Author: អេបិល

បើយោងតាមប្រភពព័ត៌មាន ដែលសារព័ត៌មានឡារ៉ែនទទួលបាន ឱ្យដឹងថា តារាសម្ដែងស្រីរាងខ្ពស់ស្រឡះ និងមានសម្បុរខ្មៅស្រអែមស្រស់ អ្នកនាង ប្រាសាទ ដាវីន ត្រូវបានអ្នកស្និទ្ធស្នាលទម្លាយថា អស់រយៈកាលជាច្រើនខែដែលនាង បានមកលេងប្រទេសកម្ពុជា បានធ្វើឱ្យអ្នកដឹកនាំក្នុងផលិតកម្មនានា ជាពិសេសផលិតករភាពយន្តជាច្រើន បានព្យាយាមទំនាក់ទំនងនាងឱ្យចូលរួមសម្ដែងភាពយន្តរបស់ខ្លួន។ តែជាចុងក្រោយនាងបានត្រឹមតែពោលបដិសេធចំពោះស្នើរទាំងអស់នោះ ដែលធ្វឱ្យមហាជនគិតថា នាងកំពុងព្រួយបារម្ភពីសុវត្ថភាពខ្លួន ទើបបានជានាងសម្ងំៗលាក់ខ្លួនមិនសូវបង្ហាញមុខ។

ប្រភពព័ត៌មានបានបន្តថា ដោយសារតែអ្នកនាង ខ្លាចគ្មានពេលវេលាគ្រប់គ្រាន់ឱ្យគេ ព្រោះការថតកុនត្រូវការពេលវេលាយូរថ្ងៃ ហើយនាងត្រូវទៅវិញនៅខែមករា។ តែទោះជាមិនបានទទួលថតកុនក្ដី ប៉ុន្តែនាងបានទទួលថតសំអាងការ និងដើរម៉ូដជាច្រើនកម្មវិធីផងដែរ។ ហើយនាបេលខាងមុខឆាប់ៗនោះ អ្នកនាងនឹងត្រូវត្រឡប់ ទៅកាន់ប្រទេសអូស្ត្រាលីវិញ ក្នុងអំឡុងដើមឆ្នាំ 2019 ។

គួររំឭកថា ប្រាសាទ ដេវីន សឹងតែត្រូវបានទស្សនិកជនភ្លេចមុខបាត់ទៅហើយ ដោយសារតែបានភៀសខ្លួនទៅរស់នៅប្រទេសអូស្រ្ដាលី បន្ទាប់ពីមានជនអនាមិក បានគំរាមយកគ្រាប់បែកទៅដាក់ក្នុងផ្ទះនាង កាលដែលនាងចេញទៅសម្ដែងនៅប្រទេសបារាំង។ ជាហេតុឱ្យអ្នកឃ្លាតឆ្ងាយពីពិភពសិល្បៈមួយរយៈធំក៏ដោយ ចាប់តាំងឆ្នាំ2016 មកម្លេះ៕

ដោយកត់សម្គាល់ឃើញថា ប្រដាល់គុនខ្មែរ ជាទីពេញនិយមសម្រាប់បងប្អូនខ្មែរស្រឡាញ់កីឡាប្រដាល់ និង ជាកេរ្ដិ៍តំណែលរបស់ដូនខ្មែរផងនោះ សព្វថ្ងៃនេះ ទើបមើលឃើញមានសកម្មភាពផ្សព្វផ្សាយអំពីគុនខ្មែរយ៉ាងសន្ធឹកសន្ធាប់ ក៏ដូចជាតាមរយៈការបញ្ចូលគុនខ្មែរទៅក្នុងវិស័យភាពយន្ដ។ យ៉ាងណាមិញ ក្រឡែកមកមើលអ្នកប្រដាល់គុនខ្មែរមួយចំនួនវិញ គឺដូចប្រិយមិត្តបានជ្រាបដឹងខ្លះៗហើយថា ពុំសូវមានជីវភាពធូធារដូចជាតារាសិល្បៈសម្ដែង ច្រៀង នោះទេ។ ពោលគឺអ្នកខ្លះក៏ខិតខំប្រកបអាជីពយ៉ាងលំបាកលំបិនបន្ថែមទៀត ដើម្បីបង្កើនចំណូលទប់ទល់ស្ថានភាពគ្រួសារ និងបន្ដថែរក្សាស្មារតីអភិរក្សនូវសិល្បៈនៃការតស៊ូរបស់ខ្មែរមួយនេះ។

ជាមួយគ្នានោះដែរ តារាសម្ដែងស្រី ដេននី ក្វាន់ ថ្មីៗនេះ ក៏បានសម្ដែងការចំណាប់អារម្មណ៍ និងត្អួញត្អែររកជំនួយ ជួយដល់បងៗកីឡាករប្រដាល់គុនខ្មែរផងដែរ។ អ្នកនាង ថា «យប់មិញនេះនាងខ្ញំបានអញ្ជើញបងៗកំពូលកីឡាករគុនខ្មែរមក ចូលរួម ញាំបាយសាមគ្គីនៅហាងកាហ្វេវប្បធ៌ម ដើម្បីបានជជែក ក៏ដូចជាសួរនាំពីបញ្ហា ជីវភាព និង ជីវិតរស់នៅរបស់ពួកគាត់។ ក្រោយពេលបានជួបជុំពួកគាត់រួច និង បានដឹងពីជីវិត ពួកគាត់រួច នាងខ្ញុំពិតជាមានចិត្ត អាណិត និង ស្ទើរតែមិនជឿថា ជីវិត កំពូលៗ កីឡាករ គឺ លំបាកខ្លាំងណាស់ មានអ្នកខ្លះ ក្រៅពីអាជីពប្រដាល់ គឺ អ្នកខ្លះ រត់ម៉ូតូកង់បី អ្នកខ្លះ ធ្វើជាសន្តិសុខ ដើម្បីបង្កើនចំនូលបន្ថែមពីអាជីពប្រដាល់ គុនខ្មែរ» ។

រាជិនីចិត្តធម៌រូបនេះ បានបន្តពោលឡើងទៀតថា « ពួកគាត់ ទាំងអស់ នេះគឺ ហើយគឺជាអ្នកស្នងមរដក គុនខ្មែរ យកឈាមស្រស់ សាច់ស្រស់មកបង្ហូរលើសង្វៀន ដើម្បីរកប្រាក់ផ្គតផ្គង់ជីវភាពគ្រួសារ ។ ដោយមើលឃើញ បានដឹងពីដឹងពីទុកលំបាករបស់ពួកគាត់(សុទ្ឋតែជាកំពូលកីឡាករគុនខ្មែរ)ឆ្លៀតក្នុងឳកាសនោះ នាងខ្ញុំ និង ក្រុមគ្រួសារ បានផ្តល់ថវិការបន្តិចបន្តួច ជូនដល់ពួកគាត់ទាំង9នាក់ ដែលមានវត្តមាននៅក្នុងកម្មវិធី បាយសាមគ្គី គុនខ្មែរ។ ការពិតអ្វីដែលនាងខ្ញុំមានអ្វីដែលបានធ្វើទៅនេះ គឺ គ្រាន់តែចង់ចែករំលែក និង ជួយសម្រាលជីវភាពគាត់តិចតួចប៉ុណ្ណោះ ប៉ុន្តែវាជាទឹកចិត្តបរិសុទ្ឋ ដែលកើតចេញ ពីក្នុងក្រអៅបេះដូង ក្នុងនាមខ្មែរ តែមួយ ពោពេញដោយសេចក្តីអាណិត ។ ឆ្លៀតក្នុងឪកាសនេះនាងខ្ញុំសូមឱ្យបងប្អូន ដែលមានជីវភាពធូធារ រឺ ឯកឧត្តម ឧកញ៉ា ងាកមកជួយ គាំទ្រ ឧបត្ថម្ភដល់ពួកគាត់ ដែលជាអ្នកថែរក្សារមរតក គុន ខ្មែរ ពីដូនតានៃយើងផង »៕

នៅព្រឹកថ្ងៃទី19 ខែវិច្ឆិកា ឆ្នាំ 2018 ប្រតិភូ និងសិល្បករកម្ពុជា បានបញ្ចប់ដំណើរចេញសម្ដែង និងទស្សនកិច្ចយ៉ាងជោគជ័យ ក្នុងព្រឹត្តិការណ៍កន្រ្ទឹមអាស៑ាន ដែលរៀបចំដោយក្រុមកន្រ្ទឹមប្រចាំខេត្តសុរិន្ទ ប្រទេសថៃ។ តំណាងសិល្បករកម្ពុជា ត្រូវបានស្វាគមន៍យ៉ាងកក់ក្ដៅនៅក្នុងព្រឹត្តិការណ៍ ខណៈដែលតារាកម្ពុជា ក៍បានដើរតួផ្សព្វផ្សាយពីវប្បធម៌ និងអរិយធ៌របស់ខ្លួន បង្អួតភ្នែកជនជាតិថៃ និងភ្ញៀវអន្តរជាតិ ធ្វើឱ្យមានការចាប់អារម្មណ៍ពីកម្ពុជាយ៉ាងខ្លាំង។

ព្រឹត្តិការណ៍នេះត្រូវបានរៀបចំបែងចែកជាពីរដោយថ្ងៃទី16 ខែវិច្ឆិកា រៀបចំនៅខេត្តសៀមរាបប្រទេសកម្ពុជា ដោយធ្វើពិធីសែនគ្រូ និង សម្ពោធផ្ទះកន្រ្ទឹមអាស៑ានទី1 ដើម្បីផ្សព្វផ្សាយថាកន្រ្ទឹមជាសិល្បៈដើមរបស់ខ្មែរ និងដើម្បីឱ្យខ្មែរនៅគ្រប់ទិសទី និងជាតិសាសន៍ដទៃ ដែលចង់អភិរក្សកន្រ្ទឹម មកសិក្សាស្វែងយល់សិល្បៈកន្រ្ទឹមនៅផ្ទះកន្រ្ទឹមនៅសៀមរាប ដោយបើកចំហរ។ មួយថ្ងៃបន្ទាប់ នៅក្នុងប្រទេសថៃ ក៍ការរៀបចំការបង្ហាញម៉ូដ ច្រៀងរាំទ្រង់ទ្រាយធំ និងផ្សព្វផ្សាយពីកន្រ្ទឹម ដោយមានតារាខ្មែរ និងសិល្បករកន្រ្ទឹមល្បីៗនៅគ្រប់ទិសទីនៅក្នុងទូរទាំងខេត្តសុរិន្ទ និងប្រទេសថៃបង្ហាញខ្លួន។

លោក នូ សុភេន អនុប្រធាននាយកដ្ឋានផលិតកម្មវិធីប្រចាំទូរទស្សន៍អប្សរា និង លោក ផាត់ តារារដ្ឋ ស្ថាបនិក”គ្រួសារតារាកម្ពុជា” គឺជាអ្នកនាំតារាខ្មែរ និងរៀបចំទម្រង់សិល្បៈទៅផ្សព្វផ្សាយនៅទីនោះ ខណៈដែលតារានីមួយ ត្រូវបានជនជាតិថៃចាប់អារម្មណ៍ និង កោតសរសើរយ៉ាងខ្លាំង ជាពិសេសកញ្ញា រំដួលលិចទឹក និង កញ្ញា វណ្ណា វត្តី ដែលបានគ្រងឈុតតំណាងខ្មែរចូលរួមក្នុងព្រឹត្តិការណ៍នោះ។ តារាពីកម្ពុជា ត្រូវបានទទួលការស្វាគមន៍យ៉ាងកក់ក្ដៅ ពីគណកម្មការរៀបចំ និងថ្នាក់ដឹកនាំប្រចាំខេត្តសុរិន្ទ ដោយក្រៅពីការសម្ដែង ក៏មានការក៏រៀបចំពិធីជប់លៀងទទួលតារាខ្មែរ ការអញ្ជើញជាកិត្តិយសឱ្យតំណាងប្រទេស ក្នុងពិធីបុណ្យដំរីទ្រង់ទ្រាយធំ ដែលមានអ្នកទស្សនាខ្ទង់ម៉ឺននាក់ និងជូនដើរទស្សនកិច្ចក្នុងតំបន់ប្រាសាទបុរាណ កន្លែងតម្បាញសូត្រល្បីល្បាញរបស់ថៃ ទស្សនកិច្ចសារមន្ទីរអភិរក្សសិល្បៈកន្រ្ទឹម និងកន្លែងធ្វើគ្រឿងអលង្ការពីប្រាក់ និងត្បូងប្រចាំខេត្តជាដើម។

គួរបញ្ជាក់ផងដែរថា បងប្អូនខ្មែរនៅសុរិន្ទ ដែលជាម្ចាស់ដើមរបស់កន្រ្ទឹម បានប្រកាសយ៉ាងក្ដែងៗថា កន្រ្ទឹមគឺជារបស់ខ្មែរ នឹងបានកោតសរសើរពីការចូលរួមរបស់តារា និងប្រតិភូពីកម្ពុជាយ៉ាងខ្លាំង ដោយតាមគម្រោងព្រឹត្តិការណ៍នឹងធ្វើកាន់តឬធំជាងនេះទៅទៀតនៅឆ្នាំក្រោយ។ បងប្អូនខ្មែរសុរិន្ទ បញ្ជាក់នៅក្នុងព្រឹត្តិការណ៍នោះថា ខ្លួននឹងស្វាគមន៍រាល់បងប្អូនខ្មែរកណ្ដាល ខ្មែរក្រោម និងជាតិសាសន៍ទាំងឡាយដែលចង់រៀនកន្រ្ទឹម ដោយឥតគិតថ្លៃ ដើម្បីឱ្យសិល្បៈរបស់ដូនតាខ្មែរមួយនេះ ត្រូវបានអភិរក្ស។ ក្នុងការស្វាគមន៍នោះ ក៍មានពិធីបួងសួង សកម្មភាពរាំលេងបង្កើនមិត្តភាពរវាងសុរិន្ទ និងកម្ពុជា និងពិធីគួចដៃដល់តារាខ្មែរឱ្យមានសិរីសួស្ដីដែលជាប្រពៃណីរបស់ជនជាតិខ្មែរសុរិន្ទដល់តារាខ្មែរ មុនពេលចាកចេញមកកម្ពុជា យ៉ាងកក់ក្ដៅផងដែរ៕

តាមរយៈបណ្ដាញទំនាក់ទំនងសង្គមហ្វេសប៊ុករបស់លោក ខៀវ កាញ៉ារីទ្ធ រដ្ឋមន្ត្រីក្រសួងព័ត៌មាន បានសរសេរបង្ហោះថា ស្ដេចចាប៉ីដងវែង លោកតាប្រាជ្ញឈួន ដែលល្បីល្បាញក្នុងវិស័យនេះអស់ជាច្រើនឆ្នាំបានទទួលមរណភាពហើយ បើទោះជាលោកត្រូវបានកូនចៅ និងសប្បុរសជន ជ្រោមជ្រែងយកទៅសង្គ្រោះបន្ទាន់ នៅក្នុងមន្ទីរពេទ្យកាល់ម៉ែត្រយ៉ាងយកចិត្តទុកដាក់។

នេះជាការបាត់បង់សិល្បករបុរាណដ៍កម្ររបស់ខ្មែរថែមម្នាក់ទៀតហើយ បន្ទាប់ពីសាស្ត្រាចារ្យ និងអ្នកជំនាញផ្នែកបុរាណមួយចំនួន ត្រូវគេឃើញទទួលមរណភាពម្ដងមួយៗ ដោយសារជរាពាធ ស្របគ្នាដែលសិល្បៈទម្រង់បុរាណរបស់អ្នកឯកទេសទាំងនោះមិនត្រូវបានចាប់អារម្មណ៍យកមកបន្តវេណដោយក្មេងៗយុវវ័យ។ រដ្ឋមន្ត្រីក្រសួងព័ត៌មាន បានសរសេរបង្ហោះមុននេះថា« ទើបទទួលបានដំណឹងពីមរណភាពរបស់លោកតា ប្រាជ្ញឈួន នៅមុននេះបន្តិច ។ លោកទទួលមរណភាពនៅវេលាម៉ោង 1 កន្លះ យប់ចូលថ្ងៃទី17 ខែវិច្ឆិកា ឆ្នាំ2018 នេះ ក្នុងជន្មាយុ 82 ចូល 83 វស្សា »។

គួរបញ្ជាក់ដែរថា ការបង្ហោះរបស់លោក បានធ្វើឱ្យម្នាក់ៗមានការស្រយ៉ុតចិត្តយ៉ាងខ្លាំង ដោយសារតែលោកតាប្រាជ្ញ ឈួន គឺអ្នកចាប៉ីដងវែងល្បីល្បាញនៅកម្ពុជា ដែលមធ្វើឱ្យពិភពលោកទទួលស្គាល់សិល្បៈបុរាណមួយនេះថាជារបស់ខ្មែរ។ ការបង្ហោះរបស់ឯកឧត្តម ខៀវ កាញ៉ារីទ្ធ ក៏ធ្វើឱ្យលោកទទួលបាននូវការកោតសរសើរពីសំណាក់មហាជនភាគច្រើនផងដែរ ដោយសារតែលោករមែងឈឺឆ្អាល និងចូលរួមលើកស្ទួយពាក់ព័ន្ធនឹងវិស័យសិល្បៈជំនួសឱ្យតួនាទីរបស់ក្រសួងវប្បធម៍ជាប្រចាំនាពេលកន្លងមក ដែលកិច្ចការនេះ គួរតែជានាទីរបស់សាមីក្រសួងវប្បធម៌ច្រើនជាង៕

ក្នុងពិធីឡើងផ្ទះកន្រ្ទឹម អមដោយពិធីថ្វាយគ្រូ និងការសម្ដែងសិល្បៈចម្រុះពីរប្រទេសកម្ពុជា និងថៃ យ៉ាងគគ្រឹកគគ្រេង នៅតំបន់ត្រាវកុត ខេត្តសៀមរាប នៅពីថ្ងៃទី១៦ វិច្ឆិកា អ្នកនាង រិន រ័កដា ដែលរដ្ឋមន្ត្រីក្រសួងព័ត៍មាន លោក ខៀវ កាញ៉ារីទ្ធ បានឱ្យឈ្មោះថាជា រាជិនីកន្រ្ទឹម និងជាតារាកន្រ្ទឹមល្បីល្បាញរបស់ថៃ ។

អ្នកនាងថា បានអះអាងថា កន្ត្រឹមគឺជារបស់ខ្មែរតែប៉ុណ្ណោះ ហេតុផលដែលកន្រ្ទឹម ត្រូវបានល្បីល្បាញក្នុងប្រទេសថៃជាង គឺដោយសារតែបងប្អូនខ្មែរភាគច្រើនដែលជាអ្នកអភិរក្សកន្រ្ទឹម បានក្លាយជាជនជាតិលើទឹកដីថៃ ក្រោយពេលទឹកដីសុរិន្ទក្លាយជារបស់ថៃប៉ុណ្ណោះ។ អ្នកនាង រិន រ័កដា ដែលគេស្គាល់ថាតារាកន្រ្ទឹមល្បីល្បាញនៅសុរិន្ទ បានថ្លែងជនជាតិដើមខ្មែរ រស់នៅខេត្តសុរិន្ទ ប្រទេសថៃ ប្រឹងប្រែងអភិរក្សកន្រ្ទឹមខ្លាំងណាស់ ដោយក្រៅពីរួបរួមគ្នាចងក្រងសិល្បករផ្នែកកន្រ្ទឹមទាំងនៅកម្ពុជា និងនៅសុរិន្ទ បង្កើតជាផលិតកម្ម ដើម្បីអភិរក្សសិល្បៈកន្រ្ទឹមមិនអោយបាត់បង់អ្នកនាង ក៍បានចំណាយថវិកាប្រមាណជា20ម៉ឺនដុល្លារ សង់ផ្ទះកន្រ្ទឹមនៅត្រាវកុត ខេត្តសៀមរាប ដើម្បីអភិរក្សកន្រ្ទឹមរបស់ខ្មែរនោះផង។

អ្នកនាងថា ផ្ទះកន្រ្ទឹម សង់ឡើងដើម្បីទុកជាកន្លែងសិក្សា និងបង្ហាត់បង្ហាញសិល្បៈកន្រ្ទឹម ដែលមានតួនាទី ដូចគ្នានឹងសារមន្ទីរកន្រ្ទឹម និងជាសាលាបណ្ដុះបណ្ដាល ទើបអ្នកនាងសម្រេចធ្វើពិធីឡើងធំកាលពីថ្ងៃទី16 វិច្ឆិកា ដោយក្រៅពីធ្វើពិធីថ្វាយគ្រូធំដុំ ក៏មានការប្រគំតន្ត្រីកន្រ្ទឹមនាយប់នោះ។ អ្នកនាងថា កន្រ្ទឹមមិនមែនជារបស់ជនជាតិថៃទេ គឺជាកម្មសិទ្ធិរបស់ខ្មែរពិតប្រាកដ ប៉ុន្តែបណ្ដាលមកពីជនជាតិខ្មែរលើនៅសុរិន្ទ ដែលបច្ចុប្បន្នគឺជាទឹកដីថៃ ទើបបងប្អូនខ្មែរមួយចំនួន យល់ថា កន្រ្ទឹមជារបស់ថៃ។ អ្នកនាងថា ដោយសារតែចង់អភិរក្សសិល្បៈកន្រ្ទឹមអោយពិភពលោកដឹងថា សិល្បៈនេះជារបស់ខ្មែរ ទើបអ្នកនាង និងសិល្បករកន្រ្ទឹមស្ទើរទាំងអស់នៅសុរិន្ទរួមគ្នា ធ្វើផ្ទះកន្រ្ទឹមនៅត្រាវកុតនោះឡើង ដោយនឹងរៀបចំគ្រូកន្រ្ទឹមៗជើងចាស់ ឱ្យមកបង្ហាត់ដល់ជនជាតិខ្មែរ ឱ្យបានយល់ដឹងពីកន្រ្ទឹម ដើម្បីឱ្យសិល្បៈមួយនេះ នៅតែត្រូវបានរក្សាក្នុងផ្នត់គំនិតជនជាតិខ្មែរ។

ជាមួយនឹងការទម្លាយឱ្យដឹងរបស់សិល្បការិនី ដែលបានទទួលងារពីរដ្ឋមន្ត្រីក្រសួងព័ត៌មានកម្ពុជាថាជា រាជិនីកន្រ្ទឹម បានធ្វើឱ្យជនជាត់ខ្មែរកណ្ដាលភ្ញាក់ខ្លួនក្រញ៉ាងតែម្ដង ជាពិសេសអ្នកធ្លាប់យល់ថា កន្រ្ទឹមមិនមែនជារបស់ខ្មែរទេ ដោយខ្លះយល់ថាគឺជារបស់ជនជាតិថៃ ព្រោះតែកន្រ្ទឹមនៅសុរិន្ទប្រទេសថៃរីកចំរើនខ្លាំងនោះ។ អ្នកនាង រិន រ័កដា បញ្ជាក់ថា អ្នកនាងនឹងប្រមូលតារាខ្មែរកណ្ដាលឱ្យចូលរួមអភិរក្សចង្វាក់កន្រ្ទឹមខ្មែរឱ្យបានច្រើន ដោយនឹងបន្តផលិតបទចម្រៀងកន្រ្ទឹម និងផ្សព្វផ្សាយឱ្យបរទេសដឹងថា កន្រ្ទឹមមិនមែនជារបស់ជាតិសាសន៍ណាទាំងអស់ តែជារបស់ខ្មែរសុទ្ធសាធ តាំងពីទឹកដីសុរិន្ទ មិនទាន់ក្លាយជាទឹកដីថៃ។ ក្នុងពិធីនោះ គេឃើញមានការប្រគំសិល្បៈ និងសម្ដែងរបាំ ពីសិល្បករល្បីៗមកពីសុរិន្ទ និងពីភ្នំពេញ ដល់យប់ជ្រៅ៕

តាមរយៈបណ្ដាញសង្គមហ្វេសប៊ុកនៅពេលមុននេះបន្តិច បានឱ្យដឹងថា ព្រឹទ្ធាចារ្យចាប៉ីដងវែងដ៏ល្បាញល្បីរបស់កម្ពុជា លោកតា ប្រាជ្ញ ឈួន បានទទួលមរណភាពហើយ នៅម៉ោងប្រមាណជាង 1 រំលងរំលងអាធ្រាត្រឈានចូលថ្ងៃទី17 ខែវិច្ឆិកា ឆ្នាំ2018 ក្នុងជន្មាយុ 82ឆ្នាំ ដោយជរាពាធ ។

បន្ទាប់ពីក្រុមគ្រួសារបានយកមកសម្រាកព្យាបាលនៅមន្ទីរពេទ្យកាល់ម៉ែតអស់ជាច្រើនថ្ងៃមក។ សពលោកតា ប្រាជ្ញ ឈួន ត្រូវបានក្រុមគ្រួសារយកទៅតម្កល់ធ្វើបុណ្យតាមប្រពៃណីព្រះពុទ្ធសាសនានៅវត្តបទុមវតី ក្រោមការឧបត្ថម្ភរបស់សម្តេចព្រះមហាសុមេធាធិបតី នន្ទ ង៉ែត សម្តេចព្រះសង្ឃនាយក នៃព្រះរាជាណាចក្រកម្ពុជា និងជាសម្តេចព្រះចៅអធិការវត្តបទុមវតី៕