យុវជនដែលបានបោះបង់ការសិក្សានៅថ្នាក់មធ្យមសិក្សាសូមកុំបោះបង់ចោលឱកាសសម្រាប់ការអភិវឌ្ឍខ្លួនព្រោះមិនទាន់អស់ផ្លូវទៅឡើយទេសម្រាប់ការកសាងអនាគតសម្រាប់ចំណេះដឹង។ កម្មវិធី BEEP ជាកម្មវិធីមួយដែលក្រសួងអប់រំ សហការជាមួយស្ថាប័នដៃគូនានាដើម្បីបណ្តុះបណ្តាលយុវជនដែលបានបោះបង់ការសិក្សាចាប់ពីថ្នាក់ទី7 ទៅ ឱ្យទទួលបានចំណេះដឹង និងជំនាញល្អៗសម្រាប់ការរស់នៅ។
កម្មវីធី BEEP (Basic Education Equivalency Program) ជាកម្មវិធីមួយដែលជាគំនិតផ្តួចផ្តើមរបស់ក្រសួងអប់រំ យុវជន និងកីឡា ក្រសួងការងារ និងបណ្តុះបណ្តាលវិជ្ជាជីវៈ និងអង្គការ UNESCO ដើម្បីផ្តល់ឱកាសដល់សិស្សដែលបានបញ្ចប់ការ-សិក្សាថ្នាក់ទី6 ហើយមិនបានរៀនបន្ត ឬអ្នកដែលបោះបង់ចោលការសិក្សាពីថ្នាក់ទី7 ដល់ថ្នាក់ទី9 ដើម្បីបញ្ចប់ការសិក្សាថ្នាក់មូលដ្ឋាន និងបន្តរៀនក្នុងប្រព័ន្ធ TVET។
ឯកឧត្តមបណ្ឌិតសភាចារ្យ ហង់ ជួនណារ៉ុន បានលើកឡើងថា យុវជនដែលបោះបង់ចោលការសិក្សាត្រឹមថ្នាក់ទី7 នៅពេលនេះអាចចាប់ផ្តើមបន្តការសិក្សាដើម្បីឈានទៅចាប់ថ្នាក់បណ្តុះបណ្តាលផ្នែកបច្ចេកទេស និងវិជ្ជាជីវៈដើម្បីពង្រឹងសមត្ថភាព និងចំណេះដឹងដែលមានស្រាប់ឱ្យកាន់តែប្រសើរឡើងតាមរយៈកម្មវិធី BEEP នេះ។ ចំណុចសំខាន់ទាំងអស់នេះនឹងធ្វើឱ្យពួកគាត់អាចសម្រេចគោលដៅ និងក្តីស្រមៃរបស់ខ្លួនក្នុងការអភិវឌ្ឍខ្លួនឱ្យក្លាយជាអ្នកជំនាញ ឬអ្នកមានអាជីពច្បាស់លាស់មួយសម្រាប់បង្កើនចំណូលក្នុងគ្រួសារ ហើយកាត់បន្ថយភាពក្រីក្រ។
កម្មវីធីនេះយុវជនអាចសិក្សាបានតាមរយៈបណ្តាញអនឡាញ នៅគ្រប់ទីកន្លែងបានយ៉ាងងាយតាមរយៈទូរស័ព្ទដៃ ឬកុំព្យូទ័រ។ ក្នុងករណីមិនយល់ច្បាស់ ឬមិនមានឧបករណ៍អឡិចត្រូនិកសម្រាប់ប្រើប្រាស់ពួកគេអាចជួបអ្នកជំនាញ និងប្រើប្រាស់សម្ភារសិក្សាបាននៅវិទ្យាស្ថានបច្ចេកវិទ្យាកម្ពុជា (ITC) ដែលគ្រប់គ្នាស្គាល់ថា ជាសាលាតិចណូ។ ចំពោះមុខវិជ្ជាដែលសិស្សអាចជ្រើសរើសសិក្សាបានមានចំនួន 11មុខសំខាន់ៗ គឺមុខវិជ្ជាសហគ្រិនភាព ភាសាអង់គ្លេសបច្ចកវិទ្យាព័ត៌មាន គណិតវិទ្យា ភាសាខ្មែរ រូបវិទ្យា និងមុខវិជ្ជាមួយចំនួនផ្សេងទៀតដែលជាជំនាញផ្នែកទន់ដើម្បីធ្វើឱ្យសិស្សកាន់តែមានសមត្ថភាពប្រសើរក្នុងពេលបម្រើការងារ។
យោងតាមអ្នកនាំពាក្យក្រសួងអប់រំ យុវជន និងកីឡា ឯកឧត្តម រស់ សុវាចា បានលើកឡើងថា អត្រាសិស្សបោះបង់ការសិក្សាត្រឹមកម្រិតមធ្យមសិក្សានៅមានកម្រិតខ្ពស់នៅឡើយ ដែលបញ្ហាទាំងអស់នេះបណ្តាលមកពីកត្តាគ្រួសារ កត្តាសង្គម កត្តាសាលារៀន និងកត្តាសិស្សផ្ទាល់តែម្តង។ ទិន្នន័យរបស់ក្រសួងអប់រំនៅឆ្នាំសិក្សា 2017-2018 បានបញ្ជាក់ថា អត្រាសិស្សបោះបង់ចោលការសិក្សាត្រឹមកម្រិតបឋមសិក្សាមានចំនួនត្រឹមតែ 4.7%តែប៉ុណ្ណោះ តែសម្រាប់ថ្នាក់មធ្យមសិក្សាបឋមភូមិមានចំនួន 16.6%។
លោក ជំទាវ គឹម សេដ្ឋានី រដ្ឋលេខាធិការក្រសួងអប់រំយុវជន និងកីឡា បានលើកឡើងថា កម្មវិធី BEEP នេះគឺជាកូនសោគន្លឹះយ៉ាងសំខាន់ក្នុងការទាក់ទាញយុវជនទាំងអស់ដែលបានបោះបង់ចោលការសិក្សាឱ្យមានឱកាសក្នុងការចាប់ផ្តើមការសិក្សាឡើងវិញដើម្បីក្លាយជាកម្លាំងពលកម្មសកម្ម និងមានសមត្ថភាពសម្រាប់សង្គម។ ក្រោយពេលយុវជនវ័យក្មេងមានសមត្ថភាពវិជ្ជាជីវៈ នោះវានឹងធ្វើឱ្យយើងមានធនធានមនុស្សសម្បូរបែបសម្រាប់បម្រើការងារក្នុងវិស័យនានាដែលកំពុងត្រូវការជាចាំបាច់ទាំងឧស្សាហកម្មសំណង់ និងទេសចរណ៍ជាដើម។
បច្ចុប្បន្ននេះជាសម័យបច្ចេកវិទ្យា ដែលរបៀបនៃការធ្វើការងារ និងការរស់នៅមានភាពប្រែប្រួលយ៉ាងឆាប់រហ័ស។ បច្ចេកវិទ្យាបានធ្វើឱ្យការអប់រំកាន់តែប្រសើរឡើង តែវាក៏អាចធ្វើឱ្យមានផលប៉ះពាល់ខ្លះៗផងដែរចំពោះវិស័យការងារ ហេតុនេះយុវជនដែលកំពុងធ្វើការងារនៅគ្រប់ទីកន្លែងទាំងក្នុងប្រព័ន្ធ និងក្រៅប្រព័ន្ធចាំបាច់ត្រូវព្យាយាមក្នុងការពង្រឹងសមត្ថភាពបន្ថែមដើម្បីរក្សាឱ្យបាននូវជំនាញដែលជាតម្រូវការជាក់ស្តែងរបស់ស្ថាប័ននានា មិនអាចបន្តធ្វើការងារដដែលៗ និងប្រើប្រាស់កម្លាំងកាយទាំងស្រុងបាននោះទេ។ ការចាប់ផ្តើមទទួលយកឱកាសក្នុងការអភិវឌ្ឍសមត្ថភាពដោយចំណាយថវិកាតិចរបស់ស្ថាប័ន អប់រំ និងការងារ នេះជាសញ្ញាវិជ្ជមានដើម្បីចាកចេញពីភាពក្រីក្រ និងទទួលយកភាពថ្កុំថ្កើងសម្រាប់ជីវិតឯកជន គ្រួសារ និងសង្គម៕
