វត្ថុអវកាសដែលមានគន្លងគោចរខុសគេ ត្រូវបានអ្នកវិទ្យាសាស្ត្រយល់ថា ដោយសារប្រព័ន្ធព្រះអាទិត្យរបស់មនុស្ស ស្រូបទាញពីប្រព័ន្ធព្រះអាទិត្យ(ផ្កាយ) ដទៃ ដែលនៅក្បែរខាង តាំងតែពីរាប់ពាន់លានឆ្នាំមុន។
ក្រុមអ្នកវិទ្យាសាស្ត្របានធ្វើការសិក្សាទៅលើវត្ថុអវកាសចំនួន19 ដែលស្ថិតនៅក្នុងទិសដែលឆៀងទៅនឹងផ្ទៃស្របនៃគន្លងគោចររបស់ប្រព័ន្ធព្រះអាទិត្យទាំងមូល។ នេះបើតាមការចេញផ្សាយកាលពីថ្ងៃទី23មេសា របស់សារព័ត៌មាន IFL។ ក្នុងនោះ វត្ថុអវកាសចំនួន17 គឺស្ថិតក្នុងក្រុម Centaur ដែលមានគន្លងគោចរចន្លោះពិភពព្រហស្បតិ៍ និងពិភពសៅរ៍។ ចំណែកសមាជិក(វត្ថុអវកាស)ចំនួន2ផ្សេងទៀត ធ្វើដំណើរក្រៅគន្លងគោចររបស់ពិភពណិបទូន។
ក្រុមអ្នកវិទ្យាសាស្ត្របានរកឃើញ គន្លងគោចរខុសគេរបស់វត្ថុអវកាសទាំង19នេះ នៅពេលធ្វើការវិភាគលើកុំព្យូទ័រដើម្បីស្វែងយល់អំពីដំណាក់កាលដំបូងនៃការកកើតប្រព័ន្ធព្រះអាទិត្យ។ ប្រការនេះបានបង្ហាញថា វត្ថុអវកាសចំនួន19ខាងលើ មិនមែនកកើតឡើងជាមួយនឹងពិភព កូនភព ផ្កាយដុះកន្ទុយ និងអាចម៍ផ្កាយជាដើមនៅក្នុងប្រព័ន្ធព្រះអាទិត្យរបស់មនុស្សនោះទេ។ ផ្ទុយទៅវិញ ពួកវាប្រហែលជាត្រូវបានស្រូបទាញចូលប្រព័ន្ធព្រះអាទិត្យកាលពីជាង4ពាន់លានឆ្នាំមុន ដែលកាលណោះប្រព័ន្ធព្រះអាទិត្យកំពុងកកើតនៅក្នុងពពកធូលីអវកាស។ ដើម្បីប្រការខាងលើអាចកើតឡើងបាន ព្រះអាទិត្យរបស់មនុស្សត្រូវតែស្ថិតនៅក្បែរៗប្រព័ន្ធផ្កាយដទៃ។
បណ្ឌិត Fathi Namouni មកពីស្ថានីយអង្កេតអវកាស Cote d’Azur បានឱ្យដឹងថា “កាលពីដើមឡើយ ដោយសារនៅមិនឆ្ងាយពីគ្នា ដូច្នេះផ្កាយទាំងឡាយតែងតែទទួលរងទំនាញពីគ្នាទៅវិញទៅមកខ្លាំងជាងបច្ចុប្បន្នឆ្ងាយណាស់ ដែលកាលណោះ កូនភព(ឬអាចម៍ផ្កាយ) អាចត្រូវបានប្រព័ន្ធផ្កាយមួយនេះ ទាញយកពីប្រព័ន្ធផ្កាយមួយផ្សេងទៀត”។
បើសិនជាវត្ថុអវកាសទាំង19នេះ មានប្រភពពីប្រព័ន្ធផ្កាយផ្សេង នោះវានឹងមានតម្លៃខ្លាំងណាស់សម្រាប់វិទ្យាសាស្ត្រ។
Maria Helena Morais ដែលជាសមាជិកនៃក្រុមស្រាវជ្រាវខាងលើ និងជាតារាវិទូមកពីសាកលវិទ្យាល័យនៃរដ្ឋ Sao Paulo ប្រទេសប្រេស៊ីល ថ្លែងថា “ការរកឃើញក្រុមវត្ថុអវកាសអន្តរតារា គឺជាជំហានដ៏សំខាន់ដើម្បីស្វែងយល់អំពីចំណុចដូចគ្នា និងខុសគ្នាទាក់ទិននឹងរូបសាស្ត្រ និងគីមីសាស្ត្ររវាងអាចម៍ផ្កាយរបស់ប្រព័ន្ធព្រះអាទិត្យ និងអាចម៍ផ្កាយរបស់ប្រព័ន្ធផ្កាយដទៃ”។
Morais បន្ថែមថា “ក្រុមវត្ថុអវកាសនេះ នាំមកនូវព័ត៌មានអំពីកញ្ចុំផ្កាយដែលជាកន្លែងកកើតរបស់ព្រះអាទិត្យ ដែលនេះនឹងអនុញ្ញាតឱ្យក្រុមតារាវិទូយល់បន្ថែមអំពីដំណើរការនៃការ “ប្លន់” យកអាចម៍ផ្កាយ និងតួនាទីរបស់វត្ថុអវកាសអន្តរតារា នៅក្នុងការធ្វើពិពិធកម្ម និងកំណត់រូបរាងនៃវិវត្តនាការរបស់ប្រព័ន្ធព្រះអាទិត្យ”៕
ប្រភព៖ សារព័ត៌មានបរទេស
