Author: អេបិល

នៅថ្ងៃម្សិលមិញនេះ អ្នកនាង ទឹម រដ្ឋា បានបង្ហោះរូបភាពជាច្រើនសន្លឹកអមដោយសារខ្លះៗ ដែលបានប្រាប់ពីមូលហេតុពិតឱ្យមហាជនបានជ្រាបពីការដែលនាងមិនមានវត្តមានក្នុងការបង្ហាញជូននូវការសម្ដែងឱ្យពុកម៉ែបងប្អូនប្រជាពលរដ្ឋខ្មែរបានទស្សនា បានជួប និងបានឃើញរូបនាងដោយផ្ទាល់នាឱកាសមហាសង្ក្រាន្ដឆ្នាំថ្មីនៅលើទឹកដីទីក្រុងអង្គរ ខេត្ត សៀមរាបនាពេលកន្លងមកនោះ។

បើទោះបីជាមានឱកាសមាស ឱកាសប្រាក់នៅក្នុងថ្ងៃប្រារព្ធពិធីអង្គរសង្ក្រាន្ដយ៉ាងណាក្ដី អ្នកនាងទឹម រដ្ឋា បានអះអាងប្រាប់ថា «ជារៀងរាល់ពេលចូលឆ្នាំខ្មែរប្រពៃណីជាតិរយៈពេល 3ថ្ងៃ មានគេសួរខ្ញុំច្រើនណាស់នូវពាក្យដដែលៗថា ហេតុអឺអត់ឃើញខ្ញុំទៅចូលរួមមហាសង្រ្កាន្ត សម្ដែងរាំច្រៀងនៅខេត្តសៀមរាបនឹងគេអ៊ីចឹង? ខ្ញុំបានប្រាប់ទៅគេវិញថា អត់បានចូលរូមទេ ព្រោះខ្ញុំចង់ចំណាយពេលវេលា 3ថ្ងៃដ៏សែនពិសេសមួយនេះនៅជាមួយនឹងគ្រួសារដ៏សែនកក់ក្ដៅរបស់ខ្ញុំ ដូចជាបងប្អូនទាំងអស់គ្នាខ្លះក៏អ៊ីចឹងដែរ»។

ជាការពិតណាស់ តាមការបង្ហោះរូបភាពជាហូរហែមកត្រូវបានគេដឹងថា ក្នុងរយៈពេល 3ថ្ងៃនៃពិធីបុណ្យចូលឆ្នាំថ្មីកន្លងទៅនេះ តារាសម្តែងទឹម រដ្ឋា បាននាំអ្នកម្តាយ និងក្រុមគ្រួសារទៅដើរលេងសង្ក្រាន្តដល់ទៅ 2ខេត្តយ៉ាងសប្បាយរីករាយ គឺសង្រ្កាន្តព្រៃវែង និងបាត់ដំបង។ អ្នកនាងបន្ដថា «ព្រោះពេលវេលាធម្មតាយើងរវល់ធ្វើការរកស៊ីរៀងៗខ្លួន ហើយក៏មិនមានពេលបានផ្ដល់ឱ្យគ្នាជាញឹកញាប់ទេ អ៊ីចឹងឱកាសនេះជាឱកាសដ៏ល្អដែលយើងបានជូបជុំគ្នាដែលមិនអាចខ្វះបាន ហើយខ្ញុំក៏សុំទោសដល់បណ្ដាក្រុមការងារទាំងអស់ដែលតែងតែទាក់ទងមកខ្ញុំ ហើយខ្ញុំមិនបានទទួល តែឥឡូវពិធីបុណ្យចូលឆ្នាំថ្មីត្រូវបានបញ្ចប់ហើយ ហើយខ្ញុំក៏មកទទួលការងារវិញដែរ»៕

បើទោះជាអាកាសធាតុក្តៅបន្តិចក៏ដោយ តែវាមិនអាចរារាំងដំណើរកម្សាន្តដ៏សប្បាយរីករាយ និងពោរពេញដោយស្នាមញញឹម​ក្រោមម្លប់នៃសុខសន្តិភាពរបស់អ្នកទេសចរជាតិ និងបរទេសបានឡើយនាព្រឹត្តិការណ៍អង្គរសង្ក្រាន្ត​ ឆ្នាំ2018នេះ​។ ល្បែង​ប្រជាប្រិយ របាំប្រពៃណីខ្មែរ សិល្បៈ​ និងការតាំងពិព័រណ៍ចម្រុះបានជំរុញទឹកចិត្តភ្ញៀវទេសចរគ្រប់រូបមិនឱ្យអល់អែករារែកក្នុងការផ្តិតយកទស្សនីយភាពទុកជាអនុស្សាវរីយ៍ឡើយ និងកាន់តែអស្ចារ្យថែមទៀតនោះ គឺព្រឹត្តិការណ៍អង្គរសង្ក្រាន្ត​ ឆ្នាំ2018នេះ មានការលេងល្បែងប្រជាប្រិយខ្មែរជាច្រើនប្រភេទ និងមានការច្រៀងរាំ សម្តែងរបាំ ល្ខោនយីកេ ផ្ទាំងទស្សនីយភាពប្លែកៗ សប្បាយៗជាច្រើនទៀត និងការបង្ហាញម៉ូដសម្លៀកបំពាក់ច្នៃប្រឌីតស្អាតៗជាច្រើនម៉ូដ ដែលជាស្នាដៃកូនខ្មែរពិតៗទៀតផង។

ភាពសប្បាយរីករាយនេះនឹងជំរុញការផ្សព្វផ្សាយវប្បធម៌ ប្រពៃណី សម្លៀកបំពាក់បុរាណខ្មែរទៅកាន់ភ្ញៀវបរទេសទូទាំងសកលលោកដែលបានមកចូលរួមទស្សនាកម្មពិធីព្រឹត្តិការណ៍អង្គរសង្ក្រាន្ត​ ឆ្នាំ2018នេះឱ្យបានស្គាល់កាន់តែច្បាស់ ដោយអ្នករៀបចំកម្មវិធីបានធ្វើការដាក់តាំង និងធ្វើការដើរបង្ហាញម៉ូដសម្លៀកបំពាក់បែបបុរាណច្នៃលាយសម័យ ដែលផលិតចេញពីវត្ថុសម្ភារនានា ជាស្នាដៃកូនខ្មែរដែលធ្លាប់យកទៅប្រកួតនៅលើឆាកអន្ដរជាតិមកបង្ហាញជូនទស្សនាទៀតផង។ ចង់ដឹងថា សម្រស់នារីខ្មែរ និងឈុតបុរាណច្នៃ មានសោភ័ណភាព និងប្រណីតភាពបែបណានោះ សូមទស្សនារូបភាពទាំងអស់ខាងក្រោមនេះ៖

កាលពីពេលថ្មីៗនេះ ក្រោយពីតារាចម្រៀងស្រីប្រចាំផលិតកម្មថោន កញ្ញា ស៊ូ​ ស៊ីរិកា បានប្រកាសដើរចេញពីវិថីសិល្បៈ និងទៅតាំងជំហរលើអាជីពថ្មីមួយដែលមិនមានការរងសម្ពាធខាងផ្លូវចិត្តនោះ ប៉ុន្មានម៉ោងក្រោយមកទៀត ស្រាប់តែ ឌីជេ ក្ដឹប ជាតារាចម្រៀង និងជាអ្នកនិពន្ធបទភ្លេងថ្មីនៅផលិតកម្មរស្មីហង្សមាស បានចេញឃ្លីបវីដេអូរយៈពេលខ្លីប្រកាសថា ខ្លួននឹងលាឈប់ពីអាជីពនិពន្ធបទចម្រៀងមួយនេះ។

លោក ចាន់ សំណាង ហៅឌីជេ ក្ដឹប បានរៀបរាប់រឿងរ៉ាវជីវិតផ្ទាល់ខ្លួននៅក្នុងឃ្លីបវីដេអូនោះថា លោកបានតស៊ូជាមួយអាជីពសិល្បៈជាអ្នកនិពន្ធបទចម្រៀងនេះអស់រយៈពេលជាង 9ឆ្នាំមកហើយ លោកពិតជានឿយហត់មែនទែន ដែលរូបលោកផ្ទាល់ត្រូវបោះជំហានពុះពារជម្នះគ្រប់ឧបសគ្គនៅលើវិថីមួយនេះតែម្នាក់ឯង។ ពោពេញទៅដោយអារម្មណ៍ក្ដុកក្ដួលអួលដើមក និងទប់ទឹកភ្នែកមិនបាន លោក សំណាង បានប្រាប់មហាជនថា «ខ្ញុំបានតាំងចិត្តបញ្ចប់អាជីពជាអ្នកនិពន្ធនេះ ចាប់តាំងពីប៉ារបស់ខ្ញុំ គាត់លួចទៅដើរលេងមានស្រីក្មេង ខ្ញុំបានតស៊ូម្នាក់ឯងអស់រយៈពេល 9ឆ្នាំហើយ តែវាគ្មានតម្លៃសម្រាប់ខ្ញុំទៀតទេ ខ្ញុំមិនចង់ឃើញគាត់ទៅចោលពួកខ្ញុំបែបនេះឡើយ ខ្ញុំសុខចិត្តទៅធ្វើការលក់ដូរជាមួយម៉ាក់ខ្ញុំធម្មតាវិញ ព្រោះអីខ្ញុំនៅសល់តែគាត់មួយទេ»។

ជាចុងក្រោយ អ្នកនិពន្ធ និងសម្រួលតន្ត្រីក្នុងបទ «រាំអីចេះ» រូបនេះបានបញ្ជាក់ប្រាប់អ្នកគាំទ្រទាំងអស់គ្នាថា «អរគុណបងប្អូនដែលបានស្រឡាញ់ និងគាំទ្រស្នាដៃរបស់ខ្ញុំកន្លងមក ហើយខ្ញុំរំពឹងទុកថា ខ្ញុំនឹងមានឱកាសត្រឡប់មកតែងនិពន្ធឡើងវិញ ប្រសិនបើខ្ញុំចង់.. »៕

ក្នុងរយៈពេល 3ថ្ងៃនៃពិធីបុណ្យចូលឆ្នាំថ្មីប្រពៃណីខ្មែរឆ្នាំ2018នេះ គេសង្កេតឃើញថា ចំនួនភ្ញៀវទេសចរដែលចូលមកទស្សនាកម្សាន្តនៅកម្ពុជាមានកំណើនដ៏គួរឱ្យចាប់អារម្មណ៍ ដោយក្នុងនោះបានកើនឡើងជាង33%។

ឯកឧត្តម ថោង ខុន រដ្ឋមន្រ្តីក្រសួងទេសចរណ៍បានមានប្រសាសន៍តាមបណ្តាញទំនាក់ទំនងសង្គមថា ភ្ញៀវអន្តរជាតិចូលមកកម្សាន្តនៅកម្ពុជាមានចំនួន 88,042 នាក់ កើនឡើង 33.37% ធៀបនឹងឆ្នាំ2017 ដែលមានចំនួន 66,011នាក់ ខណៈដែលភ្ញៀវទេសចរជាតិមានចំនួន 5,086,964 នាក់ កើនឡើង 23% ធៀបនឹងឆ្នាំ2017ដែលមានចំនួន 4,135,456។

តំបន់ដែលមានភ្ញៀវទេសចរទៅលេងច្រើនជាងគេគឺ ប្រាសាទអង្គរវត្ត ឬអង្គរសង្ក្រាន្តមានភ្ញៀវជាតិសរុបចំនួន1,780,016នាក់ កើន15.16% សរុបភ្ញៀវអន្តរជាតិ​មានចំនួន 36,694 នាក់ កើន14.25%។

គួរបញ្ជាក់ថា ភ្ញៀវទេសចរសរុបក្នុងឱកាសពិធីបុណ្យចូលឆ្នាំខ្មែរ រួមទាំងអង្គរសង្ក្រាន្តសៀមរាបផង មានចំនួន 5,175,006នាក់ កើន 23% (ធៀបនឹងឆ្នាំ2017 ដែលមានចំនួន 4,201,476 នាក់)៕

មួយរយៈកន្លងទៅនេះ គេសង្កេតឃើញតារាស្រីសិចស៊ី ដេននី ក្វាន់ បានចូលរួមការងារសង្គមក្នុងការចែករំលែកសេចក្ដីក្ដីស្រឡាញ់ជាមួយទឹកចិត្តសប្បុរសធម៌ពាំនាំនូវអំណោយ និងថវិកាមួយចំនួនទៅជូនដល់បងប្អូនជនពិការ មនុស្សចាស់ជរា ប្រជាពលរដ្ឋរស់នៅតំបន់ដាច់ស្រយាល និងឧបត្ថម្ភសម្ភារសិក្សាដល់កុមារា-កុមារីផងដែរ។ នាឱកាសចូលឆ្នាំថ្មីប្រពៃណីខ្មែរកន្លងទៅថ្មីៗនេះ នាងក៏បានឆ្លៀតពេលវេលាផ្ទាល់ខ្លួន នាំយកអំណោយទៅជូនបងប្អូនក្រីក្រដែលកំពុងប្រឈមនឹងជីវិតដ៏លំបាកនៅឯស្រុកកំណើតរបស់នាងក្នុងខេត្តព្រះវិហារដោយផ្ទាល់ដៃទៀតផង។

ដោយឡែកប៉ុន្មានម៉ោងមុននេះបន្ដិច តារាស្រីដែលធ្លាប់ជាប់បម្រាមរបស់ក្រសួងវប្បធម៌ និងវិចិត្រសិល្បៈ បានពោលពាក្យចាក់ដោតអារម្មណ៍ប្រិយមិត្តឱ្យក្ដុកក្តួលរំជួលចិត្ត និងប្រកាសតាមរកលោកយាយចំណាស់ម្នាក់ដែលកំពុងតែមានជីវភាពតោកយ៉ាក ហើយរស់នៅតែម្នាក់ឯងដោយប្រកបរបររើសអេតចាយលក់ចិញ្ចឹមជីវិត។ អ្នកនាង ដេននី ក្វាន់ បានរៀបរាប់ថា៖ «មានប្អូនស្រីម្នាក់គាត់បានផ្ញើវីដេអូ និងរូបភាពនេះមកឱ្យខ្ញុំ គាត់ប្រាប់ថា លោកយាយម្នាក់នេះគាត់រស់នៅខេត្តកំពង់ធំ គឺលំបាកខ្លាំងណាស់ រាល់ថ្ងៃគាត់ដើររើសអេតចាយមួយថ្ងៃបាន 1000រៀល ឬ2000រៀល ជួនពេលខ្លះក៏អត់។ នាងខ្ញុំពិតជាអាណិតលោកយាយខ្លាំងណាស់ ជាពិសេសពេលឮលោកយាយហៅឈ្មោះខ្ញុំ និងសុំការជួយពីនាងខ្ញុំ គឺទឹកភ្នែកខ្ញុំមិនដឹងមកពីណាទេ គឺហូរមិនឈប់រាល់ពេលមើលវីដេអូលោកយាយហៅឈ្មោះខ្ញុំ។ ខ្ញុំនឹងនាំយកអំណោយនិងថវិកាមួយចំនួនទៅជូនលោកយាយ និងលោកយាយចំនួនពីរនាក់ទៀតដែលជួបការលំបាកដូចគ្នានៅសប្តាហ៍ក្រោយ ។ និយាយទៅខ្ញុំត្រូវទៅក្នុងថ្ងៃនេះ តែដោយសាររវល់ពេក ឆ្លៀតមិនរួចទើបលើកទៅសប្តាហ៍ក្រោយ»៕

កាលពីពេលថ្មីៗនេះ នៅលើបណ្ដាញទំនាក់ទំនងសង្គមហ្វេសប៊ុកមានការភ្ញាក់ផ្អើលជាខ្លាំង នៅពេលដែលតារាចម្រៀងស្រីប្រចាំផលិតកម្មថោន កញ្ញា ស៊ូ ស៊ីរិកា ប្រកាសលាឈប់ និងលែងបន្ដដំណើរលើវិថីសិល្បៈខ្មែរទៀត ដោយនាងបានអះអាងថា នាងមានការនឿយហត់ ព្រមទាំងភ័យខ្លាចចំពោះវិស័យមួយនេះទៀតផង។

លើសពីទឹកចិត្តស្រឡាញ់ចំពោះវិស័យចម្រៀងដែលកញ្ញា ស៊ូ ស៊ីរិកា ធ្លាប់បានប្រកាស និងអះអាងខណៈដែលខ្លួនបានចូលប្រឡងក្នុងកម្មវិធីប្រឡងចម្រៀង The Voice Cambodia រដូវកាលទី1នោះ នាងបានខំព្យាយាម និងតស៊ូពុះពារមកដល់ដំណាក់កាលចុងបញ្ចប់ រហូតទទួលបានអ្នកគាំទ្រស្រឡាញ់ពេញចិត្ត ហើយស្គាល់រូបនាងកាន់តែច្រើនឡើងៗ។ នៅទីបំផុតតារាចម្រៀងរូបនេះបានចូលច្រៀង និងក្លាយជាតារាចម្រៀងស្រីប្រចាំផលិតកម្ម ថោន ក្រោយពីចប់ការប្រឡង។ តែគួរឱ្យចម្លែកខ្លាំងណាស់ នាងធ្វើឱ្យអ្នកគាំទ្ររន្ធត់អារម្មណ៍សឹងតែស្រក់ទឹកភ្នែកតាមរយៈពាក្យសម្ដីដែលបានបង្ហោះ និងរៀបរាប់យ៉ាងក្ដុកក្ដួលនៅលើហ្វេសប៊ុក។ នាងរៀបរាប់ថា ៖ «ឈប់ជាស្ថាពរ…ទីបំផុតខ្ញុំបានជីវិតរបស់ខ្ញុំមកវិញហើយ វិស័យដែលគួរឱ្យខ្លាច វិស័យតស៊ូគ្មានន័យ ហត់ណាស់! សង្ឃឹមថា ការងារថ្មីរបស់ខ្ញុំ បងប្អូននៅតែគាំទ្រហើយជួយទិញទាំងអស់គ្នាណា»។

បើតាមការបញ្ជាក់ប្រាប់អ្នកសារព័ត៌មាន តារាស្រីវ័យ 22 ឆ្នាំរូបនេះបានប្រាប់ថា ការងារនៅក្នុងផលិតកម្មថោននាពេលសព្វថ្ងៃនេះ នាងគ្មានកុងត្រាការងារទេ ពោលគឺ ប្រសិនបើនាងចង់ឈប់ ឬចង់បន្ដការងារទៅមុខទៀត នៅថ្ងៃណាក៏បានដែរ ក៏ប៉ុន្ដែនាងគ្មានគោលបំណងចង់ដើរចេញពីផលិតកម្មនេះ ទៅផលិតកម្មថ្មីនោះទេ នាងគ្រាន់តែចង់បានពេលវេលាដើម្បីសម្រាក និងឱ្យមានអារម្មណ៍ល្អ ដែលមិនមានការរងសម្ពាធពីការងារតែប៉ុណ្ណោះ ។ នាងគ្រោងនឹងចាប់ផ្ដើមអាជីពថ្មី ដែលនាងរំពឹងទុកថា បងប្អូននៅតែគាំទ្រនាងដដែល៕

អតីត​បវរកញ្ញា​ Miss universe កញ្ញា ប៊ី សុធារី បានទៅចូលរួម និងបង្ហាញវត្តមាននៅក្នុងក្បូនដង្ហែពិធីអង្គរសង្រ្កាន្ដឆ្នាំច សំរឹទ្ធិស័ក ព.ស2562  ឬគ.ស2018 កន្លងទៅថ្មីៗនេះ ដោយនាងបានឡើងសម្ដែង និងគ្រងសម្លៀកបំពាក់ឈុត “នាងសួគ៌” នៅលើក្បួនរចនាឧត្តមផែន “ផល្លានុផល” ធ្វើឱ្យមហាជនលាន់មាត់ស្ញើចសរសើរឥតឈប់អំពីសម្រស់របស់នាងដែលស័ក្តិសមឥតខ្ចោះជាមួយឈុតបុរាណខ្មែរមួយនេះ។

កញ្ញា ប៊ី សុធារី បានបញ្ជាក់ប្រាប់ថា «វាពិតជាមានកិត្តិយសណាស់សម្រាប់នាងខ្ញុំដែលបានមានវត្តមាននៅក្នុងក្បួនដង្ហែពិធីអង្គរសង្រ្កាន្តឆ្នាំនេះក្នុងតួអង្គជា “នាងសួគ៌” នៅក្នុងក្បួន “រចនាឧត្តម” ផែន “ផល្លានុផល” ជាក្បួនរចនាដ៏ឧត្តមដែលបង្ហាញពីការប្រើប្រាស់ធនធានដែលទទួលបានពីភាពសម្បូរសប្បាយ ដើម្បីកែច្នៃសម្រួលទៅដល់ជីវភាពរស់នៅប្រចាំថ្ងៃរបស់ប្រជាជាតិខ្មែរទាំងមូល អមដោយការតាក់តែងលម្អយ៉ាងប្រណីតក្នុងរចនាបថបុរាណដែលច្នៃចេញពីសម្លៀកបំពាក់អាពាហ៍ពិពាហ៍បែបប្រពៃណីខ្មែរ។ នៅអមសងខាងក្បួនមានយុវជនមកពីក្រុមល្បែងប្រជាប្រិយ កាន់កង្ហារខ្យល់យ៉ាងស្រស់ស្អាត អមដោយបទភ្លេង “សម្បត្តិរដ្ឋខេមរា” បង្ហើរសំឡេងយ៉ាងពីរោះតាមដងផ្លូវនៃក្បួនដង្ហែនាពេលនេះទៀតផង»។

យ៉ាងណាក្ដី រូបភាពដ៏ស្រស់សោភាស័ក្ដិសមសួនជានារីខ្មែរអង្គររបស់កញ្ញា ប៊ី សុធារី ក៏បានលេចឡើងនៅលើហ្វេសប៊ុកផ្លូវការរបស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាផងដែរ ។ ចង់ជ្រាបថា តើសម្រស់របស់បវរកញ្ញារូបនេះពេលគ្រងឈុតបុរាណខ្មែរមានសម្រស់សោភាបែបណានោះ សូមទស្សនារូបភាពទាំងអស់ខាងក្រោមនេះ៖