ការសិក្សានៅមហាវិទ្យាល័យមានលក្ខណៈខុសគ្នាទាំងស្រុងពីការសិក្សានៅថ្នាក់វិទ្យាល័យព្រោះថា ការសិក្សានៅកម្រិតនេះទាមទារឱ្យនិស្សិតមានការស្រាវជ្រាវស្វែងរកការពិសោធជាក់ស្តែង ព្រមទាំងប្រឡូកច្រើនទៅនឹងការងារដើម្បីស្វែងរកឱកាសដើម្បីអនុវត្តឱ្យលើទ្រឹស្តីដែលបានរៀនសូត្រ។
រដ្ឋលេខាធិការក្រសួងអប់រំ យុវជន និងកីឡា ឯកឧត្តមបណ្ឌិត អ៊ឹម កុច បានលើកឡើងថា នាពេលបច្ចុប្បន្ននេះមាននិស្សិតប្រមាណជា2ភាគ3នៅក្នុងតំបន់មួយចំនួនលើពិភពលោកមិនអាចរកការងារធ្វើបាន ឬមិនអាចទទួលបានការងារដែលត្រូវជំនាញបានក្រោយពេលបញ្ចប់ការសិក្សា។ កត្តាទាំងអស់នេះមិនមែនបណ្តាលមកពីការអប់រំនៅតាមសាលា ឬសាកលវិទ្យាល័យដែលមិនមានភាពស៊ីចង្វាក់ជាមួយនឹងទីផ្សារការងារទាំងអស់នោះទេ តែវាបណ្តាលមកពីកត្តាផ្សេងៗទៀត ជាពិសេស គឺកត្តានិស្សិតខ្លួនឯងដែលមិនបានបន្ស៊ាំខ្លួនឯងជាមួយចំនួនដើម្បីស្វែងរកបទពិសោធជាក់ស្តែង។
ឯកឧត្តម អ៊ឹម កុច បានមានប្រសាសន៍ថា៖ «កត្តាមួយចំនួនដែលជំរុញឱ្យសិស្ស-និស្សិតមិនអាចរកការងារធ្វើបាននៅកម្រិតមហាវិទ្យាល័យ គឺមកពីពួកគាត់មិនទាន់មានសមត្ថភាពឆ្លើយតបជាមួយនឹងទីផ្សារការងារមិនសូវយល់ច្បាស់ពីតម្លៃនៃការចូលរួមក្នុងសកម្មភាពស្ម័គ្រចិត្តមិនចាប់អារម្មណ៍ស្វែងយល់ពីការបង្កើតទំនាក់ទំនងល្អ និងយល់មិនបានស៊ីជម្រៅពីការសិក្សានៅមហាវិទ្យាល័យ»។
ឯកឧត្តមរដ្ឋលេខាធិការបានបន្ថែមទៀតថា ដើម្បីទទួលបានការងារ និងអភិវឌ្ឍសមត្ថភាពការងារឱ្យបានល្អក្រោយពេលបញ្ចប់ការសិក្សានៅមហាវិទ្យាល័យ មាតាបិតាទាំងឡាយត្រូវតែផ្តល់ឱកាសឱ្យបានច្រើនសម្រាប់កូនៗ និងចូលរួមអប់រំកូន ដូចជាការលើកទឹកចិត្តកូនឱ្យធ្វើការងារហាត់ការ (Internship) ជាដើម។នាពេលបច្ចុប្បន្ននេះមានក្រុមហ៊ុនជាច្រើនបានបង្កើតឡើងហើយត្រូវការអ្នកធ្វើការស្ម័គ្រចិត្តដើម្បីហាត់ការដូចជាតាមហាងកាហ្វេ និងតាមក្រុមហ៊ុនក្នុងវិស័យផ្សេងៗជាច្រើនទៀត។ ការធ្វើការហាត់ការ គឺជាការងារដែលផ្តល់បទពិសោធច្រើនលើផ្នែកការងារទំនាក់ទំនង និងធ្វើឱ្យមានភាពចាស់ទុំ។ ជាទូទៅការសិក្សានៅមហាវិទ្យាល័យគឺ មានប្រហែលជាជាង30%តែប៉ុណ្ណោះសម្រាប់ទទួលបានការងារធ្វើ ហេតុនេះនិស្សិតត្រូវស្វះស្វែងដោយខ្លួនឯងក្នុងពិភពខាងក្រៅដើម្បីរៀន ហើយអភិវឌ្ឍខ្លួនដើម្បីឱ្យឆ្លើយតបជាមួយនឹងទីផ្សារការងារ។ បន្ទាប់ពីមានចំណេះដឹងពីមហាវិទ្យាល័យមានបទពិសោធជាក់ស្តែង និងមានទំនាក់ទំនងល្អហើយ ពួកគេនឹងទទួលបានការងារល្អធ្វើក្រោយពេលបញ្ចប់ការសិក្សា។
អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្តម អ៊ាង សុផ្លែត បានលើកឡើងថា ការសិក្សានៅកម្រិតមហាវិទ្យាល័យមានលក្ខណៈខុសគ្នាទាំងស្រុងពីការសិក្សានៅកម្រិតមធ្យមសិក្សាដែលគ្រាន់តែទន្ទេញឱ្យចាំតែទ្រឹស្តី ឬគ្រាន់តែរៀនដើម្បីតែប្រឡងជាប់។ ការសិក្សានៅកម្រិតមហាវិទ្យាល័យ ទាមទារឱ្យមានភាពប្រាកដនិយម មានការស្រាវជ្រាវត្រឹមត្រូវ និងសកម្មក្នុងការអនុវត្តដើម្បីច្បាស់ថា ពួកគេយល់ច្បាស់ពីមេរៀនដែលបានរៀន ហើយធានាថា ពួកគេមានលទ្ធភាពធ្វើការក្រោយបញ្ចប់ការសិក្សា៕