Author: អេបិល

តាមរយៈសារព័ត៌មានកូរ៉េ Naver នៅថ្ងៃទី 28 ខែកុម្ភៈ ឆ្នាំ ២០២០ នេះបានឱ្យដឹងថា តារាចម្រៀងប្រុស លោក Suga ជាសមាជិកក្រុមចម្រៀង BTS បានបង្ហាញពីទឹកចិត្តដ៏សប្បុរសរបស់លោក តាមរយៈការបរិច្ចាគថវិកា ១០០ លានវ៉ុន ដែលប្រហែល ៨២,០០០ ដុល្លារអាមេរិក ដល់ស្រុកកំណើតរបស់លោក គឺនៅទីក្រុង Daegu ដើម្បីជួយដល់កិច្ចខិតខំប្រឹងប្រែងបង្ការជំងឺកូរ៉ូណា។

អ្នកសារព័ត៌មានកូរ៉េបានរាយការណ៍ថា តារាចម្រៀងប្រុសរូបនេះមានបំណងចង់មកជួយអ្នកជំងឺផ្ទាល់ ព្រោះអ្នកទាំងនោះគឺជាប្រជាជនដែលរស់នៅស្រុកកំណើតរបស់លោក ហើយលោកចង់តបស្នងសងទឹកចិត្តស្រឡាញ់ដល់អ្នកគាំទ្ររបស់លោកថែមទៀតផង។ គួរបញ្ជាក់ផងដែរថា តារាចម្រៀងប្រុស Suga បានកើតនៅទីក្រុង Daegu នៅថ្ងៃទី ៩ ខែមីនាឆ្នាំ ១៩៩៣ និងបានចូលរៀននៅសាលាបឋមសិក្សា Taejeon និងអនុវិទ្យាល័យ Gwaneum ក្នុងទីក្រុង Daegu នេះហើយ។ នៅវ័យសិក្សា ឈ្មោះរ៉េបរបស់លោកគឺ Agust D ដែលតំណាងឱ្យ ក្រុមអ្នកចម្រៀងរ៉េបនៅក្រោមដីប្រចាំទីក្រុងDaegu មុនពេលលោកបានចូលរួមជាមួយក្រុមចម្រៀង BTS ។

ទីក្រុង Daegu ត្រូវបានទទួលរងគ្រោះយ៉ាងខ្លាំងពីការផ្ទុះឡើងនូវជំងឺវីរ៉ុសកូរ៉ូណានេះ ហើយទឹកចិត្តស្រឡាញ់ស្រុកកំណើតរបស់ាតារាប្រុសមួយដួងនេះ បានធ្វើឱ្យអ្នកគាំទ្ររំភើបចិត្តជាខ្លាំង និងផ្ញើសារឱ្យលោកថែរក្សាសុខភាពឱ្យបានល្អផងដែរ៕

​អ្នកដឹកនាំ​រឿង​ ​Yeon​ ​Sang​ ​Ho​ ​បាន​ប្រកាស​ពី​កាលបរិច្ឆេទ​ចាក់​បញ្ចាំង​ដំបូង​នៃ​កំពូល​ភាពយន្ដ​ល្បី​រឿង​ ​រថភ្លើង​ទៅ​ប៊ូ​សាន​ ​វគ្គ២​ ​(​ ​Train​ ​To​ ​Busan​ ​2​)​ ដែលគម្រោងនឹងវាយលុករដូវក្ដៅនេះហើយ។ ​

ភាគ២ នេះ ត្រូវបានប្រកាសចំណងជើងជាផ្លូវការថា « Peninsula » ដែលជាដំណើរប្រយុទ្ធបន្ដជាមួយក្រុមហ្ស៊ូមប៊ី ទាំងពេលយប់នឹងពេលថ្ងៃ។ ភាពយន្ដមួននេះត្រូវបានអញ្ចើញតារាសម្ដែងល្បីជាច្រើនចូលរួមដូចជា Kang Dong Won, Lee Jung Hyun, Kwon Hae Hyo, Kim Min Jae, Kim Do Yoon ជាដើម។ ផ្ទាំងរូបភាពប្រកាសភាពយន្ដ ត្រូវបានចែកចេញជា២ដូចគ្នា បានបង្ហាញឱ្យឃើញពេលថ្ងៃនឹងយប់។ អ្នកដឹកនាំ​រឿង​ ​Yeon​ ​Sang​ ​Ho​ ​ធ្លាប់បានអះអាងគម្រោង​ចាក់​បញ្ចាំង​ជាលើកដំបូង​យ៉ាង​ពិសេស​បំផុត​នៅ​ថ្ងៃទី​ ​១២​ ​ខែសីហា​ឆ្នាំ​ ​២០២០​ ​។​ លោកបានធ្វើការសង្ខេបរឿងថា « Peninsula » ឬឧបទ្វីប កើតឡើងក្នុងរយៈពេល ៤ ឆ្នាំបន្ទាប់ពីការផ្ទុះឡើងនៃការរាតត្បាតខ្មោចឆៅហ្ស៊ូមប៊ីដែលដេញតាមតួឯកនៅលើរថភ្លើងដែលបើកពីត្បូងទៅក្រុងប៊ូសាន។ ឧបទ្វីបកូរ៉េ ត្រូវបានបំផ្លិចបំផ្លាញហើយលោក Jung-seok ដែលជាអតីតទាហានដែលបានរត់គេចខ្លួនទៅក្រៅប្រទេសនឹងត្រូវបានផ្តល់បេសកកម្មឱ្យត្រឡប់មកវិញហើយជួបជាមួយអ្នកនៅរស់ដែលមិនបានរំពឹងទុក។ វាមិនមែនជារឿងភាគរបស់ Train To Busan ទេព្រោះវាមិនមែនជារឿងបន្តដែលកើតឡើងក្នុងសកលលោកតែមួយ។
​
​
​ខ្សែភាពយន្ត​ភ័យរន្ធត់​ដើម​ ​Train​ ​To​ ​Busan​ ​បាន​បំបែក​កំណត់ត្រា​ខ្សែភាពយន្ត​កូរ៉េ​ខាងត្បូង​ជាច្រើន​នៅក្នុង​ឆ្នាំ​ ​២០១៦​ ​រួម​ទាំង​ជា​ខ្សែភាពយន្ត​ដំបូង​ដែល​ទទួល​បាន​ប្រាក់ចំណូល​សរុប​ខ្ពស់​បំផុត​ក្នុង​មួយថ្ងៃ​។​ ​Train​ ​To​ ​Busan​ ​ក៏​ជា​ខ្សែភាពយន្ត​ដំបូង​ប្រចាំឆ្នាំ​នៅ​ប្រទេស​កូរ៉េ​ដែល​ទាក់ទាញ​បាន​ ​10,000,000​ ​នៅក្នុង​តារាង​ ​box​ ​office​។​ ​កុំឱ្យ​ខកខាន​ក្នុង​ការ​រង់ចាំ​ទស្សនា​ភាពយន្ដ​នេះ​ឱ្យ​សោះ​៕

ទេព​ បូ​ព្រឹក្ស​ គឺជា​តារា​ច្រៀង​ស្រី​មួយ​រូប​ដែល​ទស្សនិកជន​ភាគច្រើន​ស្គាល់​យ៉ាង​ច្បាស់​តាមរយៈ​ការ​តុប​តែ​ខ្លួ​នប្លែ​កៗ​ពី​គេ​ ជាមួយ​បទ​ច្រៀង​ញាក់​កន្ត្រាក់​អារម្មណ៍​ព្រម​ជាមួយ​ក្បាច់​រាំ​សម្បូរ​បែប​តម្រូវ​តាមចិត្ត​យុវវ័យ​នា​ពេល​បច្ចុប្បន្ន​ ។ តែកាន់តែប្លែកអារម្មណ៍ជាងនេះ ខណៈពេលតារាចម្រៀងផ្សេងៗសម្រុកចេញបទ ចង្វាក់ប្រពៃណី និងញាក់​កន្ត្រាក់​អារម្មណ៍ តារាស្រី ទេព​ បូ​ព្រឹក្ស​ បែរជាចេញបទចម្រៀងមនោសញ្ចេតនាស៊ីអារម្មណ៍ទៅវិញ។

មួយបទនេះមានចំណងជើងថា «សុំពេលឈឺចាប់ម្នាក់ឯងបានទេ » បានផ្ដិតយកទេសភាពស្អាតៗពីប្រទេសបាំរាំង ដែលមានការចូលរួមសម្ដែង MV ជាមួយតារាចម្រៀងស្រី ឈិត សុវណ្ណបញ្ញា តារាហ្វេសប៊ុកពីររូបគឺ Alex CoNan Real និងលោក Remy Rithy។ បើទោះបីជាបទចម្រៀងមួយនេះទើបតែបញ្ចេញនៅលើយូធូបនាព្រឹកថ្ងៃទី ២៨ ខែកុម្ភៈ ឆ្នាំ ២០២០ នេះក៏ពិតមែន ក៏ប៉ុន្ដែសន្ទុះនៃការទស្សនាគឺកៀក ១ លាននាក់ទៅហើយ នេះមិនបានប៉ុន្មានម៉ោងផង។ ប្រជាប្រិយភាពរបស់តារាចម្រៀងស្រី ត្រូវបានមហាជនជាច្រើននៅតែបន្ដគាំទ្ររហូតមក បើទោះបីជានាងបានចាកចេញពីទ្រនំហង្សមាសហើយក្ដី។ ដោយឡែក ស្របពេលដែលតារាស្រីស្អាតរូបនេះចេញបទស៊ីអារម្មណ៍លន្លង់លន្លោច អ្នកគាំទ្ររបស់នាងក៏នៅតែទន្ទឹងចាំការចេញចម្រៀងញាក់​កន្ត្រាក់​អារម្មណ៍សម្រាប់ត្រៀមកម្សាន្ដនាថ្ងៃបុណ្យចូលឆ្នាំថ្មីប្រពៃណីខ្មែរផងដែរ។ ដូច្នេះចាំមើលទាំងអស់គ្នាថា ឆ្នាំថ្មីនេះ ទេព​ បូ​ព្រឹក្ស​ មានអ្វីប្លែក។

តោះកុំឱ្យខាតពេល សូមបង្វែរអារម្មណ៍អ្នកទាំងអស់គ្នាមកទស្សនាបទ «សុំពេលឈឺចាប់ម្នាក់ឯងបានទេ » វិញ ថាតើចាក់ដោតអារម្មណ៍ដក់កម្រិតណា? សូមរីករាយទស្សនាវីដេអូខាងក្រោមនេះ៖

តាមរយៈសារព័ត៌មានកូរ៉េ Naver នៅព្រឹកថ្ងៃទី ២៧ ខែកុម្ភៈ ឆ្នាំ ២០២០នេះបានឱ្យដឹងថា តារាសម្ដែងល្បីៗប្រចាំស្ថានីយទូរទស្សន៍ SBS នៅក្នុងរឿងភាគល្បីល្បាញ « ‘Dr. Romantic 2 » ត្រូវបានលុបចោលការសម្ដែងពិសេស និងហោះទៅកាន់សហរដ្ឋអាមេរិក ខណៈកំពុងជួបស្ថានភាពវឹកវរនៃវីរ៉ុសកូរ៉ូណានៅកូរ៉េខាងត្បូង។

រឿងភាគល្បីល្បាញ « ‘Dr. Romantic 2 » នៅរដូវកាលទី២នេះ ត្រូវបានគេកត់សម្គាល់ឃើញថា មានចំនួនអ្នកទស្សនាខ្ពស់ជាងគេនៅលើ Netflix ហើយតារាសម្ដែងទាំងអស់ នឹងត្រូវធ្វើដំណើរទៅកាន់កោះ សៃប៉ាន អស់រយៈពេល ៤ ថ្ងៃ ដើម្បីចូលរួមការបង្ហាញវត្តមានតួអង្គ និងសម្ដែងពិសេសនៅទីនោះ។ ក៏ប៉ុន្ដែកម្មវិធីនោះក៏ត្រូវបានលុបចោលវិញ បន្ទាប់ពីប្រទេសកូរ៉េខាងត្បូងជួបស្ថានភាពវឹកវរនៃវីរ៉ុសកូរ៉ូណា។ ហើយតារាសម្ដែងទាំងអស់ ត្រូវបានលើកទឹកចិត្តឱ្យឈប់សម្រាកនៃថ្ងៃវិស្សមកាលជំនួសវិញ។

អ្នកផលិតកម្មវិធីរបស់ស្ថានីយទូរទស្សន៍ SBS បានអះអាងថា « អ្នកគ្រប់គ្រងសិល្បករយើង កំពុងយកចិត្តទុកដាក់យ៉ាងពិសេសចំពោះតារាសិល្បៈទាំងអស់ ដើម្បីឱ្យប្រាកដបានថា ពួកក្នុងកំពុងស្ថិតក្នុងសុវត្ថិភាព និងថែទាំងសុខភាពបានយ៉ាងល្អប្រសើរ »៕

កីឡា ជាផ្នែកមួយដ៏សំខាន់នៃការរស់នៅ ហេតុនេះហើយទើប​ជានិច្ចកាលគេតែងតែឃើញព្រឹត្តិការណ៍កីឡាធំៗជាច្រើន ត្រូវបានរៀបចំឡើងនៅគ្រប់ប្រទេសទាំងអស់នៅលើពិភពលោក។ នៅឆ្នាំ2020 នេះ កីឡាក៏ត្រូវបានគេយកចិត្តទុកដាក់ខ្លាំងផងដែរនៅក្នុងមហោស្រព​គីហ្សូណាជប៉ុនកម្ពុជាលើកទី9 ដែលប្រព្រឹត្តទៅកាលពីពេលថ្មីៗនេះនៅមជ្ឈមណ្ឌល​សហប្រតិបត្តិការកម្ពុជាជប៉ុន (CJCC)។

នៅឆ្នាំនេះ ប្រធានបទសំខាន់នៃមហោស្រព​គីហ្សូណាជប៉ុនកម្ពុជា គឺ “អានុភាពនៃកីឡា” ដោយសារតែប្រទេសជប៉ុន​នឹងក្លាយជាម្ចាស់ផ្ទះ​រៀបចំការប្រកួត​កីឡាអូឡាំពិក និងប៉ារ៉ាឡាំពិក អាស្រ័យហេតុនេះហើយ ទើប​គេឃើញមាន​ការរៀបចំព្រឹត្តិការណ៍កីឡាមួយចំនួន​ បន្ថែមពីលើ​ទស្សនីយភាព​សិល្បៈវប្បធម៌​សំខាន់ៗរវាងកម្ពុជា-ជប៉ុន ដែលធ្លាប់បានធ្វើជារៀងរាល់ឆ្នាំ។ នៅក្នុងនោះក៏មានការរៀបចំសិក្ខាសាលាទាក់ទង​នឹងការអប់រំ សុខភាព សិល្បៈ បច្ចេកវិទ្យា និងបង្ហាញពីម្ហូបអាហារខ្មែរ និងជប៉ុនផងដែរ។

ឯកអគ្គរាជទូតវិសាមញ្ញ និងពេញសមត្ថភាព​របស់ប្រទេសជប៉ុនប្រចាំនៅព្រះរាជាណាចក្រកម្ពុជា ឯកឧត្តម មិកាមិ ម៉ាសាហ៊ីរ៉ូ បានលើកឡើងថា ដោយសារតែប្រទេសជប៉ុននឹងរៀបចំ​ព្រឹត្តិការណ៍កីឡា​អូឡាំពិក និងប៉ារ៉ាឡាំពិកនៅឆ្នាំនេះ ទើបយើងនាំគ្នាយកឱកាស និងដួងព្រលឹងនៃការប្រកូតកីឡាអូឡាំពិក​ដាក់បញ្ចូលក្នុងមហោស្រពគីហ្សូណានៅឆ្នាំនេះ។ ឯកឧត្តមបញ្ជាក់ផងដែរថា កីឡាបានបង្ហាត់​បង្រៀននូវ​សារៈសំខាន់នៃការខិតខំសាមគ្គីភាព យុត្តិធម៌ ភាពអត់ធ្មត់ និងផ្តល់ឱ្យនូវមិត្តភាព រួមទាំងមេរៀនសំខាន់ៗជាច្រើនទៀតសម្រាប់ជួយដល់ការរស់នៅ។

ឯកឧត្តមមានប្រសាសន៍ថា៖ «​ខ្ញុំសង្ឃឹមថា មហោស្រពគីហ្សូណាជប៉ុនកម្ពុជានៅឆ្នាំនេះ នឹងក្លាយជាឱកាស​សម្រាប់ប្រជាជនគ្រប់រូបចូលរួម​គិតពីអានុភាពនៃកីឡាក្នុងការរស់នៅប្រចាំថ្ងៃ និងសង្គម​»។

គួរបញ្ជាក់ផងដែរថា មហោស្រពគីហ្សូណាប្រចាំឆ្នាំ2020 នេះ បានបើកជាផ្លូវការកាលពីថ្ងៃទី20 ខែកុម្ភៈឆ្នាំ2020 ក្រោមអធិបតីភាពឯកឧត្តមបណ្ឌិតសភាចារ្យ ហង់ជួន ណារ៉ុន និងឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំនៅព្រះរាជាណាចក្រកម្ពុជា និងឥស្សរជនសំខាន់ៗជាច្រើនរូបផ្សេងទៀត។ បន្ថែមពីលើនេះក៏មានការចូលរួមពីក្រុមសិល្បៈវប្បធម៌នៃប្រទេសទាំង2 និងទទួលបានការចាប់អារម្មណ៍យ៉ាងខ្លាំងពីសំណាក់ប្រជាជនខ្មែរ ជាពិសេស​យុវជន៕

ថ្មីៗនេះ ដោយផ្អែកលើបណ្ដាញសង្គមហ្វេសប៊ុកអ្នកស្រី វ៉ាន់ សុភា ដែលគេស្គាល់ថាជាភរិយារបស់តារាចម្រៀងលោក សួស សងវាចា បានប្រកាស​លក់​ផ្ទះ​មួយ​ល្វែង​ស្ថិត​នៅ​សង្កាត់​ចោមចៅទី៣ ខណ្ឌ​ពោធិ៍សែនជ័យ ដោយ​សារ​តែ​គ្មាន​លទ្ធភាព​ព្យាបាល​ស្វាមី​តទៅ​ទៀត ​​។ ខណៈអ្នកស្រី វ៉ាន់ សុភាបង្ហើប​ពី​ការ​ដាក់​ផ្ទះ ដើម្បីដោះស្រាយជីវភាពមួយគ្រាសិនថា៖ «ធ្វើ​ផ្ទះ​អស់​លុយ​ហើយ​គាត់​ចាប់​ធ្លាក់​ខ្លួន​ឈឺ​ហ្មង។ គាត់​ឈឺ​៥​ឆ្នាំ​ហើយ ចឹង​បាន​ខ្ញុំ​ពិបាក តែ​បើ​លក់​ផ្ទះ​ដាច់​ធូរ​ហើ»។

ភរិយាតារាចម្រៀងជើងចាស់រូបនេះ ក៏បានអះអាងថា អ្នកស្រីមិន​ចង់​ឱ្យ​បែកធ្លាយ​ព័ត៌មាន​នេះ​ទេ ប៉ុន្ដែ​ដោយ​ចិត្ដ​ចង់​ព្យាបាល​ស្វាមី និង​ទ្រទ្រង់​ជីវភាព​គ្រួសារ​ ទើបអ្នកស្រី​សុខចិត្ដ​តារាចម្រៀង​លោក សួស សងវិចា មាន​វ័យ​៥៥​ឆ្នាំ ហើយ​លោក​បាន​ធ្លាក់​ខ្លួន​ពិកា ដោយ​រឹងដៃ​រឹងជើង និង​ស្លាប់​មួយ​ចំហៀង​ខ្លួន​ដោយសារ​ជំងឺ​លើស​ឈាម។ បច្ចុប្បន្ន​​កំពុង​សម្រាក​ព្យាបាល​នៅ​ផ្ទះ ហើយ​ត្រូវ​ទៅ​ជួប​គ្រូ​ពេទ្យជំនាញ នៃ​មន្ទីរ​ពេល​ព្រះកុសៈមៈ​យ៉ាង​ទៀងទាត់ នៅ​រៀង​រាល់​មួយ​ខែ​ម្ដង។ ផ្ទះ​​ដែល​​ប្រកាស​លក់​នេះ​ដែរ​ ​មាន​ទំហំ​ទទឹង​៧​ម៉ែត្រ​កន្លះ និង​បណ្ដោយ​ជាង​៤០​ម៉ែត្រ ហើយ​មាន​បន្ទប់​ចំនួន​១៤។ អ្នកស្រី​លក់​ក្នុង​តម្លៃ​១៥​ម៉ឺន​ដុល្លារ ហើយ​ប្រាក់​ដែល​លក់​បាន​នឹង​ត្រូវ​យក​ទៅ​បង់​ផ្ដាច់​ធនាគារ ព្យាបាល​ជំងឺ​ស្វាមី និង​ពង្រីក​មុខរបរ​លក់​ចាប់​ហួយ​នៅ​ផ្សារ​ស៊ិនជូរី​ដែលអ្នកស្រីបានជួលតូបគេលក់ដូរនោះ និង​រក​ទិញ​ផ្ទះ​រស់នៅឡើង​វិញ​ក្នុង​តម្លៃ​ប្រហែល​៣​ម៉ឺន​ដុល្លារ។

គួរបញ្ជាក់បន្ថែមថា លោក សួស សងវាចា កន្លងមកក៏ធ្លាប់ដង្ហើយអំពាវនាវសុំជំនួយពីសប្បុរសជនដែលជាអ្នកគាំទ្រចម្រៀងរបស់លោកផងដែរ តែជំនួយទាំងនោះមិនអាចទប់ទល់ការចំណាយលើការព្យាបាលជំងឺលោកបានឡើយ ៕

ផ្អែកលើបណ្ដាញសង្គមហ្វេសប៊ុកនាព្រឹកថ្ងៃទី ២៧ ខែកុម្ភៈ ឆ្នាំ ២០២០ នេះ ​តារា​កំប្លែង​នាយ តាក់ស៊ី ខណៈនេះ​កំពុងរងការផ្ទុះ​ការរិះគន់យ៉ាងចាសដៃ​ពី​សំណាក់​ទស្សនិកជន​ បន្ទាប់ពី​នាយ​បានប្រកាស​បង្ហាញ​មុខមាត់​គូស្នេហ៍​ថ្មី​ដែល​ត្រូវ​ចូល​រោងការ​ឆាប់ៗ​នេះ ​ព្រម​ជាមួយនឹង​រថយន្ត​LEXUS RX330​មានតម្លៃ​ខ្ទង់​រាប់ម៉ឺន​ដុល្លារ​យ៉ាង​ភ្ញាក់ផ្អើល​។​

ដំណឹង​នៃ​ការ​រៀប​អាពាហ៍ពិពាហ៍​ និង​ទិញ​រថយន្ត​របស់​តារា​កំប្លែង​ចាស់​វង្សា​នាយ តាក់ស៊ី នេះ​មិន​ត្រឹមតែ​មានការ​ចាប់អារម្មណ៍​ពី​សំណាក់​អ្នកគាំទ្រ​នោះទេ​ គឺ​ភ្លាមៗ​នោះ​ ក៏​ស្រាប់តែ​មាន​មតិ​រិះគន់​ជាច្រើន​ បាន​និង​កំពុង​បាញ់​ចាក់​ស្រោច​មកលើ​តារា​កំប្លែង​រូបនេះ​ជាមួយនឹង​ការហួសចិត្ត​ខ្លាំង​ក្រោយពេល​ដឹង​ពី​ព័ត៌មាន​នេះ។ តាមរយៈវីដេអូសម្ភាសន៍ផ្ទាល់ថ្ងៃម្សិលមិញនេះ នាយ តាក់ស៊ី បានបញ្ជាក់​ថា​ នាយ​និង​អ​នា​គត​ភរិយា​វ័យ​៣៩​ឆ្នាំ មាន​ស្រុកកំណើត​នៅ​ក្រុង​បាវិត​ត្រៀម​រៀបការ​ឆាប់ៗ​នេះហើយ​។​ ជាមួយគ្នា​នឹង​ប្រកាស​បែបនេះ​នាយ តាក់ស៊ី ក៏បាន​បង្ហាញមុខ​ភរិយា​ថ្មី​ព្រមជាមួយ​ការប្រកាស​ទិញ​រថយន្ត​LEXUS RX330​បង់​រំលស់ ​ដែល​ត្រូវ​ចំណាយ​ក្នុង​១​ខែៗ​ខ្ទង់​ជិត​៤០០​ដុល្លារ​ផងដែរ។យ៉ាងណាមិញ​ព្រោះតែ​ដំណឹង​នេះ ​ទើប​ធ្វើ​ឲ្យ​មហាជន​មាន​អារម្មណ៍​ហួច​ចិត្តខ្លាំង​ចំពោះ​នាយ តាក់ស៊ី ខណៈ​គ្រា​ធ្លាក់ខ្លួន​ឈឺ​លំបាក​អំពាវនាវ​រក​ជំនួយ​ពី​សប្បុរសជន​ ហើយ​ដល់ពេល​ជាសះស្បើយ​ឡើងវិញ​ បែរជា​មាន​លុយ​ទិញ​ឡាន​ LEXUS RX330​និង​ប្រកា​ស​ការ​ប្រពន្ធ​ធ្វើ​ព្រងើយ។

បើតាម​មតិ​រិះគន់​មហាជន​មួយចំនួន​ បាន​លើកឡើងថា ​បើសិនជា​ការពិត សុទ្ធតែ​បួស​ខានមិនបាន​ព្រោះ​មាន​និស្ស័យ​ជាមួយ​ពុទ្ធសាសនា សឹក​វិញ​ព្រោះ​បញ្ហា​សុខភាព ចុងក្រោយ​កាត់ចោល​មិនបាន​កាម​កិលេស​តណ្ហា អស់​និយាយ​អ្នក​ដែល​ធ្លាប់​ផ្តល់ជំនួយ​មិនដឹង​ហួសចិត្ត​យ៉ាងណាទេ​។ ​ខ្លះទៀត​និយាយថា ​អាត្មា​មិន​ចង់​និយាយ​រឿង​ពិភព​គុន​នេះ​ទេ​ តែ​ហួសពេក​! ម្តង​លែង​ប្រពន្ធ ម្តង​ទឹកនោមផ្អែម ម្តង​បួស ម្តង​សុំ​ជំនួយ ដល់​ទ្រាំលែងបាន​យកប្រពន្ធ​ទៀត​….!​អញ្ចឹង​បាន​ពាក្យចាស់​លោក​ថា Ok You Win!​។​ មិន​ខុសគ្នា​នោះទេ​ក៏មាន​ការ​រិះគន់ថា ​ឈឺ លះបង់​ប្រពន្ធ​កូន ទៅ​បួស ទេសនា ឈឺ សឹក ចូល​សិល្បៈ​វិញ រៃអង្គាស ទិញ​ឡាន​កូរ៉ូឡា ឡាន​ខូច រៃអង្គាស ប្រកាស​មុខ​គូស្នេហ៍​ថ្មី បង់​រំលស់​ឡាន ៣៣០ ការ​ឆាប់ៗ​….​។​តាមរយៈ​ការរិះគន់​នេះ​នៅ​មិនទាន់មាន​ប្រតិកម្ម​ណាមួយ​ពី​សាមីខ្លួន​នាយ តាក់ស៊ី នៅឡើយ​ទេ។

ខណៈដែលគ្មានព័ត៌មានលេចឮពីតារាសម្ដែងស្រី ឌុច លីដា នាងមានគូស្នេហ៍ ឬរៀបការពីពេលណាមកសោះ ស្រាប់តែតារាស្រីរាងតូចច្រឡឹងរូបនេះ បង្ហាញមុខកូនប្រុសដែលទើបសម្រាលបាន ៤ ថ្ងៃ ពិតជាភ្ញាក់ផ្អើលខ្លាំងទាំងក្នុងនិងក្រៅចង្កោមអ្នកសិល្បៈ។ ទាំងអ្នកសិល្បៈ និងមហាជនមួយចំនួនមានការងឿងឆ្ងល់ថា មិនដែលឮថារៀបការ! ហេតុអីបានជា ឌុច លីដា សម្រាលកូនប្រុសម្នាក់បែបនេះទៅវិញ? សង្ស័យមានប្ដីលួចលាក់ទេដឹង? សង្ស័យជាកូនចិញ្ចឹមទេដឹង?

​បើ​ផ្អែក​តាម​សារ​ជា​​ច្រើន​របស់​កញ្ញា​ ឌុច លីដា​ នៅ​ឯ​តាម​បណ្តាញ​​សង្គម​ហ្វេសប៊ុក​ និង​​​រូបភាពនៅលើបណ្ដាញសង្គមហ្វេសប៊ុក ព្រមទាំងអ្នកសិល្បៈដឹងពីជីវិតឯកជនរបស់នាង អាចឱ្យដឹងថា ​មួយ​រយៈពេល​​​ចុង​​ក្រោយ​នេះ លីដា គឺ​ពិត​ជា​​មាន​កូន​មែន​​ នាងរៀបរាប់ថា ៖«កូនគឺជាកម្លាំងចិត្ត ។ មានកូនរួច មិនអាចទៅណាបានព្រោះតែកូនដ៏គួរឲ្យស្រលាញ់នៅជាប់នឹងដើមទ្រូង »។ កញ្ញា ឌុច លីដា ក៏បានសរសេរ​​ទៀតថា​៖ «​​ថ្ងៃ​​​ហ្នឹង​​​​ម៉ាក់​ឲ្យ​អូន​លេង​​​ទឹក មុខ​ខ្លាំង​​ជាង​​​​មុន​ទៀត! អរគុណ​ដល់​​​អ្នក​ទាំង​​អស់់​គ្នា​​សម្រាប់​ការ​​ជូនពរ​អូន និង​​ម៉ាក់​អូន​​!​ »។

ប្រភពដដែរបន្តថា ដំណឹងមានកូនរបស់តារាស្រីរូបនេះបានលេចឡើងកាលពីខែមករាមកម៉្លេះ ប៉ុន្តែក៏មិនមានអ្នកជឿច្រើនដែរ ប៉ុន្តែក្រោយពីបង្ហាញមុខកូន និងឈ្មោះឡេង កិត្យាមណី នោះកាន់តែធ្វើឱ្យអ្នកក្នុងចង្កោមអ្នកសិល្បៈជឿជាក់ថាជាដំណឹងពិត។ បើផ្អែកមកលើបណ្តាញសង្គមរបស់តារាស្រីរូបនេះវិញ នាងបានបញ្ចេញរូបថតជាច្រើនសន្លឹកជាមួយកូនប្រុសដ៏គួរឱ្យស្រលាញ់ ជារៀងរាល់ថ្ងៃ។ មានរូបប៉ុនា្មនសន្លឹកនោះ គេឃើញតារាស្រី ទឹម រដ្ឋា បានកាន់ត្រកងឱបទ្រកូនប្រុសរបស់នាងដោយដៃទាំងពីទាំងរៀបរាប់ថា « Happy birthday to Mommy Lida Duch អូនសុំតំណាងឱ្យmommy ហើយព្រោះ mommy អត់បានរៀបខ្លួនទាន់ ម៉ាក់អ៊ំុ Tim Rotha ទៅសាប្រាយ ហាហាហាហា….»។

ទោះជាយ៉ាងណានៅមិនទាន់លេចចេញការរិះគន់ខ្លាំងៗនៅឡើយទេជុំវិញដំណឹងមានកូនមុនរៀបការរបស់តារាស្រីរូបនេះ និងនៅមិនទាន់មានការបកស្រាយបញ្ជាក់ព័ត៌មានច្បាស់ការពី ឌុច លីដា នៅឡើយទេ៕

តាមរយៈសារព័ត៌មានកម្សាន្ដ Naver របស់កូរ៉េខាងត្បូងដែលបានចុះផ្សាយនៅព្រឹកថ្ងៃទី ២៦ ខែកុម្ភៈ ឆ្នាំ ២០២០ នេះឱ្យដឹងថា តារាសម្ដែង និងតារាចម្រៀងខេប៉បជាច្រើនដួង បានរួមគ្នាបង្ហោះសារបំផុសឱ្យមានសកម្មភាពសប្បុរសធម៌ក្នុងការបរិច្ចាគ ថវិកា ម៉ាស និងវត្ថុដែលមានប្រយោជន៍ក្នុងការជួយដល់ការទប់ស្កត់ការរីករាលដាលឆ្លងវីរ៉ុស Covid-19 នៅទីក្រុង ដេកូ ប្រទេសកូរ៉េខាងត្បូង។ បន្ទាប់ពីបានឃើញនូវទឹកចិត្តតារាស្រី អុី យ៉ុងអេ បរិច្ចាគទឹកប្រាក់ ៥០ លានវ៉ុនដល់ក្រុមគ្រួសារអ្នកផ្ទុក Covid-19 គេក៏ឃើញមានតារាសម្ដែងជាច្រើដួងទៀត ចាប់ផ្ដើមធ្វើការបរិច្ចាគបន្តបន្ទាប់គ្នាជួយដល់ប្រជាជនកូរ៉េ។

នៅក្នុងនោះគេឃើញមានតារាសម្ដែងប្រុស ផាក សជុន (Park Seo Joon) បានប្រកាសបរិច្ចាគប្រាក់ចំនួន ១០០ លានវ៉ុន ជូនដល់មូលនិធិសហគមន៍សុខមាលភាពសង្គមប្រចាំទីក្រុង ដេកូ ដោយលោកអះអាងថា «ខ្ញុំចង់រួមចំណែករក្សាសុខភាពរបស់ជំងឺនៅក្នុងទីក្រុង ដេកូ បន្ទាប់ពីខ្ញុំបានឃើញទឹកចិត្តរបស់តារាសម្ដែងស្រី អុី យ៉ុងអេ »។

តារាសម្ដែងស្រី គីម កុអុឺន (Kim Go-Eun ) ក៏បានបរិច្ចាគប្រាក់ចំនួន ១០០ លានវ៉ុន ដើម្បីទិញម៉ាសការពារវីរ៉ុសសម្រាប់គ្រួសារជំងឺដែលកំពុងខ្វះខាតផងដែរ។

អ្នកនាងអំពាវនាវសកម្មភាពបន្ដ ដោយថេកទៅកាន់ពិធីករលោក គីម ថេក្យុន ( Kim Tae-kyun ) បានបរិច្ចាគម៉ាសអនាម័យចំនួន ១០,០០០ ម៉ាសសម្រាប់កុមារងាយរងគ្រោះ។

សូមជម្រាបថា ក៏មានតារាចម្រៀងខេប៉បជាច្រើនដួងទៀត​បានធ្វើការបរិច្ចាគទឹកអាកុលអនាម័យលាងសម្អាតដៃជាច្រើនដប ដើម្បីរួមចំណែកទប់ស្កាត់ការរីករាលដាលនៃវីរ៉ុស Covid-19 នៅក្នុងទីក្រុង ដេកូ ថែមទៀតផង៕