Author: អេបិល

តើមហាសេដ្ឋីថ្មោងថ្មីដោយសារ Bitcoin គឺនរណា?
ក្នុងអំឡុងពេលដែលមនុស្សទូទាំងពិភពលោកកំពុងតែប្រកែកគ្នាថា តើ Bitcoin មានឱកាសអាចក្លាយជាពពុះសាប៊ូឌីជីថល(ជំនួញដែលរីកធំលឿន តែងាយបែក)ដែរឬទេ? រហូតទៅដល់មានសេដ្ឋីៗមួយចំនួនកំពុងតែគិតហើយគិតទៀតថា តើគួរវិនិយោគលើ Bitcoin ឬក៏អត់នោះ? មានមនុស្សជាច្រើនណាស់ដែលមិនទាន់ដឹងថា មានមនុស្សពីរនាក់បានក្លាយជាមហាសេដ្ឋីដោយសារ Bitcoin ដែលពួកគេកំពុងកាន់ក្នុងដៃ។
សារព័ត៌មានក្នុងប្រទេសអង់គ្លេស នាំមុខគេដោយ តេឡេហ្ក្រាហ្វ បានបង្ហើបឱ្យដឹងថា ខាមេរ៉ន់ និងថៃលើរ៍ វិងឃើលវ៉ូស(Vinklevoss)បានក្លាយជាមហាសេដ្ឋីលំដាប់ពាន់លានដុល្លារដោយសារការចូលទិញ Bitcoin កាលពីឆ្នាំ 2013 ដែលក្រោយមកតម្លៃ Bitcoin ស្ទុះឡើងខ្ពស់ដល់ 10,000 ដុល្លារក្នុង 1 Bitcoin ធ្វើឱ្យទាំងពីរនាក់បងប្អូនភ្លោះក្លាយជាមហាសេដ្ឋីក្នុងចំណោមមហាសេដ្ឋីលំដាប់ពាន់លានដុល្លារដែលមានបានដោយសារ Bitcoinដោយបរិយាយ។
របាយការណ៍របស់តេឡេហ្ក្រាហ្វនៅបានប្រាប់បន្ថែមទៀតថា ថៃលើរ៍ – ខាមេរ៉ន់ វិងឃើលវ៉ូស ចាប់ផ្ដើមកាន់កាប់ Bitcoin តាំងពីឆ្នាំ 2013 ដោយក្នុងពេលនោះតម្លៃរបស់ត្រកូលប្រាក់ឌីជីថលកំពូលពេញនិយមមួយនេះនៅមានតម្លៃត្រឹមតែ 120 ដុល្លារប៉ុណ្ណោះក្នុង1 Bitcoin ជាមួយគ្នានោះតេលេហ្ក្រាហ្វជឿថា បងប្អូនភ្លោះ វិងឃើលវ៉ូស ប្រហែលជាមាន Bitcoin នៅក្នុងដៃមិនតិចជាង 1 សែន Bitcoin ឬប្រមាណ 1,16 ពាន់លានដុល្លារអាមេរិកឡើយ។
ទាំងអស់នេះ បើត្រឡប់ទៅក្រោយវិញកាលពីឆ្នាំ 2015 ពីរនាក់បងប្អូនវិងឃើលវ៉ូសធ្លាប់បានផ្ដល់បទសម្ភាសជាមួយ CNN Money ដោយបានប្រាប់ថា នៅពេលអនាគត តម្លៃរបស់ Bitcoin នឹងហក់ឡើងខ្ពស់ និងមានឱកាសច្រើនដែលវានឹងកើនតម្លៃឡើងក្លាយជាទ្រព្យសម្បត្តិលំដាប់លានលានដុល្លារមិនខាន និងដោយសារជំនឿនេះ ធ្វើឱ្យថៃលើរ៍ និងខាមេរ៉ន់បដិសេធក្នុងការបញ្ចេញ Bitcoin ទោះជាក្នុងអំឡុង 3 – 4 ឆ្នាំមុន តម្លៃរបស់ Bitcoin ធ្លាក់ចុះយ៉ាងខ្លាំងក៏ដោយ។
តើ ថៃលើរ៍ និងខាមេរ៉ន់ វិងឃើលវ៉ូស ជានរណា?
មកដល់ត្រង់នេះ មិត្តអ្នកអានអាចនឹងនឹកឆ្ងល់ថា តើបងប្អូនភ្លោះវិងឃើលវ៉ូសនេះជានរណា និងមានភាពសំខាន់យ៉ាងណាខ្លះមិនខាន។ ការពិតទៅបងប្អូនភ្លោះវិងឃើលវ៉ូសអាចរាប់បានថា ជាមនុស្សល្បីឈ្មោះម្នាក់ដែរ នៅពេលដែលទាំងពីរនាក់មានឈ្មោះថា ជាម្ចាស់ផ្នត់គំនិតក្នុងបង្កើតហ្វេសប៊ុកបណ្ដាញទំនាក់ទំនងសង្គមដ៏ធំបំផុតក្នុងពេលបច្ចុប្បន្ន មុនពេលដែលផ្នត់គំនិតនេះបានរបូតធ្លាក់ទៅដល់ដៃ ម៉ាក ហ្សាក់ឃើប៊ើក។
ពីរនាក់បងប្អូន វិងឃើលវ៉ូស បានចោទថា ម៉ាក ហ្សាក់ឃើប៊ើក ចម្លងផ្នត់គំនិតក្នុងការសាងហ្វេសប៊ុកពីខ្លួនខណៈពេលនៅជានិស្សិតនៅមហាវិទ្យាល័យ ហាវ៉ាដ ដោយនៅពេលនោះពួកគេបានហៅអ្វីដែលស្រដៀងនឹងហ្វេសប៊ុកនោះថា ConnectU (ចំណុចនេះ មិត្តអ្នកអានអាចមើលបាននៅក្នុងខ្សែភាពយន្ត The Social Network)មុននឹងតុលាការកាត់ក្ដីឱ្យបងប្អូនភ្លោះវិងឃើលវ៉ូសឈ្នះរឿងក្ដីនេះ ព្រមជាមួយបង្គាប់ឱ្យ ម៉ាក ហ្សាក់ឃើប៊ើក ត្រូវបង់ជំងឺចិត្តជាប្រាក់ចំនួន 65 លានដុល្លារអាមេរិក ហើយរឿងរ៉ាវក៏បានបញ្ចប់។
វិងឃើលវ៉ូសទាំងពីរកំពុងប្រកួតកីឡាអុំទូកក្នុងកីឡាអូឡាំពិកនៅទីក្រុងប៉េកាំង
ចំណែកអតីតភាពរបស់បងប្អូនភ្លោះវិងឃើលវ៉ូសវិញ ពួកគេរៀនចប់ពីមហាវិទ្យាល័យ ហាវ៉ាដ មានអាជីពជាអ្នកវិយោគទុន អ្នកជំនួញ ជាសហគ្រិន Start up និងធ្លាប់បានចូលរួមប្រកួតកីឡាអុំទូកក្នុងនាមជាកីឡាកររបស់សហរដ្ឋអាមេរិកក្នុងការប្រកួតកីឡាអូឡាំពិកឆ្នាំ 2008 ក្នុងទីក្រុងប៉េកាំងទៀតផង។
បច្ចុប្បន្ននេះ ទាំងពីរនាក់កំពុងធ្វើធុរកិច្ច Start up ពាក់ព័ន្ធនឹងការថ្រេដ Bitcoin និងត្រកូលប្រាក់ឌីជីថលដទៃទៀតក្នុងឈ្មោះ Gemini ដោយមានគោលដៅគាំទ្រដល់ការកើតមានការវិនិយោគទុនក្នុងត្រកូលប្រាក់ឌីជីថលយ៉ាងច្បាស់លាស់៕

រៀបរៀងដោយ តាវ៉ែនតា

December 9, 2017
អ្នកគាំទ្រអន្ទះសាទស្សនាការប្រគំតន្ត្រីរបស់ CL នៅយប់នេះ
នៅល្ងាចថ្ងៃទី9 ខែធ្នូនេះ ក្រុមហ៊ុន Smart បានសហការជាមួយ HD&S Media Group ក្នុងការរៀបចំការប្រគំតន្រ្តីរបស់កំពូលតារាចម្រៀង CL នៅក្នុងបរិវេណកោះពេជ្រ ដែលមានការចូលរួមពីសំណាក់ក្រុមតារាចម្រៀងពន្លកថ្មី Original Song ជាច្រើនដួង រួមមានកញ្ញា Nikki Nikki , Small World Small Band , លោក P-Sand , កញ្ញា ADda , លោក ថេណា , Bros La , ក្រុម SWSB និងក្រុម Mustaches Band ជាដើម ដែលធ្វើឱ្យអ្នកគាំទ្រអន្ទះសាចាំទស្សនារហូតដល់ទប់ចិត្តសឹងមិនបាន។
គួរបញ្ជាក់ផងដែរថា តាមរយៈហ្វេសប៊ុករបស់ក្រុមហ៊ុនស្មាតបានឱ្យុដឹងថា កំពូលតារាចម្រៀងប្រចាំប្រទេសកូរ៉េខាងត្បូង និងជាតារាចម្រៀងជាប់លំដាប់របស់អាមេរិក កញ្ញា CL បានធ្វើដំណើរមកដល់ប្រទេសកម្ពុជា កាលពីវេលាម៉ោង 11 យប់ម្សិលមិញនេះ ហើយគេសង្កេតឃើញមានការទទួលស្វាគមន៍យ៉ាងកក់ក្តៅពីសំណាក់អ្នកគាំទ្រជាច្រើន ដែលឈររង់ចាំនៅឯព្រលានយន្តហោះ ។ បើថ្វីត្បិតតែ តារាស្រីរូបនេះមិនមានពេលវេលារាក់ទាក់ជាមួយអ្នកគាំទ្រច្រើនក្ដី ក៏ប៉ុន្ដែ គេសង្កេតឃើញនាងមានទឹកមុខស្រស់ស្រាយ សប្បាយចិត្ត និងញញឹមញញែមមកកាន់អ្នកគាំទ្រ ដែលធ្វើឱ្យអ្នកគាំទ្រនាងមានអារម្មណ៍រំភើបជាមួយនឹងវត្តមានរបស់នាងជាខ្លាំង៕

ប្រភពរូបភាព៖ Smart Axiata
December 9, 2017
តារាស្រី Vicki Zhao តបទៅកាន់ពាក្យរិះគន់នៅលើបណ្ដាញសង្គម
តាមរយៈសារព័ត៌មានចិន Toggle បានចេញផ្សាយនៅពេលថ្មីៗនេះបានឱ្យដឹងថា មួយរយៈនេះតារាសម្តែងស្រីចិននាង Vicki Zhao ឬ នាង ត្រចៀកកាំ បានចេញមុខរិះគន់ចំៗចំពោះអ្នកលេងបណ្ដាញសង្គមអនឡាញ ដែលបានចោទប្រកាន់នាងថា រូបនាងបានបោះបង់ក្រុមហ៊ុននៅក្នុងទីក្រុងប៉េកាំង បន្ទាប់ពីការិយាល័យទាំង 4 របស់ក្រុមហ៊ុននាងត្រូវបានគេមើលឃើញថា បិទទ្វារ និងទុកចោលឱ្យនៅទំនេរ។
នៅក្នុងនោះដែរ នាង Vicki និងស្វាមីអ្នកជំនួញជនជាតិចិនលោក Huang You Long ត្រូវបានអ្នកលេងបណ្ដាញសង្គមបញ្ចេញព័ត៌មានមកថា អ្នកទាំងពីរបានជាប់ពិន័យហាមឃាត់រយៈ 5 ឆ្នាំនៅក្នុងទីផ្សារមូលបត្រ ហើយម្នាក់ៗត្រូវបានពិន័យជាប្រាក់ចំនួន 300,000 យ៉ន់ ហើយកាលពីខែមុននេះ នៅក្នុងទីផ្សារភាគហ៊ុនរបស់ស៊ាងហៃត្រូវបានគេរកឃើញថា អ្នកទាំងពីរមានចេតនាក្លែងបន្លំឯកសារក្នុងនាមជាវិនិយោគិនភាគហ៊ុន។
គួរបញ្ជាក់ផងដែរថា បន្ទាប់ពីបានទទួលដំណឹងដ៏ក្ដៅស្លឹកត្រចៀកនេះហើយ តារាស្រីរូបនេះបានចេញមុខមកបកស្រាយ និងរិះគន់អ្នកលេងបណ្ដាញសង្គមអនឡាញខ្លាំងៗថា “តើនាងខ្ញុំងាយស្រួលក្នុងការផ្លាស់ប្ដូរក្រុមហ៊ុនខ្លាំងណាស់មែនទេ ដើម្បីកែលម្អបរិស្ថានការងារនោះ? យ៉ាងហោចណាស់ក៏វាត្រូវការចំណាយពេលរៀបចំដល់ទៅ 1 ឆ្នាំដែរ ហើយណាមួយបុគ្គលិកទាំងអស់ក៏គេមានភាពនឿយហត់ដែរ ដែលត្រូវចំណាយថាមពលធ្វើការខ្លាំងនៅពេលយប់ រួចត្រូវសម្រាកសងវិញ នៅពេលថ្ងៃ។ ហើយបើបុគ្គលិកនាងខ្ញុំដ៏ទៃទៀត ត្រូវបំផ្លាស់ទីពីមួយកន្លែងទៅមួយកន្លែងទៀតនោះ ច្បាស់ជាមិនត្រូវគ្រោះថ្នាក់អស់ហើយទេឬ ប្រសិនបើចេះតែប្ដូរទីតាំងក្រុមហ៊ុនបែបនេះនោះ? “។
សូមជម្រាបបន្ថែមផងដែរថា តារាស្រីរូបនេះ និងស្វាមី ទើបតែត្រូវបានប្រកាសថា ជាអ្នកវិនិយោគដែលទទួលបានជោគជ័យ ព្រមទាំងមានទ្រព្យសម្បត្តិសរុបជាង 1 ពាន់លានដុល្លារទៀតផង៕
December 9, 2017
កញ្ញា វ៉ាន់ វល័ក្ខ កំពុងជួបទុក្ខធំ
នៅថ្ងៃទី9 ខែធ្នូ ឆ្នាំ2017នេះ តាមរយៈបណ្ដាញសង្គមហ្វេសប៊ុករបស់តារាសម្តែងស្រីដែលកំពុងមានមានប្រជាប្រិយភាព និងទីផ្សារសម្តែងច្រើនគួរសមដែរ គឺកញ្ញា វ៉ាន់ វល័ក្ខ កំពុងជួបទុក្ខជាទម្ងន់ ដោយសារតែលោកយាយជាទីស្រឡាញ់របស់នាងបានទទួលមរណភាពកាលពីយប់ថ្ងៃទី8 រំលងចូលថ្ងៃទី9 ធ្នូនេះ ដោយបានបន្សល់ទុកតែភាពអាឡោះអាល័យ និងទុក្ខសោកយ៉ាងក្រៀមក្រំដល់កូនចៅ។
តារាសម្តែងរូបនេះបានបង្ហោះសារក្រៀមក្រំលាយឡំ និងសោកស្តាយ ជាមួយរូបភាពជាច្រើនសន្លឹកលើបណ្តាញសង្គមហ្វេសប៊ុកថា «តើឲ្យចៅនិយាយថាម៉េចទៅ? លោកយាយ!» ។ ទន្ទឹមនឹងនោះដែរ គេសង្កេតឃើញមានតារាសម្តែងជាច្រើនរូប និងអ្នកគាំទ្ររបស់តារាស្រីរូបនេះ បានចូលរួមរំលែកទុក្ខ និងគោរពដួងវិញ្ញាណក្ខន្ធលោកយាយទៅកាន់សុគតិភព៕
December 9, 2017
លោក Mourinho ៖ កីឡាករក្រុម Man City នឹងត្រូវផ្តួលនៅថ្ងៃអាទិត្យនេះ
លោក Jose Mourinho អ្នកចាត់ការទូទៅរបស់ក្រុមបិសាចក្រហម Manchester United បានធ្វើការវាយប្រហារជាពាក្យសម្ដីនៅមុនពេលការប្រកួតរវាងក្រុមស្ថិតក្នុងតំបន់តែមួយលើកីឡាកររបស់ក្រុម Manchester City តាមរយៈការអះអាងថា យើងត្រូវការត្រឹមតែខ្យល់បក់ «បន្តិចបន្តួចប៉ុណ្ណោះ» សម្រាប់វាយផ្តួលពួកគេឲ្យដួលដល់ដី។
ក្រុម Man City របស់លោក Pep Guardiola នឹងធ្វើដំណើរទៅកាន់កីឡដ្ឋាន Old Trafford នៅថ្ងៃអាទិត្យនេះ ដោយសម្លឹងរកការបន្ថែមការនាំមុខចំនួន8ពិន្ទុរបស់ពួកគេលើក្រុមឈរលេខ2 Man United នៅលើកំពូលតារាងនៃក្របខ័ណ្ឌ Premier League។ ការប្រកួតនេះត្រូវបានគេចាត់ទុកថា ជាឱកាសមួយសម្រាប់ក្រុម Man United ក្នុងការធ្វើដំណើរវិលទៅកាន់ការប្រជែងដណ្តើមពានវិញ ហើយលោក Mourinho បានបង្កាត់ភ្លើងកម្តៅភ្លាមៗ នៅក្នុងសន្និសីទសារព័ត៌មានមុនការប្រកួតរបស់លោកតាមរយៈការនិយាយថា កីឡាកររបស់ក្រុម Man City នឹងចាញ់យ៉ាងងាយស្រួលបំផុត។
នៅឯទីលានហ្វឹកហាត់របស់ក្រុម Man United ក្នុងតំបន់ Carrington ភាគខាងលិចនៃទីក្រុង Manchester លោក Mourinho បានប្រាប់អ្នកយកព័ត៌មានកាលពីថ្ងៃសុក្រថា៖ «ពួកគេជាក្រុមដ៏ខ្លាំងមួយ។ ពួកគេការពារយ៉ាងល្អ ពួកគេបញ្ចេញប្រតិកម្មបានយ៉ាងល្អនៅពេលដែលពួកគេបាត់បង់បាល់។ ពួកគេលេងបានស៊ីចង្វាក់គ្នាល្អទៅលើការវាយសម្រុក ពួកគេអាចបង្កើតឱកាសបានយ៉ាងងាយ។ ពួកគេជាកីឡាករដ៏អស្ចារ្យ ពួកគេមានគ្រូបង្វឹកដ៏ឆ្នើម ហើយពួកគេមានចំណុចល្អជាច្រើន»។
គ្រូបង្វឹករូបនេះបានបន្ថែមទៀតថា៖ «ប្រសិនបើអ្នកសួរខ្ញុំរឿងមួយដែលខ្ញុំមិនចូលចិត្តនោះគឺថា ពួកគេបាត់បង់តុល្យភាពយ៉ាងងាយស្រួល។ អ្នកដឹងទេថា ត្រឹមតែកម្លាំងខ្សល់បក់បន្តិចប៉ុណ្ណោះ ពួកគេនឹងដួលគ្រាំងតែម្ដង»។ ការប្រកួតនៅថ្ងៃអាទិត្យនេះ នឹងចាប់ផ្តើមនៅម៉ោង11:30យប់៕
ប្រភពពី៖ Sky Sports
December 9, 2017
JOTUN ផ្តល់ជូននូវពណ៌ដ៏ស្រស់ស្អាតសម្រាប់មហោស្រពសិល្បៈទីក្រុងកម្ពុជា
សម្រាប់ឆ្នាំទី3សិល្បករក្នុងស្រុក និងអន្តរជាតិនឹងប្រមូលផ្តុំគ្នានៅចុងសប្តាហ៍នេះ ដើម្បីគូរគំនូរលើផ្ទាំងគំនូរដ៏ធំអស្ចារ្យនៅទីតាំងមួយចំនួននៅក្នុងរាជធានីភ្នំពេញ។ JOTUN ជាម៉ាកថ្នំាលាបមកពីប្រទេសន័រវ៉េ បានធ្វើការគាំទ្រដល់សកម្មភាពមួយនេះ ដោយផ្តល់នូវថ្នាំលាបដ៏ល្អបំផុតដល់សិល្បករ។ អ្នកទស្សនាក៏អាចចូលរួមរីករាយជាមួយនឹងការប្រគំតន្ត្រី និងការតាំងពិព័រណ៍នេះផងដែរ។
ព្រឹត្តិការណ៍ដើម្បីលើកកម្ពស់ភាពច្នៃប្រឌិត និងការបង្កើតថ្មី
ក្នុងអំឡុងពេល4ថ្ងៃ គឺចាប់ពីថ្ងៃទី07-10 ខែធ្នូ ឆ្នាំ2017នេះ ប្រជាជនកម្ពុជាជនបរទេស និងអ្នកដំណើរទាំងអស់នឹងមានឱកាសទទួលបាននូវបទពិសោធ ការយល់ដឹងអំពីសិល្បៈថ្មីៗ និងវប្បធម៌នៃទីក្រុងដ៏វិសេសនេះ។ Laetitia Troussel ជាអ្នកនិពន្ធ និងជាអ្នករៀបចំព្រឹត្តិការណ៍នេះបានមានប្រសាសន៍ថា “ទស្សនីយភាពសិល្បៈតាមដងផ្លូវនៅក្នុងប្រទេសកម្ពុជានៅមានភាពក្មេងខ្ចីនៅឡើយ ការសន្យា និងថាមវន្តដែលយើងមាន ជាមោទនភាពក្នុងការជួយឱ្យសិល្បៈមួយនេះលេចចេញជាផ្លែផ្កា និងមានភាពរីកចម្រើន!”។ អ្នកជំនាញសិល្បៈគំនូរបែបសម្រុះសម្រួលវប្បធម៌ជនជាតិបារាំង ដែលរស់នៅរាជធានីភ្នំពេញរូបនេះបានសហការជាមួយ Chifumi និង ThéoVallier ដែលជាសិល្បករគំនូរតាមដងផ្លូវដ៏ល្បីល្បាញ ដោយសារតែសា្នដៃសិល្បៈគំនូរដ៏មានភាពទាក់ទាញរបស់ពួកគេពីសិល្បៈខ្មែរ និងវប្បធម៌នៅជុំវិញទីក្រុង ហើយពួកគេទាំង2នឹងបង្ហាញពីភាពច្នៃប្រឌិតរបស់ពួកគេនៅក្នុងកម្មវិធីនេះ។
គោលបំណងនៃសិល្បៈនេះគឺដើម្បីបង្ហាញពីការបង្កើត ដែលមានភាពងាយស្រួល ហើយអ្នកទំាងអស់គ្នាក៏អាចចូលរួមបានដែរ។ សិល្បករទាំងក្នុងស្រុក និងអន្តរជាតិនឹងទទួលបានតំណាងស្មើៗគ្នា ហើយកម្មវិធីនេះផ្ទាល់ គឺជាឱកាសសម្រាប់សិល្បករខ្មែរវ័យក្មេង ដើម្បីទទួលបាននូវការទទួលស្គាល់ និងធ្វើឱ្យស្នាដៃសិល្បៈរបស់ពួកគេកាន់តែមានភាពវិវឌ្ឍឡើង។
អ្នករៀបចំកម្មវិធីនេះផ្ទាល់មានគោលបំណងចង់ឱ្យអ្នកគ្រប់គ្នាបានចូលរួមទស្សនាក្នុងព្រឹត្តិការណ៍នេះ ហេតុដូច្នេះហើយបានជាព្រឹត្តិការណ៍មួយនេះមិនត្រូវបានបង់ប្រាក់ដើម្បីចូលរួមទស្សនានោះទេ លើកលែងតែដំណើរកម្សាន្តតាមម៉ូតូកង់បីនៅថ្ងៃទី10 ខែធ្នូ ដែលជាការធ្វើដំណើរទៅកាន់ទីតាំងនានាចំនួន15កន្លែងនៅជុំវិញរាជធានីភ្នំពេញប៉ុណ្ណោះនឹងត្រូវចំណាយប្រាក់សម្រាប់ចូលរួម។
JOTUN ជាដៃគូដ៏ល្អឥតខ្ចោះក្នុងការគាំទ្រសិល្បៈនៅកម្ពុជា
ម៉ាកថ្នាំលាបដ៏ល្បីមួយនេះនឹងចូលរួមគាំទ្រដល់ព្រឹត្តិការណ៍នេះជាលើកដំបូង។ លោក Svein Johan Stub ប្រធានគ្រប់គ្រងប្រចាំប្រទេសរបស់ក្រុមហ៊ុន JOTUN បានឱ្យដឹងថា “អ្វីដែលយើងចូលចិត្តអំពីសិល្បៈនៅតាមដងផ្លូវនេះ គឺវាជាសិល្បៈដែលអាចផ្លាស់ប្តូរទាំងស្រុងនូវបុគ្គលិកលក្ខណៈនៃអគារមួយដែលមានរូបរាងសាមញ្ញបំផុតឱ្យក្លាយជាអគារមួយដែលពោរពេញដោយភាពទាក់ទាញ។ នេះគឺជាថាមពលនៃថ្នាំលាប ដោយធ្វើការជ្រើសរើសពណ៌ឱ្យសមស្របជាមួយនឹងរូបគំនូរ នោះវានឹងផ្តល់នូវភាពងាយស្រួលក្នុងការបង្ហាញពីបុគ្គលិកលក្ខណៈ និងភាពច្នៃប្រឌិតរបស់មនុស្សម្នាក់ៗ!”។ លោក Stub បានបន្ថែមទៀតថា “យើងធ្លាប់និយាយថា ថ្នាំលាបរបស់យើងបានជួយបង្កើននូវសោភណ្ឌភាពផ្ទះ និងអគារជាច្រើន ដែលក្រុមហ៊ុនផ្ទាល់ក៏ជាអ្នកផ្គត់ផ្គង់ថ្នាំលាបសម្រាប់ប៉មអេហ្វែលនៅទីក្រុងប៉ារីស និងបានផ្តល់នូវសោភណ្ឌភាពពណ៌ដល់បូរី និងអគារជាច្រើននៅទូទាំងព្រះរាជាណាចក្រកម្ពុជាផងដែរ”។ លោកបានបន្តថា “ការលើកទឹកចិត្តដល់ស្នាដៃគំនូរខ្នាតធំនៅទីសាធារណៈ និងឯកជននៅជុំវិញទីក្រុង គឺជាវិធីសាស្រ្តល្អមួយក្នុងការផ្តល់នូវអ្វីៗដែលល្អដល់ប្រជាជននៅរាជធានីភ្នំពេញ និងជាការអរគុណយ៉ាងកក់ក្តៅចំពោះការយកទុកចិត្តដាក់នូវស្លាកសញ្ញាថ្នាំលាបរបស់យើង”។
JOTUN ក៏នឹងផ្តល់ជូនអ្នកទស្សនាទាំងអស់នូវឱកាសដើម្បីឈ្នះរង្វាន់ Fujifilm Instax mini 9 តាមរយៈការប្រកួតថតរូប Selfie ក្នុងកម្មវិធីនេះផងដែរ។ សម្រាប់ព័ត៌មានបន្ថែមសូមចូលទៅកាន់គេហទំព័រ
https://www.facebook.com/jotun.kh/
សម្រាប់ព័ត៌មានបន្ថែមទាក់ទងនឹងសិល្បៈករ និងកម្មវិធីនេះ សូមចូលទៅកាន់គេហទំព័រ www.facebook.com/CambodianUrbanArt
December 9, 2017
ទៀតហើយ!! លោក ម៉ៃ សុគន្ធ រិះគន់ទៀត….
នៅថ្ងៃទី 8 ខែធ្នូ ឆ្នាំ2017 នេះ តាមរយៈគណនីហ្វេសប៊ុករបស់តារាចម្រៀងប្រុស លោក ម៉ៃ សុគន្ធ ដែលត្រូវបានប្រិយមិត្តអ្នកគាំទ្រដាក់រហ័សនាមថា តារាកំពូលទើស បានបង្ហោះសារអមជាមួយដោយរូបភាពជាច្រើនសន្លឹក ស្ដែងពីបន្ទុះនៃការប្តិកម្មរិះគន់ចំពោះការច្នៃម៉ូដឈុតបវរកញ្ញាទេសចរណ៍អន្ដរជាតិតំណាងប្រទេស កម្ពុជា ឆ្នាំ 2017 ដែលលោកបានសង្កេតមើលឃើញនិងធ្វើការបៀបនៃការថតរបស់បវរកញ្ញាឯកទៅនឹងបវរឯកថៃ ដែលមានការខុសគ្នាដាច់តែម្តង។
នៅក្នុងនោះដែរ លោក ម៉ៃ សុគន្ធបានសរសេររៀបរាប់ថា «តាំងខ្លួនជាម្ចាស់នៃវប្បធម៌ដ៏ចំណាស់ជាងគេ តែថតរូបមកឆ្គងតែម្តង យកតែអ្នកដែលគ្មានសិល្បៈបុរាណក្នុងខ្លួនមកបង្ហាញ ហេតុអ្វីមិនបើកឱ្យទូលាយសម្រាប់អ្នកដែលមានជំនាញពិតមកបង្ហាញពិភពលោកបានស្គាល់ខ្មែរ (មិនចោលសោះអារឿងទុយោហ្នឹង ខែ្មរអើយខ្មែរ ជួយអោយយោបល់ផង បើមានការលើសលួស តែមើលទៅឆ្គងពេក) សូម្បីតែលើកដៃក៏ខុសក្បួនខ្នាតដែរ លើកខ្ពស់ហើយអូន »។
គួរបញ្ជាក់ផងដែរថា តារាទើសរូបនេះ បានបន្ដបង្ហោះសារបញ្ជាក់បន្ថែមក្នុងការរិះគន់ចំៗទៀតថា« ឆ្នៃម៉ូដមកដូចបាយឡុកបាយឡ និងអ្នកម៉ូដែលទៀតសោតគ្មានព្រលឹងសិល្បៈក្នុងខ្លួនសោះ សាច់ក្រណាត់មិនស្មើវាំងននផ្ទះអ្នកខ្លះផង (មើលទៅថៃដែលចំលងខ្មែរទៅ តើប្រណីតយ៉ាងណាទាំងសាច់ក្រណាត់និងគ្រឿងអលង្ការនោះ) sad ហ្មង»៕
December 8, 2017
តារាសម្ដែងវ័យក្មេង Bondcher Both សម្ដែងរឿងដំបូងបានចូលឆាកអន្ដរជាតិ
នៅថ្ងៃទី8 ខែធ្នូ ឆ្នាំ2017 មានខ្សែភាពយន្តល្បីមួយរឿងដែលយុវវ័យកំពុងចាប់អារម្មណ៍ខ្លាំងដែលមានចំណងជើងថា ” Final Semester” ជាវណ្ណកម្មរបស់ផលិតកម្ម កងចក្រភាពយន្ដ ដែលលោកអ្នកធ្លាប់បានស្គាល់ពីគុណភាពនៃការផលិតកន្លងមកតាមរយៈរឿង “ការពារឧក្រិដ្ឋជន ឬ Jail Break” កំពុងតែធ្វើឱ្យស្រទាប់យុវវ័យអ្នកគាំទ្រពុះកញ្ជ្រោល និងអន្ទះសារង់ចាំទស្សនាខ្លាំងបំផុត។ ដោយឡែកនៅក្នុងរឿងនេះក៏មានវត្តមានតារាសម្ដែងវ័យក្មេងលោក Bondcher Both រួមជាមួយតារាៗវ័យក្មេងល្បីៗជាច្រើនរូបទៀត បានចូលរួមសម្ដែងនៅក្នុងរឿងបែបភ័យរន្ធត់មួយនេះ។
លោក Bondcher Both បានផ្ដល់បទសម្ភាសជាពិសេសមួយជាមួយសារព័ត៌មានឡារ៉ែន ដោយបានឱ្យដឹងថា «នេះគឺជាខ្សែភាពយន្តខ្នាតធំលើកដំបូងរបស់ខ្ញុំ ដែលត្រូវបានខាងផលិតកម្មអញ្ចើញឱ្យចូលរួមសម្ដែង។ ជាប្រភេទរឿងបែបយុវវ័យនៅក្នុងវ័យសិក្សា ក៏ប៉ុន្ដែមានរសជាតិរឿងប្លែកខុសពីគេ គឺមានលាយឡំជាមួយភាពភ័យខ្លាច រន្ធត់ស្លុងអារម្មណ៍ស្ទើរតែគាំងបេះដូង អស់សំណើច និងមនោសញ្ចេតនា ហើយកាន់ធ្វើឱ្យមានការចាប់អារម្មណ៍ខ្លាំងដោយសារតែរឿងមានគុណភាពស្ដង់ដារអន្ដរជាតិទៀតផង»។ លោកបានបន្ដទៀតថា «ថ្វីដ្បិតតែនេះជារឿងខ្នាតធំដំបូងដែលខ្ញុំបានចូលរួមសម្ដែងមែន ប៉ុន្ដែខ្ញុំមានមោទនភាពណាស់ ដែលរឿងនេះត្រូវបានយកទៅបញ្ចាំងនៅលើឆាកអន្ដរជាតិ បន្ទាប់មកទើបដាក់បញ្ចាំងនៅក្នុងស្រុកខ្មែរយើង អាចនិយាយបានថា រំភើបចិត្តខ្លាំងណាស់ដែលចូលរួមសម្ដែង»។
គួរបញ្ជាក់ផងដែរថា តារាប្រុសដែលមានទម្រង់មុខកូនកាត់រូបនេះ ហាក់បីដូចជាមិនសូវបានបញ្ចេញមុខមាត់នៅលើវិថីសិល្បៈខ្មែរប៉ុន្មានទេ ដោយសារតែលោកមានការមមាញឹកនៅក្នុងការសិក្សាច្រើនជាង។ យ៉ាងណាមិញប្រជាប្រិយភាពរបស់លោកនៅតែមានអ្នកគាំទ្របន្ដ ដោយសារតែលោកទទួលតែការងារបង្ហាញម៉ូដតាមកម្មវិធីធំៗ ថតស្ប៉តពាណិជ្ជកម្ម និងការសម្ដែងរឿងភាគដែលមិនប៉ះពាល់ដល់ការសិក្សាតែប៉ុណ្ណោះ។ លោកបានបញ្ជាក់បន្ថែមទៀតថា នៅពេលថ្មីៗលោកត្រូវបានផលិតករខ្មែរល្បីអញ្ជើញថតខ្សែភាពយន្ដច្រើន ហើយរឿងថ្មីបន្ទាប់ទៅទៀតដែលលោកបានចូលរួមសម្ដែងមានចំណងជើងថា “ស្នេហ៍អូនលុះអវសាន” ជាប្រភេទរឿងស្នេហាមនោសញ្ចេតនាជ្រាលជ្រៅ៕
December 8, 2017
ចង់ដឹងទេថា Rain ចំណាយអស់ប៉ុន្មាននៅថ្ងៃរៀបចំពិធីអាពាហ៍ពិពាហ៍?
ដោយយោងតាមសារព័ត៌មាន Teenee បានចេញផ្សាយនៅថ្ងៃទី8 ខែធ្នូ ឆ្នាំ2017 មុននេះបន្ដិចបានឱ្យដឹងថា លោក Rain នៅពេលថ្មីៗនេះបានបង្ហើបឱ្យដឹងអំពីការចំណាយថវិកានៅថ្ងៃរៀបអាពាហ៍ពិពាហ៍ ជាមួយ Kim Tae Hee កាលពីអំឡុងខែមករាកន្លងមក នៅក្នុងកម្មវិធីសម្ភាស Carefree Travelers ។
តារាចម្រៀង Rain បានពោលថា «ការចំណាយក្នុងការរៀបចំពិធីអាពាហ៍ពិពាហ៍របស់ខ្ញុំអស់ប្រមាណជាង 2 លានវ៉ុនតែប៉ុណ្ណោះ ដោយសារតែនេះ គឺជាតម្រូវការរបស់ភរិយារបស់ខ្ញុំ ដែលនាងមិនចង់ឱ្យមានការរៀបចំកម្មវិធីបែបអធិកអធមហើយមានភាពភ្ញាក់ផ្អើលអីនោះទេ»។ លោកបានបន្ដទៀតថា ភរិយាខ្ញុំនាងចង់រៀបចំពិធីមង្គលការបែបសាមញ្ញៗ ងាយៗ តាមបែបគ្រិស្តសាសនា ហើយគ្មានជាងថតរូបសន្លឹកនោះទេ មានតែជាងថតវីដេអូប៉ុណ្ណោះ សូម្បីតែឈុតកូនកំលោះ ក៏មិនបានទិញថ្មីដែរ។
លោកបានបញ្ជាក់បន្ថែមថា ចំពោះភ្ញៀវកិត្តិយសដែលបានចូលរួម ពួកគាត់អាចថតរូបបានដោយខ្លួនឯង មិនចាំបាច់ជួលជាងថតរូបទេ ព្រោះថា មានតែក្រុមគ្រួសារ មិត្តរួមអាជីព និងសាច់ញាតិបងប្អូនប៉ុណ្ណោះដែលបានចូលរួមនៅក្នុងពិធីមង្គលការនេះ៕
December 8, 2017
ចេមស៍ ជិ ទម្លាយអារម្មណ៍ពិតនៅពេលត្រៀមទទួលសញ្ញាបត្របរិញ្ញា
ដោយយោងតាមសារព័ត៌មាន Teenee នៅថ្ងៃទី8 ខែធ្នូ ឆ្នាំ2017 នេះបានឱ្យដឹងថា តារាឯកប្រុសជួរមុខប្រចាំស្ថានីយទូរទស្សន៍ប៉ុស្តិ៍លេខ 3 ថៃ គឺលោក ចេមស៍-ជិរ៉ាយុ បានបញ្ចប់ការសិក្សាថ្នាក់បរិញ្ញាដោយជោគជ័យ បន្ទាប់ពីលោកបានតាំងចិត្តព្យាយាមក្នុងការសិក្សាថ្នាក់មហាវិទ្យាល័យគ្រប់គ្រងពាណិជ្ជកម្មអស់រយៈពេល 5 ឆ្នាំកន្លងមក។
តារាប្រុសរូបនេះបានថ្លែងប្រាប់អ្នកសារព័ត៌មានថៃថា «ខ្ញុំបាទនឹងទទួលបរិញ្ញាបត្រនៅថ្ងៃទី15 -17 ខែធ្នូខាងមុខនេះ ខ្ញុំមានអារម្មណ៍រំភើបខ្លាំងមែនទែន ដែលបានសិក្សារហូតបានបញ្ចប់ហើយប្រឡងជាប់សញ្ញាបត្របរិញ្ញានេះ។ នេះគឺជាមោទនភាពមួយសម្រាប់ក្រុមគ្រួសារខ្ញុំ ហើយចំពោះការសិក្សាបន្ដទៀត ខ្ញុំក៏បានគិតខ្លះៗដែរ តែនៅមិនទាន់ដឹងថា ទៅរួចដែឬក៏អត់ទេ យ៉ាងណាមិញនៅពេលនេះគឺប្រហែលជាផ្អាកសិនហើយ ព្រោះគិតចង់ផ្ដោតលើរឿងការងារខ្លាំងជាង»។
លោក ចេមស៍ ក៏បានបញ្ជាក់ផងដែរថា ចំពោះការសិក្សាបណ្ដើរ ធ្វើការងារបណ្ដើរនោះ គឺមិនមែនជារឿងងាយស្រួលនោះទេ តែលោកបានព្យាយាមឱ្យការងារទាំងពីរនេះដើរទន្ទឹមគ្នាទៅបានជារឿយៗ។ ជាទូទៅចំពោះការសិក្សាថ្នាក់មហាវិទ្យាល័យគ្រប់គ្រងពាណិជ្ជកម្ម គឺត្រូវចំណាយពេលសិក្សាត្រឹមតែ 4 ឆ្នាំប៉ុណ្ណោះ ដោយឡែកលោកចង់បន្ថែមមុខវិជ្ជាច្បាប់មួយមុខទៀត ទើបត្រូវចំណាយពេលបន្ថែម 1ឆ្នាំទៀត។
គួរបញ្ជាក់ផងដែរថា តារាប្រុសវ័យ 24 ឆ្នាំរូបនេះ នឹងឡើងទទួលសញ្ញាបត្របរិញ្ញាដែលនឹងប្រទានដោយព្រះមហាក្សត្រ និងជំនួបថតរូបជាមួយក្រុមគ្រួសារ រួមទាំងបណ្ដាអ្នកគាំទ្ររបស់លោកទាំងអស់នៅថ្ងៃទី16 ខែធ្នូ ខាងមុខនេះ៕
December 8, 2017