Author: អេបិល

បើតាមបណ្ដាញហ្វេសប៊ុកនៅពេលថ្មីៗនេះបានឱ្យដឹងថា តារាសម្ដែង លោក  ញ៉ែម សុគន្ធ ត្រូវបានអ្នកលេងបណ្ដាញទំនាក់ទំនងមួយនេះទម្លាយរូបភាពជាច្រើនសន្លឹក ដែលស្ដែងឱ្យឃើញថា លោកបានភ្ជាប់ពាក្យជាមួយនារីស្រស់សោភាម្នាក់ មានឈ្មោះ ងួន កែវមល្លិកា នៅថ្ងៃទី18 ខែមិថុនា ឆ្នាំ2018 នេះ។

ដោយផ្អែកទៅលើគណនីរបស់ម្ដាយខាងកូនស្រីដែលបានបង្ហោះរូបភាពរបស់កូនស្រី អង្គុយពាក់ចិញ្ចៀនភ្ជាប់ពាក្យជាមួយលោក ញ៉ែម សុគន្ធ និងបានរៀបរាប់ថា «នាងខ្ញុំសូមថ្លែងអំណរអរគុណដល់មិត្តភ័ក្តិ បងប្អូន ពូមីង យាយតា និងភ្ញៀវកិត្តិយសទាំងអស់ដែលបានអញ្ជើញមកចូលរួមក្នុងពិធីភ្ជាប់ពាក្យកូនស្រីនាងខ្ញុំក្នុងថ្ងៃនេះ និងសូមជូនពរដល់កូនៗ និងមិត្តភ័ក្តិ បងប្អូន កូនក្មួយ ពូមីង យាយតា និងភ្ញៀវកិត្តិយសទាំងអស់សូមជួបតែពុទ្ធពរបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងសូមជួបតែសុភមង្គលគ្រប់ក្រុមគ្រួសារ»។ យ៉ាងណាមិញ តារា​ប្រុសរូបនេះក៏ទទួលបានសារជូនពរជ័យពីសំណាក់តារាកិត្តិយសដែលបានចូលរួមពិធីដ៏មហាមង្គលរបស់លោកផងដែរ ដូចជាកញ្ញា ថន លក្ខិណា បានជូនពរថា «​អបអរសាទរ​!!! បងប្រុស ញ៉ែម សុគន្ធ ភ្ជាប់ពាក្យ​ហើយ ជួបគ្នា​ម្តងទៀត​នៅ​ថ្ងៃ​ពិសេស​របស់​អ្នក​ទាំងពីរ​»​។

សូមជម្រាបផងដែរថា មួយរយៈមុននេះ តារាសម្ដែងប្រុសរូបនេះ ត្រូវបានក្មេងប្រុសម្នាក់ដែលអះអាងថា ជា​សាច់ឈាមនឹងរូបលោកចោទប្រកាន់ថា ញ៉ែម សុគន្ធ ស្រឡាញ់ភេទដូចគ្នា និងសុំមើលប្រដាប់ភេទរបស់ខ្លួន តែជាព័ត៌មានអកុសលនេះត្រូវបានបញ្ចប់មន្ទិលត្រឹមនេះហើយ ព្រោះថា​តារាប្រុសរូបនេះ បានសម្រេច​ចិត្តភ្ជាប់ពាក្យជាមួយ​នារីដ៏ស្រស់ស្អាត និងទទួលយកគ្នាធ្វើជាស្វាមីភរិយាតទៅថ្ងៃអនាគត៕

នៅទីបំផុតខាងផលិតកម្ម មាតុចក្រហ្វីលម៍ បានទម្លាយរូបភាព Poster រឿងថ្មីរបស់ខ្លួនបន្ទាប់ពីរឿង « ធ្មប់ » គឺរឿង « ទារុណកម្មខ្មោច » ដែលជាប្រភេទរឿងភ័យរន្ធត់ លួសព្រលឹង ព្រឺព្រួច អន្ទងវិញ្ញាណ ដែលធ្វើឱ្យអ្នកទស្សនានៅក្នុងរោងកុន តក់ស្លុតស្ទើតែដង្ហក់ដង្ហើមតាមសាច់រឿង។

ពីអ្នកដឹកនាំរឿង ខ្មោចដើមចេកជ្វា និង ធ្មប់ គឺលោក ហ៊ុយ យ៉ាឡេង បានប្រាប់អ្នកគាំទ្រស្នាដៃរបស់លោកទាំងអស់ថា រឿង « ទារុណកម្មខ្មោច » គ្រោងនឹងដាក់បង្ហាញខ្លួននាពេលឆាប់ៗខាងមុខនេះហើយ។ លោករំពឹងទុកយ៉ាងខ្លាំងថា ប្រភេទខ្មោចមួយនេះ នឹងជោគជ័យខ្លាំង ព្រោះថា ភាពយន្តមួយនេះ លោកបានលះបង់សាច់និងឈាម ដាក់កាយក្នុងការផលិតដើម្បីឱ្យកុនខ្មែរ កាន់តែមានវឌ្ឍនភាពទៅកាន់សាកលលោក។ លោកបានទទូចឱ្យប្រិយមិត្តអ្នកគាំទ្រ កុំភ្លេចរង់ចាំ និងទៅទស្សនាភាពយន្ដដ៏ល្អមួយនេះ។

គួរបញ្ជាក់ផងដែរថា គ្រាន់តែដាក់បង្ហាញ Poster រឿងថ្មីមួយនេះមិនបានប៉ុន្មាននាទីផង សង្កេតឃើញថា មានអ្នកគាំទ្រជាច្រើនបានចូលទៅ Comment សួរនាំលោកពីថ្ងៃបញ្ចាំងយ៉ាងភ្លូកទឹកភ្លូកដីតែម្ដង។ ដើម្បីឱ្យកាន់តែជាក់ច្បាស់​ សូមទស្សនារូបភាពទាំងអស់ខាងក្រោមនេះ៖

នៅលើបណ្ដាញទំនាក់ទំនងសង្គមហ្វេសប៊ុកផ្លូវការរបស់ផលិតកម្មថោន បានបង្ហោះវីដេអូខ្លីរបស់កញ្ញា រ៉ាប៊ី បានរៀបរាប់ទាំងអារម្មណ៍ពិតយ៉ាងអួលដើមក ពោរពេញទៅដោយមនោសញ្ចេតនាស្រឡាញ់ពុក  ដែលស្ដែងពីអារម្មណ័ពិតកាលនៅវ័យកុមារ នាងតែងតែធ្វើឱ្យឪពុកម្ដាយព្រួយបារម្ភ និងគិតគូរពីអនាគតនាងរហូតមកដល់ពេញវ័យ និងបានសាងកំហុសឆ្គងមួយចំនួនតូចដែលធ្វើឱ្យលោកទាំងពីរពិបាកចិត្ត។

នៅក្នុងវីដេអូខ្លីនោះ ម្ចាស់បទចម្រៀង «មាន់ស្រែ» បានលើកឡើងពីប្រវត្តិជូរចត់របស់ឪពុកនាងដែលជាអតីតទាហានមួយរូបបានខិតខំតស៊ូខ្លាំងណាស់ អត់ធ្មត់អត់ទ្រាំជាមួយការងារលំបាកច្រើនយ៉ាងដើម្បីទំនុកបម្រុងចិញ្ចឹមក្រុមគ្រួសារ រហូតដល់រូបនាងបានធំដឹងក្ដី និងមានការងារមួយច្បាស់លាស់។ អ្វីដែលខ្លួននាងស្រឡាញ់ និងគោរពនោះគឺ លោកឪពុកបានខិតខំរកមកបំពេញចិត្តនាង បើទោះជាត្រូវចំណាយកម្លាំងញើសឈាមអស់ច្រើនប៉ុនណា ក៏លោកមិនខ្លាចនឿយហត់អ្វីទាំងអស់។ សារជាវីដេអូប្រវត្តិពិតរបស់ឪពុកកញ្ញា រ៉ាប៊ី បានធ្វើឱ្យមហាជនជាច្រើននាក់ស្រក់ទឹកភ្នែកនៅពេលដែលបានទស្សនាហើយ។

តោះ! ចង់ដឹងថា តារាស្រី រ៉ាប៊ី បង្ហាញក្ដីស្រឡាញ់បែបណាចំពោះលោកឪពុករបស់នាងនោះ សូមទស្សនាវីដេអូ ដូចខាងក្រោម៖

នៅពេលថ្មីនេះ កំពូលតារាចម្រៀងស្រី ប្រចាំផលិតកម្មរស្មីហង្សមាស និងជាម្ចាស់យីហោកាបូបប៊្រេនដ៍ ASK គឺកញ្ញា ឱក សុគន្ធកញ្ញា ត្រូវបានគេមើលឃើញថា មានភាពរវល់ជាមួយការងារជាច្រើននៅក្នុងពិភពសិល្បៈស្ទើររកពេលសម្រាកគ្មានឡើយ តែទន្ទឹមនឹងភាពមមាញឹកនោះ នាងបានធ្វើឱ្យអ្នកគាំទ្រខ្លួនភ្ញាក់ផ្អើលជាខ្លាំង ដោយនាងបានឆ្លៀតយកពេលរបស់ខ្លួនដើម្បីទៅចូលរួមត្បាញក្រមាប្រវែង1,000ម៉ែត្រ កាលពីថ្ងៃទី14 ខែមិថុនា ឆ្នាំ2018 ម្សិលមិញ។

តាមរយៈបណ្តាញសង្គមហ្វេសប៊ុករបស់កញ្ញា ក៏ដូចជានៅក្នុង IG របស់តារាស្រីឆ្នើមរូបនេះ ក៏បានរៀបរាប់ឱ្យដឹងដែរថា «ជឿថា ខ្មែរ​ធ្វើ​បាន…! ខ្ញុំ​បាន​ចូល​រួម​ត្បាញ​ក្រមា​ 1,000 ម៉ែត្រ ទុក​ជា​អនុ​ស្សាវរីយ៍ចុះអ្នកវិញ..? តើបងប្អូនបានចូលរួមហើយឬនៅ?»។ ពិតណាស់ តារាស្រីរូបនេះបានថតរូបជាមួយអ្នកគាំទ្រ និងតារាល្បីៗរួមទ្រនំ ព្រមជាមួយតារាសម្ដែងវ័យក្មេងជាច្រើននាក់ផងដែរ។

គួរបញ្ជាក់ផងដែរថា ក្រមាជាវត្ថុចាំបាច់មួយដែលបងប្អូនខ្មែរយើងនិយមប្រើប្រាស់ មិនថាចាស់ មិនថាក្មេង តែងតែស្គាល់ថាក្រមាខ្មែររបស់យើងជាវត្ថុប្រើប្រាស់ដែលមានប្រយោជន៍ច្រើនយ៉ាងណាស់។ ស្របពេលឃើញសកម្មភាពរបស់អាយដលបែប​នេះអ្នកគាំទ្របាននាំគ្នានិយាយថា ឱក សុគន្ធកញ្ញា ពិតជាតារាស្រីមួយរូបគួរឱ្យគោរពស្រឡាញ់មែន មិនថាខ្លួនរវល់យ៉ាងណាក៏ដោយ ក៏នៅតែឆ្លៀតពេលដើម្បីចូលរួមការងារសង្គមទៀតដែរ។ កុំភ្លេចណា៎! សូមអញ្ជើញទៅចូលរួមទាំងអស់គ្នា ដើម្បីត្បាញក្រមាស្នាដៃកូនខ្មែររបស់យើងពិតៗ៕