តារាសម្ដែងល្បីៗជាច្រើននៅក្នុងពិភពសិល្បៈ បានបង្ហាញខ្លួននៅលើទីលានបាល់ទាត់នៅពហុកីឡាដ្ឋានវេស្ទើន ដើម្បីចូលរួមប្រកួតជាលើកទី12 ក្នុងនាមជាក្រុមបាល់ទាត់មហាហង្ស ប៉ះគ្នាជាមួយក្រុមបាត់ទាល់ Online។
ឆ្លងកាត់ការប្រកួតរយៈពេលពីរតង់ ក្រុមបាល់ទាត់ដែលចម្រុះដោយតារាសិល្បៈល្បីៗស្ទើរតែទទួលបានជោគជ័យទៀតហើយលើក្រុមគូប្រកួតក្នុងលទ្ធផលដ៏អស្ចារ្យគឺ 7 ទល់ 2។ លោកអ៊ិន សុភិន ជាប្រធានក្រុមបានអះអាងថា សម្រាប់ការប្រកួតដែលបានធ្វើឡើងកាលពីយប់ម្សិលមិញគឺជាប្រកួតលើកទី12របស់ក្រុមមហាហង្ស ហើយក៏ជាជ័យជម្នះលើកទី1របស់ក្រុមខ្លួនផង ចាប់តាំងពីក្រុមដែលចម្រុះតារាសិល្បៈមួយនេះត្រូវបានបង្កើតឡើង។
លោកបន្ដថាការប្រកួតលើកនេះ គឺជាការប៉ះគ្នាជាមួយក្រុមបាល់ទាត់ Online ដោយក្រុមរបស់លោករកបានគ្រាប់បាល់រហូតដល់7គ្រាប់ឯណោះ សម្រាប់ការប្រកួត 90នាទីនៅលើទីលាន។ យ៉ាងណាមិញ លោកក៏សរសេរដៃគូរប្រកួតរបស់ខ្លួនថា មិនមែនជាក្រុមខ្សោយនោះទេ ប៉ុន្តែមកពីក្រុមតារាសិល្បៈដែលជាសមាជិករបស់ក្រុមមហាហង្សកាន់តែមានទម្រង់លេងល្អ ទើបមានលទ្ធផលជាវិជ្ជមានដូចនេះ។
ចាងហ្វាងផលិតកម្មរូបនេះ បានសារភាពថា ក្នុងក្រុមរបស់លោកតារាសិល្បៈចូលរួមប្រកួត មានរបួសក្រោយបញ្ចប់ការប្រកួត តែមិនមានបញ្ហាធ្ងន់ធ្ងរណាមួយទេ គឺគ្រាន់តែមានបញ្ហារបួសជើងតិចតួចម្នាក់ៗប៉ុណ្ណោះ លើកលែងតែលោក ភឹម តារាវិបុល ដែលមានរបួសជើងធ្ងន់ជាងគេក្រោយការប៉ះទង្គិចនៅលើទីលាន។
សមាសភាពតារាៗបានបង្ហាញខ្លួនចូលប្រកួតក្នុងទីលាននាល្ងាចនោះរួមមាន តារាកំប្លែងនាយចឺម លោកហេង នរៈកក្កដា លោកជា សុវណ្ណនរាហ៍ លោកលឹម ជាឡាយ លោកភឹម តារាវិបុល លោកអូន ឧស្សាហ៍ លោកហូ ប៉ូសេង (សេង នរៈមង្គល) លោកឈុន សុវណ្ណភក្ដី តារាសម្ដែងប្រចាំផលិតកម្ម BKS លោកប៉ែន តុលា និងតារាសម្ដែងថ្មីៗជាច្រើនរូបទៀត។ ក្នុងនោះតារាសិល្បៈដែលបង្ហាញខ្លួនទៅលើកទឹកចិត្តដោយផ្ទាល់ក៏មានសុទ្ធសឹងតែវត្តមានតារាល្បីៗផងដែរ ដូចជាលោកហម ឈរ៉ា កញ្ញាសឿន ផាភួង អ្នកនាងភិន សុដាលីស កញ្ញាថន លក្ខិណា និងតារាសម្ដែងជាច្រើនរូបទៀត ដែលភាគច្រើនគឺជាតារាសម្ដែងប្រចាំផលិតកម្មមហាហង្ស និង BKS៕
