អេបិល - La Reine Media

Audi បង្ហើបឱ្យដឹងថា ខ្លួននឹងចេញលក់រថយន្តអគ្គិសនី SUV នៅឆ្នាំ2020

ក្នុងពិព័រណ៍យានយន្តនៅសហរដ្ឋអាមេរិក Genova Motor Show ក្រុមហ៊ុនផលិតរថយន្តដ៏ល្បីល្បាញ Audi បានដាក់បង្ហាញរថយន្តនាថ្ងៃអនាគតរបស់ខ្លួន គឺរថយន្តប្រើចរន្តអគ្គិសនី SUV លក្ខណៈគ្រួសារដែលនឹងមានលក់នៅឆ្នាំ2020។

យោងតាមប្រភពព័ត៌មានបានឱ្យដឹងថា រថយន្តដ៏ទំនើបប្រភេទ e-tron Sportback នេះស្ថិតក្នុងចង្វាក់ផលិតកម្មរបស់ក្រុមហ៊ុន ដែលនឹងបំពាក់ដោយបច្ចេកវិទ្យាជំនាន់ចុងក្រោយ ដោយខាងក្នុងបង្កប់សុទ្ធប្រព័ន្ធឌីជីថលដូចជា ផ្ទាំងផ្តល់ដំណឹង(តាប្លូ)ទំហំ 12.3អ៊ិញដ៏ឆ្លាតវៃ។ អំពូលភ្លើងបំភ្លឺផ្លូវ LED ឆ្លាតវៃ និងមានបង្កប់សេនស័រ ក៏ដូចជាកាមេរ៉ាមុខ-ក្រោយ ងាកចូលចតដោយស្វ័យប្រវត្តិ មើលឃើញ 360ដឺក្រេ រួមនឹងបច្ចេកវិទ្យាជាច្រើន។ ឯផ្នែកខាងក្រៅវិញមានការរចនាយ៉ាងស្រស់សង្ហា។

Audi e-tron Sportback នឹងបំពាក់ម៉ូទ័រអគ្គិសនីចំនួន2 ផ្តល់កម្លាំង 300គីឡូវ៉ាត់ដែលអាចរត់បានល្បឿនអតិបរមាពី ០ ដល់ 100គីឡូម៉ែត្រក្នុង 1ម៉ោងដោយចំណាយពេលត្រឹមតែ 5.5វិនាទីប៉ុណ្ណោះ។ ក្នុងនោះដែរ រថយន្តនេះក៏មានអាគុយប្រភេទ Lithium-ion ជំនាន់ថ្មី ថាមពល 95គីឡូវ៉ាត់ម៉ោង បំពាក់បច្ចេកវិទ្យាសាកបញ្ចូលភ្លើងលឿន ដែលសាកពេញហើយអាចរត់បានចម្ងាយ 402គីឡូម៉ែត្រ។

Audi នៅតែរក្សាបច្ចេកវិទ្យាឆ្លាតវៃបំពាក់លើកង់ទាំង4 គឺ Quatto all-wheel drive ជួយរក្សាលំនឹងរថយន្តបានល្អ ទោះជាមានឧបសគ្គបែបណាក៏ដោយ តែតម្លៃវិញ នៅមិនទាន់ប្រកាសនៅឡើយទេ៕

ទស្សនាវីដេអូខាងក្រោម៖

April 9, 2019

បើដឹងតម្លៃអ៊ីនធើណិត 5G នៅកូរ៉េខាងត្បូងហើយ ប្រាកដជាញាក់សាច់តែម្ដង!

កូរ៉េខាងត្បូង គឺជាប្រទេសដំបូងគេក្នុងពិភពលោកដែលបានដាក់ដំណើរការប្រព័ន្ធទំនាក់ទំនងជំនាន់ទី5 (5G) ដែលបានចាប់ផ្ដើមកាលពីថ្ងៃទី5 ខែមេសាកន្លងមក។

មុនការដាក់ឱ្យដំណើរការនេះ មានការអនុញ្ញាតពីនិយតករដោយកំណត់តម្លៃប្រចាំខែចន្លោះពី 50 ដុល្លារ ទៅ 110ដុល្លារ ប៉ុន្តែទទួលបាន Data តិចបំផុត។ បើយោងតាមសារព័ត៌មានក្នុងស្រុក Yonhap បានបង្ហាញឈ្មោះក្រុមហ៊ុនដែលដាក់តម្លៃផ្តល់សេវា 5G ដូចខាងក្រោម៖

ក្រុមហ៊ុនផ្គត់ផ្គង់សេវា SK Telecom ទទួលបានការអនុញ្ញាតដើម្បីផ្ដល់ជូននូវគម្រោងដូចខាងក្រោមនេះ ៖

Data ទំហំ 8GB ជាមួយតម្លៃ 49ដុល្លារ

Data ទំហំ 150GB ជាមួយតម្លៃ 66ដុល្លារ

Data ទំហំ 200GB ជាមួយតម្លៃ 84ដុល្លារ

Data ទំហំ 300GB ជាមួយតម្លៃ 110ដុល្លារ

ក្រុមហ៊ុន SK Telecom បាននិយាយថា ប្រព័ន្ធទំនាក់ទំនងរបស់ខ្លួននឹងអាចផ្ដល់ជូនល្បឿនលឿនបំផុតដល់ 2.7Gbps ដោយប្រើប្រាស់ Galaxy S10 5G។ ក្នុងល្បឿនលឿនប៉ុណ្ណេះ អ្នកប្រើប្រាស់អាចប្រើគម្រោងប្រចាំខែ 8GB អស់ក្នុងពេលមិនដល់ 25វិនាទីឡើយ ហើយគម្រោង 300GB អាចទប់បានតែ 15នាទីប៉ុណ្ណោះ។

ក្រុមហ៊ុន LG Uplus ក៏មានផ្ដល់សេវា 5G ផងដែរ ជាមួយគម្រោង 9GB តម្លៃប្រមាណ 49ដុល្លារ គម្រោង 150GB តម្លៃប្រមាណ 66ដុល្លារ និងគម្រោង 250GB តម្លៃប្រមាណ 84ដុល្លារ។ ក្រុមហ៊ុនមួយទៀតគឺ KT ជាមួយតម្លៃចាប់ពី 49ដុល្លារដូចក្រុមហ៊ុន 2ទៀតដែរ៕

April 9, 2019

Casandre Tubbs ដណ្តើមបានមេដាយមាសតេក្វាន់ដូពិភពលោក នៅប្រទេសព័រតូរីកូ មួយទៀតហើយ

កីឡាការិនីកូនកាត់ខ្មែរ-អាមេរិកាំង Casandre Tubbs បានប្រកួតឈ្នះមេដាយមាស 1គ្រឿងពីការប្រកួតដណ្ដើមជើងឯកតេក្វាន់ដូ Puerto Rico Open ដែលរៀបចំឡើងដោយសហព័ន្ធកីឡាតេក្វាន់ដូពិភពលោកចាប់ពីថ្ងៃទី5-7 ខែមេសា ឆ្នាំ2019 នៅប្រទេសព័រតូរីកូ។

មិកស៊ិក គឺជាប្រទេសដែលបានឈ្នះមេដាយមាសច្រើនជាងគេ ដោយឈ្នះមេដាយមាសចំនួន 10គ្រឿងក្នុងចំណោមមេដាយមាសចំនួន 16គ្រឿងនៃព្រឹត្តិការណ៍នេះទាំងមូល។ ខណៈម្ចាស់ផ្ទះព័រតូរីកូ និងកាណាដាឈ្នះមេដាយមាសចំនួន 2ដូចគ្នា ចំណែកប្រទេសកម្ពុជា និងដាណឺម៉ាកឈ្នះមេដាយមាស 1ម្នាក់ដូចគ្នា។

គ្រូបង្វឹកតេក្វាន់ដូ លោក Greg Tubbs ដែលជាឪពុកបង្កើតរបស់កីឡាការិនីកូនកាត់ខ្មែរ-អាមេរិកាំងរូបនេះ បានបញ្ជាក់ថា កូនរបស់លោកបានប្រកួតក្នុងវិញ្ញាសានារីទម្ងន់ 62គីឡូក្រាម តំណាងឱ្យប្រទេសកម្ពុជា ដោយបានជួយកម្ពុជាដណ្ដើមបានមេដាយមាស 1 ខណៈកាណាដាបានមេដាយប្រាក់ ឯព័រតូរីកូ និងមិកស៊ិកបានមេដាយសំរឹទ្ធម្នាក់1៕

April 9, 2019

កង្វះបទពិសោធ គឺជាមូលហេតុដែលធ្វើឱ្យក្រុមខេត្តកំពង់ចាមរបូតគ្រាប់បាល់ដល់ទៅ 22គ្រាប់ត្រឹម 2សប្ដាហ៍ប៉ុណ្ណោះ

ក្រុមខេត្តកំពង់ចាមបានបន្តរបូតគ្រាប់បាល់ 11គ្រាប់ទៀតក្នុងជំនួបជាមួយក្រុមក្រសួងការពារជាតិកាលពីថ្ងៃអាទិត្យ ដែលជាការបរាជ័យ 2លើកផ្ទួនៗក្នុងការប្រកួតលីកកំពូលកម្ពុជានាសប្តាហ៍ទី3 នេះ។

ចំពោះមូលហេតុដែលនាំឱ្យកូនក្រុមរបស់លោកធ្វើមិនបានល្អបែបនេះ គ្រូបង្វឹកក្រុមបាល់ទាត់ខេត្តកំពង់ចាម បានបង្ហើបឱ្យដឹងថា នេះមកពីកូនក្រុមរបស់លោកនៅស្ទើរបទពិសោធច្រើនក្នុងការប្រកួតធំៗ ម្យ៉ាងទៀតយើងមានកីឡាកររបួសច្រើនទៀត ទើបជាហេតុធ្វើឱ្យក្រុមរបស់លោកពិបាកក្នុងការប្រកួត។

គួរបញ្ជាក់ផងដែរថា ក្រុមខេត្តកំពង់ចាមកំពុងឈរនៅលេខរៀងទី12 ក្នុងចំណោម 14ក្រុមនៃលីកកំពូលកម្ពុជា ដែលធ្វើបានយ៉ាងល្អដោយរកបាន 3ពិន្ទុក្នុងជំនួបបើកឆាកដំបូង តែការប្រកួតក្រោយៗមក ពួកគេបានភ្លាត់ស្នៀតចាញ់ក្រុមអង្គរថាយហ្គឺរ និងក្រុមក្រសួងការពារជាតិក្នុងលទ្ធផលដូចគ្នាបេះបិទ គឺ11 ទល់នឹង0 ក្នុងសប្តាហ៍ទី2 និងទី3 ជាបន្តបន្ទាប់៕

April 9, 2019

គ្រូបង្វឹកយុទ្ធគុន ខម មួយរូបទទួលមរណភាពក្រោយជួបគ្រោះថ្នាក់ចរាចរណ៍

កាលពីព្រឹកថ្ងៃទី8 ខែមេសា ឆ្នាំ2019 ម្សិលមិញនេះ គ្រូបង្ហាត់ក្បាច់យុទ្ធគុន ខម ម្នាក់បានស្លាប់បាត់បង់ជីវិតបន្ទាប់ពីបានជួបហេតុការណ៍គ្រោះថ្នាក់ចរាចរណ៍មួយនៅខេត្តព្រះវិហារ ដោយសារមានឈាមកកនៅក្នុងខួរក្បាលក្រោយពេលរងរបួសដោយសារគ្រោះថ្នាក់ចរាចរណ៍នោះ។

គណនីហ្វេសប៊ុកមួយឈ្មោះ Nakrak Neakky បានបង្ហោះសារមួយដែលបានបញ្ជាក់ពីការបាត់បង់ជីវិតរបស់គ្រូបង្ហាត់យុទ្ធក្រមខមមួយរូប ហើយបានធ្វើឱ្យមហាជនមានការភ្ញាក់ផ្អើល សោកស្ដាយ និងចូលរួមរំលែកទុក្ខដោយអារម្មណ៍សោកសង្វេគយ៉ាងខ្លាំង ដោយសារតែក្បាច់គុនមួយនេះមិនសូវមានអ្នកចេះ ហើយគ្រូបង្វឹកវ័យក្មេងរូបនោះបានជួយលើកតម្កើងក្បាច់គុនដ៏កម្រនេះ។

ចំពោះព័ត៌មានលម្អិតអំពីគ្រោះថ្នាក់ចរាចរណ៍មួយនេះ គឺមិនបានបញ្ជាក់ឱ្យបានច្បាស់លាស់ឡើយ ដោយគ្រាន់តែឱ្យដឹងថា ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីយប់មិញ(ថ្ងៃទី8) នៅក្នុងខេត្តព្រះវិហារ ដោយគ្រូពេទ្យមិនអាចជួយសង្គ្រោះទាន់ពេលវេលាបានឡើយ ក្រោយពីគ្រូបង្វឹករូបនេះមានបញ្ហាឈាមកកក្នុងខួរក្បាល៕

April 9, 2019

ឆ្នាំនេះម្ចាស់ក្លិបអង្គរថាយហ្គឺរ មិនអាចបំបែកឯកទគ្គកម្ម អ្នកមកទស្សនាផ្ទាល់លីកកំពូលកម្ពុជាបានឡើយ

លោក Akihiro Kato ម្ចាស់ក្លិបអង្គរថាយហ្គឺរ ដែលជាជនជាតិជប៉ុនបានប្រកាសថា លោកនឹងបំបែកឯកទគ្គកម្មនៃចំនួនអ្នកគាំទ្របាល់ទាត់លីកកំពូលកម្ពុជាក្នុងរដូវកាល2019នេះ។

លោកបានជ្រើសរើសយកថ្ងៃទី7 ខែមេសា ឆ្នាំ2019 ដែលជាថ្ងៃជំនួបរវាងក្លិបរបស់លោកជាមួយក្លិបបាល់ទាត់បឹងកេត ជាថ្ងៃដែលលោកត្រៀមបំបែកឯកទគ្គកម្មមួយនេះ ដោយលោកបានត្រៀមកម្មវិធីពិសេសៗជាច្រើនសម្រាប់ស្វាគមន៍អ្នកទស្សនាដែលមកចូលរួមនៅកីឡដ្ឋានខេត្តសៀមរាបមួយនេះដោយផ្ទាល់។ តែអ្វីដែលជាការរំពឹងទុកនោះមិនបានកើតឡើងឡើយ ដោយសារមានអ្នកមកទស្សនា និងគាំទ្រត្រឹមតែ 3,090នាក់តែប៉ុណ្ណោះ។

គួររំឭកផងដែរថា កាលពីឆ្នាំមុន កីឡដ្ឋាន ខេត្តសៀមរាប បានបំបែកឯកទគ្គកម្មជាកីឡដ្ឋានដែលមានអ្នកចូលរួមទស្សនា ច្រើនជាងគេបំផុតប្រចាំរដូវកាល2018 ដោយមានអ្នកទស្សនា 4,200នាក់។

April 9, 2019

កូនប្រុសម្ចាស់ក្លិបបឹងកេតត្រូវបានក្លិប Bacelona កោះហៅទៅធ្វើតេស្ត

កូនប្រុសម្ចាស់ក្លិបបឹងកេតដែលជាយុវកីឡាករបាល់ទាត់នៅសាលាបាល់ទាត់បឹងកេត បានចេញដំណើរទៅកាន់ប្រទេសអេស្ប៉ាញតាមការកោះហៅរបស់សាលាបាល់ទាត់ក្លិប Barcelona ( FCBESCOLA ) ដើម្បីសាកល្បងសមត្ថភាព បន្ទាប់ពីរូបគេធ្លាប់បានទៅហ្វឹកហាត់នៅទីនោះកាលពីពេលកន្លងមក និងទទួលបានការចាប់អារម្មណ៍ពីក្រុមគ្រូបង្ហាត់។

ការសាកល្បងបានប្រព្រឹត្តទៅកាលពីថ្ងៃអាទិត្យ ទី7 ខែមេសាកន្លងទៅ ហើយប្រសិនបើអ្វីៗល្អប្រសើរ កីឡាករថ្នាលយុវកីឡាករមួយរូបនេះនឹងជាប់តេស្តជាកីឡាករមួយរូបនៅក្នុងក្រុមថ្នាលរបស់ក្លិបយក្សអេស្ប៉ាញមួយនេះ ហើយរូបគេនឹងចូលរួមការហ្វឹកហាត់ចាប់ពីខែមិថុនាតទៅ។

គួរបញ្ជាក់ផងដែរថា នេះគឺជាលើកទី3 របស់កុមារា Kasidej Vasunan (ហៅ DOME)ហើយ ដែលរូបគេបានធ្វើដំណើរទៅកាន់ប្រទេសអេស្ប៉ាញ បន្ទាប់ពីធ្លាប់បានទៅចូលរួមហ្វឹកហាត់ចំនួន 2លើកកន្លងមកកាលពីឆ្នាំ2018 ជាមួយនឹងកុមារជាច្រើននាក់ទៀតមកពីជុំវិញពិភពលោក។

April 9, 2019

ក្រុមជម្រើសជាតិកម្ពុជា ស្ថិតនៅចំណាត់ថ្នាក់លេខ8 ក្នុងចំណោម 11ប្រទេសនៅអាស៊ាន

ក្នុងតារាងចំណាត់ថ្នាក់ក្រុមបាល់ទាត់ពិភពលោក FIFA ក្រុមបាល់ទាត់ជម្រើសជាតិកម្ពុជាបានធ្លាក់ចំណាត់ថ្នាក់ 1លេខ សម្រាប់ខែមេសាដែលទើបតែនឹងប្រកាសកាលពីពេលថ្មីៗនេះ។

ក្នុងចំណោម 211ប្រទេសលើពិភពលោក កម្ពុជាស្ថិតនៅលេខរៀងទី173 នៃចំណាត់ថ្នាក់ក្រុមបាល់ទាត់ក្នុងពិភពលោក និងស្ថិតនៅលើលេខរៀងទី36 ក្នុងចំណោម 46ប្រទេសនៅតំបន់អាស៊ី ហើយស្ថិតនៅលេខរៀងទី8 ក្នុងចំណោម ;11ប្រទេសនៅតំបន់អាស៊ាន។

គួររំឭកផងដែរថា កាលពី 3ខែមុន កម្ពុជាបានស្ថិតនៅលើចំណាត់ថ្នាក់ខ្ពស់ដែលមិនធ្លាប់មាន គឺឈរនៅលើលេខរៀងទី165 ;ដែលជាលេខរៀងស្ថិតនៅលើប្រទេសក្នុងប្រទេសក្នុងអាស៊ានដូចគ្នាចំនួន5 ដូចជា សិង្ហបុរី ម៉ាឡេស៊ី ឡាវ ប្រ៊ុយណេ និងទីម័រខាងកើត៕

April 9, 2019

កៀកចូលឆ្នាំខ្មែរនេះ តារាសិល្បៈមួយក្រុមកាន់ហឹប ដើររៃអង្គាសប្រាក់ជួយគន្ធបុប្ផា និងមជ្ឈមណ្ឌលជាតិថែទាំកុមារនិងទារក

ពិតជាគួរឱ្យសរសើរណាស់ ខណៈដែលបានឃើញតារាសិល្បៈមួយក្រុមរួមមាន អ្នកនាង គ្រត នាយតាក់ស៊ី និងភរិយា នាយស្វិត និងភរិយា លោក សាយ សៀរ៉ា តារាសម្តែង កញ្ញា ឆើតឆាយ និងតារាចម្រៀងប៉ុន្មានដួងទៀត បាននាំគ្នាកាន់ហឹបរ៉ៃអង្គាសប្រាក់ជួយមន្ទីរពេទ្យគន្ធបុប្ផា និងមជ្ឈមណ្ឌលជាតិថែទាំកុមារនិងទារក ទាំងទឹកមុខអរសប្បាយរីករាយ ដោយគ្មានភាពនឿយហត់នោះទេ។

អ្នកនាងគ្រត បានប្រាប់ឡារ៉ែនថា នេះជាការសាងបុណ្យកុសលមួយ និងជាត្រៀមអបអរទទួលអំណរពរជ័យពីទេវតាឆ្នាំថ្មី បើទោះបីជាមរមារញឹកយ៉ាងណា ក៏មកចូលរួមជួយសង្គមជាតិយើងដែរ។តារាកំប្លែងស្រីល្បីឈ្មោះអ្នកនាងគ្រត បានបន្ដប្រាប់ឱ្យដឹងបន្ថែមថា អ្នកនាងឆ្លៀតពេលមកជួយកិច្ចការមនុស្សធម៌ខាងលើជាមួយអ្នកបងម្ចាស់ហាង«មីស៊ុបកូនកាត់»ដែលរាប់អានថៅកែស្រី។

មិនខុសពីគំនិតរបស់បងគ្រតលោក សាយ សៀរ៉ា តារាសម្តែងក៏បានចូលរួមក្នុងការងារខាងលើជាមួយហាងមីស៊ុបកូនកាត់ដែរដោយលើកឡើងទៀតថា លោករាប់អានជាមួយបងស្រីថៅកែហាងដោយបងស្រីជាមនុស្សមានចិត្តបុណ្យជួយគេគ្រប់រូបភាពមិនរើសអើង។ ម្ល៉ោះហើយនាថ្ងៃទី19 មេសា ក្រោយបុណ្យចូលឆ្នាំយើងរៀបចំអំណោយធំមួយដល់កុមារទារកជាង2០០នាក់។ អ៊ីចឹងហើយទើបម្នាក់ៗយកពេលទំនេរស្រែកច្រៀងខ្លះកាន់ហឹបជួយអំពាវនាវនៅមុខហាងមិនខ្មាស់ទេដើម្បីឱ្យបងប្អូនដឹងបរិច្ចាកប្រាក់មកជួយអ្នកអត់តិចតួចក្តីចែករំលែកគ្នាខ្មែរតែមួយ។

ដៃឱបធុងហឹបប្រាក់ទឹកមុខញញឹមចេញដោយបេះដូងរំពឹងបានដល់ដៃកុមារទារកទីទ័ល លោកស្រីថៅកែហាង«មីស៊ុបកូនកាត់»បានថ្លែងដែរថា លោកស្រីកាន់គោលការណ៍ជួយគ្រប់រូបភាពរាលកិច្ចការមនុស្សធម៌ព្រោះលោកស្រីធ្លាប់អត់រស់នៅក្រីក្រកូនកំព្រាយល់ច្បាស់ពីភាពខ្វះខាត។ អ៊ីចឹងមានតែព្យាយាមជួយតាមលទ្ធភាពដែលអាចធ្វើបានកម្រិតណាយើងជួយតាមកម្លាំង។ មិនត្រឹមតែប៉ុណ្ណឹងទេលោកស្រីរមែងលើកស្ទួយដល់សិប្បកម្មស្មូនឆ្នាំងដីដោយហាងស៊ុបរបស់លោកស្រីប្រកាន់យកស្មូនឆ្នាំងដីធ្វើជារបស់ដាក់មីស៊ុបប្រយោជន៍ជួយដល់អ្នកស្មូនឆ្នាំងតាមខេត្ត។ តាមរយៈដំណឹងនេះសូមមិត្តយុវវ័យប្រជាពលរដ្ឋទាំងអស់ជួយបរិច្ចាគហើយមកលេងកោះពេជ្រកុំភ្លេចមកទីតាំងស៊ុបចែករំលែកក្តីស្រឡាញ់ទាំងអស់គ្នា។

សូមជម្រាបដែរថា ក្នុងនោះនៅថ្ងៃទី19មេសា ខាងមុខនេះក្រុមតារាសិល្បៈនេះនិងមានកម្មវិធីចែកអំណោយដល់ «មជ្ឈមណ្ឌលជាតិថែទាំកុមារនិងទារក» ស្ថិតនៅតាមបណ្តោយផ្លូវ2004រាជធានីភ្នំពេញ។ ម្ល៉ោះហើយទើបសិល្បករទាំងអស់បានរៀបចំដុតដៃដុតជើងគ្នាចែករំលែកការងារជួយកិច្ចការមួយនេះឱ្យបានដើម្បីអំពាវនាវដល់សប្បុរសជនជួយការងារដល់មជ្ឈមណ្ឌលខាងលើ។

April 9, 2019

រ៉ូលីន មាស សុខសោភា និងតារាល្បីៗអង្រួនឆាកសង្ក្រាន្តVIPកក្រើកខេត្តព្រះសីហនុ

ពិតជាកក្រើកមិនធ្លាប់មាននៅក្នុងខេត្តព្រះសីហនុ ខណៈដែលវត្តមានតារាចម្រៀងល្បីៗទៅចូលរួមពិធីជប់លៀងដ៏អធឹកអធមអបអរបុណ្យចូលឆ្នាំរបស់បុរីវីអាយភី នាយប់ថ្ងៃទី៧ មេសា មាន៖ កញ្ញា មាស សុខសោភា លោក យ៉ែម សំអូន កញ្ញា សូដា នីតា កញ្ញា រ៉ូលីន អ្នកនាងសួន ចន្ថា កញ្ញា ឡេង មុនីរចនា អ្នកនាង ស៊ីន ឧត្តមផល្លា លោក រិន សាវ៉េត (more…)

April 9, 2019

Author: អេបិល