អេបិល - La Reine Media

បទ« ប្រហុកផ្អក» របស់តារាចម្រៀង ខេមរៈ សិរីមន្ដ ត្រូវបានអ្នកនិពន្ធបទភ្លេង ជេន រូហ្វើ អះអាងថាលួចស្នាដៃលោកទាំងស្រុង

នៅពេលថ្មីៗនេះ ផលិតកម្មរស្មីហង្សមាសបានបញ្ចេញបទចម្រៀងថ្មីរបស់ខ្លួនមានចំណងជើងថា « ប្រហុកផ្អក » ដែលជាបទចម្រៀងថ្មីរបស់លោក ខេមរៈ សិរីមន្ដ។ ក៏ប៉ុន្ដែបទនេះ ត្រូវបានអ្នកនិពន្ធភ្លេងថ្មី លោក ជេន រូហ្វើ បានអះអាងថា ហង្សមាសបានលួចស្នាដៃបទចម្រៀងនិពន្ធថ្មីរបស់ខ្លួនទាំងស្រុង និងចេញនៅលើបណ្ដាញសង្គមផងដែរ។

លោក ជេន រូហ្វើ ដែលត្រូវបានគេស្គាល់ថាជាតារាចម្រៀង និងជាអ្នកនិពន្ធបទភ្លេងថ្មី បានរៀបរាប់នៅក្នុងវីដេអូលើបណ្ដាញសង្គមហ្វេសប៊ុកថា បទ« ប្រហុកផ្អក» ដំបូងឡើយលោកបានជួបនិងត្រូវបានលោក ជួន សុជា ទំនាក់ទំនងឱ្យនិពន្ធបទភ្លេងមួយនេះនៅអំឡុងចុងឆ្នាំ២០១៨ ដោយមានការចចារថា នឹងធ្វើបទចម្រៀងជាមួយគ្នា។ លោកបានព្រមព្រៀងជាមួយលោក ជួន សុជា ដែលជាអ្នកទំនាក់ទំនងទិញបទ ក្នុងការងារមួយមានលក្ខខណ្ឌពេញលេញ ពោលគឺ តម្រូវឱ្យធ្វើបទនិពន្ធថ្មីទាំងស្រុង និងថតសំឡេងតារាចម្រៀងនៅក្នុងស្ទូឌីយោរបស់លោក ព្រមទាំងបញ្ជាក់ឈ្មោះអ្នកនិពន្ធបទភ្លេងផងដែរ។

ការចចារមិនទាន់បានត្រូវរ៉ូវ និងស្រេចបាច់ផង ស្រាប់តែបទចម្រៀងមួយនេះត្រូវបានផលិតកម្មហង្សមាសបញ្ចេញនៅទីផ្សារទៅហើយ។ លោក ជេន រូហ្វើ បានអះអាងថា បទនេះជាបទដែលលោកបានបង្កើតឡើង ហើយបានដាក់ក្នុងការចចារជាមួយលោក ជួន សុជា តែបែជាអ្នកទិញបទចម្រៀងមួយនេះ មិនទាន់មានការព្រមព្រៀងច្បាស់ការ និងមិនបានទាក់ទងមកវិញអស់រយៈពេលយូរហើយ ក៏ស្រាប់តែឃើញបទចម្រៀងនេះចេញដោយផលិតកម្មរស្មីហង្សមាស ទាំងមិនបានសុំការអនុញ្ញាតិពីម្ចាស់ស្នាដៃពិតប្រាកដ។ លោកជេន បានធ្វើការបញ្ជាក់ថា នេះជាការលួចស្នាដៃទាំងស្រុងរបស់លោក ហើយខាងផលិតកម្មរស្មីហង្សមាស បានដាក់ឈ្មោះនិពន្ធបទភ្លេងជាមនុស្សផ្សេងទៀត ដែលនេះត្រូវបានម្ចាស់ស្នាដៃចាត់ទុកថា មិនឱ្យតម្លៃអ្នកនិពន្ធទាំងនៅមានជីវិតតែម្ដង។

លោក ជេន រូហ្វើ ជាអ្នកនិពន្ធបទភ្លេងថ្មីបានប្រកាសថា បទចម្រៀងមួយនេះគឺត្រូវបានលួច និងគ្មានបានចំណាយប្រាក់អ្វីសូម្បីតែបន្ដិចឱ្យលោកនោះទេ។ លោកប្រកាសថា សូមឱ្យខាងផលិតកម្មរស្មីហង្សមាស លុបបទចម្រៀងនេះជាបន្ទាន់ ព្រោះថា បទនេះមិនត្រូវបានអនុញ្ញាតិឱ្យខាងហង្សមាសនោះទេ។ បើតាមស្ដីលោក ជេន រូហ្វើ បានបញ្ជាក់ថា បទនេះត្រូវបានលោក ជួន សុជា ប្រាប់លោកថា រៀបចំនិងបានលក់សិទ្ធទៅឱ្យខាងផលិតកម្មថោនរួចរាល់ជាស្រេចអស់ទៅហើយ។ លោកចាត់ទុកថា ផលិតកម្មរស្មីហង្សមាស គ្មានការចចារច្បាស់លាស់ និងមិនបានឱ្យតម្លៃអ្នកនិពន្ធបទភ្លេងមួយនេះ ដោយលួចស្នាដៃរបស់លោកទៅធ្វើជាបទខ្លួនឯងទាំងស្រុង៕

July 19, 2019

Oppo Reno មាន 5G នឹងអាចចេញលក់នៅចិន អំឡុងខែកញ្ញាខាងមុខនេះ

ក្រុមហ៊ុន Oppo ទើបនឹងទទួលបានអាជ្ញាប័ណ្ណពីក្រសួងទូរគមនាគមន៍រដ្ឋចិន ពីសិទ្ធិផ្គត់ផ្គង់ និងចែកចាយឧបករណ៍ 5G ដែលក្នុងនោះក៏មានស្មាតហ្វូន Oppo Reno ដែលមាន Zoom 60X មានប្រព័ន្ធ 5G ផងដែរ។

យោងតាមប្រភពពី QQ បានឱ្យដឹងថា Oppo នឹងអាចចេញលក់ Reno 5G នៅត្រីមាសទី3 ពោលគឺអំឡុងខែកញ្ញា ឆ្នាំ2019 ខាងមុខនេះ។

សូមបញ្ជាក់ដែរថា បញ្ជីឈ្មោះស្មាតហ្វូនក្រុមហ៊ុនធំៗដែលនឹងចេញលក់មាន 5G នៅចិន មានដូចជា Huawei Mate 20X, VIVO, OnePlus 7 Pro, ZTE Axon 10 Pro, Nubai X 5G និង Lenovo ជាដើម៕

July 18, 2019

Huawei Pay ចាប់ផ្តើមសេវាកម្មគិតលុយអនឡាញលើកដំបូងនៅហុងកុង

កាលពីថ្ងៃទី17 ខែកក្កដាថ្មីៗនេះ ក្រមហ៊ុន Huawei បានប្រកាសចេញ Huawei Pay ដែលជាសេវាកម្មគិតលុយអនឡាញដំបូងគេដែលឈានជើងចូលទឹកដីហុងកុង។

Huawei Pay នេះដែរ បានក្លាយជាទម្រង់គិតលុយអនឡាញ ដែលអាចឱ្យអ្នកប្រើប្រាស់អាចភ្ជាប់ជាមួយហាងជាង 400កន្លែង ព្រមជាមួយនឹងធនាគារជាច្រើនទៀត ដែលគ្រោងនឹងដំណើការនាពេលឆាប់ៗនេះ។

ថ្នាក់ដឹកនាំក្រុមហ៊ុនទូរគមនាគមន៍ HKT Trust និង HKT Limited ប្រចាំនៅទីក្រុងហុងកុងបានលើកឡើងថា សេវាកម្មនេះ ជាការបន្ថែមលើសេវាកម្មដែលមានស្រាប់ក្នុងទឹកដីហុងកុងដូចជា Tap & Go , UnionPay និង NFC ដែលសុទ្ធតែជាជម្រើសសម្រាប់ការគិតលុយអនឡាញនេះផងដែរ។

សម្រាប់នៅចិនដីគោកវិញ សេវាគិតលុយអនឡាញរបស់ Huawei នេះ នឹងប្រតិបត្តិការជាមួយធនាគារចំនួន 118 និងធនាគារមួយចំនួនតូចនៅទីក្រុងម៉ូស្គូ ប្រទេសរុស្ស៊ី (ឆ្នាំ2018) ចំណែកឯ UnionPay នៅពេលខាងមុខ ក៏អាចនឹងមានមុខងារគាំទ្រ Huawei Pay បានផងដែរ៕

July 18, 2019

មកពីអាមេរិកភ្លាម សារ៉ាយ សក្ខណា កាត់ខ្សែបូហាងតែគុជភ្លែត

នៅព្រឹកថ្ងៃទី១៨ ខែកក្កដា ឆ្នាំ ២០១៩ នេះ គេស្រាប់តែឃើញតារាសម្តែងស្រអែមស្រស់ សារ៉ាយ សក្ខណា បង្ហាញវត្តមានវិលត្រឡប់ពីទឹកដីសហរដ្ឋអាមេរិក និងបានចុះមកមើលការខុសត្រូវលើមុខរបររកស៊ីមួយទៀតក្នុងស្រុកខ្មែរ ដោយដំណើរលើកនេះអ្នកនាងប្រកាសថាច្រើនខែ។

អ្នកនាងសក្ខណា ដែលជាតារាស្រីនៅតែមានប្រជាប្រិយភាពនោះ ស្រាប់តែបង្កើតហាងតែគុជថ្មីមួយនាកណ្តាលក្នុងចំកន្លែងអ៊ូរអរក្បែរសាលារៀនរំពឹងថា កាក់កបតទៅទៀត។ ហាងតែគុជនោះមានឈ្មោះថា« TeaTime »ដែលនាងសម្រេចបើកឡើងដើម្បីឱ្យប្អូនប្រុសទាំង២របស់នាងមើលការខុសត្រូវនៅពេលនាងមិននូវស្រុកឬទុកមុខរបរឱ្យប្អូនៗរកស៊ីតែម្ដង។ ក្នុងឱកាសបើកនេះ អ្នកនាងមានហ្វ្រីកាហ្វេ១០០កែវហើយថ្ងៃបន្តបន្ទាប់មានផែនការថ្មីៗទៀត។ ទីតាំងស្ថិតៅតាមបណ្តោយផ្លូវផ្សារគីឡូលេខ៤ក្រោយវិទ្យាល័យសន្ឋរមុខដែលជាទីប្រជុំជន។ ចំពោះសិល្បៈវិញមកដល់គេហៅថតរឿងថ្មីហើយនាងទើបតែបញ្ចប់ការងារថតសម្អាងការមួយចំនួន និងអរគុណបងប្អូនទាំងអស់ដែលគាំទ្រនៅតែចង់ឱ្យនាងប្រឡូកសិល្បៈដូចដើមនាងនៅតែទទួលបើនៅត្រូវការ។

គួរបញ្ជាក់ផងដែរថា ហាងដែលបានទិញសិទ្ធអាជវកម្មមួយនេះ ត្រូវបានគេដឹងថា អ្នកនាង សារ៉ាយ សក្ខណា ចំណាយដើមទុនខ្ទង់ម៉ឺនៗដុល្លារក្នុងការទិញសម្ភារៈហាង និងជួលជុលហាងឡើងវិញ ដើម្បីឱ្យកាន់តែមានសោភណ្ឌភាពស្អាតហើយទាក់ទាញ។ អ្នកនាងថា នេះជាសាខាហាងទី ២ ហើយនៅរាជធានីភ្នំពេញ និងមានពីរសាខាទៀតនៅខេត្តបាត់ដំបងដែលកំពុងទទួលការគាំទ្រយ៉ាងខ្លាំង៕

July 18, 2019

ជប៉ុនផ្តល់ជំនួយ 4.6លានដុល្លារ គាំទ្រការអភិវឌ្ឍសេដ្ឋកិច្ច និងសង្គម

ស្របទៅតាមគម្រោងដោយពុំមានអ្វីកែប្រែ ឯកឧត្តម ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ កម្ពុជា និងឯកឧត្តម ហូរីណូអូជិ ហ៊ីដេហ៊ីសា Horinouchi Hidehisa ឯកអគ្គរាជទូតជប៉ុន ប្រចាំប្រទេសកម្ពុជា បានចុះហត្ថលេខាលើលិខិតប្តូរសារស្តីពីការផ្តល់ហិរញ្ញប្បទានឥតសំណង របស់រាជរដ្ឋាភិបាលជប៉ុន ដែលមានទឹកប្រាក់សរុបចំនួន 500លានយ៉េន ស្មើនឹង 4.6លានដុល្លារ នៅក្នុងពិធីមួយនៅថ្ងៃទី17 ខែកក្កដា ឆ្នាំ2019 នេះនៅទីស្ដីការក្រសួងការបរទេស និងសហប្រតិបត្តិការអន្តរជាតិ ។

យោងតាមសេចក្តីថ្លែងការណ៍របស់ក្រសួងការបរទេសកម្ពុជា ជំនួយឥតសំណងជាទឹកប្រាក់ 4.6 លានដុល្លារអាមេរិក ដែលរដ្ឋាភិបាលប្រទេសជប៉ុនគ្រោងនឹងផ្តល់ដល់ប្រទេសកម្ពុជានេះ គឺដើម្បីគាំទ្រការអភិវឌ្ឍសេដ្ឋកិច្ច និងសង្គមនៅក្នុងព្រះរាជាណាចក្រកម្ពុជា។

សេចក្តីថ្លែងការណ៍បានបញ្ជាក់ឱ្យដឹងថា៖«ក្នុងនាមជាដៃគូអភិវឌ្ឍន៍ដ៏សំខាន់មួយ រដ្ឋាភិបាលប្រទេសជប៉ុនបានជួយកម្ពុជា ក្នុងការអភិវឌ្ឍហេដ្ឋារចនាសម្ព័ន្ធ រួមចំណែកដល់ការធ្វើឱ្យប្រសើរឡើងដល់វិស័យសេដ្ឋកិច្ច និងសុខុមាលភាពសង្គម ក៏ដូចជាការបង្កើនការតភ្ជាប់ទំនាក់ទំនងជាមួយបណ្តាប្រទេសដទៃទៀតនៅក្នុងតំបន់»។

សូមបញ្ជាក់ថា ក្នុងឆ្នាំសារពើពន្ធជប៉ុន2018ដែលគិតចាប់ចាប់ពីខែមេសា 2018 ដល់មីនា 2019 សរុបមកកម្ពុជា និងជប៉ុនបានចុះហត្ថលេខាលើឯកសារសី្តពីជំនួយអភិវឌ្ឍន៍ផ្លូវការរបស់ ជប៉ុនដែលផ្តល់ជូនរាជរដ្ឋាភិបាលកម្ពុជាសរុបមានចំនួន 14,997លានយ៉េន គិតជាដុល្លារអាមេរិក ប្រមាណជា 134.38លាន។ ក្នុងនោះជំនួយឥតសំណងប្រមាណជា 19.42លានដុល្លារអាមេរិក ឥណទានសម្បទានប្រមាណជា 114.96លានដុល្លារអាមេរិក៕

July 18, 2019

ស្រាបៀរថៃហ្គ័រដឹកនាំក្រុមម្ចាស់ជើងឯក TIGER STREET FOOTBALL FESTIVAL 2019 ធ្វើដំណើរទស្សនកិច្ចនៅប្រទេសប្រេស៊ីលជួបកំពូលកីឡាករបាល់ទាត់លំដាប់ពិភពលោក “RONALDINHO”

ភ្នំពេញ៖ នៅយប់ថ្ងៃទី 16 ខែកក្កដា ឆ្នាំ 2019 ក្រុមការងារស្រាបៀរថៃហ្គ័រដឹកនាំក្រុមម្ចាស់ជើងឯកនៃព្រឹត្តិការណ៍ការប្រកួត Tiger Street Football Festival 2019 ដំណើរទស្សនកិច្ចនៅប្រទេសប្រេស៊ីល ជួបជាមួយកំពូលកីឡាករបាល់ទាត់លំដាប់ពិភពលោក Ronaldo de Assis Moreira ដែលគេស្គាល់ជាទូទៅថា “Ronaldinho” នៅក្នុងប្រទេសកម្ពុជា។

កំពូលកីឡាករបាល់ទាត់ជាតិប្រេស៊ីលរូបនេះដែលជាឯកអគ្គរដ្ឋទូតប្រចាំកម្មវិធីប្រកួតបាល់ទាត់ដ៏អស្ចារ្យប្រចាំឆ្នាំ ២០១៩ Tiger Street Football Festival នឹងទទួលស្វាគមន៍ក្រុមស្នងការដ្ឋាននគរបាលខេត្តព្រះសីហនុ«A» ដែលជាក្រុមម្ចាស់ជើងឯកនៃព្រឹត្តិការណ៍ការប្រកួត Tiger Street Football Festival 2019 និងក្រុមការងារស្រាបៀរថៃហ្គ័រដែលដឹកនាំដំណើរទស្សនកិច្ចនេះ។

ក្នុងដំណើរទស្សនកិច្ចនេះ សមាជិកទាំងអស់នៃក្រុមម្ចាស់ជើងឯកនឹងមានឱកាសពិសេសអស្ចារ្យចូលទស្សនាផ្ទាល់នូវការប្រកួត១ភាគ៤ផ្ដាច់ព្រ័ត្ររវាងក្រុម Flamengo និង Athletico Paranaense ក្នុងក្របខ័ណ្ឌពានរង្វាន់ប្រេស៊ីល (Copa do Brasil) ទៅលេងឆ្នេរសមុទ្រ Copacabana ឡើងភ្នំ Corcovado ជាពិសេសអញ្ជើញទៅលេងវិមានរបស់កំពូលកីឡាករបាល់ទាត់លំដាប់ពិភពលោក Ronaldinho និងកម្មវិធីពិសេសជាច្រើនទៀតក្នុងក្នុងដំណើរទស្សនកិច្ចពិសេសនេះ។

ដំណើរទស្សនកិច្ចនេះ មានរយៈពេលបីថ្ងៃចាប់ពី ១៧ រហូតដល់ថ្ងៃទី ១៩ ខែកក្កដា នៅទីក្រុង Rio de Janeiro ប្រទេសប្រេស៊ីលក្រោមវត្តមានដ៏ខ្ពង់ខ្ពស់ពីកំពូលកីឡាករបាល់ទាត់ លំដាប់ពិភពលោក Ronaldinho ។

ចំពោះព័ត៌មានលម្អិតអំពីកម្មវិធីដំណើរទស្សកិច្ចក្រុមម្ចាស់ជើងឯក Tiger Street Football Festival 2019 នៅប្រទេសប្រេស៊ីល សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH

 សូមពិសាថៃហ្គ័រដោយការទទួលខុសត្រូវ

July 18, 2019

LG ដាក់បង្ហាញម៉ាស៊ីនសម្ងួតបច្ចេកវិទ្យាដ៏ឆ្លាតវៃ ដំបូងគេបង្អស់នៅក្នុងប្រទេសកម្ពុជា

ថ្ងៃចន្ទ ទី15 ខែកក្កដា ឆ្នាំ2019 នេះ ក្រុមហ៊ុន LG Electronics និង ក្រុមហ៊ុន ជីហ្គៀ (G Gear) ប្រារព្ធពិធីសម្ពោធ ផលិតផលថ្មីម៉ាស៊ីនសម្ងួតបច្ចេកវិទ្យាដ៏ឆ្លាតវៃ ។ ជាក់ស្ដែង ពិធីសម្ពោធនេះប្រារព្ធនៅ LG Premium Brandshop ដែលមានអាស័យដ្ឋាន ផ្ទះលេខ 135 មហាវិថីព្រះមុនីវង្ស សង្តាត់ មនោរម្យ ខណ្ឌ 7 មករា រាជធានីភ្នំពេញ ។

ដោយសារតែមានការគ្រាំទ្រពីអ្នកប្រើប្រាស់នូវម៉ាស៊ីនបោកសំលៀកបំពាក់ម៉ាកសញ្ញា LG នៅលើទីផ្សារកាន់តែច្រើនទៅ ពីមួយឆ្នាំ ទៅមួយឆ្នាំ ទើបធ្វើអោយក្រុមហ៊ុន LG Electronics បានបង្តើតនូវ បច្ចេកវិទ្យាដ៏ឆ្លាតវៃ និង អស្ចារ្យ សំរាប់សំរួលក្នុងការប្រើប្រាស់ នោះគឺ ម៉ាស៊ីនសម្ងួត LG Dryer ដែលភ្ជាប់មកជាមួយបច្ចេកវិទ្យា Dual Inverter Heat Pump ។ ហើយម៉ាស៊ីនសម្ងួតនេះ និងដាក់លក់នៅលើទីផ្សារក្នុងប្រទេសកម្ពុជាចាប់ពីពេលនេះតទៅ ។

ម៉ាស៊ីនសម្ងួត LG Dryer ដែលភ្ជាប់មកជាមួយបច្ចេកវិទ្យា Dual Inverter Heat Pump គឺជាម៉ាស៊ីនសម្ងួតជំនាន់ទី 3 របស់ក្រុមហ៊ុន LG Electronics វាផ្ដល់ភាពងាយស្រួលក្នុងការប្រើប្រាស់ ក្នុងការរស់នៅប្រកបដោយភាពស៊ីវិល័យ និង ផាសុកភាព ។ សមត្ថភាពរបស់ម៉ាស៊ីនសម្ងួត LG Dryer មានលក្ខណះខុសពីម៉ាស៊ីនសម្ងួតធម្មតាដូចជា ៖

• DUAL Inverter Heat Pump™
ជាបច្ចេកវិទ្យា កុំប្រែសសឺរភ្លោះ ដែល ប្រើនៅថាមពលដ៏អស្ចារ្យ សន្សំសំចៃថាមពល និង ពេលវេលាទ្វេដង កាត់បន្ថយសំលេងរំខាន បានយ៉ាងមានប្រសិទ្ធភាព ។
• Gentle Care
ដំណើរការសម្ងួតក្នុងសីតុណ្ហភាពទាប ដើម្បីជួយកាត់បន្ថយការខូច ឬ រួញ សាច់ក្រណាត់ និងជួយរក្សាសាច់ក្រណាត់បានយ៉ាងល្អ ។
• Eliminates up to 99.9％ of Allergens
ជាមុខងារកំចាត់ចោលនៅបាក់តេរីកង្វក់ និង អាឡែកហ្ស៊ី ផ្សេងៗ ជាប់នៅសាច់ក្រណាត់ ដែលបណ្ដាលអោយមានផលប៉ះពាល់ដល់ផ្លូវដង្ហើមកុមារ បានរហូតដល់ 99.9% ដែលទទួលបាន វិញ្ញាបនបត្រ័ ទទួលស្គាល់ ពី BAF (British Allergy Foundation ) ។
• Auto Cleaning Condenser
បង្កើតឡើងជាមួយតម្រងពីរដែលអាចរក្សាភាពស្អាតរបស់ធុងចម្រោះនេះ ធ្វើឱ្យម៉ាស៊ីនសម្ងួតរក្សាការដំណើរការស្ងួតខ្ពស់ដោយការច្រោះចេញសំណើមពីសំលៀកបំពាក់។
ម្យ៉ាងទៀតមុខងារលាងសំអាតដោយស្វ័យប្រវតិ្ត គឺរក្សានូវដំណើរការនៃការសម្ងួតល្អ Auto CLeaning Condenser ផ្តល់នូវលំហូខ្យល់ដ៏ត្រឹមត្រូវ ដែលភ្ជាប់មកជាមួយឧបករណ៍ចាប់សញ្ញាសម្ងួតនៃសំណើមលើសម្លៀកបំពាក់និងកំណត់ពេលស្ងួតដោយស្វ័យប្រវត្តិ។
• Smart ThinQ™
ផ្ដល់ជូនភាពងាយស្រួលជាងមុនជាមួយ Smart ThinQ ™
ពីការគ្រប់គ្រងប្រតិបត្តិការរបស់ម៉ាស៊ីនតាមរយៈការតភ្ជាប់ពីចម្ងាយ។ អនុញ្ញាតឱ្យអ្នកបញ្ជាម៉ាស៊ីនសម្ងួតពីគ្រប់ទីកន្លែងគ្រប់ពេលតាមរយៈការភ្ជាប់ Wi-Fi
• Saving Money and Time
បច្ចេកវិទ្យាកូនកាត់ Eco Hybrid™ គឺធ្វើអោយអ្នកអាចសំន្សំសំចៃថាមពលក៏បាន និង ពេលវេលាក៏បាន បច្ចេកវិទ្យានេះនឹងផ្តល់ជូនជម្រើសដើម្បីសន្សំសំចៃថាមពលឬពេលវេលា វាអាស្រ័យទៅលើរបៀបរស់នៅរបស់អ្នកប៉ុណ្ណោះ។

លោក Sung Suk Kim អគ្គនាយកក្រុមហ៊ុន LG ប្រចាំប្រទេសកម្ពុជាបានមានប្រសាសន៏ដែរ“ថ្ងៃនេះខ្ញុំមានមោទនភាពខ្លាំងណាស់ដែលបានណែនាំនូវផលិតផលដែលមានបច្ចេកវិទ្យាខ្ពស់មួយទៀតគឺម៉ាស៊ីនសម្ងួត LG Dryer ដែលភ្ជាប់មកជាមួយបច្ចេកវិទ្យា Dual Inverter Heat Pump យើងកត់សម្គាល់ឃើញថាមានការកើនជាឡើងខ្លាំងមួយរយះចុងក្រោយចំពោះការប្រើប្រាស់ផលិតផលអេឡិចត្រូនិចដើម្បីកាត់បន្ថយកម្លាំងក្នុងគ្រួសារ ព្រមទាំងសន្សំពេលវេលាសម្រាប់គូស្វាមីភរិយាថ្មីថ្មោង ក៏ដូចជាគ្រួសារដែលមានចំនូលពីមធ្យមឡើងទៅ បញ្ហាអនាម័យរឹតតែត្រូវបានអោយតម្លៃខ្ពស់ចំពោះផលិតផលទាំងអស់សម្រាប់ជីវភាពប្រចាំថ្ងៃផងដែរ។

លោកបានបន្ដទៀតផងដែរថា ម៉ាស៊ីនសម្ងួត LG Dryer អាចបំពេញតាមតម្រូវការនិងបំណងប្រាថ្នារបស់អតិថិជនបាន វាគឺជាផលិតផលដែលអ្នករាល់គ្នានឹងពេញចិត្តបំផុតក្នុងការជួយសម្រួលអោយប្រសើរឡើងនូវគុណភាពជីវិតរស់នៅប្រចាំថ្ងៃរបស់យើងគ្រប់ៗគ្នា” ។

អ្វីដែលគួរអោយសរសើរនោះគឺក្រុមហ៊ុន LG បានគិតគូរដល់ភាពងាយស្រួល ដោយរចនាម៉ាស៊ីនបោក និងម៉ាស៊ីនសម្ងួត មានភាពសមស្របនឹងគ្នាក្នុងការជួយសន្សំសំចៃពេលវេលា និងបង្កើនសោភ័ណភាពកាន់តែស្រស់ស្អាត សម្រាប់គេហដ្ឋានរបស់អ្នកប្រើប្រាស់ទាំងឡាយ ។

អតិថិជនទាំងអស់អាចអញ្ជើញមកទស្សនានៅការដាក់តាំងបង្ហាញម៉ាស៊ីនសម្ងួត LG Dryer ស៊េរីថ្មីនេះបាននៅគ្រប់ហាងលក់គ្រឿងអេឡិចត្រូនិចដែលជាអ្នកចែកចាយលក់បន្តរបស់ក្រុមហ៊ុន G Gear និងហាង LG BrandShop គ្រប់សាខាទាំងអស់ ។

ទំនាក់ទំនងបន្ថែម ទូរសព្ទលេខ 023 222 699

July 18, 2019

Wow!! ធ្លាយដំណឹងតារាសម្ដែង ភុល សុវណ្ណដានីន មានតួនាទីជាមន្ដ្រី និងត្រៀមទៅវៀតណាមទៀត

តារាសម្ដែងឯកប្រុសលោក ភុល សុវណ្ណដានីន កំពុងត្រូវបានអ្នកគាំទ្រ សរសើរមិនតិចមាត់ទេ ដែលលោកគឺជាតារាសម្ដែងមួយរូប ក្រៅពីមានកេរ្តិ៍ឈ្មោះបោះសំលេងនៅក្នុងសិល្បៈក៏ត្រូវគេដឹងថាមានការងាររឹងមាំ ជាមន្ត្រីប្រចាំនៅក្នុងក្រសួងមហាផ្ទៃ។ តំណែងរបស់លោកត្រូវគេប៉ាន់ស្មានថា នឹងជួយឱ្យលោកអាចឈោងតំណែងជាមន្ត្រីជាន់ខ្ពស់ ឬ ឋានៈឯកឧត្តមដោយមិនពិបាកនោះទេនៅពេលខាងមុខ។

ពិតជាឡូយមែនទែន ដែលតារាសម្ដែងរូបនេះត្រូវគេបង្ហើបបន្ថែមថា លោកត្រៀមចេញទៅកាន់ប្រទេសវៀតណាមដើម្បីសិក្សារហូតដល់៣ខែ។ នេះបើយោងតាមសេចក្ដីប្រកាសពីក្រសួងមហាផ្ទៃ ដែលតម្រូវឱ្យលោក ដែលមានតួនាទីជាវរសេនីយ័ត្រី(ស័ក្ត៤) នាយរងការិយាល័យ នៃនាយកដ្ឋានកិច្ចការប៉ុស្តិ៍នគរបាលរដ្ឋបាល ដោយ ក្រសួងមហាផ្ទៃ។

តារាសម្ដែង លោក ភុល សុវណ្ណដានីន បានបញ្ជាក់ថា លោកពិតជាត្រូវក្រសួងមហាផ្ទៃ ដែលលោកបម្រើការបញ្ជូនឱ្យទៅសិក្សានៅក្នុងប្រទេសវៀតណាម ដោយគម្រោងនឹងចាកចេញទៅនៅថ្ងៃទី២២ កក្កដា ក្នុងឆ្នាំ២០១៩នេះ ហើយរហូតដល់៣ខែក្រោយទើបលោកត្រលប់មកវិញ។ បេសកកម្មនេះ មិនមែនជាលើកទី១នោះទេ ព្រោះពេលកន្លងមក លោកក៏ធ្លាប់ត្រូវបានបញ្ជូនចេញបែបនេះផងដែរ៕

July 17, 2019

អតិថិជនច្រើនកុះករតំរង់ជួរទិញ Huawei Y9 2019 នៅហាងទូរសព្ទចំរើន និង ហាងអាម៉ីស៊ីវអេង 2!

ភ្នំពេញ ថ្ងៃទី 15 កក្កដា ឆ្នាំ 2019 ៖ មនុស្សយ៉ាងច្រើនកក់កុញបានឈរតំរង់ជួរបន្តកន្ទុយគ្នាឡើងផ្អើល ម្តុំផ្សារដេប៉ូ ដើម្បីទិញស្មាតហ្វូន Huawei Y9 2019 ដែលពួកគេបានធ្វើការកុម្ម៉ង់ទិញទុកមុន។ ការតំរង់ជួរយ៉ាងច្រើនកក់កុញដ៏គួរឲ្យភ្ញាក់ផ្អើលនេះ គឺស្ថិតនៅហាងទូរសព្ទចំរើន នាពេលព្រឹកថ្ងៃអាទិត្យទី 14 កក្កដា និងនៅហាងអាម៉ីស៊ីវអេង 2 នៅថ្ងៃរសៀល ដែលហាងទាំងពីរនេះមានសន្ទុះនៃការកុម្ម៉ង់ទិញទុកមុនស្មាតហ្វូន Huawei Y9 2019 ច្រើនជាងគេបំផុត ។

Huawei Y9 2019 បានបំបែកកំណត់ត្រា ទទួលបានការកុម្ម៉ង់ទិញទុកមុនលើសពីការរំពឹងទុក ច្រើនលើសលុប ជាពិសេសទទួលបានការគាំទ្រខ្លាំងយ៉ាងគំហុក រហូតដល់អតិថិជនតំរង់ជួររង់ចាំទិញបែបនេះ។ រឹតតែពិសេសទៀតនោះ អ្នកចូលរួមតំរង់ជួរទាំងអស់ក៏មានឱកាសជួបផ្ទាល់ និងថតរូបផ្ទាល់ ជាមួយអាយដូលក្នុងដួងចិត្ត ដែលជាតារាតំណាងផ្សព្វផ្សាយរបស់ក្រុមហ៊ុន Huawei គឺអ្នកនាងឱក សុគន្ធកញ្ញា និង លោកនីកូ ។ អស់ទាស់ហ្មង់ បានជួបអាយដូលផង បានស្មាតហ្វូនសំណប់ចិត្តប្រើមុនគេផង ហើយថែមទាំងទទួលបានកាដូជាច្រើន និងអាវយឹតដែលមានហត្ថលេខារបស់អាយដូលទៀតផង ។

រូបភាពខ្លះៗនៅហាងចំរើន
រូបភាពខ្លះៗនៅហាងអាម៉ីស៊ីវអេង 2
គួរបញ្ជាក់ផងដែរថាមិនមែនតែនៅប្រទេសកម្ពុជាយើងទេ ដែលមានការគាំទ្រយ៉ាងគំហុកបែបនេះ ប្រទេសជាច្រើនទៀតក៏ទទួលបានការគាំទ្រខ្លាំងបែបនេះដែរ ដូចជាប្រទេលពីលីពីន ត្រឹមតែ 2ម៉ោងប៉ុណ្ណោះ លក់បានរហូតដល់ជាងមួយម៉ឺនគ្រឿង។Huawei Y9 2019 បានក្លាយជាស្មាតហ្វូនទទួលបានការពេញនិយមខ្លាំងបំផុតលើទីផ្សារដោយសារតែ ជាស្មាតហ្វូនកាមេរ៉ាមុខ Pop-up Selfie ទំហំ 16MP អេក្រង់លាតពេញផ្ទៃទំហំ 6.59 អ៊ីញ គ្មានស្នាមឆក តម្លៃសមរម្យបំផុតគ្មានគូប្រៀបត្រឹមតែ $239 ប៉ុណ្ណោះ។ ចំណែកឯកាមេរ៉ាក្រោយវិញ ស្មាតហ្វូននេះបំពាក់ដោយកាមេរ៉ារហូតដល់ទៅបីគ្រាប់ដែលមានមុខងារអាចថត Ultra Wide បានល្អជាទីគាប់ចិត្ត កាមេរ៉ាទីមួយទំហំ 16MP កាមេរ៉ាទីពីរទំហំ 8MP និង កាមេរ៉ាទីបីទំហំ 2MP ROM ទំហំធំ 128GB ដំណើរការដោយ Kirin 710F ថាមពលថ្ម 4000mAh សាកថ្មបានលឿន ប្រើប្រាស់ USB type C ជម្រើសបីពណ៍ គឺពណ៍បៃតង (Emerald green) ខៀវ (Sapphire blue) និងពណ៍ខ្មៅ (Midnight black)។
លោក Henry Xiao នាយកគ្រប់គ្រងប្រចាំនៅប្រទេសកម្ពុជា របស់ក្រុមហ៊ុន Huawei បានលើកឡើងថា លោកពិតជាមានអារម្មណ៍ រំភើបសប្បាយរីករាយយ៉ាងខ្លាំងដែល Huawei Y9 2019 ទទួលបានការគាំទ្រខ្លាំងលើសលប់ រហូតដល់មានការតំរង់ជួរចាំទិញបែបនេះ។ លោកពិតជាអរគុណចំពោះអតិថិជនទាំងអស់ដែលតែងតែគាំទ្រក្រុមហ៊ុន Huawei ជាពិសេសស្មាតហ្វូនម៉ូដែលនេះ និងមានទំនុកចិត្តលើផលិតផលរបស់យើង។ លោកបានបន្ថែមទៀតថា ក្រៅពីម៉ូដែលថ្មីដែលទើបតែសម្ពោធនៅលើទីផ្សារប្រទេសកម្ពុជា នៅដើមខែសីហាខាងមុខនេះ ក្រុមហ៊ុន Huawei នឹងមានគម្រោងសម្ពោធជាផ្លូវការស្មាតហ្វូនដែលអាចប្រើ 5G នៅប្រទេសកម្ពុជា។
សម្រាប់អតិថិជនដែលខកខានមិនបានកុម្ម៉ង់ទិញទុកមុន អតិថិជនក៏អាចទិញ Huawei Y9 2019 នៅហាងទូរសព្ទដែលនៅជិតអ្នកបំផុតនៅទូទាំងប្រទេសកម្ពុជា។
សម្រាប់ព័ត៌មានបន្ថែម សូមចូលទៅកាន់
Website: https://consumer.huawei.com/kh/
Facebook: Huawei Mobile (https://bit.ly/2ePDMSq)

July 17, 2019

អឺរ៉ុបផ្តល់ហិរញ្ញប្បទានឥតសំណងជាទឹកប្រាក់ចំនួន 26លានអឺរ៉ូ សម្រាប់អនុវត្តន៍គម្រោងចំនួន3

សហភាពអឺរ៉ុបនឹងផ្តល់ហិរញ្ញប្បទានឥតសំណង តាមកម្មវិធីកែទម្រង់ចំនួន3 មានថវិកាចំនួន26,8លានអឺរ៉ូដល់កម្ពុជា ក្រោមកិច្ចសហប្រតិបត្តិការកម្ពុជា-សហភាពអឺរ៉ុប ដែលការអនុវត្តកម្មវិធីនឹងត្រូវធ្វើឡើងក្នុងខែសីហា ឆ្នាំ2019 នេះ ដោយរដ្ឋាភិបាលនឹងជំរុញសម្របសម្រួលជាមួយក្រសួងជំនាញពាក់ព័ន្ធ ដើម្បីរៀបចំឯកសារគាំទ្រសម្រាប់ការបន្តផ្តល់ថវិកា។

ក្នុងសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា តាមការ កំណត់ក្នុងកិច្ចព្រមព្រៀងហិរញ្ញប្បទាន ឥតសំណងតាមកម្មវិធីកែទម្រង់នីមួយៗនៃកិច្ចសហប្រតិបត្តិការកម្ពុជា-សហភាពអឺរ៉ុប ការវាយតម្លៃនៃការអនុវត្តក្របខ័ណ្ឌឆ្នាំ2018 មានជាលទ្ធផល៖

ទី1- កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី3 ត្រូវបើកផ្តល់ថវិកាសម្រាប់ឆ្នាំ2019 ចំនួន 4,3លានអឺរ៉ូ។
ទី2- ភាពជាដៃគូកំណែទម្រង់វិស័យអប់រំឆ្នាំ2018-2021 ត្រូវបើកផ្តល់ថវិកាសម្រាប់ឆ្នាំ2019 ចំនួន 17,5លានអឺរ៉ូ
ទី3- កម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្ន(ផ្នែកនេសាទ) ត្រូវបើកផ្តល់ថវិកាសម្រាប់ឆ្នាំ2019 ចំនួន 5,0លានអឺរ៉ូ ។

សូមបញ្ជាក់ថា ការបន្តផ្តល់ថវិកានៃការអនុវត្តកម្មវិធីកែទម្រង់ចំនួន3 ដែលថវិកាទ្រទ្រង់កម្មវិធីមានទឹកប្រាក់សរុបចំនួន 26,8លានអឺរ៉ូ បានធ្វើឡើងនៅក្នុងជំនួបពិភាក្សាការងារ រវាងឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី15 ខែកក្កដាកន្លងមក ជាមួយលោក George Edgar) ឯកអគ្គរដ្ឋទូតសហភាពអឺរ៉ុបប្រចាំកម្ពុជា ដោយបានបង្ហាញជំហរបន្តគាំទ្រសម្រាប់កិច្ចសហប្រតិបត្តិការកម្ពុជា-សហភាពអឺរ៉ុបជាមួយនឹងការបន្តពង្រឹងកិច្ចសហប្រតិបត្តិការជាមួយរាជរដ្ឋាភិបាលកម្ពុជា។

ឯកឧត្តម អូន ព័ន្ធមុនីរ័ត្ន បានស្វាគមន៍យ៉ាងកក់ក្តៅចំពោះឯកឧត្តម ចច អេដហ្គារ និងសហការី និងបានថ្លែងអំណរគុណដល់សហភាពអឺរ៉ុប ចំពោះជំហរបន្តគាំទ្រ និងការបន្តពង្រឹងកិច្ចសហប្រតិបត្តិការជាមួយរាជរដ្ឋាភិបាលបន្ថែមទៀត ដែលឆ្លុះបញ្ចាំងអំពីសុភវិនិច្ឆ័យចំពោះសមិទ្ធផលនានា ដែលរាជរដ្ឋាភិបាលកម្ពុជាខិតខំសម្រេចបាន និងកិច្ចសហប្រតិបត្តិការដ៏ល្អប្រសើរកន្លងមក៕

July 17, 2019

Author: អេបិល