Author: អេបិល

លោក Southgate៖ តំបន់ប្រយុទ្ធរបស់អង់គ្លេស បង្ហាញពីភាពខ្លាំង ក្រោយផ្តួលអេស្ប៉ាញ
លោក Gareth Southgate ជឿជាក់ថា តំបន់ប្រយុទ្ធរបស់ក្រុមបាល់ទាត់ជម្រើសជាតិអង់គ្លេស បានឆ្លើយតបទៅនឹងការរិះគន់ផ្សេងៗ កាលពីថ្ងៃចន្ទ តាមរយៈការស៊ុតបាល់បញ្ចូលទី 3គ្រាប់ ក្នុងការប្រកួតដ៏រំភើបនៃតង់ទី1 នៅពេលប្រកួតជាមួយនឹងក្រុមជម្រើសជាតិអេស្ប៉ាញ។
ខ្សែប្រយុទ្ធ Raheem Sterling បានស៊ុតបាល់បញ្ចូលទី 2គ្រាប់នៅចន្លោះគ្រាប់បាល់របស់ខ្សែប្រយុទ្ធ Marcus Rashford ស្របពេលដែល Harry Kane ក៏បានបង្ហាញពីទម្រង់លេងយ៉ាងល្អផងដែរ ខណៈដែលរូបគេបានជួយឱ្យមិត្តរួមក្រុមរបស់គេរកបានគ្រាប់បាល់ 2គ្រាប់យ៉ាងល្អ ក្នុងពេលអង់គ្លេស បានយកឈ្នះ 3-2 ក្នុងទីក្រុងSeville។ ក្រុមជម្រើសជាតិអេស្ប៉ាញ មិនធ្លាប់បានរបូតគ្រាប់បាល់ 3គ្រាប់នៅលើទឹកដីខ្លួនឯងឡើយ នៅមុនពេលតង់ទី1 ហើយស្របពេលដែលខ្សែបម្រើ PacoAlcacer បានវាយបក 1គ្រាប់វិញ ជ័យជម្នះរបស់ក្រុមជម្រើសជាតិអង់គ្លេស បានមានសុវត្ថិភាព នៅត្រឹមពេលដែលខ្សែការពារ Sergio Ramos បានតែតបាល់បញ្ចូលទីនៅវិនាទីចុងក្រោយនៃការប្រកួតនេះ។ Sterling, Rashford និង Kane សុទ្ធសឹងបានរងនូវការរិះគន់នានាក្នុងរយៈពេលប៉ុន្មានសប្តាហ៍ចុងក្រោយនេះ។ Sterling មិនធ្លាប់បានរកគ្រាប់បាល់បញ្ចូលទីសោះសម្រាប់ក្រុមជម្រើសជាតិអង់គ្លេស ក្នុងរយៈពេល 3ឆ្នាំ ស្របពេលដែលការមិនអាចរកបានគ្រាប់បាល់ក្នុងការប្រកួតអន្តរជាតិរបស់ Kane បច្ចុប្បន្នបន្តរហូតដល់ទៅ 7ប្រកួត។
ជាមួយគ្នានេះ Rashford បានខ្ជះខ្ជាយឱកាសមាស 2លើក នៅពេលប្រកួតជាមួយនឹងក្រុមជម្រើសជាតិក្រូអាស៊ី កាលពីថ្ងៃសុក្រ។ លោក Southgate បានឱ្យដឹងថា៖ «កីឡាករទាំង 3នាក់បានយល់ចំពោះសំណួរដែលត្រូវបានចោទសួរ ហើយរាល់កីឡាករទាំង3នាក់ បានឆ្លើយតបវិញជាមួយនឹងការបង្ហាញពីទម្រង់លេងយ៉ាងរឹងមាំ»៕
ប្រភពពី៖ Worldsoccertalk
October 17, 2018
Halep ទទួលបានចំណាត់ថ្នាក់លេខ1 ក្នុងពិភពលោករយៈពេល 2ឆ្នាំជាប់ៗគ្នា
កីឡាការិនីវាយកូនបាល់ Simona Halep ដែលជាម្ចាស់ជើងឯក French Open នឹងបញ្ចប់ឆ្នាំនេះ ក្នុងនាមជាកីឡាការិនីមានចំណាត់ថ្នាក់លេខ1 ក្នុងពិភពលោកសម្រាប់រដូវកាលទី2 ជាប់ៗគ្នា។ នេះបើយោងតាមការប្រកាសរបស់សហព័ន្ធកីឡាវាយកូនបាល់ផ្នែកនារីហៅកាត់ថា WTA កាលពីថ្ងៃចន្ទ។
កីឡាការិនីសញ្ជាតិរ៉ូម៉ានី វ័យ 27ឆ្នាំរូបនេះ បានផ្តួលកីឡាការិនី Sloane Stephens ក្នុងព្រឹត្តិការណ៍ French Open ដើម្បីឈ្នះពានក្នុងកម្មវិធី Grand Slam ជាលើកទី1 របស់គេ កាលពីខែមិថុនា ហើយ និងបានចំណាយរយៈពេល 40សប្តាហ៍ដោយស្ថិតនៅលើកំពូលតារាង នៅចុងរដូវកាលនេះ។ Halep បានឱ្យដឹងក្នុងសេចក្តីប្រកាសព័ត៌មានរបស់ WTA ថា៖ «ការបញ្ចប់រដូវកាលនេះ ក្នុងនាមជាកីឡាការិនីមានចំណាត់ថ្នាក់លេខ1 ក្នុងពិភពលោកកាលពីឆ្នាំមុន គឺជាកិត្តិយសដ៏ធំមួយសម្រាប់ខ្ញុំ។ ការរក្សាបានចំណាត់ថ្នាក់នេះជាលើកទី2 ក្នុងឆ្នាំ2018 គឺជាការសម្រេចបាននូវសមិទ្ធផលដ៏ពិសេសមួយ ជាពិសេស ក្រោយពីការឈ្នះពាន Grand Slam ជាលើកទី1 របស់ខ្ញុំ នៅឆ្នាំនេះ»។
Halep ត្រូវបានគ្រោងធ្វើការប្រកួតក្នុងទីក្រុងម៉ូស្គូ នៅសប្តាហ៍នេះ នៅមុនពេលបញ្ចប់រដូវកាលរបស់នាងក្នុងព្រឹត្តិការណ៍ WTA Finals នៅប្រទេសសិង្ហបុរី ប៉ុន្តែបានជួបបញ្ហារបួសត្រង់ខ្នងរបស់នាង កាលពីដើមខែនេះ ដែលនាំឱ្យមានភាពមិនច្បាស់ចំពោះការចូលរួមក្នុងព្រឹត្តិការណ៍ទាំង 2លើក៕
ប្រភពពី៖ Channel News Asia
October 17, 2018
Griezmann រកបាន 2គ្រាប់ ដើម្បីធ្វើឱ្យលោក Loew កាន់តែលិចលង់ក្នុងបញ្ហា
ខ្សែប្រយុទ្ធ Antoine Griezmann បានស៊ុតបាល់បញ្ចូលទី 2គ្រាប់ក្នុងតង់ទី2 ខណៈដែលក្រុមម្ចាស់ជើងឯកពិភពលោកបារាំង បានធ្វើការវាយបកដេញតាមពីក្រោយ ដើម្បីផ្តួលក្រុមជម្រើសជាតិអាល្លឺម៉ង់ ក្នុងលទ្ធផល 2-1 ក្នុងយុទ្ធនាការ UEFA Nations League កាលពីថ្ងៃអង្គារ និងបានបង្កើតឱ្យមានភាពស្រពេចស្រពិលជុំវិញអនាគតរបស់លោក Joachim Loew។
ខ្សែបម្រើ Toni Kroos បានស៊ុតបាល់ប៉េណាល់ទីនៅនាទីទី14 សម្រាប់ក្រុមជម្រើសជាតិអាល្លឺម៉ង់ ប៉ុន្តែ Griezmann បានបង្កើតឱ្យមានការវាយបកដ៏គួរឱ្យរំភើបមួយ ក្នុងការប្រកួតលើកទី1 រវាងក្រុមទាំង2 នាកីឡដ្ឋាន Stade de France ចាប់តាំងពីការប្រកួតមិត្តភាពកាលពីខែវិច្ឆិកា ឆ្នាំ2015 ដែលត្រូវបានរំខានដោយសារតែការវាយប្រហារបែបភេរវកម្មជាបន្តបន្ទាប់ក្នុងរដ្ឋធានីរបស់បារាំង។ គ្រូបង្វឹកនៃក្រុមជម្រើសជាតិបារាំង លោក Didier Deschamps បានប្រើប្រាស់ក្រុមដ៏ខ្លាំងមួយដែលបានចូលលេងក្នុង World Cup វគ្គផ្តាច់ព្រ័ត្រ ខណៈដែល Presnel Kimpembe ជាកីឡាករថ្មីតែម្នាក់ដែលបានចូលជំនួសខ្សែការពារ Samuel Umtiti។ ការរងបរាជ័យ 3-០ របស់ក្រុមអាល្លឺម៉ង់ ក្រោមស្នាដៃក្រុមជម្រើសជាតិហូឡង់ កាលពីថ្ងៃសៅរ៍ បានធ្វើឱ្យលោក Loew ផ្លាស់ប្តូរកីឡាករ 5នាក់ ខណៈដែលលោកបានបន្ថែមល្បឿនក្នុងតំបន់ប្រយុទ្ធ ជាមួយនឹងការដាក់បញ្ចូល Leroy Sane និង Serge Gnabry។ ទោះបីជាយ៉ាងណា ក្រោយពីការប្រកួតកាលពីថ្ងៃអង្គារ លោក Loew នៅតែមានការរឹងទទឹង និងបានកោតសរសើរចំពោះការបង្ហាញពីទម្រង់លេងរបស់ក្រុមខ្លួន។
លោក Loew បានឱ្យដឹងថា៖ «ខ្ញុំពិតជាខកចិត្តចំពោះលទ្ធផលនេះ បើទោះបីខ្ញុំត្រូវតែនិយាយថា ការបរាជ័យនេះ គឺមានលក្ខណៈផ្សេងគ្នាពីលទ្ធផលកាលពីថ្ងៃសៅរ៍ក៏ដោយ»។ គ្រូបង្វឹករូបនេះបានបន្ថែមទៀតថា៖ «មិនមែនដោយសារតែលទ្ធផលនេះឡើយ ប៉ុន្តែ ដោយសារតែការបង្ហាញពីទម្រង់លេង។ ខ្ញុំពិតជារីករាយជាមួយនឹងទម្រង់លេងរបស់ក្រុម។ ខ្ញុំគិតថា យើងបានស្ថិតក្នុងកម្រិតស្មើគ្នាមួយ ជាមួយនឹងក្រុមដ៏ខ្លាំងបំផុតក្នុងពិភពលោក»៕
ប្រភពពី៖ Sport24
October 17, 2018
Kyrgios ភ្ញាក់ផើ្អលចំពោះក្តីស្រឡាញ់របស់អ្នកគាំទ្ររុស្ស៊ី
កីឡាករវាយកូនបាល់ Nick Kyrgios បានបញ្ជាក់ថា រូបគេមានការភ្ញាក់ផ្អើលក្នុងពេលទទួលបានការអបអរពីសំណាក់អ្នកគាំទ្រម្ចាស់ផ្ទះ នៅពេលដែលរូបគេបានផ្តួលកីឡាកររុស្ស៊ី Andrey Rublev ក្នុងលទ្ធផល 6-3 4-6 និង6-4 ក្នុងការប្រកួតជុំទី1 នៃព្រឹត្តិការណ៍ Kremlin Cup កាលពីថ្ងៃអង្គារ។
កីឡាករសញ្ជាតិអូស្ត្រាលីដែលមានចំណាត់ថ្នាក់លេខ5 ប្រចាំព្រឹត្តិការណ៍នៅទីក្រុងម៉ូស្គូរូបនេះ បានវាយកូនបាល់យ៉ាងល្អចំនួន 24លើកដើម្បីឈ្នះការជួបគ្នាជាលើកទី1 របស់គេជាមួយនឹង Rubvlev វ័យ20ឆ្នាំ។ Kyrgios បានឱ្យដឹងថា៖ «ខ្ញុំពេញចិត្តក្នុងការលេងនៅលើទីលានក្នុងសាល ហើយយើងបានលេងជាមួយ Andrey ជាច្រើនលើកក្នុងពេលរូបគេស្ថិតក្នុងវ័យក្មេង។ រូបគេនឹងមានអាជីពដ៏អស្ចារ្យមួយ»។ កីឡាកររូបនេះបានបន្ថែមទៀតថា៖ «ខ្ញុំពិតជាមានការភ្ញាក់ផ្អើលខ្លាំងណាស់ដែលមនុស្សជាច្រើនបានអបអរដល់ខ្ញុំនៅទីនេះ។ វាពិតជាល្អណាស់។
ជាធម្មតា នៅពេលដែលខ្ញុំមិនស្ថិតនៅផ្ទះ ខ្ញុំមិនមែនជាមនុស្សគួរឱ្យស្រឡាញ់បំផុតឡើយ ប៉ុន្តែ វាជារឿងដ៏ល្អមួយក្នុងការស្តាប់ឮសំឡេងអបអរ។ ខ្ញុំមានអារម្មណ៍ហាក់ដូចនៅផ្ទះខ្លួនឯងអ៊ីចឹង»។ Kyrgios វ័យ 23ឆ្នាំ ដែលបានធ្លាក់ទៅកាន់ចំណាត់ថ្នាក់លេខ37 លើតារាងពិភពលោក ក្រោយពីធ្លាក់ចុះទម្រង់លេងនៅឆ្នាំនេះ នឹងត្រូវប៉ះជាមួយនឹងកីឡាករ Mirza Basic ក្នុងវគ្គ 16នាក់ចុងក្រោយ ក្រោយពីកីឡាករសញ្ជាតិបូស្នីរូបនេះ បានផ្តួលកីឡាករទុយនីស៊ី MalekJaziri ក្នុងលទ្ធផល 7-6 (7/4) និង6-2៕
ប្រភពពី៖ Channel News Asia
October 17, 2018
កញ្ញា ឌី លីកា និងបវរកញ្ញា Miss Grand បង្ហាញដងខ្លូនក្នុងឈុតប៊ីគីនីយ៉ាងសិចស៊ី
កន្លងទៅថ្មីៗនេះ Miss Grand របស់កម្ពុជាកញ្ញា ឌី លីកា បានទទួលការជ្រើសរើសជាប់លេខមួយ ដោយទទួលបានការ Like និង Share ច្រើនជាងគេ ប៉ុន្តែមិនទាន់ចប់នោះទេត្រូវប្រកួតនៅវគ្គ TOP 10 និងវគ្គផ្តាច់ព្រ័ត្រទៀត។ ខណៈនៅថ្ងៃទី 17 ខែតុលា នេះ ជាថ្ងៃកំណត់ដែលកម្មវិធី Miss Grand International តម្រូវឱ្យបេក្ខភាពនារីតំណាងប្រទេសនីមួយៗមកពីជុំវិញពិភពលោក បង្ហាញខ្លួនជាថ្មីម្តងទៀតក្នុងឈុតប៊ីគីនី ឬ ឈុតហែលទឹក ។
ការបង្ហាញខ្លួនក្នុងឈុតប៊ីគីនី ឬ ឈុតហែលទឹកនេះ បេក្ខនារីតំណាងប្រទេសទាំង 10នេះ សុទ្ធតែបង្ហាញដោយភាពជឿជាក់បំផុត ជាមួយរូបរាងកាយដ៏ស្រស់ស្អាត និង សមសួនមួយបែបម្នាក់ ហើយសម្រាប់កញ្ញា ឌី លីកា Miss Grand Cambodia ប្រចាំឆ្នាំ 2018 ក៏មិនខុសពីបវរកញ្ញាទាំងនោះដែរ ដោយកញ្ញាបានបង្ហាញខ្លួនយ៉ាងមានទំនុកចិត្ត ការជឿជាក់ចំពោះរូបរាងកាយដ៏ស្រឡូន និង ស្រស់ស្អាតរបស់ខ្លួន ជាមួយនឹងស្ទីលថតដ៏គួរឱ្យទាក់ទាញថែមទៀត ។
គួរបញ្ជាក់ផងដែរថា ការប្រលងបវរកញ្ញានេះ Miss Grand តំណាងប្រទេសកម្ពុជាកញ្ញា ឌី លីកា មិនត្រឹមតែត្រូវស្លៀកពាក់ឈុតតំណាងជាតិតែមួយមុខនោះទេ កញ្ញា ឌី លីកា ត្រូវស្លៀកពាក់ឈុតហែលទឹក និងឈុតផ្សេងៗបន្ដបន្ទាប់ទៀត។ ចង់ដឹងថា នាងមានសម្រស់សោភា និងដងខ្លូនស្រឡូនប៉ុនណានោះ សូមទស្សនារូបភាពខាងក្រោម ៖
October 17, 2018
ស្រាបៀរអាន់ឆ័រនឹងចាប់រង្វាន់ផ្តាច់ព្រ័ត្រនៅថ្ងៃអាទិត្យចុងសប្តាហ៍នេះ
រាជធានីភ្នំពេញ៖ នៅថ្ងៃអាទិត្យទី 21 ខែតុលា ឆ្នាំ2018 ខាងមុខនេះ ស្រាបៀរអានឆ័រនឹងរៀបចំកម្មវិធីចាប់រង្វាន់លើកចុងក្រោយនៅស្ថានីយទូរទស្សន៍ PNN ក្នុងកម្មវិធីតន្រ្តី Anchor Fun Zone ដើម្បីផ្តល់រង្វាន់លាភមង្គលជូនដល់គូស្វាមីភរិយាថ្មីទាំងអស់ដែលបានជាវស្រាបៀរអាន់ឆ័រសម្រាប់ទទួលភ្ញៀវកិត្តិយសក្នុងកម្មពិធីអាពាហ៍ពិពាហ៍របស់ខ្លួន។
កម្មវិធី Anchor Fun Zone នឹងមានការផ្សាយផ្ទាល់លើកញ្ចក់ទូរទស្សន៍ ភីអិនអិន (PNN) ចាប់ពីម៉ោង 8យប់-10យប់ ដោយមានការចូលរួមសម្តែងដ៏អស្ចារ្យពីតារាចម្រៀងល្បីឈ្មោះជាច្រើនរូបដើម្បីផ្តល់ការកម្សាន្តសប្បាយជូនទស្សនិកជន មានដូចជា លោក ខេមរះ សេរីមន្ត លោកជី ដេវីត កញ្ញាទេព បូព្រឹក្ស និងលោក Dede។ កម្មវិធីនេះធ្វើឡើងសម្រាប់តែអតិថិជនដែលបានជាវស្រាបៀរអាន់ឆ័រសម្រាប់កម្មវិធីអាពាហ៍ពិពាហ៍របស់ខ្លួន។ សម្រាប់ការចាប់រង្វាន់ផ្តាច់ព្រ័ត្រនេះ ស្រាបៀរអាន់ឆ័រ នឹងប្រគល់រង្វាន់ដំណើរក្រេបចន្ទទឹកឃ្មុំទៅកាន់កោះសាមុយប្រទេសថៃ ចំនួន 15 រង្វាន់ជូនគូស្វាមីភរិយាថ្មីដែលមានមហាសំណាង។
តើគូស្វាមីភរិយារូបណាខ្លះជាម្ចាស់រង្វាន់ផ្តាច់ព្រ័ត្រដ៏អស្ចារ្យទាំងនេះ?
សូមកុំភ្លេចចូលរួមទស្សនា និងតាមដានទាំងអស់គ្នា!!!
ពិសាដោយការទទួលខុសត្រូវ៕
October 17, 2018
ភ្ញាក់ផ្អើល !! លោកស្រី សាក់ស៊ី ស្បោង បង្ហាញវត្តមានចូលរួមគោរពវិញ្ញាណក្ខន្ធព្រះបរមរតនកោដ្ឋ
យោងតាមហ្វេសប៊ុកផេចរបស់ក្រុមព្រះសុរិយា បានបញ្ចេញរូបភាពជាច្រើនសន្លឹករបស់ លោកស្រី សាក់ ស៊ីស្បោង ក៏ដូចជាបានផ្ដល់នូវព័ត៌មាន ត្រួសៗមួយចំនួន ដើម្បីឱ្យមហាជនបានជ្រាបដឹង។ លោកស្រី សាក់ ស៊ីស្បោង បានចាកចេញពីប្រទេសកម្ពុជា អស់រយៈពេលជាច្រើនឆ្នាំមកហើយ បន្ទាប់ពីលោកស្រីបានលាឈប់ពីការសម្ដែង តាំងពីជំនាន់ មុនសម័យខ្មែរក្រហមមកម្ល៉េះ។ ទស្សនិកជន ក៏ដូចជាមហាជននៅក្នុងប្រទេសកម្ពុជា បានគិតស្មាន និងសន្និដ្ឋានថា លោកស្រី សាក់ ស៊ីស្បោង ប្រហែលជាបាត់បង់ជីវិត នៅក្នុងសម័យ ខ្មែរក្រហមបាត់ទៅហើយ ក៏ប៉ុន្តែអ្វីដែលគួរឱ្យភ្ញាក់ផ្អើល គឺលោកស្រីនៅមានជីវិត និងបានមកលេងប្រទេសកម្ពុជា ជាពិសេសនោះ គឺមកគោរពវិញ្ញាណក្ខន្ធ ព្រះបរមរតនកោដ្ឋទៀតផង។
ហ្វេសប៊ុកផេចរបស់ក្រុមព្រះ សុរិយា បានសរសេរថា «នរណាមិនស្គាល់សាក់ស៊ី ស្បោង! អតីតកាល និងបច្ចុប្បន្នភាព នៃអតីតតារាភាពយន្ត សាក់ស៊ី ស្បោង តារាសម្តែងបែបអន្តរជាតិ និយមសម្តែងតួកាច ឆ្នាស់ឆ្នើម ស៊ីវិល័យដោយរស់រវើក។ ខ្សែភាពយន្តល្បីៗ របស់លោកស្រីរួមមាន រឿង «អប្សរា» រឿង «រស់ដោយសប្បាយ» រឿង «ព្រះប្រជាកុមារ» រឿង«វិលវិញណាបង» រឿង«លោហិតវាសនា» និង រឿង«សែនទារុណ» ជាដើម។ មកដល់ពេលនេះមហាជនជាច្រើន នៅតែចងចាំលោកស្រី ប៉ុន្តែក៏មានមហាជនខ្លះគិតថា លោកស្រីបានត្រូវខ្មែរក្រហមសម្លាប់បាត់ទៅហើយ។ ផ្ទុយទៅវិញ ចំពោះការបាត់ដំណឹង និងការពុំបង្ហាញខ្លួនជាច្រើនឆ្នាំកន្លងមកនេះ ដោយសារតែលោកស្រីរស់នៅឆ្ងាយពីមាតុប្រទេស ហើយឈប់សំរាកពីវិស័យភាពយន្ត សព្វថ្ងៃលោកស្រី បានតាំងចិត្តសាងធម៌ក្រោមពុទ្ធឱវាទ យ៉ាងខ្ជាប់ខ្ជួន»។
ហ្វេសប៊ុកផេចរបស់ក្រុមព្រះ សុរិយា បានប្រាប់ឱ្យដឹងបន្ថែមទៀតថា «លោកស្រី អញ្ជើញមកប្រទេសកម្ពុជា ក្នុងគោលបំណងដ៏សំខាន់ គឺមកថ្វាយបង្គំព្រះបរមចេតិយ នៃសម្តេចព្រះបរមរតនកោដ្ឋ និងផ្សាយនូវមហាកុសលថ្វាយព្រះចមក្សត្រ ដែលព្រះអង្គមានគុណ បំណាច់ច្រើនលើសលប់សម្រាប់ មាតុប្រទេសកម្ពុជា។ លោកស្រីបានធ្វើដំណើរ អស់រយៈចម្ងាយជាង១ម៉ឺនគីឡូ ដើម្បីមកចូលរួមព្រះរាជពិធី ជាមួយអង្គព្រះមហាក្សត្រ ព្រះករុណាព្រះបរមនាថ សម្តេចព្រះមហាក្សត្រី ព្រះវររាជមាតា ជាតិខ្មែរ រួមទាំង ព្រះរាជវង្សានុវង្ស និងប្រជាជាតិខ្មែរទាំងមូល ក្នុងព្រះនគរកម្ពុជា»៕
October 17, 2018
គួច ខេវិន និយាយរឿងចម្លងវប្បធម៌បរទេសទាំងងងឹតងងល់ និងតើក្រសួង និងស្ថាប័នណាខ្លះ គួរទទួលខុសត្រូវ?
លោក គួច ខេវិន ត្រូវបានគេស្គាល់លោកថា ជាអ្នកផលិតកម្មវិធីកម្សាន្ត របស់ស្ថានីយ៍ទូរទស្សន៍ដ៏ល្បីឈ្មោះ ដែលថ្មីៗនេះលោកបានសម្ដែងអារម្មណ៍អរគុណ ចំពោះអ្នកគាំទ្រ និងបញ្ចេញទស្សនៈ ទាក់ទងនិងការថែរក្សាតម្លៃ មរតក បេតិកភណ្ឌ និងវប្បធម៌របស់ជាតិ ដោយសង្កត់ធ្ងន់ថា តើអ្នកបានធ្វើអ្វីខ្លះដើម្បីរក្សា «វប្បធម៌» ជាតិខ្មែរ?
លោក គួច ខេវិន បានសរសេរបង្ហោះ នៅលើបណ្តាញសង្គមហ្វេសប៊ុកផ្ទាល់ខ្លួនថា «ខ្ញុំបាទសូមអរគុណជាអនេក ដល់មិត្តក្នុង Facebook ដែលតែងតែគាំទ្រ រៀងរាល់កម្មវិធីទូរទស្សន៍ ដែលខ្ញុំផលិត ហើយនិងបានជួយ Share និង Like…។ ជាក់ស្តែងដូចជារដូវបុណ្យភ្ជុំកន្លងមក ដែលមានក្រុមត្រកូល ខាត់ មានអ្នក Share និងចូលរួមតាមដានជាង 21k… ក្នុងពេលតែ3ថ្ងៃជាមួយនឹង ភ្លេង បុរាណខ្មែរ យ៉ាងពីរោះរណ្តំចិត្ត»។
លោក គួច ខេវិន បានលើកឡើងបន្តទៀតថា «ខ្មែរពិតជាសំបូរហូរហៀរ ទៅដោយមរតក បេតិកភណ្ឌ និងវប្បធម៌ ក៏ដោយសារ តែភាពហូរហៀនេះ ហើយទើបបានជាធ្វើឱ្យខ្មែរពិបាកថែ ពិបាករក្សា…ពិបាកចែកចាយឱ្យកូនចៅ ជំនាន់ក្រោយៗ រួចក៏ទុកឱ្យគេលួច គេប្លន់ ឱ្យគេរើសយកទៅធ្វើជាសម្បត្តិ របស់គេទៅវិញ។ ចំណែកខ្លួនជាម្ចាស់មរតក ដ៏សំបូរបែប ក៏បណ្តែតបណ្តោយកូនចៅ ឱ្យទៅលួចចម្លងវប្បធម៌ ជាតិគេទាំងងងឹតងងល់មកពង្វក់ខ្មែរ តជំនាន់ហើយថែមទាំងនៅតែអួតក្អេងក្អាង ខុសទំនង…»។
អ្នកផលិតកម្មវិធីកម្សាន្តរូបនេះនិយាយថា «ប្រសិនជាមាន មនសិកា ជាខ្មែរពិតតែបន្តិចបន្តួច រួចលួចក្រឡេកមើលពួក ដែលធ្លាប់លួច ធ្លាប់ប្លន់ ធ្លាប់រើសយក មរតកវប្បធម៌ខ្មែរ ទៅថែ ទៅរក្សា ទៅការពារ ទៅលើកស្ទួយនោះ អ្នកនឹងមិនក្លាយទៅជាខ្មែរដែលត្រូវបណ្តាសាររបស់ បុព្វបុរស មហានរគ នោះឡើយ ។ ជំនួសឱ្យពាក្យសោកស្តាយ តើអ្នកបានធ្វើអ្វីខ្លះដើម្បីរក្សា «វប្បធម៌» ជាតិខ្មែរ? ប្រឈមទៅនឹងភាពធ្លាក់ដុនដាប ដល់កម្រិតមួយដែលមិនល្អ នៃវប្បធ៌មរបស់ខ្មែរតើក្រសួង និងស្ថាប័នណាខ្លះ គួរទទួលខុសត្រូវ និងបញ្ឈប់ភាពលង់លក់ដ៏អាក្រក់ ទាំងកណ្តាលថ្ងៃត្រង់បែបនេះ?»៕

October 17, 2018
រន្ធត់ចិត្ត!! Selena Gomez កំពុងព្យាបាលជំងឺផ្លូវចិត្ត និងមានបញ្ហាជំងឺក្រលៀន
តាមរយៈសារព័ត៌មាន Mthai ដែលចេញផ្សាយនៅពេលថ្មីៗនេះ បានឱ្យដឹងថា អ្នកគាំទ្ររបស់តារាចម្រៀងវ័យក្មេងនាង Selena Gomez មានភាពភ្ញាក់ផ្អើល ហើយរន្ធត់ចិត្តជាខ្លាំង ខណៈដែលទទួលដំណឹងថា តារាស្រីរូបនេះ កំពុងសម្រាកក្នុងមន្ទីរពេទ្យជំងឺផ្លូវចិត្ត បើទោះបីជានាង ទើបតែជាពីការវះកាត់ប្ដូរក្រលៀនហើយថ្មីៗនេះ ដោយសុវត្ថិភាព ។
សារព័ត៌មានបរទេសបានធ្វើការចេញផ្សាយថា បើទោះបីជាការវះកាត់របស់តារាស្រីវ័យ 26 ឆ្នាំរូបនេះ បានទទួលជោគជ័យក៏ពិតមែន តែនាងត្រូវពិនិត្យសុខភាពជាប្រចាំ នៅក្នុងដំណាក់កាលទី 2 និង ទី 3 នៃសប្ដាហ៍បន្ដបន្ទាប់ ព្រោះនាងមានគ្រាប់ឈាមសថយចុះ ដែលបានបង្ហាញពីលិទ្ធផលអាការជំងឺ នោះអាចបណ្ដាលមកពីក្រលៀនដែលទើបនឹងវះកាត់ថ្មី។ គ្រូពេទ្យ បានបញ្ជាក់ប្រាប់អ្នកសារព័ត៌មានថា បញ្ហាដ៏គ្រោះថ្នាក់មួយនេះ អាចបណ្ដាលមកពី នាងSelena Gomez មានបញ្ហាវិប្បត្តផ្លូវចិត្ត និងកើតវិតុកង្វល់ខាងផ្លូវអារម្មណ៍ខ្លាំងពេក ជាហេតុជំរុញឱ្យនាងធ្លាក់ខ្លួនទៅរកសភាពទន់ខ្សោយកម្លាំង និងសុខភាពមិនរឹងមាំ។
គ្រូពេទ្យក៏បានបញ្ជាក់បន្ថែមថា ខណៈនេះ តារាចម្រៀងស្រីរូបនេះ កំពុងសម្រាកព្យាបាលផ្លួវចិត្ត នៅឯមន្ទីរ East Coast ដែលត្រូវការពេលវេលាព្យាបាលទៅតាមដំណាក់កាលនិមួយៗ និងបរិស្ថានជុំវិញខ្លួនផងដែរ។ សូមជម្រាបថា មានអ្នកគាំទ្រជាច្រើន បានជូនពរឱ្យតារាស្រីរូបនេះ បានឆាប់ជាសះស្បើយ ៕
October 16, 2018
ធ្លាយដំណឹង !! កំពូលតារាចម្រៀង Jessie J មានទំនាក់ទំនងស្នេហាជាមួយតារាសម្ដែងប្រុសរូបសង្ហា
តាមរយៈការផ្ដល់បទសម្ភាសន៍ជាមួយសារព័ត៌មាន People កំពូលតារាចម្រៀងស្រីសំឡេងខ្ពស់ Jessie J ត្រូវបានគេដឹងថា កំពុងតែមានទំនាក់ទំនងស្នេហាក្រៅសិល្បៈជាមួយតារាសម្ដែងប្រុសល្បីឈ្មោះរូបសង្ហា លោក Channing Tatum ។
ប្រភពសារព័ត៌មានដដែលបានបង្ហើបថា រយៈពេលមួយសប្ដាហ៍កន្លងមក តារាចម្រៀងស្រីរូបនេះ បានបណ្ដើរគូស្នេហ៍នៅកន្លែងរៀនវ៉ាយកូនហ្គូលជាមួយនឹងគ្នា ហើយមុននេះពួកគេក៏បានទាក់ទងគ្នាក្រោយការប្រគំតន្ត្រីទេសចរណ៍ពេញពិភពលោក អស់រយៈពេល 2 ទៅ 3 ខែកន្លងមកដែរ។ តែយ៉ាងណាមិញ តារាចម្រៀង Jessie J នៅតែមិនទាន់បានប្រកាស និងអះអាងអំពីទំនាក់ទំនងជាមួយតារាសម្ដែងប្រុសរូបនេះ នៅក្នុងឋានៈអ្វីឱ្យពិតប្រាកដនៅឡើយទេ ។
គួររំឭកផងដែរថា តារាសម្ដែងប្រុស Channing Tatum បានលែងលះជាមួយអតីតភរិយាអ្នកនាង Jenna Dewa អស់រយៈពេល 9 ឆ្នាំមកហើយ នៅខណៈនេះ លោកហាក់បីដូចជា កំពុងព្យាយាមទាក់ទងតារាចម្រៀងស្រី Jessie J យ៉ាងមុតមាំផងដែរ ៕
October 16, 2018