អេបិល - La Reine Media

អេឡិច ចាន់ត្រា ចែករំលែកក្ដីស្រឡាញ់ដល់កុមារក្នុងមណ្ឌលសុម៉ាលីម៉ម

អ្នកលេងហ្វេសប៊ុកជាច្រើន បានលាន់មាត់សរសើរថាលោក អេឡិច ចាន់ត្រា គឺជាតារាគំរូម្នាក់ ដោយសារតែលោក បានបង្ហាញក្ដីស្រឡាញ់ ទៅកាន់មនុស្សដែលចំគោលដៅ ដែលខុសពីយុវវ័យ និងអ្នកមួយចំនួនដែលសុខចិត្តយកពេលទៅចំណាយលើរឿងផ្ទាល់ខ្លួន ជាមួយនឹងបុរស ឬនារីជាសង្សារជំនួសវិញ។

លោកបានចំណាយពេលញាំបាយជាមួយគ្រួសារ ដែលលោកប្រកាសថា កម្របានញាំបាយជុំគ្នា ព្រោះតែការងារ ដោយក្រៅពីញាំអាហារជុំគ្នា លោកក៏បានបង្ហាញការគោរព និងយកចិត្តទុកដាក់ចំពោះអ្នកមានគុណទាំងនោះដែរ។ អ្វីដែលគេកាន់តែលាន់មាត់ទៅទៀត គឺលោកបានឆ្លៀតទៅចែកទឹកចិត្ត និងចំណីចំណុក ហើយចំណាយពេលលេងជាមួយប្អូនៗ នៅក្នុងមណ្ឌលកុមារកំព្រាសុម៉ាលីម៉ម ដែលតារាមួយចំនួន មើលរំលងក្នុងថ្ងៃនៃក្ដីស្រឡាញ់។ នៅក្នុងមណ្ឌលនេះ គេកត់សម្គាល់ថា វត្តមានតារាច្រើននាក់មកហើយ ទៅលើកទឹកចិត្តក្មេងៗ ប៉ុន្តែមិនមែនក្នុងថ្ងៃ14 កុម្ភ:នោះទេ ដោយសារតែថ្ងៃទិវារនៃក្ដីស្រឡាញ់នោះ គេផ្ដោតជាធំតែលើការចំណាយពេលជាមួយគូស្នេហ៍ និងជាមួយមួយចំនួន ដែលខ្លួនគិតថា សំខាន់ច្រើនជាង។

លោក អេឡិច ចាន់ត្រា បានអះអាងថា ហេតុផលដែលលោកចំណាយពេលទៅមើលក្មេងៗ នៅក្នុងមណ្ឌលសុម៉ាលីម៉មនោះ គឺបណ្ដាលមកពីពេលកន្លងមក លោករមែងទៅលេងជាមួយក្មេងធ្វើឱ្យមានទំនាក់ទំនងជាប្រចាំ ហើយដោយសារតែលោកគិតថា ក្នុងថ្ងៃ14 កុម្ភ: ក្មេងទាំងនេះ ត្រូវការការយកចិត្តទុកដាក់ខ្លាំងជាងថ្ងៃណាៗ ទាំងអស់ ទើបលោករវល់ប៉ុណ្ណា ក៏នៅតែចំណាយពេល ជាមួយក្មេងៗនៅក្នុងមណ្ឌលនោះ ដោយលោកកាន់តែរំភើបចិត្តខ្លាំងឡើង នៅពេលបានឃើញក្មេងៗទាំងនោះសប្បាយរីករាយ ដូចបានកាដូពីឋានសួគ៍៕

February 16, 2019

ថ្មីទៀតហើយ!! មាស សុខសោភា ៖ «រឿងចូលហង្សមាសនេះ ខ្ញុំកំពុងតែពិចារណាហើយ»

តារាស្រី មាស សុខសោភា នាពេលថ្មីៗនេះ កំពុងតែមានសកម្មភាពមមាញឹកជាមួយកម្មវិធី ស្នាដៃកូនខ្មែរសម្រាប់មាស សុខសោភា ដែលគេមើលឃើញថា តារាស្រីទឹកដមសំឡេងផ្អែមជាងទឹកឃ្មុំមួយដួងនេះ មានបទចម្រៀងនិពន្ធថ្មីនៅក្នុងដៃយ៉ាងច្រើន ដែលបេក្ខជនប្រលងក្នុងកម្មវិធី និពន្ធដើម្បីឱ្យនាងបានច្រៀង និងក៏កំពុងទទួលបានពីប្រជាប្រិយភាពបទចម្រៀងក្នុងចំណោមចំណាត់ថ្នាក់ទាំង 5 ផងដែរ។ ស្របពេលដែលកំពុងឡើងកូដជាមួយបទនិពន្ធថ្មីៗ ស្រាប់តែ ធ្លាយដំណឹងមកថា នាងកំពុងពិចារណាចូលទ្រនំហង្សមាសមែនទែនហើយ។

សូមរំឭកថា កន្លងទៅក្នុងអំឡុងខែ កុម្ភៈ ឆ្នាំ 2018 មាស សុខសោភា ត្រូវបានអ្នកសារព័ត៌មានទម្លាយរឿង វេចបង្វិចចេញពីថោន ក៏ប៉ុន្ដែនាងបានចេញមុខបកស្រាយចំពោះព័ត៌មានដែលបានសុះសាយថា រូបនាងបានបញ្ចប់កុងត្រាកិច្ចសន្យាជាមួយផលិតកម្មថោន ប៉ុន្ដែមិនរត់ចូលទៅផលិតកម្មធំគឺ រស្មីហង្សមាស នោះទេ ពោលគឺនាងបានធ្វើការបដិសេធ និងច្រាណចោលរាល់ព័ត៌ដែលបានចេញមក ដែលធ្វើមហាជនមានការងឿងឆ្ងល់ រួមទាំងខាងផលិតកម្មសាមីខ្លួនផ្ទាល់ មានប្រិតកម្មខ្លាំងលើរូបនាង។ យ៉ាងណាមិញ នាងបានសង្កត់ធ្ងន់ កាលដែលគ្មានកុងត្រានៅថោន និងមិនព្រមចាកចេញនោះ គឺនាងខិតខំប្រឹងប្រែងធ្វើការដោយកម្លាំងចិត្ត និងការយោគយល់ទុកចិត្តគ្នាទៅវិញទៅមក។

ចូលមកដល់ខែកុម្ភៈ ឆ្នាំ 2019 នេះវិញម្ដង ស្រាប់តែសារព័ត៌មានក្នុងស្រុកមួយបានទម្លាយម្ដងទៀតថា មាស សុខសោភា ពិចារណាចូលផលិតកម្មហង្សមាសទៀតហើយ។ ខណៈមហាជនជាច្រើនកំពុងចាប់អារម្មណ៍ថា តើពិតមែន100% ឬមិនទៅហង្សមាស ទេ? ព្រោះថា មហាជនជាច្រើនគេរំពឹងថា ប្រសិនបើនាងទៅហង្សមាសពិតនោះ គឺជារឿងល្អសម្រាប់នាង និងបានក្ដោបឱកាសការងារសិល្បៈច្រើនទៀតផង តាមរយៈកម្មវិធីច្រើននៅទូរទស្សន៍ហង្សមាស។

មាស សុខសោភា បានតបទៅអ្នកសារព័ត៌មានវិញថា ចំពោះរឿងចូលហង្សមាស នេះ ខ្ញុំកំពុងតែពិចារណាហើយ។ យើងត្រូវការពេលវេលាគិតឱ្យបានច្បាស់លាស់ជាមុនសិន។ ខ្ញុំមានមិត្តភក្តិនៅទីនោះ (ហង្សមាស) គាត់ចង់ឱ្យខ្ញុំទៅហ្នុងដែរ ព្រោះគាត់ចង់ឃើញសកម្មភាពថ្មីៗរបស់យើងនៅឆ្នាំថ្មីនេះ ហើយខ្ញុំគិតថា ហង្សមាស ពេលនេះ គាត់ក៏មានការងារសិល្បៈច្រើនដែរ។ ប៉ុន្តែខ្ញុំត្រូវការលក្ខខណ្ឌរបស់ខ្ញុំដែរ គឺដូចខ្ញុំធ្លាប់ប្រាប់អ៊ីចឹងថា ខ្ញុំត្រូវការសិទ្ធិសេរីភាព។ ខ្ញុំយល់ថា បើហង្សមាស គាត់ចង់បានខ្ញុំមែន គាត់នឹងយល់ស្របតាមសំណើរបស់យើង ដែលចង់បានជាមិនខាន៕

February 16, 2019

ពានរង្វាន់ដែលឈ្នះ - SsangYong បើកដំណើរការបន្ទប់តាំងលក់រថយន្តរបស់ខ្លួននៅក្នុងទីតាំងប្រកបដោយសក្តានុពលបំផុតនៅរាជធានីភ្នំពេញ

ការរីកចម្រើនយ៉ាងឆាប់រហ័សរបស់ក្រុមហ៊ុន SsangYong Cambodia និងការទទួលយកម៉ាកសញ្ញារថយន្តដ៏ទំនើបនេះរបស់ប្រជាជនកម្ពុជាបានធ្វើឱ្យ SsangYong សម្រេចចិត្តពង្រីកអគារតាំងបង្ហាញរបស់ខ្លួនបន្ថែមទៀត ដើម្បីផ្តល់នូវភាពងាយស្រួលដល់អតិថិជនដែលមានតម្រូវការលើសពីការរំពឹងទុក។

នៅក្នុងឆ្នាំនេះ SsangYong នឹងបើកកន្លែងអគារតាំងលក់រថយន្តទំនើបរបស់ខ្លួននៅទីតាំងដែលងាយស្រួលរកឃើញបំផុតនៅរាជធានីភ្នំពេញនៃព្រះរាជាណាចក្រកម្ពុជា នៅថ្ងៃទី15 ខែកុម្ភៈ ឆ្នាំ2019។ អគារតាំងបង្ហាញរថយន្ត SsangYong មានទីតាំងស្ថិតនៅលើមហាវិថីសហព័ន្ធរុស្សី (ក្បែរស្ពានអាកាសសាលាតិចណូ)ដែលនេះគឺជាកាអគារតាំងបង្ហាញទី2របស់ខ្លួន បន្ទាប់ពីសាខាចោមចៅ ដែលបានបើកដំណើរការកាលពីឆ្នាំមុន។

អគារតាំងបង្ហាញថ្មី ដែលមានរាងបួនជ្រុងស្មើយ៉ាងទូលាយ នឹងក្លាយជាកន្លែងនៃការតាំងបង្ហាញនូវគ្រឿងតុបតែងផ្ទៃខាងក្នុងនៃរថយន្តដ៏ទាក់ទាញបំផុតនៅក្នុងប្រទេសកម្ពុជា។ ការបើកសម្ភោធនេះនឹងបង្ហាញពីម៉ូដែលរថយន្តចុងក្រោយរបស់ SsangYong ដែលបង្ហាញពីការច្នៃប្រឌិតរបស់រថយន្ត SUV ដ៏ទំនើប។

គណៈគ្រប់គ្រង SsangYong បានអញ្ជើញអ្នកសារព័ត៌មានទាំងអស់ឱ្យមកទទួលយកនូវបទពិសោធន៍ដ៏ដ៏អស្ចារ្យបំផុត ដើម្បីចូលរួមនៅក្នុងពិធីបើកសម្ពោធជាផ្លូវការនូវអគារតាំងបង្ហាញថ្មីដ៏គួរឱ្យទាក់ទាញនេះ។ ពិធីសម្ពោធជាផ្លូវការនឹងត្រូវបានដឹកនាំដោយនាយកប្រតិបត្តិនៃក្រុមហ៊ុន SsangYong Cambodia និង អ្នកគ្រប់គ្រងទូទៅនៃក្រុមហ៊ុន Asia / KD Export Team SsangYong Motor និងក្រុមការងារនៃក្រុមហ៊ុន SsangYong ជាច្រើនរូបទៀត។

លោក Lee Jae Hoo អគ្គនាយកប្រតិបត្តិនៃក្រុមហ៊ុន SsangYong Cambodia បានមានប្រសាសន៍ថា “ក្រុមហ៊ុន SsangYong Cambodia បានបង្កើតអគារតាំងបង្ហាញដំបូងបង្អស់របស់ខ្លួននៅក្នុងខែមីនា ឆ្នាំ2018 ។ នៅក្នុងទីផ្សារប្រកួតប្រជែងនៃរថយន្តម៉ាកល្បីនេះ SsangYong បានគ្រប់គ្រងស្ថានភាពបានយ៉ាងឆាប់រហ័ស ដើម្បីបង្កើនភាគហ៊ុននៃទីផ្សាររបស់ខ្លួន។ ដំណើរការលក់របស់យើងគឺគួរឱ្យភ្ញាក់ផ្អើលខ្លាំងណាស់សម្រាប់យើងដែលធ្វើឱ្យយើងសម្រេចចិត្តបង្កើតអគារតាំងបង្ហាញថ្មីមួយនេះនៅចំកណ្តាលនៃរាជធានីភ្នំពេញ ដើម្បីផ្តល់នូវភាពងាយស្រួលឡើងដល់អតិថិជនដែលមានស្រាប់ និងអតិថិជនបន្ថែមទៀតរបស់យើង” ។

អគារតាំងបង្ហាញថ្មីនេះ គឺជាផ្នែកមួយនៃការរីកចម្រើនដ៏សំខាន់របស់ SsangYong នៅក្នុងប្រទេសកម្ពុជា។ ការមានកាអគារតាំងបង្ហាញរថយន្តនៅក្នុងប្រទេសកម្ពុជា បានបញ្ជាក់ថាក្រុមហ៊ុន SsangYong គឺមានសេដ្ឋកិច្ចកំពុងរីកចម្រើន ហើយក៏បង្ហាញថា ម៉ាកសញ្ញាមួយនេះត្រូវបានគេទទួលស្គាល់ជាផ្លូវការហើយនៅថ្ងៃនេះ និងនៅឆ្នាំខាងមុខទៀត។

លោក Yoon Jiseok អ្នកគ្រប់គ្រងទូទៅនៃក្រុមហ៊ុនSsangYong ប្រចាំប្រទេសកូរ៉េ (Asia/KD Export Team SsangYong Motor) បានមានប្រសាសន៍ថា “ ក្រុមហ៊ុន SsangYong បានបើកដំណើរការតាំងពីឆ្នាំ1954 ដែលគិតមកដល់ ឥលូវមានរយៈពេលជាង65ឆ្នាំ លើជំនាញផលិតយានយន្ត ហើយយើងពិតជាមានមោទនភាពខ្លាំងណាស់ ចំពោះការផលិតរថយន្តរយៈពេលដ៏យូរអង្វែងរបស់យើង។ SsangYong បានផលិតរថយន្តប្រភេទ SUV, Pick Up, MPV Car ដែលមានលក្ខណៈ Dynamic Driving តាមបច្ចេកទេស 4 x4 ដែលគិតពីសុវត្ថិភាពជាចំបង និងខិតខំប្រឹងប្រែង ធ្វើយ៉ាងណាដើម្បីអោយបំពេញតាមតម្រូវការអតិថិជន។

ជារៀងរាល់ឆ្នាំការលក់របស់យើងមានកំណើនកើនឡើងរហូត ជាក់ស្តែងឆ្នាំ២០១៨ យើងលក់បានរថយន្តចំនួន144,000គ្រឿង និងក្នុងឆ្នាំ2019 យើងជឿជាក់ថានឹងកើនដល់ 163,000គ្រឿង។

ជាមួយកិច្ចសហប្រតិបត្តិការដ៏ល្អ ជាមួយក្រុមហ៊ុនSsangYong ប្រចាំប្រទេសកម្ពុជានេះ យើងនឹងធានាផ្គត់ផ្គង់នូវរថយន្តដ៏ល្អប្រណិតពីរោងចក្រយើងផ្ទាល់ មកកាន់ទីផ្សារប្រទេសកម្ពុជា”

ការបើកសម្ពោធអគារតាំងបង្ហាញនេះផងដែរ ក៏នឹងមានការបង្ហាញពីពាន់រង្វាន់ដែលក្រុមហ៊ុន ទទួលបានផងដែរមានដូចជា “SsangYong ឯកទេសរថយន្ត SUV ដ៏ល្បីល្បាញលើពិភពលោក ៖ សូមមកទទួលយកបទពិសោធន៍ថ្មីជាមួយនឹងរថយន្ត SsangYong” (“World Renowned SUV Specialist: Enter and Experience the New SsangYong.”) ។ ស្លាកតាំងបង្ហាញនេះតំណាងឱ្យចក្ខុវិស័យរបស់ SsangYong ដែលត្រូវបានគេស្គាល់ និងស្ថិតនៅលំដាប់កំពូលក្នុងផ្នែករថយន្តបែប Sport ដ៏ទំនើបទាន់សម័យ។ ដើម្បីបញ្ជាក់ពីចំណុចដ៏ល្អខាងលើនេះ ក្នុងឆ្នាំ2018 និងឆ្នាំ2019 រថយន្ត Rexton និងរថយន្ត Rexton Sports បានទទួលពានរង្វាន់ជាច្រើនពីទស្សនាវដ្តី 4X4 នៃចក្រភពអង់គ្លេស។ ទស្សនាវដ្តី 4×4 គឺជាទស្សនាវដ្តីរបស់ចក្រភពអង់គ្លេស និងជាទស្សនាវដ្តី Pick-Up ដែលបង្ហាញពីរថយន្ត 4WD និងរថយន្តដឹកទំនិញទូទាំងពិភពលោក។ ជារៀងរាល់ឆ្នាំទស្សនាវដ្តី 4X4 បានជ្រើសរើសគំរូរថយន្តជិត90គំរូរថយន្ត សម្រាប់ការសិក្សាស៊ីជម្រៅ និងការវាយតម្លៃ ដើម្បីធ្វើការប្រកួតប្រជែង។ នៅឆ្នាំ2018 រថយន្ត SsangYong ម៉ូដែល Rexton បានឈ្នះពានរង្វាន់ចំនួនបី គឺ ឈ្នះពានរង្វាន់ “រថយន្តដែលមានគុណម្លៃល្អដាច់គេ” “រថយន្តដែលខ្លាំង ធុន រឹងមាំជម្នះគ្រប់ឧបសគ្គផ្លូវ” និងពានរង្វាន់ “រថយន្ត 4X4 ប្រចាំឆ្នាំ”។ រថយន្ត SsangYong ម៉ូដែល Rexton នៅតែបន្តទទួលបានពានរង្វាន់ “រថយន្តដែលមានគុណម្លៃល្អដាច់គេ” ក្នុងខែមករា ឆ្នាំ2019 រយៈពេល2ឆ្នាំជាប់ៗគ្នាផងដែរ។ ចំណែក រថយន្ត SsangYong ម៉ូដែល Rexton Sports ទទួលបានពានរង្វាន់ “រថយន្តដែលមានគុណម្លៃល្អដាច់គេ” ក្នុងប្រភេទ “រថយន្ត Pick-Up ប្រចាំឆ្នាំ” ក្នុងឆ្នាំ2018។

នៅក្នុងកម្មវិធីសន្និសីទសារព័ត៌មាន លោក Park Keun Baek អគ្គនាយកផ្នែកលក់នៃក្រុមហ៊ុន SsangYong បានពន្យល់ពីភាពពេញនិយមរបស់រថយន្ត SsangYong គឺដោយសារសុវត្ថិភាព ការរចនា និងកម្លាំងថាមពលរបស់រថយន្ត។ លោកបានថ្លែងថា “… ឧទាហរណ៍ ម៉ូដែល Rexton គឺផលិតឡើងដោយផ្តោតលើសុវត្ថិភាពរបស់អ្នកដំណើរ និងភាពធន់នៃរថយន្ត សូម្បីតែនៅពេលបើកបរនៅលើផ្លូវដ៏លំបាកយ៉ាងណាក៏ដោយ។ ការរចនាម៉ូដែល Rexton ឡើងគឺទទួលបានការកោតសរសើរពីអ្នកជំនាញខាងត្រួតពិនិត្យស្វ័យប្រវត្តិជាច្រើនថា ជារថយន្ត SUV ដ៏ស្រស់ស្អាតបំផុតនៅក្នុងទីផ្សារ។ ចំណែករឿងម៉ាស៊ីនវិញ រថយន្ត SsangYong ម៉ូដែល Rexton បំពាក់ដោយម៉ាស៊ីនម៉ាស៊ូត 2.2 លីត្រ ប៉ុន្តែការដំណើរការម៉ាស៊ីនរបស់វាគឺស្រដៀងគ្នាទៅនឹងម៉ាស៊ីន 3.0 លីត្រដែរ។ បច្ចេកវិទ្យានេះ គឺត្រូវបានក្រុមវិស្វកម្មនៃក្រុមហ៊ុន SsangYong រួមបញ្ជូនគ្នាយ៉ាងល្អឥតខ្ចោះ ស្របទៅនឹងការរួមបញ្ជូនគ្នា 7 ល្បឿននៃរថយន្តដឹកជញ្ជូនម៉ូដែល Mercedes Benz”។

នៅឆ្នាំ2019នេះ នឹងក្លាយជាឆ្នាំដ៏គួរឱ្យរំភើបសម្រាប់ក្រុមហ៊ុន SsangYong ព្រោះថានឹងមានព្រឹត្ដិការណ៍ជាច្រើនកំពុងរង់ចាំនាពេលខាងមុខនេះ។ ក្រុមហ៊ុន SsangYong គ្រោងនឹងដាក់បង្ហាញម៉ូដែលថ្មីមួយទៀតនៅពាក់កណ្តាលឆ្នាំនេះ និងកន្លែងតាំងបង្ហាញមួយផ្សេងទៀតនៅដើមឆ្នាំក្រោយនៅក្បែរតំបន់បឹងកេងកង។

ក្រុមហ៊ុន SsangYong សូមស្វាគមន៍ចំពោះអតិថិជនទាំងអស់ឱ្យមកទស្សនាកន្លែងតាំងបង្ហាញថ្មីរបស់ក្រុមហ៊ុន ដើម្បីទទួលបាននូវបទពិសោធថ្មីជាមួយនឹងរថយន្ត SsangYong ដែលពិភពលោកទទួលស្គាល់ ដែលមានទីតាំងស្ថិតនៅតាមបណ្តោយមហាវិថីសហព័ន្ធរុស្សី (កែងមហាវិថីសហព័ន្ធរុស្សី និងវត្តនាគវ័ន) សង្កាត់ផ្សារដេប៉ូ 3 ខណ្ឌទួលគោក រាជធានីភ្នំពេញ។

សម្រាប់ព័ត៌មានបន្ថែម សូមទំនាក់ទំនងមកកាន់លេខទូរស័ព្ទ 098 456 888 / 095 456 888៕

February 16, 2019

Tiger Street Football Festival 20 19 នៅមណ្ឌលខេត្តកំពង់ចាមជម្រុះយក7ក្រុមឡើងទៅភ្នំពេញ

កំពង់ចាម៖មណ្ឌលទី៧នៃកាប្រកួតវគ្គជម្រុះ Tiger Street Football Festival 2019 បានមកដល់ខេត្តកំពង់ចាមហើយ ដោយមានក្រុមចំនួន៧៦បានដាក់ពាក្យចូលរួមប្រកួតខណៈមានក្រុមជើងខ្លាំងជាច្រើនប្រចាំមណ្ឌលនេះមានក្តីសង្ឃឹមខ្ពស់ដណ្តើមកៅអីឆ្ពោះទៅវគ្គផ្តាច់ព្រ័ត្រនៅភ្នំពេញនាថ្ងៃទី16 និងទី17 មីនា 2019 ខាងមុខនេះ។

ថ្លែងក្នុងកម្មវិធីសន្និសីទសារព័ត៌មានកាលពីរសៀលថ្ងៃទី15 ខែកុម្ភៈ ឆ្នាំ2019 នៅសណ្ឋាគារភ្នំប្រុស ខេត្តកំពង់ចាម លោក តឹក សេងហុង នាយកគ្រប់គ្រងស្លាកសញ្ញាស្រាបៀរថៃហ្គ័របានលើកឡើងថា សម្រាប់ឆ្នាំ2019 នេះគឺ ជាលើកទី៧ហើយដែលក្រុមហ៊ុនស្រាបៀរថៃហ្គ័របានសហការជាមួយសហព័ន្ធបាល់ទាត់កម្ពុជាក្នុងការបង្កើតព្រឹត្តិការណ៍ ប្រកួតបាល់ទាត់ Tiger Street Football Festival ប្រចាំឆ្នាំ 2019នេះឡើង។ ហើយអ្វីដែលកាន់តែពិសេសក្នុងឆ្នាំនេះ យើងបានបង្កើនមណ្ឌលប្រកួតដល់៩ទីតាំង និងប្រាក់រង្វាន់សរុបទូទាំងប្រទេសកាន់តែធំអស្ចារ្យរហូតដល់50,000ដុល្លារ។

លោកបាននិយាយលើកទឹកចិត្តដល់ក្រុមកីឡាករទាំងអស់ត្រូវខិតខំលេងឲ្យអស់ពីកម្លាំងកាយចិត្តនិងលេងដោយយុត្តិធម៌ (FairPlay)ជាពិសេសត្រូវខិតខំដើម្បីដណ្តើមយកពានទូទាំងប្រទេសយកមកទឹកដីខេត្តកំពង់ចាម។ ការប្រកួតជម្រុះនឹងធ្វើនៅទីលានកោះពេជ្រមាត់ទន្លេ ខេត្តកំពង់ចាម ថ្ងៃទី16 និង 17ខែកុម្ភៈ ដោយមានក្រុមចូលរួម ក្រុម76 ខណៈមណ្ឌលកំពង់ចាមនេះត្រូវយក៧ក្រុមដើម្បីឡើងទៅវគ្គផ្តាច់ព្រ័ត្រ នៅរាជធានីភ្នំពេញថ្ងៃទី16និងទី17 មីនា 2019 ខាងមុខនេះ ជាពិសេសមានឱកាសជួបផ្ទាល់ជាមួយកំពូលតារាបាល់ទាត់ពិភពលោក គឺកីឡាករបាល់ទាត់ Ronaldinho។

ស្រាបៀរថៃហ្គ័រជាស្រាបៀរដែលមានគុណភាពខ្ពស់លំដាប់ថ្នាក់អន្តរជាតិមានដើមកំណើតតាំងពីឆ្នាំ1932នៅប្រទេសសិង្ហបុរី និងមានលក់នៅច្រើនជាង70ប្រទេសនៅទូទាំងពិភពលោក ហើយស្រាបៀរថៃហ្គ័រឈ្នះពានរង្វាន់លំដាប់ថ្នាក់អន្តរជាតិ ច្រើនជាង40មេដាយផ្នែករសជាតិ និងគុណភាព។

សូមចូលទៅកាន់ទំព័រហ្វេសប៊ុកផ្លូវការ របស់ស្រាបៀរថៃហ្គ័រ៖ www.facebook.com/TigerBeerKH
ពិសាដោយការទទួលខុសត្រូវ៕

February 16, 2019

កសិករម្នាក់ទៀតហើយនៅស្រុកសំឡូត ខេត្តបាត់ដំបង ឈ្នះរង្វាន់100លានរៀល ពីតែបៃតង អ៊ីឈីតាន់

បន្ទាប់ពីបានប្រគល់ទឹកប្រាក់រង្វាន់ 100លានរៀល ទៅដល់ដៃអតិថិជនចំនួន2នាក់ ដែលឈ្នះរង្វាន់ធំដូចគ្នាក្នុងថ្ងៃតែមួយកាលពីសប្ដាហ៍កន្លងទៅ ឥឡូវនេះមានអតិថិជនថ្មីម្នាក់ទៀតហើយ ឈ្មោះ សង ស្នា ភេទប្រុស អាយុ២៨ឆ្នាំ បច្ចុប្បន្នមានមុខរបរជាកសិករ រស់នៅក្នុងភូមិព្រៃធំ ឃុំកំពង់ល្ពៅ ស្រុកសំឡូត ខេត្តបាត់ដំបង។

ថ្លែងប្រាប់ក្រុមការងារដែលបានចុះប្រគល់រង្វាន់ធំដល់លំនៅដ្ឋានផ្ទាល់ លោក សង ស្នា ដែលក្លាយជាមហាសេដ្ឋីថ្មីឈ្នះរង្វាន់ប្រាក់លានរបស់តែបៃតង អ៊ីឈីតាន់ បានរាប់ប្រាប់ឱ្យដឹងថា ៖ កាលពីចុងសប្ដាហ៍កន្លងទៅនេះ ក្រោយពេលសម្រាកពីការងារព្យួរដីដាំដំឡូង ហើយអស់កម្លាំង និងមានភាពស្រេកទឹកផងនោះ លោកក៏បានទិញតែបៃតង អ៊ីឈីតាន់ រសជាតិផ្លែគូលេន មួយដបពីអ្នកលក់នៅផ្សារ អក្សរ តេ ទទួលទាន លុះពេលមួលគម្របដបទទួលទាន ក៏ស្រាប់តែឃើញមានរង្វាន់ 100លានរៀល នៅក្នុងគម្របដបតែម្ដង ។ ភ្លាមនោះលោកពិតជាមានអារម្មណ៍រំភើបខ្លាំងមែនទែន ហើយក៏យកបង្ហាញប្រាប់អ្នកលក់ រួមជាមួយ បងប្អូន ក្រុមគ្រួសារឱ្យបានដឹង រួមជាមួយនឹងទូរស័ព្ទជូនដំណឹងដល់ក្រុមហ៊ុនតាមរយៈលេខទូរស័ព្ទដែលមានស្រាប់នៅនឹងគម្របដប។ លោកបានបញ្ជាក់ទាំងអារម្មណ៍រំជើបរំជួលទៀតថា តាំងពីមុនមកលោកមិនធ្លាប់នឹកគិតថា អាចលុយច្រើនសន្ធឹកសន្ធាប់ដូច្នេះនោះទេ ព្រោះគ្មានមុខរបរអ្វីក្រៅពីជួលដីចម្ការគេដាំដំឡូងដើម្បីទទួលបានកម្រៃនោះទេ ប៉ុន្តែពេលនេះ តែបៃតង អ៊ីឈីតាន់ បានជួយកែប្រែជោគវាសនាគ្រួសាររបស់លោកឱ្យមានភាពល្អប្រសើរហើយ ។ ក្រោយពីទទួលបានលុយរង្វាន់ធំ 100លានរៀល លោកនឹងយកមួយចំនួនទៅសងបំណុលគេ ហើយទុកមួយចំណែកទៀតទិញដីធ្វើចម្ការ ដើម្បីទ្រទ្រង់ជីវភាពទៅថ្ងៃអនាគត។

គួរបញ្ជាក់ផងដែរថា សម្រាប់រដូវកាលទី3 ឆ្នាំ2019 នេះ ក្រុមហ៊ុន តែបៃតង អ៊ីឈីតាន់ បានបង្កើនរង្វាន់ធំនូវចំនួនទឹកប្រាក់ 100លានរៀល រហូតដល់ 70រង្វាន់, ម៉ូតូ Scoopy i ចំនួន70រង្វាន់ , ទូរស័ព្ទ iphone Xs ចំនួន70រង្វាន់ រួមជាមួយនឹងរង្វាន់ Free តែបៃតងអ៊ីឈីតាន់ រាប់លានរង្វាន់ទៀត។ រួសរាន់ឡើង អ្នកដែលមានសំណាងបានក្លាយជាសេដ្ឋីបន្ទាប់ អាចជារូបអ្នក ៕

February 15, 2019

អាជ្ញាធរជាតិអប្សរាកំពុងរៀបចំដំឡើងផ្ទាំងឈ្មោះប្រាសាទជាង100ផ្ទាំងដាក់តាមប្រាសាទនានាក្នុងរមណីយដ្ឋានអង្គរ

តាមរយៈទំព័រផ្លូវការរបស់ក្រសួងវប្បធម៌ និងវិចិត្រសិល្បៈ បានឱ្យដឹងថា ដើម្បីលើកកម្ពស់តំបន់រមណីយដ្ឋានអង្គរ និងស្របតាមអនុសាសន៍ណែនាំរបស់គណៈកម្មាធិការ ICC-Angkor អាជ្ញាធរជាតិអប្សរា កំពុងឆ្លាក់ផ្ទាំងឈ្មោះប្រាសាទដែលមានទាំងអក្សរខ្មែរ និងអក្សរអង់គ្លេស ធ្វើពីថ្មភក់ប្រមាណ 118ផ្ទាំង ហើយគ្រោងនឹងលើកដាក់តាមប្រាសាទនានាក្នុងរមណីយដ្ឋានអង្គរក្នុងពេលឆាប់ៗខាងមុខនេះ។

ផ្ទាំងស្លាកឈ្មោះប្រាសាទនេះ បង្ហាញជូននូវព័ត៌មានសំខាន់ៗមួយចំនួនពាក់ព័ន្ធនឹងប្រាសាទដូចជា ឈ្មោះប្រាសាទ អាយុកាលសាងសង់ប្រាសាទ ទិសច្រកចូលប្រាសាទ និងអមដោយស្លាកសញ្ញា (Logo) ចំនួន4គឺ ស្លាកសញ្ញាអាជ្ញាធរជាតិអប្សរានៅចំកណ្តាលខាងលើឈ្មោះប្រាសាទ និងស្លាកសញ្ញា៣ផ្សេងទៀត ដែលនៅខាងក្រោមគឺ ស្លាកសញ្ញាយូណេស្កូ ស្លាកសញ្ញាបេតិកភណ្ឌពិភពលោក និងស្លាកសញ្ញាអនុសញ្ញាក្រុងឡាអេឆ្នាំ1954 សម្រាប់ការការពារសម្បត្តិវប្បធម៌ក្នុងគ្រាមានជម្លោះប្រដាប់អាវុធ។

ផ្ទាំងស្លាកសញ្ញាឈ្មោះប្រាសាទនេះមានបីទំហំផ្សេងគ្នា ដោយគិតទៅតាមទីតាំងជាក់ស្តែងនៃច្រកចូលប្រាសាទ ដែលដំឡើងបាន គឺទំហំធំចំនួន 16ផ្ទាំង កម្ពស់១.៥០០មមx បណ្ដោយ ៩១៤មមxកម្រាស់៤៦៤មម។ ទំហំមធ្យមចំនួន ៥២ផ្ទាំង កម្ពស់១,២០០មមxបណ្ដោយ៧៣១មមx កម្រាស់៣៧១មម។ ទំហំតូចចំនួន ៥០ផ្ទាំង កម្ពស់១,០០០មមxបណ្ដោយ៦១៣មមxកម្រាស់៣១១មម។

ក្នុងដំណើរចុះពិនិត្យការដ្ឋានធ្វើស្លាកសញ្ញានៅ Artisans Angkor នារសៀលថ្ងៃទី14 ខែកុម្ភៈ ឆ្នាំ2019 ឯកឧត្តម សុខ សង្វារ អគ្គនាយករងទទួលបន្ទុកនាយកដ្ឋានអភិវឌ្ឍន៍ទេសចរណ៍អង្គរបញ្ជាក់ថា មកដល់ពេលនេះផ្ទាំងស្លាកឈ្មោះរបស់ប្រាសាទដែលបានធ្វើរួចរាល់ហើយមានចំនួនប្រហែល25%នៃចំនួនផ្ទាំងសរុប ខណៈដែលផ្ទាំងខ្លះទៀតកំពុងស្ថិតនៅក្នុងការឆ្លាក់អក្សរ លាបពណ៌បេតិកភណ្ឌ (ពណ៌ឈាមជ្រូក) និងខ្លះទៀតកំពុងឆ្លាក់ក្បាច់លម្អ។

ឯកឧត្តមបន្ថែមថា ចំនួនផ្ទាំងនេះគឺមិនបានដំឡើងគ្រប់ប្រាសាទទាំងអស់ក្នុងតំបន់រមណីយដ្ឋានអង្គរឡើយ ដោយហេតុថា ប្រាសាទខ្លះនៅជ្រៅក្នុងព្រៃមិនមានទីតាំងដាក់បាន។ ចំពោះទីតាំងដែលតម្លើងស្លាកឈ្មោះប្រាសាទនេះ ក្រុមការងារបានគិតទៅចំណុច3គឺ នៅក្បែរច្រកចូលទស្សនាប្រាសាទ ទីតាំងងាយមើលឃើញរបស់ភ្ញៀវទេសចរ និងទីតាំងដែលមិនប៉ះពាល់ដល់ទិដ្ឋភាពប្រាសាទទាំងមូល។

អាជ្ញាធរជាតិអប្សរា សង្ឃឹមថា សមិទ្ធផលនេះនឹងជួយផ្ដល់ភាពងាយស្រួល និងបទពិសោធន៍ល្អសម្រាប់ភ្ញៀវទេសចរ ក្នុងការទស្សនាតំបន់អង្គរ ឆ្លើយតបតាមតម្រូវការចាំបាច់របស់ភ្ញៀវទេសចរ លើកតម្លៃប្រាសាទនិងកិត្យានុភាពជាតិ និងទទួលបាននូវព័ត៌មានមួយចំនួនដែលធ្វើឲ្យដំណើរកម្សាន្ត កាន់តែមានភាពងាយស្រួល និងច្បាស់លាស់បន្ថែមទៀត៕

February 15, 2019

ធនាគារ ប្រេដ ប៊ែង ខេមបូឌា ឧបត្ថម្ភមូលនិធិបាល់ទាត់ KMH

ធនាគារ ប្រេដ ប៊ែង ខេមបូឌា ដែលជាធនាគារអឺរ៉ុបតែមួយគត់ និងជាធនាគារអន្តរជាតិដ៏ធំជាងគេបង្អស់ នៅប្រទេសកម្ពុជា មានសេចក្តីសោមនស្សរីករាយ និងមានមោទនភាពយ៉ាងក្រៃលែង ដែលបានធ្វើជាអ្នកឧបត្ថម្ភធំរបស់មូលនិធិបាល់ទាត់ KMH។

មូលនិធិបាល់ទាត់ KMH ត្រូវបានបង្កើតឡើង នៅឆ្នាំ2012 ដោយសមាជិកក្រុម ISI ក្នុងទិសដៅលើកកម្ពស់វិស័យកីឡាបាល់ទាត់នៅកម្ពុជា និងចូលរួមចំណែកអភិវឌ្ឍន៍យុវជនកម្ពុជាឲ្យក្លាយជាកីឡាករអាជីព តាមរយៈការហ្វឹកហ្វឺនដែលមានលក្ខណៈស្តង់ដារ។

លោក Guillaume Perdon អគ្គនាយកនៃធនាគារ ប្រេដ ប៊ែង ខេមបូឌា បានយល់ច្បាស់ពីអត្ថប្រយោជន៍របស់កីឡា សម្រាប់សុខភាព ហើយជាពិសេស បានសង្កេតឃើញថា ជនជាតិខ្មែរ ទាំងប្រុស ទាំងស្រី ទាំងចាស់ ទាំងក្មេង សុទ្ធតែចូលចិត្តលេងកីឡា មិនថាពួកគាត់ធ្វើកីឡា ដើម្បីសុខភាព ឬដើម្បីជាការកំសាន្តសប្បាយនោះទេ។ លោកក៏បានបន្ថែមទៀតថា ការចូលរួមឧបត្ថម្ភក្នុងគម្រោងកីឡានេះ គឺជាឆន្ទៈដ៏មោះមុតរបស់ធនាគារ ប្រេដ ប៊ែង ខេមបូឌា ក្នុងការចូលរួមអភិវឌ្ឍសង្គមកម្ពុជា ក៏ដូចជាលើកស្ទួយសុខភាពរបស់ប្រជាជនខ្មែរផងដែរ។

សូមបញ្ជាក់ថា ចាប់តាំងពីបើកដំណើរការនៅប្រទេសកម្ពុជា នៅខែមីនា ឆ្នាំ2017 ធនាគារ ប្រេដ ប៊ែង ខេមបូឌា បានចូលរួមឧបត្ថម្ភកម្មវិធីផ្សេងៗជាច្រើន ដែលជាកម្មវិធីលើកស្ទួយសកម្មភាពសង្គម សិល្បៈ ក៏ដូចជាវប្បធម៌ខ្មែរ ក្នុងនោះមានជាអាទិ៍ មហោស្រពរូបថតអង្គរ (Angkor Photo Festival) ពិព័រណ៍នារីសម័យថ្មី (Ladies Fair) សិល្បៈគំនូរទីក្រុងកម្ពុជា (Cambodian Urban Art) ពិព័រណ៍កុមារនិងគ្រួសារ (Kids Fair & Family Expo)។ល។

បច្ចុប្បន្ន ធនាគារ ប្រេដ ប៊ែង ខេមបូឌា មានសាខាសរុប ចំនូន 4 ដែល 3 នៅទីក្រុងភ្នំពេញ 1 នៅខេត្តសៀមរាប។ នៅក្នុងខែកុម្ភៈនេះ ធនាគារនឹងដាក់ដំណើរការសាខាថ្មី នៅខេត្តបាត់ដំបង ហើយក៏នឹងគ្រោងបើកសាខាមួយទៀត នៅរង្វង់មូលចោមចៅ នៅមុនរដូវភ្លៀងខាងមុខនេះដែរ។ ទិសដៅរបស់ ធនាគារ ប្រេដ ប៊ែង ខេមបូឌា គឺបើកសាខាឲ្យបានចំនួន 20 និងដាក់ដំណើរការម៉ាស៊ីនអេធីអឹមឲ្យបានចំនួន 1000 នៅត្រឹមដំណាច់ ឆ្នាំ 2020៕

Website: https://www.bredcambodia.com

February 15, 2019

Arsenal ចាញ់ក្រោមស្នាដៃ BATE ខណៈ Chelsea ឈ្នះទាំងប្រផិតប្រផើយ

ក្រុម Arsenal នឹងត្រូវជួបការលំបាកដ៏ធំមួយក្នុងការប្រជែងយកកៅអីទៅវគ្គបន្តនៃក្របខ័ណ្ឌ Europa League ក្រោយពីបានរងបរាជ័យក្នុងលទ្ធផល 1-០ ក្រោមស្នាដៃក្រុម BATE Borisov ក្នុងការប្រកួតវគ្គ 32ក្រុមចុងក្រោយ ជើងទី1 ស្របពេលដែលខ្សែប្រយុទ្ធ Alexandre Lacazette បានរងពិន័យកាតក្រហមកាលពីថ្ងៃព្រហស្បតិ៍។

កីឡាករ Stanislav Dragun បានជួយឱ្យក្រុម BATE រកបានគ្រាប់បាល់មុន នៅមុនពេលបញ្ចប់តង់ទី1 ក្នុងទីក្រុង Barysaw ហើយក្រុម Arsenal មិនបានដាក់សម្ពាធខ្លាំងក្នុងការវាយបកវិញឡើយ ខណៈដែលការពិន័យកាតក្រហមទៅលើ Lacazette នៅជិតបញ្ចប់ការប្រកួត នឹងធ្វើឱ្យរូបគេអវត្តមានក្នុងការប្រកួតជើងទី2 នៅសប្តាហ៍ក្រោយនាកីឡដ្ឋាន Emirates។

បច្ចុប្បន្នក្រុមរបស់លោក Unai Emery ឈ្នះត្រឹមតែ 2ប្រកួតគត់ក្នុងចំណោមការប្រកួតក្រៅទឹកដី 89លើកចុងក្រោយរបស់ពួកគេ ហើយការឈ្នះទាំង 2លើកនោះ បានកើតឡើងលើទឹកដីក្រុម Huddersfield ក្នុងក្របខ័ណ្ឌ Premier League កាលពីសប្តាហ៍មុន និងលើទឹកដីក្រុម Blackpool ក្នុងពាន FA Cup។

ស្របពេលជាមួយគ្នានេះ Chelsea ដណ្តើមបានជ័យជម្នះក្នុងលទ្ធផល 2-1 នៅលើទឹកដីក្រុម Malmo ក្នុងការប្រកួតក្របខ័ណ្ឌ Europa League វគ្គ 32ក្រុមចុងក្រោយ ជើងទី1 កាលពីថ្ងៃព្រហស្បតិ៍ ដើម្បីបន្ធូរបន្ថយសម្ពាធទៅលើគ្រូបង្វឹកលោក Maurizio Sarri។

ក្រុមភ្ញៀវ Chelsea ត្រូវតែធ្វើការស្តារមុខមាត់វិញ ក្រោយពីការរងបរាជ័យក្រៅទឹកដីដ៏អាម៉ាស់ចំនួន 2លើកជាប់ៗគ្នា ខណៈដែលការបរាជ័យក្នុងលទ្ធផល 6-០ ក្រោមស្នាដៃក្រុម Manchester City កាលពីថ្ងៃអាទិត្យ បានកើតឡើង បន្ទាប់ពីការចាញ់ 4-០ នៅលើទឹកដីក្រុម Bournemouth។

លោក Sarri បានប្រាប់បណ្តញសារព័ត៌មាន BT Sport ថា៖ «ខ្ញុំពិតជារីករាយណាស់ ពីព្រោះយើងបានលេងជាមួយនឹងការជឿជាក់ ហើយវាមិនងាយស្រួលឡើយ ក្រោយពីការចាញ់ក្នុងការប្រកួតចុងក្រោយក្រោមស្នាដៃក្រុម Man City»៕
ប្រភពពី៖ worldsoccertalk

February 15, 2019

ថាម៉េច?? ស្រីស្អាត ផា ណាម៉ុច សុខចិត្តផ្អាកសម្ដែង តែមិនចោលលោក នៅ ស៊ីនឿន

មួយរយៈចុងក្រោយនេះ កញ្ញាផា ណាម៉ុច ដែលជាតួអង្គកាចឆ្នាស់ឆ្នើមនៅក្នុងរឿងភាគជាច្រើន ហាក់ប្រលែងដៃចោលក្នុងអាជីពសម្ដែង ខណៈតារាស្រករក្រោយជាច្រើនកំពុងតែប្រកួតប្រជែងគ្នាដណ្ដើមទីផ្សារ។ ជួបផា ណាម៉ុច កាលពីពេលថ្មីៗនេះនាងបញ្ជាក់អ្នកសារព័ត៌មាន ឡារ៉ែន ថា នាងមិនបានបោះបង់ចោលអាជីពសម្ដែងទេ មូលហេតុនាងសម្រាកមួយរយៈព្រោះនាងជាប់ដៃជាមួយនៅ ស៊ីនឿន។

កញ្ញាផា ណាម៉ុច នាងបានទទួលស្គាល់ថា នាងពិតជាបានប្រលែងដៃមួយទំហឹងក្នុងអាជីពសម្ដែងពិតមែន ពោលគឺ កាលពីពាក់កណ្ដាលឆ្នាំ2018 កន្លងទៅនេះ ទោះបីជាមានផលិតករជាច្រើនទាក់ទងឱ្យនាងសម្ដែងក៏ដោយ ក៏នាងបដិសេធដែរ។ តែយ៉ាងណានាងមិនបោះបង់ចោលអាជីពសិល្បៈទេ ទោះបីជាមានការងារច្រើនប៉ុណ្ណាក៏ដោយ ព្រោះតែអាជីពមួយនេះបានលើកមុខមាត់នាងក្នុងសង្គមយ៉ាងខ្លាំង។

តារាសម្ដែងរូបនេះបញ្ជាក់បន្ថែមថា មូលហេតុបដិសេធការសម្ដែងព្រោះ នាងរវល់ទទួលច្រៀងជាមួយវង់របស់តារាចម្រៀងនៅ ស៊ីនឿន គ្រាដែលនាងជាសមាជិកក្នុងក្រុមចម្រៀងជាមួយលោកនៅ ស៊ីនឿន អស់រយៈពេលជាង3ឆ្នាំទៅហើយ។ តារាសម្ដែងតួឆ្នាស់ម្នាក់នេះបន្ថែមថា ចាប់តាំងពីនាងចាប់អាជីពចម្រៀងជាមួយវង់តន្រ្ដីរបស់លោកនៅ ស៊ីនឿន គឺនាងកាក់កបណាស់ពោលគឺមានការងារធ្វើច្រើន សឹងតែរកពេលសម្រាកមិនបានដូច្នេះហើយទើបនាងសម្រេចចិត្ដផ្អាកការសម្ដែងមួយរយៈសិន ទំរាំតែរយាលការងារចម្រៀង។

ជាមួយគ្នានេះដែរកញ្ញាផា ណាម៉ុច បានបញ្ជាក់ទៀតថា «ច្រៀងជាមួយបងនឿន រីកចម្រើនខ្លាំងណាស់ គាត់មានប្រជាប្រិយភាពក្នុងសិល្បៈស្រាប់ដូច្នេះគាត់មានការងារធ្វើច្រើន ពិសេសគាត់ជាមេក្រុមដែលមានសណ្ដានចិត្ដល្អ យកធុរៈកូនចៅក្នុងក្រុម ម្លោះហើយទើបពួកយើងអាចរួមការងារជាមួយគ្នាបានយូរដូច្នេះ»។ ក្រៅពីអួតសរសើរពីសណ្ដានចិត្ដមេហើយនោះតារាចម្រៀង និងសម្ដែងរូបនេះបញ្ជាក់ថា ដើរជាមួយលោកនៅ ស៊ីនឿន មានរាស៊ីខ្លាំង ព្រោះមិនត្រឹមតែសម្បូរការងារធ្វើក្នុងសិល្បៈទេ សូម្បីតែអាជីវកម្មផ្ទាល់ខ្លួនរបស់នាងក៏រីកចម្រើនដែឬ។

ទោះយ៉ាងណាផា ណម៉ុច បានអះអាងថា ការផ្អាកពីការសម្ដែងយូរមិនបានធ្វើឲ្យនាងធ្លាក់ប្រជាប្រិយភាពទេ ព្រោះនៅពេលនាងទៅច្រៀងម្ដងៗតែងតែមានមហាជនបានស្គាល់នាងជាតួអង្គកាចឆ្នាស់ សម្ដែងនៅក្នុងរឿង «ហង្សបាក់ស្លាប» របស់ស្ថានីយទូរទស្សន៍ប៉ុស្ដិ៍លេខ៥។ ដូច្នេះការវិលត្រលប់មកសម្ដែងជាថ្មីនៅក្នុងរឿង«រ៉ៃប្ដូរទ្រនំ»របស់ស្ថានីយទូរទស្សន៍ប៉ុស្ដិ៍លេខ៥ក្នុងតួអង្គស្រីមានចរិតក្រម៉ិចក្រម៉ើមទើបតែក្រុងពាលីកាលពីថ្ងៃ14 កុម្ភៈ រិតតែធ្វើឱ្យមហាជនស្គាល់នាងបន្ថែមទៀត៕

February 15, 2019

Nishikori ឈានទៅវគ្គ 1/4 នៃពាន Rotterdam Open

កីឡាករវាយកូនបាល់សញ្ជាតិជប៉ុន Kei Nishikori បានកត់ត្រាជ័យជម្នះក្នុងលទ្ធផល 6-1 និង6-4 លើកីឡាករឡេតូនី ErnestsGulbis កាលពីថ្ងៃព្រហស្បតិ៍ ដើម្បីឈានទៅវគ្គ 8នាក់ចុងក្រោយនៃព្រឹត្តិការណ៍ Rotterdam Open។

ក្នុងនាមជាកីឡាករកំពូលរបស់អាស៊ី កីឡាករមានចំណាត់ថ្នាក់លេខ៧ក្នុងពិភពលោករូបនេះ បានប្រើប្រាស់ពេលអស់ 1ម៉ោង និង 15នាទីដើម្បីឈានទៅវគ្គបន្ត ខណៈដែលរូបគេបានកត់ត្រាជ័យជម្នះជាលើកទី3 នៅពេលប្រកួតជាមួយនឹងកីឡាករ Gulbis ដែលធ្លាប់បានឈានទៅវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ French Open រួចមកហើយ។
Nishikori នឹងត្រូវប៉ះជាមួយនឹងកីឡាករ Hungarian MartonFucsovics ដែលបានផ្តួលកីឡាករ NikolozBasilashvili របស់ហ្ស៊កហ្ស៊ី ក្នុងលទ្ធផល 7-6 (7/1) និង6-1 នៅថ្ងៃសុក្រនេះ ដើម្បីប្រជែងយកកៅអីទៅកាន់វគ្គពាក់កណ្តាលផ្តាច់ព្រ័ត្រ។

Nishikori ដែលបានឈ្នះពានក្នុងកម្មវិធី ATP ជាលើកទី 12របស់គេក្នុងទីក្រុង Brisbane កាលពីដើមឆ្នាំនេះ បានកត់ត្រាជ័យជម្នះជាលើកទី10 របស់គេនៅរដូវកាលនេះ ដោយចាញ់ត្រឹមតែ 1លើកគត់ ខណៈដែលការចាញ់តែ 1លើកនោះ បានកើតឡើងដោយសារតែរូបគេបានបោះបង់ការប្រកួតក្នុងព្រឹត្តិការណ៍ Australian Open វគ្គ 8នាក់ចុងក្រោយជាមួយនឹងកីឡាករ Novak Djokovic។

Nishikori បានឱ្យដឹងថា៖ «នេះគឺជាការប្រកួតល្អប្រសើរជាងការប្រកួតទី1 ទៅទៀត។ ខ្ញុំបានវិលទៅប្រកួតវិញបានយ៉ាងល្អ និងបានធ្វើឱ្យរូបគេស្ថិតក្រោមសម្ពាធ។ ការប្រកួតសិតទី2 ពិតជាស្វិតស្វាញ ប៉ុន្តែ ខ្ញុំមិនបារម្ភឡើយ ក្រោយពីរូបគេបានវាយបកវិញ។ ខ្ញុំអាចលេងកីឡាវាយកូនបាល់ដ៏ល្អនៅថ្ងៃនេះ។ ខ្ញុំពិតជារីករាយជាមួយនឹងកម្រិតរបស់ខ្ញុំណាស់»៕

ប្រភពពី៖ Channel News Asia

February 15, 2019

Author: អេបិល