ក្រុមហ៊ុនជប៉ុនមួយបានបើកការដ្ឋានសាងសង់ទោងកន្រ្តកវិលជាផ្លូវការ ដោយបានចំណាយទឹកប្រាក់វិនិយោគជាង 7លានដុល្លារ លើការសាងសង់ទោងកន្រ្តកវិលលំដាប់អន្តរជាតិ ដែលមានទីតាំងស្ថិតក្នុងបរិវេណផ្សារ Box Vill នៅភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប។
លោក ថាកេយ៉ូសិ ស៊ីណូមីយ៉ា (Takeyoshi Shinomiya) ប្រធានក្រុមប្រឹក្សាភិបាលក្រុមហ៊ុនអង្គរអាយ ខមភេនី លីមីធីត បានថ្លែងថា ក្រុមហ៊ុនជប៉ុនAngkor Eye គឺជាក្រុមហ៊ុន ដែលមានសាជីវកម្មក្នុងប្រទេសកម្ពុជា ដោយធ្វើការវិនិយោគទឹកប្រាក់ចំនួន 7.2លានដុល្លារអាមេរិក សម្រាប់ការសាងសង់ទោងកន្រ្តកវិលដ៏ថ្មីមួយនេះនៅក្នុងក្រុងសៀមរាប។
លោកបានបន្ដថា កន្លងមក ក្រុមហ៊ុន Angkor Eye បានចាប់ដៃគូធុរកិច្ចខាងសាងសង់សួនកម្សាន្តក្នុងប្រទេសជប៉ុន និងផ្តល់សេវាដំណោះស្រាយការកម្សាន្ត កន្លែងកម្សាន្តធំៗ និងផ្សារទំនើបធំៗ ហើយមកដល់បច្ចុប្បន្ននេះ ក្រុមហ៊ុនមានទោងកន្ត្រកវិលដ៏ទាក់ទាញចំនួន 13កន្លែងនៅជុំវិញពិភពលោក។
ចំណែកគម្រោងទោងកន្រ្ដកវិល Angkor Eye នៅក្នុងក្រុងសៀមរាបនេះ គឺជាគម្រោងទី14 របស់ក្រុមហ៊ុន។ ថ្មីៗនេះ ដោយមានកំណើនតម្រូវការឧបករណ៍ និងសួនកម្សាន្តតាមបែបវិស្វកម្ម និងស្តង់ដាជប៉ុន ដែលមានគុណភាពខ្ពស់ ក្រុមហ៊ុនរបស់លោកបានពង្រីកខ្លួនទៅជាអ្នកនាំចេញទោងកន្រ្តកវិល និងឧបករណ៍ជំនាញផ្សេងៗទៀតជាច្រើន។
លោក ម៉េង ហៀង អគ្គនាយកក្រុមហ៊ុន Angkor Eye បានគូសបញ្ជាក់ថា៖« ទោងកន្រ្តកវិល នេះ នឹងសាងសង់ឡើងក្នុងកម្ពស់ 85ម៉ែត្រ មានចំនួន 48កន្ត្រក ដែលអាចផ្ទុកភ្ញៀវទេសចរបាន 192នាក់ក្នុងពេលតែមួយ ហើយភ្ញៀវទេសចរម្នាក់នឹងត្រូវប្រើពេលវេលា 18នាទី សម្រាប់ការជិះមួយជុំ»។
លោកបានបន្ដថា ពេលជិះទោងកន្ត្រកវិលកម្សាន្តលើអាកាស ភ្ញៀវទេសចរអាចទស្សនាទិដ្ឋភាពទីរួមខេត្តសៀមរាប ហើយអាចផ្តិតយករូបភាព និងទេសភាពដ៏ស្រស់ត្រកាល ជុំវិញក្រុងសៀមរាប និងអាចមើលឃើញ តំបន់បឹងទន្លេសាប និងទេសភាពរមណីយដ្ឋានអង្គរ ពីលើអាកាស ជាពិសេសអាចមើលឃើញប្រាង្គប្រាសាទអង្គរវត្តដ៏ល្បីល្បាញទៀតផង។
ជាមួយគ្នានេះ លោកក៏បានបង្ហាញពីមូលហេតុដែលក្រុមហ៊ុនសម្រេចយកទីតាំងខេត្តសៀមរាប សម្រាប់ការវិនិយោគនេះ ដោយសារតែខេត្តសៀមរាបមានប្រាង្គប្រាសាទអង្គរវត្តដ៏អស្ចារ្យលើពិភពលោក ហើយមានភ្ញៀវទេសចរជាតិ និងអន្តរជាតិមកទស្សនាយ៉ាងច្រើនកុះករ និងកំពុងមានសម្ទុះកើនឡើងយ៉ាងខ្លាំងក្លា និងប្រកបដោយភាពទាក់ទាញបំផុត។ លោកសង្ឃឹមថា ទោងកន្ត្រកវិលលំដាប់ពិភពលោកនេះ នឹងចូលរួមចំណែកក្នុងការផ្តល់សេវាកម្សាន្តបន្ថែមលើកម្មវិធីទេសចរណ៍របស់ភ្ញៀវទេសចរជាតិ និងអន្តរជាតិ បន្ទាប់ពីពួកគេបានទស្សនាប្រាសាទបុរាណ និងរមណីយដ្ឋានធម្មជាតិ ដែលមាននៅក្នុងខេត្តសៀមរាបរួចមក។
ឯកឧត្តមអភិបាលខេត្ដបានបញ្ជាក់ថា ការវិនិយោគមណ្ឌលកម្សាន្តកន្រ្តកវិលលំដាប់អន្តរជាតិនេះ គឺជាផលិតផលទេសចរណ៍ថ្មីមួយទៀតនៅក្នុងខេត្តសៀមរាប ដែលនឹងរួមចំណែកធ្វើឱ្យអ្នកទេសចរអាចស្នាក់នៅកម្សាន្តសប្បាយនៅក្នុងខេត្តសៀមរាបបានយូរផងដែរ។ លោករំពឹងថា ក្រៅពីមណ្ឌលកម្សាន្តកន្រ្តកវិលនេះ ក្រុមហ៊ុនជប៉ុនមួយនេះ នឹងបង្កើននូវការវិនិយោគបន្ថែមទៀតនៅព្រះរាជាណាចក្រកម្ពុជា ជាពិសេសក្នុងខេត្តសៀមរាបលើវិស័យផ្សេងៗទៀត ដើម្បីចូលរួមដល់កិច្ចអភិវឌ្ឍន៍នៅកម្ពុជា។
ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា៖« ខេត្តសៀមរាប គឺជាប៉ូលសេដ្ឋកិច្ចដ៏សំខាន់របស់ប្រទេស ដោយផ្អែកលើសក្តានុពលវិស័យទេសចរណ៍ ព្រោះតែភាពសម្បូរបែប នៃសម្បតិ្តវប្បធម៌ រមណីយដ្ឋានប្រវត្តិសាស្រ្តធម្មជាតិ ជាពិសេសប្រាសាទអង្គរវត្ត ដែលធ្វើឱ្យភ្ញៀវទេសចរមកទស្សនាខេត្តសៀមរាប មានការកើនឡើងជាលំដាប់»។
ឯកឧត្តម បានបញ្ជាក់ថា៖« ជាក់ស្តែងក្នុងឆ្នាំ2018 កន្លងទៅនេះ មានភ្ញៀវទេសចរចំនួនជាង 5, 8លាននាក់ កើនឡើង 5,36% តាមរយៈកំណើននៃភ្ញៀវទេសចរទាំងនេះ ដែលបានបង្កើនការងារជូនបងប្អូនប្រជាពលរដ្ឋក្នុងខេត្តប្រមាណ 38ម៉ឺននាក់ ដោយក្នុងនោះផ្តល់ការងារដោយផ្ទាល់ចំនួន 8ម៉ឺននាក់ និងដោយប្រយោលប្រមាណជា 30ម៉ឺននាក់»៕
