គម្រោងលំនៅឋានមានតម្លៃសមរម្យបែបខុនដូ ដែលទីតាំងក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញបានបើកការដ្ឋាននៅថ្ងៃនេះ ហើយការសាងសង់ដំណាក់កាលទីមួយនឹងបញ្ចប់ក្នុងរយៈពេល 42 ខែខាងមុខ។
លោក អេឡិច យ៉ាស៊ូម៉ូតូ ស្ថាបនិកនៃក្រុមហ៊ុនអារ៉ាខាវ៉ាបានលើកឡើងថា ដោយសង្កេតឃើញថា តម្រូវការលំនៅឋានរបស់ប្រជាពលរដ្ឋនៅក្នុងរាជធានីភ្នំពេញកាន់តែមានកំណើនខ្លាំង ធ្វើឱ្យលោកមានគំនិតផ្ដួចផ្ដើមនាំមកជូនប្រជាជនកម្ពុជានូវលំនៅឋានតម្លៃសមរម្យដែលស្របតាមគោលនយោបាយរបស់រាជរដ្ឋាភិបាលជប៉ុនដែលបានគាំទ្រគោលនយោបាយស្ដីពីលំនៅឋានផងដែរ។ លោកបន្ដថា គម្រោងលំនៅឋានដែលជាអគារខ្ពស់ៗបានរីកដុះដាលច្រើននៅក្នុងរាជធានីភ្នំពេញ ប៉ុន្ដែសុទ្ធតែជាគម្រោងលំនៅឋានដែលមានតម្លៃថ្លៃ ដោយឡែកគម្រោងលំនៅឋានមានតម្លៃសមរម្យផ្ដល់លទ្ធភាពដល់ប្រជាពលរដ្ឋគ្រប់ស្រទាប់អាចទិញបាន គឺប្រហែលទើបតែមានជាលើកទីមួយប៉ុណ្ណោះ។
ស្ថាបនិកនៃក្រុមហ៊ុនអារ៉ាខាវ៉ា បានបង្ហាញពីជំនឿចិត្ដថា៖«ផ្អែកលើការកសាងដោយសំណង់អគារដែលមានគុណភាព និងក្រុមហ៊ុនមិនទទួលយកប្រាក់កក់ពីអតិថិជនមកធ្វើជាទុនវិនិយោគក្នុងការសាងសង់នោះ ខ្ញុំជឿថា យើងនឹងទទួលបានការគាំទ្រពីអតិថិជនយ៉ាងច្រើន ព្រោះអតិថិជនគ្រាន់តែបើកគណនីសន្សំប្រាក់ទុកក៏អាចទិញបានដែរ»។
លំនៅឋានតម្លៃសមរម្យនេះត្រូវបានអភិវឌ្ឍលើផ្ទៃដីទំហំ13,680ម៉ែត្រក្រឡាដែលត្រូវសាងសង់2ដំណាក់កាលដោយដំណាក់កាលដំបូងក្រុមហ៊ុនត្រូវសាងសង់អគារស្នាក់នៅរួមចំនួន10អគារចែកជា5ប្លុក ដោយមួយប្លុកមាន2អគារ និងមានកម្ពស់19ជាន់ ទៅ23ជាន់ និងមានបន្ទប់ប្រមាណ2,000បន្ទប់ និងគ្រោងចំណាយទុនវិនិយោគប្រមាណ70លានដុល្លារ។ ដែលមានបន្ទប់Gពីរប្រភេទ។ ទីមួយប្រភេទស្ទីឌីយោ មានទំហំ23-24ម៉ែត្រការ៉េ និងប្រភេទទីពីរ មាន2បន្ទប់គេង។ ព្រមទាំងមានចំណតជាន់ក្រោមដី 2ជាន់ដែលអាចចតរថយន្ដបាន300គ្រឿង និងជាន់ផ្ទាល់ដីសម្រាប់ចតម៉ូតូ និងកង់។ គម្រោងនេះមានតម្លៃចន្លោះពី2-3ម៉ឺនក្នុងមួយយូនីតដែលតម្លៃនេះក្រុមហ៊ុនកំពុងតែសិក្សាបន្ថែម និងអាចមានការកំណត់តម្លៃជាក់លាក់មួយក្រោយពីសាងសង់បាន6ខែ ក្រោយគិតចាប់ពីពេលនេះ ដែលអារ៉ាខាវ៉ានឹងជូនសម្រាប់អតិថិជនទូទៅទាំងអស់។
ឯកឧត្ដម ជា សុផារ៉ា ទេសរដ្ឋមន្រី្ដ រដ្ឋមន្រីក្រសួងរៀបចំដែនដីនគរូបនីយកម្ម និងសំណង់បានលើកឡើងថា៖« គម្រោងនេះពិតជាល្អ និងមានតម្លៃសមរម្យសម្រាប់ប្រជាជនកម្ពុជា ព្រោះថា ប្រសិនបើលក់ក្នុងតម្លៃថ្លៃដែលប្រជាពលរដ្ឋមិនអាចទទួលយកបាន វាលែងក្លាយជាគម្រោងដែលមានតម្លៃសមរម្យទៀតហើយ»។
ជាមួយគ្នានេះដែរ ឯកឧត្ដមបានអំពាវនាវឱ្យអ្នកវិនិយោគក្នុង និងក្រៅស្រុកទាំងអស់ ពិសេសអ្នកវិនិយោគជប៉ុនបន្ដធ្វើការវិនិយោគនៅកម្ពុជាបន្ថែមលើគម្រោងនានា និងគម្រោងលំនៅឋានតម្លៃសមរម្យ ទោះបីគម្រោងនេះតូចក្ដីធំក្ដី ក្រសួងរៀបចំដែនដី នគរូបនីយកម្ម និងសំណង់ និងចូលរួមគាំទ្រពេញទំហឹង និងជំរុញឱ្យកិច្ចការអភិវឌ្ឍឆ្ពោះទៅមុខយ៉ាងរហ័ស ដើម្បីធ្វើយ៉ាងណាបង្កភាពងាយស្រួលដល់ប្រជាជនកម្ពុជាមានជីវភាពមធ្យម និងក្រោមមធ្យមអាចមានលទ្ធភាពទិញលំនៅឋានរស់នៅបានសមរម្យដូចគេដូចឯង។
គួរបញ្ជាក់ថា គម្រោងលំនៅឋានតម្លៃសមរម្យ របស់ក្រុមហ៊ុន Arakawa ជាគម្រោងទី3ហើយដែលធ្វើការអភិវឌ្ឍ ខណៈគម្រោងទី1 អភិវឌ្ឍដោយក្រុមហ៊ុនរបស់លោកឧកញ៉ា សៀ ឫទ្ធី នៅខាងត្បូងរាជធានីភ្នំពេញ និងគម្រោងទី2 អភិវឌ្ឍដោយក្រុមហ៊ុនលោកឧកញ៉ាប៊ុន ចេស នៅភាគខាងជើងនៃរាជធានី៕
