ភ្នំពេញ – នៅថ្ងៃទី11 ខែកញ្ញាខាងមុខនេះ មន្ដ្រីជំនាញក្រសួងការងារ និងបណ្ដុះបណ្ដាលវិជ្ជាជីវៈ និងស្ថាប័នពាក់ព័ន្ធទាំងអស់នឹងចេញដំណើរទៅប្រទេសថៃ ដើម្បីចាប់ផ្ដើមយុទ្ធនាការ100ថ្ងៃក្នុងការធ្វើលិខិតឆ្លងដែនជូនប្រជាពលរដ្ឋកម្ពុជាដែលបម្រើការងារនៅក្នុងប្រទេសថៃដែលពុំទាន់បានបំពេញលក្ខខណ្ឌស្របច្បាប់នៅតាមរោងចក្រចំនួន 200កន្លែង។
ឯកឧត្ដម អ៊ិត សំហេង រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈមានប្រសាសន៍ថាយុទ្ធនាការ100ថ្ងៃនេះត្រូវបានអនុវត្ដតាំងពីថ្ងៃ1 ខែសីហា ឆ្នាំ2017មកម្ល៉េះ ហើយនឹងត្រូវដាក់បន្ថែមក្រុមចល័ត4ក្រុមបន្ថែមទៀតចុះទៅធ្វើការដល់រោងចក្រចំនួន200កន្លែងដែលមានការប្រើប្រាស់ពលករខ្មែរលើសពី70នាក់។
ក្រសួងការងារ និងបណ្ដុះបណ្ដាលវិជ្ជាជីវៈនឹងដំណើរការការធ្វើលិខិតឆ្លងដែនជូនប្រជាពលករខ្មែរនៅក្នុងប្រទេសថៃដោយផ្ទាល់ដោយពុំចាំបាច់ចំណាយពេលវេលាធ្វើដំណើរមកធ្វើលិខិតឆ្លងដែននៅព្រំដែននៃព្រះរាជាណាចក្រកម្ពុជានោះទេ។ ការធ្វើលិខិតឆ្លងដែននេះគឺធ្វើតែមួយថ្ងៃនឹងទទួលបានលិខិតឆ្លងដែរតែម្តងជាមួយនឹងតម្លៃ2350បាត និងគ្រោងធ្វើឱ្យបាន500នាក់ក្នុងមួយថ្ងៃ។ យុទ្ធនាការនោះមន្ដ្រីចល័តរបស់ក្រសួងការងារ និងបណ្ដុះបណ្ដាលវិជ្ជាជីវៈនឹងផ្ដល់ជូននូវលិខិតឆ្លងដែន លិខិតធ្វើដំណើរ ព្រមទាំងប័ណ្ណ COWC។
រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ បានបញ្ជាក់ទៀតថា ប្រសិនបើយុទ្ធនាការ100ថ្ងៃផ្ដល់ភាពស្របច្បាប់ជូនពលករខ្មែរដែលធ្វើជាមួយរាជរដ្ឋាភិបាលថៃបញ្ចប់ទៅប្រកបដោយជោគជ័យនោះ កម្ពុជានឹងពិចារណាថា នឹងបន្ដយុទ្ធនាការផ្ដល់ភាពស្របច្បាប់សម្រាប់ពលករខ្មែរទៅធ្វើការនៅប្រទេសម៉ាឡេស៊ីបន្ដទៀត។
គួររំឭកថា មានប្រជាពលរដ្ឋខ្មែរកំពុងតែបម្រើការងារនៅក្នុងប្រទេសថៃក្នុងរង្វង់1លាន 5ម៉ឺននាក់ ក្នុងនោះមានប្រមាណតែជាង70ម៉ឺននាក់ប៉ុណ្ណោះជាពលករស្របច្បាប់ ចំណែកជាង30ម៉ឺននាក់ទៀតពុំទាន់មានភាពស្របច្បាប់នៅឡើយទេ។ ដូច្នេះទើបរាជរដ្ឋាភិបាលដែលមានក្រសួងការងារ និងបណ្ដុះបណ្ដាលវិជ្ជាជីវៈជាសេនាធិការសម្រេចធ្វើកិច្ចការនេះឡើងដើម្បីជួយសម្រួលដល់ប្រជាពលករខ្មែរដែលពុំមានពេលវេលាគ្រប់គ្រាន់ក្នុងការធ្វើលិខិតឆ្លងដែន និងពុំទាន់បំពេញបែបបទស្របច្បាប់ក្នុងការបម្រើការងារនៅប្រទេសថៃ។
យុទ្ធនាការនេះត្រូវបានដាក់ចេញបន្ទាប់ពីភាគីថៃប្រកាសថា នឹងរឹតបន្ដឹងផ្នែកច្បាប់ដោយដាក់ទោសធ្ងន់ធ្ងរទៅលើពលករបរទេសទាំងឡាយណាដែលទៅធ្វើការនៅប្រទេសខ្លួនដោយមិនស្របច្បាប់ ពិសេសទៅលើថៅកែជនជាតិថៃណានៅតែបន្ដទទួលយកកម្មករមកធ្វើការងារដោយខុសច្បាប់។ ទោះជាយ៉ាងណាភាគីថៃក៏បានពន្យារពេលការអនុវត្ដច្បាប់រឹតបន្ដឹងនេះរហូតដល់6ខែ ដើម្បីទុកលទ្ធភាពឱ្យពលករកម្ពុជាអាចបំពេញលក្ខខណ្ឌឱ្យស្របច្បាប់៕
