ក្រោយពីរត់ការផ្លូវច្បាប់ ទៅសហព័ន្ធកីឡាគុនខ្មែរ មិនទាន់នោះ អ្នកប្រដាល់ អ៊ុំ ចំរើន ត្រូវបានខកខាន ទៅប្រកួតដណ្ដើមខ្សែក្រវ៉ាត់ កម្រិតពិភពលោក (Max Muay Thai World Champion) នៅ Max Muay Thai Stadium ក្នុងទីក្រុងប៉ាតាយ៉ា ប្រទេសថៃ នាថ្ងៃទី ៣០ ខែមេសា ខាងមុខនេះវិញហើយ ។ ខណៈ ដែលបហិច្ឆតា របស់អ្នកប្រដាល់រូបនេះ ចង់ដណ្ដើមខែក្រវ៉ាត់មកជូនជាតិខ្លាំងណាស់។
គ្រូបង្វឹករបស់កីឡាកររូបនេះ ដែលមកពីក្លិបតាឡីដំរីមានរិទ្ធ លោក ម៉ាក់ សុខន បានឱ្យដឹងថា៖ «នៅពេលក្លិបបានធ្វើសំណើទៅ គឺខាងថ្នាក់លើរបស់សហព័ន្ធកីឡាប្រដាល់គុនខ្មែរ បានប្រាប់ឲ្យខាង Max Muay Thai World Champion ទាក់ទងមកសហព័ន្ធផ្ទាល់ ប៉ុន្តែដោយសារពេលវេលានៅសល់តិចពេក គឺមិនអាចធ្វើទៅរួចទេ ព្រោះសហព័ន្ធ ត្រូវសុំសំណើទៅក្រសួងអប់រំ យុវជន និងកីឡា ទៀត អ៊ីចឹងយើងមិនអាចទៅប្រកួតដោយគ្មានការអនុញ្ញាតនោះទេ ព្រោះវានាំឲ្យប៉ះពាល់ដល់ក្លិបរបស់យើង»។
អ៊ុំ ចំរើន ក៍បាននិយាយដែលថា៖ «តាមខ្ញុំដឹង កម្មវិធីប្រកួតនេះ គេបានរៀបចំរួចរាល់អស់ហើយ ប៉ុន្តែវាទាក់ទងដល់សហព័ន្ធកីឡាប្រដាល់គុនខ្មែររបស់យើង ហើយខ្ញុំមិនហ៊ានទៅប្រកួតដោយគ្មានការអនុញ្ញាតពីសហព័ន្ធនោះទេ ចំណែកសំណើសុំទៅសហព័ន្ធ យ៉ាងណានោះ ខ្ញុំអត់ដឹងច្បាស់ដែរ គឺលើគ្រូរបស់ខ្ញុំ»។
កីឡាករូបនេះ សង្កត់ធ្ងន់ថា៖ ព្រឹត្តិការណ៍ប្រកួតនេះ វាជាក្តីសុបិនរបស់ខ្ញុំ ព្រោះវាមិនងាយបានទៅទេ ហេតុនេះបើសិនជាខ្ញុំបានចូលរួមនោះ ខ្ញុំនឹងប្រឹងប្រែងវ៉ៃឲ្យអស់ពីសមត្ថភាព ដើម្បីដណ្តើមយកខ្សែក្រវាត់នេះដើម្បីមុខមាត់ជាតិ ពិសេសបង្ហាញឲ្យពិភពលោកបានឃើញពីក្បាច់គុនបុរាណខ្មែរ»។
គួររំឭកថា កីឡាករ វង្ស ណយ និង សេន ប៊ុនថេន ជាដើមសុទ្ធតែធ្លាប់ត្រូវបានសហព័ន្ធដាក់ទណ្ឌកម្មចំពោះការចេញទៅប្រកួតនៅ Max Muay Thai World Champion ជាលក្ខណៈឯកជន គ្មានការអនុញ្ញាត គឺមានតែ មឿន សុខហ៊ុច ម្នាក់ទេ ដែលត្រូវបានក្រសួង និងសហព័ន្ធ អនុញ្ញាតឲ្យទៅប្រកួតដណ្តើមខ្សែក្រវាត់មាស ជាផ្លូវការក្នុងព្រឹត្តិ្កការណ៍ Max Muay Thai World Champion នេះកាលពីឆ្នាំ ២០១៦ បន្ទាប់ពីរូបគេបានឈ្នះខ្សែក្រវាត់ប្រាក់ ប៉ុន្តែ សុខហ៊ុច បានធ្លាក់ពីការប្រកួតដណ្តើមខ្សែក្រវាត់មាសនោះ ត្រឹមវគ្គជម្រុះលើកទី ១៕
