ភ្នំពេញ៖ លោកសាស្ត្រាចារ្យ Qi Shaowu នាយកមជ្ឈមណ្ឌលវិទ្យាស្ថានស្រាវជ្រាវពូជស្រូវ China National Hybrid Rice R&D Center បានថ្លែងឱ្យដឹងថា ការសាកល្បងដាំស្រូវប្រភេទថ្មីនាំមកពីប្រទេសជប៉ុនកំពុងទទួលបានជោគជ័យខ្លាំងនៅក្នុងប្រទេសកម្ពុជា។
លោកបញ្ជាក់ថា ការសាកល្បងដាំដុះពូជអង្ករគ្រាប់ឃ្លីនៅកម្ពុជាទទួលបានលទ្ធផលល្អប្រសើរខ្លាំងជាងពូជស្រូវដទៃ ដោយក្នុង1ហិកតាទទួលផលបានប្រមាណជា 7.7តោននៅក្នុងខេត្តកំពង់ស្ពឺ និង 7.4តោននៅក្នុងខេត្តពោធិ៍សាត់។ លក្ខណៈពិសេសរបស់ពូជស្រូវជប៉ុនប្រភេទនេះមានចំនួន4យ៉ាងដែលត្រូវបានជ្រើសរើសយកមកដាំនៅប្រទេសកម្ពុជាដោយពូជនីមួយៗអាចធន់នឹងទឹកជំនន់ ធន់នឹងជំងឺឆ្លង និងត្រូវការប្រើប្រាស់សារធាតុជីតិចបំផុត ជាពិសេសធន់នឹងអាកាសធាតុក្តៅ។ បច្ចុប្បន្នប្រភេទពូជស្រូវជប៉ុននេះកំពុងមានតម្រូវការទីផ្សារខ្ពស់ទូទាំងពិភពលោក ជាពិសេសប្រទេសចិនដែលកំពុងមានការខ្វះខាតអង្ករប្រភេទនេះជាង3លានតោនក្នុងមួយឆ្នាំ។
ឯកឧត្តមវេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ បានថ្លែងកោតសសើរ និងវាយតម្លៃខ្ពស់ចំពោះមជ្ឈមណ្ឌលវិទ្យាស្ថានស្រាវជ្រាវពូជស្រូវ China National Hybrid Rice R&D Center ជាពិសេសលោកសាស្ត្រាចារ្យ Qi និងសហការីដែលបានមកសិក្សាស្រាវជ្រាវពូជអង្ករគ្រាប់ឃ្លីថ្មីនេះនៅប្រទេសកម្ពុជា និងមានបំណងវិនិយោគ និងសហការជាមួយក្រសួងក្នុងការផ្លាស់ប្តូបទពិសោធការងារដើម្បីអភិវឌ្ឍវិស័យស្រូវអង្ករនៅកម្ពុជាឱ្យកាន់តែមានកិត្យានុភាពលើទីផ្សារស្រូវអង្ករពិភពលោកដែលស្របជាមួយគោលដៅអាទិភាពរបស់រាជរដ្ឋាភិបាលក្នុងការធានាសន្តិសុខស្បៀង និងបង្កើតការនាំចេញអង្ករកម្ពុជាឱ្យបានលើសពី 1លានតោនក្នុង1ឆ្នាំ។
ឯកឧត្តមរដ្ឋមន្ត្រីក៏បានផ្តល់អនុសាសន៍ណែនាំមួយចំនួនដល់លោកសាស្ត្រាចារ្យ Qi និងសហការី ត្រូវរៀបចំសេចក្តីព្រាងអនុស្សរណៈនៃការយោគយល់គ្នា3ភាគី រវាងក្រុមហ៊ុនទទួលទិញអង្ករនេះទៅកាន់ទីផ្សារចិន ខណៈមជ្ឈមណ្ឌលវិទ្យាស្ថានស្រាវជ្រាវ និងក្រសួងកសិកម្ម រុក្ខាប្រមាញ់ និងនេសាទ នឹងត្រូវចុះហត្ថលេខានៅពាក់កណ្តាលខែធ្នូខាងមុខ។
ទន្ទឹមនឹងនេះត្រូវអនុវត្តនូវយុទ្ធសាស្ត្រមួយចំនួនគឺ
ទី1.គិតគូរពីការអនុវត្តដោយផ្សារភ្ជាប់វិស័យឯកជន និងកសិករតាមរយៈធ្វើការដាំដុះ និងផ្គត់ផ្គង់តាមកិច្ចសន្យា។
ទី2. ផ្តល់ស្រូវដែលមានតម្រូវការទីផ្សារខ្ពស់ដល់កសិករខ្មែរ។
ទី3.កំណត់តំបន់ដាំដុះដែលមានសក្តានុពលខ្ពស់ដើម្បីបង្កើនប្រសិទ្ធភាព និងគុណភាពអង្ករ។ ទី4.បន្តកិច្ចសហប្រតិបត្តិការល្អរវាងមជ្ឈមណ្ឌលវិទ្យាស្ថានស្រាវជ្រាវពូជស្រូវ និងក្រសួងដោយការបង្កើតក្រុមការងារ និងគណៈកម្មការ។
លោកសាស្ត្រាចារ្យ Qi Shaowu និងតំណាងក្រុមហ៊ុនចិនបានបញ្ជាក់យ៉ាងមុតមាំថា ក្រុមហ៊ុននឹងប្រមូលទិញប្រភេទស្រូវខាងលើទាំងអស់សម្រាប់នាំចេញទៅកាន់ទីផ្សារប្រទេសចិន នៅពេលកសិករកម្ពុជាផលិតបាន៕
