របាយការណ៍សិក្សាថ្មីមួយរបស់ធនាគារពិភពលោកបានរកឃើញថា កម្ពុជាទទួលបានអគ្គិសនីដែលផ្គត់ផ្គង់ដោយបណ្តាញចែកចាយរបស់រដ្ឋកាន់តែធំទូលាយរហូតដល់ 71.5ភាគរយនៃគ្រួសារនៅទូទាំងប្រទេស ប៉ុន្តែសេវាកម្មផ្គត់ផ្គង់ត្រូវតែកែសម្រួលឱ្យប្រសើរជាងនេះ ដោយសារប្រជាជនរហូត 33ភាគរយ នៅតែត្អួញត្អែរពីភាពរអាក់រអួលនៃការផ្គត់ផ្គង់ចរន្តអគ្គិសនី។
របាយការណ៍ធនាគារពិភពលោកដែលទើបចេញផ្សាយនៅថ្ងៃព្រហស្បតិ៍សប្ដាហ៍មុន ក្រោមចំណងជើងថា កម្ពុជាលើសពីការតភ្ជាប់បណ្តាញ៖ ការវិនិច្ឆ័យតាមអភិក្រមក្របខ័ណ្ឌពហុលំដាប់លើលទ្ធភាពទទួលបានថាមពលបានរកឃើញថា នៅទូទាំងប្រទេស គ្រួសារជនកម្ពុជាចំនួនជិត 90ភាគរយមានលទ្ធភាពទទួលបានការផ្គត់ផ្គង់អគ្គិសនីយ៉ាងហោចណាស់រយៈពេល 4ម៉ោងក្នុង1ថ្ងៃ។
របាយការណ៍របស់ធនាគារពិភពលោកដដែលបានឱ្យដឹងថា នៅតំបន់ជនបទបច្ចុប្បន្នមានគ្រួសារចំនួន 30ភាគរយដែលពឹងផ្អែកលើប្រភពថាមពលអគ្គិសនីមិនមែនបណ្តាញចែកចាយរដ្ឋដើម្បីទទួលបានភ្លើងអគ្គិសនីប្រើប្រាស់ ក្នុងនោះមានប្រព័ន្ធស្រូបថាមពលពន្លឺព្រះអាទិត្យខ្នាតលំនៅឋាន ចង្កៀងគោមប្រើថាមពលព្រះអាទិត្យ និងអាគុយសាកភ្លើង។
ការពង្រឹងប្រព័ន្ធផ្ទេរ និងចែកចាយចរន្ត ឱ្យបានកាន់តែល្អ ក៏ដូចជាការលើកកម្ពស់ពង្រីកការតភ្ជាប់ចរន្តអគ្គិសនីជាមួយបណ្តាញរដ្ឋ និងការប្រើប្រាស់ប្រព័ន្ធស្រូបថាមពលព្រះអាទិត្យតាមលំនៅឋាន និងនាំឱ្យកម្ពុជាពង្រឹងបានកាន់តែរឹងមាំនូវសក្តានុពលនៃសេដ្ឋកិច្ចរបស់ខ្លួន។
បើទោះបីជាកំណើននៃការផ្គត់ផ្គង់អគ្គិសនីមានភាពប្រសើរឡើងយ៉ាងណាក៏ដោយ ប៉ុន្តែគុណភាពរបស់សេវាកម្មនៅអន់ថយនៅឡើយ ដែលវាជះឥទ្ធិពលយ៉ាងខ្លាំងដល់ការរស់នៅ និង ការប្រកបអាជីវកម្មរបស់ប្រជាពលរដ្ឋ។
របាយការណ៍នោះបានឱ្យដឹងថា បញ្ហាប្រឈមធំជាងគេគឺ ភាពទុកចិត្តបាន (ការដាច់ចរន្តញឹកញាប់)និងគុណភាព (បញ្ហាតង់ស្យុងឡើងចុះ)នៃការផ្គត់ផ្គង់ចរន្តអគ្គិសនីតាមបណ្តាញចែកចាយរដ្ឋ ដោយសារជាងពាក់កណ្តាលនៃលំនៅឋានដែលភ្ជាប់ចរន្តអគ្គិសនីជាមួយបណ្តាញចែកចាយរបស់រដ្ឋបានរងការដាច់ចរន្តអគ្គិសនីជាង 14លើកក្នុងមួយសប្តាហ៍ (ជាមធ្យមប្រហែល 6នាទីក្នុងមួយលើក)។ 33ភាគរយនៃអ្នកប្រើប្រាស់អគ្គិសនីតាមបណ្តាញចែកចាយរដ្ឋនិយាយថា ពួកគេឧស្សាហ៍ជួបប្រទះបញ្ហាតង់ស្យុងអគ្គិសនីឡើងចុះខ្លាំងណាស់។
លោកស្រី អុីនហ្គូណា ដូប្រាចា នាយិកាគ្រប់គ្រងធនាគារពិភពលោកប្រចាំកម្ពុជា មានប្រសាសន៍ថា ថាមពលមានសារៈសំខាន់ណាស់សម្រាប់ពង្រីកសមត្ថភាពប្រកួតប្រជែងផ្នែកឧស្សាហកម្មដែលបង្កើតការងារថ្មី ហើយសម្រាប់ធ្វើឱ្យប្រសើរឡើងនូវសេវាសាធារណៈដែលពង្រីកឱកាសក្នុងការជួយឱ្យប្រជាពលរដ្ឋកម្ពុជាគ្រប់រូបមានជីវភាពប្រកបដោយផាសុកភាព និងគុណភាពកាន់តែល្អជាងមុន។
លោកស្រីថែមទាំងបានបញ្ជាក់ថា៖ “កម្ពុជាជាប្រទេសទី1នៅក្នុងតំបន់អាស៊ីបូព៌ា និងប៉ាស៊ីហ្វិកដែលត្រូវបានធ្វើការអង្កេតអភិក្រមក្របខ័ណ្ឌពហុលំដាប់នេះដែលផ្តល់ទិន្នន័យពិស្តារស្តីពីលទ្ធភាពទទួលបានថាមពលអគ្គិសនីតាមគ្រួសារ សម្រាប់យកទៅពង្រឹងការរៀបចំគោលនយោបាយក្នុងវិស័យថាមពលនេះ។
ឯកឧត្តម ទី នរិន្ទ ប្រធានអាជ្ញាធរអគ្គិសនីកម្ពុជាបានទទួលស្គាល់ថា គុណភាពរបស់សេវាកម្មអគ្គិសនីពិតជានៅខ្សោយមែន ដែលទាមទារឱ្យមានការពង្រឹងបន្ថែមទៀតសម្រាប់ធានាដល់ការរីកចម្រើននៃអាជីវកម្ម ដែលជាផ្នែកមួយក្នុងការជំរុញសេដ្ឋកិច្ចជាតិឱ្យកាន់តែរីកចម្រើនឡើង។ ឯកឧត្តម ទី នរិន្ទ បានបញ្ជាក់ថា៖ “កម្ពុជាសម្រេចបានភាពរីកចម្រើនយ៉ាងលឿននៅក្នុងការពង្រីកលទ្ធភាពទទួលបានចរន្តអគ្គិសនីទៅដល់បណ្តាភូមិនានា និងអ្នកប្រើប្រាស់ ក៏ប៉ុន្តែវឌ្ឍនភាពនេះក៏ទទួលបាននៅក្នុងតម្លៃខាតបង់មួយដែរ។ អាស្រ័យហេតុនេះ ពេលនេះជាពេលដែលយើងត្រូវបង្វែរការយកចិត្តទុកដាក់របស់យើងទៅពង្រឹងភាពគួរទុកចិត្តបាន និងគុណភាពនៃការផ្គត់ផ្គង់ចរន្តអគ្គិសនីដើម្បីជួយឱ្យសេដ្ឋកិច្ចគ្រួសារ និងធុរកិច្ចលួតលាស់បានល្អ។
ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពលធ្លាប់បានអះអាងកាលពីពេលកន្លងមកថា ដំណើរការទំនប់សេសាន្តក្រោម2 នឹងធ្វើឱ្យវិស័យថាមពលនៅកម្ពុជាកាន់តែមានស្ថេរភាព ដោយកម្ពុជានឹងកាត់បន្ថយការខ្វះខាតថាមពលអគ្គិសនីសម្រាប់ការផ្គត់ផ្គង់ដល់អ្នកប្រើប្រាស់របស់ខ្លួនដែលមានកំណើនក្នុងរង្វង់ជិត 20ភាគរយប្រចាំឆ្នាំ បន្ទាប់ពីការដាក់ឱ្យដំណើរការសាកល្បងនូវទំនប់វារីអគ្គិសនីសេសាន្តក្រោម2 ដែលជាការវិនិយោគរួមគ្នារវាងក្រុមហ៊ុនក្នុងស្រុក និងក្រុមហ៊ុនមកពីប្រទេសចិន និងវៀតណាម។
ឯកឧត្តម ស៊ុយ សែម បានអះអាងថា ទំនប់វារីអគ្គិសនីសេសាន្តក្រោម2 ដែលសាងសង់ឡើងនៅខេត្តស្ទឹងត្រែងនឹងមានកម្លាំងផលិតថាមពលសរុប 400មេហ្គាវ៉ាត់ក្នុងមួយម៉ោង ខណៈដែលការផលិតថាមពលនឹងធ្វើឡើងនៅចុងខែតុលាសម្រាប់តួប៊ីនទី1 រីឯតួប៊ីន7ផ្សេងទៀតនឹងត្រូវដំណើរការជាបន្តបន្ទាប់នៅឆ្នាំ2018នេះ។
របាយការណ៍របស់អាជ្ញាធរអគ្គិសនីកម្ពុជាបង្ហាញថា គិតត្រឹមចុងឆ្នាំ2016 ការតភ្ជាប់បណ្តាញបានចំនួន 100,589ភូមិនៅទូទាំងប្រទេសដែលស្មើនឹង74.74%នៃភូមិសរុបនៅទូទាំងប្រទេស ហើយភ្ជាប់ចរន្តឱ្យប្រជាពលរដ្ឋប្រើប្រាស់បានចំនួន 191ម៉ឺនខ្នងផ្ទះ ត្រូវជា 58%នៃចំនួនខ្នងផ្ទះសរុប។
របាយការណ៍ដដែលបានបន្ថែមថា ចំពោះការតភ្ចាប់បណ្តាញអគ្គិសនីជាតិ បច្ចុប្បន្ននេះមានខ្សែបណ្តាញតង់ស្យុងខ្ពស់ 115គីឡូវ៉ុល និង 230គីឡូវ៉ុលប្រវែង 1,525គីឡូម៉ែត្រ និងមានអនុស្ថានីយចំនួន25កន្លែងដែលគ្របដណ្តប់លើខេត្តក្រុងចំនួន14រួចហើយ និងភ្ជាប់បន្ថែមនៅខេត្តចំនួន 9ផ្សេងទៀតនៅឆ្នាំ2018 ហើយខេត្តពីរចុងក្រោយគឺ ខេត្តរតនគិរី និងមណ្ឌលគិរី នឹងត្រូវភ្ជាប់នៅដើមឆ្នាំ2020៕
