នាយុគសម័យថ្មីនេះ បច្ចេកវិទ្យាព័ត៌មានគឺជាផ្នែកដ៏សំខាន់បំផុតមួយដែលមិនអាចខ្វះបានសម្រាប់គ្រប់ចង្វាក់ផលិតកម្ម និងសកម្មភាពការងារនៅក្នុងសង្គម។ ការងារដែលធ្លាប់ប្រើប្រាស់មនុស្សច្រើននាក់ត្រូវបានជំនួសដោយម៉ាស៊ីនដែលគ្រប់គ្រងដោយមនុស្សតិចនាក់បំផុត ហើយជាចរន្តទៅថ្ងៃអនាគតអ្នកដែលចេះប្រើម៉ាស៊ីន ឬបច្ចេកវិទ្យា ទើបអាចដណ្តើមបានការងារល្អៗធ្វើនៅក្នុងទីផ្សារការងារទាំងជាតិ និងអន្តរជាតិ។
ឆ្លើយតបនឹងបញ្ហានេះដែរ រដ្ឋលេខាធិការនៃក្រសួងការងារ និងបណ្តុះបណ្តាលវិជ្ជាជីវៈឯកឧត្តម ពេជ សោភ័ន បានលើកឡើងថា ក្រុមហ៊ុន ឬសហគ្រាសនៅកម្ពុជាត្រូវតែកែប្រែទម្រង់ឱ្យបានឆាប់រហ័សដើម្បីឱ្យសេដ្ឋកិច្ចមានការកែប្រែរចនាសម្ព័ន្ធ និងរក្សាបាននូវការប្រកួតប្រជែងរបស់ខ្លួនតាមរយៈការប្រើប្រាស់បច្ចេកវិទ្យា និងបន្តធ្វើការបង្កើតថ្មីប្រកបដោយភាពច្នៃប្រឌិត។ ឯកឧត្តមរដ្ឋលេខាធិការបានលើកឡើងផងដែរថា ដើម្បីឱ្យក្រុមហ៊ុនសហគ្រាសកែប្រែទម្រង់នេះបាន ធនធានមនុស្សរបស់ខ្លួនក៏ត្រូវតែធ្វើការកែទម្រង់ដែរ។ ក្រុមហ៊ុនត្រូវបង្កើតជំនាញ និងបណ្តុះបណ្តាលជំនាញបន្ថែមដើម្បីឆ្លើយតបទៅនឹងសេដ្ឋកិច្ច និងការកែប្រែរចនាសម្ព័ន្ធ។
ពាក់ព័ន្ធនឹងបញ្ហានេះដែរ ឯកឧត្តម ពេជ សោភ័ន បានជំរុញឱ្យសហគ្រាសត្រូវតែធ្វើការវិនិយោគលើការបណ្តុះបណ្តាលជំនាញដើម្បីអភិវឌ្ឍធនធានមនុស្សរបស់ខ្លួនដើម្បីចាប់យកបច្ចេកវិទ្យាថ្មីមកប្រើប្រាស់ប្រកបដោយប្រសិទ្ធភាព មុននឹងឈានទៅដល់ការពង្រីកខ្លួនទៅក្នុងទីផ្សារសម័យថ្មីនេះបាន។
ពាក់ព័ន្ធនឹងបញ្ហានេះ លោកស្រី អេង សុភាព សមាជិកាក្រុមប្រឹក្សាភិបាលសហព័ន្ធនិយោជក និងសមាគមពាណិជ្ជកម្មកម្ពុជាបានលើកឡើងថា ការលើកឡើងនូវប្រធានបទពាក់ព័ន្ធនឹងធនធានមនុស្សនេះក្នុងគោលដៅ គឺធ្វើយ៉ាងណាឱ្យការគ្រប់គ្រង និងការបណ្ដុះបណ្ដាលធនធានមនុស្សនៅតាមក្រុមហ៊ុន រោងចក្រ សហគ្រាសទាំងអស់ដំណើរការស្របទៅនឹងការរីកចម្រើនផ្នែកបច្ចេកវិទ្យាឌីជីថល។
លោកស្រីបានបន្ដថា ការរៀបចំ និងផ្លាស់ប្ដូរប្រព័ន្ធគ្រប់គ្រងធនធានមនុស្សបែបឌីជីថលនេះនឹងកាត់បន្ថយ
ពេលវេលាបានលឿនរហ័ស និងអាចដឹងព័ត៌មានបានភ្លាមៗក្នុងការតាមដានសកម្មភាពការងារបុគ្គលិក ការធ្វើរបាយការណ៍ និងការគ្រប់គ្រងប្រកបដោយគុណភាព និងប្រសិទ្ធភាពខ្លាំងជាងមុន៕
