អេបិល - La Reine Media

Supachai Jaided ពីគ្មានអ្នកស្គាល់ ក្លាយជាខ្សែប្រយុទ្ធ Super Star របស់ថៃ

កីឡាករវ័យ 19ឆ្នាំ Supachai Jaided(ស៊ុផាឆៃ ចៃឌេត) បានក្លាយជាខ្សែប្រយុទ្ធដ៏មុតស្រួចរបស់ថៃនៅក្នុងពានរង្វាន់ AFF SUZUKI CUP 2018 ដែលបានបង្ហាញខ្លួនឡើងយ៉ាងល្អដោយការរកគ្រាប់បាល់បានដល់ទៅ 3គ្រាប់ គិតត្រឹម 4ប្រកួតដំបូងនៃពានរង្វាន់មួយនៅពេលនោះ។

កីឡាកររូបនេះមានដើមកំណើតនៅខេត្តប៉ាតានី(ខេត្តភាគខាងត្បូង) ប្រទេសថៃ បានចូលហ្វឹកហាត់បាល់ទាត់តាំងពីវ័យ 8ឆ្នាំ បច្ចុប្បន្នជាកីឡាកររបស់ក្លិប Burriram United ដ៏ល្បីល្បាញ។ រូបគេ គឺជាកុមារាម្នាក់ក្នុងចំណោម 10នាក់ដែលត្រូវបានជ្រើសរើសពីថ្នាលបណ្ដុំបណ្ដាលទូទាំងប្រទេសទៅហ្វឹកហាត់នៅប្រទេសស៊ុយអែត។ បន្ទាប់ពីត្រឡប់មកវិញ រូបគេបានចូលរួមជាមួយក្រុម U19 ជម្រើសជាតិថៃ ហើយបានជួយឱ្យថៃលើកពាន AFF U19 Championship។

អ្វីដែលធ្វើឱ្យគ្រូបង្វឹកជម្រើសជាតិថៃ មានការចាប់អារម្មណ៍លើរូបគេនោះគឺ រូបគេមានវ័យត្រឹមតែ 18ឆ្នាំ និងត្រូវបានកោះហៅជាកីឡាករបម្រុងក្នុងឈុត U-23 ដោយកាលនោះរូបគេត្រឹមតែជាកីឡាករប្តូរចូលនៅពេលចុងម៉ោងចំនួន 3ប្រកួតប៉ុណ្ណោះ តែរូបគេរកគ្រាប់បាល់បានដល់ទៅ 3គ្រាប់៕

July 5, 2019

ក្រលេកមកមើលរថយន្ត SUV មាឌតូចច្រឡឹងមួយនេះ យុវវ័យគ្រប់គ្នាដឹងតែបាក់ចិត្តស្តូកតែម្តង

បច្ចុប្បន្ននេះ រថយន្តប្រភេទ SUV ទទួលបានការពេញនិយមគួរឲ្យកត់សម្គាល់ ដោយសាររថយន្តប្រភេទនេះអាចប្រើប្រាស់បានច្រើនកាលៈទេសៈ មិនថាសម្រាប់ធ្វើការ ឬដំណើរកម្សាន្តនោះទេ។ ភាគច្រើន អ្នកដែលជ្រើសរើសរថយន្តប្រភេទនេះយកទៅប្រើប្រាស់ដោយសាររថយន្ត SUV មានបំពាក់បច្ចេកវិទ្យាទំនើប និងមានសុវត្ថិភាពខ្ពស់។

ដោយមានភាពងាយស្រួលក្នុងការបត់បែនបាននៅក្នុងទីក្រុង សន្សំសំចៃប្រេង និងមានប្រព័ន្ធសុវត្ថិភាពខ្ពស់ ធ្វើឲ្យរថយន្ត Ford Ecosport ដែលជាប្រភេទរថយន្ត SUV ខ្នាតតូចនេះទទួលបានការពេញនិយម នេះក៏ដោយសារតែសមត្ថភាពអាចបត់បែនទៅតាមគ្រប់តម្រូវប្រចាំថ្ងៃរបស់យើង ដូចជាការប្រើប្រាស់នៅក្នុងទីក្រុង ឬការដើរកម្សាន្តតាមខេត្តចុងសប្ដាហ៍ជាដើម។

ជាមួយរថយន្ត Ford Ecosport ការបើកបរផ្លូវឆ្ងាយកាន់តែសប្បាយរីករាយ និងចំណាយកាន់តែតិច ព្រោះ Ford Ecosport បានបំពាក់ដោយម៉ាស៊ីន Ecoboost ទំហំ 1.0L តែមានកម្លាំងខ្លាំង ស៊ីប្រេងតិច និងមិនប៉ះពាល់បរិស្ថានទៀតផង។

សម្រាប់ការបើកបរនៅក្នុងទីក្រុងដែលមានផ្លូវស្ទះតូចចង្អៀត ពិបាកចតឡានក៏លែងជាបញ្ហាទៀតដែរ ព្រោះ Ford Ecosport មានរាងតូចល្មម ងាយស្រួលរកកន្លែងចត។ ម្យ៉ាងទៀតរថយន្តនេះក៏បានភ្ជាប់មកជាមួយនូវបចេ្ចកវិទ្យាទំនើបៗមួយចំនួនដូចជា ចង្កៀងមុខបិទបើកអូតូ ផ្លិតទឹកអូតូ និងមានកាមេរ៉ា និងសេនសឺខាងក្រោយជំនួយចូលចតផងដែរ។

មិនតែប៉ុណ្ណោះអ្នកអាចជ្រើសរើសរថយន្តមួយដែលអ្នកគិតថាស័ក្ដសមនឹងបុគ្គលិកលក្ខណៈរបស់អ្នក ព្រោះ Ford Ecosport មានច្រើនព៌ណសម្រាប់អ្នកជ្រើសរើស រួមមានដូចជាព៌ណខៀវ ស័ក្ដសមសម្រាប់អ្នកដែលចូលចិត្តភាពហ៊ឺហាសប្បាយរីករាយ ព៌ណក្រហមសម្រាប់អ្នកដែលស្រលាញ់រថយន្តបែបស្ព័រ ព៌ណទឹកក្រូចសម្រាប់អ្នកស្រលាញ់ភាពថ្មីខុសប្លែកពីគេ និងព៌ណ ក៏មើលទៅស្រស់ស្អាតមិនចាញ់ព៌ណដទៃដែរ។

ថ្វិត្បិតតែរថយន្តនេះមានរាងតូចល្មមមែនពិត តែមានកន្លែងដាក់សំភារៈច្រើនដល់ទៅជាង 20 កន្លែង ដូចជាកន្លែងដាក់កែវឬដបទឹក កន្លែងដាក់ស្បែកជើង ប្រអប់ត្រជាក់សម្រាប់ដាក់ភេសជ្ជៈ កន្លែងដាក់ទូរស័ព្ទ និងកន្លែងដាក់ឥវ៉ាន់ជាច្រើនទៀត។

រីឯសម្រាប់ដំណើរកម្សាន្តចុងសប្ដាហ៍វិញ Ford Ecosport ក៏មិនចាញ់រថយន្ត SUV ប្រភេទធំៗដែរ អ្នកអាចដាក់សំភារៈផ្សេងៗដូចជាកង់ ឬក្ដារជិះលើទឹកនៅលើដំបូល និងផ្នែកខាងក្រោយរថយន្តបាន។ បចេ្ចកវិទ្យាជំនួយនៅពេលបើកបរមួយចំនួនបានបំពាក់លើ Ford Ecosport ដែលផ្ដល់ភាពងាយស្រួល និងផ្ដល់ទំនុកចិត្តក្នុងការបើកបរ រួមមានដូចជា ប្រព័ន្ធទប់លំនឹងពេលឡើងចំណោត (Hill Launch Assist)។ នៅពេលកំពុងឡើង ហើយអ្នកឈប់នៅលើទួល ប្រព័ន្ធនេះនឹងជាន់ហ្វ្រាំងដោយស្វ័យប្រវត្តិរយៈពេល 2.5 Sec ដើម្បីទុកពេលឲ្យអ្នកមានពេលដកជើងចេញពីហ្វ្រាំងទៅជាន់លើហ្គាជៀសវាងការរអិលថយក្រោយ។

កាន់តែពិសេសជាងនេះទៅទៀត ជាមួយនឹងប្រព័ន្ធទប់លំនឹងរថយន្តពេលបើកបរក្នុងផ្លូវកោង និងរអិល វាអាចធ្វើការទប់លំនឹងរបស់រថយន្ត និងបញ្ជៀសការក្រឡាប់ (Electronic Stability Control) មិនចំពោះតែផ្លូវធម្មតានោះទេ នៅលើផ្លូវគ្រួស ឬផ្លូវដីក៏ដំណើរការបានដូចគ្នា។

July 5, 2019

ភ្ញាក់ផ្អើល!! ពីអតីតអ្នករាំអមឆាកដ៏ល្បីប្រចាំប៉ុស្តិ៍លេខ៣ ក្លាយជាអគ្គនាយិកាក្រុមហ៊ុនធំ

នៅរសៀលថ្ងៃទី៤ កក្កដា ឆ្នាំ២០១៩ គេស្រាប់តែឃើញ អតីតអ្នករាំអមឆាកប្រចាំនៅប៉ុស្តិ៍លេខ ៣ , បាយ័ន និងទូរទស្សន៍អាស៊ីអាគ្នេយ៍កាលពីមុន គឺអ្នកនាង ឆិល ពេជ្រពណ្ណរាយ បង្ហាញវត្តមានកាត់ខ្សែបូក្រុមហ៊ុនលក់ផលិតផលថែរក្សាសម្ភស្សធំនៅក្នុបរិវេណសណ្ឋាគារណាហ្កាវើល។

អ្នកនាង ឆិល ពេជ្រពណ្ណរាយ ត្រូវបានគេដឹងថា ជាស្ថាបនិកក្រុមហ៊ុនល្អពិតពេជ្រចរណៃខូអិលធីឌី ដែលអ្នកសិល្បៈភាគច្រើនស្គាល់ថា ស្រីពេជ្រៗ បានរៀបរាប់ប្រវត្តិថា ជីវិតរបស់អ្នកនាងបានហែលឆ្លងការងារជាអ្នករាំប្រចាំក្រុមមួយ ដើម្បីរកលុយរ៉ាប់រងគ្រួសារយ៉ាងលំបាកមុនក្លាយជាមេក្រុមរាំ ក្នុងការចាត់ចែងក្រុមរាំប្រចាំប៉ុស្តិ៍បាយ័ន និង ទូរទស្សន៍អាស៊ីអាគ្នេយ៍។ អ្នកនាងថា ជីវិតកាន់តែលំបាក នៅពេលបន្ទុកគ្រួសាររាប់មិនអស់ហើយ ស្រាប់តែធ្លាក់ខ្លួនបាក់សម្រស់ អាលែហ្ស៊ីប្រតិកម្មស្បែកមុខឡើងខ្ទេចខ្ទី។ យ៉ាងណាមិញអ្នកនាង បានទទួលជីវិតមួយថ្មី ក្រោយពេលម្ចាស់ផលិតផលប្រចាំប្រទេសថៃណែនាំឱ្យប្រើប្រាស់ផលិតផលសុខភាព P.Nice ( ភីណៃ) ហើយធ្វើឱ្យអ្នកនាងមានសម្រស់ស្អាតឡើងវិញ ដើម្បីតស៊ូក្នុងការរកប្រាក់។

ជាមួយនឹងឱកាសបានជាជាថ្មីនោះហើយ ហើយដោយមានការជ្រោមជ្រែងពីម្ចាស់ប្រេនធំរបស់ប្រទេសថៃផង ទើបធ្វើឱ្យអ្នកនាងមានលទ្ធភាពនាំចូលផលិតផលមួយនេះ មកលក់ផ្ដាច់មុខ ក្រោយពេលប្រកាសលក់លើអនឡាញមួយរយៈ ហើយទទួលបានការគាំទ្រ។ អ្នកនាងបន្តថា ផលិតផលនេះ លោកស្រីកាន់តែជឿជាក់ខ្លាំង នៅពេលពិសោធន៍ព្យាបាលអតិថិជនកន្លងមក ហើយសុទ្ធតែមានលទ្ធផលសះស្បើយដូចគ្នា។

យ៉ាងណាមិញអ្នកនាងថា ទោះជាក្លាយជាម្ចាស់ក្រុហ៊ុនធំមួយនេះ តែអ្នកនាងមិនចោលសិល្បៈនោះទេ គឺនៅតែបន្តដឹកនាំក្រុមរាំប្រចាំប៉ុស្តិ៍បាយ័ន និងអាស៊ីអាគ្នេយ៍មិនឈប់នោះឡើយ។ អ្នកស្រី ឆិល ពេជ្រពណ្ណរាយ បន្តថា អ្នកស្រីនឹងពង្រីកក្រុមហ៊ុនរបស់ខ្លួនអោយក្លាយជាក្រុហ៊ុនធំមួយ ដោយក្រៅលក់ និងចែកចាយក្នុងភ្នំពេញ ក៏នឹងវាយលុកទីផ្សារនៅគ្រប់បណ្ដាខេត្តផងដែរ៕

July 5, 2019

អីយ៉ា!! ក្រោយថតឈុតសម្អាងការតួឯកក្មេង ដាវណ្ណ រីគី ស្រាប់តែអ្នកនាង តូច ស្រីពេជ្រ បង្ហើបពីទំនាក់ទំនងពិសេសមួយ...

សកម្មភាពថតសម្អាងរបស់ អ្នកនាង តូច ស្រីពេជ្រ មិនត្រូវបានគេចាប់អារម្មណ៍ប៉ុន្មានទេ តែម្នាក់ៗផ្ដោតការចាប់អារម្មណ៍ពីសកម្មភាពថតម៉ូដរបៀបកូនកំលោះកូនក្រមុំ រវាងកញ្ញា មរកត កូនស្រីអ្នកនាង និង តួឯកក្មេង ដាវណ្ណ រីគី ដែលកូនកំលោះរបស់តារាសម្ដែងអ្នកនាង ចាន់ សោភ័ណ្ឌ ហៅ រ៉េតរ៉ូស ច្រើនជាង។

រូបថតដែលបានបង្ហោះនៅលើបណ្ដាញសង្គមហ្វេសប៊ុកត្រូវបានម្នាក់ៗលាន់មាត់និយាយថា ចាស់ទុំទាំងសងខាងកំពុងផ្គូរផ្គងឱ្យក្មេងទាំងពីរបន្សល់ទុកអនុស្សាវរីយ៍ទោះរស់នៅឆ្ងាយគ្នា។ យ៉ាងណាមិញ ប្រភពពីចាស់ទុំទាំងសងបានអះអាងថា រវាងកូនស្រីអ្នកនាង តូច ស្រីពេជ្រ និង ដាវណ្ណ រីគី ធ្លាប់ថតជាមួយគ្នាតាំងពីនៅក្មេងវ័យម៉្លេះ ដោយពេលពួកគេម្នាក់ៗពេញវ័យ ក៏នៅតែចូលចិត្តគ្នា។ ជាក់ស្ដែង គឺសកម្មភាពថតសម្អាងការដែលបានធ្វើឡើង គឺសមីខ្លួនកញ្ញា មរកត ជាអ្នកពេញចិត្ត ស្របជាមួយភាគីកូនប្រុសតែម្ដង ដោយម្ដាយៗទាំងសងខាងអត់មានជំរុញនោះទេ។

យ៉ាងណាមិញ អ្នកនាង តូច ស្រីពេជ្រ និយាយថា អ្នកនាងបង្កើតបានតែរូបកាយកូនស្រីប៉ុណ្ណោះ ចំណែកទឹកចិត្តគឺអត់បង្ខំទេ។ អ្នកនាងថារវាងកូនស្រីរបស់ខ្លួន និង ដាវណ្ណ រីគី ពួកគេទាំងពីរធ្លាប់បានសម្ដែងជាមួយគ្នាតាំងពីតូចៗមកម្លេះ ហើយដោយសារតែអ្នកទាំងពីរក៏នៅតែរត់រកគ្នា ទើបអ្នកនាងទាក់ទងឱ្យថតជាកូនកំលោះកូនក្រមុំរួមគ្នា មុនពេលអ្នកនាង និងកូនស្រីត្រលប់ទៅអាមេរិកវិញ។ អ្នកនាងថា មិនទាន់ដឹងថាទំនាក់ទំនងរាប់គ្នារវាងកូនស្រី និង ដាវណ្ណ រីគី ឈានដល់ចំណុចនោះទេ ប៉ុន្តែបើក្មេងៗទាំងរាប់គ្នាជាមិត្ត ឬ លើសពីនេះ គឺអ្នកនាងរីករាយទទួលយក។

ទន្ទឹមជាមួយនឹងការបង្ហើបរបស់ អ្នកនាង តូច ស្រីពេជ្រ កាន់តែមានការចាប់អារម្មណ៍ ដោយសារតែក្មេងៗទាំងពីរសុទ្ធតែជាតួសម្ដែងធ្លាប់មានអនុស្សាវរីយ៍ជាមួយគ្នា ហើយម្ដាយៗទាំងសងខាងគឺរាប់គ្នាដូចជាគ្រួសារតែមួយទៀត ថ្វីដ្បិតថា ម្ខាងនៅអាមេរិក ហើយម្ខាងនៅកម្ពុជា។ កាន់តែចាប់អារម្មណ៍ទៅទៀត គឺក្មេងៗទាំងពីរក្រោយពេលពេញរូបពេញរាង គឺសង្ហានិងស្រស់ស្អាតសមគ្នាគ្មានពីរ ប្រសិនបើក្លាយជាគូស្នេហ៍ដូចការប៉ាន់ស្មាន៕

July 5, 2019

កុំឱ្យខកខាន!! ទស្សនារឿង មនុស្សពីងពាងឆ្ងាយពីផ្ទះ «Spider Man Far From Home» នៅវគ្គចុងក្រោយមានព័ត៌មានបែកធ្លាយ

អ្វីដែលលោកអ្នកមិនអាចខកខានបានក្នុងការទស្សនារឿង មនុស្សពីងពាងឆ្ងាយពីផ្ទះ «Spider Man Far From Home» គឺវគ្គក្រេឌីតស៊ីនដែលបានឱ្យដឹងពីព័ត៌មានបែកធ្លាយ មានវីដេអូមួយចេញពីបុរសម្នាក់បានប្រកាសឱ្យមនុស្សលើពិភពលោកបានដឹងថា ការពិត មនុស្សពីងពាង ដែលគ្រប់គ្នាស្គាល់ថាជា Spider man គឺជា Peter Parker។

ជាការពិតណាស់ មនុស្សពីពាង ត្រូវបានគេទម្លាយឈ្មោះ Peter Parker ដែលជាវិរៈបុរសសង្គ្រោះពិភពលោកមានអាយុក្រោម ២១ឆ្នាំ តែអ្វីដែលគ្រប់គ្នាបានទស្សនានិងមិនទាន់បានទស្សនា គឺអាចផ្ទុយពីការពិតធ្វើឱ្យអ្នកគាំទ្រភ្ញាក់អារម្មណ៍ខ្លាំង និងហួសចិត្តរកនិយាយអ្វីមិនបានឡើយ។

គួរបញ្ជាក់ផងដែរថា រឿង«Spider Man Far From Home» ត្រូវបានបង្កប់រឿងរ៉ាវនៃវគ្គបន្ដទៀតតាមរយៈ ក្រេឌីតស៊ីន ដល់ទៅពីរដែលធ្វើឱ្យហួសចិត្តខ្លាំង ។ កុំឱ្យខកខានទស្សនាភាពយន្ដល្អមើល មនុស្សពីងពាងឆ្ងាយពីផ្ទះ ពិតជាមានចំណុចភ្ញោចច្រើនណាស់ ដែលមានដាក់បញ្ចាំងនៅរោងភាពយន្ដទំនើប Major Cineplex ចាប់បីថ្ងៃទី ៥ ខែកក្កដា ឆ្នាំ ២០១៩ នេះតទៅហើយ តែកុំភ្លេចកក់សំបុត្រទុកមុនណា៎ ព្រោះថាប្រយ័ត្នរកកន្លែងអង្គុយមិន៕

https://youtu.be/JbnX6YpqDnU

https://youtu.be/qOzgEj8JeSU

July 4, 2019

តារាចម្រៀង កញ្ញា វុទ្ធ សុគន្ធា ត្រៀមទៅអង្រួននៅលើទឹកដីអូស្រាលី

តាមរយៈបណ្ដាញសង្គមហ្វេសប៊ុកនាពេលថ្មីៗនេះ គេបានឃើញថា តារាចម្រៀង កញ្ញា វុទ្ធ សុគន្ធា គ្រោងនឹងទៅបង្ហាញខ្លួននៅលើទឹកដីប្រទេសអូស្រាលី នៅអំឡុងចុងខែកក្កដា នេះហើយ ខណៈដែលសាមីខ្លួន ក៏បញ្ជាក់ប្រាប់ថា ខ្លួនពិតជាមានគម្រោងចាកចេញទៅមែន ប៉ុន្តែទៅរហូតដល់២ប្រទេសឯណោះ។

តារាចម្រៀង កញ្ញា វុទ្ធ សុគន្ធា និយាយថា នឹងពិតចាកចេញទៅសម្ដែងនៅប្រទេសអូស្ត្រាលីមែន ដោយដំណើររបស់នាង នឹងចាកចេញនៅថ្ងៃទី ៣១ កក្កដា នេះហើយ ដើម្បីទៅច្រៀងនៅលើទឹកដីមួយនេះ រយៈពេល៦សប្ដាហ៍។ កញ្ញាថា ខ្លួននឹងបើកឆាកច្រៀងនៅតាមបណ្ដារដ្ឋជាច្រើនរបស់ប្រទេសអូស្ត្រាលី អមដោយវត្តមានតារាមួយចំនួនពីស្រុកខ្មែរផងដែរ ដូចជាលោក អេឡិច ចាន់ត្រា ជាដើម។ កញ្ញានឹងបន្តបេសកកម្មទៅច្រៀងនៅក្នុងប្រទេសញូហ្សេឡិនរយៈពេល២សប្ដាហ៍បន្ថែមទៀត ដែលមានន័យថា ដំណើរចាកចេញទៅច្រៀងនៅក្រៅប្រទេសលើកនេះ គឺទៅរយៈពេល២ខែ គឺមួយខែកន្លះនៅប្រទេសអូស្ត្រាលី និង កន្លះខែនៅ លើទឹកដីប្រទេសញូហ្សេឡិន។

កញ្ញា វុទ្ធ សុគន្ធា និយាយថា នាងមិនត្រៀមអ្វីច្រើនសម្រាប់ការចាកចេញនេះទេ ដោយសារតែនាងគឺជាតារាចម្រៀងប្រចាំក្រុមដែលមានឈ្មោះបោះសំលេងស្រាប់ហើយ ដែលអាចច្រៀងបានទាំងប្រភេទបទបុរាណ សម័យ និងបទបែបរាំសប្បាយៗ។ នេះជាអាជីពដែលនាងប្រឡូកមកច្រើនឆ្នាំមកហើយ ទើបនាងមិនសូវមានការបារម្ភពីការគាំទ្រ ដោយសារតែនាងគឺជាតារាអាជីពស្រាប់ ដែលអាចបត់បែនបានគ្រប់ប្រភេទបទ។ យ៉ាងណាមិញ នាងក៍បានត្រៀមខ្លួនបកស្រាយបទពិរោះៗ និងមានការសម្ដែងអោយប្លែកភ្នែកផង ដើម្បីអោយបងប្អូនបានទស្សនានៅទីនោះ សប្បាយចិត្តផងដែរ សម្រាប់ការសម្ដែងទាំង២ប្រទេសរបស់ខ្លួន។

July 4, 2019

ឥណ្ឌូនេស៊ី និងអូស្ត្រាលីមានបំណងធ្វើម្ចាស់ផ្ទះ World Cup 2034 រួមគ្នា

ឥណ្ឌូនេស៊ី និងអូស្ត្រាលីបានជួបគ្នាពិភាក្សាអំពីគម្រោងត្រៀមធ្វើសហម្ចាស់ផ្ទះព្រឹត្តិការណ៍ World Cup 2034 ក្នុងជំនួបទ្វេភាគីដាច់ដោយឡែកមួយក្នុងការប្រជុំប្រទេសបាល់ទាត់នៃតំបន់អាស៊ាន។

ជំនួបប្រជុំនេះហាក់ធ្វើឱ្យប្រទេសនៅក្នុងតំបន់អាស៊ានទាំងមូលមិនសូវជាសប្បាយចិត្តប៉ុន្មានឡើយ ដោយសារតែឥណ្ឌូនេស៊ីជាប្រទេសក្នុងតំបន់អាស៊ានដែរ តែមិនបានចូលរួមជាមួយប្រទេសក្នុងតំបន់ ដោយបែរជាទៅចូលដៃសហការជាមួយនឹងប្រទេសផ្សេងក្នុងការដាក់ពាក្យធ្វើម្ចាស់ផ្ទះ World Cup 2034 នេះទៅវិញ។

គួរបញ្ជាក់ផងដែរថា កាលពីពេលថ្មីៗនេះ ថៃបានបបួលប្រទេសក្នុងតំបន់អាស៊ានទាំងមូលដើម្បីធ្វើជាម្ចាស់ផ្ទះ World Cup 2034 ដោយក្នុងនោះកម្ពុជាក៏បានយល់ព្រមផងដែរ៕

July 3, 2019

មាស ម៉ើ ប្តូរអាជីពមករត់ឡានឈ្នួលរកប្រាក់ផ្គត់ផ្គង់គ្រួសារវិញ

កីឡាករប្រដាល់ក្បាច់គុនចម្រុះដែលធ្លាប់មានឈ្មោះល្បីល្បាញរបស់កម្ពុជា លោក មាស ម៉ើ ត្រូវបានគេប្រទះឃើញកំពុងតែរត់ឡានឈ្នួល ខណៈដែលបច្ចុប្បន្នបានឈប់ហ្វឹកហាត់ប្រដាល់ហើយ។

ចំពោះការប្តូរអាជីពមករត់ឡានឈ្នួលវិញបែបនេះ ត្រូវបានកីឡាកររូបនេះបញ្ជាក់ថា មកពីខ្លួនមិនមានការប្រកួតជាងកន្លះឆ្នាំមកហើយ ខណៈដែលការប្រកួតចុងក្រោយបង្អស់របស់គេ គឺវាយជាមួយនឹងកីឡាករសញ្ជាតិឥណ្ឌូនេស៊ីលើសង្វៀនធំជាងគេបង្អស់របស់ទ្វីបអាស៊ី ONE FC។

ទោះជាបែបនេះក្តី មាស ម៉ើ បាននិយាយថា គេនៅតែស្រឡាញ់អាជីពជាអ្នកប្រដាល់ តែនេះដោយសារតែជីវភាពគ្រួសារព្រោះត្រូវចិញ្ចឹមប្រពន្ធ និងកូនទាំងអស់ 4នាក់ ទើបត្រូវតែខឹតខំ តែប្រសិនបើគេនៅខ្លួនមួយវិញ ប្រាកដណាស់គេនឹងនៅស៊ូជាមួយកីឡាមួយនេះដើម្បីមុខមាត់ប្រទេសជាតិមិនខាន៕

July 3, 2019

កម្ពុជាដែលជាម្ចាស់ផ្ទះការប្រកួតហែលទឹកជើងឯកយុវជនអាស៊ាន មិនបានឈ្នះមេដាយសូម្បីតែ1

ការប្រកួតកីឡាហែលទឹកជើងឯកយុវជនអាស៊ានប្រចាំឆ្នាំ2019 ដែលកម្ពុជាធ្វើជាម្ចាស់ផ្ទះលើកដំបូងបំផុត ត្រូវបានបិទបញ្ចប់ជាស្ថាពរហើយកាលពីម្សិលមិញនេះ នៅទីលានហែលទឹកនៃពហុកីឡដ្ឋានជាតិមរតកតេជោ។

ការប្រកួតដែលបញ្ចប់កាលពីថ្ងៃទី30 ខែមិថុនាកន្លងទៅនេះបង្ហាញឱ្យឃើញថា យុវជនវៀតណាមធ្វើបានល្អជាងគេក្នុងចំណោម 10ប្រទេស គឺឈ្នះបានមេដាយមាសចំនួន43 ប្រាក់41 និងសំរឹទ្ធ25 សរុបចំនួន 109គ្រឿង ឈរនៅចំណាត់ថ្នាក់លេខ1 តាមពីក្រោយដោយថៃ សិង្ហបុរី ឥណ្ឌូនេស៊ី ហ្វីលីពីន និងម៉ាឡេស៊ី។

គួរបញ្ជាក់ផងដែរថា ម្ចាស់ផ្ទះកម្ពុជា និងប្រទេសចំនួន 3ផ្សេងទៀត រួមមានឡាវ មីយ៉ាន់ម៉ា និងប្រ៊ុយណេ មិនបានទទួលចំណាត់ថ្នាក់ក្នុងការប្រកួតនេះឡើយ ដោយមិនបានឈ្នះមេដាយសូម្បីតែ១គ្រឿងពីការប្រកួតនេះ៕

July 3, 2019

រដ្ឋសភា អនុម័តគម្រោងថាមពលវារីអគ្គិសនី និងអគ្គិសនីដើរដោយពន្លឺព្រះអាទិត្យ

រដ្ឋសភានៃប្រទេសកម្ពុជា បានសម្រេចអនុម័តយល់ព្រមលើគម្រោងសាងសង់វារីអគ្គិសនីរបស់ក្រុមហ៊ុន SPHP (ខេមបូឌា) ក្នុងការប្រើប្រាស់ទុនវិនិយោគប្រមាណជាង 200លានដុល្លារ សាងសង់វារីអគ្គិសនីមួយកន្លែង នៅក្នុងខេត្តពោធិ៍សាត់ដែលមានទំហំ 80មេហ្គាវ៉ាត់ ដោយគម្រោងនេះនឹងអនុញ្ញាតដាក់ឱ្យដំណើរការនៅឆ្នាំ2023 ខាងមុខ។

ឯកឧត្តម ជាម យៀប ប្រធានគណៈកម្មការសេដ្ឋកិច្ចហិរញ្ញវត្ថុ និងសវនកម្មនៃររដ្ឋសភា បានឱ្យដឹងនៅក្នុងសម័យប្រជុំរដ្ឋសភាលើកទី2 នីតិកាលទី6 នៅថ្ងៃទី1 ខែកក្ដដា 2019 នេះថា រាជរដ្ឋាភិបាលបានសម្រេចឱ្យក្រុមហ៊ុន អេសភីអេចភី (ខេមបូឌា) ឯ.ក មានឈ្មោះដើម KTC Cable Co.Ltd សិក្សាអភិវឌ្ឍន៍គម្រោងវារីអគ្គិសនីស្ទឹងពោធិ៍សាត់1 កម្លាំងអានុភាព 80មេហ្គាវ៉ាត់ ស្ថិតនៅក្នុងភូមិសាស្ត្រឃុំប្រមោយ ស្រុកវាលវែង ខេត្តពោធិ៍សាត់។

ឯកឧត្តមបន្តថា៖«ការវិនិយោគទុនសាងសង់គម្រោងវារីអគ្គិសនីស្ទឺងពោធិ៍សាត់1 នេះត្រូវចំណាយថវិកាសរុប 231.10លានដុល្លាអាមេរិក ក្នុងរយៈពេលសម្បទាន 39ឆ្នាំ ដោយរយៈពេលសាងសង់ 4ឆ្នាំ និង 35ឆ្នាំសម្រាប់ធ្វើអាជីវកម្ម»។

សូមបញ្ជាក់ថា រដ្ឋាភិបាលកាលពីកន្លងទៅថ្មីៗនេះ បានអនុម័តឱ្យក្រុមហ៊ុន SPHP (Cambodia) Co., Ltd ធ្វើការវិនិយោគលើគម្រោងសាងសង់ស្ថានីយវារីអគ្គិសនី 1កន្លែងនៅតាមស្ទឹងពោធិ៍សាត់ ក្នុងស្រុកវាលវែង ខេត្តពោធិ៍សាត់ ក្រោមរូបភាពសាងសង់-ដំណើរការ-ផ្ទេរ (BOT) ដោយចំណាយទុនវិនិយោគ 231.10លានដុល្លារ សម្រាប់រយៈពេលសម្បទាន 39ឆ្នាំ។

ឯកឧត្តម ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានថ្លែងថា ការពង្រីកការវិនិយោគលើវិស័យថាមពលនេះអាចនិយាយថា ជារបត់ថ្មីមួយរបស់កម្ពុជាក្នុងការឈានឆ្ពោះទៅរកការពង្រឹងសន្តិសុខថាមពល ដើម្បីឆ្លើយតបនឹងកំណើននៃការប្រើប្រាស់ថាមពលដ៏ច្រើនពេលបច្ចុប្បន្ន។

ឯកឧត្តមបញ្ជាក់ថា យើងកំពុងរៀបចំពង្រឹងខ្លួនឯងដើម្បីធានាសន្តិសុខថាមពលដោយខ្លួន ឯង ដោយមិនពឹងពាក់ទាំងស្រុងទៅលើថាមពលដែលទទួលបានពីប្រទេសជិតខាងនោះទេ។

ជាមួយគ្នានេះផងដែរ រដ្ឋសភាជាតិក៏បានអនុម័តសេចក្តីព្រាងច្បាប់យល់ព្រមលើការធានាទូទាត់របស់រាជរដ្ឋាភិបាលកម្ពុជា ចំពោះគម្រោងវិនិយោគក្នុងវិស័យអគ្គិសនីចំនួន2 ផ្សេងទៀតដូចខាងក្រោម៖

1- គម្រោងវិយោគបន្ថែមសមត្ថភាពស្ថានីយផលិតអគ្គិសនីដើរដោយពន្លឺព្រះអាទិត្យ អានុភាព 20មេហ្កាវ៉ាត់ថែមពីលើគម្រោងចាស់ 60មេហ្កាវ៉ាត់ នៅស្រុកឧដុង្គ ខេត្តកំពង់ស្ពឺ សរុបទាំងអស់ 80មេហ្កាវ៉ាត់។
2-គម្រោងវិនិយោគសាងសង់ស្ថានីយផលិតអគ្គិសនីដើរដោយពន្លឺព្រះអាទិត្យថ្មី 2កន្លែង មានអានុភាព 120មេហ្កាវ៉ាត់នៅខេត្តកំពង់ឆ្នាំង មានអានុភាព 60មេហ្កាវ៉ាត់ និងនៅខេត្តពោធិ៍សាត់ មានអានុភាព 60មេហ្កាវ៉ាត់។
គោលដៅនៃគម្រោងទាំង3 ខាងលើ គឺដើម្បីជួយបន្ថែមសមត្ថភាពប្រភពអគ្គិសនី ទប់ទល់នឹងកំណើននៃសេចក្តីត្រូវការអគ្គិសនីនៅឆ្នាំ2021 ឆ្នាំ2022 និងឆ្នាំ2023។ គម្រោងអភិវឌ្ឍន៍មួយ ចំនួនទៀតនឹងដាក់ជូនសភាដើម្បីធ្វើការពិនិត្យ និងអនុម័តជាបន្តបន្ទាប់។

យោងតាមរបាយការណ៍ប្រចាំឆ្នាំ2018 របស់អាជ្ញាធរអគ្គិសនីកម្ពុជាបានឱ្យដឹងថា កម្ពុជាគ្រោងនឹងបង្កើនការផ្គត់ផ្គង់ថាមពលអគ្គិសនីដល់ 2,870មេហ្គាវ៉ាត់ នៅឆ្នាំ2019 ដែលកើនឡើងពី 2650.26មេហ្គាវ៉ាត់ក្នុងឆ្នាំ2018៕

July 3, 2019

Author: អេបិល