Author: អេបិល

បទថ្មីពីតារាចម្រៀងស្រី បេប៊ី ទើបតែចេញក្ដៅៗ នៅក្នុងផលិតកម្មថោននោះ មានចំណងជើងថា«ប្រពន្ធកាច» ដោយបទនេះ គឺគ្រាន់តែស្ដាប់សាច់ភ្លេងមានការចាប់អារម្មណ៍តែម្ដង ស្របពេលដែលគេជឿថា ស្រីស្អាតជាម្ចាស់បទនេះ ក៏ពិតជាបំបែកក្បាច់រាំបានទាក់ភ្នែកឱ្យត្រូវនឹងសាច់ភ្លេងល្អ។

បទនេះ ជាស្នាដៃនិពន្ធទំនុកច្រៀង និង Melody ដោយលោក ម៉ានិត វីរ៉ាយុត្ត និងនិពន្ធបទភ្លេងដោយលោក លាង ស៊ាងលីន ដែលធ្លាប់និពន្ធបទភ្លេងឱ្យតារាចម្រៀង កញ្ញា រ៉ាប៊ីផ្ទុះ។ បទថ្មីរបស់កញ្ញា បេប៊ីនេះ នឹងក្លាយជាបទប្រកួតប្រជែងក្នុងអំឡុងបុណ្យចូលឆ្នាំខ្មែរ ដោយសាច់ភ្លេងក្នុងបទចម្រៀងនេះ គ្រាន់តែឮក៏ចង់រាំ មិនខុសពីបទ«មាន់ស្រែ» របស់ថោន ដែលធ្លាប់ផ្ទុះកាលឆ្នាំមុន។

កញ្ញា បេប៊ី ដែលកាន់តែស្រស់សោភាខុសប្លែកពីមុនប្រកាសថា កុំភ្លេចរង់ចាំទស្សនាMV បទនេះ ដោយនាងក៏សន្យានឹងបង្កើតក្បាច់រាំឱ្យរស់រវើកជាមួយក្រុមរាំ និងបង្កើតការសម្ដែងឱ្យប្លែកតម្រូវអ្នកចូលចិត្តរាំបុណ្យចូលឆ្នាំផងដែរ។ អ្នកគាំទ្ររបស់នាងរំពឹងយ៉ាងខ្លាំងថា បេប៊ី នឹងក្លាយជាតារាចម្រៀងលេចធ្លោនៅក្នុងផលិតកម្មថោន ខណៈដែលតារាចម្រៀង មាស សុខសោភា ដែលជាខ្លាញីក៏លេចដំណឹងថារត់ទៅហង្សមាស ដែលច្បាស់ណាស់ថា រ៉ាប៊ី បេប៊ី និង ស៊ូស៊ីរីកា និងក្លាយជាតារាជួរមុខរបស់ផលិតកម្មនេះ។

យ៉ាងណាមិញ បេប៊ី ហាក់មិនមានរំពឹងថាបទ«ប្រពន្ធកាច» របស់ខ្លួន នឹងផ្ទុះកក្រើកជំនួសបទ”មាន់ស្រែ” ដែលធ្លាប់ល្បីលក្រើកកាលចូលឆ្នាំមុននៅឡើយទេ ដោយនាងបានត្រឹមតែអះអាងថានឹងប្រឹងឱ្យអស់ពីលទ្ធភាព។ ក្រៅពីបទប្លែកត្រចៀកមួយនេះ បេប៊ី ក៏មានបទល្អៗជាច្រើនទៀត សម្រាប់ឱកាសចូលឆ្នាំខ្មែរផងដែរ៕

ក្រោយ​ផ្ទុះរឿង​ពលរដ្ឋ​ជាង​៧០ គ្រួសារ​ធ្វើ​ការ​តវ៉ា​និង​ប្ដឹង​ទាម​ទារ​​​ ៤​ចំណុច​ទៅ​ខណ្ឌ​សែន​សុខ​ កាល​ពី​ម្សិលមិញ​ទៅលើ​ក្រុម​គ្រួសារ​របស់​កំពូល​តារាចម្រៀង​លោក ព្រាប សុវត្ថិ រួច​មក​ឥឡូវ​នេះ​សាមី​ខ្លួន​បាន​ចេញ​មុខ​បក​ស្រាយ​ហើយ។

លោកព្រាប សុវត្ថិ អះអាងថា កន្លង​ទៅ​មាន​ពលរដ្ឋ​តែ១​គ្រួសារ រស់នៅ​ទល់មុខ​ផ្ទះ​គ្នាប៉ុណ្ណោះដែលអន់ចិត្ត​ចំពោះ​ការ​ចត​ឡាន និង​សំឡេង​រំខាន​ខ្លះ​ពី​រោង​ជាង​ឈើ​ តែមិន​ពាក់​ព័ន្ធ​ដល់​ពលរដ្ឋ​ក្នុង​ភូមិ​រហូត​ដល់​៧០​គ្រួសារ​នោះ​ទេ។ លោក​ថា ការរស់នៅ​ប្រចាំ​ថ្ងៃ​តែងតែ​មាន​ការ​ខុសឆ្គង​ខ្លះ តែ​ក៏​គ្មាន​រឿង​អ្វី​ដែលមិន​អាច​និយាយ​គ្នា​បាន​ដែរ ហើយ​​លោក​ក៏​ជា​មនុស្ស​អាច​និយាយ​គ្នា​បាន​គ្រប់​ពេល មិនគួរមានរឿងទេ។ លោក ព្រាប សុវត្ថិ៖«បង​កំពុង​ធ្វើ​ដំណើរ​តាម​ផ្លូវ​ចេញ​ពី​ខេត្ត…បង​ក៏​មិន​ទាន់​ដឹង​ច្បាស់​ពី​មូលហេតុ​ដែល​នាំ​ឱ្យ​មាន​ការ​តវ៉ា​នោះ​ដែរ តែ​ទៅ​វិញ​បង​នឹង​សិក្សា​ឱ្យ​បាន​ជ្រៅ​ជាង​នេះ ហើយ​បង​រីករាយ​នឹង​ដោះស្រាយ​ជាមួយ​ពលរដ្ឋគ្រប់ពេល។ បើ​បង​ខុស​បង​កែប្រែ»។

គួរ​បញ្ជាក់ថា​ពលរដ្ឋ​ប៉ុន្មាន​គ្រួសារ​ខាង​លើ​បាន​តវ៉ា​ឱ្យ​ ​អាជ្ញាធរ​សង្កាត់​ គោកឃ្លាំង ខណ្ឌសែនសុខ ជួយ​ដោះ​ស្រាយ​ជូន​​ពួក​គាត់​នូវ​៤ ចំណុច​ដែល​ពាក់ព័ន្ធ​ជាមួយ​កំពូល​តារាចម្រៀង​លោក ព្រាប សុវត្ថិ រួម​មាន៖

១. ឈប់ ឱ្យគាត់ធ្វើរបងបំពានលើផ្លូវ​សាធារណៈ​

២​.ឈប់ ធ្វើរោងឈើបិទផ្លូវ​

៣​.ឈប់ចតរថយន្ត​ បិទផ្លូវ​ គ្មានសណ្តាប់ធ្នាប់

៤​.ឈប់ រោទិ៍សំឡេងរថយន្តលាន់ខ្លាំងដេកពួនមិនបាន។

សូមជម្រាបថា នៅព្រឹកថ្ងៃទី៦ ខែមីនា​នេះ កំពូលតារាចម្រៀង ព្រាប សុវត្ថិ បានសម្របសម្រួលជាមួយអ្នកក្បែរខាងដោយសន្ដិវិធី និងធ្វើការអធ្យាស្រ័យចំពោះការលើសលួសទៅអ្នកជិតខាងដោយអចេតនា៕

មហោស្រពភាពយន្ដអន្ដរជាតិ ឬ CIFF លើកទី ១០ នេះ បានប្រកាសបើកភាពយន្ដរហូតដល់ ១៥៧ ចំណងជើង មកពី៤៤ ប្រទេស រួមមានភាពយន្ដខ្នាតធំ ភាពយន្ដខ្នាតខ្លី ភាពយន្ដឯកសារ និងភាពយន្ដគំនូរជីវចល ។

លោក CEDRIC ELOY ប្រធានមហោស្រពភាពយន្តអន្តរជាតិកម្ពុជានិងជាអ្នករៀបចំកម្មវិធីនេះ បានប្រាប់អ្នកសារព័ត៌មានឡារ៉ែនថា ៖ «CIFFលើកទី១០ នេះ ជាព្រឹត្តិការណ៍វប្បធម៌អន្តរជាតិដែលធំជាងគេបង្អស់នៅកម្ពុជានឹងប្រារព្ធខួបគម្រប់ ១០ ឆ្នាំរបស់ខ្លួន​ ដែលនឹងធ្វើឡើងចាប់ពីថ្ងៃទី ១៣ ដល់ថ្ងៃទី ២២ ខែមីនា ឆ្នាំ ២០២០។ ឆ្នាំនេះការចូលរួមគាំទ្រយ៉ាងពេញទំហឹងពីសំណាក់ដៃគូសហការ ព្រមទាំងអ្នកគាំទ្រផ្នែកបច្ចេកទេសជាច្រើន ហើយយើងខ្ញុំពិតជាមានសេចក្ដីរំភើបបំផុតដែលក្រុមហ៊ុនទូរស័ព្ទចល័ត CELLCARD បានចូលរួមធ្វើជា “ម្ចាស់ឧបត្ថម្ភកម្មវិធីធំ” នៃមហោស្រពរបស់យើង។

ភាពយន្ដទាំង ១៥៧ ចំណងជើង ក៏ត្រូវបានសម្រិតសម្រាំងពិសេសៗយកមកដាក់បញ្ចាំងនៅលើផ្ទាំងសំពត់សក្នុងរោងភាពទំនើបៗ ដូចជារឿង «រសាត់អណ្ដែត» (ជាភាពយន្តដែលឈ្នះពានរង្វាន់នៅក្នុងមហោស្រពភាពយន្តអន្តរជាតិជាច្រើន)។ ភាពយន្តនេះបង្ហាញពីប្រធានបទ ការជួញដូរមនុស្សនៅកម្ពុជា និងនៅអាស៊ីអាគ្នេយ៍។ ជាមួយគ្នានេះដែរ ភាពយន្តរឿង «នាឡិកាដាស់វិញ្ញាណ» ដែលដឹកនាំដោយលោកលៀក លីដា (ជាភាពយន្តដែលរកបានចំណូលខ្ពស់ និងទទួលងារជាភាពយន្តឆ្នើមក្នុងមហោស្រពភាពយន្តជាតិកាលពីឆ្នាំ ២០១៩) ក៏នឹងត្រូវចាក់បញ្ចាំងក្នុងមហោស្រពភាពយន្តអន្តរជាតិកម្ពុជាលើកទី ១០ ផងដែរ» ។

កម្មវិធីភាពយន្តខ្មែរដ៏ពិសេស គឺជាការចាក់បញ្ចាំងលើកដំបូងបង្អស់នៃទស្សនីយភាព «បង្សុកូល ៖ ការរំឭកដល់កម្ពុជា» ជាទស្សនីយភាពបង្កើតឡើងថ្មីដោយអង្គការសិល្បៈខ្មែរអមតៈ និងថតដោយមជ្ឈមណ្ឌលបុប្ផាណា។ ការចាក់បញ្ចាំងលើកដំបូងបង្អស់លើពិភពលោក ជាមួយការសម្ដែងទស្សនីយភាព។ មហោស្រពភាពយន្តអន្តរជាតិកម្ពុជាក៏សូមគោរព រំឭកដល់សម្ដេចរាជបុត្រី ព្រះរៀម នរោត្តម បុប្ផាទេវី ដែលបានសោយទិវង្គតកាលពីខែវិច្ឆិកា ឆ្នាំ ២០១៩។ កម្មវិធីពិសេសរួមមានការបញ្ចាំងភាពយន្ត ពិធីគោរពរំឭក ព្រមទាំងពិព័រណ៍ដ៏ពិសេសមួយស្ដីពីរបាំព្រះរាជទ្រព្យ នៅឯសណ្ឋាគារ Rosewood។ នេះជាការបញ្ជាក់បន្ថែមរបស់លោក CEDRIC ELOY។

សូមជម្រាបថា ការចាក់បញ្ចាំងខ្សែភាពយន្តលើសពី ១៥០ លើក នៅតាមរោងភាពយន្តធំៗមួយចំនួនក្នុងរាជធានីភ្នំពេញ ហើយឆ្នាំនេះ ទីតាំងទាំងនោះមានដូចជា រោងភាពយន្ត LEGEND, រោងភាពយន្ត MAJOR CINEPLEX, មជ្ឈមណ្ឌលបុប្ផាណា, សាលមហោស្រពចតុម្មុខ, សណ្ឋាគារ ROSEWOOD និង THE CIFF VILLAGE នៅផ្សារទំនើប EXCHANGE SQUARE។ កុំឱ្យខកខានឱ្យសោះណា៎ ជួបគ្នាជាថ្មីម្ដងទៀតនៅថ្ងៃបើកមហោស្រពថ្ងៃទី ១៣ មីនា ខាងមុខនេះ៕

តាមការលើកឡើង និងស៊ែរជាច្រើននៅលើបណ្ដាញសង្គមហ្វេសប៊ុកបានឱ្យឃើញថា តារាហ្វេសប៊ុក « ម៉ែរួយ » ដែលធ្លាប់តែកើបចំណូលពីការលក់ផលិតផលនៅលើហ្វេសប៊ុក ខណៈនេះស្រាប់តែអ្នកនាងធ្វើឱ្យកុមារៗសិស្សនុសិស្សនៅក្នុងសាលារៀនមួយកន្លែងក្នុងខេត្តក្រចេះ រំភើបចិត្តជាអនេក និងញញឹមបិទមាត់មិនជិត ដោយអ្នកនាងប្រកាសផ្ដល់ជំនួយសាងសង់សាលារៀនក្នុងទំហំទឹកប្រាក់ 60000ដុល្លា​រ។

ផ្ដល់ការបញ្ជាក់បន្ថែមជូនសារព័ត៌មានឡារ៉ែន ម៉ែរួយ ឆ្លើយឆ្លងថា នេះជាការផ្ដល់ក្ដីសង្ឃឹមថ្មីមួយជូនកុមារទីទាល់ក្រនៅក្នុងខេត្តក្រចេះ ឱ្យមានថ្នាក់សិក្សារៀនសូត្រក្រេបយកចំណេះដឹង។ ទំហំទឹកប្រាក់ 60000ដុល្លា​រ គឺតិចតួចបំផុត ក៏ប៉ុន្ដែជាការរួមចំណែកក្នុងន័យមនុស្សធម៌ និងកិច្ចការងារសង្គម។ ម៉ែរួយ មើលឃើញថា សាលារៀនចាស់មានសភាពទ្រុដទ្រោមខ្លាំង​ ពេលភ្លៀងរឺក្តៅក្មេងៗរៀនមិនកេីត​ ទេីប «មែរួយ» សម្រេចចិត្តជួយតែម្តង​ មិ​នយូរទៀតទេក្មេងៗនិងមានសាលារៀនថ្មីរៀនឆាប់ៗ។ ហើយបងប្អូនតំណាងចែកចាយក្រុមហ៊ុនរបស់ម៉ែរួយទាំងអស់នេះ ក៏បានរួមចំណែកដល់សាលានៅ ភូមិក្រញូងសែនជ័យ ឃុំក្រញូងសែនជ័យ ស្រុកស្នួលខេត្តក្រចេះ ដែលជាអំណោយដ៏ថ្លៃថ្លាដោយទឹកចិត្តដ៏ល្អបរិសុទ្ធរបស់អ្នកម្ដាយ ដេីម្បីឱ្យក្មេងៗបានរៀននៅសាលាល្អនិងឱ្យក្មេងក្លាយជាពលរដ្ធល្អនៅក្នុងសង្គមទៅថ្ងៃមុខ។

គួរបញ្ជាក់ផងដែរថា រហូតមកទល់និងពេលនេះសាលារៀនដែលខាងម៉ែរួយ ជាស្ថាបនិករបស់ក្រុមហ៊ុនរួយអ៊ិនហ្វីនិធី បានលេចចេញជារូបរាងនិងផ្លែផ្កាហើយ៕

តាមរយៈបណ្ដាញសង្គមហ្វេសប៊ុក គេមើលឃើញថា ផ្សារ​កសិផល​ធម្មជាតិ​ឡេង​ណាវ៉ាត្រា​ ​ត្រៀម​​បើក​សម្ពោធ​​​នា​ពេល​ឆាប់ៗ​ខាង​មុខ​នេះនៅ​ថ្ងៃ​ទី​១៥ ខែ មិនា ឆ្នាំ ២០២០ ដើម្បីចូលរួម​ចំណែក​ជួយ​ជ្រោមជ្រែង​កសិករ​​ និង​ស្រប​តាម​គោលនយោបាយ​អភិវឌ្ឍ​វិស័យ​កសិកម្ម​របស់​រាជរដ្ឋាភិបាល។ ផ្សារ​​របស់​លោក​ឧកញ៉ា​វ័យ​ក្មេងរូបនេះ​កំពុង​មាន​ប្រជាប្រិយភាព​នេះ ​​បាន​ប្រមូល​ទិញ​កសិផល​ពី​កសិករ​ដែល​បច្ចុប្បន្ន​បាន​ចងក្រង​និង​ប្រមូល​ទិញ​ជា​មួយ​កសិករ​សរុប មាន​រហូត​ដល់​ទៅ​១៨​ខេត្ត​ឯណោះ សម្រាប់​យក​មក​​ផ្គត់​ផ្គង់​ទីផ្សារ​ក្នុង​ស្រុក។

ក្នុងនោះគេឃើញតារាចម្រៀងប្រុសសំឡេងស្អក ខេម បានបង្ហាញការគាំទ្រ និងឱ្យដឹងថា អ្នក​គ្រប់​គ្រង​ផ្សារបានអះអាងថាក្រុម​ជំនាញ​ត្រួត​ពិនិត្យ​គុណភាព​ម្ហូបអាហារ​របស់​ផ្សារ​ទំនើប​កសិផល​ធម្មជាតិ​ឡេង​ណាវ៉ាត្រា​ត្រូវ​បាន​បណ្ដុះបណ្ដាល​បច្ចេកទេស​ នៅ​មជ្ឈមណ្ឌល​ត្រួតពិនិត្យ​ប្រមូល​ផ្ដុំ​គុណភាព​ដែល​ឧបត្ថម្ភ​ដោយ​ប្រទេស​ជប៉ុន និង​បណ្ដុះបណ្ដាល​បច្ចេកទេស​លក្ខណៈ​ស្តង់​ដារ​ ពី​​ទីភ្នាក់ងារ​សហប្រតិបត្តិការ​អន្តរជាតិ​ប្រទេស​ជប៉ុន ហៅ​កាត់​ថា(JICA) ទទួល​ស្គាល់​ដោយ​ក្រសួងកសិកម្ម ។ អ្វី​ដែល​ជា​ទំនុក​ចិត្ត​នោះ កសិផល​ទាំងអស់​ត្រូវ​បាន​​តាមដាន​ត្រួត​ពិនិត្យ​តាំង​ពី​កន្លែង​ដាំដុះ​​រហូត​ដល់​កន្លែង​វេច​ខ្ចប់ តែ​ម្ដង ក្នុង​នោះ​ដែរ​កសិករ​ទាំងអស់​ត្រូវ​បាន​ចុះ​កិច្ចសន្យា​និង​កុង​ត្រា​ស្រប​តាម​គោលការណ៍​ដាំដុះ​តាម​គោល​ការណ៍​ធម្មជាតិ ។

កញ្ញា តន់ ចន្ទសីម៉ា តារាស្រីប្រចាំផលិតកម្មកាឡាក់ស៊ី និងជាម្ចាស់បទ « ឡាសារ៉ែន » ក៏បានចូលរួមថតស្ពតបន្លែធម្មជាតិនេះ និងឱ្យដឹងថា ដើម្បី​ជួយ​ដល់​កសិករ ផ្សារ​កសិផល​ធម្មជាតិ​ឡេង​ណាវ៉ាត្រា បាន​បញ្ជូន ធនធាន​មនុស្ស​គ្រប់​ជំនាញ​ចុះ​ពន្យល់​និង​ណែនាំ​ក្នុង​ការ​ដាំដុះ​តាម​គោលការណ៍​ធម្មជាតិ​ដោយ​មិន​ប្រើប្រាស់​សារធាតុគីមី។ ជា​មួយ​នឹង​ការ​ប្រមូល​ទិញ​នេះ​ផង​ដែរ ប្រសិន​បើ​កសិករ​ណា​មួយ​មាន​គំនិត​បន្លំ​ល្មើស​នឹង​លក្ខន្តិកៈ​ប្រើប្រាស់​សារធាតុ​គីមី​ នឹង​ត្រូវ​ទទួល​ការ​ផាក​ពិន័យ​ជា​ទឹក​ប្រាក់​ ហើយ​បញ្ឈប់​ការ​ទទួល​ទិញ​ពី ក្រុមហ៊ុន​រយៈពេល​មួយ​ឆ្នាំ។ យ៉ាងណាមីញដើម្បី​ឱ្យ​កាន់​តែ​មាន​ភាព​ងាយ​ស្រួល​នឹង​ទំនើប​នោះ ខាង​ក្រុមហ៊ុន​​បាន​រៀប​ចំ​ការ​កម្មង់​ទិញ តាម​​អន​ឡាញ ឬ​បញ្ជា​ទិញ​តាម​ទូរស័ព្ទ​ដៃ កម្មង់​តាម ទំនិញ​ដែល​​លោក​អ្នក​ត្រូវ​ការ ត្រឹម​តែ​២០​នាទី បន្លែ​ផ្លែ​ឈើ ឬ ត្រី​សាច់​តែ លោក​អ្នក​កម្មង់​នោះ នឹង​ដឹក​ជូន​ផល់​ផ្ទះ​លោក​អ្នក​តែ​ម្ដង៕

ក្រោយ​ពី​ទទួល​បាន​ការ​គាំទ្រ​ខ្លាំង​ នៅ​​លើ​ហ្វេសប៊ុក​ផេក​ទូរទស្សន៍​បាយ័ន​ និង​ Youtube ​ផ្លូវ​ការ​របស់​សាស្ត្រាហ្វៀម (SATRA FILM ) រួច​មក​ឥឡូវ​នេះ​​រឿង​ “ពោះធំ” បាន​កំណត់​ថ្ងៃ​ដាក់​បញ្ចាំង​នៅ​រោងកុន​ហើយ។

បើ​តាម​ហ្វេសប៊ុក​ផេក​​ផ្លូវ​ការ​របស់​ Pous Thom The Movie បាន​ប្រកាស​ថារឿង “ពោះធំ” Version រោងកុន​​ត្រៀម​នឹង​សម្ពោធ​​ចាក់​បញ្ចាំង​​នៅ​ថ្ងៃ​ទី​២៦ ខែ​មីនា ឆ្នាំ​២០២០ ខាង​មុខ​នេះ​ហើយ។ រឿង “ពោះធំ” ជា​ប្រភេទ​ភាពយន្ត​បែប​កម្សត់​​បង្កប់​ទៅ​ដោយ​អត្ថន័យ​អប់​រំ​ជា​ច្រើន​ក្នុង​រឿង​ ពិសេស​គឺ​ផ្ដោត​សំខាន់​ទៅ​លើ​មិត្តយុវវ័យ​តែ​ម្ដង​ ដែល​ឆាប់​ប្រឡូក​​រឿង​​ផ្លូវ​ភេទ​ទាំង​ខ្លួន​នៅ​​វ័យ​ក្មេង។

គួរបញ្ជាក់ដែរថា ខ្សែភាពយន្តរឿងពោះធំ​ Version រោងកុន​ ដែលត្រៀមចាក់បញ្ចាំងក្នុងពេលឆាប់ៗខាងមុខនេះ​ គឺមានភាពខុសប្លែកពី​ version ភាពយន្តជីវិតរឿងពោះធំ​ Version អនឡាញ​ ដែលធ្លាប់ចាក់បញ្ចាំងតាមទំព័រ​ Facebook និង​ Youtube របស់ផលិតកម្ម​ Sastra ព្រោះមានការថតឈុតឆាកថតថ្មីទាំងអស់ ដែលបង្ហាញពីជីវិតរបស់តួឯកប្រុសស្រីក្រោយពេលចាកចេញពីផ្ទះ​ ទៅផ្សងជីវិតក្មេងខ្ចីគ្មានទីជម្រក​ តស៊ូលំបាកវេទនា​ ដោយគ្មានឪពុកម្តាយ​ ទាំងតួស្រីកំពុងមានផ្ទៃពោះវ័យក្មេង​ ។ ជាក់​ស្ដែង​ក្នុង​ភាព​យន្ត​​”ពោះធំ” នេះ​តួ​ឯក​ប្រុស​ស្រី​ក្នុង​រឿង​​គឺ​ជា​សិស្ស​សាលា​កំពុង​​តែ​សិក្សា​នៅ​ថ្នាក់​វិទ្យាល័យ​ តែ​ពួក​គេ​​ទាំង​ពីរ​បាន​ស្រឡាញ់​ទាក់​ទង​គ្នា​ជ្រុល​ជ្រួស​រហូត​ដល់​មាន​កូន​​ដោយ​មិន​បាន​ព្រៀង​ទុក។ ក្រោយ​មក​គូស្នេហ៍​​វ័យ​ក្មេង​មួយ​គូ​នេះ​ត្រូវ​បាន​ចាកចេញ​ពី​ផ្ទះ​ទៅ​រស់​នៅ​តែ​ពីរនាក់​បន្ទាប់​ពី​បែក​ធ្លាយ​រឿង​ដល់​ឪពុក​ម្ដាយ។

ឈុតឆាកថ្មីនេះនឹងកាន់តែធ្វេីឱ្យអ្នកទស្សនាស្រក់ទឹកភ្នែកនឹងឆាកជីវិតរបស់ពួកគេ​ និងស្រាយចម្ងល់អ្នកទស្សនាវគ្គមុនថាតេីវាសនារបស់ពួកគេនិងកូនក្នុងពោះចុងក្រោយនឹងទៅជាយ៉ាងណា?

ក្នុងឱកាសដឹកនាំតារាសិល្បៈចូលរួមក្នុងទិវារវប្បធម៌ជាតិ៣មីនាលើកទី២២ នៅមជ្ឈមណ្ឌលកោះពេជ្រ កាលពីថ្ងៃទី៣ មីនា ឆ្នាំ២០២០ ស្ថាបនិកគ្រួសារតារាកម្ពុជា ក៏ដូចជាសមាជិកភាគច្រើន បានទទូចឱ្យមានការបំផុសពីទម្រង់សិល្បៈវប្បធម៌បុរាណរបស់ខ្មែរឱ្យបានច្រើន ក្នុងស្រទាប់មហាជន ជាពិសេសគឺការបង្ហាញអត្តសញ្ញាណនូវវប្បធម៌របស់ខ្លួននៅគ្រប់សកម្មភាព ដើម្បីបង្ហាញពីការលើកស្ទួយសិល្បៈវប្បធម៌របស់ជាតិ។

លោក ផាត់ តារារដ្ឋ ស្ថាបនិកគ្រួសារតារាកម្ពុជា បានថ្លែងបញ្ជាក់ថា ធៀបនឹងរយៈពេលមុន «យុវវ័យ» ពោលគឺមហាជនច្រើនឡើងមកហើយ ដែលចាប់អារម្មណ៍លើកស្ទួយសិល្បៈវប្បធម៌បុរាណខ្មែរ តាមរយៈការសហការគ្នាគ្រងឈុតបែបបុរាណក្នុងកម្មវិធីធំៗ ដោយស្លៀកចងក្បិន ឬ គ្រងឈុតក្នុងសម័យកាលណាមួយ នៅក្នុងកម្មវិធីជប់លៀង ឡើងផ្ទះ និងមង្គលការជាដើម ដើម្បីបង្ហាញអោយអន្តរជាតិ និងក្មេងជំនាន់ក្រោយ មើលឃើញថាអត្តសញ្ញាណរបស់ដូនតាខ្មែរមានតម្លៃមិនអាចកាត់ថ្លៃបានក្នុងផ្នត់គំនិតមហាជនសម័យទំនើប។

ក្នុងនោះ របាំបុរាណ ល្ខោនបាសាក់ និង ល្ខោនខោលជាដើម ក៏ត្រូវគេលើកស្ទួយជាថ្មី ក្នុងកម្មវិធីសម្ពោធធំៗផងដែរ ដែលនេះគឺជាអ្វី ដែលលោក និង សមាជិកគ្រួសារតារាកម្ពុជាភាគច្រើនចង់បាន។ លោកថា «គ្រួសារតារាកម្ពុជា» គឺបណ្ដាំអ្នកសិល្បៈរាប់ទាំងតារាល្បីៗ និងតារាថ្មី ដើម្បីរួមគ្នាធ្វើសកម្មភាពដែលមានតម្លៃវប្បធម៌ ជាពិសេសបំផុសឱ្យមហាជនចេះស្រលាញ់សិល្បៈបុរាណ តាមរយៈដែលគ្រួសារតារាកម្ពុជា បានរៀបចំកម្មវិធីគ្រងឈុតបុរាណ និង ប្រកួតឈុតបុរាណជារឿយៗរៀងរាល់មួយឆ្នាំម្ដង នាពេលកន្លងមក។ លោកថាកម្មវិធីទិវាវប្បធម៍ មានតម្លៃមិនអាចកាត់ថ្លៃបាន ព្រជាការបំផុសអោយមហាជចាប់អារម្មណ៍ និងមើលឃើញថាសិល្បៈបុរាណខ្មែរ មិនថារបាំ យីគេ ល្ខោន ចម្រៀង និងសំលៀកបំពាក់ដែលជាអត្តសញ្ញាណជាតិជាដើម មានជីវិតរស់រវើកជានិរន្ត។

អ្នកនាង លី ម៉ារីណា បញ្ជាក់ថា នេះជាកម្មវិធីថ្នាក់ជាតិមួយ ដែលសិល្បករខ្មែរមកពីគ្រប់ទិសទី មានឱកាសបង្ហាញនូវអត្តសញ្ញាណជាតិ តាមរយៈការបង្ហាញសំលៀកបំពាក់បែបខ្មែរ និងលើកស្ទួយវប្បធម៌ប្រពៃរបស់ខ្មែរ។ អ្នកនាងថា សំលៀកបំពាក់ខ្មែរ មិនត្រឹមតែស្អាតប៉ុណ្ណោះទេ តែក៏ថ្លៃថ្នូរក្នុងស្រទាប់ជាតិ និង អន្តរជាតិផងដែរ។

ការចូលរួមរបស់គ្រួសារតារាកម្ពុជា ក្នុងកម្មវិធីវប្បធម៌ជាតិលើកនេះ គឺជាការសហការរួមគ្នា បង្កើតចំណងសាមគ្គី ក៏ដូចជាការ ពង្រីកស្នាដៃនៅក្នុងសង្គមសិល្បៈ លើកស្ទួយដល់វប្បធម៌ជាតិ៕

ក្នុងទិវាវប្បធម៌ជាតិ ពីរសៀលម្សិលមិញសម្ដេច ហ៊ុន សែន បានប្រកាសដកតំណែងលោក យាង វណ្ឌី ប្រធានក្រុមព្រះសូរិយា និងបញ្ជាឱ្យបិទទិដ្ឋាការជនជាតិម៉ាឡេស៊ីម្នាក់ ក្រោយពីនាំយករបាំព្រះរាជទ្រព្យខ្មែរទៅសម្តែងនៅទីមិនសមរម្យ ធ្វើឱ្យអាប់ឱនដល់វប្បធម៌ជាតិ។

ក្នុងទិវាវប្បធម៌ជាតិ ក្រោមប្រធានបទ “យុវជនដើម្បីវប្បធម៌ជាតិ” កាលពីរសៀលម្សិលមិញនេះ សម្តេចតេជោ ហ៊ុនសែន នាយករដ្ឋមន្រ្តីនៃព្រះរាជាណាចក្រកម្ពុជា បានប្រកាសថា សម្តេចមិនអាចទទួលយកបានទេ នូវការសម្តែងរបាំព្រះរាជទ្រព្យ នៅប្រទេសសិង្ហបុរីកាលពីពេលថ្មីៗនេះដែលធ្វើឱ្យអាប់ឱនមរតកវប្បធម៌ ក្រោយពីបុគ្គល Cheah Fah Loong ជនជាតិម៉ាឡេស៊ី សញ្ជាតិសង្ហបុរី និងលោក យាង វណ្ឌី ប្រធានក្រុមព្រះសុរិយា បាននាំយករបាំព្រះរាជទ្រព្យខ្មែរទៅសម្តែងនៅទីមិនសមគួរ ធ្វើឱ្យអាប់ឱនដល់សិល្បៈ វប្បធម៌ជាតិខ្មែរ។

សម្តេចតេជោ ហ៊ុនសែន នាយករដ្ឋមន្រ្តីនៃព្រះរាជាណាចក្រកម្ពុជា មានប្រសាសន៍ថា «ប្រសិនបើធ្វើការបួងសួងឱ្យ ព្រះរាជាណាចក្រកម្ពុជា ក៏ខ្លួនឯងត្រូវរកទីតាំងឱ្យបានសមរម្យ ហើយមិនអាចឱ្យអ្នករបាំខ្មែរមកអង្គុយ និងរាំពីក្រោយបុគ្គលដែលជាគ្រូ អោមអាមនោះទេ»។ យ៉ាងណាក៏ដោយ សម្រាប់បញ្ហានេះ សម្តេចបានបញ្ជាក់ថា នេះមិនមែនជាជម្លោះរវាងរាជរដ្ឋាភិបាលកម្ពុជា និងរដ្ឋាភិបាលសិង្ហបុរីនោះទេ គឺផ្តោតសំខាន់តែលើជនជាតិម៉ាឡេស៊ី សញ្ជាតិសិង្ហបុរីម្នាក់នេះ ដោយមានការរួមគំនិតជាមួយបុគ្គលខ្មែរមួយចំនួនប៉ុណ្ណោះ។ សម្តេចបញ្ជាក់បន្ត៖ «រាប់ទាំងបុគ្គលម្នាក់ដែលខ្ញុំចេញអនុក្រឹត្យដកចេញពីតំណែង ដែលជាជំនួយការរដ្ឋមន្រ្តីប្រតិភូអមនាយករដ្ឋមន្រ្តី ដែលមិនអនុញ្ញាតឱ្យគេប្រមាថរាជវង្សានុវង្សខ្មែរតាម Facebook ទេ»។

ចំពោះទង្វើពុំគួរគម្បីរបស់ជនជាតិម៉ាឡេស៊ី សញ្ជាតិសង្ហបុរីនេះ ត្រូវប្រមុខរដ្ឋាភិបាលកម្ពុជា ចាត់ទុកថា ការសម្តែងបែបនេះ ជាការវាយប្រហារដល់របបរាជានិយម ព្រះមហាក្សត្រ និងរាជវង្សានុវង្ស។ សម្តេចតេជោ បានបញ្ជាឱ្យហាមឃាត់លោក Cheah Fah Loong ជនជាតិម៉ាឡេស៊ី សញ្ជាតិសង្ហបុរី ដែលរៀបចំរបាំព្រះរាជទ្រព្យដោយខុសឆ្គងពីប្រពីណៃជាតិខ្មែរ មិនចូលមកប្រទេសកម្ពុជានោះទេ ប៉ុន្តែបើសិនបើបុគ្គលរូបនោះ ចេញមុខសុំទោសចំពោះកំហុសខុសឆ្គងដែលខ្លួនបានប្រព្រឹត្ត រាជរដ្ឋាភិបាលនឹងពិចារណា ក្នុងការអនុញ្ញាតឲ្យចូលមកកម្ពុជាវិញ។ ក្រៅពីបុគ្គល Cheah Fah Loong សម្តេចតេជោ ក៏បានចេញអនុក្រឹត្យដកតំណែង លោក យាង វណ្ណី ប្រធានក្រុមព្រះសុរិយា ពីជំនួយការឯកឧត្តម ឆែម គាតរិទ្ធី រដ្ឋមន្ត្រីប្រតិភូអមនាយករដ្ឋមន្ត្រី មានថានៈស្មើរប្រធាននាយកដា្ឋនផងដែរ បន្ទាប់ពីបុគ្គលរូបនេះជាអ្នកចេញមុខនាំយកសិល្បករខ្មែរមួយក្រុម ប្រមាណ ១៦នាក់ ទៅសម្តែងរបាំអប្សរា របាំបួងសួង និងរបាំក្ងោក នៅទីពុំសមគួរនៅប្រទេសសិង្ហបុរី។

ក្រៅពីការប្រកាសដកតំណែងលោក យាង វណ្ណី និងបិទទិដ្ឋាការជនជាតិម៉ាឡេស៊ីសញ្ជាតិសង្ហបុរី សម្តេចតេជោហ៊ុនសែន បានដាក់បញ្ជាឱ្យក្រសួងវប្បធម៌ និងវិចិត្រសិល្បៈ ធ្វើការពង្រឹងវិន័យនៃការគ្រប់គ្រងសិល្បៈវប្បធម៌ជាតិឲ្យបានដូចមុន។ គួររំលឹកដែរថា កាលពីពេលថ្មីៗនេះ លោក យាង វណ្ឌី ប្រធានក្រុមព្រះសុរិយាបានសិល្បករខ្មែរមួយក្រុម ប្រមាណ ១៦នាក់ ទៅធ្វើការសម្តែងរបាំបុរាណខ្មែរជាច្រើនប្រភេទនៅប្រទេសសិង្ហបុរីក្នុងឱកាសពិធីឆ្លងឆ្នាំថ្មី ដោយបានអះអាងប្រាប់អ្នកសារពត៌មានក្នុងស្រុកថា ប្រទេសសិង្ហបុរីមានទំហំតូច មិនមានទីតាំង ឬបរិវេនធំសម្រាប់រៀបចំឆាកនោះទេ ម៉្យាង មិនមែនជាកម្មវិធីពិពរណ៌នោះទេដែលតម្រូវឱ្យចាំបាច់ត្រូវរាំលើឆាក។ ហើយពិធីដែលខ្លួននាសិល្បករខ្មែរទៅសម្តែងគឺត្រូវរៀបចំឡើងដើម្បីដេញឧបទ្រពចង្រៃពីឆ្នាំចាស់ និងដើម្បីសេចក្តីសុខ ស៊េរីសួស្តីសម្រាប់ឆ្នាំថ្មី មិនថាប្រជាជនសិង្ហបុរី ឬកម្ពុជានោះទេ ពោលទៅតាមជំនឿសាសនារៀងៗខ្លួន៕

ទិវារវប្បធម៌ជាតិ៣មីនា ជាទិវារដ៏សំខាន់មួយរបស់ប្រទេសជាតិ ដែលជានិច្ចជាកាលរាជរដ្ឋាភិបាលបានយកចិត្តទុកដាក់រៀបចំប្រារព្ធពិធីនេះជារៀងរាល់ឆ្នាំ ដើម្បីរំឭកដល់គុណូបការៈ និងស្នាដៃដ៏វិសេសវិសាលរបស់បុព្វបុរសនៃយើង ដែលបានបន្សល់ទុកនូវកេរមរតកវប្បធម៌ដ៏សម្បូរបែប និងមានតម្លៃមិនអាចកាត់ថ្លៃបានដល់កូនចៅជំនាន់ក្រោយ។

ការប្រារព្ធទិវារវប្បធម៌ជាតិ៣មីនា លើកទី ២២ ជាការជំរុញផ្សព្វផ្សាយ ការផ្ទេរចំណេះដឹង ចំណេះធ្វើ ជំនាញបច្ចេកទេ និងទេពកោសល្យវប្បធម៌ ក៏ដូចជាការក្រើនរំឭក បំផុសស្មារតីស្រឡាញ់វប្បធម៌ជាតិ និងមនសិការស្នេហាជាតិ ដល់ប្រជាពលរដ្ឋទាំងអស់ ជាពិសេសយុវជនដែលជាទំពាំងស្នងឬស្សី ដែលមានកាត្វកិច្ចថែរក្សាការពារឱ្យស្ថិតស្ថេរគង់វង្សនូវសម្បត្តិវប្បធម៌ជាតិ ដែលសំដៅទៅលើការរក្សាបាននូវភាពនៃវប្បធម៌។

​ក្នុងឱកាស​នោះ លោកស្រី ភឿង ស​កុ​ណា រដ្ឋមន្ត្រីក្រសួង​វប្បធម៌ និង​វិចិត្រសិល្បៈ​បាន​រំឭក​ដល់​អាជ្ញាធរ​រួម​នឹង​អ្នកពាក់ព័ន្ធ​ឱ្យបន្ត​ផ្តោត​ការយកចិត្តទុកដាក់​ថែរក្សា​និង​អភិរក្ស​វប្បធម៌ ប្រពៃណី ទំនៀមទម្លាប់​ខ្មែរ និង​រៀបចំ​អភិវឌ្ឍន៍ថែរក្សា​ទុក ដើម្បី​ឱ្យកូនចៅ​ជំនាន់​ក្រោយៗ និង​ភ្ញៀវទេសចរ​បានឃើញ និង​ទទួលស្គាល់ ក៏ដូចជា​ការផ្សព្វផ្សាយឱ្យដល់​មហាជនសម្តៅ​អនុវត្ត​ក្នុងន័យ “​យុវជនដេីម្បីវប្បធម៌ជាតិ” ។

យ៉ាងណាមិញ ដើម្បីអបអរទិវារវប្បធម៌ជាតិ៣មីនា លើកទី ២២ សិល្បករ សិល្បការិនី និងតារាល្បីៗជាច្រើនដួងបានចូលរួម និងអបអរដល់សិល្បករសិល្បការិនីដែលស្នាដៃល្អក្នុងការចូលរួមថែរក្សាការពារ និងអភិរក្សសិល្បៈវប្បធម៌ដ៏មានតម្លៃរបស់ប្រទេសជាតិ។ ទន្ទឹមនឹងនោះដែរ សម្តេចតេជោនាយករដ្ឋមន្ត្រី បានស្នើសុំឱ្យសិល្បករ សិល្បការរិនី ក្លាយជាសកម្មជនចូលរួមទប់ស្កាត់ការផ្សព្វផ្សាយព័ត៌មិនពិតទាំងឡាយ និងចូលរួមធ្វើការអប់រំផ្សព្វផ្សាយអំពីការទប់ស្កាត់នៃការរីករាយដាលជំងឺឆ្លង COVID-19 (កូរ៉ូណា)ផងដែរ៕

ភាពយន្តខ្នាតធំរឿង “វិញ្ញាណតៃហោង” របស់ផលិតកម្មបដិហារ្យភាពយន្ត បានសម្ពោធដាក់បញ្ចាំងជាផ្លូវការហើយនៅរាត្រីថ្ងៃទី2 ខែមីនា ឆ្នាំ២០២០នេះនៅរោងភាពយន្ត Legend ស៊ីធីម៉ល ក្រោមវត្តមានតារាល្បីៗចូលរួមយ៉ាងច្រើនកុះករ។

ថ្លែងក្នុងពិធីសម្ពោធភាពយន្តខាងលើលោក ស៊ុម ភារិន ចាងហ្វាងផលិតកម្ម “បដិហារ្យភាពយន្ត” បានឲ្យដឹងថា រឿង “វិញ្ញាណតៃហោង” គឺជាស្នាដៃទី៩របស់ផលិតកម្មលោក ដោយបានចំណាយវេលាថតអស់រយៈពេល៦ខែ មុនប្រកាសដាក់បញ្ចាំងនៅថ្ងៃនេះ។ ឯគុណភាព សាច់រឿង ព្រមទាំងប្លង់ថតគឺល្អជាងរឿងមុនៗ ដោយបានសម្រិតសម្រាំងឡើងជាពិសេសតែម្ដង។

មូលហេតុដែលលោក ហ៊ាននិយាយថារឿង “វិញ្ញាណតៃហោង” ល្អនិងពិសេសជាងរឿងមុនៗដោយសារតែសាច់រឿងប្រទាក់ក្រឡាគ្នា ជាមួយអត្ថន័យអប់រំជាច្រើនដល់សង្គមខ្មែរនាពេលបច្ចុប្បន្ន។ បន្ទាប់ពីរឿងនេះទៅលោក ត្រៀមនឹងផលិតភាពយន្តថ្មីដែលមានរសជាតិថ្មី “បុរសសាច់កម្ម” ជាប្រភេទបែបស្នេហាបែបកំប្លែង។

“វិញ្ញាណតៃហោង” ជារឿងខ្មោចបែបភ័យរន្ធត់ព្រឺព្រួចលាយលំជាមួយឈុតឆាកកំប្លែងជាច្រើន ធ្វើឲ្យទស្សនិកជនទស្សនាហើយទប់សំណើចមិនបាន ដែលគ្រោងនឹងដាក់បញ្ចាំងនៅរោងភាពយន្តគ្រប់រោងភាពយន្តទំនើបៗ ទាំងនៅរាជធានីភ្នំពេញ និងតាមបណ្ដាខេត្តនៅថ្ងៃទី៥ ខែមីនា ឆ្នាំ២០១៩ ខាងមុខនេះហើយ៕