ភ្នំពេញ – ទើបតែផ្ដល់ជូនកាដូដល់កម្មករតាមរយៈការជិះរថយន្ដក្រុងសាធារណៈរយៈពេលពីរឆ្នាំដោយមិនគិតថ្លៃ កាលពីម្សិលមិញនេះសម្ដេចនាយករដ្ឋមន្ដ្រី ហ៊ុន សែន បានលើកឡើងថា នៅឆ្នាំ2018 ខាងមុខកម្មករទាំងអស់នឹងទទួលបានសេវាថែទាំព្យាបាលសុខភាពពីមន្ទីរពេទ្យរដ្ឋដោយឥតគិតថ្លៃ។
សម្ដេចនាយករដ្ឋមន្ដ្រី ហ៊ុន សែន បានលើកឡើងថា នៅដើមឆ្នាំ2018ខាងមុខកម្មករទាំងអស់នឹងអាចទទួលបានសេវាព្យាបាលសុខភាពដោយឥតគិតថ្លៃពីមន្ទីរពេទ្យរដ្ឋ។ សម្ដេចបញ្ជាក់ថា៖«កម្មករត្រូវរាប់បញ្ចូលទាំងកម្មករបើកបរយានយន្តផងដែរ គាត់ក៏ជាកម្មករដែរ និយាយរួមត្រូវក្ដោបយកកម្មករទាំងអស់។ ខ្ញុំបានពិភាក្សាបញ្ហានេះជាមួយឯកឧត្ដម ម៉ម ប៊ុនហេង ឯកឧត្តម អ៊ិត សំហេង ឯកឧត្ដមអូន ព័ន្ធមុន្នីរ័ត្ន យើងត្រូវធ្វើការជាមួយគ្នា»។
ក្រៅពីក្រសួងសុខាភិបាល ក្រសួងការងារ ក្រសួងសេដ្ឋកិច្ច និងហិរញ្ញវត្ថុ ក្នុងនោះក៏មានក្រសួងនានាផ្សេងទៀតដែរដែលត្រូវចូលរួមសហការលើការងារនេះដូចជាក្រសួងទេសចរណ៍ ក្រសួងកសិកម្ម ក្រសួងរៀបចំដែនដី នគរូបនីយកម្ម និងសំណង់ ក្រសួងសាធារណការ អាកាសចរណ៍ស៊ីវីល ក្រសួងរ៉ែ និងថាមពល ក្រសួងឧស្សាហកម្ម និងសិប្បកម្ម និងក្រសួងមុខងារសាធារណៈ ជាដើម។
សម្ដេចហ៊ុន សែន បានបញ្ជាក់ថា៖ ឧទាហរណ៍ក្នុងវិស័យសាធារណការមានក្រុមហ៊ុនដឹកជញ្ជូនប៉ុន្មាន?មានកម្មករប៉ុន្មានជាក់លាក់?កម្មករនោះនឹងត្រូវបានទទួលការថែទាំសុខភាពអត់បង់ថ្លៃត្រូវធ្វើការងារជាមួយក្រសួងសាធារណការឱ្យមានការបញ្ជាក់ពីក្រុមហ៊ុនដើម្បីទទួលបានសេវាពិនិត្យព្យាបាលសុខភាពពីមន្ទីរពេទ្យរដ្ឋ។ ខាងវិស័យកសិកម្មពិនិត្យមើលមានចម្ការកៅស៊ូប៉ុន្មាន? ឬកសិដ្ឋានប៉ុន្មាន? ដូចជាឧកញ៉ាម៉ុង ឬទ្ធី មានចម្ការដូងប្រេងអ៊ីចឹងជាដើម។ កម្មករនៅទីនោះក៏ត្រូវទទួលបានសេវានេះដូចគ្នា»៕
