Author: អេបិល

ខណៈនេះ ឪពុករបស់តារាចម្រៀងប្រចាំផលិតកម្មថោន លោក ករុណា ពេជ្រ កំពុងសម្រាកព្យាបាលជំងឺនៅឯប្រទេសវៀតណាម ហើយលោកក៏បានបង្ហើបប្រាប់ពីស្ថានភាពជំងឺរបស់លោកឪពុកផងដែរ។ ក្រោយពីបានបញ្ជូនទៅព្យាបាលនៅមន្ទីរពេទ្យប្រទេសវៀតណាម ឪពុកលោក ករុណា ពេជ្រ មានសភាពល្អប្រសើរជាងមុនបន្ដិចហើយ តែនៅមិនទាន់ដឹងខ្លួននៅឡើយទេ ។ តារាចម្រៀងរូបនេះនៅតែបន្ដប្រកាសលក់ផ្ទះវីឡាទោលរបស់ខ្លួន ដើម្បីយកប្រាក់ទៅព្យាបាលឪពុកបន្ថែមទៀត។

លោក ករុណា ពេជ្រ បានរៀបរាប់ថា «ប៉ាអើយ ឥឡូវនេះកូននាំអ៊ំមកលេងប៉ាហើយ…ហ៊ឺ…បងប្អូននៅសល់តែពីរនាក់ ឥឡូវប្អូនឈឺទៀត…»។ លោកបន្ដថា «ខ្ញុំសូមប្រកាសលក់ផ្ទះវីឡាទោល នៅកែងផ្លូវខាងមុខតែម្តង មានទីតាំងនៅបុរីពិភពថ្មីសំរោងអណ្តែត3 ផ្ទះលេខ 2 ( E0,E1,E2 ) , ផ្លូវ A…ទល់មុខសួនច្បារធំ 2 មានទីធ្លាធំទូលាយខាងមុខផ្ទះ  ចំណាយពេលតែ 5នាទីដល់ផ្សារ Makro និងផ្សារទំនើប AEON II ទំហំដី : ទទឹងមុខ 18,40 m រីកទទឹងក្រោយ 19,40m និងបណ្តោយ 33,40 m តម្លៃបងប្អូនអាចសួរក្នុង inbox បាន…»។

គួរបញ្ជាក់ផងដែរ លោក ករុណា ពេជ្រ បានទម្លាយសារនៅក្នុងចិត្តយ៉ាងក្ដុកក្ដួលឱ្យមហាជនបានដឹង នៅពេលដែលឪពុកកំពុងតែសម្រាកព្យាបាលលោករៀបរាប់ថា «បណ្តាំដែលចេញពីមាត់របស់ប៉ា 3ចំណុចដែលប៉ាផ្តាំកូនមុនពេលពីរអាទិត្យនៃការធ្លាក់ខ្លួនឈឺរបស់ប៉ា កូននឹងចងចាំ ហើយប្រឹងអនុវត្តវាឱ្យល្អ ប្រឹងធ្វើឱ្យវាមានតម្លៃ លុះដល់ដំណាក់កាលចុងក្រោយ…!!!! អ្វីដែលប៉ាផ្តាំនៅពេលនោះ កូនខំទប់ទឹកភ្នែកមិនឱ្យស្រក់ ហើយនិយាយលួងប៉ាថា អ្វីដែលប៉ាបារម្ភនោះ សូមប៉ាកុំភ័យ ហើយនិយាយបន្លប់ប៉ាមកជាសប្បាយៗវិញ ហើយក្នុងចិត្តឆ្ងល់ថា ហេតុអ្វីសុខៗប៉ានិយាយផ្តាំអ៊ីចឹងជាមួយកូន?។ តែអ្វីៗមិននឹកស្មានដល់ថា បន្ទាប់ពីនោះមកតែ 2អាទិត្យសោះ ប៉ាទៅជាធ្លាក់ខ្លួនមានជំងឺអ៊ីចឹងសោះ ស្រណោះសម្តីប៉ាផ្តាំកូនណាស់ ប៉ា»។

លោកបានបន្ដរៀបរាប់ទៀតថា «បណ្តាំទាំង 3នោះ ឥឡូវនេះកូនយកបណ្តាំ 1 ក្នុងចំណោមបណ្តាំទាំង 3 របស់ប៉ាមកខំប្រឹងធ្វើតាមសម្តីប៉ាហើយ។ ហើយកូននឹងខំប្រឹងព្យាយាមធ្វើដោយឧត្តមគតិ ប្រឹងដោយគ្មានការសោកស្តាយ និងដោយគ្មានការនឿយហត់ទេប៉ា..ទោះបីពេលនេះប៉ាមិនទាន់ដឹងអ្វីក៏ដោយ…ក៏កូននៅតែសង្ឃឹមថា ថ្ងៃណាមួយពេលប៉ាដឹងខ្លួនឡើងវិញប៉ានឹងញញឹមជាមួយលទ្ធផលដែលប៉ាបានផ្តាំកូន…»៕

ខណៈ​មានមតិ​ជាច្រើន​បានលើកឡើង​ថា​ លោក​ ឯម រៀម កំពុង​បំពុលសង្គម ​និង​ធ្វើ​ឱ្យ​កូន​ខ្មែរ​មានការ​យល់​ច្រឡំ​កាន់តែខ្លាំងពីរឿង «អប្សរាប្រុស»។ ទោះជាយ៉ាងណាក៏ដោយ ឆ្លើយតប​នឹង​ការរិះគន់​នេះ ​ភ្លាមៗ​របស់លោក ឯម រៀម ដែលមាននាមថា បណ្ឌិតច្នៃម៉ូដ បាន​ចេញមុខ​បកស្រាយ​ថា​ សូម​ចែករំលែក​ដល់កូន​ខ្មែរ ​គួរ​ដឹងថា ​ម្កុដ​អប្សរា​ពាក់​បាន​ទាំង​បុរស ​ទាំង​ស្ត្រី ​ហើយ​អប្សរា​ក៏មាន 2​ប្រភេទ​ដែរ​ ដោយ​ការ​មើល​ឃើញ​នៅ​តាម​សសរ​ពេជ្រនៃ​ប្រាសាទបាយ័ន​ គឺ​មិន​មាន​ដើមទ្រូង​ធំៗ​ដូច​ស្ត្រី​ទេ​ ថែមទាំង​មាន​ស្លៀក​ប៉ឹង ​ដោយ​មិន​មាន​ស្លៀកសំពត់ទៀតផង ដូច្នេះ​ហើយ ​តាម​ការ​មើលឃើញ គឺ​អប្សរាមាន​ទាំងបុរស មាន​ទាំង​ស្ត្រី។

បើទោះជាមានការបកស្រាយដូច្នោះពិតមែន តែតារាចម្រៀងប្រុស ម៉ៃ សុគន្ធ បានប្រតិកម្មចំពោះការនិយាយរបស់បណ្ឌិតច្នៃម៉ូដថា «បកស្រាយលើកនេះ បណ្ឌិតម្នាក់នេះឆ្កួតហើយ អប្សរាមាន 2ភេទ?  ហាហាហហា លោកបណ្ឌិតឆ្កួតបំពុលកូនខ្មែរ បោកគេទៀតហើយ លោកបណ្ឌិតស្រាវជ្រាវមកពីណា លោកបណ្ឌិតស្គាល់ប្រភេទចម្លាក់អស់ ចម្លាក់វាមាន3ប្រភេទ លោកយល់ច្រឡំលើចម្លាក់លិបហើយ អប្សរាគ្មានប្រុសទេ អប្សរាកើតចេញមកពីណា? ម៉េចបានជាចេញជាប្រុសកើត លោកបណ្ឌិតហើយលោកបណ្ឌិត (ណាមួយចម្លាក់ខ្លះរងសំណឹក និងបរិយាកាស ទើបមើលទៅឃើញបែបនោះ)»។ តើពិតដូចជាតារាប្រុសរូបនេះនិយាយដែរឬទេ ព្រោះថា ចាប់តាំងពីបានសិក្សាមក «អប្សរ ឬអប្សរា» គឺបានកើតចេញការកូរសមុទ្រទឹកដោះ ដែលមាននៅក្នុងរឿងព្រេងទេវកថា ក៏មានឆ្លាក់ជាប់នៅលើប្រាង្គប្រាសាទអង្គរវត្តដូចគ្នា ដូច្នោះហើយ តើអប្សរាប្រុសចេញមកពីអ្វីទៅវិញ?។

កាន់តែនិយាយត្រូវចិត្តមហាជនខ្លាំង លោក  ម៉ៃ សុគន្ធ បានទទូចឱ្យក្រសួងវប្បធម៌ និងវិចិត្រសិល្បៈ មានចំណាត់ការចំពោះរឿងធំមួយនេះ លោកថា «សូមក្រសួងវប្បធម៌ ក្រឡេកមើលបណ្ឌិតម្នាក់នោះបកស្រាយផង គាត់ថា មានអប្សរាឈ្មោល អ៊ីចឹងអប្សរាឈ្មោលកើតពីពេលណា? កើតពីការកូរសមុទ្រទឹកលិង្គមែន??? បើអប្សរាស្រី កើតពីការកូរសមុទ្រទឹកដោះ ស៊ែរឱ្យគាត់បានភ្លឺខួរផង (អប្សរាគឺស្រីសួគ៌ រាំរបាំថ្វាយអស់ទេវតា និងព្រះឥន្រ្ទ អ៊ីចឹងអប្សរាឈ្មោលរាំថ្វាយព្រះឥន្រ្ទដែរមែន? ចម្លាក់ខ្មែរ ចែកជា 3ប្រភេទណា៎  Shareផង ឱ្យបណ្ឌិតមួយនេះឈប់ឆ្កួត និងវង្វេងវប្បធម៌ ហើយឈប់បំផ្លាញវប្បធម៌ខ្លួនឯង»។

នៅក្នុងវីដេអូរបស់តារាប្រុសរូបនេះ ក៏បាននិយាយរិះគន់ក្ឌាំងៗដូចគ្នា។ ចង់ដឹងថាបែបណាវិញនោះ សូមទស្សនាវីដេអូខាងក្រោមនេះ៖

គ្មាននរណាម្នាក់ដែលមិនមានកំហុសនៅក្នុងជីវិតនោះទេ តែសំខាន់បំផុតគឺការទទួលស្គាល់ពីកំហុសដែលខ្លួនបានប្រព្រឹត្ត និងកែប្រែជីវិតឱ្យដើរលើផ្លូវទៀងត្រង់សុចរិតឡើងវិញ។ តារាចម្រៀង ប៊ុត សីហា ក៏ដូចគ្នានោះដែរ ឱកាសនៅមាន គេនៅស្វាគមន៍លោក អ្នកគាំទ្រទាំងអស់គឺនៅតែមាន ហើយមហាជនក៏លោកចង់ឱ្យ សីហា ក្រោកឈរឡើងវិញជាមួយកម្លាំងចិត្ត និងការប្រព្រឹត្តល្អៗ លែងពាក់ព័ន្ធជាមួយគ្រឿងញៀន។

ជាមួយគ្នានោះដែរ គ្រាន់តែតារាចម្រៀងប្រុសរូបនេះ បានបញ្ចេញបទចម្រៀងនិពន្ធរបស់ខ្លួននៅលើហ្វេសប៊ុក មិនបានប៉ុន្មានផង ក៏សង្កេតឃើញមានសម្ទុះគាំទ្រយ៉ាងខ្លាំងស្រេចទៅហើយ។ បទចម្រៀងនោះមានចំណងជើងថា «កូនខុសហើយម៉ែ» ជាការរៀបរាប់ពីវិប្បដិសារីរបស់ខ្លួនលោកផ្ទាល់ និងបានសន្យាចំពោះម្ដាយថា និងកសាងគ្រួសារឱ្យមានតែស្នាមញញឹមឡើងវិញ មិនឱ្យមានតែទឹកភ្នែកដូចកាលពីមុនទៀតឡើយ។ សារជីវិតទួញសោករបស់តារាប្រុសរូបនេះ បានធ្វើឱ្យមហាជនចាប់អារម្មណ៍តាមដានពីរឿងរ៉ាវកម្សត់ផ្ទាល់របស់លោក ក៏ដូចជាការទាក់យកចិត្តមហាជនឱ្យអាណិតស្រឡាញ់លោកឡើងវិញដូចគ្នាដែរ។

នៅពេលថ្មីៗនេះ លោក ប៊ុត សីហា បានបង្ហោះរូបភាពក្រុមកុមារអត់ឃ្លានមួយ និងបានសរសេររៀបរាប់ពីការតាំងជំហរចិត្តឡើងវិញ ព្រមទាំងផ្ដល់ការសន្យាថា «ពេលខ្លះមើលខ្លួនឯង ហាក់កម្សត់សឹងតែផ្តើមមកពីការឈឺចាប់ ប្រឹងប្រែងទម្រាំតែបានថ្ងៃមួយល្អ ហើយក៏ធ្លាក់ទៅដល់ចំណុចសូន្យវិញ និងអស់ជំនឿលែងចង់បន្តរស់។ តែបើមើលទៅមនុស្សជុំវិញយើងវិញ ហាក់ខុសឆ្ងាយពីពួកយើងណាស់ រកតែបាយចម្អែតក្រពះសឹងមិនបានផង តែពួកគេនៅតែចង់រស់បន្ត(មនុស្សគិតខុសគ្នា)។ បងសូមសន្យានឹងប្អូនៗថា បើបងមានឱកាស ឬក៏បានប្រសើរជាងនេះបន្តិច បងនឹងទៅជួបប្អូនៗនិងច្រៀងលេងជាមួយប្អូនៗម្តងទៀត កន្លងមកបងបានធ្វើវាបានតិចតួចណាស់ តែពីថ្ងៃនេះទៅបងនឹងធ្វើវាឱ្យបានច្រើនជាងនេះ បងសន្យា»៕

https://www.youtube.com/watch?v=ExzpkrZmgpU

គ្មានអ្នកណាម្នាក់មិនលាន់មាត់សរសើរនោះទេ ចំពោះវត្តមានសមាជិកតារាសិល្បៈរបស់ «គ្រួសារតារាកម្ពុជា» ដែលបានបង្ហាញខ្លួននៅក្នុងព្រឹត្តិការណ៍ «សម្រស់ឯកវាយនភណ្ឌ ឆ្នាំ2018» វគ្គផ្ដាច់ព្រ័ត្រ នៅពីថ្ងៃទី1 ឧសភា ក្នុងបរិវេណសាលមហោស្រពកោះពេជ្រ។ តារាជាសមាជិកទាំងអស់ ត្រូវបានគេឃើញរំលេចឡើងក្នុងឈុតសម័យបុរាណយ៉ាងល្អអស្ចារ្យ ដែលធ្វើឱ្យកម្មវិធីទាំងមូលទទួលបានការចាប់អារម្មណ៍យ៉ាងខ្លាំង សម្រាប់ការស្លៀកបង្ហាញនូវឈុតបុរាណខ្មែរចម្រុះសម័យកាលនោះ។

ឈុតដែល «គ្រួសារតារាកម្ពុជា» ស្លៀកបង្អួតនៅក្នុងថ្ងៃនោះ រួមមានសម្លៀកបំពាក់ក្នុងសម័យលង្វែក សម័យឧដុង្គសម័យអាណានិគមបារាំង សម័យចតុមុខ សម័យសង្គមរាស្ត្រនិយម និងពិសេសជាងគេគឺការបង្ហាញខ្លួនរបស់តារាជាកូនក្រុមក្នុងសម័យអង្គរបានលេចឡើងត្រដែតពេញក្នុងកម្មវិធីតែម្ដង។ រូបសម្រស់ក្នុងឈុតសម័យបុរាណដែលគ្រងដោយតារាសិល្បៈប្រមាណជាង 40រូបរបស់ក្រុមនេះ បានធ្វើឱ្យក្រសែភ្នែកភ្ញៀវជាតិ និងអន្តរជាតិមើលឃើញកាន់តែធំធេងលើសដើម ពីការរួមចំណែកអភិរក្ស និងលើកកម្ពស់ឡើងវិញនូវសម្លៀកបំពាក់ក្នុងសម័យបុរាណទាំងនោះ ដើម្បីបង្ហាញដល់អ្នកជំនាន់ក្រោយ។

លោក ផាត់ តារារដ្ឋ ស្ថាបនិក «គ្រួសារតារាកម្ពុជា» បានសម្ដែងការកោតសរសើរចំពោះតារាសិល្បៈដែលបានរួមចំណែកចូលរួម ដោយក្រៅពីបានចំណាយពេល នៅបានចំណាយពេលស្រាវជ្រាវ និងចំណាយនូវថវិកាផ្ទាល់ខ្លួន ដើម្បីស្វះស្វែងរកឈុតទាំងនោះ ដើម្បីបំផុសឱ្យខ្មែរ ជាពិសេសបរទេស ស្គាល់ច្បាស់ពីភាពផូរផង់នៃវប្បធម៌ខ្មែរ។ លោកថា«គ្រួសារតារាកម្ពុជា»នឹងរួមចំណែកឱ្យកាន់តែខ្លាំង ដើម្បីឱ្យទម្រង់សម្លៀកបំពាក់បុរាណដែលកាន់តែមានអ្នកមើលរំលង ក្លាយជាទម្រង់នៃការស្លៀកពាក់ដ៏ពេញនិយមមួយ សម្រាប់ការចូលរួមក្នុងកម្មវិធីធំៗ ជាពិសេសដូចព្រឹត្តិការណ៍ប្រកួតសម្រស់ឯកវាយនភ័ណ្ឌលើកទី3 នេះជាដើម។

លោកបន្ដថា តារាសិល្បៈ គឺជាអ្នកផ្សព្វផ្សាយវប្បធម៌មួយដ៏ធំ ដូច្នេះបើតារាសិល្បៈមិនរួមចំណែកបំផុសឱ្យអ្នកជំនាន់ក្រោយស្រឡាញ់ពេញចិត្តនូវសម្លៀកបំពាក់កាលពីអតីតកាលទាំងនោះទេ គឺមិនខុសពីធ្វើឱ្យទម្រង់ឈុតបុរាណទាំងនោះត្រូវបាត់បង់ឡើយ។  នៅក្នុងព្រឹត្តិការណ៍ផ្ដាច់ព្រ័ត្រដែលបានរកឃើញជយលាភីលេខ1 លេខ2 និងលេខ3 ពីសំណាក់អ្នកចូលរួមប្រកួតជាកម្មករ-កម្មការិនីរោងចក្រនោះក្នុងថ្ងៃនោះ និងគេក៏បានកត់សម្គាល់ដែរថា សម្លៀកបំពាក់គ្រប់ឈុតរបស់បេក្ខនារី បានរចនាឡើង និងឆ្លុះបញ្ចាំងពីទឹកដៃច្នៃប្រឌិត និងចេញជាទម្រង់ខ្មែរសុទ្ធសាធ ជួយលើកសម្រស់កម្មវិធី ជាពិសេសគឺបេក្ខនារីឱ្យលេចធ្លោ។ យ៉ាងណាមិញដើម្បីចូលរួមចំណែកលើកស្ទួយវប្បធម៌ជាតិឱ្យកាន់តែខ្លាំង ប្រធានក្រុមតារារូបនេះបានគ្រោងនឹងបំផុសឱ្យសមាជិករបស់ខ្លួនទាំងជាង200នាក់ក្នុងវិស័យសិល្បៈ រួមចំណែកជួយដល់សិល្បៈបុរាណរបស់ខ្មែរឱ្យបានកាន់តែច្រើនឡើងៗ៕

នាឱកាសម្ពោធហាងកាហ្វេ Inthanin នៅម្ដុំបឹងកេងកងដែលមានមហាជនចូលរួមច្រើនកុះករ នៅក្នុងនោះបានជួបតារាស្រី និងជាអតីតប្រលងកម្មវិធីចម្រៀងលំដាប់ពិភពលោក បេក្ខភាព The Cambodia Idol កញ្ញា សោភា ទេពី បានជួបសម្ភាសន៍ជាមួយអ្នកសារព័ត៌មាន ឡារ៉ែនថា តាំងពីនាងមិនទាន់ចូលប្រឡងកម្មវិធីលំដាប់ពិភពលោកមកម្លេះ គឺនាងមិនបានប្រកាន់ខ្លួនថាធ្លាប់ជាបេក្ខភាពក្នុងការប្រឡងកម្មវិធីលំដាប់ពិភពលោកឡើយ រាល់ការងារទាក់ទងនិងសិល្បៈគឺនាងអាចទទួលបានទាំងអស់។

ស្របគ្នានោះដែរ ការចូលរួមកម្មវិធីសម្ពោធដែលមានតារាសិល្បៈជាច្រើនចូលរួមបែបហ្នឹងក្រៅពីទទួលបានអារម្មណ៍រីករាយពីការជួបជុំគ្នាហើយ វាក៏ជាការងារមួយផ្នែកនៃសិល្បៈធ្វើឱ្យនាងចំណេញក្នុងការផ្សព្វផ្សាយប្រជាប្រិយភាពខ្លួនផងដែរ។

កញ្ញាសោភា ទេពី បញ្ជាក់ថា «ក្រោយពីបានប្រឡងកម្មវិធីចម្រៀងលំដាប់ពិភពលោករួចហើយ មានប្រិយមិត្ដជាច្រើនស្គាល់ខ្ញុំ ជាងមុនដូច្នេះខ្ញុំត្រូវចូលរួមក្នុងសកម្មភាពបែបហ្នឹង ដើម្បីពង្រីកប្រជាប្រិយភាពបន្ថែមទៀត។ ជាក់ស្ដែងនៅពេលខ្ញុំមកមានបងប្អូនសួរនាំច្រើនពីការងារសិល្បៈរបស់ខ្ញុំ ស្គាល់ខ្ញុំថា ជាបេក្ខនារីក្នុងកម្មវិធីពិភពលោក ខុសប្លែកពីមុនពេលខ្ញុំចូលប្រឡងក្នុងកម្មវិធីចម្រៀង។ ម្យ៉ាងក្នុងនាមជាអ្នកសិល្បៈខ្ញុំមិនអាចប្រកាន់ពេកនោះទេ ព្រោះការងារអ្វីក៏បានផ្ដល់តម្លៃឱ្យខ្ញុំដែរសំខាន់ឱ្យតែបានមហាជនស្គាល់ច្រើន»។

គួរបញ្ជាក់ផងដែរថា ដើម្បីពង្រីកប្រជាប្រិយភាពឱ្យកាន់តែខ្លាំង តារាស្រីវ័យ16 ឆ្នាំរូបនេះបន្ថែមថា គោលដៅអនាគតនាងចង់ទទួលបានការគាំទ្រពីមហាជនមិនថា ទោះបីជាតាមរយៈការច្រៀង សម្ដែង ឬពិធីការិនីក៏ដោយ និងសព្វថ្ងៃទាល់តែយើងមានជំនាញច្រើន បើមិនដូច្នោះទេ មិនអាចដើរទាន់សភាពការនៃការវិវត្ដនៃសិល្បៈបានទេ បើយើងចេះច្រើនទោះគេត្រូវការជំនាញអ្វីក៏យើងអាចទៅបាន៕

នៅព្រឹកថ្ងៃទី 28 ខែមេសា ឆ្នាំ 2018 នេះ កំពូលតារាសម្ដែងស្រីថៃអ្នកនាង នុន វរៈនុត ដែលប្រមិយមិត្តអ្នកគាំទ្របានស្គាល់ថាជានាង ឡាំយ៉ងទី 2 នៃរឿងភាគ « មាសទឹកប្រាំបួន » តាមរយៈការដាក់បញ្ចាំងនៅលើកញ្ចក់ស្ថានីយទូរទស្សន៍ប៉ុស្ដិ៍ PNN កន្លងទៅនោះ នាងបានធ្វើដំណើរមកកាន់ប្រទេសកម្ពុជា ជាលើកដំបូងតាមរយៈការផ្ដល់កិត្តយស និងអញ្ចើញចូលរួមសម្ពោធការកាហ្វេ អ៊ីនថានីន ( Inthanin Cofee ) នៅសាខាទី 2 ម្ដុំបឹងកេងកង លើផ្លូវប៉ាស្ទើ ។

កំពូលតារាស្រីជួរមុខរូបនេះ បានសម្ដែងសេចក្ដីត្រេកអរជាក្រៃលែង ខណៈបានជួបជាមួយតារាប្រុសស្រីនៅក្នុងប្រទេសកម្ពុជា និងជាពិសេសអ្នកគាំទ្ររូបនាងនៅទីនេះ សឹងតែរកនិយាយអ្វីមិនត្រូវទាល់តែសោះ បានតែញញឹមញញែមផ្ដល់ក្ដីស្រឡាញ់ ការរាក់ទាក់ថតរូបជាមួយគ្នាតែប៉ុនណោះ។ តារាស្រីវ័យជាង 37 ឆ្នាំរូបនេះ បាននិយាយប្រាប់អ្នកសារព័តមាន​ ឡារ៉ែន ថា នាងមានក្ដីរំភើបពិតមែន ដែលបានមកដល់ប្រទេសកម្ពុជា បើមិននឹកស្មានថា កម្ពុជា ទទួលស្វាគមន៍នាងបានល្អ និងកក់ក្ដៅដល់កម្រិតនេះសោះ។ នាងបន្ដថា បន្ទាប់ពីជំនួបជាមួយអ្នកគាំទ្រកម្ពុជាទាំងអស់នៅពេលរសៀលរួចហើយ ការមកដល់ប្រទេសកម្ពុជាដំបូងនេះ នាងគ្រោងបន្ដដំណើរទៅទស្សនាតំបន់ទេសចរណ៍សំខាន់មួយកន្លែងនៅក្នុងទឹកដីខេត្តសៀមរៀប។

អ្នកនាង នុន វរៈនុត បញ្ជាក់ផងដែរថា អរគុណដល់បណ្ដារអ្នកគាំទ្រកម្ពុជាទាំងអស់ បានស្រឡាញ់នូវការសម្ដែងរបស់នាងកន្លងមក និងជួយបន្ដគាំទ្របន្ថែមទៀត ព្រោះថា ថ្មីៗខាងមុខនេះ អ្នកនាងមានរឿងភាគល្អមើលជាច្រើន ដើម្បីបំពេញទស្សនីយអារម្មណ៍មហាជនទាំងអស់ទៀត និងមានឱកាសល្អ អ្នកនាងនិងវិលត្រឡប់មកជួយប្រិយមិត្តអ្នកគាំទ្រម្ដងទៀតនៅក្នុងប្រទេសកម្ពុជា ។ អ្នកនាងប្រាប់ថា អ្នកគាំទ្រកម្ពុជា និងប្រជាជនកម្ពុជា ពិតជាស្អាតៗ និងគួរឱ្យស្រឡាញ់ខ្លាំងបំផុត៕

បើតាមរយៈការបង្ហោះរូបភាពរបស់លោក វណ្ណា ស័ក្ដិ ដែលជាកូនប្រុសបង្កើតរបស់លោក យាយ ណយ សំណាង វិរសិល្បការិនីជើងចាស់ផ្នែកចម្រៀងអាយ៉ៃ និងកំប្លែងបានមើលឃើញថា លោកយាយកំពុងតែធ្លាក់ខ្លួនឈឺខ្លាំង និងដេកសម្រាកព្យាបាលនៅក្នុងមន្ទីរពេទ្យឯកជនមួយកន្លែងក្នុងរាជធានីភ្នំពេញ។

តារាចម្រៀងប្រុសប្រចាំផលិតកម្ម M រូបនេះបានបញ្ជាក់ពីស្ថានភាពរបស់ម្ដាយលោកនៅលើគណនីហ្វេសប៊ុកថា «សូមទេវតាឆ្នាំថ្មីជួយតាមថែរក្សាម៉ាក់ឱ្យរួចផុតពីជំងឺទាំងឡាយផងចុះ កូនមិនឱ្យម៉ាក់មានបញ្ហាអ្វីទាំងអស់ កូននឹងនៅក្បែរម៉ាក់ជានិច្ចណា កូនស្រឡាញ់ម៉ាក់ និយាយមែនណា…!» ។ លោកបានប្រាប់អ្នកសារព័ត៌មានថា «យប់មិញ ម៉ែគាត់ឈឺធ្ងន់ គាត់ធ្វើទុក្ខខ្លាំង។ គាត់ប្រាប់ថាឈឺចុងដង្ហើម ខ្ញុំក៏​បាន​នាំគាត់មកពេទ្យទាំងយប់ តែ​​គេងនៅពេទ្យឯកជនទេ ហើយ​ថ្ងៃ​បន្តិច​ក៏នាំគាត់ទៅសម្រាកនៅផ្ទះវិញ តែពេលព្រលប់នេះ អាការ​គាត់​​ក៏ធ្វើ​ទុក្ខជាថ្មី ខ្ញុំក៏នាំគាត់មកពេទ្យម្តងទៀត មិនបានចូលក្នុងពេទ្យ​ដែលនាំ​គាត់​មក​កាលពីយប់ទេ លើកនេះមកពេទ្យនៅផ្សារ​កណ្តាលតែ​ម្តង»។

កូនប្រុសដែលបានយកចិត្តទុកដាក់ថែរក្សាម្ដាយចាស់ជរារូបនេះ បានបញ្ជាក់ប្រាប់អ្នកសារព័ត៌មានបន្ដទៀតថា​ «ម៉ែខ្ញុំគាត់មិន​ចង់​ចូលទៅសម្រាក​ព្យា​បាល​នៅមន្ទី​រពេទ្យទេ គាត់មានអារម្មណ៍ខ្លាចពេទ្យ ដូចជាខ្លាចជំងឺគាត់ម៉េចមិនដឹងទេ អ៊ីចឹងហើយ​បាន​​ជា​ខ្ញុំ​នាំគាត់មកព្យាបាលតែពេទ្យឯកជនតែម្ដង។ តែនៅពេលនេះខ្ញុំ​ក៏នាំ​គាត់​ត្រឡប់ទៅផ្ទះវិញដែរហើយ ព្រោះពេទ្យ​គេ​បាន​ពិនិត្យចាក់ថ្នាំ ពេលនេះគាត់ក៏បានធូរស្បើយបន្តិចហើយដែរ»។

យ៉ាងណាមិញ អ្នកគាំទ្រ និងមហាជនអ្នកលេងបណ្ដាញសង្គមទាំងអស់ បាននាំគ្នាជូនពរលោកយាយ ណយ សំណាង ឱ្យឆាប់ជាសះស្បើយ និងសូមឱ្យទេវតាមានឫទ្ធិបារមី រួមទាំងវត្ថុស័ក្ដិសិទ្ធិទាំងឡាយ តាមថែរក្សាលោកយាយឱ្យរួចពីទុក្ខភ័យជំងឺទាំងពួង៕

ពិតជាគួរឱ្យភ្ញាក់ផ្អើលបំផុត នៅថ្ងៃម្សិលមិញនេះ ខណៈដែលលោក នី រតនា បានភ្ជាប់ពាក្យជាមួយគូដណ្ដឹងជា​កូនស្រី​អ្នកជំនួញ​ខាង​ផលិតផល​គ្រឿងសម្អាង​ម្នាក់​ក្នុង​ទីក្រុង​ភ្នំពេញ បានធ្វើឱ្យអ្នកគាំទ្រគ្រប់រូបអបអរសាទររូបលោកយ៉ាងភ្លូកទឹកភ្លូកដី។ តែលោកអ្នកពិតជាមិនទាន់ច្បាស់ទេថា តើលោក នី រតនា មានភរិយា ឬបានភ្ជាប់ពាក្យជាមួយនារីណាម្នាក់ហើយឬនៅនោះទេ។

បើតាមប្រភពសិ្នទ្ធស្នាលនឹងឪពុកក្មេករបស់លោក នី រតនា បានបង្ហើបប្រាប់ឱ្យដឹងថា តារាចម្រៀងរូបនេះ បានភ្ជាប់ពាក្យជាកញ្ញា ហេង សុវណ្ណភក្ដិណា ជាកូនស្រីបង្កើតរបស់លោកហេង សុវណ្ណ គឺជាម្ចាស់ក្រុមហ៊ុន មង្គលសុវណ្ណ ត្រេឌីង និងជាអគ្គនាយកស្ថានីយវិទ្យុ មង្គលសុវណ្ណ ដែលជាប្រព័ន្ធផ្សព្វផ្សាយដ៏ធំមួយគ្របដណ្ដប់ទូទាំងបណ្ដាខេត្តនៅក្នុងប្រទេសកម្ពុជា។ មិនតែប៉ុណ្ណោះ លោកក៏ជាអ្នកជំនួញម្នាក់ដែលបាននាំចូលនូវផលិតផលថែរក្សាសុខភាព ថែរក្សាសម្ផស្ស និង ជីសរីរាង្គ អាក្រូសូល ផងដែរ។

គួរកត់សម្គាល់ផងដែរថា ដោយសារមានបទពិសោធ និងទទួលបានជោគជ័យនៅក្នុងការរកស៊ីជំនួញធំៗ ឪពុកក្មេក នី រតនា ពង្រីកហាងនាំចូលផលិតផលថែរក្សាសម្ផស្សម៉ាក WOMEA ពីប្រទេសជប៉ុន មកចរាចរក្នុងទីផ្សារនៅក្នុងប្រទេសកម្ពុជា ដោយយករូប នី រតនា និងកូនស្រីបង្កើត ជាអ្នកតំណាង និងផ្សព្វផ្សាយពីផលិតផលផ្ទាល់តែម្ដង។ ជាក់ស្ដែងនៅព្រឹកថ្ងៃភ្ជាប់ពាក្យកូនស្រី ហេង សុវណ្ណភក្ដិណា និងតារាចម្រៀងប្រុស នី រតនា នាព្រឹកថ្ងៃម្សិលមិញនេះ លោក ហេង សុវណ្ណ បានសរសេរសារនៅលើហ្វេសប៊ុកផ្ទាល់ខ្លួនថា «ខ្ញុំបាទ សូមគោរពថ្លែងអំណរគុណ និងសូមអរគុណយ៉ាងជ្រាលជ្រៅបំផុត ជូនចំពោះវត្តមានរបស់ឯកឧត្តម លោកឧកញ៉ា លោកជំទាវ លោក លោកស្រី មិត្តរួមមហាវិទ្យាល័យ មិត្តរួមវិទ្យាល័យ សហការីរួមការងារ និងបង ប្អូន ក្មួយៗ ទាំងអស់ ដែលបានអញ្ជើញចូលរួមក្នុងពិធីភ្ជាប់ពាក្យកូនស្រីរបស់ខ្ញុំបាទនៅព្រឹកថ្ងៃទី27 ខែមេសា ឆ្នាំ2018។

ខ្ញុំបាទ ក៏សូមអភ័យទោស ចំពោះការបម្រើមិនបានគ្រប់ជ្រុងជ្រោយក្នុងកម្មវិធី។ សូមគោរពជូនពរ ឯកឧត្តម លោកឧកញ៉ា លោកជំទាវ លោក លោកស្រី មិត្តរួមមហាវិទ្យាល័យ មិត្តរួមវិទ្យាល័យ បង ប្អូន និងក្មួយៗទាំងអស់ សូមជួបតែសេចក្តីសុខ រកទទួលទានមានបាន ជោគជ័យក្នុងការងារ និងមានសុភមង្គលក្នុងគ្រួសារ»៕

ថ្មីៗនេះ លោក ប៊ុត សីហា បានបញ្ចេញវីដេអូចម្រៀងខ្លីៗ ដែលបង្ហាញពីស្នាដៃនិពន្ធបទចម្រៀងថ្មីរបស់លោក នៅលើបណ្ដាញទំនាក់ទំនងសង្គមហ្វេសប៊ុក ដែលទទួលបានការគាំទ្រយ៉ាងភ្លូកទឹកភ្លូកដី រហូតដល់អ្នកគាំទ្រជាច្រើនរបស់លោកបានស្រមៃទន្ទឹងចាំនូវការកែខ្លួន និងការខិតខំប្រឹងប្រែងសាងប្រជាប្រិយភាពឡើងវិញ។

ជឿថាមនុស្សម្នាក់ៗរមែងមានការប្រព្រឹត្តខុសជារឿងធម្មតា តែអ្វីដែលសំខាន់នោះគឺ ការទទួលស្គាល់កំហុសហើយមានការកែប្រែឡើងវិញ ដោយសាងភាពទុកចិត្ត និងភាពស្មោះត្រង់ដល់គាំទ្រឱ្យនៅតែអាណិតស្រឡាញ់ដូចដើម។ នៅក្នុងនោះ លោក ហេង នរៈកក្កដា ជាតារាសម្ដែង និងពិធីករ បានសម្ដែងការចាប់អារម្មណ៍ចំពោះតារាចម្រៀង ប៊ុត សីហា ថា «ពេលមានឱកាសរកលុយ សីហាគិតតែសប្បាយរីករាយ មិនចេះថែរក្សាតម្លៃការងារ បើខ្ញុំមានឱកាសដូចសីហាវិញ ខ្ញុំមិនដឹងជាសប្បាយចិត្តយ៉ាងណាទេ។ ទី១ ខ្ញុំអាចរកលុយបានច្រើន ទី២ សីហាប្រឡងជាប់ក្នុងកម្មវិធីលំដាប់ពិភពលោក ទី៣ សីហាជាតារាល្បី។ បើពេលនេះសីហាភ្ញាក់ខ្លួន និងកែខ្លួន ខ្ញុំនឹងនៅតែគាំទ្រសីហា 100% ព្រោះកើតមកគ្មានអ្នកណាម្នាក់មិនចេះខុសនោះទេ សំខាន់យើងខុសហើយ តែយើងចេះកែខ្លួន»។

គួរបញ្ជាក់ផងដែរថា បើទោះបីជា លោក ប៊ុត សីហា ធ្លាប់បានប្រព្រឹត្តខុសម្ដង បង្ករឿងអាស្រូវសម្លាប់ប្រជាប្រិយភាពខ្លួនឯងក៏ពិតមែន តែសង្ឃឹមថា ប្រិយមិត្តទាំងអស់គ្នានឹងអភ័យទោសចំពោះរូបលោក ផ្ដល់ឱកាសថ្មីសម្រាប់លោកជាថ្មីម្ដងទៀត។ តើអ្នកទាំងអស់យល់ឃើញបែបណាដែរ ?៕