Author: អេបិល

ទីបំផុត!! តារាស្រី Lisa BLACPINK គ្រងតំណែងអ្នកតាមដានច្រើនជាងគេនៅលើអ៊ីនស្ដាក្រាម
ថ្មីនេះមានការភ្ញាក់ផ្អើលបំផុត ខណៈដែលបានឃើញអ៊ីនស្ដាក្រាមរបស់តារាចម្រៀងស្រីវ័យក្មេងនៅក្នុងក្រុម BLACPINK គឺ Lisa BLACPINK ដែលនាងគឺជា ជនជាតិថៃប្រលូកសិល្បៈKPOP។ អ្វីដែលធ្វើឱ្យមហាជនអ្នកគាំទ្រចម្រៀង KPOP ចំហមាត់ថ្លុងនោះគឺ តារាស្រីរូបនេះ មានអ្នកតាមដាននៅលើអ៊ីនស្ដាក្រាមដល់ទៅ 13.2 លាននាក់ ដែលយកឈ្នះកំពូលតារាស្រីកូរ៉េ Taeyeon មានអ្នកតាមដានត្រឹមតែ 12.9 លាននាក់ប៉ុណ្ណោះ។
តារាសម្រៀងកូរ៉េជនជាតិថៃរូបនេះ មានឈ្មោះពិត ลลิสา มโนบาล ( លីហ្សា មៈណូបាន ) ហើយត្រូវបានមហាជនជាច្រើននិយាយថា ជាតារាចម្រៀងប្រជាប្រិយ និងទទួលបានភាពល្បីល្បាញខ្លាំងជាងគេប្រចាំក្រុម ហើយរឿងរ៉ាវរបស់នាង តែងតែនៅជាចំណុចដ៏ចាប់អារម្មណ៍ខ្លាំងរបស់អ្នកគាំទ្រ។ នាងធ្លាប់រងសម្ពាធពីអ្នកគាំទ្រូកូរ៉េ ដែលទទូចចង់ឱ្យបាងចាកចេញពីក្រុម។
គួររំឭកផងដែរថា ក្រុមចម្រៀងកូរ៉េដ៏ល្បី Black Pink បានមកប្រគំតន្ត្រីដ៏ធំរយៈពេលបីថ្ងៃនៅប្រទេសថៃ ចាប់ពីថ្ងៃទី 11 ដល់ថ្ងៃទី13 ខែមករា ឆ្នាំ 2019 នេះ ។ ព្រឹត្តិការណ៍ប្រគំតន្ត្រីរបស់ក្រុមចម្រៀងស្រីខាងលើ បានប្រារព្ធឡើងដោយជោគជ័យក្រោមការចូលរួមពីទស្សនិកជនយ៉ាងច្រើនផុសផុល មិនតែប៉ុណ្ណោះ សូម្បីតែសិល្បករល្បីៗលំដាប់ជួរមុខប្រចាំប្រទេសថៃ ក៏បាននាំគ្នាចូលរួមដែរ ។ ក្នុងនោះដែរ ដើម្បីលើកទឹកចិត្តដល់តារាចម្រៀង Lisa កូនស្រីពៅក្នុងក្រុម BLACPINK មានតារាសិល្បករថៃជាច្រើនដួងមានដូចជា ប៊េឡា រ៉ានី តារាសម្ដែង Taew Natapohn នាង Mew Nittha តារាស្រី Mint Chalida តារាប្រុស Boy Pakorn ព្រមទាំងតារាល្បីៗជាច្រើនដួងទៀត បាននាំគ្នាសម្ដែងនូវអារម្មណ៍រំភើបយ៉ាងខ្លាំងក្នុងការចូលរួមប្រគំតន្ត្រីនេះ ជាពិសេសពួកគេក៏បានជួប និង ផ្ដិតយករូបភាពយ៉ាងស្និទ្ធស្នាលជាមួយតារាចម្រៀង Lisa ទៀតផង ។ តារាសិល្បថៃថា នាងគឺសិល្បករកម្លាំងចិត្តមួយរូប ដែលហ៊ានពង្រឹងជំហ៊ាននៅលើវិថីសិល្បៈបរទេស និងជាគំរូបមួយសម្រាប់តារាសិល្បករថៃ៕

January 15, 2019
រិទ្ធ អូមេហ្គា អ្នកដឹកនាំសម្ដែងនៅផលិតកម្មថោនត្រូវគេគំរាមបាញ់សម្លាប់
ជារឿងភ្ញាក់ផ្អើល ខណៈដែលអ្នកដឹកនាំសម្ដែងនៅផលិតកម្មថោន រិទ្ធ អូមេហ្គា បានLive វីដេអូកាលពីយប់មិញថា ក្មេងពាលមួយក្រុមបានកាប់បុគ្គលិកលោកបែកមួកសុវត្ថិភាពជាពីរ ក្រោយចេញពីធ្វើការនៅកោះពេជ្រ វេលាម៉ោង3ទៀបភ្លឺនាថ្ងៃទី12 ខែមករា ឆ្នាំ2019កន្លងទៅថ្មីៗនេះ។ លោកថា បើសិនជាគាត់គ្មានមួកសុវត្ថិភាពការពារទេនោះប្រហែលជាស្លាប់ហើយពេលនេះ។
លោក រិទ្ធ អូមេហ្គា ថាជនបង្កហេតុខាងលើបានគំរាមបាញ់សម្លាប់លោកថែមទៀតផង ដោយពួកគេបានបោះពាក្យសម្ដីមកលើកូនចៅថា«ពួកហែងត្រៀមធាតុត្រៀមកោដ្ឋឲ្យហើយទៅ»។ លោកថា រឿងកើតឡើងចំពោះលោកនិងកូនចៅកើតឡើងដោយសារតែការប្រជែងរឿងរកស៊ី។ អ្នកដឹកនាំសម្ដែងមួយនេះ បញ្ជាក់ថា « មួយទៀត ឮអ្នកឯងថាចង់បាញ់ខ្ញុំបំបាក់ជើងមែន? អាងអី? អ្នកឯងកំពុងមើលងាយសមត្ថកិច្ចមើលងាយរាជជរដ្ធាភិបាល នឹង ច្បាប់ក្នុងប្រទេសកម្ពុជាហើយ នឹងថ្នាក់ដឹកនាំហើយ។ ប្រយ័ត្នពាក្យសម្តីអ្នកឯង នឹងទង្វើអ្នកឯង សូមកុំបំពានមកខ្ញុំនឹងហាងខ្ញុំទៀត ខ្ញុំរកស៊ីសុំតែម៉ាសុខ នឹងរកស៊ីដោយសុច្ចរឹត ប្រឹងបង្កើតអ្វីដែលជាគំនិតខ្លួនឯង។ ខ្ញុំបានដាក់ពាក្យបណ្តឹងបង្កក់ហើយៗ បើខ្ញុំ នឹងគ្រួសារខ្ញុំមានបញ្ហាអីកើតឡើងគឺខាងអ្នកឯងជាអ្នកបង្ក។ ព្រោះខ្ញុំជាប្រជាពលរដ្ធស្លូតត្រង់ តែងតែជួយការងារសង្គម នឹងសប្បុរសធម៌ មិនដែលដើរបង្ករជំលោះអ្នកណា រឺចារឹកពាលចង់សំលាប់អ្នកណាដូចអ្នកឯងទេ។ សំខាន់ប្រទេសមានច្បាប់ !!! »។
គួរបញ្ជាក់ផងដែរថា បន្ទាប់ពីជួបហេតុការណ៍ដូច្នេះ រិទ្ធ អូមេហ្គា និងកូនចៅបានទៅដាក់ពាក្យប្ដឹងជនល្មើសរួចរាល់ហើយដើម្បីចាត់ការទៅតាមផ្លូវច្បាប់ ដោយខាងលោក បានថតរថយន្ត និងសកម្មភាពជនបង្ករហេតុទុកជាភ័ស្ដតាងផងដែរ។ រិទ្ធ អូមេហ្គា បានរៀបរាប់ថា ចំពោះអត្តសញ្ញាណមេធំនៅពីក្រោយការគំរាមបាញ់សម្លាប់នេះលោក សុំលាក់សិនគ្រប់យ៉ាងនឹងបង្ហាញក្នុងពេលឆាប់ព្រោះរឿងនេះបានទៅដល់ដៃសមត្ថកិច្ចហើយ៕
January 14, 2019
តារាសម្ដែងលីលី ចេញវីដេអូប្រកាសស្វែងរកស្ត្រីដែលខ្លួនជួយសម្រាលកូនកណ្តាលផ្លូវ
នៅលើបណ្តាញសង្គមហ្វេសប៊ុកនៅរាត្រីថ្ងៃទី 12 ខែមករា នេះ មានការសរសើរមិនដាច់ពីមាត់ ក្រោយពេលបានឃើញស្រីស្អាតម្នាក់ជួយបង្កើតកូនឱ្យស្ត្រីអនាថាម្នាក់ នៅតាមដងផ្លូវត្រូវប្រជាពលរដ្ឋធ្វើដំណើរ នៅតាមដងផ្លូវ ស្ថិតនៅតាមបណ្តោយផ្លូវ៣១៥កែង និងផ្លូវ៥១៦ ជាប់និងផ្សារធីខេ ក្នុងសង្កាត់បឹងកក់១ ខណ្ឌទួលគោក។ ឃើញហេតុការនេះភ្លាមៗ ម្នាក់ៗបាននាំគ្នា ជួយសង្គ្រោះបឋម រហូតជួយបង្កើតបានសម្រេច។ ក្រោយពីផ្ទុះរឿងដ៏ប្រពៃនេះ ពេលនេះបានដឹងច្បាស់ហើយថា កញ្ញាស្រស់ស្អាតម្នាក់នោះគឺជាតារាសម្ដែង លីលី ជាតួសំខាន់នៅក្នុងរឿង «កាំបិតមុខ2» របស់ផលិតកម្មមហាហង្ស ដែលត្រៀមដាក់បញ្ចាំងឆាប់ៗនេះ។
ហើយថ្មីៗតារាស្រីខាងលើនេះ ក៏បានចេញវីដេអូប្រកាសស្វែងរក ស្ត្រីអនាថាខាងលើ ដោយរៀបរាប់ថា »នាងខ្ញុំ លីលី សូមប្រកាសស្វែងរកដំណឹងបងស្រីដែលនាងខ្ញុំបានជួយសម្រាលកូនយប់មិញនៅតាមចញ្ចើមផ្លូវផង ដោយសារតែអាណិតនិងឃើញបងស្រីខ្វះខាតផងនោះ។ នាងខ្ញុំ លីលី និងម្ចាស់ផលិតកម្ម មហាហង្ស លោក អ៊ិន សុភិន និងតួសំដែងក្នុង រឿង “កាំបិតមុខ2” បានមានបំណងធ្វើមូលនិធិសប្បុរសធម៌ ដើម្បីយកទៅជួយបងស្រីនិងកូនស្រី។ បើពុកម៉ែបងប្អូនណាមាន បំណងចង់ជួយចូលមូនិធិទៅកាន់បងស្រី អាចទំនាកទំនងមកកាន់ហ្វេសប៊ុកនាងខ្ញុំផ្ទាល់Lyly Yaka Il ឬក៏អាចទំនាក់ទំនង តាមរយៈផលិតកម្ម មហាហង្ស ក៏បាន។ នេះគឺលេខទូរស័ព្ទ នាងខ្ញុំផ្ទាល់ 086223355 060223355 ហើយសូមឱ្យបងប្អូនជួយធ្វើការ share បន្តផង»៕

January 14, 2019
ប្រទេសជប៉ុនត្រូវការកម្លាំងពលកម្មបន្ថែមទៀតពីកម្ពុជា ក្នុងឆ្នាំ2019
ឧស្សាហកម្មជប៉ុននឹងមានតម្រូវការកម្លាំងពលកម្មបន្ថែមទៀតពីប្រទេសជាដៃគូក្នុងការបញ្ជូនពលករទៅកាន់ប្រទេសជប៉ុន ក្នុងនោះកម្ពុជាក៏ជាដៃគូមួយដែរ ដែលគ្រោងនឹងបញ្ជូនពលករ-ពលការិនីបន្ថែមទៅធ្វើការនៅប្រទេសជប៉ុនផងដែរ។ នេះបើតាមព័ត៌មានឱ្យដឹងក្នុងជំនួបកិច្ចពិភាក្សាការងារជាមួយនឹងមន្រ្តីតំណាងពីប្រទេសជប៉ុន និងរដ្ឋមន្រ្តីក្រសួងការងារ។
ក្នុងជំនួបពិភាក្សាការងាររវាងលោក មីគី វ៉ាតាណាបេ (Miki Watanabe) ប្រធានគណៈកម្មាធិការអចិន្រៃ្តយ៍សភាកិច្ចការបរទេស និងការពារជាតិនៃរដ្ឋសភាជប៉ុននៅទីស្តីការក្រសួង ឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា នៅពេលខាងមុខនឹងមានក្រុមហ៊ុនជប៉ុនមកបើកជាបន្តបន្ទាប់ដើម្បីបណ្តុះបណ្តាល និងងាយស្រួលបញ្ជូនកម្មសិក្សាការីពីកម្ពុជាទៅប្រទេសជប៉ុន ខណៈដែលរដ្ឋាភិបាលជប៉ុនបានកែប្រែច្បាប់ថ្មី។
ឯកឧត្តមរដ្ឋមន្រ្តីបានបញ្ជាក់ថា ក្រុមហ៊ុនខាងលើ គឺជាក្រុមហ៊ុនចម្រុះខាងផ្នែកឧស្សាហកម្ម និងផ្នែកសេវាកម្ម ដែលបច្ចុប្បន្ន ក្រុមហ៊ុននេះបានគ្រប់គ្រងបុគ្គលិកប្រមាណ 2ម៉ឺននាក់នៅប្រទេសជប៉ុន កំពុងត្រូវការកម្លាំងបន្ថែមទៀត។ ប្រទេសជប៉ុនបានចាប់ផ្តើមរៀបចំបង្កើតឱ្យមានគម្រោងថ្មីសម្រាប់បង្កើនលំហូរនៃកម្លាំងពលកម្មពីប្រទេសផ្សេងៗ និងសម្រាប់អនុវត្តនៅអំឡុងខែមេសា ឆ្នាំ2019ខាងមុខនេះ ដើម្បីដោះស្រាយបញ្ហាកង្វះកម្លាំងពលកម្មជំនាញនៅប្រទេសជប៉ុន។
ឯកឧត្តម អ៊ិត សំហេង បានបញ្ជាក់បន្ថែមថា៖ ដើម្បីអនុវត្តគម្រោងថ្មីនេះបាន នាពេលខាងមុខរដ្ឋាភិបាលប្រទេសទាំង2 (កម្ពុជា-ជប៉ុន) ពិសេសក្រសួងការងារកំពុងរៀបចំឱ្យមានការចុះកិច្ចព្រមព្រៀងសហប្រតិបត្តិការជាមួយក្រសួងពាក់ព័ន្ធរបស់ប្រទេសជប៉ុន ដើម្បីអនុវត្តនូវប្រព័ន្ធថ្មី និងច្បាប់ថ្មីរបស់ភាគីជប៉ុន។ គិតមកដល់ពេលនេះ កម្ពុជាមានកម្មសិក្សាការីចេញទៅធ្វើការនៅប្រទេសជប៉ុនចំនួន ប្រមាណជាង 9ពាន់នាក់។
ឯកឧត្តមបន្តថា ជាមួយគ្នានេះ ប្រទេសជប៉ុនបាននិងកំពុងរៀបចំឱ្យមានសេចក្តីព្រាង និងកិច្ចព្រមព្រៀងសហប្រតិបត្តិការជាមួយបណ្តាប្រទេសដែលបញ្ជូនពលករទាំងអស់ និងបានអនុញ្ញាតឱ្យបញ្ជូនទាំងកម្មសិក្សាការីបច្ចេកទេស និងអ្នកធ្វើការជំនាញបច្ចេកទេសទៅកាន់ប្រទេសជប៉ុនផងដែរ។ ក្រសួងការងារ និងបណ្តុះបណ្តាលវិជ្ជាជីវៈបានសហការជាមួយមន្ត្រីជំនាញនៃប្រទេសជប៉ុន ដើម្បីពិនិត្យ និងរៀបចំឱ្យមានកិច្ចព្រមព្រៀងសហប្រតិបត្តិការជាមួយគ្នា ក្នុងគោលបំណងដើម្បីបង្កើនទីផ្សារការងារ និងឱកាសការងារដល់ប្រជាជនកម្ពុជា។
សូមបញ្ជាក់ថា នៅក្នុងចំណោមប្រទេសជាដៃគូរបស់ប្រទេសជប៉ុនដែលបានបញ្ជូនពលករទៅធ្វើការនៅទីនោះមានចំនួន 15ប្រទេសហើយ។ ក្នុងចំណោមប្រទេសដែលបានបញ្ជូនពលករទៅប្រទេសជប៉ុនពីលេខ1 រហូតដល់15 ប្រទេសកម្ពុជាឈរនៅលេខរៀងទី7៕
January 14, 2019
ដូចការគ្រោងទុក ឆ្នាំ2019 ក្រុមហ៊ុន Air China ចាប់ផ្តើមហោះហើរត្រង់មកកម្ពុជា
ក្រុមហ៊ុនអាកាសចរណ៍ Air China បានចាប់ផ្តើមហោះហើរត្រង់ពីទីក្រុងប៉េកាំងរបស់ប្រទេសចិនមកកាន់ទីក្រុងភ្នំពេញ ដូចការគ្រោងទុកនៅខែមករា ឆ្នាំ2019 នេះហើយ បន្ទាប់ពីមានការពន្យារពេលកាលពីពេលកន្លងមក។ ជើងហោះហើរត្រង់នេះ គឺជាការចាប់ផ្តើមនៃការហោះហើរដោយផ្ទាល់ដំបូងនៃការតភ្ជាប់ទីក្រុងប៉េកាំងមកកាន់ទីក្រុងភ្នំពេញ ដែលមានការហោះហើរ 3ជើងក្នុង1សប្តាហ៍ (ថ្ងៃច័ន្ទ ថ្ងៃពុធ និងថ្ងៃសៅរ៍)
យោងតាមហ្វេសប៊ុកផ្លូវការ Cambodia Airports បានចុះផ្សាយនៅថ្ងៃទី8 ខែមករា ឆ្នាំ2019កន្លងមកនេះបានលើកឡើងថា “[ក្រុមហ៊ុនអាកាសចរណ៍ថ្មី] សូមស្វាគមន៍មកកាន់ជើងហោះហើរដំបូងរបស់ Air China ដែលបានមកដល់កាលពីម្សិលមិញនៅក្នុងអាកាសយានដ្ឋានអន្តរជាតិភ្នំពេញ។
លោក ខែក នរិន្ទដា ប្រធានទំនាក់ទំនងសាធារណៈនៃអាកាសចរណ៍កម្ពុជា ធ្លាប់បានបញ្ជាក់ឱ្យដឹងថា ក្រុមហ៊ុនអាកាសចរណ៍ Air China នឹងប្រតិបត្តិការយន្តហោះចំនួន3 ដែលមានបំពាក់ទង់ជាតិចិន ដោយហោះហើរត្រង់ពីទីក្រុងប៉េកាំង មកទីក្រុងភ្នំពេញចំនួន 3លើកក្នុង 1សប្តាហ៍ចាប់ពីថ្ងៃទី7 ខែមករា ឆ្នាំ2019 នេះ។ នៅពេលក្រុមហ៊ុនដាក់ឱ្យដំណើរការហើយនោះ ចំនួនយន្តហោះនឹងកើនឡើងអាស្រ័យលើតម្រូវការ។
មន្ត្រីអាកាសចរណ៍ស៊ីវីលបានឱ្យដឹងថា អាកាសយានដ្ឋានអន្តរជាតិខេត្តព្រះសីហនុបច្ចុប្បន្នគ្រប់គ្រងជើងហោះហើរពី15 ទៅ 20ដងក្នុងមួយសប្ដាហ៍។ អាកាសយានដ្ឋានអន្តរជាតិខេត្តសៀមរាបមានជើងហោះហើរពី60 ទៅ70លើក និងរាជធានីភ្នំពេញមានជើងហោះហើរលើសពី 80លើក។ លោកបានប៉ាន់ប្រមាណថា ប្រហែលពាក់កណ្តាលនៃជើងហោះហើរនៅក្នុងអាកាសយានដ្ឋានសំខាន់ៗចំនួន3 របស់ប្រទេសកម្ពុជាកំពុងតែមានជើងហោះហើរមកពីប្រទេសចិន ឬហោះទៅកាន់ប្រទេសចិន។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានឱ្យដឹងថា ទោះបីសព្វថ្ងៃមានការហោះហើរត្រង់ពីប្រទេសចិនមកម្ពុជាជាង 10ក្រុមហ៊ុនរួចហើយក្ដី តែជើងហោះហើរត្រង់ថ្មីនេះ នឹងស្រូបយកភ្ញៀវទេសចរចិនកាន់តែច្រើនមកកម្ពុជា ព្រោះថា ខេត្តនីមួយៗរបស់ប្រទេសចិន មានមនុស្សរស់នៅរាប់លាននាក់។ លោកមានប្រសាសន៍ថា «វាក៏ផ្ដល់ភាពងាយស្រួល សម្រាប់ប្រជាជនកម្ពុជាផងដែរ ស្របពេលដែលសព្វថ្ងៃ ប្រជាជនកម្ពុជាបានចេញទៅកម្សាន្តនៅប្រទេសចិនកាន់តែច្រើនឡើង»។
លោកបញ្ជាក់ដែរថា ក្រៅពីផ្ដល់ភាពងាយស្រួលហើយ សម្រាប់ភ្ញៀវទេសចរចិនមកកាន់កម្ពុជា វាជាការបង្ហាញពីទំនាក់ទំនងដ៏ល្អរវាងប្រទេសទាំង2 ក៏ដូចជាទាក់ទាញអ្នកវិនិយោគចិនមកកម្ពុជាបន្ថែម «ការតភ្ជាប់ត្រង់នាពេលខាងមុខនេះ មិនត្រឹមតែជំរុញឱ្យមានភ្ញៀវទេសចរចិនមកកម្ពុជាមានការកើនឡើងនោះទេ តែវាថែមទាំងនាំពាណិជ្ជករ និងការវិនិយោគបន្ថែមមកកម្ពុជាផងដែរ ដែលជាកត្តាជំរុញកំណើនសេដ្ឋកិច្ចកម្ពុជាឱ្យកាន់តែប្រសើរផងដែរ។
លោក ហូ វណ្ឌី បានបញ្ជាក់ដែរថា រាល់ការតភ្ជាប់ត្រង់ពីទីក្រុងធំៗមកកាន់កម្ពុជា សុទ្ធតែជាចំណុចវិជ្ជមាន យើងស្វាគមន៍ទាំងអស់ឱ្យតែមានការហោះហើរត្រង់មកកម្ពុជា មកកាន់តែច្រើន កាន់តែល្អ។ លោកបន្ថែមថា «ការហោះហើរត្រង់ពីទីក្រុងប៉េកាំងក៏ដូចជាទីក្រុងធំៗដទៃទៀតដែរ សុទ្ធតែផ្ដល់ផលចំណេញជាច្រើនដល់កម្ពុជា ជាពិសេសការចំណាយរបស់ភ្ញៀវទេសចរ ដោយពួកគេមិនបានចំណាយថវិកានៅប្រទេសណាមួយនៅពេលមានការឈប់សំចតនោះទេ ដោយថវិកាទាំងអស់នឹងត្រូវចំណាយនៅប្រទេសកម្ពុជា»។
យោងតាមរបាយការណ៍ពីក្រសួងទេសចរណ៍បានឱ្យដឹងថា ជនជាតិចិនជាង1,44លាននាក់បានមកធ្វើទស្សនកិច្ចនៅកម្ពុជាក្នុងរយៈពេល 9ខែនៃឆ្នាំ2018។ ចំនួនអ្នកដំណើរឆ្លងកាត់ព្រលានយន្តហោះអន្តរជាតិទាំង3 នៅក្នុងព្រះរាជាណាចក្រកម្ពុជាបានកើនឡើងដល់10,4 លាននាក់កាលពីឆ្នាំ2018៕
January 14, 2019
Yoshida ជំរុញឱ្យជប៉ុនបន្ថែមភាពមុតស្រួច ខណៈកាតា រកបាន 6គ្រាប់លើកូរ៉េខាងជើង
ខ្សែការពារ Maya Yoshida ប្រធានក្រុមនៃក្រុមបាល់ទាត់ជម្រើសជាតិជប៉ុន បានទទួលស្គាល់ថា ក្រុមមានរហស្សនាមថា Blue Samurai មួយនេះ ត្រូវតែបង្ហាញពីភាពមុតស្រួចបន្ថែមទៀត ខណៈដែលពួកគេបានយកឈ្នះលើក្រុមជម្រើសជាតិអូម៉ង់ ក្នុងលទ្ធផល 1-០ ដើម្បីឈានទៅវគ្គ 16ក្រុមចុងក្រោយនៃយុទ្ធនាការ Asian Cup កាលពីថ្ងៃអាទិត្យ។
ការស៊ុតបាល់ប៉េណាល់ទី 1គ្រាប់ដ៏ចម្រូងចម្រាសពីខ្សែបម្រើ Genki Haraguchi បានជួយឱ្យក្រុមម្ចាស់ជើងឯក 4សម័យកាលមួយនេះ ឈានទៅវគ្គ 16ក្រុមចុងក្រោយ ក្រោយពីការបង្ហាញទម្រង់លេងដ៏ត្រដាបត្រដួសមួយ ដែលបានធ្វើឱ្យ Yoshida ត្អូញត្អែរពីការខ្វះភាពមុតស្រួចរបស់ក្រុមខ្លួននៅក្នុងទីក្រុង Abu Dhabi។
ក្រោយពីក្រុមជប៉ុន ដណ្តើមបានជ័យជម្នះ 2លើកជាប់ៗគ្នា ក្នុងការប្រកួតពូល F កីឡាករ Yoshida បានឱ្យដឹងថា៖ «យើងត្រូវតែមានភាពមុតស្រួចជាងមុន។ យើងគួរតែបានស៊ុតបាល់បញ្ចូលទី 2គ្រាប់ ឬច្រើនជាងនេះ។ នោះគឺជាមូលហេតុដែលយើងបានជួបការលំបាកនៅរយៈពេល 10នាទីចុងក្រោយ។ វាតែងតែលំបាក នៅពេលដែលអ្នកនាំមុខ 1-០ ហើយខ្សែការពារ ត្រូវតែរក្សាការនាំមុខនោះ»។
Yoshida ក៏មានអារម្មណ៍ថា សំណាងបានធ្លាក់ទៅលើក្រុមជម្រើសជាតិជប៉ុន ដែលបានទទួលបាល់ប៉េណាល់ទី 1គ្រាប់ នៅពេលដែល Haraguchi ត្រូវបានធ្វើឱ្យដួលក្នុងប្រអប់គ្រោះថ្នាក់ និងគេចផុតពីការពិន័យនៅពេលដែលខ្សែការពារ Yuto Nagatomo បានយកដៃប៉ះបាល់ នៅមុនពេលបញ្ចប់តង់ទី1។ ក្រុមជម្រើសជាតិជប៉ុន នឹងត្រូវប៉ះជាមួយនឹងក្រុមជម្រើសជាតិអារ៉ាប៊ីសាអ៊ូឌីត ឬកាតា ក្នុងវគ្គ 16ក្រុមចុងក្រោយ ខណៈដែលក្រុមម្ចាស់ផ្ទះ World Cup ឆ្នាំ2022 មួយនេះ បានយកឈ្នះលើក្រុមកូរ៉េខាងជើង ក្នុងលទ្ធផល 6–០ ដើម្បីកក់កៅអីទៅវគ្គ 16ក្រុមរួចជាស្រេច កាលពីថ្ងៃអាទិត្យ៕

January 14, 2019
អ្នកនាង ចនច័ន្ទ លក្ខិណា និយាយចំៗក្រោយនាយទុយចេញវីដេអូបកស្រាយ
ក្រោយពីផ្ទុះការសង្ស័យថា តារាសម្ដែងនិងជាពិធីករល្បីឈ្មោះ លោក អ៊ឹង រដ្ឋា ហៅទុយ ប្រើប្រាស់គ្រឿងញៀន ខណៈកំពុងនិយាយក្នុងការ Live Video នៅលើបណ្ដាញសង្គមហ្វេសប៊ុកនៅពេលថ្មីៗកន្លងទៅនេះ ភ្លាមៗស្រាប់តែគេឃើញថា អ្នកនាង ចន ច័ន្ទល័ក្ខិណា ចេញសារបញ្ជាក់អំពីរឿងរបស់លោកផងដែរ។
អ្នកនាង ចនច័ន្ទ បានលើកឡើងថា « តាមរយះការបកស្រាយវិដេអូនេះហើយនៅមានការលើកមតិជាច្រើនដែលជាចំណុចអវិជ្ជមាន បើគាត់ហ៊ានពិនិត្យទឹកនោមដើម្បីបកស្រាយបញ្ជាក់ការពិតឱ្យបងប្អូនដែលចង់ដឹងរឿងរបស់គេអស់ចិត្តតើបងប្អូនមានអ្វីឱ្យគាត់វិញ ？ ឱ្យលុយឱ្យផ្ទះ ឱ្យការងារមានប្រាក់ខែដល់គាត់ឬ ？ ខ្ញុំមិនកាន់ជើងនិងគាំទ្រលើកទឹកចិត្តអ្នកប្រើប្រាស់គ្រឿងញៀនទេ តែខ្ញុំនិយាយតាមការបកស្រាយរបស់គាត់គឺគាត់បាននិយាយហើយ តែមតិរបស់មនុស្សមួយចំនួនគឺចូលចិត្តដេញជើងនិងជាន់គេណាស់ »។
ប្រធានសមាគមសិល្បករខ្មែររូបនេះ បានបន្ដថា « តាមរយះរឿងរ៉ាវមួយចំនួនកន្លងមកគឺបើបុគ្គលណាធ្វើអ្វីមួយឆ្គាំឆ្គង ហើយបុគ្គលនោះបានបកស្រាយសុំទោសជាសាធារណះ នៅតែឃើញមានមតិជាច្រើនដែលមិនទទួលស្គាល់យល់ព្រមនូវការសុំទោសទាំងនោះ ។ បញ្ជាក់ថាប្រជាជនយើងមួយចំនួនគ្មានការអធ្យាស្រ័យជនមានកំហុសដែលដឹងខុសនោះទេ ។ សួរថាពួកអ្នកជាអ្វីបានជាត្រូវបញ្ជារឱ្យគេធ្វើតាមការចង់បានរបស់ខ្លួន ？ទំនេរណាស់មនុស្សមួយចំនួន សម្បូរពេលវិភាគរឿងគេណាស់ ហើយក៏ចូលចិត្តរុញមនុស្សឱ្យស្លាប់ដែរ »៕

January 14, 2019
គ្រូបង្វឹក៖ Serena ត្រៀមខ្លួនរួចរាល់សម្រាប់ការឈ្នះពាន Grand Slam ជាលើកទី1 ក្នុងនាមជាម្តាយម្នាក់
កីឡាការិនីវាយកូនបាល់ Serena Williams បានត្រៀមខ្លួនរួចរាល់ហើយសម្រាប់ការឈ្នះពានកម្មវិធី Grand Slam ជាលើកទី1 របស់នាងក្នុងនាមជាម្តាយម្នាក់ ក្រោយពីបានធ្វើដំណើរទៅប្រកួតក្នុងព្រឹត្តិការណ៍ Australian Open ក្នុងលក្ខខណ្ឌដ៏ល្អបំផុតរបស់នាង ចាប់តាំងពីការវិលពីសម្រាកពីមាតុភាព។ នេះបើយោងតាមគ្រូបង្វឹករបស់នាង គឺលោក Patrick Mouratoglou។
គ្រូបង្វឹកសញ្ជាតិបារាំងលោក Mouratoglou ដែលបានជួយឱ្យ Serena ឈ្នះពាន 10លើកចុងក្រោយក្នុងចំណោមពាន Grand Slam 23 របស់នាងនោះ មានអារម្មណ៍ថា កីឡាការិនីសញ្ជាតិអាមេរិករូបនេះ បានស្ថិតក្នុងភាពរឹងមាំគួរសមហើយ នៅពេលដែលនាងបានឈានទៅវគ្គផ្តាច់ព្រ័ត្រនៃព្រឹត្តិការណ៍ Wimbledon និង US Open កាលពីឆ្នាំមុន។
ប៉ុន្តែ ទោះបីជាយ៉ាងណា ភាពរឹងមាំរបស់នាងចាប់តាំងពីពេលនោះមក បានឈានដល់កម្រិតដ៏គួរឱ្យកត់សម្គាល់ ហើយកំណត់ត្រានៃការឈ្នះពាន Grand Slam ចំនួន 24 ដែលត្រូវបានបង្កើតឡើងដោយកីឡាការិនី Margaret Court អាចនឹងត្រូវតាមស្មើនៅលើទីលាន Melbourne Park។ នេះបើយោងតាមការអះអាងរបស់លោក Mouratoglou។
លោកបានប្រាប់អ្នកយកព័ត៌មានក្នុងសម្ភាសមួយថា៖ «ដំបូងឡើយ កាលពីឆ្នាំមុន នាងបានបង្កើតការខិតខំព្យាយាមដ៏អស្ចារ្យមួយ ដើម្បីវិលទៅកាន់ភាពខ្លាំងបំផុត ក្រោយពីបានសម្រាលកូន ហើយនាងបានវិលទៅរកភាពខ្លាំងយ៉ាងឆាប់រហ័ស»។
គ្រូបង្វឹករូបនេះបានបន្ថែមទៀតថា៖ «នាងមានបញ្ហាជាច្រើនទាក់ទងនឹងសុខភាព ក្រោយពីសម្រាលកូន ប៉ុន្តែនាងពិតជាមិនបានស្ថិតក្នុងកម្រិតខ្លាំង 100ភាគរយឡើយ។ នាងបានឈានទៅកាន់វគ្គផ្តាច់ព្រ័ត្រ 2លើកក្នុង Grand Slam។ នាងបានបង្ហាញពីភាពរឹងមាំ។ ប៉ុន្តែ ពេលនេះនាងមានភាពរឹងមាំវិញហើយ»៕

January 14, 2019
ផ្លូវក្រវាត់ក្រុងតម្លៃជិត $300លានដែលប្រជាជនជុំវិញរាជធានីទន្ទឹងរង់ចាំបានបើកការដ្ឋានសាងសង់ហើយនៅព្រឹកនេះ…
ផ្លូវក្រវាត់ក្រុងខ្សែទី3 ប្រវែង 53គីឡូម៉ែត្រឆ្លងកាត់រាជធានីភ្នំពេញ និងខេត្តកណ្តាលគ្រោងនឹងចំណាយថវិកាសាងសង់ប្រមាណជិត 300លានដុល្លារអាមេរិកត្រូវបានបើកការដ្ឋានសាងសង់នៅព្រឹកថ្ងៃទី14 ខែមករា ឆ្នាំ2019 នេះហើយ។
ផ្លូវក្រវាត់ក្រុងថ្មីនេះមានទីតាំងស្ថិតនៅតាមបណ្តោយផ្លូវជាតិលេខ4 ដល់ផ្លូវជាតិលេខ1 ដោយភ្ជាប់ភូមិសាស្ត្រខេត្តកណ្តាល និងរាជធានីភ្នំពេញ ដោយក្នុងនោះផ្លូវឆ្លងកាត់ក្នុងរាជធានីភ្នំពេញចំនួន 15គីឡូម៉ែត្រ និងកាត់ភូមិសាស្រ្តខេត្តកណ្តាលចំនួន 53គីឡូម៉ែត្រ។ ចំណុចចាប់ផ្តើមនៃផ្លូវ គឺគីឡូម៉ែត្រលេខ14 +105 នៃផ្លូវជាតិលេខ4 និងចុងបញ្ចប់នៅគីឡូម៉ែត្រលេខ24 + 840 នៃផ្លូវជាតិលេខ1។ នៅតាមដងផ្លូវនេះមានស្ពានអាកាសឆ្លងកាត់ចំនួន 4កន្លែង កាត់ពីលើផ្លូវជាតិលេខ4 ផ្លូវជាតិលេខ3 ផ្លូវជាតិលេខ2 និងផ្លូវជាតិលេខ1 ដែលប្រវែងស្ពានសរុប 1,000ម៉ែត្រ។ ក្នុងនោះក៏មានស្ពានឆ្លងទន្លេបាសាក់ចំនួន 2កន្លែងត្រង់កោះអន្លង់ចិនប្រវែងសរុប 996ម៉ែត្រ (ស្ពានបាសាក់ខាងកើតប្រវែង 630ម៉ែត្រ និងស្ពានបាសាក់ខាងលិច ប្រវែង 366ម៉ែត្រ)។
ចំពោះទំហំផ្លូវវិញ គឺមានទទឹងប្រវែង 27ម៉ែត្រ សម្រាប់ទីប្រជុំជន និងក្រៅទីប្រជុំជនមានប្រវែង 25ម៉ែត្រដោយដាក់ភ្លើងបំភ្លឺផ្លូវនៅកំណាត់ផ្លូវក្នុងក្រុង និងដាំដើមឈើលម្អនៅក្រៅក្រុង។
បើតាមលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានបញ្ជាក់ថា ផ្លូវនេះគ្រោងចំណាយថវិកាប្រមាណ 273លានដុល្លារអាមេរិក ក្រោមហិរញ្ញប្បទានពីរដ្ឋាភិបាលចិន ស្របពេលដែលរាជរដ្ឋាភិបាលកម្ពុជាចូលរួមបដិភាគសម្រាប់ដោះស្រាយផលប៉ះពាល់។ គម្រោងសាងសង់ផ្លូវក្រវាត់ក្រុងខ្សែទី3 នេះ ក៏តភ្ជាប់ផងដែរទៅនឹងផ្លូវទំនប់កប់ស្រូវ ផ្លូវជាតិលេខ5 និងភ្ជាប់ទៅស្ពានឈ្នះឈ្នះ និងមហាវិថីឈ្នះឈ្នះ និងផ្លូវជាតិលេខ6 ដែលនឹងប្រែក្លាយទៅជាផ្លូវក្រវាត់ក្រុងដ៏ធំ និងទំនើបមួយ បម្រើការជាផ្លូវដឹកជញ្ជូនវាងរាជធានីភ្នំពេញ តភ្ជាប់ពីផ្លូវជាតិលេខ6 ផ្លូវជាតិលេខ5 ផ្លូវជាតិលេខ4 ផ្លូវជាតិលេខ3 ផ្លូវជាតិលេខ2 និងផ្លូវជាតិលេខ21 ឆ្លងកាត់ទន្លេបាសាក់ ព្រមទាំងកោះអន្លង់ចិន និងភ្ជាប់ទៅផ្លូវជាតិលេខ1 ពិសេសភ្ជាប់ទៅចំណតផែកុងតឺន័រថ្មីរបស់កំពងផែស្វយ័តភ្នំពេញ នៅស្រុកកៀនស្វាយ ក៏ដូចជាការបំពេញឱ្យការតភ្ជាប់ផ្លូវអាស៊ានហាយវេយ៍ (AH1 និងAH11) និងផ្លូវរបៀងសំខាន់ៗ (របៀងកណ្តាល និងរបៀងសេដ្ឋកិច្ចភាគខាងត្បូង) របស់មហាអនុតំបន់មេគង្គ។
គួរបញ្ជាក់ផងដែរថា ផ្លូវក្រវាត់ក្រុងខ្សែទី3 សាងសង់តដោយក្រុមហ៊ុនសំណង់សៀងហៃគ្រុប ខូអិលធីឌី (Shanghai Construction Group Co., Ltd.) និងត្រួតពិនិត្យបច្ចេកទេសសាងសង់ ដោយក្រុមហ៊ុនទីប្រឹក្សាបច្ចេកទេសក្វាងចូវ វ៉ានអាន (Guangzhou Wanan Construction Supervision Co., Ltd) ប្រើរយៈពេលសាងសង់ចំនួន 42ខែ គ្រោងបញ្ចប់នៅខែធ្នូ ឆ្នាំ2021៕

January 14, 2019
ពិតជាមិនសរសើរមិនបាន!! ដេននី ក្វាន់ ចំណាយពេលទំនេរខ្លួនចែកអំណោយដល់អ្នកក្រខ្សត់
ក្នុងចំណោមតារាហ្វេសបុកដែលមានកេរ្តិ៍ឈ្មោះសំលេង កញ្ញា ដេននី ក្វាន់ បានក្លាយជាតារាដែលមានភាពលេចធ្លោរជាងគេទាំងរឿងល្អ និងរឿងអាក្រក់។ រឿងមិនល្អ គឺនាងត្រូវគេរិះគន់ថាស៊ិចស៊ី និងជានារីមាត់ដាចមិនសំចៃមាត់ នៅពេលមានបុគ្គលណាម្នាក់ធ្វើឱ្យឆេះដុំ សូម្បីតែក្នុងម៉ោងនាង Live ឃោសនាផលិតផល។
ប៉ុន្តែអ្វីមិនសរសើរនាងមិនបាន គឺនាងជាតារាដែលបានចំណាយពេលធ្វើទានទាំងខ្លួនរវល់ដកឃ្លាមិនរួច ដោយសកម្មភាពចែកទានរបស់នាង ក៍មិនមែនគ្រាន់តែចែកបាយកញ្ចប់ ឬ ចែកទានបន្តិចបន្តួច ហើយថតបង្ហោះនោះទេ។
នៅលើគណនីផ្លូវការរបស់នាង កញ្ញា ដេននី ក្វាន់ ត្រូវគេឃើញផុសពីសកម្មភាពទាំងល្អ និងអាក្រក់ចម្រុះគ្នា ដោយក្នុងពេលខ្លះនាងផុសតបតនឹងអ្នកមាក់ងាយចំពោះនាង និងផុសពីអារម្មណ៍មិនសប្បាយចិត្តក្នុងរឿងស្នេហា តែស្របនឹងការបង្ហោះមិនល្អ នាងក៍ផុសពីការចែកទាន ដើម្បីជាគំរូដល់តារាផ្សេងទៀត។
ដេននី ក្វាន់ បានបង្ហោះក្ដៅៗ នៅថ្ងៃទី12 ខែ មករា ថា « ថ្ងៃនេះនាងខ្ញុំ និងបងស្រីរបស់នាងខ្ញុំបាននាំយកអំណោយចំនួន18គ្រួសារជូន ដល់លោកយាយលោកតា នៅភូមក្បាលពោធ៍ ឃុំសំបួរ ស្រុកទ្រាំង ខេត្តតាកែវ។ ក្រោយពីចែកជូនពួកគាត់ហើយមានអារម្មណ៏ថាជ្រះថ្លាក្នុងចិត្តណាស់ សម្រាប់ខ្ញុំគ្មានអ្វីសប្បាយចិត្តជាងការដែលបានចែករំលែកដល់អ្នកក្រខ្សត់ជាងខ្ញុំនោះទេ។ ខ្ញុំសន្យាថា និងបន្តធ្វើការងារមនុស្សធម៌ជារៀងរហូតតាមលទ្ធភាពនិងពេលវេលាដែលនាងខ្ញុំមាន »។
សកម្មភាពចែកទានរបស់នាង ត្រូវបានគេចែកចាយ និងកោតសរសើរយ៉ាងខ្លាំង ជាពិសេសក្នុងពេលដែលគេដឹងថា នាងរវល់ស្ទើររកម៉ោងសម្រាកមិនបាន ប៉ុន្តែនៅតែចំណាយលុយធ្វើទាន ដែលត្រូវគេឱ្យពិន្ទុថា បើគ្មានឆន្ទៈ គឺមិនអាចចំណាយពេលកើតទេ ហើយទឹកចិត្តដែលនាងឈានដល់ការចំណាយពេលធ្វើទាននោះ ក៏ពិបាករកបុគ្គលសាមញ្ញដែលរវល់ដូចនាង អាចធ្វើបានដែរ។ នេះមិនមែនជាសកម្មភាពលើកដំបូងដែលនាងបានធ្វើនោះទេ គឺអាចនិយាយបានថាជាទម្លាប់ទៅហើយ ទើបនាងត្រូវគេលាន់មាត់ថា ដេនីក្វាន់ ពិតជាមិនសរសើរមិនបាន ដោយមិនមែនធ្វើតែរឿងរងការរិះគន់ដូចតារាដែលមានរឿងអាស្រូវខ្លះឡើយ៕
January 14, 2019