ជាធម្មតានៅពេលដែលការផ្គត់ផ្គង់មិនគ្រប់គ្រាន់ នឹងធ្វើឱ្យតម្លៃនៃផលិតផលមានការកើនឡើងដូចជាកាលពីដើមឆ្នាំ តម្លៃបន្លែផ្កាខាត់ណាលក់បានថ្លៃខ្ពស់ ដោយសារមិនសូវសម្បូរ តែលុះដល់កណ្តាលដៃ និងចុងដៃ ការប្រមូលផលបានកាន់តែច្រើន តម្លៃក៏បានធ្លាក់ចុះវិញដែរ។
លោកសៅ ផេង និងលោកណែម សារឿន កសិករនៅភូមិកោះផុស ឃុំដីឥដ្ឋ ស្រុក កៀនស្វាយ ខេត្តកណ្តាល បាននិយាយស្រដៀងគ្នាថា ពួកគាត់បានចាប់យករបរដាំបន្លែជិត 30ឆ្នាំមកហើយ និងបានដាំបន្លែផ្កាខាត់ណានេះជាង 10ឆ្នាំមកហើយដែរ។ ជាធម្មតាតម្លៃបន្លែផ្កាខាត់ណា នឹងលក់បានថ្លៃនៅពេលកាត់លក់ដំបូង(ដើមដៃ) លុះដល់កណ្តាលដៃ និងចុងដៃគឺតម្លៃតែងតែធ្លាក់ចុះទៅវិញ ព្រោះតែទិន្នផលជន់ឡើងកាន់តែច្រើន។ ជាក់ស្តែងក្នុងឆ្នាំនេះកាលពីដំបូងឡើយមួយគីឡូក្រាមបានដល់ទៅ 5,000រៀល ឥឡូវពាក់កណ្តាលដៃនេះ គឺបានត្រឹមតែជាង 2,000រៀលប៉ុណ្ណោះក្នុងមួយគីឡូក្រាម ហើយបើតម្លៃនៅទ្រឹងត្រឹមប៉ុណ្ណឹង កសិករក៏មិនជួបបញ្ហាអ្វីខ្លាំងដែរ ព្រោះអាចនៅបានចំណេញខ្លះដែរ ដោយសារកាលពីដើមដៃយើងបានកាត់លក់ 5 ទៅ6លើករួចមកហើយ ក្នុងតម្លៃចន្លោះពី 3,000 ទៅ5,000រៀល ព្រោះបន្លែផ្កាខាត់ណានេះក្នុងមួយចម្ការគេកាត់លក់បាន 6 ទៅ7ដងឯណោះទើបអស់។គ្រាន់តែកុំឱ្យធ្លាក់ថ្លៃដូចកាលពីឆ្នាំទៅ 1គីឡូក្រាមបានតែជាង 1,000រៀលនោះ ពិតជាខាតបះដៃបះជើងហើយ។
ពួកគាត់ក៏បានឱ្យដឹងដែរថា ឆ្នាំនេះដោយសារអាកាសធាតុត្រជាក់ មានភាពអំណោយផលច្រើនចំពោះដំណាំផ្កាខាត់ណា ទើបមិនសូវប្រើថ្នាំ និងជីច្រើនឡើយ។ កសិករទាំងពីរក៏បានប្រាប់អំពីវិធីដាំដុះ និងថែទាំផងដែរថា ដំណាំផ្កាខាត់ណាមុនដំបូងឡើយ ត្រូវសាបកូនទុករយៈពេល 28 ទៅ30ថ្ងៃ ទើបដកកូនយកមកស្ទូង(ដាក់ដាំ) ហើយមុននឹងយកកូនមកស្ទូងត្រូវភ្ជួររាស់ហាលដីចោលពី 10 ទៅ15ថ្ងៃសិន ទើបលើកជារង។ ពេលដាំរួច ត្រូវស្រោចទឹក1ថ្ងៃម្តង និងជ្រួយគុម្ព 1អាទិត្យម្តង ហើយរយៈពេល 10 ទៅ15ថ្ងៃត្រូវដាក់ជីម្តង។ ដំណាំបន្លែផ្កាខាត់ណា ត្រូវការថែទាំខ្លាំងជាងប្រភេទដំណាំបន្លែផ្សេងៗទៀត ហើយក្រោយពីដាំបាន1ខែ គឺយើងអាចកាត់ផ្កាវាលក់បានហើយ ដោយផ្កាមួយគុម្ព មានទម្ងន់ចន្លោះពីកន្លះគីឡូក្រាម ទៅ7ខាំ។
លោក ស សំណាង ប្រធានសហគមន៍បន្លែសុវត្ថិភាពឃុំដីឥដ្ឋ ស្រុកកៀនស្វាយ ខេត្តកណ្តាលបានប្រាប់ដែរថា នៅភូមិកោះផុស កសិករភាគច្រើននិយមដាំបន្លែផ្កាខាត់ណា តែវាមានតម្លៃឡើងចុះមិនទៀងទាត់ទេ ប៉ុន្តែប្រសិនបើពួកគាត់ចូលរួមជាសមាជិកសហគមន៍ និងងាកមកប្រើប្រាស់ថ្នាំសម្លាប់សត្វល្អិត និងជីធម្មជាតិវិញនោះ តម្លៃបន្លែរបស់ពួកគាត់នឹងមានលំនឹង ដូចជាផ្កាខាត់ណាអុីចឹង គឺអាចលក់ទៅឱ្យអង្គការ និងក្រុមហ៊ុនដៃគូក្នុងមួយគីឡូក្រាមបាន 4,000រៀលថេរ ប៉ុន្តែសព្វថ្ងៃក៏កំពុងមានបញ្ហាដែរ ដោយសារការបញ្ជាទិញបន្លែសុវត្ថិភាពមានកម្រិត ហើយក៏សូមសំណូមពរដល់ជំនាញពាក់ព័ន្ធក៏ដូចជារដ្ឋាភិបាលដែរ សូមមេត្តាជួយគិតគូរបញ្ហាទីផ្សារបន្លែនេះផង៕
