ពិតជាមានភាពភ្ញាក់ផ្អើលជាខ្លាំងនៅលើបណ្ដាញសង្គមហ្វេសប៊ុកដែលគេបានដឹងថា ក្រោយពីអ្នកនាង យ៉ាន លីនដា ធ្លាប់បានប្រកាសថា បានរងអំពើហិង្សាពីលោក យ៉ែម សំអូន មុននឹងលែងលះគ្នានោះ ថ្មីៗនេះអ្នកនាងបានបង្ហោះសារវែងអន្លាយដ៏គួរឱ្យភ្ញាក់ផ្អើល អំពីរឿងរ៉ាវរបស់កូនស្រីវ័យជាង 10ឆ្នាំរបស់អ្នកនាងថា កំពុងប្រឈមជំងឺផ្លូវចិត្តធ្ងន់ធ្ងរ ក្នុងពេលដែលអ្នកនាងជាម្ដាយជាអ្នកទទួលរ៉ាប់រងលើកូនស្រីតែម្នាក់ឯង។ អ្នកនាងបានរៀបរាប់ពីអ្វីដែល Veronica កូនស្រីអ្នកនាងបានជួបប្រទះ និងពីការបារម្ភរបស់អ្នកនាង ចាប់តាំងពីកូនស្រីរបស់អ្នកនាងមានសម្ពាធផ្លូវចិត្ត ក្រោយពេលអ្នកនាង និងលោក យ៉ែម សំអូន បានបែកបាក់គ្នាមក។
ការសរសេររៀបរាប់ លើបណ្តាញសង្គមផ្លូវការរបស់អ្នកនាង យ៉ាន លីនដា មានអត្ថន័យយ៉ាងដូច្នេះថា «មនុស្សជាច្រើនបានសួរខ្ញុំថា តើមានរឿងអ្វី និងហេតុអ្វីបានជាខ្ញុំបាត់ខ្លួន?។ មានពាក្យចចាមអារ៉ាមជាច្រើន បានចាប់ផ្តើមលេចឡើងអំពីខ្ញុំ ប៉ុន្តែវាមិនមែនជាបញ្ហាសម្រាប់ខ្ញុំនោះទេ អ្វីដែលខ្ញុំត្រូវប្រឈម គឺស្មុគស្មាញជាងនេះទៅទៀត។ ខ្ញុំមិនចេញមុខបកស្រាយនឹងពាក្យចចាមអារ៉ាមទាំងអស់នោះទេ ប៉ុន្តែខ្ញុំយកពេលដើម្បីមើលថែដល់អ្នកដែលកំពុងប្រឈមនឹងបញ្ហាថប់អារម្មណ៍ និងធ្លាក់ទឹកចិត្តធ្ងន់ធ្ងរ គឺប្រសើរជាង។ ខ្ញុំកំពុងចែករំលែករឿងនេះ ដើម្បីរំឭកដល់អ្នកដែលកំពុងមានបញ្ហាសុខភាពផ្លូវចិត្ត ថាអ្នកមិនឯកានោះទេ ហើយវាគ្មានបញ្ហាទេក្នុងការនិយាយចេញមក»។
អ្នកនាង យ៉ាន លីនដា សរសេរបន្តថា «របស់ខ្ញុំទៅជាបែបនេះ។ ខ្ញុំមានអារម្មណ៍ថា នាងមិនសូវល្អគ្រប់គ្រាន់សម្រាប់ពិភពលោកនេះទេ ប៉ុន្តែនាងល្អណាស់សម្រាប់ខ្ញុំ នាងគ្មានអ្វីទៀតទេ តែមានបន្ទុកមួយ គឺចង់ចាកចេញពីខ្ញុំជារៀងរហូត។ ខ្ញុំមានអារម្មណ៍ថា ខ្ញុំបានបរាជ័យក្នុងនាមជាម្តាយម្នាក់។ ខ្ញុំបានសម្រេចចិត្តរារាំងពិភពលោក ដែលខ្ញុំផ្តល់ឱ្យនាង នូវការយកចិត្តទុកដាក់របស់ខ្ញុំ ខ្ញុំចង់ចេញទៅទីនោះ ហើយស្វែងរកជំនួយទាំងអស់ដែលខ្ញុំអាចធ្វើបាន ដើម្បីឱ្យនាងអាចឆ្លងកាត់សម័យកាលដ៏ងងឹតនេះនៅក្នុងជីវិតរបស់នាង។ ខ្ញុំបានស្វែងរកជំនួយពីអ្នកឯកទេស ហើយក៏បានដឹងថា Veronica បានទទួលរងពីជំងឺបាក់ទឹកចិត្ត (PTSD) តាំងពីតូចម្ល៉េះ។ លទ្ធផលរបស់នាង គឺមានភាពអវិជ្ជមានជាច្រើន ដោយសារតែមានហេតុការណ៍ដែលនាំឱ្យនាងមានការឈឺចាប់ជាច្រើន បានកើតឡើងពេញមួយជីវិតរបស់នាង ហើយបន្ទាប់ពីបានទទួលការព្យាបាល នាងកាន់តែប្រសើរឡើងហើយ»។
អ្នកនាង យ៉ាន លីនដា បន្តថា «បញ្ហាធុញថប់អារម្មណ៍ និងការបាក់ទឹកចិត្ត កើតឡើងក្នុងលក្ខណៈខុសប្លែកពីគ្នាចំពោះបុគ្គលម្នាក់ៗ។ Veronica ស្ថិតក្នុងចំណុចមួយដែលអាស្រ័យលើអារម្មណ៍ក្រៀមក្រំរបស់នាង និងការធុញថប់ ការភ័យស្លន់ស្លោជាដើម។ នាងចាប់ផ្តើមឮសំឡេង ឮទាំងដែលគ្មានសំឡេងអ្វីសោះ តែនាងមិនអាចធ្វើបានក្នុងការកាត់បន្ថយសំឡេងទាំងនោះទេ។ នៅពេលយប់នាងមើលឃើញរូបងងឹតឈរនៅបាតគ្រែរបស់នាង ឬឈរនៅជុំវិញនាង វាធ្វើឱ្យបានភ័យខ្លាចក្នុងការនៅតែម្នាក់ឯង។ អំឡុងពេលថ្ងៃ Veronica ក៏ពិបាកណាស់ដែរលើការគេង នាងមិនអាចប្រាប់បានទេ ពីភាពខុសគ្នារវាងអ្វីដែលមិនពិត និងអ្វីជាការពិត ដើម្បីឱ្យនាងមានអារម្មណ៍ថា នាងមានជីវិតរស់រវើក និងគេចផុតពីការឈឺចាប់។ នាងវ៉ៃជញ្ជាំង នាងកោសខ្លួនឯងរហូតទាល់តែនាងហូរឈាម ដែលនេះគឺជាវិធីតែមួយគត់របស់នាងក្នុងការទប់ទល់។ ក្នុងនាមជាម្តាយមួយរូបដែលមើលថែកូន បានឆ្លងកាត់ការឈឺចាប់ជាច្រើន គ្មានអ្វីអាចនឹងកាន់តែអាក្រក់នោះទេ»។
អតីតភរិយារបស់ លោក យ៉ែម សំអូន បន្ថែមថា «បន្ទាប់ពីអ្នកជំនាញបានផ្តល់ការប្រឹក្សាយោបល់ប្រចាំសប្តាហ៍ រួមផ្សំទាំងថ្នាំព្យាបាលផងនោះ បានធ្វើឱ្យនាងប្រសើរវិញហើយ ជាពិសេសរួមជាមួយនឹងការរបបអាហារ ការហាត់ប្រាណផងនោះ។ វានៅតែពិបាកសម្រាប់នាង ប៉ុន្តែខ្ញុំបានប្តេជ្ញាចិត្តថា ព្យាយាមអ្វីៗគ្រប់យ៉ាង។ មានគេប្រាប់ខ្ញុំថា គួរចិញ្ចឹមសត្វ ព្រោះវាអាចជួយពួកយើងបាន។ ពួកវាបានជួយ Veronica ជាច្រើន ពេលនាងមានអារម្មណ៍ក្រៀមក្រំ យ៉ាងណាក៏ដោយនាងអាចបង្កើតស្នាមញញឹមនៅលើមុខរបស់នាងបាន ហាក់បីដូចជាទុក្ខកង្វល់។ ឆ្នាំមុន យើងបានធ្វើតេស្តជាច្រើនលើបញ្ហានេះ តែអ្វីដែលសំខាន់បំផុត យើងត្រូវថែរក្សាសុខភាពផ្លូវចិត្ត និងសុខភាពរាងកាយរបស់អ្នក ដូច្នេះអ្នកនឹងមានភាពរឹងមាំ ព្រមទាំងអាចស៊ូទ្រាំ ក្នុងការទប់ទល់នឹងបញ្ហាប្រឈមក្នុងជីវិត»។
អ្នកនាងថា «សារដែលខ្ញុំចង់ប្រាប់នៅពេលនេះ គឺសូមមើលថែលើកូនៗរបស់អ្នក និងមនុស្សជាទីស្រឡាញ់របស់អ្នក ហើយធ្វើការកត់សម្គាល់អាកប្បកិរិយាប្លែកៗ ឬចម្លែករបស់ពួកគេ។ ព្រមទាំងនិយាយជាមួយពួកគេ កុំឱ្យវារីករាលដាល ដល់ចំណុចមួយដែលពួកគេ គិតថាគ្មានផ្លូវចេញ។ វាគ្មានការព្យាបាល ដោយអព្ភូតហេតុលើជំងឺបាក់ទឹកចិត្តបាននោះទេ ប៉ុន្តែវាអាចត្រូវបានគ្រប់គ្រង ដោយប្រឹក្សាជាមួយអ្នកជំនាញ ហើយព្យាយាមហាត់ពត់ដោយខ្លួនឯង។ វាអាស្រ័យលើការខិតខំប្រឹងប្រែងរបស់អ្នក»។ «Veronica នៅមានថ្ងៃខ្លះធ្វើទុក្ខ ប៉ុន្តែមិនអីទេ ខ្ញុំនឹងយកនាងទៅកន្លែងដែលនាងទៅកាលពីឆ្នាំមុន។ ទាំងពីរនាក់ Veronica និងខ្ញុំ ចង់ចែករំលែករឿងរ៉ាវទៅអ្នកទាំងអស់គ្នា ហើយយើងសង្ឃឹមថា យើងអាចជួយក្នុងការលើកទឹកចិត្តអ្នកមានបញ្ហាបាក់ទឹកចិត្ត «Ppl» ឱ្យតស៊ូឡើង កុំភ័យខ្លាច។ ចុងក្រោយ–សូមអរគុណ Veronica ដែលមិនបោះបង់ ខិតខំតស៊ូជាមួយម៉ាក់។ ពួកយើងបន្តដំណើរទៅមុខទៀត ស៊ូៗណា៎ អ្នកកូនស្រី!»។
សូមបញ្ជាក់ថា អ្នកនាង យ៉ាន លីនដា បានដាក់ពាក្យប្ដឹងលែងស្វាមី គឺលោក យ៉ែម សំអូន ជាផ្លូវការ ក្រោយទៅដល់ប្រទេសអូស្រ្តាលី បន្ទាប់ពីផ្ទុះជម្លោះជាមួយស្វាមី ដែលបង្កឱ្យអ្នកនាងមានរបួស ដែលអ្នកនាងប្រាប់ថា មិនមែនជាលើកទី1នោះទេ។ ជម្លោះនេះ មិនអាចជ្រើសរើសយកការផ្សះផ្សារនឹងគ្នាបាននោះទេ ដោយសារតែរឿងរ៉ាវនោះ កើតឡើងច្រើនដងមកហើយ។ យ៉ាងណាមិញ កាលពីអំឡុងខែឧសភា ឆ្នាំ2015 យ៉ាន លីនដា បានបង្ហើបពីបុរសដែលលួចលាក់ពាក់ព័ន្ធជាមួយស្វាមីខ្លួន។ បន្ទាប់ពីឆ្លើយតបនឹងការបង្ហោះសារសុំអភ័យទោសជាសាធារណៈរបស់លោក យ៉ែម សំអូន ជាស្វាមីរួចមក អ្នកនាង យ៉ាន លីនដា ដែលត្រូវជាភរិយាបានបង្ហើបប្រាប់អំពីសម្ព័ន្ធភាពជ្រាលជ្រៅរបស់ស្វាមីនាង និងបុរសម្នាក់ដែលជាតារាល្បីឈ្មោះមួយរូបនៅក្នុងស្រុកផងដែរ៕
