខ្លួនយ៉ាងត្រជាក់ល្ហឹម ដែលមន្ត្រីប៉ូលិសកូរ៉េដាក់ស្លាកថា #worraworldwide »។ នាងក៏បានបញ្ជាក់ប្រាប់ទៀតដែរថា នេះគឺជាលើកទី 2 ហើយដែលបានចូលមកទីនេះ៕

ដោយយោងតាមសារព័ត៌មាន Teenee ដែលបានចេញផ្សាយនៅថ្ងៃទី6 ខែធ្នូ​ ឆ្នាំ2017 នេះ បានឱ្យដឹងថា នៅថ្ងៃទី 5 ម្សិលមិញស្ថានីយទូរទស្សន៍ True 4U បានដាក់បញ្ចាំងរឿងភាគខ្នាតធំបែបប្រវត្តិសាស្ត្រដ៏ល្បីល្បាញបំផុតប្រចាំឆ្នាំ2017 នេះនៅលើផ្ទាំងកញ្ចក់ទូរទស្សន៍ហើយ។ គ្រាន់តែបើកឆាកដំបូង តារាស្រីជួរមុខ3ដួងនៅក្នុងរឿងនេះ ត្រូវបានមហាជនគាំទ្រ និងកោតសរសើទេពកោសល្យសម្ដែងរបស់ពួកនាង ហើយជាពិសេសបានសរសើរចំពោះសម្រស់តារាទាំង 3 ដួងនេះ ខណៈគ្រងឈុតបុរាណថៃដែលប្រកបទៅដោយគ្រឿងអលង្ការពណ៌មាសយ៉ាងស្រស់ស្អាតបំផុត។

គួរបញ្ជាក់ផងដែរថា តារាល្បីៗទាំង 3 ដួងនេះ រួមមាន កញ្ញា នុន វរ៉ានុត សម្ដែងជា ចៅហ្វាស័ងវ៉ានយ៍ ដែលជាគតិនារីប្រកបដោយចំណេះដឹងផ្លូវច្បាប់ ។ កញ្ញា ផេន ខេក សម្ដែងជា បុស្សបាបាន់ ព្រះនាងម្ចាស់ដែលស្ថិតក្នុងសែស្រឡាយរាជវង្ស ប្រាមណ៍ និងតារាសម្ដែងស្រី ភីងគី ​សម្ដែងជាសម្ដេចបុរម្យរាជិនី។ សូមទស្សនារូបភាពទាំងឡាយខាងក្រោមនេះ៖

យោងតាមសារព័ត៌មាន koreaboo ដែលបានចេញផ្សាយនៅថ្ងៃទី6 ខែធ្នូ ឆ្នាំ2017 ព្រឹកមិញនេះ បានឱ្យដឹងថា ក្រុមនារីជប៉ុនដែលនិយមប្រើប្រាស់បណ្ដាញសង្គមយូធូប និងក្រុមនារីៗមួយចំនួនធំទៀត ដែលដឹកនាំដោយកញ្ញា Pepsi Lu បានផ្ដើមគំនិតអនុញ្ញាតឱ្យពួកក្រុមបុរសៗដែលធ្វើដំណើរតាមដងផ្លូវចាប់ច្របាច់ដើមទ្រូងពួកនាងក្នុងន័យទាមទារឱ្យមានសន្ដិភាពពិភពលោក។

កាលពីក្នុងអំឡុងខែ​វិច្ឆិកាកន្លងទៅ នៅក្នុងទីក្រុង តូក្យូ ក្នុងសង្កាត់ Shibuya  ក្រុមនារីៗខាងលើនេះបាននាំគ្នាធ្វើសកម្មភាពដោយលើកបដាដែលមានសរសេរថា “Free Oppai (breast)” ដែលមានន័យថា សុដន់ឥតគិតថ្លៃ បែបនេះម្ដងរួចមកហើយ និងបានបង្កឱ្យសង្កាត់នេះទាំងមូលមានការភ្ញាក់ផ្អើលជាខ្លាំង។ ឥឡូវមកដល់ដើមខែធ្នូនេះ បដារបស់ពួកនាងនៅតែធ្វើឱ្យក្រុមបុរសជប៉ុន និងជនបរទេសដែលជាភ្ញៀវទេសចរដែលទៅកម្សាន្ដនៅទីនោះ មានការចាប់អារម្មណ៍យ៉ាងខ្លាំងដដែល ដោយពួកគេបានដើរចូលមកចាប់ប៉ះដើមទ្រូងរបស់ពួកនាង។

នាង Pepsi Lu បានប្រាប់អ្នកសារព័ត៌មានថា ចំពោះរូបនាងមានបុរសមិនតិចជាង 60 នាក់ទេដែលបានមកប៉ះដើមទ្រូងរបស់នាង។ នាងបានបន្ដទៀតថា «ពិភពលោកនឹងមានសុខសន្ដិភាព ព្រោះដើមទ្រូងនេះនឹងជួយដល់ពិភពលោក»។

គួរបញ្ជាក់ផងដែរថា ក្រុមនារីខាងលើនេះនឹងបន្ដធ្វើសកម្មភាពបែបនេះតទៅទៀត ហើយព្រមទាំងថតឃ្លីបវីដេអូបង្ហោះនៅក្នុងបណ្ដាញសង្គមយូធូប ដែលក្រុមនាងបានរំពឹងទុកថា ក្នុងមួយឃ្លិបវីដេអូយ៉ាងហោចណាស់ក៏បាន 1 លានអ្នកចូលទស្សនាដែរ។  សូមបញ្ជាក់ថា ទាំងអស់នេះ គឺដើម្បីសម្រេចការបំបែកឯតទគ្គកម្មពិភពលោកក្នុងការទាមទារសន្ដិភាពពិភពលោក៕

https://youtu.be/-J-4uVi1NEg

នៅថ្ងៃទី6 ខែធ្នូ ឆ្នាំ2017នេះ នៅលើបណ្ដាញទំនាក់ទំនងសង្គមហ្វេសប៊ុក កំពុងមានភាពភ្ញាក់ផ្អើលជាខ្លាំងចំពោះព័ត៌មានរបស់បងស្រីរបស់តារាសិចស៊ី ដេននី ក្វាន់ បានបង្ហោះរៀបរាប់អំពីតម្លៃនៃការកែសម្ផស្សរបស់អ្នកនាង នៅក្នុងប្រទេសថៃ ដែលសរុបតម្លៃអស់ជាង 15,200$។

អ្នកនាង ចោម ចាន់ បងស្រីរបស់ ដេននី ក្វាន់ បានបង្ហោះឱ្យដឹងថា «ថ្ងៃនេះសុំបង្ហាញពីតម្លៃវះកាត់កែសម្ផស្សរបស់ខ្ញុំ!!!!! អ៊ីចឹងៗសម្រាប់អ្នកមានលុយ គឺមិនច្រើនទេ!! ដើម្បីប្តូរយកភាពស្រស់ស្អាតជាមួយភាពជឿជាក់ និងសុវត្ថិភាព លទ្ធផលដែលទទួលបានគឺពិតជាគាប់ចិត្ត។ ធម្មជាតិផ្តល់ឱ្យ គឺមិនគ្រប់ដប់ឡើយ ដូចនេះត្រូវកែច្នៃបន្ថែមទើបល្អប្រសើរ!!!! សម្រាប់ភាពស្រស់ស្អាតរបស់ខ្ញុំគឺចំណាយត្រឹមតែ10,200$ ទេ តែបូកនឹងថ្លៃស្នាក់នៅ ថែទាំ ចាយវាយ 5,000$ ទៀត អ៊ីចឹងសរុបទៅ 15,200$ អ៊ីចឹងលុយខ្ញុំមិនស្តាយទេ តែអ្វីដែលស្តាយនោះគឺ ខ្ញុំមានលុយហើយនៅមុខអាក្រក់ ការផ្លាស់ប្តូរមុខមាត់ថ្មីរបស់ខ្ញុំគឺមិនខ្លាចរាល់ការចំណាយលុយ និងពេលវេលា តើមិត្តយើងចាប់អារម្មណ៍ទេ?»។

ទន្ទឹមគ្នានោះដែរ តារាស្រីសិចស៊ី ដេននី ក្វាន់ ក៏បានលើកឡើងពីរឿងកែសម្ផស្សនេះ​ដែរថា នៅលើលោកនេះមនុស្សប្រុសស្រីណាដែលមិនចង់មានសម្រស់ស្រស់ស្អាត? ទាំងខ្ញុំទាំងគេ…? ជាធម្មតាមនុស្សគ្រប់រូបកើតមកលើផែនដីនេះសុទ្ធតែចង់បានរូបរាងស្រស់ស្អាតទៅតាមសេចក្តីប៉ងប្រាថ្នា តែយើងមិនអាចបញ្ជាច្បាប់ធម្មជាតិបានទេ។ តែយើងអាចតុបតែង កែប្រែរូបសម្រស់របស់យើងតាមការចង់បានរបស់យើងបាន ទាំងនេះវាមិនមែនជាកំហុស ឬក៏ជាការប្រព្រឹត្តអំពើអាក្រក់នោះឡើយ…ងាកមកសង្គមបច្ចុប្បន្នដែលជាសង្គមស៊ីវិល័យវិញ គ្រាន់តែចង់បានរូបរាងមុខមាត់ស្អាតបំពេញបំណងប្រាថ្នាផ្ទាល់ខ្លួនសោះ ម្តេចក៏ត្រូវទទួលបានការដៀមដាម មើលងាយ ពេបជ្រាយ( ថា ក្នុងខ្លួនសុទ្ធតែគីមី ) ទៅវិញ?។

នាងក៏បានបញ្ជាក់បន្ថែមទៀតដែរថា ខ្ញុំមិនយល់សោះ លុយខ្ញុំ ខ្លួនខ្ញុំ សម្រស់ខ្ញុំ មិនបានពាក់ព័ន្ធ ឬទៅយកលុយពីបុគ្គលណាផ្សេងឡើយ ម្តេចក៏ចេះដឹងឈឺឆ្អាលខ្លាំងម្ល៉េះ? មនុស្សខ្ញុំហ៊ានធ្វើ គឺហ៊ានទទួល ខ្លាចអីនឹងប្រាប់គេថា ខ្ញុំស្អាតដោយ​សារកែសម្ផស្ស! អ្នកខ្លះគ្មានលុយកែក៏មកទើស  ឯអ្នកខ្លះទៀតមានលុយកែហើយ តែនៅតែមិនស្អាត អាហ្នឹងវាម៉េចវិញ? ឈប់បានឈប់ទៅណា៎ អ្នកទើសមួយចំនួន ព្រោះខ្ញុំមិនបានយកខ្លួនប្រាណអ្នកឯងមកកែសម្ផស្សទេ៕

នៅថ្ងៃទី5 ខែធ្នូ ឆ្នាំ2017នេះ បន្ទាប់ពីបានបញ្ចប់ពិធីរៀបអាពាហ៍ពិពាហ៍រួចមក តារាស្រី សុគន្ធ នីសា បានចេញសារនៅលើបណ្ដាញសង្គមឱ្យដឹងថា ដោយបានទទួលការប្រសិទ្ធពរជ័យពីការចូលរួមយ៉ាងអធិកអធមពីសំណាក់ភ្ញៀវកិត្តិយស យើងខ្ញុំពិតជាសប្បាយរីករាយ ត្រេកអរយ៉ាងខ្លាំង និងសូមថ្លែងអំណរគុណជាអនេកចំពោះការចូលរួមប្រកបដោយក្តីស្រឡាញ់រាប់អានយើងខ្ញុំទាំងពីរនាក់នេះ ទៅដល់ភ្ញៀវកិត្តិយសទាំងឡាយដូចជា ឯកឧត្តម លោកជំទាវ លោកឧកញ៉ា អ្នកឧកញ៉ា អស់លោកលោកស្រី អ្នកនាងកញ្ញា រៀមច្បងសិល្បករជំនាន់មុន ថ្នាក់ដឹកនាំក្នុងវិស័យសិល្បៈ មិត្តសិល្បករ និងបងប្អូនជំនាន់ក្រោយនៃក្រុមសិល្បករ បងប្អូនសាច់ញាតិ អុំពូ មាមីង ទាំងខាងប្រុសទាំងខាងស្រី ក្នុងវត្តមានដ៏ខ្ពង់ខ្ពស់ប្រកបដោយកិត្តិយសចំពោះយើងខ្ញុំទាំងពីរក្នុងឱកាសនេះ។

តារាស្រីរូបនេះ បានបន្តបញ្ជាក់បន្ថែមថា ព្រមជាមួយគ្នានេះដែរយើងខ្ញុំទាំងពីរនាក់ក៏ដូចជាក្រុមគ្រួសារទាំងសងខាងសូមអភ័យទោសចំពោះរាល់កំហុសឆ្គង និងកង្វះខាតនានា ព្រោះការទទួលមិនបានដិតដល់ដោយប្រការណាមួយ ហើយសង្ឃឹមថា ភ្ញៀវកិត្តិយសទាំងអស់មេត្តាខន្តី និងអធ្យាស្រ័យដោយសេចក្តីរាប់អានដ៏ជ្រាលជ្រៅមកកាន់គ្រួសារយើងខ្ញុំទាំងពីរ។ គួរបញ្ជាក់ផងដែរថា ប្រភពដែលសារព័ត៌មានឡារ៉ែនទទួលបានត្រូវបានបង្ហើបឱ្យដឹងថា តារាស្រីឆោមស្រស់រូបនេះ គ្រោងនឹងធ្វើដំណើរកម្សាន្ដក្រេបចន្ទទឹកឃ្មុំ ឬ Honey Moon នៅលើកោះម៉ាល់ឌីវ ដែលមានសម្រស់​​​ផ្ទៃសមុទ្រ​​ពណ៌​​ខៀវ​ស្រងាត់​​ដាច់កន្ទុយភ្នែក ចំណែកស្វាមីអ្នកនាងក៏ចង់បន្ដទៅជប់លៀង និងកាត់ចំណងដៃនៅរដ្ឋឡូវែល សហរដ្ឋអាមេរិក ហើយពួកគេថែមទាំងមានគម្រោងយកបុត្រភ្លាមៗតែម្ដងទៀតផង៕

តាមរយៈបណ្ដាញសង្គមហ្វេសប៊ុក នៅថ្ងៃទី5 ខែ​ធ្នូ ឆ្នាំ2017 នេះបានឱ្យដឹងថា ក្រោយពី​សាង​ស្នេហ៍​ផ្អែមល្ហែមជាមួយគ្នា​អស់មួយរយៈ​មក ​ ថ្មីនេះៗអតីតគូដណ្ដឹង នី មុន្នីនាថ ដែលគេដឹងថា បានឈ្លោះបាក់បែកគ្នានោះបានចាប់ផ្តើមចេញសារ​វាយប្រហារ​ជា​បន្តបន្ទាប់មកលើរូបនាង ថែមទាំងឌឺដង​ពាក្យសម្តី​ដាក់គ្នា​ដូច​អា​យ៉ៃ​ឆ្លើយឆ្លងមិនចេះចប់មិនចេះហើយដូច្នោះដែរ។

លោក អ៊ឹង សូ​ឡាំង ជាអតីតគូដណ្ដឹងរបស់តារាស្រីរូបនេះបានផ្លែផ្កាដាក់នាងនៅលើបណ្ដាញសង្គមហ្វេសប៊ុកកាលពីថ្ងៃទី3 ខែធ្នូនេះថា «បងនឹងទៅ…កុំភ័យ! អូនត្រៀមតែលុយដែលអូនបានបោកបងទៅនោះឱ្យគ្រប់ចំនួន ហើយរួមនឹងលុយជំងឺចិត្តដែលពៅមាស( ផ្កាមាស) ត្រូវបង់ឱ្យបងបន្ទាប់ពីចេញសាលដីកាពីតុលាការបញ្ជាក់ថា អូនពិតជាបានបោក និងបំពានលើសេចក្ដីទុកចិត្តនោះទៅ ពេលនោះហើយដែលបងនឹងចុះទៅស្រុកខ្មែរដើម្បីប្រមូលលុយនោះយកទៅធ្វើបុណ្យខ្លះ ច្រូចទឹកឱ្យអូនខ្លះ សូមកុំឱ្យអូនអត់ឃ្លាន ស៊ីមិនរើសមុខតទៅទៀតណា…ហាសហា»។ សំដីឡកឡាយនេះបានបញ្ចើចបញ្ឈឺតារាសម្ដែងស្រីរូបនេះជាខ្លាំង ហើយអ្វីដែលគួរឱ្យកត់សម្គាល់ពីភ្លើងកំហឹងដែលមិនអាចទប់បាននេះ នី មុន្នីនាថ បានតបតជា​សារ​អន្ទងហៅបុរសអាណិកជននេះវិញដែលមាន​អត្ថន័យ​ថា ​«សូមបញ្ជាក់ថា ​នាង​ខ្ញុំ​គ្មាន​គេច​ទៅណា​ទេ ​នាង​ខ្ញុំ​នៅក្នុង​ប្រទេស​កម្ពុជា​ដដែល មានតែ​អតីត​គូ​ដណ្ដឹង​របស់​នាង​ខ្ញុំ​ទេ​ដែល​គាត់​មិន​នៅក្នុង​ប្រទេស​កម្ពុជា អ៊ីចឹ​ង​សូមមេត្តា​ពិចារណា​ផង (​បើ​បង​ពិតជា​ស្មោះត្រង់ ​បង​មក​កម្ពុជា​មក ​​អូន​ចាំ​បង)​»​។​

គួររំឭកផងដែរថា មេធាវី​តំណាងឱ្យតារាសម្ដែងស្រី នី មុន្នីនាថ ទើបបាន​ចូលខ្លួន​ជំនួស​កូនក្តី​របស់លោក​តាម​ដីកា​បង្គាប់​របស់​តុលាការ​កាលពី​ថ្ងៃទី29 វិច្ឆិកាកន្លងទៅនេះ រីឯបណ្ដឹងទាមទារប្រាក់សំណងដែលអតីតគូដណ្ដឹងបានដាក់ពាក្យប្ដឹងមកលើតារាស្រីរូបនេះក៏នៅមិនទាន់មានដំណោះស្រាយនៅឡើយដែរ។

ដើម្បីឱ្យកាន់តែជាក់ច្បាស់ សូមទស្សនារូបភាពខាងក្រោមនេះ៕

នៅថ្ងៃទី4 ខែធ្នូ ឆ្នាំ2017 នេះ នៅលើបណ្ដាញទំនាក់ទំនងសង្គមហ្វេសប៊ុក កំពុងតែភ្ញាក់ផ្អើលជាខ្លាំងចំពោះសារប៉ុន្មានឃ្លាដ៏មានន័យខ្លឹមសាររបស់តារាចម្រៀង សុខ​ ពិសី ដែលបានបង្ហាញពីការលើកទឹកចិត្ត ការជួយយកអាសាគ្នាក្នុងគ្រាមានទុក្ខលំបាក ការសាងអំពើល្អនៅក្នុងសង្គម និងជាពិសេស គឺការបង្កើតមិត្តភាព ដែលជាមូលហេតុធ្វើឱ្យតារាស្រីរូបនេះ មិនងាយធ្លាក់ប្រជាប្រិយភាព និងមានញាតិមិត្តស្រឡាញ់រាប់អានរូបនាងច្រើនឡើងៗ។

តារាប្រចាំទ្រនំផលិតកម្ម សាន់ដេ រូបនេះបានបង្ហោះសារដែលជាអាវុធទាក់យកចិត្តអ្នកគាំទ្រនៅលើហ្វេសប៊ុកថា «ជឿអត់ថា ការសាងអំពើ់ល្អ និងជួយឱ្យអ្នកដទៃជួបតែរឿងល្អ ធ្វើជាមនុស្សត្រូវចេះដឹងគុណអ្នកដែលធ្លាប់ជួយយើងពេលយើងលំបាក ទើបគេហៅមនុស្សមានគុណធម៌ នេះជាមូលហេតុដែលខ្ញុំទៅណាមកណាតែងតែមានញាតិជានិច្ច ហេ ហេ »។

គួរបញ្ជាក់ផងដែរថា ភាពល្បីល្បាញ​របស់​កញ្ញា សុខ ពិសី មិន​សំដៅ​ទៅលើ​តែ​ទេពកោសល្យ ឬ​ជំនាញ​មួយ​មុខ​នោះទេ ប៉ុន្ដែ​រូប​សម្រស់ និង ភាព​រួសរាយ​រាក់ទាក់​ចំពោះ​មហាជន គឺជា​អាវុធ​ដ៏​សំខាន់​មួយ​ដើម្បី​ក្ដោប​យក​ប្រជាប្រិយភាព​ពី​អ្នកគាំទ្រ​កាន់តែ​ច្រើនឡើងទ្វេដង៕