Author: អេបិល

ករុណា ពេជ្រ និងក្រុមតារាចម្រៀងក្នុងផលិតកម្មថោន ចុះចែកអំណោយជូនជនរងគ្រោះដោយទឹកជំនន់
ជំនន់ទឹកភ្លៀងកំពុងតែវាយលុកក្នុងបណ្ដាខេត្តជាច្រើននៅក្នុងប្រទេសកម្ពុជា បណ្ដាលឱ្យទទួលរងការលិចលង់យ៉ាងខ្លាំង ខណៈមានគ្រួសារជាច្រើនកំពុងតែជួបនូវការលំបាក បន្ទាប់ពីផ្ទះសំបែងត្រូវបានជន់លិចដោយសារទឹកឡើងខ្លាំង។ យ៉ាងណាមិញបញ្ហានេះក៏មានសប្បុរសជន និងអ្នកសិល្បៈជាច្រើនបានចូលរួមផ្ដល់ជាអំណោយ និងចុះទៅចែកជូននៅតាមតំបន់ដែលរងគ្រោះទៀតផង។
ក្នុងនោះ តារាចម្រៀងប្រចាំផលិតកម្មថោន លោក ករុណា ពេជ្រ ក៏បានដឹកនាំក្រុមតារាចម្រៀងក្នុងផលិតកម្ម និងក្រុមការងារនាំយកអំណោយចុះទៅចែកជូនដល់ប្រជាពលរដ្ឋរងគ្រោះផងដែរ។ ជានិច្ចកាល តារាចម្រៀងរូបនេះមិនដែលរំលងការងារមនុស្សធម៌ក្នុងការចុះជួយដល់បងប្អូនក្រីក្រ ចាស់ជរា និងជនពិការឡើយ។ ជាក់ស្តែងតាមរយៈវីដេអូឃ្លីប ដែលរៀបរាប់ពីទុក្ខលំបាករបស់ប្រជាពលរដ្ឋដែលរងគ្រោះដោយទឹកជំនន់នោះ ករុណា ពេជ្រ បានសម្តែងពីក្តីអាណិត ចំពោះបងប្អូនដែលផ្ទះសំបែងត្រូវជន់លិច និងមិនបានយកសម្ភារមកជាមួយ គ្មានទាំងចំណីអាហារ សម្លៀកបំពាក់ និងសម្ភារប្រើប្រាស់ផ្ទាល់ខ្លួនទៀតផង។
នៅលើគណនីហ្វេសប៊ុករបសខ្លួន លោក ករុណា ពេជ្រ បានឱ្យដឹងថា «ថ្ងៃនេះ ខ្ញុំបាទ ករុណា ពេជ្រ បានដឹកនាំតារាចម្រៀងប្រចាំផលិតកម្ម ថោន ដូចជា អ្នកនាង កាតុ លោក សុគន្ធ ថេរាយុ និង កញ្ញា ឈិត សុវណ្ណបញ្ញា ចូលរួមធ្វើវិភាគទាន និងបាននាំយកនូវអំណោយ និងថវិកាមួយចំនួនរបស់បណ្តាក្រុមហ៊ុន និងសប្បុរសជនទាំងក្នុង និងក្រៅប្រទេសទៅជូនដល់អ្នកដែលរងគ្រោះដោយសារទឹកជំនន់ នៅភូមិរំលោង សង្កាត់កណ្តោលដុំ ក្រុងច្បារមន ខេត្តកំពង់ស្ពឺចំនួន 197គ្រួសារ និងឃុំតាំងស្យា ស្រុកភ្នំស្រួច ខេត្តកំពង់ស្ពឺ ចំនួន 148 គ្រួសារ សរុប ទាំងអស់ 345 គ្រួសារ ដែលក្នុងមួយគ្រួសារនឹងទទួលបាន មី 1កេស អង្ករ 20គីឡូក្រាម ទឹកត្រី 1យួរ ឃីត 1កញ្ចប់ រួមទាំងថវិកា 20,000រៀលទៀតផង»៕
July 25, 2018
ជីដូនកាកី រងការរិះគន់យ៉ាងចាស់ដៃ ចំពោះការបង្ហាញភាពសិចស៊ីហួសហេតុ
មហាជនក្នុងបណ្ដាញសង្គមនាំគ្នារិះគន់តារាសម្ដែងជីដូនកាកី ឬស្រីម៉ុច ដែលស្លៀកឈុតសិចស៊ីមិនធម្មតា បែបប៊ីគីនី វាលគល់ភ្លៅ លេចក្រលៀន ស្ទើរតែលេចតំបន់សំខាន់។ ក្នុងនោះដែរ តារាចម្រៀងពូកែទើសលោក ម៉ៃ សុគន្ធ និងតារាចម្រៀងជើងចាស់ ក៏បានបង្ហោះសារសួររកមុខអ្នកច្នៃម៉ូដសម្លៀកបំពាក់ឱ្យតារាស្រីរូបនេះស្លៀកផងដែរ ព្រោះវាធ្វើឱ្យប៉ះពាល់ដល់តម្លៃតារាផ្សេងៗទៀត។
លោក ម៉ៃ សុគន្ធ រៀបរាប់ថា «(តែងកាយមិនមើលប្រាណ តែងប្រាណមិនមើលវ័យ)កំពូលតារាខ្មែរ និងតារាថៃ តារាខ្មែរមើលទៅមិនដឹងជាដូចស្អី ហួសនឹងថ្លែង ត្រឹមតែបុណ្ណឹងយើងអាចវាយតម្លៃបានហើយ កម្រិតរីកចម្រើន ឬធ្លាក់ចុះកំពូលអ្នកច្នៃម៉ូដ ចង់ស្គាល់ណាស់ ចង់ឱ្យរង្វាន់អ្នកច្នៃម៉ូដ ចេញស្លីបអ្នកមានបុណ្យទៅមើលយល់» ។ លោកបន្ដថា «មិនមែនចង់ទើសទេ តែវាហួសហេតុពេក មិនដឹងថ្លែងថាម៉េច ជ្រុលនិយមពេកហើយ (ម៉ូដខោទឹកនោមកូនក្មេង ម្ចាស់ផ្ទះ នាងក្តៅស្អុះពេក បានស្លៀកចឹង ចង់រកមុខអ្នកច្នៃម៉ូតកប់ក្រលៀននេះណាស់ លីអូ ស នាងចង់ហែលទឹកលើឆាក ហ្នឹងហើយជាដើមហេតុដែលតែងតែធ្វើឱ្យមហាជនវាយតម្លៃអ្នកសិល្បៈ កម្រិត Down and Low» ។
គួរបញ្ជាក់ផងដែរថា ខណៈបង្ហាញវត្តមានសិចស៊ីជាថ្មីនាពេលនោះ ហាក់មិនបានរុញឱ្យតារាស្រីរូបនេះទទួលបានការគាំទ្រ និងប្រជាប្រិយនោះឡើយ តែផ្ទុយទៅវិញនាងត្រូវរងការរិះគន់យ៉ាងខ្លាំងពីមហាជន ពិសេសតារាសិល្បៈប្រុសស្រីផ្សេងទៀតក៏បានបញ្ចេញប្រតិកម្មធ្ងន់ៗ ជុំវិញការស្លៀកពាក់ដែលមើលទៅប្រាសចាកពីវប្បធម៌ប្រពៃណីខ្មែរយើងបែបនេះ។ ក៏មិនខុសគ្នាដែរ អ្នកនាង គង់ ច័ន្ទសូរិយា ក៏បានថ្លែងដោយឥតសំចៃមាត់លើគណនីហ្វេសប៊ុករបស់នាងមុននេះបន្តិចថា «តារាថៃមធ្យម ងំតារាខ្មែរនឹងហ្មង បើបិទបាំងខ្លះទៅវាម៉េច? ចាំទៅស្រាតក្នុងបន្ទប់វិញទៅហ្អេ? កន្លែងហ្នឹងហើយដែលធ្វើឱ្យវប្បធម៌ខ្មែរធ្លាក់ចុះ»។ រីឯអ្នកនាង ខ្ញុង វិញក៏បានលើកឡើងដែរថា «ចេះទៅរួច?!» ។
សូមជម្រាបថា មហាជនបានធ្វើការរិះគន់ចំពោះភាពសិចស៊ីរបស់ សុខ ស្រីម៉ុច ដោយបាននិយាយជារួមថា «មែនហើយបង ថៃស្លៀកប៉ុណ្ណឹងមិនសូវអីទេ តែខ្មែរយើងគាត់ជ្រុលហើយ គាត់ចង់បង្ហាញថា គាត់កូនច្រើនហើយនៅរាងស្អាត ស្អាតមែន តែគាត់ជាអ្នកសិល្បៈ ដល់អ៊ីចឹងពេកពិបាកណាស់»៕
July 25, 2018
មិនខុសពីកញ្ញា បេប៊ី ទេ លោក រុន ណាកូ ក៏ជួបរឿងចម្លែកៗមុន និងក្រោយទទួលពានដែរ
តារាវ័យក្មេង 2រូប មានកញ្ញា ប៊េប៊ី និងលោក រុន ណាកូ គឺជាម្ចាស់ជយលាភីដែលទទួលបានការចាប់អារម្មណ៍គួរឱ្យកត់សម្គាល់នៅក្នុងកម្មវិធីប្រកួតសម្លៀកបំពាក់បុរាណ ដោយសារតែអ្នកទាំងពីរសុទ្ធតែបានគ្រងឈុតព្រះរាជាល្បីៗឈ្មោះក្នុងសម័យរុងរឿងរបស់កម្ពុជាដូចគ្នា និងទទួលបានពានជាតារាលេចធ្លោប្រចាំឆ្នាំពីកម្មវិធីនោះដូចគ្នា និងចំណុចដែលរឹតតែស្រដៀងគ្នាទៀតនោះ គឺអ្នកទាំងពីរសុទ្ធតែបានជួបហេតុភេទចម្លែកៗដូចគ្នាទាំងមុន និងក្រោយលើកពាន រហូតដល់ថ្នាក់ធ្វើឱ្យអ្នកទាំងពីរបាក់ស្បាត លែងចង់គ្រងឈុតបុរាណបែបនេះសម្រាប់លើកក្រោយទៀតៗផង។
លោក រុន ណាកូ បានទម្លាយពីរឿងរ៉ាវដែលខ្លួនជួបប្រទះស្រដៀងនឹងកញ្ញា បេប៊ីដែរនោះថា មុនគ្រងឈុតព្រះបាទសុរិយវរ្ម័នទី2 ដែលស្រាវជ្រាវ និងច្នៃដោយលោក នូ សុផេន ដើម្បីចូលប្រកួតនោះ លោកដឹងច្បាស់ណាស់ថា មិនអាចធ្វើរឿងផ្ដេសផ្ដាស់ ឬសូម្បីតែមាត់ប៉ប៉ាច់ប៉ប៉ោចមិនល្អបានឡើយ ដើម្បីកុំឱ្យបារមីរបស់ម្ចាស់ឈុតប្រកែប្រកាន់។ លោកកាន់តែប្រយ័ត្នទៅទៀតក្នុងឥរិយាបថអង្គុយនៅនឹងតុ ទាំងការនិយាយលេងសើច ឬផឹកជល់កែវជាដើម។ ប៉ុន្តែដោយសារតែអ្នកសិល្បៈចេះតែជល់កែវ និងបង្ខំឱ្យហូបស្រាខ្លាំងពេក លោកក៏ដាក់មួយក្អឹកក្នុងពេលអង្គុយរង់ចាំការបង្ហាញខ្លួនជាលើកទី2 មុនការប្រកាសលទ្ធផល។ ស្រាប់តែពេលនោះចាប់ផ្ដើមមានអាការងឿង និងតឹងណែនក្បាលដូចត្រូវគេយកស្អីមករឹតក្បាលឡើងណែនអ៊ីចឹង ខណៈដែលមកុដលោកពាក់នោះរលុង និងថែមទាំងត្រូវញ៉ុកកន្សែងបន្ថែមនៅខាងក្នុងសោះហ្នឹង?!។
លោកបន្ដថា ស្ថានភាពនោះបានធ្វើឱ្យលោកសម្រេចចិត្តដោះមកុដចេញមួយសន្ទុះសិន ហើយមានគំនិតចង់ឈប់បន្តការប្រកួត ព្រោះស្ថានភាពកាន់តែតានតឹងខ្លាំង ដោយសារតែលោកចាប់ផ្ដើមមានអារម្មណ៍ថា ដកដង្ហើមលែងចង់ដល់គ្នា ដូចមានអ្នកណាម្នាក់មកច្របាច់បំពង់ខ្យល់ជាប់អ៊ីចឹង តែយ៉ាងណាក៏ដោយ ក្រោយពេលលោកដឹងថា ទំនងជាខុសតំណមហើយនោះ ក៏នាំគ្នាបួងសួងសុំឱ្យម្ចាស់ឈុតកុំប្រកែប្រកាន់អី និងអត់ទោសឱ្យផង។ ភ្លាមនោះ មួយសន្ទុះក្រោយមកក៏ស្រាប់តែដូចត្រូវគេដកពិសចេញអ៊ីចឹង លោកបានស្រួលខ្លួនដូចដើមឡើងវិញ ហើយអាចបន្តការប្រកួតក្នុងវគ្គទីបាន។។ លោកថា ខ្លួនលោកមិនមែនជាមនុស្សអបិយជំនឿទេ ប៉ុន្តែក្រោយជួបហេតុការណ៍ចម្លែកនេះ ធ្វើឱ្យលោកភ្លឺភ្នែកតែម្ដង ថា ឈុតបុរាណរបស់ព្រះមហាក្សត្រខ្មែរកាលពីសម័យអតីតកាល បើទោះជាបានបង្កើតថ្មីក៏ដោយ ក៏នៅតែមានបារមីតាមថែរក្សាដែរ។
លោកបញ្ជាក់ថា កាន់តែមានរឿងគួរឱ្យព្រឺខ្លួនទៅទៀត នៅពេលគណៈកម្មការប្រកាសថា លោកបានទទួលពាន «តារាលេចធ្លោប្រចាំឆ្នាំផ្នែកគ្រងឈុតបុរាណស័ក្ដិសម» ភ្លាម លោកមានអារម្មណ៍ថា ដូចជាមានវិញ្ញាណអ្វីម្យ៉ាងមកឈរនៅក្បែរៗរូបលោក ដែលលោកយល់ថា ប្រហែលជាម្ចាស់ឈុតគេមកអបអរសាទរដែលឈុតរបស់គេបានឈ្នះពានដែរហើយមើលទៅ ប៉ុន្តែសម្រាប់រូបលោកវិញ គឺព្រឺខ្លួនខ្ញាក បះរោមច្រូង ដល់ថ្នាក់មកដល់ផ្ទះហើយ ក៏នៅតែព្រឺៗដេកមិនលក់ទៀតផង៕
July 23, 2018
Taylor Swift ដុតនំ Cake ជូនជាកាដូដល់ Selena Gomez មិត្តសំណព្វចិត្ត
តាមរយៈសារព័ត៌មាន Daily Mail ដែលចេញផ្សាយនៅថ្ងៃទី23 ខែកក្កដា ឆ្នាំ2018 នេះបានឱ្យដឹងថា កាលពីថ្ងៃអាទិត្យម្សិលមិញនេះ ត្រូវជាថ្ងៃកំណើតរបស់តារាចម្រៀងស្រី Selena Gomez ដែលមានវ័យ 26ឆ្នាំហើយ នៅក្នុងពេលនោះតារាចម្រៀងស្រីដែលជាមិត្តសម្លាញ់សំណព្វចិត្តជាងគេរបស់នាង គឺតារាស្រី Taylor Swift បានដុតនំ Cake ដោយផ្ទាល់ដៃដើម្បីជូនជាកាដូលើកទឹកចិត្តដល់ Selena ស្របពេលដែល Selena កំពុងមានរឿងអាស្រូវខូចចិត្តជាច្រើនពាក់ព័ន្ធនឹង JB ( Justin Bieber ) ។
បើទោះបីជាតារាចម្រៀងស្រី Taylor Swift កំពុងមានភាពមមាញឹកក្នុងការប្រគំតន្ត្រីទេសចរណ៍ទូទាំងពិភពលោកយ៉ាងណាក៏ដោយ ក៏តារាស្រីរូបនេះនៅតែឆ្លៀតពេលវេលាផ្ទាល់ខ្លួន លើកទឹកចិត្តមិត្តសម្លាញ់របស់នាង និងបង្ហោះរូបភាពនៅលើ IG យ៉ាងផ្អែមល្ហែមជាមួយនឹង Selena Gomez ផងដែរ។ ក្នុងថ្ងៃកំណើតរបស់ Gomez អតីតមិត្តប្រុសរបស់នាង លោក Weekend ក៏បានជូនបាច់ផ្កាជាពិសេសមកកាន់នាងផងដែរ ដើម្បីសម្ដែងការលើកទឹកចិត្ត បើទោះបីជាអ្នកទាំងពីរបានចែកផ្លូវគ្នារួចហើយយ៉ាងណាក៏ដោយ។
សូមជម្រាបបន្ថែមថា អ្នកគាំទ្រ Selena Gomez ជាពិសេស Fan Club របស់នាងផ្ទាល់បានបង្ហោះរូបភាពកាលពីនាងនៅវ័យកុមារជាច្រើនសន្លឹកយ៉ាងឃ្ជូតៗ នៅលើ IG ដែលធ្វើឱ្យតារាស្រីរូបនេះកាន់តែមានកម្លាំងចិត្តបន្ថែមឡើងទៀតនៅក្នុងថ្ងៃកំណើត។ គួររំឭកដែរថា Selena ធ្លាប់មានប្រវត្តិវះកាត់ប្តូរក្រលៀន និងលើរាងកាយនៅមានបន្សល់ស្នាមដេរកាលពីគ្រាវះកាត់នោះយ៉ាងច្បាស់ គឺមានប្រវែងជិតមួយចង្អាមឯណោះ និងវាបានបង្ហាញឱ្យឃើញយ៉ាងច្បាស់នៅពេលណាដែលនាងស្លៀកពាក់សិចស៊ីខ្លីៗម្ដងៗ៕
July 23, 2018
ព្រាប សុវត្ថិ ចេញមុខវិនិយោគលើវិស័យអចលនទ្រព្យយ៉ាងចំហ
បន្ទាប់ពីមានភាពគគ្រឹកគគ្រេងខាងការវិនិយោគលើវិស័យអចលនទ្រព្យ(ពុះដីឡូត៍លក់) ខណៈនេះលោក ព្រាប សុវត្ថិ ក៏បានប្រកាសចាប់ដៃជាមួយលោកឧកញ៉ាវ័យក្មេង ឡេង ណាវ៉ាត្រា ដែលត្រូវគេស្គាល់ថា ជាអ្នកជំនួញវ័យក្មេងដែលជោគជ័យលើវិស័យអចលនទ្រព្យទាំងលើជំនួញពុះដីឡូត៍លក់ និងសាងសង់បុរី ដោយការដាក់ទុនរួមគ្នាជាង 5លានដុល្លារធ្វើជំនួញពុះដីឡូត៍លក់លើទំហំដីជាង 13ហិកតានៅម្ដុំផ្សារព្រៃទទឹង លើផ្លូវជាតិលេខ3។
លោក ព្រាប សុវត្ថិ បានថ្លែងនៅក្នុងសន្និសីទកាសែតកាលពីរសៀលថ្ងៃទី21 កក្កដា កន្លងទៅថ្មីៗនេះថា ដើម្បីអបអរមុខជំនួញរួមគ្នារបស់លោក ជាមួយលោកឧកញ៉ា ឡេង ណាវ៉ាត្រា លោកនិងដៃគូភាគហ៊ុនបានសម្រេចថែមជូនម៉ូតូមួយគ្រឿងតែម្ដងចំពោះអតិថិជនណាដែលបានទិញដីចំនួន 1ឡូត៍ក្នុងគម្រោងរបស់លោកនៅផ្សារព្រៃទទឹង លើផ្លូវជាតិលេខ3 នេះ ខណៈដែលដីឡូត៍ក្នុងគម្រោងនេះបានប្រកាសលក់តែក្នុងតម្លៃចាប់ពី 3,900ដុល្លារប៉ុណ្ណោះក្នុងមួយឡូត៍ ទាបជាងគម្រោងផ្សេងៗទៀតដែលនៅក្នុងតំបន់ជុំវិញនោះ។ ទាំងអស់នេះ គឺដើម្បីផ្ដល់លទ្ធភាពឱ្យអតិថិជនមានឱកាសបានទិញដីឡូត៍របស់លោក និងលោក ឡេង ណាវ៉ាត្រា ដែលទើបប្រកាសចាប់ដៃគ្នានេះ។ លោកបានបន្ដថា ការថែមជូននេះនឹងមានកំណត់រយៈពេល15ថ្ងៃ គិតចាប់តាំងពីថ្ងៃប្រកាសនេះតទៅ ដោយលោកបានបញ្ជាក់យ៉ាងខ្លីថា ទោះជាក្នុងរយៈពេលនេះដីឡូត៍ក្នុងគម្រោងរបស់លោកទាំងមូលត្រូវបានអតិថិជនទិញអស់រហូតដល់ទៅជាងមួយពាន់ឡូត៍ហើយក៏ដោយ ក៏លោក និងដៃគូភាគហ៊ុនបានសម្រេចចិត្តដាច់ខាតលើការបន្ថែមម៉ូតូមួយគ្រឿងជូនដល់អតិថិជនគ្រប់ៗគ្នា មិនឱ្យខ្វះម្នាក់ណាឡើយ ដើម្បីទុកជាចំណងដៃរបស់លោក ព្រាប សុវត្ថិ និងលោក ឡេង ណាវ៉ាត្រា ដែលបានចាប់ដៃធ្វើជំនួញរួមគ្នាក្នុងគ្រានេះ។
គួរបញ្ជាក់ផងដែរថា ក្រៅពីការប្រកាសជូនម៉ូតូមួយគ្រឿងជាកាដូសម្រាប់ការបើកគម្រោងបណ្ដាក់ទុនរួមគ្នានេះហើយ លោកព្រាប សុត្ថិ នៅបានបញ្ជាក់បន្ថែមទៀតថា មូលហេតុដែលលោកសម្រេចចិត្តបោះទុនរួមគ្នាជាមួយលោកឧកញ៉ា ឡេង ណាវ៉ាត្រា រហូតដល់ជាង 5លានដុល្លារលើគម្រោងវិនិយោគអចលនទ្រព្យនៅផ្សារព្រៃទទឹងនោះ គឺដោយសារតែលោក ឡេង ណាវ៉ាត្រា ជាបុគ្គលមានការតស៊ូគួរឱ្យសរសើរ ជាបុគ្គលជោគជ័យ និងជាបុគ្គលដែលបានទទួលនូវការគោរពជាច្រើនពីសំណាក់មហាជនក្នុងនាមអ្នកជំនួញមានគុណធម៌ និងមានទឹកចិត្តសប្បុរសតាមរយៈកិច្ចការបរិច្ចាគរាប់មិនអស់។ ក្នុងនោះលោកក៏ចង់ជោគជ័យក្នុងជំនួញដីធ្លីឱ្យខ្លាំងដូចគ្នានឹងលោកឡេង ណាវ៉ាត្រា ផងដែរ ទើបលោកប្រើពេលសិក្សាពីការចាប់ដៃ និងបានស្វែងរកដីធ្លីយ៉ាងលំបាក ទម្រាំរកបានដីមួយប្លង់ធំទំហំជាង 13ហិកតានៅទីប្រជុំជនផ្សារព្រៃទទឹង លើផ្លូវជាតិលេខ3 ដែលមានចម្ងាយប្រមាណជា11គីឡូម៉ែត្រពីរង្វង់មូលចោមចៅនេះ។
ជាចុងក្រោយលោកបានបញ្ជាក់ម្ដងទៀតថា ដីដែលបានប្រើទុនរួមគ្នា និងជាគម្រោងបើកឆាកជាមួយលោកឡេង ណាវ៉ាត្រា នេះគឺស្ថិតនៅចំទីតាំងល្អនៅក្នុងទីប្រជុំជនដែលមានតម្លៃសមរម្យអាចទទួលយកបាន។ ការចាប់ដៃគូវិនិយោគលើវិស័យអចលនទ្រព្យយ៉ាងបើកចំហនេះ ត្រូវបានគេរំពឹងទុកថា អ្នកគាំទ្រកំពូលតារាចម្រៀង ព្រាប សុវត្ថិ នឹងមានការចាប់អារម្មណ៍ចំពោះដីឡូត៍ពុះលក់របស់លោកដែលស្ថិតក្នុងទីតាំងល្អ មានតម្លៃត្រឹមតែ 3,900ដុល្លារ និងថែមទាំងផ្ដល់ម៉ូតូជូនមួយគ្រឿងទៀតផង៕
July 23, 2018
តារាចម្រៀងស្រី Miley Cyrus និងគូដណ្ដឹងកំពុងឃ្លាតឆ្ងាយពីគ្នា
បើតាមការចេញផ្សាយរបស់សារព័ត៌មាននៅចក្រភពអង់គ្លេស Daily Mail បានឱ្យដឹងថា តារាចម្រៀងស្រីល្បីឈ្មោះនៅសហរដ្ឋអាមេរិក នាង Miley Cyrus និងគូដណ្ដឹងរបស់នាងលោក Liam Hemsworth ត្រូវបានគេបង្ហើបថា ពួកគេកំពុងតែឃ្លាតឆ្ងាយពីគ្នាហើយ បន្ទាប់ពីបានព្យាយាមទ្រាំទ្ររស់នៅជាមួយគ្នាទាំងមានអារម្មណ៍វេទនាផ្លួវចិត្តអស់រយៈពេលជាច្រើនខែរួចមក។
ម្ចាស់បទចម្រៀង «The Wrecking Ball» វ័យ 25ឆ្នាំ និងតារាសម្ដែងប្រុសក្នុងរឿង «Hunger Games star» វ័យ 28 ឆ្នាំ ត្រូវបានគេបង្ហើបឱ្យដឹងទៀតថា អ្នកទាំងពីរមានការឃ្នើសចិត្តនឹងគ្នាក្រោយពេលរៀបការ ដែលអ្នកទាំងពីរមិនទាន់មានបុត្រនៅឡើយ ជាមូលហេតុមួយបណ្ដាលឱ្យពួកគេមិនសូវជាត្រូវរ៉ូវគ្នាប៉ុន្មានឡើយ។ បើតាមប្រភពដែលជិតស្និទ្ធនឹងទំនាក់ទំនងស្នេហារបស់តារាទាំងពីរដួងនេះបានបង្ហើបប្រាប់ឱ្យដឹងថា តារាស្រី Miley Cyrus នាងជាមនុស្សរឹងរូស និងប្រហែលមិនអាចបន្ដទំនាក់ទំនងស្នេហាឱ្យបានយូរអង្វែងនោះទេ។
គួរបញ្ជាក់ផងដែរថា មានអ្នកគាំទ្រជាច្រើននាក់កំពុងសង្កេតតាមដានអំពីទំនាក់ទំនងស្នេហារបស់តារាស្រីរូបនេះ និងគូស្នេហ៍ ដែលនៅពេលបច្ចុប្បន្ននេះ ពួកគេទាំងពីរកំពុងព្យាយាមរស់នៅជាមួយគ្នា ដើម្បីបិទបាំងភ្នែកមហាជន បើទោះបីជាពួកគេត្រូវរងទុក្ខវេទនាផ្លូវចិត្តយ៉ាងណាក៏ដោយ៕
July 23, 2018
Everton ខិតកាន់តែកៀកក្នុងការនាំយក Richarlison ពី Watford ក្នុងតម្លៃខ្លួន 50លានផោន
ក្លិបទូកក្តោង Everton កំពុងស្ថិតយ៉ាងប្រកៀកក្នុងការចុះហត្ថលេខាជាមួយនឹងខ្សែប្រយុទ្ធប្រេស៊ីល Richarlison ពីក្លិប Watford ក្នុងការផ្ទេរមួយដែលអាចនឹងមានតម្លៃខ្លួនដល់ទៅ 50លានផោន (ស្មើនឹង65,66លានដុល្លារអាមេរិក)។
Richarlison បានចុះហត្ថលេខារយៈពេល 5ឆ្នាំជាមួយនឹង Watford កាលពីខែសីហា ឆ្នាំ2017 ក្រោយពីបានផ្ទេរមកពីក្លិប Fluminense សម្រាប់តម្លៃខ្លួន11.5លានផោន បន្ទាប់ពីបានបង្ហាញពីទម្រង់លេងយ៉ាងល្អក្នុងព្រឹត្តិការណ៍ Under-20 World Cup។ លោក Marco Silva គ្រូបង្វឹករបស់ក្រុម Everton គឺជាសមាជិកនៃផ្នែកចាត់ការទូទៅរបស់ក្លិប Watford ដែលបាននាំយក Richarlison ទៅកាន់កីឡដ្ឋាន Vicarage Road។ ខ្សែប្រយុទ្ធវ័យ 21ឆ្នាំរូបនេះ បានស៊ុតបាល់បញ្ចូលទី 5គ្រាប់ក្នុងការបង្ហាញខ្លួន 12លើកដំបូងរបស់គេក្នុងក្របខ័ណ្ឌ Premier League នៅមុនពេលទម្រង់លេងរបស់គេបានធ្លាក់ចុះវិញ។
តម្លៃខ្លួនជាកំណត់ត្រានៃការទិញចូលកីឡាកររបស់ Everton គឺ Gylfi Sigurdsson ដែលបានផ្ទេរមកពីក្លិប Swansea កាលពីខែសីហា ឆ្នាំ2017 ក្នុងតម្លៃខ្លួន 45លានផោន។ Richarlison មិនបានរកគ្រាប់បាល់បញ្ចូលទីសោះចាប់តាំងពីខែវិច្ឆិកា ប៉ុន្តែ លោក Silva មានបំណងចង់នាំយករូបគេទៅកាន់កីឡដ្ឋាន Goodison Park ចាប់តាំងពីលោកបានចូលជំនួសកន្លែងរបស់លោក Sam Allardyce កាលពីថ្ងៃទី31 ខែឧសភា។
ការពិភាក្សាផ្សេងៗជុំវិញការផ្ទេរនេះបានបន្ត បើទោះបី Everton មិនមានទំនាក់ទំនងល្អជាមួយនឹងក្លិប Watford ចាប់តាំងពីមិនអាចនាំយកលោក Silva ដែលកាលនោះកំពុងដឹកនាំនៅកីឡដ្ឋាន Vicarage Road ទៅកាន់កីឡដ្ឋាន Goodison Park ក្រោយពីការចាកចេញរបស់លោក Ronald Koeman កាលពីខែតុលា ឆ្នាំ2017 ក៏ដោយ៕
ប្រភពពី៖ BBC
July 21, 2018
ផ្ទុះអាងបំពង់ចំហាយទឹកនៅកណ្ដាលទីក្រុង ញូវយ៉ក ( មានវីដេអូ )
ដោយយោងតាមសារព័ត៌មាន China Xinhua News ដែលចេញផ្សាយមុននេះបន្ដិចបានឱ្យដឹងថា កើតមានហេតុការណ៍ផ្ទុះអាងបំពង់ចំហាយទឹក នៅកណ្ដាលទីក្រុង ញូវយ៉ក សហរដ្ឋអាមេរិក ខណៈដែលផ្សែងបានបំភាយឡើងយ៉ាងខ្ពស់ទៅលើអាកាស បណ្ដាលឱ្យប្រជាជនដែលរស់នៅម្ដុំនោះមានភាពភ្ញាក់ផ្អើលជាខ្លាំង។
ហេតុការណ៍នេះបានកើតឡើងនៅថ្ងៃទី 19 ខែកក្កដា ឆ្នាំ 2018 នាវេលាម៉ោង 6 .40 នាទី ម៉ោងនៃសហរដ្ឋអាមេរិក (ត្រូវពេលព្រឹកថ្ងៃនេះក្នុងស្រុកខ្មែរ ) ដែលបានកើតឡើងនៅម្ដុំផ្លូវ Fifth Avenue និងផ្លូវ 21Street ដែលមិនឆ្ងាយពីអគារ Flatiron Building ប៉ុន្មាននោះទេ។ គួរបញ្ជាក់ផងដែរថា ហេតុការណ៍រន្ធត់នេះ ពុំមានអ្នករបួស និងស្លាប់ឡើយ។ ដើម្បីឱ្យកាន់តែជាក់ច្បាស់ សូមទស្សនាវីដេអូខាងក្រោមនេះ ៖
July 21, 2018
Cristiano Ronaldo ប្រកាសលក់ភូមិគ្រិះដ៏ធំស្កឹមស្កៃក្នុងតម្លៃ 4.8 លានដុល្លារសហរដ្ឋអាមេរិក
តាមរយៈសារព័ត៌មាន Sanook ដែលចេញផ្សាយនៅពេលមុននេះបន្ដិច បានឱ្យដឹងថា បន្ទាប់ពីសម្រេចចិត្តចុះកិច្ចកុងត្រារយៈពេល 4 ឆ្នាំជាមួយ Juventus ជាក្រុមលំដាប់ប្រចាំ កាល់សូ Serie A ប្រទេសអ៊ីតាលី និងជាការបិទទំព័រ 9 ឆ្នាំក្នុងព័ណ៌អាវ Real Madrid នោះ នៅទីបំផុតកីឡាករ Cristiano Ronaldo ដែលជាអាយដលក្រុមជម្រើសជាតិព័រទុយហ្គាល់ បានប្រកាសលក់ភូមិគ្រិះដ៏ធំស្កឹមស្កៃក្នុងតម្លៃ 4.8 លានដុល្លារសហរដ្ឋអាមេរិក ។
នៅក្នុងភូមិគ្រិះមួយនេះ មានបន្ទប់គេងចំនួន 7 បន្ទប់ទឹកចំនួន 8 ដូចដែលកីឡាកររូបនេះបានបង្ហោះនៅលើបណ្ដាញសង្គមអ៊ីនស្ដាក្រាម ដែលមានអ្នកតាមដានលោកដល់ទៅ 136 លាននាក់។ គួរបញ្ជាក់ដែរថា នៅផ្នែកខាងក្រៅមានកន្លែងហាត់ប្រាណផ្ទាល់ខ្លួនដ៏ធំដូចវិមានមួយ មានតារាងបាល់ទាត់ធំមួយ អាងហែលទឹកដ៏ប្រណីត និងមានកន្លែងងូតទឹកយ៉ាងមានផាសុខភាពតែម្ដង។ ក្រៅពីនោះ ក៏មានការរចនាម៉ូដបន្ទប់ និងទីតាំងផ្សេងៗទៀត ស្របតាមចំណង់ចំណូលចិត្តអ្នកស្រឡាញ់កីឡាបាល់ទាត់ផងដែរ។
ដើម្បីឱ្យកាន់តែជាក់ច្បាស់ សូមទស្សនារូបភាពនៅក្នុងភូមិគ្រិះដ៏ធំស្កឹមស្កៃរបស់លោក Cristiano Ronaldo ខាងក្រោមនេះ៖
July 21, 2018
តារាស្រី ផេន ខេក ត្រូវបានតែងតាំងជាអ្នកនាំពាក្យកងទ័ពជើងទឹក
តាមរយៈគេហទំព័រ Tvpool នៅថ្ងៃទី21 ខែកក្កដា ឆ្នាំ 2018 នេះ បានឱ្យដឹងថា ពិតជាធម្មតាមែន ដែលតារាស្រីលំដាប់ជួរនាង ខេមនីច ចាមិកន ឬមានឈ្មោះក្នុងសិល្បៈ ផេន ខេក ត្រូវបានជ្រើសតាំងពិសេសជាអ្នកនាំពាក្យរបស់កងទ័ពជើងទឹក ដើម្បីឱ្យប្រតិបត្តិការព័ត៌មានរបស់អង្គភាពកងទ័ពជើងទឹក និងមានប្រសិទ្ធភាពបំផុត។
សូមជម្រាបផងដែរថា ក្រោយពីបានធ្វើការតែងតាំងហើយ តារាស្រី ផេនខេក ត្រូវបំពេញតួនាទីដូចនេះ ៖
1-ទំនាក់ទំនងសាធារណៈ ជាមួយព័ត៌មានរបស់អង្គភាពកងទ័ពជើងទឹក នៅក្នុងនាមជាអ្នកនាំពាក្យដែលបានប្រគល់ជូន។
2-ចូលរួមជាពិធីការិនី និងកិច្ចការងារផ្សេងៗ របស់អង្គភាពកងទ័ពជើងទឹក ដូចដែលអង្គភាពបានប្រគល់ជូន។
3-ផ្ដល់ព័ត៌មាន និងពាក្យណែនាំជាប្រយោជន៍ដល់ការប្រតិបត្តិការព័ត៌មានរបស់កងទ័ពជើងទឹក។
4-ប្រតិបត្តិតួនាទីផ្សេងៗ តាមដែលអង្គភាពបានប្រគល់ជូន ដោយអ្នកនាំពាក្យរបស់ទ័ពជើងទឹក និងផ្លាស់ប្ដូរតំណែងវិញ នៅពេលដែលអង្គភាពកងទ័ពជើងទឹកមានបញ្ជាការប្រែប្រួល។
គួរបញ្ជាក់ផងដែរថា ការទទួលតំណែងថ្មីរបស់តារាសម្ដែងស្រីរូបនេះ អាចនិយាយបានថា ជាមោទនភាពមួយយ៉ាងធំធេង ព្រោះនាងមិនត្រឹមតែមានរូបសម្បត្តិស្រស់សោភាតែមួយប៉ុណ្ណោះទេ នាងមានទាំងទេពកោសល្យ ខ្នះខ្នែងការងារសប្បុរធម៌ និងមានពហុជំនាញក្នុងការធ្វើកិច្ចការផ្សេងៗទៀត៕
July 21, 2018