ថ្នាក់ដឹកនាំជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ កំពុងបំពេញទស្សនកិច្ចនៅប្រទេសបារាំង និងបានចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការចំនួន2 ដែលមានតម្លៃជាទឹកប្រាក់41លានអឺរ៉ូ។
បើយោងតាមព័ត៌មានដែលចែកចាយដោយក្រសួងសេដ្ឋកិច្ច និងហិរញ្ញវត្ថុដល់អ្នកសារព័ត៌មាននៅក្នុងកិច្ចប្រជុំពិគ្រោះយោបល់កម្រិតគោលនយោបាយលើកទី2 ជាមួយសមភាគីបារាំង នាទីស្នាក់ការកណ្តាលរបស់ ទីភ្នាក់ងារបារាំងសម្រាប់អភិវឌ្ឍន៍ (AFD) នាទីក្រុងប៉ារីស សាធារណរដ្ឋបារាំង ឯកឧត្តម វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ក្នុងនាមរាជរដ្ឋាភិបាលកម្ពុជា បានចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការចំនួន 2 ដែលរួមមាន៖
1-កិច្ចព្រមព្រៀងឥណទានសម្បទានលើគម្រោងទឹកស្អាត និងអនាម័យក្នុងទីរួមខេត្ត ក្នុងទឹកប្រាក់ចំនួន 40លានអឺរ៉ូ។ និង២-កិច្ចព្រមព្រៀងហិរញ្ញប្បទានឥតសំណងសម្រាប់ការសិក្សា និងពង្រឹងសមត្ថភាព ក្នុងទឹកប្រាក់ចំនួន 1លានអឺរ៉ូ។
ក្រសួងសេដ្ឋកិច្ច និងហិរញ្ញវត្ថុ បានឲ្យដឹងថាកិច្ចព្រមព្រៀងសហប្រតិបត្តិការទាំងពីរខាងលើនេះនឹងចូលរួមចំណែកក្នុងផ្តល់ការអភិវឌ្ឍហេដ្ឋារចនាសម្ព័ន្ធជនបទតាមរយៈការផ្តល់សេវាកម្ម ក៏ដូចជាការតបណ្តាញទឹកស្អាតទៅកាន់ទីជនបទ និងការកសាងសមត្ថភាពមន្ត្រីអនុវត្តគម្រោង និងការសិក្សាសមិទ្ធលទ្ធភាពគម្រោងក្នុងក្របខ័ណ្ឌកិច្ចសហប្រតិបត្តិការអភិវឌ្ឍន៍ជាមួយ AFD។
តាមរយៈព័ត៌មានដែលបានផ្សព្វផ្សាយនោះ ឯកឧត្តម វង្សី វិស្សុត បានលើកឡើងថា ក្នុងគោលដៅធានាដល់ការអភិវឌ្ឍប្រកបដោយចីរភាពរបស់កម្ពុជា កិច្ចសហប្រតិបត្តិការហិរញ្ញវត្ថុ ដែលផ្តល់ដោយរដ្ឋាភិបាលបារាំងតាមរយៈ AFD ក្នុងក្របខ័ណ្ឌឥណទានសម្បទាន ត្រូវតែឆ្លើយតបទៅនឹងតម្រូវការរបស់កម្ពុជា ដើម្បីទ្រទ្រង់ដល់កំណើនសេដ្ឋកិច្ច។ ការកាត់បន្ថយភាពក្រីក្រ និងត្រូវឲ្យចំនូវអាទិភាពគោលនយោបាយនានារបស់កម្ពុជា ក៏ដូចជាត្រូវឱ្យមានសង្គតិភាពជាមួយគោលនយោបាយក្នុងការខ្ចី ព្រមទាំងច្បាប់ និងបទប្បញ្ញត្តិពាក់ព័ន្ធនានារបស់កម្ពុជាផងដែរ។
តាមប្រភពព័ត៌មានដដែល លោក Philippe BAUDUIN នាយកប្រតិបត្តិរងរបស់ទីភ្នាក់ងារបារាំងសម្រាប់អភិវឌ្ឍន៍ (AFD) បានបញ្ជាក់ថា AFD គ្រោងនឹងបន្ថែមទំហំហិរញ្ញប្បទានសហប្រតិបត្តិការដល់ការអភិវឌ្ឍរបស់ប្រទេសកម្ពុជា ឱ្យស្របទៅនឹងបរិការណ៍នៃការអភិវឌ្ឍបច្ចុប្បន្នរបស់ប្រទេសកម្ពុជា ហើយនៅក្នុងន័យនេះ លោកនឹងខិតខំជួយសម្របសម្រួលគ្រប់បែបយ៉ាងដល់ប្រទេសកម្ពុជា ក្នុងការស្រូបយកនូវហិរញ្ញប្បទានសហប្រតិបត្តិការនេះពី AFD ឲ្យបានច្រើនតាមដែលអាចធ្វើទៅបាន៕
