Author: អេបិល

ក្រុមបាតតារាង Swansea ផ្តល់ការអាម៉ាសដល់ក្រុម Liverpool
ការប្រឹងប្រែងរបស់ក្រុម Liverpool ដើម្បីឆ្ពោះទៅកាន់ការឈ្នះកៅអីក្នុងក្របខ័ណ្ឌ Champions League បានជួបនឹងការខកចិត្តមួយ ក្រោយពីពួកគេបានចាញ់ក្នុងលទ្ធផល 1-០ ក្រោមស្នាដៃក្រុមបាតតារាងនៃក្របខ័ណ្ឌ Premier League គឺ Swansea កាលពីថ្ងៃចន្ទ។
គ្រាប់បាល់ស៊ុតបញ្ចូលទីតែ1គ្រាប់នៅរយៈពេល 5នាទីចុងក្រោយនៃតង់ទី1 គ្រប់គ្រាន់ក្នុងការផ្តល់ជ័យជម្នះដល់ក្រុមម្ចាស់ផ្ទះ ខណៈដែលភាពទន់ខ្សោយនៅតំបន់ការពាររបស់ក្រុម Liverpool ហាក់ដូចជាវិលត្រឡប់មកវិញហើយ។ ក្រុមរបស់លោក Jurgen Klopp ដែលបានដាក់ឲ្យខ្សែការពារកណ្តាលមានតម្លៃខ្លួន 75លានផោន (ស្មើនឹង 104.8លានដុល្លារអាមេរិក) Virgil van Dijk បង្ហាញខ្លួនជាលើកទី 1របស់គេនោះ បានឈានទៅកាន់ការប្រកួតនេះ ដោយសម្លឹងរកការបន្ថែមកំណត់ត្រានៃការមិនស្គាល់ចាញ់សោះរបស់ពួកគេឱ្យបានរហូតដល់ 19ប្រកួត និងតាមស្មើពិន្ទុជាមួយនឹងក្រុមឈរលេខ 3 Chelsea។ ប៉ុន្តែ ទោះបីជាពួកគេបានព្យាយាមបើកការវាយសម្រុកយ៉ាងខ្លាំងក្លា និងបង្កើតឲ្យមានឱកាសជាច្រើនលើកក៏ដោយ ប៉ុន្តែ ក្រុម Liverpool របស់លោក Klopp មិនអាចរកគ្រាប់បាល់តាមស្មើវិញបានឡើយ ហើយ Roberto Firmino ថែមទាំងបានខ្ជះខ្ជាយឱកាសល្អៗនៅពេលជិតបញ្ចប់ការប្រកួតទៀតផង។
ការបរាជ័យបានបញ្ចប់ការមិនស្គាល់ចាញ់របស់ក្រុម Liverpool ត្រឹម 14ប្រកួតក្នុងក្របខ័ណ្ឌ Premier League បើគិតចាប់តាំងពីខែតុលាមក។ ដោយឡែក ក្រុម Swansea បានរងបរាជ័យត្រឹមតែ 1លើកគត់ ក្នុងចំណោមការប្រកួត 6លើក បើគិតចាប់តាំងពីការតែងតាំងលោក Carlos Carvalhal មក។ លោក Carvalhal សញ្ជាតិព័រទុយហ្គាល់ ដែលរកបាន 7ពិន្ទុពីការប្រកួត 4លើកដំបូងរបស់លោកនោះ បានឲ្យដឹងថា៖ «ខ្ញុំបាននិយាយជាមួយនឹងកីឡាកររបស់ខ្ញុំ និងបាននិយាយថា Liverpool គឺជាក្រុមដ៏ខ្លាំងមួយ»៕
ប្រភពពី៖ Sky Sports

January 23, 2018
តារាចម្រៀងល្បីឈ្មោះ Ed Sheeran បង្ហាញមុខមិត្តស្រីជាសាធារណៈ
ដោយយោងតាមសារព័ត៌មាន Khaosod នៅថ្ងៃទី22 ខែមករា ឆ្នាំ 2018 នេះបានឱ្យដឹងថា តារាចម្រៀងល្បីឈ្មោះ Ed Sheeran ដែលជាម្ចាស់បទ “Shape of you” វ័យ26ឆ្នាំ បានប្រកាសដំណឹងល្អមួយថា ខណៈនេះលោកកំពុងតែមានទំនាក់ទំនងស្នេហាយ៉ាងផ្អែមល្ហែមជាមួយមិត្តស្រី កញ្ញា Cherry Seaborn មានវ័យ 25 ឆ្នាំ ដែលជាអ្នកប្រឹក្សាយោបល់ល្បីឈ្មោះជនជាតិអង់គ្លេស។
បើតាមការបង្ហោះរូបនៅលើបណ្ដាញអ៊ីនស្ដាក្រាមរបស់តារាចម្រៀងប្រុសជនជាតិអង់គ្លេសរូបនេះ កាលពីថ្ងៃទី20 ក៏បានឱ្យដឹងផងដែរថា លោកមានភាពស្និទ្ធស្នាល និងមិនបានលាក់លៀមពីទំនាក់ទំនងស្នេហាមួយនេះពីភ្នែកមហាជនឡើយ។ លោកបានបន្ថែមពាក្យពេចន៍នៅលើរូបភាពមិត្តស្រីថា «ខ្ញុំមានគូដណ្ដឹងសម្រាប់ខ្លួនឯងហើយ ពួកយើងបានទាក់ទងគ្នាតាំងពីមុនចូលឆ្នាំថ្មីនេះមកម្ល៉េះ។ ពួកយើងមានសេចក្ដីសុខ និងស្រឡាញ់គ្នាខ្លាំងណាស់ សូម្បីតែសត្វឆ្មារបស់ពួកយើងក៏វាមានសេចក្ដីសុខដូចគ្នា»។
Got myself a fiancé just before new year. We are very happy and in love, and our cats are chuffed as well xx
A post shared by Ed Sheeran (@teddysphotos) on Jan 20, 2018 at 5:49am PST
គួរបញ្ជាក់ផងដែរថា ប្រភពសារព័ត៌មានបរទេសក៏បានបង្ហើបបញ្ជាក់បន្ថែមដែរថា អ្នកទាំងពីរបានស្គាល់គ្នា តាំងពីសម័យនៅរៀនមកម្ល៉េះ ប៉ុន្ដែសម្ព័ន្ធភាពរបស់អ្នកទាំងពីរត្រូវបានស្ងប់ស្ងាត់មួយរយៈវិញ ដោយសារតែខាងស្រីត្រូវទៅរៀនបន្ដនៅមហាវិទ្យាល័យក្នុងសហរដ្ឋអាមេរិក។ ហើយពួកគេបានត្រឡប់មកជួបគ្នា និងចាប់ផ្ដើមមើលចិត្តថ្លើមគ្នាឡើងវិញនៅក្នុងអំឡុងឆ្នាំ 2015 រហូតមកដល់បច្ចុប្បន្ននេះតែម្ដង៕
January 22, 2018
តារាចម្រៀងចិន Nicholas Tse បង្ហាញពីតិចនិកធ្វើម៉ូដសក់ល្បីកាលពី18ឆ្នាំមុន
តទៅនេះគឺជាសម្រង់ព័ត៌មានចេញពីគេហទំព័រ Kenh14 នៅថ្ងៃទី22 ខែមករា ឆ្នាំ 2018 ដែលបានចេញផ្សាយថា តារាចម្រៀងចិនល្បីឈ្មោះលោក Nicholas Tse បានទម្លាយរូបភាពជាច្រើនសន្លឹកនៅលើបណ្ដាញទំនាក់ទំនងសង្គម ដែលស្ដែងឱ្យឃើញពីតិចនិកធ្វើម៉ូដសក់ល្បីរបស់លោកកាលពី18ឆ្នាំមុន ដែលកាលនោះមិនទាន់មានឧបករណ៍ច្នៃម៉ូដសក់ទំនើបៗដូចពេលបច្ចុប្បន្ននៅឡើយ ដែលធ្វើឱ្យមហាជនអ្នកគាំទ្ររូបលោក មានារភ្ញាក់ផ្អើល និងនឹកស្មានមិនដល់ទាល់តែសោះ។
តារាចម្រៀងរូបនេះបានបង្ហើបឱ្យដឹងដែរថា កាលពី18ឆ្នាំមុន មុនពេលឡើងសម្ដែងនៅលើឆាក ឬកម្មវិធីសម្ភាសនៅក្នុងស្ថានីយទូរទស្សន៍នីមួយៗម្ដងៗ លោកបានសម្រេចចិត្តយកឆ្នាំងអ៊ុតសម្លៀកបំពាក់ មកអ៊ុតសក់របស់លោកឱ្យត្រង់គ្រប់ពេល ហើយវាពិតជាមានផលលំបាកណាស់ ព្រោះកាលនោះនៅមិនទាន់មានឧបករណ៍ធ្វើម៉ូដសក់ទំនើបៗនៅឡើយទេ។ ស្របគ្នានោះដែរ មានអ្នកគាំទ្រតារាប្រុសរូបនេះជាច្រើនបានចូលទៅបញ្ចេញមតិថា «នេះមិនត្រឹមតែជារឿងដែលមិននឹកស្មានដល់នោះទេ តែវាថែមទាំងជារឿងដ៏គួរឱ្យអស់សំណើចទៀតផង តើលោកច្បាស់ជាចង់ក្លាយខ្លួនជាតារាកំប្លែងហើយមែនទេ?»។
ដើម្បីឱ្យកាន់តែជ្រាបច្បាស់បន្ថែមទៀត សូមទស្សនារូបភាពទាំងឡាយខាងក្រោមនេះ៖
January 22, 2018
ភាពយន្ដថៃល្បី Malila The Farewell Flower ឈ្នះពានរង្វាន់មហោស្រពភាពយន្ដនៅទីក្រុងប៊ូសាន
តាមរយៈសារព័ត៌មាន Mthai ដែលបានចេញផ្សាយនៅថ្ងៃទី22 ខែមករា ឆ្នាំ2018 នេះ បានឱ្យដឹងថា ការបើកបង្ហាញខ្លួនរបស់ខ្សែភាពយន្ដថៃនៅក្នុងឱកាសមហោស្រពភាពយន្ដប្រចាំតំបន់អាស៊ី នៅក្នុងទីក្រុង ប៊ូសាន ប្រទេសកូរ៉េខាងត្បូង ដែលនៅក្នុងនោះកំពូលខ្សែភាពយន្ដខ្នាតធំដ៏ល្បីល្បាញប្រចាំឆ្នាំរបស់ប្រទេសថៃ ដែលមានចំណងជើងថា “Malila The Farewell Flower” ឫ “បាយសីម្លិះលា” បានឈ្នះពានរង្វាន់ភាពយន្ដដែលល្អបំផុតប្រចាំឆ្នាំ2018នេះ។
ខ្សែភាពយន្តខ្នាតធំខាងលើនេះ ត្រូវបានដឹកនាំសម្ដែងដោយលោក នុឈី អៈនុឆា ប៊ុណយៈវ៉ាន់ថៈណៈ និងសម្ដែងដោយតារាល្បីឈ្មោះពីរដួងគឺលោក វៀរ៍ ស៊ុកុនលៈវ៉ាត់ និង អូ អនុឈីត។ ស្របគ្នានោះដែរ តារាសម្ដែងរូបស្រស់សង្ហា វៀរ៍ ស៊ុគុនលៈវ៉ាត់ បានឈ្នះពានរង្វាន់ Face of Asia Award តារាឯកភាពយន្ដអាស៊ីដែលមានអ្នកគាំទ្រចាប់អារម្មណ៍ខ្លាំងជាងគេបំផុត។ យ៉ាងណាមិញ អ្នកដឹកនាំរឿង នុឈី អៈនុឆា បានបង្ហើបប្រាប់អ្នកសារព័ត៌មានថៃថា រឿងនេះបានបរិយាយពីការរៀបចំបាយសីស្លាធម៌ ដោតក្រងជាក្បាច់ដោយផ្កាម្លិះលា ដើម្បីអន្ទងហៅព្រលឹងមនុស្សដែលខ្លួនស្រឡាញ់ឱ្យវិលត្រឡប់មកវិញ។ ភាពយន្ដនេះទៀតសោត បានដាក់បញ្ចាំងនៅក្នុងពិធីមហោស្រពភាពយន្ដជាច្រើនប្រទេស ដូចជាសិង្ហបុរី តៃវ៉ាន់ ឥណ្ឌា និងកូរ៉េខាងត្បូងផងដែរ។
លោក នុឈី អៈនុឆា បានបញ្ជាក់ផងដែរថា បើទោះបីជាខ្សែភាពយន្ដធំមួយនេះបានឆ្លុះបញ្ជាំងពីសង្គមក្រុមមនុស្សស្រឡាញ់ភេទដូចគ្នាក្ដី ក៏ប៉ុន្ដែ លោករំពឹងទុកថា លោកនឹងព្យាយាមយកខ្សែភាពយន្ដល្បីមួយនេះ ទៅដាក់បញ្ជាំងនៅក្នុងទីផ្សារភាពយន្ដក្នុងបណ្ដាប្រទេសធំៗដូចជាប្រទេស ចិន ស្វ៊ីស ទីក្រុងឡុងដ៍នៃចក្រភពអង់គ្លេស និងមានគោលបំណងទៅដណ្ដើមពានរង្វាន់នៅសហរដ្ឋអាមេរិកទៀតផង៕
សូមទស្សនាវីដេអូរឿងខាងក្រោមនេះ៖

January 22, 2018
ភាគបញ្ចប់នៃកំពូលភាពយន្ដ Maze Runner: The Death Cure ធ្វើឱ្យទស្សនិកជនអត់ទ្រាំមិនទស្សនាមិនបាន
តាមរយៈសារព័ត៌មាន Khaosod នៅថ្ងៃទី22 ខែមករា ឆ្នាំ 2018 បានឱ្យដឹងថា ភាគបញ្ចប់នៃកំពូលខ្សែភាពយន្ដបែបវិទ្យាសាស្ត្រ “Maze Runner: The Death Cure” បានធ្វើឱ្យកក្រើកទីផ្សារភាពយន្ដនៅក្នុងឆ្នាំ 2018 នេះ ដែលមានមហាជនរង់ចាំទស្សនាយ៉ាងអន្ទះសា។
ភាគបញ្ចប់នៃ The Maze Runner ត្រូវបាននិទានដោយមេដឹកនាំក្រុម Thomas ដែលបានដឹកនាំក្រុម Gladers ដែលបានរត់គេចចូលទៅក្នុងបេសកកម្មគ្រោះថ្នាក់បំផុតចុងក្រោយមួយ ដើម្បីជួយមិត្តភ័ក្តិ។ ពួកគេត្រូវលួចចូលក្នុងទីក្រុងចុងក្រោយ ជាទីតាំងស្ថិតក្រោមការគ្រប់គ្រងរបស់អង្គការ WCKD ដែលអាចប្រែក្លាយជាព្រៃវង្វេងដ៏ស្លាប់រស់មួយ។ អ្នកដែលអាចនៅរស់រានមានជីវិតចេញមកវិញបាន គឺជាអ្នកដែលបានទទួលចម្លើយដែលក្រុម Gladers តែងសួរ ចាប់ពីពេលពួកគេចូលក្នុងព្រៃវង្វេងដំបូង។
គួរបញ្ជាក់ផងដែរថា ភាគចុងក្រោយនៃកំពូលខ្សែភាពយន្ដ Maze Runner: The Death Cure មានដាក់បញ្ចាំងនៅលើផ្ទាំងសំពត់សនៅក្នុងប្រទេសកម្ពុជា នាថ្ងៃទី23 ខែមករា ឆ្នាំ2018 នេះហើយ ដែលភាគបញ្ជប់នេះ មានការចូលរួមសម្ដែងដោយកំពូលតារាល្បីៗដូចជា Dylan O’Brien ( សម្ដែងជា Thomas ) Thomas Brodie Ki Hong Lee Kaya Scodelario Will Poulter និងតារាសម្ដែងជើងចាស់ល្បីៗជាច្រើនរូបទៀតផងដែរ៕
January 22, 2018
Mario Maurer អះអាងលែងបើករថយន្ដប្រជែងនៅតាមផ្លូវទៀតហើយ
តាមរយៈសារព័ត៌មាន Khaosod បានចេញផ្សាយនៅថ្ងៃទី 19 ខែមករា ឆ្នាំ2018 បានចេញផ្សាយថា ក្រោយពីតារាសម្ដែងឯកប្រុស Mario Maurer បានបើករថយន្ដប្រណីតរបស់ខ្លួនប្រជែងមុខរថយន្ដតាក់ស៊ីបណ្ដាលឱ្យមានជម្លោះជេរគ្នាទៅវិញទៅមក រហូតដល់អ្នកបើកតាក់ស៊ីក្ដៅស្លឹកត្រចៀកខ្លាំង ក៏ទាញចម្ពាមកៅស៊ូ មកបាញ់កញ្ចក់រថយន្ដរបស់តារាសម្ដែងប្រុសរូបនេះ បែកខ្ចាយហើយនោះ ព័ត៌មាននេះ បានវាយប្រហារប្រជាប្រិយភាពរបស់តារាសម្ដែងរូបនេះយ៉ាងខ្លាំងក្លា រហូតដល់លោកបានផ្ដល់បទសម្ភាសន៍ជាមួយអ្នកសារព័ត៌មានជាសាធារណៈ និងអះអាងលែងបើករថយន្ដប្រជែងគ្នានៅតាមដងផ្លូវទៀតហើយ។
នៅក្នុងកម្មវិធី The New King Power Rangnam តារាសម្ដែងេកប្រុសខាងលើ បានបកស្រាយរឿងកន្លងទៅនេះ ប្រាប់អ្នកសារព័ត៌មានថា « ខ្ញុំមិនចង់និយាយអ្វីច្រើនជាងនេះទេ បញ្ហានោះមានការទាស់ស្ដីច្រើនខ្លះដែរ តែខ្ញុំក៏ព្រមទទួលស្គាល់ថាខ្លួនជាអ្នកខុសផងដែរ ដែលបានបើកឡានប្រជែងមុខគាត់ ទើបបានជាខ្ញុំសុំទោសបងប្រុសអ្នករត់តាក់ស៊ីហើយដែរ។ គាត់ក៏បានសុំទោសមកកាន់ខ្ញុំវិញ ហើយខ្ញុំជាអ្នកទទួលខុសត្រូវសងថ្លៃខូចខាត ដើម្បីឱ្យគ្រប់យ៉ាងចប់ទៅបានយ៉ាងងាយស្រួល»។
យ៉ាងណាក៏ដោយ លោក Mario ក៏បានបន្ដប្រាប់បញ្ចាក់បន្ថែមថា « ខ្ញុំមិនបានគិតថា រឿងនេះបានក្លាយជារឿងធំយ៉ាងដូច្នោះឡើយ តាមការពិតទៅនៅថ្ងៃកើតហេតុ ខ្ញុំក៏មានអារម្មណ៍ខឹងខ្លាំងផងដែរ តែខ្ញុំបានរំងាប់អារម្មណ៍វិញ ហើយមិនចង់បំផ្លាញអ្វី ឬប្រើហឹង្សាដាក់បងប្រុសនោះឡើយ។ ហេតុផលដែលធ្វើខឹងបែបខណៈនោះគឺ ម្នាក់ៗខឹងរៀងខ្លួន និងចង់ឈ្នះចាញ់រៀងខ្លួន តែយ៉ាងណាមិញ ខ្ញុំក៏បានប្រាប់ប៉ូលិសឱ្យបញ្ចប់រឿងក្ដីមួយនោះ ព្រមទាំងបង់ឱ្យប៉ូលិសម្នាក់ 1000 បាត និងសងថ្លៃជំងឺចិត្ត ព្រមទាំងសំណងជួសជុលរថយន្ដផងដែរ»៕
January 19, 2018
នោះ!!…Angelina Jolie កំពុងមានទំនាក់ទំនងស្នេហាថ្មីជាមួយតារាចម្រៀងកម្ពុជា
តាមរយៈសារព័ត៌មាន Teenee បានចេញផ្សាយនៅថ្ងៃទី 19 ខែមករា ឆ្នាំ 2018 នេះបានឱ្យដឹងថា បន្ទាប់ពីបានចែកផ្លូវជាមួយអតីតស្វាមី លោក Brad Pitt មិនទាន់បានយូរប៉ុន្មានផង តារាសម្ដែងស្រីល្បីឈ្មោះ Angelina Jolie ស្រាប់តែលេចឮដំណឹងមកថា នៅទីបំផុតមានបុរសថ្មីវ័យក្មេងជាង បានយកឈ្នះចិត្តរបស់អ្នកនាងហើយ។
ព័ត៌មានដែលបានទម្លាយចេញមកជាសាធារណៈមួយនេះ គឺបានចេញផ្សាយពីសំណាក់សារព័ត៌មានកម្សាន្ដដ៏ធំមួយនៅសហរដ្ឋអាមេរិក បានចេញផ្សាយថា អ្នកនាង Angelina Jolie កំពុងមានទំនាក់ទំនងស្នេហាថ្មីជាមួយតារាចម្រៀងកម្ពុជា ដែលមានឈ្មោះថា PraCh Ly ជាតារាចម្រៀងរ៉េបជនជាតិកម្ពុជា ហើយក៏ជាមិត្តស្និទ្ធស្នាលជាមួយអ្នកនិពន្ធរឿង និងជាសកម្មជនសិទ្ធិមនុស្ស លោកស្រី អ៊ឹង លួង។ កន្លងមក តារាស្រីល្បីឈ្មោះរូបនេះ បានប្រាស្រ័យទាក់ទងគ្នាយ៉ាងល្អប្រសើរជាមួយអ្នកទាំងពីរខ្លាំងណាស់ រហូតដល់បានបង្កើតទំនាក់ទំនងផ្អែមល្ហែមជាមួយតារាចម្រៀងប្រុសខាងលើនេះ។
គួរបញ្ជាក់ផងដែរថា កាលពីថ្ងៃទៅថ្វាយបង្គំព្រះពុទ្ធ និងធ្វើបុណ្យនៅក្នុងអារាមខ្មែរមួយក្នុងទីក្រុង Long Beach រដ្ឋ California សហរដ្ឋអាមេរិកជាមួយកូនទាំង 5 នាក់ រួមទាំងវត្តមានលោកស្រី អ៊ឹង លួង នោះ សាព័ត៌មានដដែលបានទម្លាយបន្ថែមឱ្យដឹងថា នៅថ្ងៃនោះ អ្នកនាង Angelina Jolie បណ្ដើរគ្នាជាមួយលោក PraCh Ly ហើយលោកក៏ជាអ្នកក្លាយជាមនុស្សសំខាន់របស់អ្នកនាងចាប់តាំងពីថ្ងៃនោះមក ជាពិសេស លោកមានភាពស្និទ្ធ និងត្រូវចិត្តត្រូវថ្លើមគ្នាខ្លាំងបំផុតជាមួយកូនប្រុសចិញ្ចឹមជនជាតិខ្មែរគឺ Maddox៕
January 19, 2018
«បើស្រឡាញ់ ហេតុអ្វីបងមិនខ្វល់» ចាក់ដោតអារម្មណ៍យុវវ័យឱ្យស្រក់ទឹកភ្នែក
បើតាមរយៈបណ្ដាញសង្គមហ្វេសប៊ុករបស់តារាចម្រៀងស្រីរូបស្រស់ផូរផង់កញ្ញា សុខ ពិសី ត្រូវបានគេដឹងថា ជាតារាចម្រៀងដ៏មានប្រជាប្រិយភាព ព្រមទាំងកំពុងទទួលបានការគាំទ្រយ៉ាងច្រើនលើសលប់ពីសំណាក់មិត្តៗយុវវ័យ។ ថ្មីៗនេះ MV នៃបទចម្រៀងថ្មីបែបមនោសញ្ចេតនារបស់នាងកំពុងតែធ្វើឱ្យមិត្តៗយុវវ័យពេញចិត្តយ៉ាងខ្លាំង ដែលបទនោះមានចំណងជើងថា៖ «បើស្រឡាញ់ ហេតុអ្វីបងមិនខ្វល់» ក្នុងនោះដែរ យើងគេឃើញមានហ្វ៊ែនៗរបស់កញ្ញា សុខ ពិសី ចែករំលែកតៗគ្នាជាច្រើននាក់ផងដែរ។
ជាក់ស្ដែង រាល់បទចម្រៀងរបស់តារាស្រីសាច់សខ្ចីរូនេះហាក់កំពុងតែកក្រើកពេញបណ្ដាញហ្វេសប៊ុក ខណៈដែល MV បទចម្រៀងថ្មីបែបមនោសញ្ចេតនារណ្ដំចិត្តយុវវ័យដែលមានចំណងជើងថា «បើស្រឡាញ់ ហេតុអ្វីបងមិនខ្វល់» បានចេញ Full MV មកហើយ ។ ជាងនេះទៅទៀត គ្រាន់តែ MV បទថ្មីរបស់កញ្ញា សុខ ពិសី ចេញផ្សាយលើបណ្ដាញសង្គមមិនទាន់បានប៉ុន្មានម៉ោងផង ស្រាប់តែមានអ្នកចូលទស្សនាយ៉ាងច្រើនសន្ធឹកសន្ធាប់ទៅហើយ។ ចំពោះបទថ្មីនេះដែរ មិនត្រឹមតែពីរោះនោះទេ សូម្បីអត្ថន័យសាច់រឿងក៏ចាក់ដោតបេះដូងអ្នកទស្សនាឱ្យសឹងស្រក់តែទឹកភ្នែកដោយមិនដឹងខ្លួនទៀតផង៕
ចង់ដឹងថា សាច់រឿងស្នេហាក្នុងបទចម្រៀង «បើស្រឡាញ់ ហេតុអ្វីបងមិនខ្វល់» មានភាពកម្សត់ និងសណ្ដំបេះដូង រំជួលអារម្មណ៍មិត្តយុវវ័យយ៉ាងណាខ្លះនោះ សូមទស្សនាវីដេអូខាងក្រោមនេះ៖
https://www.youtube.com/watch?v=beLvOHYq-O8
January 18, 2018
សមាជិកក្រុមចម្រៀង 2PM បង្ហើបថា លោកធ្លាប់មានជំងឺបាក់ទឹកចិត្តដូច Jonghyun
តាមរយៈសារព័ត៌មាន Teenee ដែលបានចេញផ្សាយនៅថ្ងៃទី18 ខែមករា ឆ្នាំ2018 នេះបានឱ្យដឹងថា តារាចម្រៀងប្រុសលោក Wooyoung ដែលជាសមាជិកក្រុមចម្រៀង 2PM បានចេញមុខមកអះអាងថា លោកធ្លាប់ស្ថិតនៅក្នុងស្ថានភាពបាក់ទឹកចិត្តដូចអតីតតារាចម្រៀងប្រុស Kim Jonghyun សមាជិកក្រុមចម្រៀង SHINee ដែរ។
កាលពីថ្ងៃទី15 ខែមករា កន្លងទៅ តារាប្រុសរូបសង្ហាម្នាក់នេះ បានចេញមុខនៅក្នុងកម្មវិធីសម្ភាសរបស់ស្ថានីយទូរទស្សន៍ TV Report ក្នុងកម្មវិធីប្រ៉ូម៉ូតអាល់ប៊ុមចម្រៀងថ្មីរបស់លោក ដែលជាអាល់ប៊ុមចម្រៀងទោលជាលើកទី 2 ។ លោក Wooyoung បានផ្ដល់បទសម្ភាសថា «កាលពីពេលកន្លងទៅ ខ្ញុំបានដឹងពីព័ត៌មានដ៏រន្ធត់របស់តារាចម្រៀង Kim Jonghyun សមាជិកក្រុមចម្រៀង SHINee ហើយខ្ញុំជឿថា គាត់សម្រេចចិត្តបែបនេះ ក៏ព្រោះតែគាត់រងសម្ពាធផ្លូវចិត្តខ្លាំងក្លាជាងខ្ញុំ។ បើគិតឱ្យស៊ីជម្រៅបន្តិច ខ្ញុំអាចយល់ពីជម្រៅចិត្តរបស់គាត់ ហើយខ្ញុំក៏ជឿថា នៅមានតារាល្បីៗជាច្រើនទៀតកំពុងស្ថិតក្នុងស្ថានភាពជំងឺដូចគាត់ដែរ។ ខ្ញុំក៏ជាអ្នកជំងឺបាក់ទឹកចិត្តម្នាក់ដែរ កាលពី 5 ឆ្នាំមុន ហើយខ្ញុំបានជួបហេតុការណ៍ស្រដៀងគ្នានឹង Jonghyun ដែរ»។
តារាប្រុសរូបនេះ បានបន្ដបញ្ជាក់ថា «ជំងឺបាក់ទឹកចិត្តរបស់ Kim Jonghyun ដូចរឿងរ៉ាវរបស់ខ្ញុំដែរ។ នៅពេលនោះ ខ្ញុំចង់យកឈ្នះដោយចិត្តខ្លួនឯងដោយវិធីច្រើនយ៉ាងដែលគិតថាអាចធ្វើទៅបាន។ ខ្ញុំបាននឹកឃើញពីសមាជិកក្រុមចម្រៀង 2PM ទើបខ្ញុំអាចបញ្ចប់រឿងនោះបាន ក៏ប៉ុន្ដែ វាមិនមែនជារឿងងាយស្រួលប៉ុន្មានទេសម្រាប់ខ្ញុំ។ ខ្ញុំបានព្យាយាមគិតថា ខ្ញុំចាំបាច់ត្រូវតែបញ្ចប់បញ្ហាមួយនេះដោយភាពរឹងមាំរបស់ខ្ញុំតែម្ដង»។
ចុងបញ្ចប់ លោក Wooyoung បានយកឈ្នះជំងឺបាក់ទឹកចិត្ត និងបានប្រាប់បន្ថែមថា «ខ្ញុំបានរកឃើញវិធីសាស្ត្រដោះស្រាយបញ្ហាតាមបែបផែនរបស់ខ្ញុំ គឺខ្ញុំទៅរៀនគូររូប និងជ្រមុជទឹក ហើយខ្ញុំបានស្វែងរកបទពិសោធ និងជំនួយពីក្រុមបងៗដែលមានអាយុច្រើនជាងខ្ញុំ ព្រមទាំងចំណាយពេលអានសៀវភៅ និងរឿងក្ដីដែលកើតមាននៅក្នុងសង្គមជាច្រើនផងដែរ»៕
January 18, 2018
Selena Gomez ប្រកាសឆ្អែតឆ្អន់ និងលែងយោគយល់ចំពោះពាក្យរិះគន់របស់ម្ដាយ
បើតាមការចេញផ្សាយរបស់សារព័ត៌មាន Radar Online នៅថ្ងៃទី18 ខែមករា ឆ្នាំ2018 បានឱ្យដឹងថា តារាចម្រៀងអាមេរិកដ៏ស្រស់ផូរផង់ គឺកញ្ញា Selena Gomez អាចឈានដល់ការកាត់ផ្តាច់ទំនាក់ទំនងជាមួយម្តាយបង្កើតរបស់ខ្លួនដោយសារតែអត់ទ្រាំលែងបាននឹងការរិះគន់ដដែលជាដដែលរបស់អ្នកម្តាយរូបនេះមកលើគូស្នេហ៍ជាតារាចម្រៀងដូចគ្នា ដែលទើបត្រូវរ៉ូវគ្នាសាជាថ្មី គឺកំពូលតារាចម្រៀងដើមកំណើតកាណាដា លោក Justin Bieber។
ប្រាកដណាស់ ទំនាក់ទំនងរបស់ Selena Gomez និង Justin Bieber ពិតជាបានវិលត្រឡប់មករកភាពផ្អែមល្ហែមឡើងវិញមែន ហើយពុំមាននរណាម្នាក់អាចបញ្ឈប់រឿងនេះបានឡើយ រួមទាំងអ្នកម្តាយដែលមានក្តីកង្វល់ច្រើនរបស់តារាចម្រៀងប៉ុបវ័យ25ឆ្នាំរូបនេះ គឺលោកស្រី Mandy Teefey ផង។
បន្ទាប់ពីលោកស្រី Teefey បាននិយាយយ៉ាងបើកចំហថា លោកស្រីមិនសប្បាយចិត្តសោះ អំពីជម្រើសរបស់កូនស្រីរបស់ខ្លួន ក្នុងការទៅត្រូវរ៉ូវគ្នាវិញជាមួយតារាចម្រៀង Justin Bieber វ័យ23ឆ្នាំ។ ប្រភពជិតស្និទ្ធនឹង Selena បានបង្ហើបឱ្យដឹងថា តារាចម្រៀងអាមេរិកដែលមានប្រជាប្រិយជាខ្លាំងនៅក្នុងស្រទាប់យុវវ័យជុំវិញពិភពលោករូបនេះ នឹងមិនឈរឱបដៃមើល ហើយបណ្តោយឱ្យម្តាយរបស់ខ្លួន និយាយរិះគន់ពេញៗមាត់ទៅលើ Justin បែបនេះឡើយ។ ប្រភពដដែលបានបន្ថែមថា Selena បានឆ្អែតឆ្អន់ជាមួយការយោគយល់អធ្យាស្រ័យដល់ម្តាយខ្លួនហើយ ដោយអ្នកទាំងពីរ សព្វថ្ងៃនេះ គឺមិននិយាយរកគ្នាទាល់តែសោះ។ លោកស្រី Mandy អាចនិយាយរិះគន់តាមតែចិត្តខ្លួន ប៉ុន្តែទង្វើនេះគឺបានត្រឹមតែរុញច្រាន Selena ឱ្យឃ្លាតកាន់តែឆ្ងាយទៅប៉ុណ្ណោះ។
គួរជម្រាបថា រឿងរ៉ាវវិវាទរវាងម្តាយនឹងកូននេះ បានផ្ទុះឡើងនៅលើបណ្តាញសារព័ត៌មាននានា បន្ទាប់ពី កញ្ញា Selena Gomez បានសម្រេចចិត្តចំណាយពេលវេលាឆ្លងឆ្នាំសកលថ្មីៗនេះ ជាមួយ Justin Bieber នៅឯប្រទេសម៉ិកស៊ិក ដោយមិនបាននៅរីករាយជាមួយក្រុមគ្រួសាររបស់នាងដូចសព្វដង ហើយមកទល់ពេលនេះស្ថានការណ៍ គឺពុំបានល្អប្រសើរឡើងឡើយ៕
January 18, 2018